یسوع وانگوں جوش نال مُنادی کرو

1.‏ کیہڑی خوبی یہوواہ دے بندیاں نُوں اوہناں لوکاں توں فرق بناندی اے جیہڑے مسیحی ہون دا دعویٰ کردے نیں؟‏

یہوواہ دے بندے بڑے جوش نال مُنادی کردے نیں۔ ایہہ خوبی اوہناں نُوں اوہناں لوکاں توں فرق بناندی اے جیہڑے مسیحی ہون دا دعویٰ کردے نیں۔ (‏طِطُس 2:‏14‏)‏ پر کدی کدار شاید توانوں لگے کہ مُنادی لئی تواڈا جوش پہلے ورگا نئیں رہیا۔ شاید تُسی وی اِک کلیسیا دے محنتی بزرگ وانگوں محسوس کرو جنہے کہیا:‏ ”‏کدی کدار میرا مُنادی کرن نُوں بالکل دل نئیں کردا۔“‏

2.‏ کدی کدار مُنادی لئی اپنے جوش نُوں قائم رکھنا مشکل کیوں ہو سکدا اے؟‏

² شاید سانوں مُنادی کرن توں زیادہ دُوجے طریقیاں نال یہوواہ دی خدمت کرنا پسند ہوئے۔ ایہدی کیہہ وجہ ہو سکدی اے؟ جدوں اَسی اپنیاں عبادت‌گاہواں دی تعمیر یاں مرمت دے کم چ حصہ لینے آں، آفتاں دے دوران اپنے بھین بھراواں دی مدد کرنے آں یاں کسے ہور طریقے نال اوہناں دا حوصلہ ودھانے آں تے سانوں فوراً ای ایہدے چنگے نتیجے نظر آ جاندے نیں تے سانوں بڑی خوشی مِلدی اے۔ ایہدے علاوہ جدوں اَسی اپنے بھین بھراواں نال مِل کے کم کرنے آں تے اَسی صلح نال رہنے آں تے ماحول بڑا اچھا ہوندا اے۔ سانوں ایہہ وی پتہ ہوندا اے کہ اَسی اپنے بھین بھراواں لئی جو کجھ کرنے آں، اوہ ایہدی بڑی قدر کردے نیں۔ پر جے مُنادی دی گل کیتی جائے تے شاید اَسی کئی سالاں توں اِک ای علاقے چ مُنادی کر رہے آں تے گھٹ ای لوک ساڈا پیغام سُن دے نیں یاں فیر کجھ لوک تے ایہنوں سُننا ای نئیں چاہندے۔ اَسی ایہہ وی جاننے آں کہ جیویں جیویں ایس دُنیا دا خاتمہ نیڑے آ رہیا اے، ساڈے کم دی ہور زیادہ مخالفت ہوئے گی۔ (‏متی 10:‏22‏)‏ کیہڑی چیز ساڈی مدد کر سکدی اے تاکہ مُنادی لئی ساڈا جوش قائم رہوے؟‏

3.‏ اِنجیر دے درخت والی مثال توں اَسی مُنادی لئی یسوع دے جوش بارے کیہہ سکھنے آں؟ (‏لُوقا 13:‏6-‏9‏)‏

³ جدوں یسوع زمین تے سی تے اوہنے کدی وی مُنادی لئی اپنے جوش نُوں گھٹ نئیں ہون دِتا۔ وقت دے نال نال اوہ ہور وی زیادہ جوش نال مُنادی کرن لگ پیا۔ آؤ اوہدی دَسی ہوئی اِک مثال تے غور کرنے آں جدے توں اَسی ویکھ سکاں گے کہ اَسی مُنادی لئی اپنے جوش نُوں کیویں قائم رکھ سکنے آں۔ ‏(‏لُوقا 13:‏6-‏9 نُوں پڑھو۔)‏ اوہنے دَسیا کہ اِک بندے نے اپنے انگوراں دے باغ چ اِنجیر دا درخت لایا سی۔ اوہنے تِن سال تک اوہدی دیکھ بھال کیتی پر اوہدے چ کوئی پھل نہ لگیا۔ ایسے طرحاں یسوع تقریباً تِن سال تک یہودیاں چ مُنادی کردا رہیا۔ پر اوہناں وچوں زیادہ‌تر نے اوہدے پیغام نُوں قبول نئیں کیتا۔ پر جیویں اوس بندے نے ایہہ اُمید نئیں چھڈی کہ اوہنوں اِک نہ اِک دن اِنجیر دے درخت توں پھل مِل جائے گا، ایسے طرحاں یسوع نے وی اُمید نئیں چھڈی تے نہ ای مُنادی دے کم چ اپنا جوش ٹھنڈا ہون دِتا۔ ایہدی بجائے اوہنے لوکاں دے دل تک پونچن لئی ہور وی زیادہ کوشش کیتی۔‏

4.‏ اَسی کیہڑیاں چار گلاں تے غور کراں گے جیہڑیاں اَسی جوش نال مُنادی کرن بارے یسوع کولوں سکھ سکنے آں؟‏

⁴ ایس مضمون چ اَسی ویکھاں گے کہ یسوع نے مُنادی لئی جوش کیویں وکھایا، خاص طور تے اپنی زندگی دے آخری چھ مہینیاں چ۔ (‏لُوقا 10:‏1‏)‏ جے اَسی یسوع دِیاں سکھائیاں ہوئیاں گلاں تے عمل کراں گے تے اوہ کم کراں گے جیہڑے اوہنے کیتے تے اِنج مُنادی لئی اَسی اپنا جوش قائم رکھ سکاں گے۔ آؤ چار ایہو جہیاں گلاں تے غور کرئیے جیہڑیاں اَسی یسوع کولوں سکھ سکنے آں:‏ (‏1)‏اوہنے اپنا دھیان یہوواہ دی مرضی تے رکھیا، (‏2)‏اوہنے بائبل دِیاں پیشین‌گوئیاں تے دھیان دِتا، (‏3)‏اوہنے مدد لئی یہوواہ تے بھروسا کیتا تے (‏4)‏اوہنے ایس گل دی اُمید کدی نئیں چھڈی کہ کجھ لوک اوہدے پیغام نُوں ضرور قبول کرن گے۔‏

اوہنے اپنا دھیان یہوواہ دی مرضی تے رکھیا

5.‏ یسوع نے ایہہ کیویں ظاہر کیتا کہ اوہدا دھیان ایس گل تے سی کہ یہوواہ اوہدے کولوں کیہہ چاہندا اے؟‏

⁵ یسوع نے جوش نال ”‏بادشاہی دی خوش‌خبری“‏ سُنائی کیونکہ اوہ جان دا سی کہ یہوواہ چاہندا اے کہ اوہ ایہہ کم کرے۔ (‏لُوقا 4:‏43‏)‏ اوہدی نظر چ خوش‌خبری سُنان دا کم سب توں اہم سی۔ جدوں زمین تے یسوع دی زندگی دے کجھ ای مہینے رہ گئے سن تے اوہدوں وی اوہ شہراں تے پنڈاں چ جا کے لوکاں نُوں تلیم دیندا رہیا۔ (‏لُوقا 13:‏22‏)‏ ایہدے علاوہ اوہنے اپنے ہور زیادہ شاگرداں نُوں مُنادی کرن دی تربیت دِتی۔—‏لُوقا 10:‏1‏۔‏

6.‏ یہوواہ دی خدمت چ جیہڑیاں ذمے‌داریاں ساڈے کول نیں، اوہناں دا مُنادی نال کیہہ تعلق اے؟ (‏تصویر نُوں وی ویکھو۔)‏

⁶ یہوواہ تے یسوع ساڈے کولوں چاہندے نیں کہ اَسی مُنادی دا کم کرئیے۔ اَج وی ایہہ کم سب توں اہم اے۔ (‏متی 24:‏14؛‏ 28:‏19، 20‏)‏ اَسی یہوواہ دی خدمت چ جیہڑا وی کم کرنے آں، اوہدا تعلق مُنادی دے کم نال ہوندا اے۔ مثال لئی، اَسی اپنیاں عبادت‌گاہواں بنانے آں تاکہ اوتھے ایہو جہے لوک عبادت لئی آ سکن جنہاں نُوں اَسی خوش‌خبری سُنانے آں۔ ایہدے علاوہ بیت‌ایل چ جیہڑا کم کیتا جاندا اے، اوہدے ذریعے مُنادی دے کم نُوں ودھان چ مدد مِلدی اے۔ نالے اِمدادی کمیٹیاں آفت توں متاثر ہون والے بھین بھراواں دی مدد ایس لئی کردیاں نیں تاکہ اوہ فیر توں یہوواہ دی خدمت کر سکن جدے چ مُنادی دا کم وی شامل اے۔ جدوں اَسی مُنادی کرن دی اہمیت نُوں سمجھ جانے آں تے ایہہ یاد رکھنے آں کہ ایہہ اوہ اہم کم اے جیہڑا یہوواہ ساڈے کولوں چاہندا اے تے ساڈے دل چ ایہہ خواہش ودھدی اے کہ اَسی باقاعدگی نال ایہدے چ حصہ لئیے۔ ذرا ہنگری چ رہن والے اِک بزرگ دی مثال تے غور کرو جدا ناں یانوش اے۔ اوہنے کہیا:‏ ”‏مَیں اکثر اپنے آپ نُوں یاد دَوانا واں کہ یہوواہ دی خدمت چ کیتا جان والا کوئی وی کم مُنادی دی جگہ نئیں لے سکدا کیونکہ دُوجیاں نُوں خوش‌خبری سُنانا ساڈی سب توں اہم ذمے داری اے۔“‏

7.‏ یہوواہ کیوں چاہندا اے کہ اَسی مُنادی کردے رہیے؟ (‏1-‏تیمُتھیُس 2:‏3، 4‏)‏

⁷ جدوں اَسی لوکاں نُوں یہوواہ دی نظر نال ویکھاں گے تے مُنادی لئی ساڈا جوش ودھے گا۔ یہوواہ چاہندا اے کہ زیادہ توں زیادہ لوک بادشاہی دی خوش‌خبری نُوں سُنن تے سچائی بارے علم حاصل کرن۔ ‏(‏1-‏تیمُتھیُس 2:‏3، 4 نُوں پڑھو۔)‏ بادشاہی دے پیغام توں لوکاں دِیاں زندگیاں بچ سکدیاں نیں۔ ایس لئی ایس کم نُوں ہور چنگی طرحاں کرن لئی یہوواہ ساڈی تربیت کر رہیا اے۔ مثال لئی، کتاب ”‏پیار وکھاؤ، شاگرد بناؤ“‏ چ سانوں ایہو جہے مشورے دِتے گئے نیں جنہاں دی مدد نال اَسی لوکاں نال اِنج گل بات شروع کر سکنے آں تاکہ اوہ مسیح دے شاگرد بن سکن۔ جے لوک اَج ساڈے پیغام نُوں قبول نئیں وی کردے تے وڈی مصیبت دے ختم ہون توں پہلاں اوہناں کول ایہنوں قبول کرن دا موقع ہوئے گا۔ ہو سکدا اے کہ مستقبل چ اوہناں نُوں اوہ گلاں یاد آن جیہڑیاں اَج اَسی اوہناں نُوں دَس رہے آں۔ تے ایہدی وجہ توں ہو سکدا اے کہ اوہناں دے دل چ یہوواہ دی عبادت کرن دی خواہش پیدا ہوئے۔ پر ایہہ اوہدوں ای ہو سکے گا جدوں اَسی مُنادی کردے رہواں گے۔‏

اوہنے پیشین‌گوئیاں تے دھیان دِتا

8.‏ پاک کلام دِیاں پیشین‌گوئیاں تے دھیان دین دی وجہ توں یسوع نے اپنے وقت نُوں کیویں استمال کیتا؟‏

⁸ یسوع جان دا سی کہ پاک کلام چ اوہدے بارے جیہڑیاں پیشین‌گوئیاں لکھیاں نیں، اوہ کیویں پوریاں ہون گیاں۔ اوہ ایہہ وی جان دا سی کہ زمین تے اوہدی خدمت صرف ساڈھے تِن سال تک رہوے گی۔ (‏دانی‌ایل 9:‏26، 27)‏ ایہدے علاوہ اوہنوں اوہناں پیشین‌گوئیاں بارے وی پتہ سی جنہاں چ دَسیا گیا سی کہ اوہنوں کدوں تے کیویں موت دا سامنا کرنا پووے گا۔ (‏لُوقا 18:‏31-‏34‏)‏ یسوع پاک کلام دِیاں پیشین‌گوئیاں نُوں سمجھدا سی ایس لئی اوہنے اپنے وقت نُوں چنگی طرحاں استمال کیتا۔ اوہنے جوش نال مُنادی کیتی تاکہ اوہ اوس کم نُوں پورا کر سکے جیہڑا اوہنوں دِتا گیا سی۔‏

9.‏ بائبل دِیاں پیشین‌گوئیاں تے دھیان دین دی وجہ توں ساڈے دل چ جوش نال مُنادی کرن دی خواہش کیویں پیدا ہوندی اے؟‏

⁹ جے اَسی بائبل دِیاں اوہناں پیشین‌گوئیاں تے غور کراں گے جیہڑیاں ساڈے زمانے چ پوریاں ہو رہیاں نیں یاں جیہڑیاں پوریاں ہون والیاں نیں تے ساڈے دل چ جوش نال مُنادی کرن دی خواہش ودھے گی۔ اَسی جاننے آں کہ ایس دُنیا دے خاتمے چ بوہت تھوڑا وقت رہ گیا اے۔ اَسی اپنے آلے دَوالے جیہڑے واقعے ہوندے ویکھ رہے آں تے لوک جیس طرحاں دا رویہ ظاہر کر رہے نیں، اوہ ایس گل دا ثبوت اے کہ بائبل دِیاں پیشین‌گوئیاں دے مطابق اَسی آخری زمانے چ رہ رہے آں۔ اَسی ایہہ وی جاننے آں کہ برطانیہ تے امریکہ دی عالمی طاقت دی روس تے اوہدے ساتھی مُلکاں نال دُشمنی چل رہی اے۔ ایس دُشمنی دی وجہ توں بائبل دی اوہ پیشین‌گوئی پوری ہو رہی اے جیہڑی آخری زمانے چ شمال دے بادشاہ تے جنوب دے بادشاہ بارے سی۔ (‏دانی‌ایل 11:‏40)‏ اَسی ایہہ گل وی سمجھ گئے آں کہ برطانیہ تے امریکہ دی عالمی طاقت اوس مورت دے پیراں وَل اشارہ کردی اے جدا ذکر دانی‌ایل 2:‏43-‏45 چ ہویا اے۔ بائبل دِیاں پیشین‌گوئیاں دا مطالعیا کرن نال سانوں ایس گل دا پکا یقین ہو گیا اے کہ بوہت چھیتی خدا دی بادشاہی انسانی حکومتاں نُوں ختم کر دَوے گی۔ ایہناں ساریاں پیشین‌گوئیاں توں ثابت ہوندا اے کہ خاتمہ بوہت نیڑے وے۔ ایس لئی ہُن اپنے وقت دا بہترین استمال کرنا تے جوش نال مُنادی کرنا بوہت ضروری اے۔‏

10.‏ بائبل چ لکھیاں پیشین‌گوئیاں ہور کیہڑے طریقے نال ساڈے جوش نُوں ودھاندیاں نیں؟‏

¹⁰ بائبل دِیاں پیشین‌گوئیاں چ سانوں ایہو جیہا پیغام وی مِلدا اے جیہڑا اَسی بڑی خوشی نال دُوجیاں نُوں دَسنا چاہنے آں۔ ایس بارے ذرا ڈومینیکن ریپبلک چ رہن والی بھین کیری دی مثال تے غور کرو۔ اوہنے کہیا:‏ ”‏جدوں مَیں سوچنی آں کہ مستقبل چ یہوواہ کِنّے شاندار کم کرے گا تے میرا دل کردا اے کہ مَیں ایہناں بارے دُوجیاں نُوں وی دَساں۔ جدوں مَیں ویکھنی آں کہ لوکاں نُوں کِنّیاں مشکلاں دا سامنا کرنا پے رہیا اے تے مینوں محسوس ہوندا اے کہ اوہناں نُوں وی یہوواہ دے شاندار وعدیاں بارے جانن دی لوڑ اے۔“‏ بائبل دِیاں پیشین‌گوئیاں توں سانوں ایہہ وی پتہ چلدا اے کہ یہوواہ مُنادی دے کم چ ساڈی مدد کر رہیا اے۔ اِنج اَسی ہمت ہارے بغیر ایس کم نُوں کردے رہنے آں۔ ایہدے بارے ہنگری چ رہن والی بھین لائلہ نے کہیا:‏ ”‏یسعیاہ 11:‏6-‏9 چ لکھی گل توں میرے اندر اوہناں لوکاں نُوں وی خوش‌خبری سُنان دی خواہش پیدا ہوندی اے جنہاں بارے لگدا اے کہ اوہ ایہنوں قبول نئیں کرن گے۔ پر مینوں پتہ اے کہ یہوواہ دی مدد نال کوئی وی انسان بدل سکدا اے۔“‏ زمبیا چ رہن والے بھرا کرسٹوفر نے کہیا:‏ ”‏مرقس 13:‏10 چ ایہہ پیشین‌گوئی کیتی گئی اے کہ خوش‌خبری دی مُنادی پوری دُنیا چ ہوئے گی۔ ایہہ میرے لئی بڑے اعزاز دی گل اے کہ مَیں ایس پیشین‌گوئی دے پورے ہون چ حصہ لے رہیا واں۔“‏ بائبل دِیاں کیہڑیاں پیشین‌گوئیاں دی وجہ توں تواڈے اندر مُنادی کرن دا جذبہ پیدا ہوندا اے؟‏

اوہنے مدد لئی یہوواہ تے بھروسا کیتا

11.‏ یسوع نُوں جوش نال مُنادی کرن لئی یہوواہ تے بھروسا کرن دی لوڑ کیوں سی؟ (‏لُوقا 12:‏49،‏ 53‏)‏

¹¹ یسوع نُوں بھروسا سی کہ یہوواہ جوش نال مُنادی کرن چ اوہدی مدد کرے گا۔ بھانویں کہ یسوع مُنادی کردے ویلے لوکاں نال بڑی عزت نال گل کردا سی پر فیر وی اوہنوں پتہ سی کہ بادشاہی دا پیغام سُن کے کجھ لوک غصے چ آ جان گے تے اوہدی مخالفت کرن گے‏۔ (‏لُوقا 12:‏49،‏ 53 نُوں پڑھو۔)‏ مذہبی رہنماواں نُوں تے یسوع دا پیغام ایناں چبھ دا سی کہ اوہناں نے کئی وار یسوع نُوں جانوں مارن دی کوشش کیتی۔ (‏یوحنا 8:‏59؛‏ 10:‏31،‏ 39‏)‏ پر یسوع فیر وی مُنادی کردا رہیا کیونکہ اوہنوں پتہ سی کہ یہوواہ اوہدے نال اے۔ اوہنے کہیا:‏ ”‏مَیں کلّا نئیں سگوں میرا باپ میرے نال اے جنہے مینوں گھلیا اے۔ .‏ .‏ .‏ اوہنے مینوں کلّا نئیں چھڈیا کیونکہ مَیں ہمیشاں اوہی کم کرنا واں جنہاں توں اوہ خوش ہوندا اے۔“‏—‏یوحنا 8:‏16،‏ 29‏۔‏

12.‏ یسوع نے اپنے شاگرداں نُوں کیویں تیار کیتا تاکہ اوہ مخالفت دے باوجود مُنادی کردے رہن؟‏

¹² یسوع مسیح نے اپنے شاگرداں نُوں وی ایہہ گل یاد دَوائی کہ اوہ مدد لئی یہوواہ تے بھروسا کرن۔ اوہنے وار وار اوہناں نُوں ایس گل دا یقین دَوایا کہ یہوواہ اوس ویلے وی اوہناں دی مدد کرے گا جدوں اوہناں تے ظلم کیتا جائے گا۔ (‏متی 10:‏18-‏20؛‏ لُوقا 12:‏11، 12‏)‏ یسوع جان دا سی کہ بادشاہی دا پیغام سُنان دی وجہ توں اوہدے شاگرداں دی مخالفت کیتی جائے گی۔ (‏متی 10:‏16؛‏ لُوقا 10:‏3‏)‏ ایس لئی اوہنے اپنے شاگرداں نُوں ہوشیار رہن دی نصیحت کیتی۔ اوہنے اوہناں نُوں ایہہ ہدیت وی دِتی کہ اوہ اوہناں لوکاں نُوں خوش‌خبری دا پیغام سُنن تے مجبور نہ کرن جیہڑے ایہنوں قبول نئیں کرنا چاہندے۔ (‏لُوقا 10:‏10، 11‏)‏ یسوع نے اوہناں نُوں ایہہ وی کہیا کہ جے اوہناں تے اِک شہر تے ظلم کیتا جاندا اے تے اوہ دُوجے شہر بھج جان۔ (‏متی 10:‏23‏)‏ بھانویں کہ یسوع بڑے جوش نال مُنادی کردا سی تے یہوواہ تے بھروسا رکھدا سی پر فیر وی اوہنے اپنے آپ نُوں جان بجھ کے خطرے چ نئیں پایا۔—‏یوحنا 11:‏53، 54‏۔‏

13.‏ تُسی ایس گل دا یقین کیوں رکھ سکدے او کہ یہوواہ مُنادی کرن چ تواڈی مدد کرے گا؟‏

¹³ اَج بوہت سارے لوک ساڈے پیغام دی مخالفت کردے نیں۔ ایس لئی سانوں یہوواہ دی مدد دی لوڑ اے تاکہ اَسی دُوجیاں نُوں جوش نال خوش‌خبری سُنا سکئے۔ (‏مُکاشفہ 12:‏17‏)‏ تُسی ایس گل دا پکا یقین کیوں رکھ سکدے او کہ یہوواہ تواڈی مدد وی ضرور کرے گا؟ ذرا یسوع مسیح دی اوس دُعا تے غور کرو جدا ذکر یوحنا 17 باب چ ہویا اے۔ یسوع نے یہوواہ کولوں درخاست کیتی کہ اوہ اوہدے رسولاں دی حفاظت کرے تے یہوواہ نے اوہدی درخاست سُنی۔ اعمال دی کتاب چ اَسی ایس گل دے کئی ثبوت ویکھنے آں جدوں یہوواہ نے خوش‌خبری سُنان چ اوہناں رسولاں دی مدد کیتی جنہاں تے ظلم کیتا جا رہیا سی۔ یسوع نے اپنی دُعا چ ایہہ وی کہیا کہ یہوواہ اوہناں لوکاں دی وی حفاظت کرے جیہڑے رسولاں دا پیغام سُن کے ایمان لیان گے۔ تے اِک لحاظ نال یسوع نے تواڈے لئی وی دُعا کیتی۔ یہوواہ یسوع دی دُعا دا ہُن وی جواب دے رہیا اے۔ اوہ تواڈی مدد کرے گا جیویں اوہنے رسولاں دی مدد کیتی۔—‏یوحنا 17:‏11،‏ 15،‏ 20‏۔‏

14.‏ اَسی ایس گل دا یقین کیوں رکھ سکنے آں کہ اَسی مشکلاں دے باوجود وی جوش نال مُنادی کر سکنے آں؟ (‏تصویر نُوں وی ویکھو۔)‏

¹⁴ جیویں جیویں ایس دُنیا دا خاتمہ نیڑے آ رہیا اے ساڈے لئی دُوجیاں نُوں خوش‌خبری سُنانا ہور مشکل ہو سکدا اے۔ پر یسوع مسیح نے سانوں یقین دَوایا اے کہ سانوں ہمیشاں اوہ مدد مِلدی رہوے گی جدے ذریعے اَسی جوش نال مُنادی کردے رہواں گے۔ (‏لُوقا 21:‏12-‏15‏)‏ یسوع تے اوہدے شاگرداں وانگوں اَسی لوکاں نال کوئی بحث نئیں کراں گے سگوں اَسی اوہناں نُوں ایہہ موقع دَواں گے کہ اوہ ساڈے پیغام نُوں سُنن یاں نہ سُنن دا فیصلہ آپ کرن۔ جنہاں مُلکاں چ ساڈے بھین بھرا آزادی نال مُنادی نئیں کر سکدے، اوتھے وی اوہ کسے نہ کسے طریقے نال خوش‌خبری سُناندے رہندے نیں کیونکہ اوہ اپنی طاقت تے نئیں سگوں یہوواہ تے بھروسا کردے نیں۔ جیویں پہلی صدی چ اوہنے اپنے بندیاں نُوں طاقت دِتی اوسے طرحاں اوہ اَج سانوں وی طاقت دَوے گا تاکہ مُنادی دا کم اوہدوں تک ہوندا رہوے جدوں تک اوہ چاہندا اے۔ (‏2-‏تیمُتھیُس 4:‏17‏)‏ تُسی ایس گل دا پکا یقین رکھ سکدے او کہ جے تُسی یہوواہ تے بھروسا رکھو گے تے تُسی جوش نال مُنادی کردے رہوو گے۔‏

اوہنے امید نئیں چھڈی

15.‏ ایہہ کیویں پتہ چلدا اے کہ یسوع نے مُنادی کردے ویلے امید کدی نئیں چھڈی؟‏

¹⁵ یسوع نُوں یقین سی کہ کجھ لوک خوش‌خبری دے پیغام نُوں قبول کرن گے۔ ایسے لئی اوہ خوشی، جوش تے لگن نال مُنادی کردا رہیا۔ مثال لئی، 30 عیسوی دے آخر چ یسوع نے ویکھیا کہ بوہت سارے لوک خوش‌خبری دے پیغام نُوں سُننا چاہندے نیں۔ اوہنے اوہناں نُوں اِک ایہو جہی فصل کہیا جیہڑی واڈھی لئی تیار اے۔ (‏یوحنا 4:‏35‏)‏ تے ایہدے تقریباً اِک سال بعد اوہنے اپنے شاگرداں نُوں کہیا:‏ ”‏فصل بوہت اے۔“‏ (‏متی 9:‏37، 38‏)‏ فیر یسوع نے دُبارہ ایس گل تے زور دیندیاں ہوئیاں کہیا:‏ ”‏فصل تے بوہت اے .‏ .‏ .‏ ایس لئی کھیت دے مالک دی مِنت کرو کہ اوہ واڈھی لئی ہور مزدور بھیجے۔“‏ (‏لُوقا 10:‏2‏)‏ یسوع نے ایس گل دی امید کدی وی نئیں چھڈی کہ لوک اوہدا پیغام سُنن گے تے جدوں لوکاں نے یسوع دا پیغام سُنیا تے اوہنوں بڑی خوشی ہوئی۔—‏لُوقا 10:‏21‏۔‏

16.‏ یسوع دِیاں مثالاں توں ایہہ کیویں پتہ چلدا اے کہ اوہ مُنادی دے کم بارے بڑی چنگی سوچ رکھدا سی؟ (‏لُوقا 13:‏18-‏21‏)‏ (‏تصویر نُوں وی ویکھو۔)‏

¹⁶ یسوع نے اپنے شاگرداں نُوں سکھایا کہ اوہ ایس گل نُوں یاد رکھن کہ جوش نال مُنادی کرن دے کِنّے چنگے نتیجے نکلدے نیں۔ ایہدے بارے ذرا یسوع دِیاں دو مثالاں تے غور کرو۔ ‏(‏لُوقا 13:‏18-‏21 نُوں پڑھو۔)‏ اِک مثال چ یسوع نے بادشاہی دے پیغام نُوں رائی دے دانے وانگوں کہیا جیہڑا ودھ کے اِک درخت بن گیا۔ ایہدا مطلب سی کہ بوہت سارے لوک بادشاہی دے پیغام نُوں قبول کرن گے تے ایہناں لوکاں دی تعداد ودھدی جائے گی۔ فیر اوہنے اِک ہور مثال چ بادشاہی دے پیغام نُوں خمیر وانگوں کہیا۔ ایہدا مطلب سی کہ بادشاہی دے پیغام نے پوری دُنیا چ پھیل جانا سی تے ایس پیغام دی وجہ توں لوکاں دِیاں زندگیاں بدل جانیاں سن، فیر بھانویں دُوجیاں نُوں ایہہ تبدیلیاں فوراً نظر نہ آندیاں۔ اِنج یسوع مسیح نے اپنے شاگرداں نُوں ایہہ یقین دَوایا کہ جیہڑا پیغام اوہ دُوجیاں نُوں سُنا رہے نیں، یقیناً ایہدے بوہت چنگے نتیجے نِکلن گے۔‏

17.‏ سانوں مُنادی کردے ویلے اچھی امید کیوں رکھنی چاہی دی اے؟‏

¹⁷ جدوں اَسی ایس بارے سوچنے آں کہ خوش‌خبری دے پیغام دی وجہ توں لوکاں نُوں کِنّاں فائدہ ہو رہیا اے تے ساڈے دل چ ایہہ خواہش پیدا ہوندی اے کہ اَسی جوش نال مُنادی کردے رہیے۔ ہر سال لکھاں لوک مسیح دی یاد گیری تے آندے نیں تے ساڈے کولوں بائبل کورس کردے نیں۔ ایہدے علاوہ ہزاراں لوک بپتسمہ لیندے نیں تے ساڈے نال مِل کے مُنادی دے کم چ حصہ لیندے نیں۔ اَسی ایہہ تے نئیں جان دے کہ ہور کِنّے لوک خوش‌خبری دے پیغام نُوں قبول کرن گے پر اَسی ایہہ گل ضرور جاننے آں کہ یہوواہ وڈی بِھیڑ نُوں جمع کر رہیا اے جیہڑی وڈی مصیبت چوں بچ کے نکل آئے گی۔ (‏مُکاشفہ 7:‏9،‏ 14‏)‏ یہوواہ کھیت دا مالک اے تے اوہنوں ایس گل تے پورا یقین اے کہ حالے وی بوہت سارے لوک خوش‌خبری دے پیغام نُوں قبول کرن گے۔ ایس لئی سانوں پورے جوش نال مُنادی دا کم کردے رہنا چاہی دا اے۔‏

18.‏ ساڈا کیہہ عزم اے؟‏

¹⁸ شروع توں ای یسوع دے شاگرد جوش نال مُنادی کرن دی وجہ توں مشہور نیں۔ مثال لئی، جدوں لوکاں نے ویکھیا کہ رسول کِنّی دلیری نال گواہی دے رہے نیں تے اوہ سمجھ گئے کہ اوہ یسوع دے نال ہوندے سن۔ (‏اعمال 4:‏13‏)‏ اَسی وی چاہنے آں کہ اَسی جوش نال مُنادی کردے رہیے تاکہ لوک سانوں ویکھ کے ایہہ سمجھ جان کہ اَسی یسوع دی مثال تے عمل کر رہے آں۔‏