خاکساری نال منو کہ تُسی کجھ گلاں نُوں نئیں جان دے

1.‏ یہوواہ نے ساڈے اندر کیہڑیاں صلاحیتاں پائیاں نیں تے کیوں؟‏

یہوواہ نے سانوں بڑے شاندار طریقے نال بنایا اے۔ اوہنے ساڈے اندر ایہہ صلاحیت رکھی اے تاکہ اَسی سوچ وچار کرئیے، نوِیاں گلاں نُوں سکھیے، ایہناں نُوں سمجھئے تے سکھیاں ہوئیاں گلاں تے عمل کرئیے۔ پر یہوواہ نے ساڈے اندر ایہہ صلاحیتاں کیوں پائیاں نیں؟ کیونکہ اوہ چاہندا اے کہ اَسی اوہدے بارے سکھیے تے اپنی سوچن سمجھن دی صلاحیت نُوں استمال کر کے اوہدی خدمت کرن دا فیصلہ کرئیے۔—‏اَمثال 2:‏1-‏5؛‏ رومیوں 12:‏1‏۔‏

2.‏ (‏الف)‏سانوں اپنے بارے کیہڑی گل منن دی لوڑ اے؟ (‏ایوب 37:‏23، 24)‏ (‏تصویر نُوں وی ویکھو۔)‏ (‏ب)‏جدوں اَسی ایہہ مننے آں کہ اَسی ساریاں گلاں نُوں نئیں جان دے تے سانوں کیہہ فائدہ ہوندا اے؟‏

² ایس گل چ کوئی شک نئیں کہ یہوواہ نے ساڈے اندر بوہت ساریاں گلاں سکھن دی صلاحیت پائی اے۔ پر بوہت ساریاں گلاں نیں جنہاں بارے اَسی نئیں جان دے۔ ‏(‏ایوب 37:‏23، 24 نُوں پڑھو۔)‏ ایہدے لئی ذرا ایوب دی مثال تے غور کرو۔ یہوواہ نے ایوب کولوں بوہت سارے سوال پچھے جنہاں توں ایوب ایہہ سمجھ پایا کہ اوہ بوہت ساریاں گلاں بارے نئیں جان دا۔ ایس گل بات توں بعد ایوب نُوں احساس ہویا کہ اوہنوں خاکسار بنن تے اپنی سوچ نُوں بدلن دی لوڑ اے۔ (‏ایوب 42:‏3-‏6)‏ جدوں اَسی وی ایہہ گل مناں گے کہ اَسی ساریاں گلاں نُوں نئیں جان دے تے سانوں وی بڑا فائدہ ہوئے گا۔ اِنج اَسی خاکسار بن سکاں گے تے ایس گل تے بھروسا رکھ سکاں گے کہ یہوواہ سانوں اوہناں گلاں بارے ضرور دَسے گا جنہاں نُوں جاننا ساڈے لئی واقعی ضروری اے تاکہ اَسی صحی فیصلے کر سکئے۔—‏اَمثال 2:‏6۔‏

3.‏ ایس مضمون چ اَسی کیہڑیاں گلاں تے غور کراں گے؟‏

³ ایس مضمون چ اَسی ویکھاں گے کہ اَسی کیہڑیاں گلاں بارے نئیں جان دے تے کدی کدار اوہناں گلاں بارے نہ جانن دی وجہ توں سانوں کیہڑیاں مشکلاں دا سامنا ہو سکدا اے۔ اَسی ایس گل تے وی غور کراں گے کہ کجھ گلاں بارے نہ جاننا بہتر کیوں ہوندا اے۔ ایہناں گلاں تے غور کرن نال ساڈا بھروسا ایس گل تے ودھے گا کہ یہوواہ جدے کول سارا علم اے، سانوں اوہناں گلاں بارے ضرور دَسے گا جنہاں بارے سانوں جانن دی لوڑ اے۔—‏ایوب 37:‏16۔‏

اَسی نئیں جان دے کہ خاتمہ کدوں آئے گا

4.‏ متی 24:‏36 دے مطابق اَسی کیہڑی گل نئیں جان دے؟‏

⁴ متی 24:‏36 نُوں پڑھو۔‏ اَسی نئیں جان دے کہ ایہہ بھیڑی دُنیا کدوں ختم ہوئے گی۔ جدوں یسوع زمین تے سی تے اوہ وی اوس ”‏دن یاں گھڑی“‏a بارے نئیں جان دا سی۔ بعد چوں اوہنے اپنے رسولاں نُوں دَسیا کہ ”‏ایہہ فیصلہ کرن دا حق“‏ صرف یہوواہ کول اے کہ کیہڑے واقعے کدوں ہون گے۔ (‏اعمال 1:‏6، 7‏)‏ یہوواہ نے ایس دُنیا دے خاتمے دا وقت طے کر لیا اے پر اَسی ایس گل دا اندازہ نئیں لا سکدے کہ خاتمہ کدوں آئے گا۔‏

5.‏ اَسی ایہہ نئیں جان دے کہ خاتمہ کدوں آئے گا۔ ایس وجہ توں سانوں کیہڑیاں مشکلاں دا سامنا کرنا پے سکدا اے؟‏

⁵ یسوع نے ایس بھیڑی دُنیا دے خاتمے بارے جو کجھ کہیا، اوہدے توں پتہ چلدا اے کہ اَسی ایہہ نئیں جان دے کہ سانوں ہور کِنّاں اِنتظار کرنا پووے گا۔ ایس لئی ہو سکدا اے کہ اَسی بے‌صبرے یاں بے‌حوصلہ ہو جائیے، خاص طور تے اوس وقت جدوں اَسی کئی سالاں توں یہوواہ دے دن دا اِنتظار کر رہے آں۔ یاں شاید ہو سکدا اے کہ اَسی اپنے گھر والیاں یاں دُوجے لوکاں وَلّوں ایہہ طعنے سُن سُن کے ہمت ہار جائیے کہ خاتمہ حالے تک کیوں نئیں آیا۔ (‏2-‏پطرس 3:‏3، 4‏)‏ شاید اَسی سوچئے کہ جے سانوں خاتمے دے دن یاں وقت دا پتہ ہوندا تے ساڈے لئی صبر نال کم لینا تے دُوجیاں دے طعنیاں نُوں سُننا زیادہ اسان ہوندا۔‏

6.‏ ایہہ چنگی گل کیوں اے کہ سانوں ایہہ نئیں پتہ کہ ایس بھیڑی دُنیا دا خاتمہ کدوں آئے گا؟‏

⁶ یہوواہ نے سانوں ایہہ تے نئیں دَسیا کہ خاتمہ کدوں آئے گا پر اوہنے سانوں ایہہ ظاہر کرن دا موقع دِتا اے کہ اَسی محبت دی وجہ توں اوہدی خدمت کرئیے تے اوہدے تے بھروسا رکھیے۔ اَسی دُنیا دے خاتمے تک ای نئیں سگوں ہمیشاں تک یہوواہ دی خدمت کرنا چاہنے آں۔ ایس گل تے اپنا دھیان رکھن دی بجائے کہ ”‏یہوواہ دا دن“‏ کدوں آئے گا، سانوں اوہناں چنگیاں گلاں تے اپنا دھیان رکھنا چاہی دا اے جیہڑیاں اوس دن دے بعد ہون گیاں۔ اِنج اَسی یہوواہ دے نیڑے جانواں گے تے اوہدے تے بھروسا رکھ سکاں گے۔—‏2-‏پطرس 3:‏11، 12‏۔‏

7.‏ اَسی کیہہ جاننے آں؟‏

⁷ سانوں اوہناں گلاں تے غور کرنا چاہی دا اے جنہاں بارے اَسی جاننے آں۔ اَسی جاننے آں کہ آخری زمانہ 1914 چ شروع ہویا۔ یہوواہ نے بائبل چ ایہو جہیاں پیشین‌گوئیاں لکھوائیاں جنہاں توں نہ صرف ایہہ ثابت ہوندا اے کہ آخری زمانہ ایسے سال چ شروع ہویا سی سگوں اوہنے بڑی تفصیل نال اوہناں حالاتاں بارے وی دَسیا جیہڑے 1914 توں بعد ہونے سن۔ ایہہ پیشین گوئیاں پوریاں ہوئیاں نیں۔ ایہدے توں سانوں ایس گل دا یقین ہو جاندا اے کہ یہوواہ دا عظیم دن نیڑے وے۔ (‏صِفَنیاہ 1:‏14)‏ اَسی ایہہ وی جاننے آں کہ یہوواہ ساڈے کولوں کیہڑا کم لینا چاہندا اے۔ اوہ چاہندا اے کہ اَسی زیادہ توں زیادہ لوکاں نُوں ”‏بادشاہی دی خوش‌خبری“‏ دا پیغام سنائیے۔ (‏متی 24:‏14‏)‏ ایہہ پیغام تقریباً 240 مُلکاں چ 1000 توں زیادہ زباناں چ سُنایا جا رہیا اے۔ ایس کم نُوں لگن نال کرن لئی سانوں خاتمے دے ”‏دن یاں گھڑی“‏ بارے جانن دی لوڑ نئیں اے۔‏

اَسی نئیں جان دے کہ یہوواہ ساڈی مدد کیویں کرے گا

8.‏ اِصطلا‌ح ”‏سچے خدا دے کم“‏ کیس گل وَل اشارہ کردی اے؟ (‏واعظ 11:‏5)‏

⁸ اَسی ہمیشاں سچے خدا یہوواہ دے کماں نُوں چنگی طرحاں نئیں جان سکدے۔ ‏(‏واعظ 11:‏5 نُوں پڑھو۔)‏ اِصطلا‌ح ”‏سچے خدا دے کم“‏ ایس گل وَل اشارہ کردی اے کہ یہوواہ اپنے مقصد نُوں پورا کرن لئی کیہہ کردا اے یاں کیس گل دی اجازت دیندا اے۔ اَسی ایہہ پوری طرحاں نئیں جان سکدے کہ یہوواہ کوئی کم کیوں ہون دیندا اے یاں فیر اوہ کیس طریقے نال ساڈی مدد کرے گا۔ (‏زبور 37:‏5)‏ بائبل چ ماں دے پیٹ چ پلن والے بچے دی مثال دے کے ایہہ گل سمجھائی گئی اے کہ اَسی یہوواہ دے ہر کم نُوں چنگی طرحاں نئیں جان سکدے۔ جیویں اَسی، ایتھوں تک کہ سائنس‌دان وی ایہہ گل پوری طرحاں نئیں سمجھ سکدے کہ اِک حاملہ عورت دے پیٹ چ بچہ کیویں پلدا اے اونویں ای اَسی ایہہ گل وی پوری طرحاں نئیں سمجھ سکدے کہ یہوواہ ساڈی مدد کیویں کرے گا۔‏

9.‏ جدوں سانوں ایہہ پتہ نئیں ہوندا کہ کجھ معاملیاں چ یہوواہ ساڈی مدد کیویں کرے گا تے شاید اَسی کیہہ سوچن لگ پئیے؟‏

⁹ جدوں سانوں ایہہ پتہ نئیں ہوندا کہ کجھ معاملیاں چ یہوواہ ساڈی مدد کیویں کرے گا تے شاید اَسی کجھ فیصلے لیندے ویلے جھجک محسوس کرئیے۔ مثال لئی، ہو سکدا اے کہ اَسی یہوواہ دی ہور زیادہ خدمت کرن لئی قربانیاں دین توں گھبرائیے جیویں کہ اپنی زندگی نُوں سادہ بنانا یاں فیر ایہو جہی جگہ تے جا کے خدمت کرنا جتھے گھٹ مبشر نیں۔ یاں فیر کجھ صورتحال چ شاید اَسی ایہہ سوچن لگ پئیے کہ یہوواہ ساڈے توں خوش نئیں اے تے ایسے لئی اوہ ساڈی مدد نئیں کر رہیا۔ ایہہ اوہدوں ہو سکدا اے جدوں اَسی یہوواہ دی ہور زیادہ خدمت کرن لئی منصوبے بنانے آں پر اوہناں نُوں پورا نئیں کر پاندے۔ یاں اَسی مُنادی دے کم چ ودھ چڑھ کے حصہ لینے آں پر حالے تک ساڈے کول کوئی بائبل کورس نئیں اے۔ یاں فیر اَسی تعمیر دے کسے منصوبے تے کم کر رہے آں پر ایہنوں پورا کرن لئی سانوں بوہت ساریاں مشکلاں دا سامنا کرنا پے رہیا اے۔‏

10.‏ جدوں اَسی نئیں جان دے کہ یہوواہ ساڈی مدد کیویں کرے گا تے سانوں اپنے اندر کیہڑی خوبی پیدا کرن دا موقع مِلدا اے؟‏

¹⁰ جدوں اَسی نئیں جان دے کہ یہوواہ ساڈی مدد کیویں کرے گا تے اوہدوں سانوں موقع مِلدا اے کہ اَسی اپنے اندر خاکساری دی خوبی پیدا کرئیے۔ ایس طرحاں اَسی ایہہ سمجھ جانے آں کہ یہوواہ دے خیال تے اوہدیاں راہواں ساڈے خیال تے ساڈیاں راہواں توں اُچیاں نیں۔ (‏یسعیاہ 55:‏8، 9)‏ اِنج اَسی یہوواہ تے ہور زیادہ بھروسا کرنا سکھنے آں کہ اوہ ہر کم چنگے طریقے نال کرے گا۔ جدوں اَسی مُنادی یاں تنظیم دے کسے منصوبے دے چنگے نتیجے ویکھنے آں تے اَسی یہوواہ دی وڈیائی کرن دے قابل ہُنے آں جدا اوہ حق رکھدا اے۔ (‏زبور 127:‏1؛‏ 1-‏کُرنتھیوں 3:‏7‏)‏ جے کسے معاملے دا اوہ نتیجہ نئیں نکلدا جو اَسی سوچیا ہوندا اے تے اوس ویلے سانوں ایہہ گل یاد رکھنی چاہی دی اے کہ یہوواہ سب کجھ جان دا اے۔ (‏یسعیاہ 26:‏12)‏ سانوں اوہ کم کردے رہنا چاہی دا اے، جو اَسی کر سکنے آں تے ایس گل تے بھروسا رکھنا چاہی دا اے کہ یہوواہ ساڈی مدد کرے گا۔ بھانویں یہوواہ کوئی معجزہ کر کے ساڈی مدد نہ کرے، جیویں اوہنے پرانے وقتاں چ کیتا پر اَسی پورا یقین رکھ سکنے آں کہ اوہ ساڈی رہنمائی ضرور کرے گا۔—‏اعمال 16:‏6-‏10‏۔‏

11.‏ اَسی کیہڑیاں اہم گلاں جاننے آں؟‏

¹¹ اوہناں گلاں تے سوچ وچار کرو جنہاں بارے اَسی جاننے آں۔ مثال لئی، اَسی جاننے آں کہ یہوواہ محبت کرن والا، اِنصاف پسند تے حکمت والا خدا اے۔ اَسی ایہہ وی جاننے آں کہ یہوواہ اوہناں کماں دی بڑی قدر کردا اے جیہڑے اَسی اوہدے لئی تے اپنے بھین بھراواں لئی کرنے آں۔ ایہدے علاوہ سانوں ایہہ وی پتہ اے کہ یہوواہ ہمیشاں اوہناں لوکاں نُوں اجر دیندا اے جیہڑے اوہدے وفادار رہندے نیں۔—‏عبرانیوں 11:‏6‏۔‏

اَسی نئیں جان دے کہ کل کیہہ ہوئے گا

12.‏ یعقوب 4:‏13، 14 دے مطابق اَسی کیہڑی گل نئیں جان دے؟‏

¹² یعقوب 4:‏13، 14 نُوں پڑھو۔‏ ایہہ سچ اے کہ ساڈے وچوں کوئی وی ایہہ گل نئیں جان دا کہ کل اوہدے نال کیہہ ہوئے گا۔ ایس دُنیا چ رہندے ہوئیاں اچانک کسے تے وی بُرا وقت آ سکدا اے تے کسے نال کجھ وی ہو سکدا اے۔ (‏واعظ 9:‏11)‏ ایس لئی اَسی جیہڑے منصوبے بنائے نیں، اوہناں بارے اَسی یقین نال ایہہ نئیں کہہ سکدے کہ اوہ ضرور پورے ہون گے یاں اوہناں نُوں پورا کرن لئی اَسی زندہ رہواں گے۔‏

13.‏ جدوں اَسی اوہناں گلاں بارے نئیں جان دے جیہڑیاں مستقبل چ ہون گیاں تے شاید اَسی کیہو جیہا محسوس کرئیے؟‏

¹³ ساڈے لئی مشکلاں نُوں برداشت کرنا اوہدوں بوہت اوکھا ہو سکدا اے جدوں اَسی ایہہ نئیں جان دے کہ اَگے چل کے ساڈے نال کیہہ ہوئے گا۔ مستقبل بارے حدوں ودھ پریشان ہون دی وجہ توں ساڈی خوشی گھٹ ہو سکدی اے۔ اَسی اپنی زندگی چ اچانک ہون والیاں تبدیلیاں تے حادثیاں دی وجہ توں مایوس تے چڑچڑے ہو سکنے آں۔ ایہدے علاوہ جو اَسی سوچنے آں اُنج نئیں ہوندا تے اوہدوں وی اَسی بے‌حوصلہ تے دُکھی ہو سکنے آں۔—‏اَمثال 13:‏12۔‏

14.‏ سچی خوشی دا تعلق کیس گل نال اے؟ (‏تصویراں نُوں وی ویکھو۔)‏

¹⁴ مشکلاں نُوں برداشت کرن نال اَسی ایہہ ثابت کرنے آں کہ اَسی خودغرض نئیں آں تے بھانویں کجھ وی ہو جائے، اَسی اپنے اسمانی باپ یہوواہ نال محبت دی وجہ توں اوہدی خدمت کردے رہواں گے۔ بائبل چ لکھے واقعیاں نُوں پڑھن نال اَسی سکھنے آں کہ سانوں ایس گل دی توقع نئیں کرنی چاہی دی کہ یہوواہ سانوں ہر مشکل توں بچائے گا۔ سانوں ایہہ وی نئیں سوچنا چاہی دا کہ یہوواہ نے پہلاں توں ای طے کیتا اے کہ ساڈی زندگی چ کیہہ کجھ ہوئے گا۔ یہوواہ جان دا اے کہ سانوں سچی خوشی ایس گل توں نئیں مِل سکدی کہ سانوں اپنے مستقبل بارے ہر گل دا پتہ ہوئے سگوں ساڈی خوشی دا تعلق ایس گل نال اے کہ اَسی اوہدے کولوں رہنمائی منگئے تے اوہدے فرمانبردار رہیے۔ (‏یرمیاہ 10:‏23)‏ جدوں اَسی کوئی وی فیصلہ کردے ویلے یہوواہ کولوں رہنمائی منگنے آں تے اِک لحاظ نال اَسی ایہہ کہہ رہے ہُنے آں:‏ ”‏جے یہوواہ نے چاہیا تے اَسی زندہ رہواں گے تے ایہہ یاں اوہ کم کراں گے۔“‏—‏یعقوب 4:‏15‏۔‏

15.‏ اَسی مستقبل بارے کیہہ جاننے آں؟‏

¹⁵ سچ اے کہ اَسی نئیں جان دے کہ کل ساڈے نال کیہہ ہوئے گا پر اَسی ایہہ ضرور جاننے آں کہ یہوواہ نے سانوں ہمیشاں دی زندگی دین دا وعدہ کیتا اے، فیر بھانویں اوہ سانوں زمین تے ہمیشاں دی زندگی دَوے یاں اسمان تے۔ (‏طِطُس 1:‏2‏)‏ اَسی جاننے آں کہ یہوواہ جھوٹھ نئیں بول سکدا تے کوئی وی چیز اوہنوں اپنے وعدے پورے کرن توں نئیں روک سکدی۔ صرف اوہی شروع چ ای انجام بارے دَس سکدا اے تے جیہڑیاں گلاں حالے تک نئیں ہوئیاں، اوہناں بارے بوہت پہلاں توں ای دَس سکدا اے۔ (‏یسعیاہ 46:‏10)‏ جیویں ماضی چ یہوواہ دِیاں ساریاں پیشین‌گوئیاں پوریاں ہوئیاں سن اوسے طرحاں اوہدیاں اوہ پیشین‌گوئیاں وی ضرور پوریاں ہون گیاں جیہڑیاں اوہنے مستقبل بارے کیتیاں نیں۔ (‏رومیوں 8:‏35-‏39‏)‏ سانوں پورا یقین اے کہ کوئی وی چیز یہوواہ نُوں ساڈے نال محبت کرن توں نئیں روک سکدی۔ بھانویں ساڈی زندگی چ کوئی وی مشکل آ جائے یہوواہ سانوں اوہدا مقابلہ کرن لئی حکمت، طاقت تے تسلی دَوے گا۔ اَسی ایس گل دا پکا یقین رکھ سکنے آں کہ یہوواہ ہمیشاں ساڈی مدد کرے گا تے سانوں برکت دَوے گا۔—‏یرمیاہ 17:‏7، 8۔‏

اَسی پوری طرحاں نئیں سمجھ سکدے کہ یہوواہ سانوں کِنّی چنگی طرحاں جان دا اے

16.‏ یہوواہ ساڈے بارے کیہہ کجھ جان دا اے تے ایہہ جان کے توانوں کیہو جیہا لگدا اے؟ (‏زبور 139:‏1-‏6)‏

¹⁶ زبور 139:‏1-‏6 نُوں پڑھو۔‏ ساڈا خالق یہوواہ ساڈے بارے ہر گل بڑی چنگی طرحاں جان دا اے۔ اوہ جان دا اے کہ اَسی جو سوچنے آں تے جو محسوس کرنے آں، اوہدی کیہہ وجہ اے۔ اَسی جو کجھ کہنے آں تے جو ساڈے دل چ ہوندا اے، یہوواہ اوہدے بارے جان دا اے۔ اوہ ایہہ وی جان دا اے کہ اَسی کوئی کم کیوں کرنے آں۔ جیویں کہ بادشاہ داؤد نے کہیا:‏ یہوواہ نے ساڈی حفاظت لئی سانوں چارے پاسیوں گھیریا ہویا اے تے ہمیشاں ساڈی مدد کرن لئی تیار رہندا اے۔ توانوں ایہہ جان کے کیہو جیہا لگدا اے کہ لامحدود طاقت دا مالک تے کائنات دا خالق تواڈی اینی فکر کردا اے؟ ایس بارے داؤد نے کہیا:‏ ایہہ گل میری سمجھ توں باہر اے کہ تُوں مینوں اینی چنگی طرحاں جاننا ایں، ہاں ایہنوں سمجھنا میرے وسوں باہر اے۔—‏زبور 139:‏6۔‏

17.‏ شاید سانوں ایہہ مننا مشکل کیوں لگے کہ یہوواہ سانوں چنگی طرحاں جان دا اے؟‏

¹⁷ شاید اپنے خاندان، ثقافت یاں پرانے عقیدیاں دی وجہ توں سانوں ایہہ مننا مشکل لگے کہ یہوواہ سانوں پیار کردا اے تے ساڈی فکر کردا اے۔ یاں شاید اَسی ایہہ سوچئے کہ ماضی چ مَیں اینیاں وڈیاں غلطیاں کیتیاں نیں کہ یہوواہ میرے ورگے انسان نُوں کدی وی نئیں جاننا چاہوے گا۔ نالے اوہ میرے توں بوہت دُور اے۔ کدی کدار تے داؤد وی اِنج ای محسوس کردا سی۔ (‏زبور 38:‏18، 21)‏ شاید اِک شخص جیہڑا اپنے آپ نُوں بدلن تے یہوواہ دے معیاراں مطابق چلن لئی سخت کوشش کر رہیا اے، ایہہ سوچن لگ پئے کہ ”‏جے خدا واقعی مینوں سمجھدا اے تے فیر اوہ ایہہ کیوں چاہندا اے کہ مَیں اپنی زندگی نُوں بدلاں؟ اوہ مینوں اُنج ای قبول کیوں نئیں کردا، جنج دا مَیں ہے واں؟“‏

18.‏ سانوں ایہہ گل کیوں مننی چاہی دی اے کہ یہوواہ سانوں ساڈے توں وی چنگی طرحاں جان دا اے؟ (‏تصویراں نُوں وی ویکھو۔)‏

¹⁸ سانوں ایہہ گل مننی چاہی دی اے کہ یہوواہ سانوں ساڈے توں وی چنگی طرحاں جان دا اے تے اوہ ساڈے اندر اوہ اچھائیاں ویکھ سکدا اے جیہڑیاں اَسی نئیں ویکھ سکدے۔ سچ اے کہ اوہنوں ساڈیاں کمیاں کمزوریاں دا پتہ اے تے اوہ سمجھدا اے کہ اَسی کوئی چیز کیوں محسوس کرنے آں تے کوئی کم کیوں کرنے آں۔ پر اوہ ایہہ وی جان دا اے کہ اَسی اوہدے نال پیار کرنے آں تے اِک چنگا انسان بننا چاہنے آں۔ (‏رومیوں 7:‏15‏)‏ جدوں اَسی ایس بارے سوچنے آں کہ یہوواہ ہمیشاں ایس گل تے دھیان دیندا اے کہ اَسی اپنے اندر ہور کِنّی بہتری لیا سکنے آں تے اِنج سانوں وفاداری تے خوشی نال اوہدی خدمت کرن دی ہمت مِلدی اے۔‏

19.‏ اَسی یہوواہ بارے کیہڑیاں گلاں جاننے آں؟‏

¹⁹ ایس گل چ کوئی شک نئیں کہ یہوواہ محبت اے۔ (‏1-‏یوحنا 4:‏8‏)‏ اَسی جاننے آں کہ یہوواہ سانوں کوئی حکم ایس لئی دیندا اے کیونکہ اوہ سانوں پیار کردا اے تے دِلوں ساڈا بھلا چاہندا اے۔ اَسی جاننے آں کہ یہوواہ چاہندا اے کہ اَسی ہمیشاں تک زندہ رہیے۔ ایسے لئی اوہنے فدیے دا بندوبست کیتا۔ ایس نعمت دی وجہ توں سانوں ایس گل دا پکا یقین ہو جاندا اے کہ غلطیاں کرن دے باوجود وی اَسی یہوواہ دی اوس طرحاں خدمت کرسکنے آں، جیویں اوہ چاہندا اے۔ (‏رومیوں 7:‏24، 25‏)‏ اَسی جاننے آں کہ ”‏خدا ساڈے دل نالوں وڈا اے تے سب کجھ جان دا اے۔“‏ (‏1-‏یوحنا 3:‏19، 20‏)‏ یہوواہ ساڈے بارے ہر گل تے غور کردا اے تے اوہنوں ایس گل تے پورا بھروسا اے کہ اَسی اوہدی مرضی پوری کرن چ کامیاب ہو سکنے آں۔‏

20.‏ اَسی حدوں ودھ پریشان ہون توں کیویں بچ سکنے آں؟‏

²⁰ یہوواہ نے سانوں اوہ سب کجھ دَسیا اے جدے بارے سانوں جانن دی لوڑ اے۔ جدوں اَسی خاکساری نال ایس گل نُوں مننے آں تے اَسی اوہناں گلاں بارے حدوں ودھ پریشان نئیں ہوندے جنہاں نُوں جاننا ساڈے لئی ضروری نئیں اے۔ ایہدی بجائے اَسی اپنا دھیان زیادہ اہم گلاں تے رکھ سکنے آں۔اِنج کرن نال اَسی یہوواہ تے مکمل بھروسا ظاہر کرنے آں جدے کول پورا علم اے۔ (‏ایوب 36:‏4)‏ سچ اے کہ حالے اَسی کجھ گلاں نُوں پوری طرحاں نئیں سمجھدے پر اَسی جاننے آں کہ یہوواہ سانوں ہمیشاں نوِیاں گلاں سکھاندا رہوے گا۔ اَسی اوس وقت دا اِنتظار کر رہے آں جدوں اَسی ہمیشاں تک اپنے عظیم خدا یہوواہ بارے نوِیاں گلاں سکھدے رہواں گے۔—‏واعظ 3:‏11۔‏