فیصلہ کرو کہ تُسی کدی عبادت کرو گے

1.‏ سچی خوشی حاصل کرن لئی سانوں کیہہ کرنا چاہی دا اے تے کیوں؟ (‏یسعیاہ 48:‏17، 18)‏

ساڈا اسمانی باپ یہوواہ سانوں بڑا پیار کردا اے تے اوہ چاہندا اے کہ اَسی ہُن تے آن والے وقت چ وی خوشیاں نال بھری زندگی گزارئیے۔ (‏واعظ 3:‏12، 13)‏ اوہنے سانوں بوہت سارے شاندار کم کرن دی صلاحیت دِتی اے۔ پر اوہنے سانوں ایہہ صلاحیت نئیں دِتی کہ اَسی آپ ایہہ فیصلہ کرئیے کہ کیہہ صحی اے تے کیہہ غلط۔ (‏واعظ 8:‏9؛ یرمیاہ 10:‏23)‏ اوہنوں پتہ اے کہ سانوں اوہدی عبادت کرن تے اوہدے معیاراں مطابق زندگی گزارن نال ای سچی خوشی مِل سکدی اے۔‏‏—‏یسعیاہ 48:‏17، 18 نُوں پڑھو۔‏

2.‏ شیطان سانوں کیس گل دا یقین دَوانا چاہندا اے پر یہوواہ نے اوہدے دعوے نُوں جھوٹھا ثابت کرن لئی کیہہ کیتا اے؟‏

² شیطان سانوں ایس گل دا یقین دَوانا چاہندا اے کہ اَسی یہوواہ دی رہنمائی دے بغیر خوش رہ سکنے آں تے آپ ایہہ فیصلہ کر سکنے آں کہ کیہہ صحی اے تے کیہہ غلط۔ (‏پیدائش 3:‏4، 5)‏ یہوواہ نے شیطان دے ایس دعوے نُوں جھوٹھا ثابت کرن لئی انساناں نُوں کجھ وقت لئی ایہہ اجازت دِتی اے کہ اوہ اپنی مرضی مطابق زندگی گزار کے ویکھ لین۔ اَسی ویکھ سکنے آں کہ ایہدے کِنّے بھیڑے نتیجے نکلے نیں۔ پر بائبل چ سانوں بوہت سارے ایہو جہے لوکاں دِیاں مثالاں مِلدیاں نیں جنہاں نُوں یہوواہ دی خدمت کر کے بڑی خوشی مِلی۔ ایہناں وچوں سب توں ودھیا مثال یسوع مسیح دی اے۔ آؤ غور کرنے آں کہ یسوع نے یہوواہ دی عبادت کرن دا فیصلہ کیوں کیتا۔ فیر اَسی ویکھاں گے کہ ساڈا اسمانی باپ ایہہ حق کیوں رکھدا اے کہ اَسی اوہدی عبادت کرئیے۔ تے آخر چ اَسی ایس گل تے غور کراں گے کہ اَسی یہوواہ دی عبادت کرن دا فیصلہ کیوں کیتا اے۔‏

یسوع نے یہوواہ دی عبادت کرن دا فیصلہ کیوں کیتا؟‏

3.‏ شیطان نے یسوع نُوں کیہہ کہیا پر یسوع نے کیہہ فیصلہ کیتا؟‏

³ جدوں یسوع زمین تے سی تے اوہنوں ایہہ فیصلہ کرنا سی کہ اوہ کدی عبادت کرے گا۔ اوہدے بپتسمہ لین توں تھوڑی دیر بعد ای شیطان نے اوہنوں دُنیا دِیاں ساریاں بادشاہیاں وکھائیاں تے اوہنوں کہیا کہ جے اوہ اوہنوں صرف اِک وار ای جُھک کے سجدہ کرے گا تے اوہ اوہنوں ساریاں بادشاہیاں دے دَوے گا۔ پر یسوع نے اوہنوں کہیا:‏ ”‏چلا جا ایتھوں شیطان!‏ کیونکہ پاک کلام چ لکھیا اے کہ ”‏تُوں صرف یہوواہ اپنے خدا دی عبادت کر تے صرف اوہدی خدمت کر۔“‏“‏ (‏متی 4:‏8-‏10‏)‏ یسوع نے یہوواہ دی عبادت کرن دا فیصلہ کیوں کیتا؟ آؤ ویکھنے آں۔‏

4، 5.‏ یسوع نے یہوواہ دی عبادت کرن دا فیصلہ کیوں کیتا؟‏

⁴ یسوع نے یہوواہ دی عبادت کرن دا فیصلہ کیوں کیتا؟ ایہدی سب توں وڈی وجہ ایہہ سی کہ اوہ اپنے اسمانی باپ نال بوہت پیار کردا سی۔ (‏یوحنا 14:‏31‏)‏ اوہ ایس لئی وی یہوواہ دی عبادت کردا سی کیونکہ اوہ جان دا سی کہ یہوواہ ای عبادت دا حق‌دار اے۔ (‏یوحنا 8:‏28، 29؛‏ مُکاشفہ 4:‏11‏)‏ یسوع جان دا سی کہ یہوواہ نے ای سانوں زندگی دِتی اے تے دل کھول کے بے‌شمار نعمتاں دِتیاں نیں، نالے اَسی اوہدے تے بھروسا کر سکنے آں۔ (‏زبور 33:‏4؛ 36:‏9؛‏ یعقوب 1:‏17‏)‏ یسوع نے ویکھیا سی کہ یہوواہ ہمیشاں سچ بولدا اے۔ اوہنوں ایہہ وی پتہ سی کہ جو کجھ اوہدے کول اے، اوہ سب اوہنوں یہوواہ وَلّوں مِلیا اے۔ (‏یوحنا 1:‏14‏)‏ پر شیطان یہوواہ توں بالکل فرق اے۔ اوہدی وجہ توں انساناں تے موت آئی اے۔ اوہ جھوٹھا، لالچی تے خودغرض اے۔ (‏یوحنا 8:‏44‏)‏ یسوع اپنے باپ یہوواہ نُوں چنگی طرحاں جان دا سی۔ پر ایہدے نال نال اوہ شیطان دی اصلیت وی جان دا سی۔ ایس لئی اوہنے شیطان وانگوں بنن تے اپنے باپ دے خلاف جان بارے کدی سوچیا وی نئیں۔—‏فِلپّیوں 2:‏5-‏8‏۔‏

⁵ یسوع نے ایس لئی وی یہوواہ دی عبادت کرن دا فیصلہ کیتا کیونکہ اوہدا دھیان ایس گل تے سی کہ اوہدی وفاداری دی وجہ توں کِنّے چنگے نتیجے نِکلن گے۔ (‏عبرانیوں 12:‏2‏)‏ اوہنوں پتہ سی کہ جے اوہ اپنے باپ دا وفادار رہوے گا تے اوہ اوہدے ناں نُوں پاک ثابت کر سکے گا تے اوس سارے نقصان نُوں بھر سکے گا جیہڑا شیطان دی وجہ توں ہویا اے۔‏

یہوواہ عبادت دا حق کیوں رکھدا اے؟‏

6، 7.‏ (‏الف)‏اَج بوہت سارے لوک یہوواہ دی عبادت کیوں نئیں کردے؟ (‏ب)‏یہوواہ عبادت دا حق کیوں رکھدا اے؟‏

⁶ اَج بوہت سارے لوک ایس لئی یہوواہ دی عبادت نئیں کردے کیونکہ اوہ یہوواہ تے اوہدیاں شاندار خوبیاں بارے نئیں جان دے تے نہ ای اوہناں نُوں ایہہ پتہ اے کہ یہوواہ نے اوہناں لئی کیہہ کجھ کیتا اے۔ ایہہ گل ایتھنز چ رہن والے لوکاں بارے وی سچ سی جنہاں نُوں پولُس نے خوش‌خبری سُنائی سی۔—‏اعمال 17:‏19، 20،‏ 30،‏ 34‏۔‏

⁷ پولُس نے اوہناں نُوں دَسیا کہ سچے خدا نے سارے ”‏انساناں نُوں زندگی، ساہ تے ساریاں چیزاں دِتیاں نیں۔“‏ اوہنے ایہہ وی کہیا:‏ ”‏اوہدے ای ذریعے اَسی پیدا ہوئے آں تے اوہدے ای سہارے ٹُرنے پھرنے آں تے زندہ واں۔“‏ یہوواہ ساڈا خالق اے جنہے اِک آدمی دے ذریعے ساریاں قوماں پیدا کیتیاں۔ ایس لئی صرف یہوواہ ای عبادت دا حق رکھدا اے۔—‏اعمال 17:‏25، 26،‏ 28‏۔‏

8.‏ یہوواہ کیہڑا کم کدی نئیں کردا؟ وضاحت کرو۔‏

⁸ یہوواہ ایس کائنات دا خالق تے حاکم اے۔ ایس لئی اوہ ساڈے کولوں زبردستی اپنی عبادت کرا سکدا اے۔ پر اوہ اِنج کدی وی نئیں کردا۔ ایہدی بجائے اوہنے سانوں ایس گل دے ثبوت دِتے نیں کہ اوہ موجود اے تے ساڈے وچوں ہر اِک نُوں بڑا پیار کردا اے۔ اوہ چاہندا اے کہ زیادہ توں زیادہ لوک اوہدے دوست بنن تے ہمیشاں تک اوہدے دوست رہن۔ (‏1-‏تیمُتھیُس 2:‏3، 4‏)‏ ایسے لئی یہوواہ نے سانوں تربیت دِتی اے کہ اَسی دُوجیاں نُوں اوہدے مقصد تے اوہناں کماں بارے دَسیئے جیہڑے اوہ انساناں لئی کرے گا۔ (‏متی 10:‏11-‏13؛‏ 28:‏19، 20‏)‏ ایہدے علاوہ، اوہنے ساڈے لئی کلیسیاواں دا بندوبست کیتا اے تے سانوں ایہو جہے نگہبان دِتے نیں جیہڑے بڑے پیار نال ساڈا خیال رکھدے نیں۔—‏اعمال 20:‏28‏۔‏

9.‏ یہوواہ ہور کیہڑے طریقیاں نال سارے انساناں لئی محبت ظاہر کردا اے؟‏

⁹ یہوواہ دی محبت ایس گل توں وی ثابت ہوندی اے کہ اوہ اوہناں لوکاں نال وی چنگی طرحاں پیش آندا اے جیہڑے ایہہ نئیں من دے کہ اوہ موجود اے۔ اوہ ایہناں لوکاں نُوں وی چنگیاں شیواں دیندا اے۔ ذرا ایس گل دے کجھ ثبوتاں تے غور کرو:‏ ہزاراں سالاں توں کروڑاں لوکاں نے صحی تے غلط بارے اپنے معیار بنائے ہوئے نیں تے اوہ ایہناں مطابق ای زندگی گزار رہے نیں۔ پر یہوواہ فیر وی بڑے پیار نال اوہناں نُوں اوہ چیزاں دے رہیا اے جیہڑیاں زندہ رہن تے زندگی دا مزہ لین لئی ضروری نیں۔ (‏متی 5:‏44، 45؛‏ اعمال 14:‏16، 17‏)‏ یہوواہ نے اوہناں نُوں صلاحیت دِتی اے کہ اوہ دُوجیاں نال دوستی کر سکن، اپنے گھر والیاں نال پیار کر سکن، اولاد پیدا کر سکن تے اپنی محنت توں فائدہ حاصل کر سکن۔ (‏زبور 127:‏3؛ واعظ 2:‏24)‏ ایہناں گلاں توں صاف نظر آندا اے کہ یہوواہ سارے انساناں نال کِنّاں پیار کردا اے۔ (‏خروج 34:‏6)‏ آؤ ہُن غور کرنے آں کہ اَسی یہوواہ دی عبادت کرن دا فیصلہ کیوں کیتا اے تے ایہدے بدلے چ یہوواہ نے سانوں کیہڑیاں برکتاں دِتیاں نیں۔‏

اَسی یہوواہ دی عبادت کرن دا فیصلہ کیوں کیتا اے؟‏

10.‏ (‏الف)‏یہوواہ دی عبادت کرن دی سب توں وڈی وجہ کیہہ اے؟ (‏متی 22:‏37‏)‏ (‏ب)‏یہوواہ دے صبر دی وجہ توں توانوں کیہڑے فائدے ہوئے نیں؟ (‏زبور 103:‏13، 14)‏

¹⁰ یسوع مسیح وانگوں ساڈی نظر چ وی یہوواہ دی عبادت کرن دی سب توں وڈی وجہ ایہہ وے کہ اَسی اپنے اسمانی باپ یہوواہ نال بوہت پیار کرنے آں۔ ‏(‏متی 22:‏37 نُوں پڑھو۔)‏ جدوں اَسی اوہدیاں شاندار خوبیاں بارے سکھیا تے ساڈے دل چ اوہدے لئی محبت پیدا ہونی شروع ہو گئی۔ مثال لئی، ذرا ایس گل تے غور کرو کہ یہوواہ ساڈے نال کِنّے صبر نال پیش آندا اے۔ جدوں بنی‌اِسرائیل نے یہوواہ دی نافرمانی کیتی تے یہوواہ نے بڑے پیار نال اوہناں نُوں کہیا:‏ اپنیاں بُریاں راہواں توں مُڑو۔ (‏یرمیاہ 18:‏11)‏ یہوواہ ایس گل نُوں ہمیشاں یاد رکھدا اے کہ اَسی عیب‌دار آں تے مٹی نال بنے آں۔ ‏(‏زبور 103:‏13، 14 نُوں پڑھو۔)‏ جدوں تُسی یہوواہ دے صبر بارے تے اوہدیاں دُوجیاں شاندار خوبیاں بارے سوچ‌وچار کردے او تے کیہہ تواڈے دل چ ایہہ خواہش پیدا نئیں ہوندی کہ تُسی ہمیشاں تک اوہدی عبادت کردے رہوو؟‏

11.‏ اَسی ہور کیہڑیاں گلاں دی وجہ توں یہوواہ دی عبادت کرن دا فیصلہ کیتا اے؟‏

¹¹ اَسی ایس لئی وی یہوواہ دی عبادت کرنے آں کیونکہ سانوں پتہ اے کہ صرف اوہدی عبادت کیتی جانی چاہی دی اے۔ (‏متی 4:‏10‏)‏ ایہدے علاوہ اَسی ایہہ وی جاننے آں کہ جے اَسی یہوواہ دے وفادار رہواں گے تے ایہدے بڑے چنگے نتیجے نِکلن گے۔ مثال لئی، اِنج کرن نال اَسی یہوواہ دے ناں نُوں پاک ثابت کر سکاں گے، شیطان نُوں جھوٹھا ثابت کر سکاں گے تے اپنے اسمانی باپ دے دل نُوں خوش کر سکاں گے۔ نالے جے اَج اَسی یہوواہ دی عبادت کرن دا فیصلہ کراں گے تے سانوں ایہہ موقع وی ملے گا کہ اَسی ہمیشاں تک اوہدی خدمت کردے رہیے۔—‏یوحنا 17:‏3‏۔‏

12، 13.‏ اَسی بھین جینی تے پیم دے تجربے توں کیہہ سکھنے آں؟‏

¹² جے تُسی حالے چھوٹے او یاں نوجوان او تے فیر وی تُسی یہوواہ لئی اپنے دل چ محبت پیدا کر سکدے او۔ تے جیویں جیویں تُسی وڈے ہووو گے، ایہہ محبت ودھدی جائے گی۔ ایس بارے ذرا دو سکیاں بھیناں دی مثال تے غور کرو جنہاں دا ناں جینی تے پیم اے۔‏a جدوں جینی 11 سال دی سی تے پیم 10 سال دی سی تے اوہ یہوواہ دے گواہواں کولوں بائبل کورس کرن لگ پئیاں۔ بھانویں کہ اوہناں دے ماں پیو نُوں آپ بائبل کورس کرن چ اینی دلچسپی نئیں سی پر اوہناں نے اپنیاں دِھیاں نُوں بائبل کورس کرن دی اجازت دے دِتی۔ پر اوہناں دی ایہہ شرط سی کہ اوہ دونویں اِتوار والے دن اوہناں نال چرچ جان۔ بھین جینی نے کہیا:‏ ”‏میرے سکول دے بچے میرے تے دباؤ پاندے سن کہ مَیں اوہناں وانگوں جنسی بدکاری تے نشہ کراں۔ پر مَیں یہوواہ دے گواہوں کولوں جیہڑی تلیم حاصل کر رہی ساں، اوہدی مدد نال مَیں ایس دباؤ دا مقابلہ کر سکی۔“‏

¹³ کجھ سالاں بعد اوہ دونویں بھیناں مبشر بن گئیاں تے بعد چوں پہل‌کاراں دے طور تے خدمت کرن لگ پئیاں۔ ایہدے نال نال اوہ اپنے وڈیرے ماں پیو دا وی خیال رکھدیاں سن۔ اپنے ماضی بارے بھین جینی کہندی اے:‏ ”‏مَیں ویکھیا اے کہ یہوواہ اپنے دوستاں دا ساتھ نئیں چھڈدا تے 2-‏تیمُتھیُس 2:‏19 دے مطابق یہوواہ اپنے بندیاں نُوں جان دا اے۔“‏ ایس گل چ کوئی شک نئیں کہ یہوواہ اوہناں لوکاں دا خیال رکھدا اے جیہڑے اوہدے نال محبت کردے نیں تے اوہدی عبادت کردے نیں۔‏

14.‏ اَسی اپنیاں گلاں تے کماں توں یہوواہ دے ناں تے لگے الزاماں نُوں جھوٹھا کیویں ثابت کر سکنے آں؟ (‏تصویراں نُوں وی ویکھو۔)‏

¹⁴ اَسی یہوواہ دے ناں تے لگے ہر اِلزام نُوں جھوٹھا ثابت کرنا چاہنے آں۔ مثال لئی، فرض کرو کہ تواڈا اِک دوست اے جیہڑا بوہت مہربان، کُھلے دل والا تے دِلوں معاف کرن والا اے۔ پر اِک دن کوئی بندہ تواڈے دوست تے ایہہ اِلزام لاندا اے کہ اوہ بوہت ظالم تے بے‌ایمان اے۔ تُسی ایہو جہیاں جھوٹھیاں گلاں سُن کے کیہہ کرو گے؟ تُسی یقیناً اپنے دوست دے حق چ بولو گے۔ ایسے طرحاں جدوں شیطان تے اوہدے حمایتی یہوواہ بارے جھوٹھ پھیلا کے اوہدی بدنامی کردے نیں تے اَسی دُوجیاں نُوں یہوواہ بارے سچائی دَسنے آں تے دلیری نال اوہدے حق چ بولنے آں۔ (‏زبور 34:‏1؛ یسعیاہ 43:‏10)‏ اَسی اپنیاں گلاں تے کماں توں ثابت کرنے آں کہ اَسی پورے دل تے جان نال یہوواہ نال پیار کرنے آں تے اوہدی عبادت کرنا چاہنے آں۔‏

15.‏ پولُس نُوں اپنی زندگی چ تبدیلیاں کرن نال کیہڑے فائدے ہوئے؟ (‏فِلپّیوں 3:‏7، 8‏)‏

¹⁵ اَسی یہوواہ نُوں خوش کرن تے ودھ چڑھ کے اوہدی خدمت کرن لئی اپنی زندگی چ تبدیلیاں کرن نُوں تیار رہنے آں۔ ایہدے لئی ذرا پولُس دی مثال تے غور کرو۔ جدوں اوہ یہودی مذہب دا حصہ سی تے اوہدی اپنی قوم چ بڑی عزت تے ناں سی۔ پر مسیح دا شاگرد بنن تے یہوواہ دی عبادت کرن لئی اوہنے ایہہ سب کجھ قربان کر دِتا۔ (‏گلتیوں 1:‏14‏)‏ ایہدا ایہہ نتیجہ نکلیا کہ اوہنوں ساری زندگی یہوواہ دی خدمت کر کے بڑی خوشی مِلی تے اوہنوں اسمان تے یسوع نال حکمرانی کرن دا موقع وی مِلیا۔ اوہنے یہوواہ دی خدمت کرن دا جیہڑا فیصلہ کیتا سی، اوہنوں اوہدے تے کدی وی پچھتاوا نئیں ہویا۔ جے اَسی وی ایہہ فیصلہ کیتا اے تے سانوں وی کدی پچھتاوا نئیں ہوئے گا۔‏‏—‏فِلپّیوں 3:‏7، 8 نُوں پڑھو۔‏

16.‏ اَسی بھین جولیا دے تجربے توں کیہہ سکھنے آں؟ (‏تصویراں نُوں وی ویکھو۔)‏

¹⁶ جے اَسی یہوواہ دی عبادت نُوں اپنی زندگی چ سب توں زیادہ اہمیت دَواں گے تے اَسی ہُن تے ہمیشاں تک خوشیاں بھری زندگی گزار سکاں گے۔ ایس بارے ذرا بھین جولیا دی مثال تے غور کرو۔ جدوں اوہ نوجوان سی تے اوہ اپنے چرچ دی کوائر دا حصہ سی۔ اوہ ایناں اچھا گاندی سی کہ اِک گلوکار نے اوہدے ہنر نُوں نکھارن لئی اوہنوں تربیت دِتی۔ چھیتی بھین جولیا اِک ماہر گلوکار بن گئی تے بوہت مشہور ہو گئی۔ اوہ وڈے وڈے موسیقی دے ہالاں چ گانے گاندی سی۔ جدوں بھین جولیا موسیقی دے اِک بڑے مشہور سکول چ جاندی سی تے اوہدی کلاس دا اِک مُنڈا اوہدے نال خدا بارے گل کرن لگ پیا تے اوہنے اوہنوں دَسیا کہ خدا دا ناں یہوواہ اے۔ چھیتی بھین جولیا یہوواہ دے گواہوں کولوں ہفتے چ دو وار بائبل کورس کرن لگ پئی۔ اوہنے فیصلہ کیتا کہ اوہ دُنیا چ ناں کمان دی بجائے یہوواہ دی عبادت نُوں اپنی زندگی چ سب توں زیادہ اہمیت دَوے گی۔ اوہدے لئی ایہہ فیصلہ کرنا اسان نئیں سی۔ اوہنے کہیا:‏ ”‏بوہت سارے لوکاں نے مینوں کہیا کہ مَیں اپنی صلاحیت نُوں ضائع کر رہی آں۔ پر مَیں چاہنی ساں کہ میرا پورا دھیان یہوواہ دی خدمت تے ہوئے۔“‏ بھین جولیا نُوں ایہہ فیصلہ کیتے ہوئے 30 توں زیادہ سال ہو گئے نیں۔ اَج اوہ اپنے فیصلے بارے کیہو جیہا محسوس کردی اے؟ اوہنے کہیا:‏ ”‏مَیں بڑی خوش تے مطمئن آں تے مینوں ایس گل دا پکا بھروسا اے کہ یہوواہ مستقبل چ میرے دل دی ہر خواہش نُوں پورا کرے گا۔“‏—‏زبور 145:‏16۔‏

یہوواہ دی عبادت کردے رہوو

17.‏ دُنیا دا خاتمہ نیڑے وے تے فیر ایس گل توں سانوں اوہناں لوکاں بارے کیہہ پتہ چلدا اے جنہاں نے حالے تک یہوواہ دی عبادت کرن دا فیصلہ نئیں کیتا تے جنہاں نے ایہہ فیصلہ کر لیا اے؟‏

¹⁷ ایس دُنیا دا خاتمہ بوہت نیڑے وے۔ پولُس رسول نے کہیا:‏ ہُن بوہت تھوڑا وقت رہ گیا اے۔ جنہے آنا اے، اوہ ضرور آوے گا تے اوہ دیر نئیں کرے گا۔ (‏عبرانیوں 10:‏37‏)‏ ایس گل توں سانوں کیہہ پتہ چلدا اے؟ اِک گل تے ایہہ کہ ہُن لوکاں کول بوہت تھوڑا وقت رہ گیا اے۔ ایس لئی اوہناں نُوں چھیتی ایہہ فیصلہ کرن دی لوڑ اے کہ کیہہ اوہ یہوواہ دی عبادت کرن گے یاں نئیں۔ (‏1-‏کُرنتھیوں 7:‏29‏)‏ تے دُوجی گل ایہہ کہ جے اَسی یہوواہ دی خدمت کرن دا فیصلہ کیتا اے تے سانوں یاد رکھنا چاہی دا اے کہ بھانویں سانوں مصیبتاں نُوں برداشت کرنا پووے گا پر ایہہ صرف کجھ دیر لئی ہون گیاں۔‏

18.‏ یہوواہ تے یسوع ساڈے کولوں کیہہ چاہندے نیں؟‏

¹⁸ یسوع نے لوکاں نُوں صرف ایہہ حوصلہ نئیں دِتا کہ اوہ اوہدے شاگرد بنن سگوں اوہنے اوہناں نُوں ایہہ وی کہیا کہ اوہ اوہدے پچھے پچھے چلدے رہن۔ (‏متی 16:‏24‏)‏ ایس لئی جے اَسی کئی سالاں توں یہوواہ دی عبادت کر رہے آں تے سانوں پکا عزم کرنا چاہی دا اے کہ اَسی اِنج ہمیشاں کردے رہواں گے۔ سانوں پوری وا لانی چاہی دی اے تاکہ اَسی یہوواہ دی عبادت کرن دے اپنے فیصلے تے قائم رہیے۔ سچ اے کہ اِنج کرنا مشکل ہو سکدا اے پر سانوں یاد رکھنا چاہی دا اے کہ یہوواہ دی عبادت کرن نال سانوں نہ صرف اَج سگوں مستقبل چ وی بوہت ساریاں برکتاں مِلن گیاں۔—‏زبور 35:‏27۔‏

19.‏ اَسی بھرا جیمز توں کیہہ سکھنے آں؟‏

¹⁹ کجھ لوکاں نُوں لگدا اے کہ جے اوہ یہوواہ دی عبادت کرن گے تے اوہناں نُوں بوہت ساریاں قربانیاں دینیاں پین گیاں۔ جے تُسی نوجوان او تے کیہہ توانوں لگدا اے کہ یہوواہ دی عبادت کرن دی وجہ توں تُسی زندگی دا مزہ نئیں لے پا رہے؟ ذرا اِک نوجوان بھرا دی گل تے غور کرو جدا ناں جیمز اے۔ اوہنے کہیا:‏ ”‏مینوں لگدا سی کہ یہوواہ دا گواہ ہون دی وجہ توں میری زندگی قید ہو کے رہ گئی اے۔ مَیں سوچنا ساں کہ میرے ہم عمر کِنّے مزے دی زندگی گزار رہے نیں۔ اوہ آزادی نال پارٹیاں کردے نیں، ڈیٹنگ کردے نیں تے مار کٹائی والیاں ویڈیو گیماں کھیڈدے نیں۔ پر مینوں عبادتاں تے مُنادی چ جانا پیندا اے۔“‏ ایس سوچ دا بھرا جیمز تے کیہہ اثر ہویا؟ اوہ کہندا اے:‏ ”‏مَیں عبادتاں تے جان دے نال نال غلط کم وی کرن لگ پیا۔ کجھ وقت لئی تے مینوں اِنج کرن چ بڑا مزہ آیا۔ پر ایہدے توں مینوں سچی خوشی نئیں مِلی۔ مَیں بائبل دِیاں اوہناں سچائیاں بارے سوچن لگ پیا جنہاں تے مَیں دھیان نئیں دے رہیا ساں۔ فیر مَیں فیصلہ کیتا کہ مَیں پورے دل نال یہوواہ دی عبادت کراں گا۔ مینوں لگدا اے کہ اوس ویلے توں یہوواہ میری ہر دُعا دا جواب دے رہیا اے۔“‏

20.‏ ساڈا کیہہ عزم ہونا چاہی دا اے؟‏

²⁰ زبور لکھن والے اِک بندے نے یہوواہ دی حمد چ ایہہ گیت گایا:‏ اوہ بندہ خوش رہندا اے جنہوں تُوں چُننا ایں تے اپنے نیڑے لیانا ایں تاکہ اوہ تیرے گھر دے ویہڑیاں چ وَسے۔ (‏زبور 65:‏4)‏ آؤ، اَسی ایہہ عزم کرئیے کہ اَسی یہوواہ دی عبادت کرنا کدی نئیں چھڈاں گے۔ دُعا اے کہ اَسی وی یشوع وانگوں ایہہ کہہ سکئے:‏ جتھوں تک میری تے میرے گھرانے دی گل اے تے اَسی یہوواہ دی عبادت کراں گے۔—‏یشوع 24:‏15۔‏