اَسی کدی وی کلّے نئیں آں

1، 2.‏ (‏الف)‏اَسی ایہہ کیوں کہہ سکنے آں کہ اَسی اپنیاں مشکلاں چ کدی وی کلّے نئیں آں؟ (‏ب)‏ایس مضمون چ اَسی کیہڑیاں گلاں تے غور کراں گے؟‏

جدوں اَسی کسے مشکل چوں لنگھ رہے ہنے آں تے شاید سانوں محسوس ہوئے کہ اَسی بالکل کلّے آں تے ایس مشکل چوں نِکلن دی کوئی راہ نئیں اے۔ پر اَسی کلّے نئیں آں۔ ساڈا اسمانی باپ صرف ساڈیاں مشکلاں نُوں ویکھدا ای نئیں سگوں اوہنے وعدہ کیتا اے کہ اوہ ایہناں چوں نِکلن چ ساڈی مدد وی کرے گا۔ یہوواہ اپنے بندیاں نُوں بڑے پیار نال ایہہ کہندا اے:‏ مَیں تیری مدد کراں گا۔—‏یسعیاہ 41:‏10۔‏

² ایس مضمون چ اَسی ویکھاں گے کہ یہوواہ ایہناں چار طریقیاں نال ساڈی مدد کردا اے:‏ (‏1)‏اوہ ساڈی رہنمائی کردا اے، (‏2)‏اوہ ساڈیاں ضرورتاں پوریاں کردا اے، (‏3)‏اوہ ساڈی حفاظت کردا اے تے (‏4)‏اوہ سانوں تسلی دیندا اے۔ یہوواہ نے سانوں ایس گل دا یقین دَوایا اے کہ بھانویں سانوں کسے وی مشکل دا سامنا ہوئے، اوہ سانوں کدی نئیں بُھلے گا تے نہ ای سانوں چھڈے گا۔ ایس لئی اَسی پورے یقین نال کہہ سکنے آں کہ اَسی کدی وی کلّے نئیں آں۔‏

یہوواہ ساڈی رہنمائی کردا اے

3، 4.‏ یہوواہ ساڈی رہنمائی کیویں کردا اے؟ ‏(‏زبور 48:‏14‏)‏

³ زبور 48:‏14 نُوں پڑھو۔‏ یہوواہ نُوں پتہ اے کہ اَسی آپ اپنی رہنمائی نئیں کر سکدے سگوں سانوں اوہدی مدد دی لوڑ اے۔ پر یہوواہ اَج اپنے بندیاں دی رہنمائی کیویں کردا اے؟ اپنے کلام بائبل دے ذریعے۔ (‏زبور 119:‏105)‏ یہوواہ اپنے کلام دے ذریعے ساڈی مدد کردا اے تاکہ اَسی ایہو جہے فیصلے کرئیے تے اپنے اندر ایہو جہیاں خوبیاں پیدا کرئیے جنہاں توں اَسی نہ صرف ہُن سگوں ہمیشاں تک خوشیاں بھری زندگی گزار سکئے۔‏a مثال لئی، اوہ سانوں سکھاندا اے کہ اَسی اپنے دل چوں ناراضگی نُوں کڈھیے، ہر معاملے چ ایمانداری نال کم لئیے تے دوجیاں نال محبت کرئیے۔ (‏زبور 37:‏8؛‏ عبرانیوں 13:‏18؛‏ 1-‏پطرس 1:‏22‏)‏ جدوں اَسی ایہو جہیاں خوبیاں ظاہر کرنے آں جیہڑیاں یہوواہ نُوں پسند نیں تے فیر اَسی چنگے ماں پیو، چنگے جیون ساتھی تے چنگے دوست بن پانے آں۔‏

⁴ یہوواہ نے اپنے کلام چ ایہو جہے لوکاں بارے وی لکھوایا اے جیہڑے بالکل ساڈے ورگے جذبات رکھدے سن۔ اوہناں نے ایہو جہیاں مشکلاں دا سامنا کیتا جنہاں دا اَج سانوں وی سامنا کرنا پیندا اے۔ (‏1-‏کُرنتھیوں 10:‏13؛‏ یعقوب 5:‏17‏)‏ جدوں اَسی ایہناں لوکاں بارے پڑھنے آں تے اوہناں گلاں تے عمل کرنے آں جیہڑیاں اَسی ایہناں توں سکھنے آں تے ایہدے توں سانوں دو فائدے ہوندے نیں۔ پہلا فائدہ ایہہ کہ اَسی سمجھ جانے آں کہ اَسی کلّے ای مشکلاں چوں نئیں لنگھ رہے سگوں بائبل چ جنہاں لوکاں دا ذکر کیتا گیا اے، اوہناں نُوں وی ایہو جہیاں مشکلاں دا سامنا کرنا پیا۔تے یہوواہ دی مدد نال اوہ ایہناں مشکلاں نُوں برداشت کر سکے۔ (‏1-‏پطرس 5:‏9‏)‏ دُوجا فائدہ سانوں ایہہ ہوندا اے کہ اَسی سکھ جانے آں کہ مشکلاں دے باوجود وی اَسی خوش رہ سکنے آں۔—‏رومیوں 15:‏4‏۔‏

5.‏ یہوواہ کنہاں دے ذریعے صحی راہ تے چلن چ ساڈی مدد کردا اے؟‏

⁵ یہوواہ ساڈے بھین بھراواں دے ذریعے وی ساڈی رہنمائی کردا اے۔‏b مثال لئی، حلقے دے نگہبان باقاعدگی نال کلیسیاواں دا حوصلہ ودھان لئی جاندے نیں۔ اوہناں دِیاں تقریراں نال ساڈا ایمان مضبوط ہوندا اے تے ساڈا ایکا قائم رہندا اے۔ (‏اعمال 15:‏40–‏16:‏5‏)‏ ایہدے علاوہ، کلیسیا دے بزرگ ہر مبشر چ ذاتی دلچسپی لیندے نیں تے یہوواہ دے نیڑے رہن چ اوہناں دی مدد کردے نیں۔ (‏1-‏پطرس 5:‏2، 3‏)‏ ماں پیو اپنے بچیاں دی رہنمائی کردے نیں تاکہ اوہ یہوواہ دی راہ تے چلن تے اوہناں دی مدد کردے نیں تاکہ اوہ اپنی سوچن سمجھن دی صلاحیت نُوں استمال کر کے چنگے فیصلے کر سکن تے چنگیاں عادتاں دے مالک بن سکن۔ (‏اَمثال 22:‏6)‏ پُختہ مسیحی بھیناں جوان بھیناں نُوں اپنی چنگی مثال توں سکھاندیاں نیں، اوہناں نُوں چنگے مشورے دیندیاں نیں تے بڑے پیار نال اوہناں دا حوصلہ ودھاندیاں نیں۔—‏طِطُس 2:‏3-‏5‏۔‏

6.‏ یہوواہ دی رہنمائی توں فائدہ حاصل کرن لئی سانوں کیہہ کرنا ہوئے گا؟‏

⁶ یہوواہ نے ساڈی رہنمائی لئی سانوں اوہ سب کجھ دِتا اے جدی وجہ تُوں اَسی چنگے فیصلے کر سکنے آں تے خوش رہ سکنے آں۔ پر اَسی ایہہ کیویں ظاہر کر سکنے آں کہ اَسی ایہناں ساریاں گلاں لئی یہوواہ دے شکرگزار آں؟ اَمثال 3:‏5، 6 چ لکھیا اے:‏ اپنے پورے دل نال یہوواہ تے بھروسا رکھ تے اپنی سمجھ اُتے اعتبار نہ کر۔ جے اَسی اِنج کراں گے تے یہوواہ ساڈیاں راہواں سِدھیاں کرے گا۔ ایہدا مطلب ایہہ وے کہ یہوواہ ساڈی مدد کرے گا کہ اَسی ایہو جہیاں گلاں توں دُور رہیے جنہاں دی وجہ توں ساڈی خوشی گھٹ ہو سکدی اے۔ اَسی یہوواہ دے بڑے شکرگزار آں کہ اوہ سانوں چنگی طرحاں جان دا اے تے ساڈے نال پیار کرن دی وجہ توں اوہ سانوں مشورے دیندا اے تے نصیحت کردا اے۔—‏زبور 32:‏8۔‏

یہوواہ ساڈیاں ضرورتاں پوریاں کردا اے

7.‏ یہوواہ ہور کیہڑے طریقیاں نال ساڈی مدد کردا اے؟ (‏فِلپّیوں 4:‏19‏)‏

⁷ فِلپّیوں 4:‏19 نُوں پڑھو۔‏ یہوواہ سانوں صرف ایہہ نئیں دَسدا کہ اَسی اوہدے نیڑے کیویں رہ سکنے آں سگوں اوہ ایس بارے وی ساڈی رہنمائی کردا اے کہ اَسی اپنیاں ضرورتاں پوریاں کرن لئی محنت کیویں کر سکنے آں۔ ایہناں ضرورتاں چ کھان پین، کپڑے تے گھر شامل اے۔ (‏متی 6:‏33؛‏ 2-‏تھسلُنیکیوں 3:‏12‏)‏ سانوں ایس گل دی فکر ہو سکدی اے کہ اَسی اپنیاں ضرورتاں کیویں پوریاں کراں گے۔ پر یہوواہ چاہندا اے کہ اَسی ایہناں گلاں بارے حدوں ودھ فکر نہ کرئیے۔ (‏متی 6:‏25‏)‏ پر کیوں؟ کیونکہ ساڈا اسمانی باپ اپنے وفادار بندیاں نُوں مشکلاں چ کدی وی کلّا نئیں چھڈدا۔ (‏متی 6:‏8؛‏ عبرانیوں 13:‏5‏)‏ تے جے یہوواہ سانوں کہندا اے کہ اوہ ساڈیاں ضرورتاں پوریاں کرے گا تے اَسی اوہدے تے پورا بھروسا رکھ سکنے آں۔‏

8.‏ یہوواہ نے داؤد لئی کیہہ کیتا؟‏

⁸ آؤ ہُن اَسی غور کرنے آں کہ یہوواہ نے داؤد دا خیال کیویں رکھیا۔ جدوں داؤد، بادشاہ ساؤل توں اپنی جان بچان لئی بھج رہیا سی تے یہوواہ نے داؤد تے اوہدے ساتھیاں نُوں اوہ چیزاں دِتیاں جنہاں دے ذریعے اوہ زندہ رہ سکدے سن۔ اوس مشکل وقت نُوں یاد کردے ہوئے داؤد نے لکھیا:‏ مَیں پہلاں جوان ساں ہُن بڈھا ہو گیا واں، پر مَیں نہ تے کدی صادق نُوں بے سہارا تے نہ ای اوہدے بچیاں نُوں روٹی لئی ہتھ پھیلاندے ویکھیا اے۔ (‏زبور 37:‏25)‏ داؤد وانگوں تُسی وی ایس گل دا تجربہ کیتا ہوئے گا کہ یہوواہ نے کیس طرحاں مشکل وقت چ تواڈی تے تواڈے بھین بھراواں دی مدد کیتی۔‏

9.‏ اَج یہوواہ کسے آفت دے دوران اپنے بندیاں دی مدد کیویں کردا اے؟ (‏تصویراں نُوں وی ویکھو۔)‏

⁹ یہوواہ اوس ویلے وی اپنے بندیاں دِیاں ضرورتاں پوریاں کردا اے جدوں اوہ کسے آفت دا سامنا کردے نیں۔ مثال لئی، جدوں پہلی صدی چ کال پیا تے فرق فرق علاقیاں چوں مسیحیاں نے اپنے ضرورت‌مند بھین بھراواں لئی چیزاں بھیجیاں۔ (‏اعمال 11:‏27-‏30؛‏ رومیوں 15:‏25، 26‏)‏ اَج وی یہوواہ دے بندے کُھلے دل نال اپنے ضرورت‌مند بھین بھراواں دی مدد کردے نیں۔ جدوں کوئی آفت آندی اے تے یہوواہ اپنے بندیاں دے دل چ ایہہ گل پاندا اے کہ اوہ اوہناں بھین بھراواں نُوں ضرورت دِیاں چیزاں دین جیہڑے اوس آفت توں متاثر ہوئے نیں جیویں کہ کھان پین دیاں چیزاں، کپڑے تے دوائیاں وغیرہ۔ تعمیر دے کم چ حصہ لین والے بھین بھرا اوہناں دے گھراں تے اوہناں عبادت‌گاہواں دی مرمت کردے نیں جنہاں نُوں نقصان ہوندا اے۔ ایہدے علاوہ، یہوواہ دے بندے فوراً اوہناں لوکاں نُوں بائبل چوں تسلی تے امید دیندے نیں جیہڑے آفت دی وجہ توں اپنے گھر والے تے رشتے‌داراں توں وِچھڑ جاندے نیں۔‏c

10، 11.‏ تُسی بورس دے تجربے توں کیہہ سکھیا اے؟‏

¹⁰ یہوواہ اوہناں لوکاں دی وی دل کھول کے مدد کردا اے جیہڑے اوہدی عبادت نئیں کردے۔ یہوواہ دی مثال تے عمل کردے ہوئیاں اَسی وی ایہناں لوکاں دی مدد کرن لئی تیار رہنے آں۔ (‏گلتیوں 6:‏10‏)‏ اِنج کرن دے بڑے چنگے نتیجے نکلدے نیں۔ ایس بارے ذرا بورس ناں دے اِک ہیڈ ماسٹر دی مثال تے غور کرو جیہڑا یوکرین چ رہندا اے۔ بھانویں کہ بورس یہوواہ دا گواہ نئیں اے پر اوہ ہمیشاں اپنے اوہناں طالب‌علماں نال بڑے پیار نال پیش آندا اے جیہڑے یہوواہ دے گواہ نیں تے اوہ اوہناں دے عقیدیاں دا احترام وی کردا اے۔ جنگ دے دوران بورس نے ایہہ فیصلہ کیتا کہ اوہ اپنے پِنڈ نُوں چھڈ کے اپنے ملک دے کسے ہور علاقے چ چلا جائے گا جتھے اوہ محفوظ رہوے۔ ایس دوران ساڈے بھین بھراواں نے اوہدی بڑی مدد کیتی۔ بعد چوں بورس مسیح دی موت دی یادگیری تے گیا۔ جدوں اوہ ایس بارے سوچدا اے کہ ساڈے بھین بھراواں نے اوہدی کیویں مدد کیتی تے اوہ کہندا اے:‏ ”‏یہوواہ دے گواہ میرے نال بڑے پیار نال پیش آئے تے اوہناں نے میرا بڑا خیال رکھیا۔ ایس لئی مَیں دِلوں اوہناں دا شکرگزار آں۔“‏

¹¹ جدوں اَسی ضرورت‌مند لوکاں دی مدد کرنے آں تے اَسی اپنے اسمانی باپ یہوواہ دی مثال تے عمل کر رہے ہنے آں، فیر بھانویں اوہ ساڈے ہم‌ایمان ہون یاں نہ ہون۔ (‏لُوقا 6:‏31،‏ 36‏)‏ سانوں امید اے کہ ساڈی محبت دی وجہ توں لوکاں دے دل چ ساڈے اسمانی باپ نُوں جانن تے مسیح دا شاگرد بنن دی خواہش پیدا ہوئے گی۔ (‏1-‏پطرس 2:‏12‏)‏ بھانویں لوک یہوواہ دی عبادت کرن دا فیصلہ کرن یاں نہ کرن، سانوں اوہناں دی مدد کرن نال اوہ خوشی ملے گی جیہڑی کسے نُوں کجھ دے کے مِلدی اے۔—‏اعمال 20:‏35‏۔‏

یہوواہ ساڈی حفاظت کردا اے

12.‏ یہوواہ کیس لحاظ نال اپنے سارے بندیاں نُوں محفوظ رکھے گا؟ (‏زبور 91:‏1، 2، 14)‏

¹² زبور 91:‏1، 2، 14 نُوں پڑھو۔‏ یہوواہ نے وعدہ کیتا اے کہ اوہ سانوں ہر اوس چیز توں محفوظ رکھے گا جیہڑی اوہدے نال ساڈی دوستی نُوں توڑ سکدی اے۔ اوہ شیطان نُوں ایس گل دی اجازت کدی وی نئیں دَوے گا کہ اوہ اوہدے بندیاں نُوں اوہدی عبادت کرن توں روکے۔ (‏یوحنا 17:‏15‏)‏ اَسی ایس گل تے پورا بھروسا رکھ سکنے آں کہ جدوں وڈی مصیبت آئے گی تے اوہدوں یہوواہ اپنے وعدے مطابق نہ صرف ساڈے ایمان نُوں مضبوط رکھن چ ساڈی مدد کرے گا سگوں سانوں نجات وی دَوائے گا۔—‏مُکاشفہ 7:‏9،‏ 14‏۔‏

13‏.‏ یہوواہ ساڈے وچوں ہر اِک دی کیس طرحاں حفاظت کردا اے؟‏

¹³ یہوواہ ساڈے وچوں ہر اِک دی کیس طرحاں حفاظت کردا اے؟ اوہ اپنے کلام دے ذریعے صحی تے غلط نُوں سمجھن چ ساڈی مدد کردا اے۔ (‏عبرانیوں 5:‏14‏)‏ جدوں اَسی بائبل دے اصولاں مطابق زندگی گزارنے آں تے اَسی یہوواہ نال اپنی دوستی نُوں محفوظ رکھنے آں تے ایہو جہے فیصلے کرنے آں جنہاں دی وجہ توں اَسی خوشیاں بھری تے چنگی زندگی گزار سکنے آں۔ (‏زبور 91:‏4)‏ یہوواہ اپنی کلیسیا دے ذریعے وی ساڈی حفاظت کردا اے۔ (‏یسعیاہ 32:‏1، 2)‏ جدوں اَسی ایہو جہے لوکاں نال وقت گزارنے آں جیہڑے یہوواہ نال محبت کردے نیں تے اوہدے اصولاں مطابق زندگی گزاردے نیں تے اوہناں دِیاں گلاں توں سانوں حوصلہ مِلدا اے۔ ایس طرحاں اَسی ایس دُنیا دی بُری سوچ توں بچ جانے آں۔—‏اَمثال 13:‏20۔‏

14.‏ (‏الف)‏یہوواہ سانوں ہر مشکل توں کیوں نئیں بچاندا؟ (‏ب)‏زبور 9:‏10 چ سانوں کیس گل دا یقین دَوایا گیا اے؟ (‏فٹ‌نوٹ نُوں وی ویکھو۔)‏

¹⁴ ماضی چ یہوواہ نے کدی کدار اپنے بندیاں دِیاں جاناں نُوں وی محفوظ رکھیا۔ پر اوہنے ہر وار اِنج نئیں کیتا۔ ساڈے وچوں کسے تے وی بھیڑا وقت آ سکدا اے تے کسے نال وی اچانک کجھ وی ہو سکدا اے۔ (‏واعظ 9:‏11)‏ ایہدے علاوہ کدی کدار یہوواہ نے اپنے کجھ بندیاں نُوں ظلم وی سہن دِتا تے اوہناں نُوں مرن توں نئیں بچایا تاکہ شیطان جھوٹھا ثابت ہو سکے۔ (‏ایوب 2:‏4-‏6؛‏ متی 23:‏34‏)‏ ایہہ سچ اے کہ شاید یہوواہ اَج وی ساڈیاں مشکلاں نُوں ختم نہ کرے پر اَسی ایس گل دا پکا یقین رکھ سکنے آں کہ اوہ اوہناں لوکاں نُوں کدی وی کلّا نئیں چھڈے گا جیہڑے اوہدے نال پیار کردے نیں۔‏d‏—‏زبور 9:‏10۔‏

یہوواہ سانوں تسلی دیندا اے

15.‏ سانوں دُعا کرن، بائبل پڑھن تے اپنے بھین بھراواں توں تسلی کیویں مِل سکدی اے؟ (‏2-‏کُرنتھیوں 1:‏3، 4‏)‏

¹⁵ 2-‏کُرنتھیوں 1:‏3، 4 نُوں پڑھو۔‏ کدی کدار اَسی دُکھی، پریشان تے مایوس ہو جانے آں۔ ہو سکدا اے کہ تُسی ہُن وی کسے پریشانی چوں لنگھ رہے او جدی وجہ توں تُسی بوہت کلّا محسوس کر رہے او۔ کیہہ توانوں لگدا اے کہ کوئی وی توانوں سمجھ نئیں سکدا؟ ایس گل دا یقین رکھو کہ یہوواہ تواڈے جذباتاں نُوں سمجھدا اے۔ اوہ نہ صرف تواڈے درد نُوں محسوس کردا اے سگوں توانوں ہر طرحاں دی مصیبت چ تسلی وی دیندا اے۔ جدوں اَسی دل کھول کے یہوواہ کولوں دُعا کرنے آں تے فیر اوہ سانوں اوہ ”‏اِطمینان“‏ دیندا اے ”‏جیہڑا سمجھ توں باہر اے۔“‏ (‏فِلپّیوں 4:‏6، 7‏)‏ ایہدے علاوہ، جدوں اَسی بائبل نُوں پڑھنے آں تے سانوں بڑا سکون مِلدا اے۔ جدوں اَسی پڑھنے آں کہ اوہ سانوں کِنّاں پیار کردا اے تے اوہنے سانوں سمجھ تے امید دِتی اے تے ساڈی ٹُٹی ہوئی ہمت فیر توں بحال ہو جاندی اے۔ عبادتاں تے جا کے سانوں بوہت زیادہ تسلی تے حوصلہ مِلدا اے۔ اوتھے اَسی اپنے بھین بھراواں دے پیار نُوں محسوس کرنے آں۔‏

16.‏ تُسی بھرا ناتھن تے بھین پرِسلہ دے تجربے توں کیہہ سکھیا اے؟‏

¹⁶ امریکہ چ رہن والے بھرا ناتھن تے بھین پرِسلہ دی مثال تے غور کرو۔ اوہناں دے تجربے توں اَسی سکھنے آں کہ خدا اپنے کلام دے ذریعے سانوں حوصلہ تے تسلی کیویں دیندا اے۔ کجھ سال پہلاں اوہناں دونواں نے فیصلہ کیتا کہ اوہ اوس جگہ جا کے یہوواہ دی خدمت کرن گے جتھے مبشراں دی زیادہ ضرورت اے۔ بھرا ناتھن نے کہیا:‏ ”‏سانوں پورا بھروسا سی کہ یہوواہ ساڈیاں کوششاں تے ضرور برکت پائے گا۔“‏ پر اوس نوِیں جگہ تے جان توں بعد اوہناں نُوں صحت دے مسئلیاں تے پیسے دھیلے دی تنگی دا سامنا کرنا پیا۔ آخرکار اوہناں نُوں اپنی خدمت چھڈ کے واپس جانا پیا۔ پر اوہناں نُوں فیر وی پیسے دھیلے دی تنگی دا سامنا رہیا۔ پرانے وقت نُوں یاد کردے ہوئے بھرا ناتھن نے کہیا:‏ ”‏اَسی سوچیا سی کہ یہوواہ ساڈیاں کوششاں تے برکت پائے گا۔ پر مَیں حیران ساں کہ اِنج کیوں نئیں ہویا۔ مَیں تے ایتھوں تک سوچن لگ پیا کہ شاید میرے کولوں کوئی غلطی ہوئی اے۔“‏ پر وقت دے نال نال بھرا ناتھن تے بھین پرِسلہ سمجھ گئے کہ یہوواہ نے مشکل وقت چ کدی وی اوہناں دا ساتھ نئیں چھڈیا سی۔ بھرا ناتھن نے کہیا:‏ ”‏اوس مشکل وقت دے دوران بائبل ساڈے لئی اِک دوست وانگوں سی جیہڑی سانوں تسلی تے رہنمائی دیندی سی۔ جدوں اَسی اپنیاں مشکلاں تے دھیان دین دی بجائے ایس گل تے دھیان دِتا کہ یہوواہ نے مشکل وقت چ ساڈی مدد کیویں کیتی تے ساڈا ایس گل تے یقین مضبوط ہویا کہ یہوواہ آن والے وقت چ وی ساڈی مدد کرے گا۔“‏

17.‏ بھین ہیلگا نُوں تسلی کیویں مِلی؟ (‏تصویر نُوں وی ویکھو۔)‏

¹⁷ سانوں اپنے بھین بھراواں دے ذریعے وی تسلی مِلدی اے۔ ایس بارے ذرا بھین ہیلگا دی مثال تے غور کرو جیہڑی ملک ہنگری چ رہندی اے۔ اوہنے کئی سالاں تک صحت دے ایہو جہے مسئلیاں دا سامنا کیتا جنہاں دی وجہ توں اوہ بڑی پریشان رہندی سی تے اپنے آپ نُوں ناکارہ سمجھدی سی۔ پر ہُن جدوں اوہ اوس وقت نُوں یاد کردی اے تے اوہ ایہہ صاف ویکھ سکدی اے کہ یہوواہ نے کلیسیا دے بھین بھراواں دے ذریعے اوہنوں کِنّی تسلی دِتی۔ اوہنے کہیا:‏ ”‏یہوواہ نے جدوں ویکھیا کہ نوکری کرن، اپنے بیمار بچے دی دیکھ‌بھال کرن تے ہور مشکلاں دی وجہ توں میری طاقت گھٹ ہو رہی اے تے اوہنے میری بڑی مدد کیتی۔ پچھلے 30 سالاں دے دوران اِک دن وی ایہو جیہا نئیں سی جدے چ خدا نے اپنا ایہہ وعدہ پورا نہ کیتا ہوئے کہ اوہ مینوں تسلی دَوے گا۔ اوہنے اکثر دُوجیاں دِیاں گلاں دے ذریعے میرا حوصلہ ودھایا۔ بھین بھرا اکثر مینوں ایہو جہے میسج تے کارڈ گھلدے سن یاں شاباش دیندے سن جدی مینوں اوس ویلے بڑی لوڑ ہوندی سی۔“‏

18.‏ اَسی دُوجیاں نُوں تسلی کیویں دے سکنے آں؟‏

¹⁸ ساڈے لئی ایہہ بڑے مان دی گل اے کہ اَسی اپنے اسمانی باپ یہوواہ وانگوں دُوجیاں نُوں تسلی دے سکنے آں۔ پر اَسی اِنج کیویں کر سکنے آں؟ اَسی اوہناں دی گل دھیان نال سُن سکنے آں، اوہناں نال پیار تے نرمی نال گل کر سکنے آں تے ایہو جہے طریقیاں نال اوہناں دی مدد کر سکنے آں جدی اوہناں نُوں واقعی ضرورت اے۔ (‏اَمثال 3:‏27)‏ اَسی اوہناں سارے لوکاں نُوں تسلی دین دی کوشش کرنے آں جیہڑے مشکلاں چوں لنگھ رہے نیں۔ ایہناں چ اوہ لوک وی شامل نیں جیہڑے یہوواہ دی عبادت نئیں کردے۔ جدوں ساڈے پڑوسی کسے وجہ توں دُکھی، پریشان یاں بیمار ہوندے نیں تے اَسی اوہناں نُوں مِلن جا سکنے آں، اوہناں دی گل دھیان نال سُن سکنے آں تے بائبل چوں اوہناں نُوں کوئی ایت پڑھ کے سنا سکنے آں جدے توں اوہناں نُوں تسلی ملے۔ جدوں اَسی تسلی دین والے خدا یہوواہ دی مثال تے عمل کردے ہوئے اپنے ہم‌ایماناں دا حوصلہ ودھانے آں تے اِنج اَسی مشکلاں دا مقابلہ کرن چ اوہناں دی مدد کر رہے ہنے آں۔ ایہدے علاوہ جدوں اَسی اوہناں لوکاں نُوں تسلی دینے آں جیہڑے یہوواہ دی عبادت نئیں کردے تے اِنج اَسی اوہناں دے دل نُوں نرم کر رہے ہنے آں تاکہ اوہ یہوواہ بارے سکھن۔—‏متی 5:‏16‏۔‏

یہوواہ ساڈی مدد کرن لئی ہمیشاں تیار اے

19.‏ یہوواہ ساڈے لئی کیہہ کجھ کردا اے تے اَسی اوہدی مثال تے کیویں عمل کر سکنے آں؟‏

¹⁹ یہوواہ نُوں اپنے اوہناں سارے بندیاں دی فکر اے جیہڑے اوہنوں پیار کردے نیں۔ جدوں اَسی مشکلاں چوں لنگھ رہے ہنے آں تے یہوواہ سانوں کلّا نئیں چھڈدا۔ جیویں ماں پیو بڑے پیار نال اپنے بچیاں دا خیال رکھدے نیں، اوسے طرحاں ساڈا اسمانی باپ ساڈا خیال رکھدا اے۔ اوہ ساڈی رہنمائی کردا اے، ساڈیاں ضرورتاں نُوں پورا کردا اے، ساڈی حفاظت کردا اے تے مشکل وقت چ سانوں تسلی دیندا اے۔ جدوں اَسی مشکلاں چ دُوجیاں دا ساتھ دینے آں تے اوہناں دا حوصلہ ودھانے آں تے اَسی اپنے اسمانی باپ دی مثال تے عمل کر رہے ہنے آں۔ ایس گل چ کوئی شک نئیں کہ ایس دُنیا چ رہندے ہوئیاں سانوں مشکلاں تے تکلیفاں دا سامنا کرنا پیندا اے۔ پر اَسی ایس گل دا پکا یقین رکھ سکنے آں کہ یہوواہ ہمیشاں ساڈے نال ہوئے گا۔ اوہنے ساڈے نال وعدہ کیتا اے:‏ ڈر نہ کیونکہ مَیں تیرے نال آں۔ (‏یسعیاہ 41:‏10)‏ ایس وعدے توں ساڈا ایس گل تے بھروسا ودھدا اے کہ اَسی کدی وی کلّے نئیں آں۔‏