یسوع دی نظر چ یہوواہ دا ناں کِنّاں اہم اے؟‏

1، 2.‏ (‏الف)‏یسوع نے اپنی موت توں اِک رات پہلاں کیہہ کیتا؟ (‏ب)‏ایس مضمون چ اَسی کیہڑے سوالاں تے غور کراں گے؟‏

جمعرات 14 نیسان 33 عیسوی دی شام نُوں یسوع مسیح نے اپنے وفادار رسولاں دے نال اِک خاص تقریب منائی۔ یسوع جان دا سی کہ اوسے رات یہوداہ اِسکریوتی اوہنوں دھوکھا دَوے گا تے ایہدے بعد اوہدے دُشمن اوہدے تے بوہت ظلم کرن گے تے اوہنوں مار دین گے۔ ایس لئی یسوع نے اپنی موت توں پہلاں شاگرداں دا حوصلہ ودھان لئی اوہناں نال بوہت ساریاں گلاں کیتیاں۔ فیر یسوع نے دُعا کیتی تے اوہ سارے اوس کمرے چوں چلے گئے جتھے اوہ کھانا کھا رہے سن۔ سانوں یسوع دی ایہہ دُعا یوحنا دی اِنجیل دے 17 باب چ مِلدی اے۔‏

² یسوع دی ایس دُعا توں ایہہ کیویں پتہ چلدا اے کہ اوہ اوس ویلے کیہڑی گل بارے فکرمند سی؟ ایہدے علاوہ، اوہدی دُعا توں ایہہ کیویں ظاہر ہوندا اے کہ زمین تے اپنی خدمت دے دوران کیہڑی گل اوہدے لئی سب توں زیادہ اہم سی؟ آؤ ایہناں سوالاں تے غور کرنے آں۔‏

‏”‏مَیں ایہناں نُوں تیرے ناں بارے سکھایا اے“‏

3.‏ یسوع نے یہوواہ دے ناں بارے کیہہ کہیا تے اوہدی گل دا کیہہ مطلب سی؟ (‏یوحنا 17:‏6،‏ 26‏)‏

³ یسوع نے دُعا چ یہوواہ نُوں کہیا:‏ ”‏مَیں ایہناں نُوں تیرے ناں بارے سکھایا اے۔“‏ یسوع نے ایہہ گل دو وار کہی۔ ایہدے توں پتہ چلدا اے کہ یسوع دی نظر چ یہوواہ دے ناں دی بڑی اہمیت سی۔ ‏(‏یوحنا 17:‏6،‏ 26 نُوں پڑھو۔)‏ پر اوہدی گل دا کیہہ مطلب سی؟ کیہہ اوہنے اپنے شاگرداں نُوں ایہہ دَسیا سی کہ خدا دا ناں یہوواہ اے؟ یسوع دے شاگرد یہودی سن ایس لئی اوہ پہلاں توں ای یہوواہ دا ناں جان دے سن۔ ایہہ ناں عبرانی صحیفیاں چ ہزاراں وار آیا اے۔ ایہدا مطلب اے کہ یسوع اپنے شاگرداں نُوں یہوواہ دا ناں نئیں دَس رہیا سی سگوں اوہ اوہناں نُوں ایہہ دَس رہیا سی کہ یہوواہ کیہو جیہا خدا اے۔ اوہنے اپنے شاگرداں دی مدد کیتی کہ اوہ یہوواہ نُوں ہور چنگی طرحاں جانن جیویں کہ زمین تے انساناں بارے اوہدا مقصد کیہہ اے، اوہنے کیہڑے شاندار کم کیتے نیں، اوہ مستقبل چ کیہہ کجھ کرے گا تے اوہدے چ کیہڑیاں خوبیاں نیں۔ یسوع مسیح یہوواہ نُوں سب توں چنگی طرحاں جان دا سی ایس لئی اوہی ایہناں گلاں بارے سب توں ودھیا طریقے نال سکھا سکدا سی۔‏

4، 5.‏ (‏الف)‏کسے دا ناں ساڈی نظر چ زیادہ اہم کیویں بن جاندا اے؟ مثال دَوو۔ (‏ب)‏یہوواہ دا ناں یسوع دے شاگرداں دی نظر چ زیادہ اہم کیویں بن گیا؟‏

⁴ کسے دا ناں ساڈے لئی زیادہ اہم کیویں بن جاندا اے؟ ایس سوال دا جواب جانن لئی ایس مثال تے غور کرو۔ فرض کرو کہ تواڈی کلیسیا چ اِک بزرگ اے جدا ناں ڈیوڈ اے۔ اوہ ڈاکٹر اے تے تُسی اوہنوں کئی سالاں توں جان دے او۔ فیر اِک دن اچانک تواڈی طبیعت بوہت زیادہ خراب ہو جاندی اے تے توانوں فوراً ہسپتال لجایا جاندا اے جتھے بھرا ڈیوڈ وی کم کردا اے۔ اوہ تواڈا علاج کردا اے تے تواڈی جان بچاندا اے۔ یقیناً ہُن تواڈے دل چ اوہدے لئی عزت تے محبت ہور ودھ جائے گی۔ ایہدے بعد جدوں وی تُسی اوہدا ناں سُنو گے تے توانوں فوراً یاد آ جائے گا کہ اوہنے تواڈے لئی کیہہ کیتا اے۔ ہُن تواڈی نظر چ بھرا ڈیوڈ صرف تواڈی کلیسیا دا اِک بزرگ ای نئیں اے جنہوں تُسی کئی سالاں توں جان دے او سگوں اِک ڈاکٹر وی اے جنہے تواڈی جان بچائی اے۔‏

⁵ ایسے طرحاں یسوع مسیح دے شاگرد وی یہوواہ دا ناں پہلاں توں ای جان دے سن۔ پر زمین تے یسوع دی خدمت دی وجہ توں اوہناں دی نظر چ یہوواہ دا ناں ہور خاص بن گیا۔ اَسی اِنج کیوں کہہ سکنے آں؟ کیونکہ یسوع مسیح نے جو کجھ وی سکھایا تے جیہڑے وی کم کیتے، اوہدے توں ظاہر ہویا کہ اوہدا باپ کیہو جہی ہستی اے۔ ایس لئی جدوں شاگرداں نے یسوع دے تلیم دین دے طریقے تے غور کیتا تے ایہہ ویکھیا کہ اوہ لوکاں نال کیویں پیش آندا اے تے اوہ یہوواہ نُوں چنگی طرحاں جان سکے۔—‏یوحنا 14:‏9؛‏ 17:‏3‏۔‏

تُوں مینوں اپنا ناں دِتا اے

6.‏ یہوواہ نے کیس لحاظ نال یسوع نُوں اپنا ناں دِتا؟ (‏یوحنا 17:‏11، 12‏)‏

⁶ یسوع نے اپنے شاگرداں لئی یہوواہ کولوں ایہہ دُعا کیتی:‏ ”‏اپنے ناں دی خاطر جیہڑا تُوں مینوں دِتا اے، اوہناں دی حفاظت کر۔“‏ ‏(‏یوحنا 17:‏11، 12 نُوں پڑھو۔)‏ کیہہ ایس گل دا ایہہ مطلب سی کہ ہُن یسوع دا ناں یہوواہ ہو گیا سی؟ نئیں۔ غور کرو کہ جدوں یسوع نے یہوواہ دے ناں بارے گل کیتی تے اوہنے یہوواہ نُوں کہیا:‏ ”‏اپنے ناں دی خاطر۔“‏ ایہدا مطلب اے کہ ناں یہوواہ یسوع دا ذاتی ناں نئیں بن گیا سی۔ تے فیر یسوع دی ایس گل دا کیہہ مطلب سی کہ تُوں مینوں اپنا ناں دِتا اے؟ ایہدے لئی آؤ کجھ گلاں تے غور کرنے آں۔ سب توں پہلی گل ایہہ وے کہ یسوع یہوواہ دا نمائندہ سی تے اوہدے وَلّوں بولدا سی۔ اوہ اپنے باپ دے ناں تے آیا سی تے اوہنے اوہدے ای ناں تے بڑے زبردست معجزے کیتے۔ (‏یوحنا 5:‏43؛‏ 10:‏25‏)‏ دُوجی گل ایہہ وے کہ یسوع دے ناں دا مطلب اے:‏ ”‏یہوواہ نجات اے۔“‏ ایس لئی یسوع دا ناں یہوواہ دے ناں نال جُڑیا اے۔‏

7.‏ اِک مثال دے کے دَسو کہ یسوع یہوواہ وَلّوں گل کیویں کر سکدا سی؟‏

⁷ ذرا اِک مثال تے غور کرو کہ یسوع مسیح یہوواہ وَلّوں کیویں گل کر سکدا سی۔ جدوں اِک حکمران اپنے اِک نمائندے نُوں کسے نال گل کرن لئی گھل دا اے تے جو کجھ اوہدا نمائندہ بول رہیا ہوندا اے، اوہ اِنج ای ہوندا اے جیویں اوہ حکمران آپ گل کر رہیا اے۔ ایسے طرحاں یسوع وی یہوواہ دا نمائندہ سی تے لوکاں نال اوہدے وَلّوں ای گل کر دا سی۔—‏متی 21:‏9؛‏ لُوقا 13:‏35‏۔‏

8.‏ یسوع دے زمین تے آن توں پہلاں یہوواہ نے اوہدے بارے ایہہ کیوں کہیا کہ اوہ میرے ناں تے آندا اے؟ (‏خروج 23:‏20، 21)‏

⁸ بائبل چ یسوع مسیح نُوں ”‏کلام“‏ کہیا گیا اے کیونکہ اوہ فرشتیاں تے انساناں نُوں یہوواہ وَلّوں ہدیتاں دیندا سی۔ (‏یوحنا 1:‏1-‏3‏)‏ یسوع ای اوہ فرشتہ سی جنہوں یہوواہ نے ویرانے چ بنی‌اِسرائیل دی رہنمائی کرن لئی گھلیا سی۔ جدوں یہوواہ نے اِسرائیلیاں نُوں کہیا کہ اوہ ایس فرشتے دی گل منن تے نال ای اوہنے ایس فرشتے بارے ایہہ کہیا کہ اوہ میرے ناں تے آندا اے۔‏a ‏(‏خروج 23:‏20، 21 نُوں پڑھو۔)‏ یہوواہ نے ایہہ ایس لئی کہیا کیونکہ یسوع یہوواہ دا نمائندہ اے تے اوہ ہستی اے جیہڑا سب توں ودھیا طریقے نال ایہہ ثابت کردا اے کہ یہوواہ دا ناں پاک اے تے اوہدا ہر کم صحی اے۔‏

‏”‏اَے باپ، اپنے ناں دی وڈیائی کر“‏

9.‏ یسوع دی نظر چ یہوواہ دا ناں کِنّاں اہم سی؟ وضاحت کرو۔‏

⁹ اَسی ویکھیا اے کہ زمین تے آن توں پہلاں ای یہوواہ دا ناں یسوع لئی سب توں اہم سی۔ ایسے لئی ایہہ حیرانی دی گل نئیں اے کہ جدوں اوہ زمین تے آیا تے اوہدے ہر کم توں ایہہ ظاہر ہویا کہ اوہدی نظر چ یہوواہ دا ناں کِنّاں اہم اے۔ زمین تے اپنی خدمت دے آخری دِناں چ اوہنے دُعا چ یہوواہ نُوں کہیا:‏ ”‏اَے باپ، اپنے ناں دی وڈیائی کر۔“‏ فیر یہوواہ نے فوراً اپنی گرج‌دار آواز چ یسوع نُوں جواب دِتا:‏ ”‏مَیں ایہدی وڈیائی کیتی اے تے دُبارہ وی کراں گا۔“‏—‏یوحنا 12:‏28‏۔‏

10، 11.‏ (‏الف)‏یسوع نے اپنے باپ دے ناں دی وڈیائی کیویں کیتی؟ (‏تصویر نُوں وی ویکھو۔)‏ (‏ب)‏یہوواہ دے ناں دا پاک ثابت ہونا کیوں ضروری اے؟‏

¹⁰ یسوع نے آپ وی اپنے باپ دے ناں دی وڈیائی کیتی۔ اوہ کیویں؟ اوہنے دُوجیاں نُوں اپنے باپ دِیاں خوبیاں تے اوہدے شاندار کماں بارے دَسیا۔ پر یہوواہ دے ناں دی وڈیائی کرن لئی یسوع نُوں کجھ ہور وی کرن دی لوڑ سی۔ اوہنوں اپنے اسمانی باپ دے ناں نُوں پاک ثابت کرن تے اوہدے ناں تے لگے الزاماں نُوں جھوٹھا ثابت کرن دی لوڑ سی۔ ایس گل دی اہمیت اوہدوں ہور وی واضح ہو گئی جدوں یسوع نے اپنے شاگرداں نُوں دُعا کرنی سکھائی۔ اوہنے کہیا:‏ ”‏اَے ساڈے اسمانی باپ، تیرا ناں پاک منیا جائے۔“‏—‏متی 6:‏9‏۔‏

¹¹ یہوواہ دے ناں دا پاک ثابت ہونا ایناں اہم کیوں اے؟ کیونکہ عدن دے باغ چ شیطان نے یہوواہ دے ناں نُوں بدنام کیتا سی تے اوہدے تے جھوٹھے اِلزام لائے سن۔ اوہنے ایہہ دعویٰ کیتا سی کہ یہوواہ جھوٹھا اے تے اوہ آدم تے حوا نُوں اوہ چیز نئیں دے رہیا جیہڑی اوہناں لئی چنگی اے۔ (‏پیدائش 3:‏1-‏5)‏ اِنج کرن نال اصل چ شیطان ایہہ کہہ رہیا سی کہ یہوواہ دا حکمرانی کرن دا طریقہ صحی نئیں اے۔ شیطان نے یہوواہ تے جھوٹھے اِلزام لا کے اوہدی ذات تے اوہدے ناں نُوں بدنام کیتا۔ ایوب دے زمانے چ شیطان نے ایہہ دعویٰ کیتا کہ انسان صرف اپنے مطلب لئی یہوواہ دی عبادت کردے نیں۔ ایس جھوٹھی تے مکار ہستی نے ایہہ دعویٰ وی کیتا کہ کوئی وی انسان یہوواہ نال سچی محبت نئیں کردا۔ ایس لئی جدوں انساناں تے مشکل وقت آئے گا تے اوہ یہوواہ دی خدمت کرنا چھڈ دین گے۔ (‏ایوب 1:‏9-‏11؛ 2:‏4)‏ ایہہ ثابت کرن لئی وقت دی ضرورت سی کہ یہوواہ سچا اے یاں شیطان۔‏

‏”‏مَیں اپنی جان دینا واں“‏

12.‏ یسوع یہوواہ دے ناں نال محبت کرن دی وجہ توں کیہہ کرن لئی تیار سی؟‏

¹² یسوع یہوواہ نال اینی محبت کردا سی کہ اوہ یہوواہ دے ناں نُوں پاک ثابت کرن لئی کسے وی حد تک جان لئی تیار سی۔ اوہنے کہیا:‏ ”‏مَیں اپنی جان دینا واں۔“‏ (‏یوحنا 10:‏17، 18‏)‏ واقعی، یسوع تے یہوواہ دے ناں لئی اپنی جان دین لئی وی تیار سی۔‏b پہلے بے‌عیب انسان یعنی آدم تے حوا نے یہوواہ توں مُونہہ موڑ لیا تے شیطان دا ساتھ دِتا۔ پر یسوع اوہناں ورگا نئیں سی۔ اوہ تے خوشی نال زمین تے آن تے ایس گل نُوں ثابت کرن لئی تیار سی کہ اوہ یہوواہ نال کِنّاں پیار کردا اے۔ (‏عبرانیوں 4:‏15؛‏ 5:‏7-‏10‏)‏اوہ ساری زندگی یہوواہ دا وفادار رہیا، ایتھوں تک کہ اوہنے سُولی تے اپنی جان دے دِتی۔ (‏عبرانیوں 12:‏2‏)‏ اِنج اوہنے ثابت کیتا کہ اوہ یہوواہ تے اوہدے ناں نال کِنّی محبت کردا اے۔‏

13.‏ شیطان نُوں جھوٹھا ثابت کرن لئی یسوع توں بہتر کوئی ہور کیوں نئیں ہو سکدا سی؟ (‏تصویر نُوں وی ویکھو۔)‏

¹³ یسوع نے جیس طرحاں زندگی گزاری، اوہدے توں ایہہ ثابت ہو گیا کہ یہوواہ نئیں سگوں شیطان جھوٹھا اے۔ (‏یوحنا 8:‏44‏)‏ کائنات دی کوئی وی ہستی یہوواہ نُوں اینی چنگی طرحاں نئیں جان دی جِنّی چنگی طرحاں یسوع جان دا سی۔ ایس لئی شیطان نے یہوواہ تے جیہڑے اِلزام لائے سن، جے اوہ سچ ہوندے تے یسوع نُوں ایہدے بارے ضرور پتہ ہوندا۔ پر ایہہ سارے اِلزام جھوٹھے نیں ایس لئی یسوع نے اپنے باپ دے حق چ بولن دا پکا ارادہ کیتا ہویا سی۔ اوہ اوہدوں وی اوہدا وفادار رہیا جدوں یہوواہ نے اوہدی حفاظت کرنی چھڈ دِتی سی۔ یسوع نے یہوواہ دے خلاف جان دی بجائے مرنا بہتر سمجھیا۔—‏متی 27:‏46‏۔‏c

مَیں اوہ کم پورا کیتا جیہڑا تُوں مینوں دِتا سی

14.‏ یہوواہ نے یسوع نُوں اوہدی وفاداری دا کیہہ اجر دِتا؟‏

¹⁴ یسوع نے اپنی موت توں اِک رات پہلاں دُعا چ یہوواہ نُوں کہیا کہ مَیں اوہ کم پورا کیتا جیہڑا تُوں مینوں دِتا سی۔ یسوع نُوں پورا بھروسا سی کہ یہوواہ اوہدی وفاداری دا اجر ضرور دَوے گا۔ (‏یوحنا 17:‏4، 5‏)‏ یہوواہ نے وی اپنے پُتر دے ایس بھروسے نُوں ٹُٹن نئیں دِتا تے اوہنوں قبر چ رہن نئیں دِتا۔ (‏اعمال 2:‏23، 24‏)‏ یہوواہ نے یسوع نُوں زندہ کر دِتا تے اوہنوں اسمان تے پہلاں توں زیادہ اُچا رُتبہ دِتا۔ (‏فِلپّیوں 2:‏8، 9‏)‏ آخرکار یسوع نے خدا دی بادشاہی دے بادشاہ دے طور تے حکمرانی کرنی شروع کر دِتی۔ ایہہ بادشاہی کیہہ کجھ کرے گی؟ غور کرو کہ یسوع نے دُعا سکھاندے ویلے کیہہ کہیا۔ اوہنے کہیا:‏ ”‏تیری بادشاہی آئے۔ تیری مرضی جیویں اسمان تے پوری ہوندی اے، اونویں ای زمین تے وی ہوئے۔“‏—‏متی 6:‏10‏۔‏

15.‏ یسوع مستقبل چ ہور کیہہ کجھ کرے گا؟‏

¹⁵ چھیتی ای یسوع ہرمجدون دی جنگ چ یہوواہ دے دُشمناں نُوں ختم کر دَوے گا۔ (‏مُکاشفہ 16:‏14،‏ 16؛‏ 19:‏11-‏16‏)‏ ایہدے تھوڑی دیر بعد، اوہ شیطان نُوں اتھاہ گڑھے چ قید کر دَوے گا جتھے اوہ کجھ وی نئیں کر سکے گا۔ (‏مُکاشفہ 20:‏1-‏3‏)‏ فیر یسوع اِک ہزار سال تک حکمرانی کرے گا جدے دوران اوہ زمین تے امن قائم کرے گا تے بے‌عیب بنن چ انساناں دی مدد کرے گا۔ ایہدے علاوہ اوہ مُردیاں نُوں زندہ کرے گا تے پوری زمین نُوں عدن دے باغ وانگوں سوہنا بنا دَوے گا۔ اِنج یہوواہ دا مقصد پورا ہو جائے گا۔—‏مُکاشفہ 21:‏1-‏4‏۔‏

16.‏ جدوں یسوع مسیح اِک ہزار سال لئی بادشاہی کر لوے گا تے ایہدے آخر تے کیہہ ہوئے گا؟‏

¹⁶ جدوں یسوع مسیح اِک ہزار سال لئی حکمرانی کر لوے گا تے ایہدے آخر تے انساناں دی زندگی کیہو جہی ہوئے گی؟ سارے لوک گُناہ تے ہر طرحاں دے عیب توں پاک ہو جان گے۔ فیر اوہناں نُوں فدیے دی بنا تے اپنے گُناہواں دی معافی حاصل کرن دی لوڑ نئیں ہوئے گی۔ اوہدوں کسے وِچولے دی وی لوڑ نئیں ہوئے گی کہ اوہ لوکاں دی یہوواہ نال صلح کرائے۔ اوس ویلے آخری دُشمن یعنی آدم دے گُناہ دی وجہ توں آن والی موت نُوں وی ختم کر دِتا جائے گا۔ مُردیاں نُوں زندہ کر دِتا جائے گا تے قبراں دا ناں نشان مٹ جائے گا۔ زمین تے موجود ہر انسان بے‌عیب ہو جائے گا۔—‏1-‏کُرنتھیوں 15:‏25، 26‏۔‏

17، 18.‏ (‏الف)‏یسوع دی ہزار سالہ حکمرانی دے آخر تے کیہہ ہوئے گا؟ (‏ب)‏جدوں یسوع دی ہزار سالہ حکمرانی ختم ہو جائے گی تے ایہدے بعد اوہ کیہہ کرے گا؟ (‏1-‏کُرنتھیوں 15:‏24،‏ 28‏)‏ (‏تصویر نُوں وی ویکھو۔)‏

¹⁷ یسوع مسیح دی ہزار سالہ حکمرانی دے آخر تے ہور کیہہ کجھ ہوئے گا؟ اوس ویلے اِک بڑی زبردست گل ہوئے گی۔ یہوواہ دے پاک ناں تے لگے اِلزام پوری طرحاں مٹ جان گے۔ ایس توں بعد کوئی وی ایس گل تے شک نئیں کرے گا کہ یہوواہ پاک تے اِنصاف پسند خدا اے۔ اَسی ایہہ کیوں کہہ سکنے آں؟ عدن دے باغ چ شیطان نے ایہہ دعویٰ کیتا سی کہ یہوواہ جھوٹھا اے تے اوہ محبت دی وجہ توں انساناں تے حکمرانی نئیں کردا۔ اوہدوں توں ای یہوواہ دے وفادار بندیاں نے وار وار اوہدے ناں تے لگے الزاماں نُوں جھوٹھا ثابت کیتا اے۔ یسوع دی ہزار سالہ بادشاہی دے آخر تے یہوواہ دے ناں تے لگے اِلزام پوری طرحاں مِٹ جان گے تے اوہدا ناں پاک ٹھہرے گا۔ اِنج ایہہ ثابت ہو جائے گا کہ یہوواہ اِک پیار کرن والا باپ اے۔‏

¹⁸ آخر کار شیطان دے سارے دعوے جھوٹھے ثابت ہو جان گے۔ جدوں یسوع دی ہزار سالہ حکمرانی ختم ہوئے گی تے ایہدے بعد اوہ کیہہ کرے گا؟ کیہہ اوہ شیطان وانگوں یہوواہ دے خلاف بغاوت کرے گا؟ بالکل نئیں۔ ‏(‏1-‏کُرنتھیوں 15:‏24،‏ 28 نُوں پڑھو۔)‏ اوہ بادشاہی نُوں واپس اپنے باپ دے حوالے کر دَوے گا تے اوہدے تابع ہو جائے گا۔ ایہدے چ کوئی شک نئیں کہ یسوع خوشی خوشی اپنا سارا اِختیار یہوواہ نُوں دین لئی تیار اے کیونکہ اوہ اوہنوں پیار کردا اے۔‏

19.‏ یسوع دی نظر چ یہوواہ دا ناں کِنّاں اہم اے؟‏

¹⁹ ہُن اَسی ایہہ گل سمجھ گئے آں کہ کیوں یہوواہ نے یسوع نُوں اپنا ناں دِتا اے۔ اوہ اپنے باپ دا بہترین نمائندہ ثابت ہویا اے۔ یسوع دی نظر چ یہوواہ دا ناں کِنّاں اہم اے؟ ایہہ اوہدے لئی ہر چیز توں زیادہ اہم اے۔ اوہ ایس ناں دی خاطر اپنی جان دین لئی وی تیار سی تے ایس ناں نال محبت کرن دی وجہ توں اوہ اپنی ہزار سالہ بادشاہی دے آخر تے خوشی نال سارا اِختیار اپنے باپ نُوں واپس دے دَوے گا۔ پر اَسی یسوع دی مثال تے کیویں عمل کر سکنے آں؟ ایس سوال دا جواب اگلے مضمون چ دِتا جائے گا۔‏