اَسی خدا دے وفادار بندیاں دِیاں آخری نصیحتاں توں کیہہ سکھ سکنے آں؟‏

1.‏ سانوں وڈیرے بھین بھراواں کولوں کیوں سکھنا چاہی دا اے؟‏

سانوں ساریاں نُوں زندگی دے اہم فیصلے کرن لئی رہنمائی دی لوڑ ہوندی اے۔ اَسی ایہہ رہنمائی بزرگاں تے پُختہ مسیحیاں کولوں حاصل کر سکنے آں۔ جے اوہ مسیحی کافی وڈیرے ہو چُکے نیں تے سانوں ایہہ نئیں سوچ لینا چاہی دا کہ اوہناں دے مشورے ساڈے زمانے چ فائدےمند ثابت نئیں ہو سکدے۔ یہوواہ چاہندا اے کہ اَسی وڈیرے بھین بھراواں کولوں سکھیے کیونکہ اوہناں کول ساڈے نالوں بوہتا زندگی دا تجربہ تے سمجھ اے۔—‏ایوب 12:‏12۔‏

2.‏ ایس مضمون چ اَسی کیس گل تے غور کراں گے؟‏

² پرانے وقتاں چ یہوواہ نے اپنے وفادار وڈیرے بندیاں دے ذریعے اپنے لوکاں نُوں حوصلہ دِتا تے اوہناں دی رہنمائی کیتی جیویں کہ موسیٰ، داؤد تے یوحنا رسول دے ذریعے۔ اوہ تِنے فرق فرق دَور چ رہندے سن تے اوہناں دے حالات وی اِک دُوجے نالوں کافی فرق سن۔ اوہناں تِناں نے مرن توں پہلاں جوان لوکاں نُوں کجھ نصیحتاں کیتیاں جدے چ اوہناں نے ایس گل تے زور دِتا کہ خدا دے فرمانبردار رہنا کِنّاں ضروری اے۔ یہوواہ نے اوہناں دِیاں نصیحتاں نُوں اپنے کلام چ لکھوایا تاکہ اَسی اَج اوہناں توں فائدہ حاصل کر سکئے۔ بھانویں اَسی جوان آں یاں وڈیرے، سانوں ساریاں نُوں اوہناں دِیاں نصیحتاں تے غور کرن نال فائدہ ہو سکدا اے۔ (‏رومیوں 15:‏4؛‏ 2-‏تیمُتھیُس 3:‏16‏)‏ ایس مضمون چ اَسی ویکھاں گے کہ موسیٰ، داؤد تے یوحنا رسول نے مرن توں پہلاں کیہڑیاں نصیحتاں کیتیاں تے اَسی اوہناں دِیاں نصیحتاں توں کیہہ سکھ سکنے آں۔‏

تُسی لمی عمر پاؤ گے

3.‏ موسیٰ نے کیہڑے کیہڑے طریقے نال یہوواہ دی خدمت کیتی؟‏

³ موسیٰ نے پورے دل نال یہوواہ دی خدمت کیتی۔ اوہنے اِک نبی دے طور تے کم کیتا، بنی‌اِسرائیل دا اِنصاف کیتا، اوہناں دی رہنمائی کیتی تے پاک کلام دے کجھ حصے لکھے۔ ایس لئی اوہدے کول بڑا تجربہ سی۔ یہوواہ نے اوہدے ذریعے بنی‌اِسرائیل نُوں مصر دی غلامی چوں کڈھیا تے موسیٰ نے اپنے اَکھیں یہوواہ دے معجزے ویکھے۔ یہوواہ نے اوہدے ذریعے بائبل دِیاں پہلیاں پنج کتاباں تے زبور 90 لکھوایا۔ اِنج لگدا اے کہ زبور 91 تے ایوب دی کتاب وی موسیٰ نے ای لکھی سی۔‏

4.‏ موسیٰ نے کنہاں دا حوصلہ ودھایا تے کیوں؟‏

⁴ موسیٰ 120 سال دی عمر چ فوت ہویا۔ اوہنے مرن توں پہلاں ساری اِسرائیلی قوم نُوں کٹھا کیتا تاکہ اوہ اوہناں نُوں یہوواہ دے اوہ شاندار کم یاد دَوائے جیہڑے اوہناں نے ویکھے سن۔ اوہناں وچوں کئی اِسرائیلیاں نے اپنی جوانی چ یہوواہ دے معجزے ویکھے سن تے ایہہ وی ویکھیا سی کہ یہوواہ نے کیویں مصریاں نُوں سزا دِتی سی۔ (‏خروج 7:‏3، 4)‏ اوہناں نے بحرِقلزم نُوں دو حصے ہوندیاں ویکھیا سی تے اوہدے چوں لنگھ کے آئے سن۔ نالے اوہناں نے ایہہ وی ویکھیا سی کہ کیویں یہوواہ نے فرعون تے اوہدی فوج نُوں سمندر چ غرق کر دِتا سی۔ (‏خروج 14:‏29-‏31)‏ ویرانے چ اوہناں نے ویکھیا سی کہ یہوواہ نے اوہناں دی حفاظت کیتی سی تے اوہناں دا خیال رکھیا سی۔ (‏اِستثنا 8:‏3، 4)‏ ہُن بنی‌اِسرائیل اوس ملک چ جان ای والے سن جدا یہوواہ نے وعدہ کیتا سی۔ ایس لئی موسیٰ مرن توں پہلاں اوہناں دا حوصلہ ودھانا چاہندا سی۔‏a

5.‏ اِستثنا 30:‏19، 20 دے مطابق موسیٰ نے مرن توں پہلاں جیہڑی گل کہی، اوہدے توں بنی‌اِسرائیل نُوں کیہہ حوصلہ مِلیا ہوئے گا؟‏

⁵ موسیٰ نے کیہہ کہیا؟‏ (‏اِستثنا 30:‏19، 20 نُوں پڑھو۔)‏ موسیٰ نے بنی‌اِسرائیل نُوں یاد دَوایا کہ اوہناں نُوں بوہت ساریاں برکتاں مِلن والیاں نیں تے اوہ اوس ملک چ لمی عمر پا سکدے نیں جنہوں دین دا وعدہ یہوواہ نے اوہناں نال کیتا اے۔ واقعی اوہ ملک بوہت ای خوب‌صورت سی۔ موسیٰ نے اوس ملک بارے ایہہ کہیا:‏ اوہ توانوں وڈے وڈے تے ودھیا شہر دَوے گا جیہڑے تُسی نئیں بنائے تے ایہو جہے گھر دَوے گا جیہڑے ہر طرحاں دِیاں ودھیا چیزاں نال بھرے ہون گے جنہاں لئی تُسی محنت نئیں کیتی تے اوہ توانوں حوض دَوے گا جیہڑے تُسی نئیں پُٹے تے انگوراں دے باغ تے زیتون دے درخت دَوے گا جیہڑے تُسی نئیں لائے۔—‏اِستثنا 6:‏10، 11۔‏

6.‏ خدا نے دُوجیاں قوماں نُوں ایہہ اجازت کیوں دِتی کہ اوہ اِسرائیلیاں دے ملک نُوں فتح کر لین؟‏

⁶ موسیٰ نے بنی‌اِسرائیل نُوں ایس گل توں وی آگاہ کیتا کہ اوہ اوہدوں تک ای ایس ملک چ رہ سکن گے جدوں تک اوہ یہوواہ دے حکماں نُوں من دے رہن گے۔ موسیٰ نے اوہناں نُوں ہلاشیری دِتی کہ اوہ زندگی نُوں چُنن تے اِنج کرن لئی اوہ یہوواہ دی گل سُنن تے اوہدے نال جُڑے رہن۔ پر بنی‌اِسرائیل نے یہوواہ دے حکماں نُوں مننا چھڈ دِتا۔ ایس لئی یہوواہ نے اسوریاں نُوں تے بعد چوں بابلیاں نُوں ایہہ اجازت دِتی کہ اوہ اوہناں دے ملک نُوں فتح کر لین تے اوہناں نُوں غلام بنا کے لے جان۔—‏2-‏سلاطین 17:‏6-‏8، 13، 14؛ 2-‏تواریخ 36:‏15-‏17، 20۔‏

7.‏ اَسی موسیٰ دی کہی گل توں کیہہ سکھ سکنے آں؟ (‏تصویر نُوں وی ویکھو۔)‏

⁷ اَسی موسیٰ دی کہی گل توں کیہہ سکھنے آں؟ جے اَسی یہوواہ دے فرمانبردار رہواں گے تے سانوں ہمیشاں دی زندگی ملے گی۔‏ جیویں بنی‌اِسرائیل اوس ملک دی دہلیز تے کھلوتے سن جنہوں دین دا وعدہ یہوواہ نے اوہناں نال کیتا سی اونویں ای اَج اَسی وی نوِیں دُنیا دی دہلیز تے کھلوتے آں۔ بوہت چھیتی ایہہ زمین عدن دے باغ وانگوں سوہنی بن جائے گی۔ (‏یسعیاہ 35:‏1؛‏ لُوقا 23:‏43‏)‏ شیطان تے اوہدے باغی فرشتے نئیں ہون گے۔ (‏مُکاشفہ 20:‏2، 3‏)‏ نالے جھوٹھا مذہب وی نئیں ہوئے گا جیہڑا لوکاں نُوں یہوواہ توں دُور کر دیندا اے۔ (‏مُکاشفہ 17:‏16‏)‏ نہ ای ایس دُنیا دِیاں حکومتاں ہون گیاں جیہڑیاں اپنی عوام تے ظلم کردیاں نیں۔ (‏مُکاشفہ 19:‏19، 20‏)‏ نوِیں دُنیا چ باغی لوکاں لئی کوئی جگہ نئیں ہوئے گی۔ (‏زبور 37:‏10، 11)‏ ایہدی بجائے سارے لوک یہوواہ دے حکماں نُوں منن گے تے اِنج اوہ اِک مُٹھ رہن گے تے اوہناں چ امن ہوئے گا۔ اوہ اِک دُوجے نال پیار کرن گے تے اِک دُوجے تے بھروسا کرن گے۔ (‏یسعیاہ 11:‏9)‏ ایہہ کِنّی شاندار امید اے۔ ایس توں وی ودھ کے ایہہ کہ جے اَسی یہوواہ دے فرمانبردار رہواں گے تے اَسی ایس زمین تے صرف کجھ سالاں لئی نئیں سگوں ہمیشاں تک زندہ رہ سکاں گے۔—‏زبور 37:‏29؛‏ یوحنا 3:‏16‏۔‏

8.‏ ہمیشاں دی زندگی دے وعدے تے غور کرن نال اِک مشنری نُوں کیویں مدد مِلی؟ (‏یہوداہ 20، 21‏)‏

⁸ جے اَسی ہمیشاں دی زندگی دے وعدے نُوں یاد رکھاں گے تے فیر بھانویں سانوں کسے وی مشکل دا سامنا کیوں نہ ہوئے، اَسی یہوواہ دے فرمانبردار رہواں گے۔ ‏(‏یہوداہ 20، 21 نُوں پڑھو۔)‏ ایس وعدے توں سانوں ایہہ ہمت وی ملے گی کہ اَسی اپنیاں کمزوریاں دا مقابلہ کر سکئے۔ اِک بھرا جیہڑا کئی سالاں توں افریقہ چ مشنری دے طور تے خدمت کر رہیا اے، اوہنوں اپنی اِک کمزوری تے قابو پان لئی سخت کوشش کرنی پئی۔ اوہ کہندا اے:‏ ”‏مینوں احساس ہویا کہ جے مَیں یہوواہ دا فرمانبردار نہ رہیا تے مینوں ہمیشاں دی زندگی نئیں ملے گی۔ ایس گل توں میرا ایہہ عزم مضبوط ہویا کہ مَیں اپنی کمزوری نال لڑن دی کوشش کردا رہواں تے ایہدا مقابلہ کرن لئی یہوواہ کولوں دُعا کردا رہواں۔ اوہدی مدد نال مَیں اپنی کمزوری تے قابو پان چ کامیاب ہو گیا۔“‏

تُسی کامیاب ہووو گے

9.‏ داؤد نے اپنی زندگی چ کیہڑیاں مشکلاں دا سامنا کیتا؟‏

⁹ داؤد اِک بادشاہ، شاعر تے نبی سی۔ ایہدے علاوہ اوہ ساز وجان تے جنگ لڑن چ وی ماہر سی۔ اوہنے بوہت ساریاں مشکلاں دا سامنا کیتا۔ کئی سالاں تک اوہ بادشاہ ساؤل توں بھج دا رہیا جیہڑا اوہنوں مارنا چاہندا سی۔ جدوں داؤد آپ بادشاہ بنیا تے اوہدوں وی اوہنوں اپنی جان بچان لئی بھجنا پیا کیونکہ اوہدے پُتر ابی‌سلوم نے اوہدی جگہ تے زبردستی بادشاہ بنن دی کوشش کیتی سی۔ داؤد اپنیاں مشکلاں تے خامیاں دے باوجود ساری زندگی یہوواہ دا وفادار رہیا۔ تے یہوواہ نے وی اوہدے بارے کہیا کہ اوہدے توں میرا دل خوش اے۔ ایس لئی داؤد نے جیہڑی نصیحت کیتی، اوہ ساڈے لئی بڑی فائدہ‌مند اے۔—‏اعمال 13:‏22؛‏ 1-‏سلاطین 15:‏5۔‏

10.‏ داؤد نے اپنے پُتر سلیمان نُوں بادشاہ بنن توں پہلاں نصیحت کیوں کیتی؟‏

¹⁰ ذرا اوس نصیحت تے غور کرو جیہڑی داؤد نے اپنے پُتر سلیمان نُوں کیتی جیہڑا اوہدے بعد بادشاہ بنن والا سی۔ سلیمان نوجوان سی تے اوہنوں یہوواہ نے آپ بادشاہ دے طور تے چُنیا سی تاکہ اوہ اوہدی عبادت تے وڈیائی لئی ہیکل بنائے۔ (‏1-‏تواریخ 22:‏5)‏ ایس کم چ سلیمان نُوں بوہت ساریاں مشکلاں دا سامنا کرنا پینا سی۔ ایس لئی آؤ اَسی ویکھنے آں کہ داؤد نے اوہنوں کیہہ نصیحت کیتی۔‏

11.‏ 1-‏سلاطین 2:‏2، 3 دے مطابق داؤد نے اپنے پُتر سلیمان نُوں کیہہ کہیا تے اوہدی گل کیویں سچ ثابت ہوئی؟ (‏تصویر نُوں وی ویکھو۔)‏

¹¹ داؤد نے کیہہ کہیا؟‏ (‏1-‏سلاطین 2:‏2، 3 نُوں پڑھو۔)‏ داؤد نے اپنے پُتر سلیمان نُوں کہیا کہ جے اوہ یہوواہ دا فرمانبردار رہوے گا تے اوہ زندگی چ کامیاب ہوئے گا۔ تے واقعی کئی سالاں تک سلیمان کامیاب رہیا وی۔ (‏1-‏تواریخ 29:‏23-‏25)‏ مثال لئی، اوہنے بڑی شاندار تے سوہنی ہیکل بنائی تے بائبل دِیاں کجھ کتاباں دے حصے لکھے۔ اوہ اپنی حکمت تے امیری لئی بوہت مشہور ہو گیا۔ (‏1-‏سلاطین 4:‏34)‏ پر داؤد نے اوہنوں کہیا سی کہ اوہ اوہدوں تک ای کامیاب رہوے گا جدوں تک اوہ یہوواہ دا فرمانبردار رہوے گا۔ افسوس دی گل اے کہ جدوں سلیمان وڈیرا ہو گیا تے اوہنے جھوٹھے دیوتاواں دی عبادت کرنی شروع کر دِتی۔ یہوواہ نے سلیمان توں اپنا برکت دا ہتھ چُک لیا ایس لئی اوہدے کول اوہ حکمت وی نہ رہی جدے ذریعے اوہ اِنصاف نال حکومت کردا سی۔—‏1-‏سلاطین 11:‏9، 10؛ 12:‏4۔‏

12.‏ اَسی داؤد دی کہی گل توں کیہہ سکھنے آں؟‏

¹² اَسی داؤد دی کہی گل توں کیہہ سکھنے آں؟ جے اَسی یہوواہ دے فرمانبردار رہواں گے تے اَسی کامیاب ہونواں گے۔ (‏زبور 1:‏1-‏3)‏ ظاہری جہی گل اے کہ یہوواہ نے ایہہ وعدہ نئیں کیتا کہ اَسی سلیمان وانگوں امیر تے مشہور ہونواں گے۔ پر جے اَسی اوہدے فرمانبردار رہواں گے تے اوہ سانوں حکمت ضرور دَوے گا جدے ذریعے اَسی چنگے فیصلے کر سکاں گے۔ (‏اَمثال 2:‏6، 7؛‏ یعقوب 1:‏5‏)‏ اوہدے اصول نوکری، پیسہ، تلیم تے تفریح دے معاملے چ صحی فیصلے کرن چ ساڈی مدد کردے نیں۔ جے اَسی اوہدے اصولاں تے عمل کراں گے تے اَسی ہر ایہو جہی چیز توں بچ سکاں گے جدی وجہ توں یہوواہ نال ساڈی دوستی ٹُٹ سکدی اے تے اَسی ہمیشاں دی زندگی نُوں گنوا سکنے آں۔ (‏اَمثال 2:‏10، 11)‏ ایہدے علاوہ سانوں چنگے دوست مِلن گے تے ساڈی خاندانی زندگی وی خوشیاں نال بھری ہوئے گی۔‏

13.‏ کیہڑی چیز نے بھین کارمن دی مدد کیتی کہ اوہ کامیابی دی راہ چُنے؟‏

¹³ ذرا بھین کارمن دی مثال تے غور کرو جیہڑی موزمبیق چ رہندی اے۔ اوہ سوچدی سی کہ اوہنوں اعلیٰ تلیم حاصل کرن نال کامیابی مِل سکدی اے۔ ایس لئی اوہنے یونیورسٹی چ داخلہ لے لیا جتھے اوہ عمارتاں دے ڈیزائن بنانا سکھن لگ پئی۔ اوہنے دَسیا:‏ ”‏مَیں جو سکھ رہی ساں، اوہ مینوں بوہت اچھا لگدا سی۔ پر ایہہ تلیم حاصل کرن چ میرا بوہت سارا وقت تے طاقت لگ جاندی سی۔ مَیں سویرے ساڈھے 7 وجے توں شام 6 وجے تک یونیورسٹی چ رہنی ساں۔ میرے لئی عبادتاں تے جانا وی بڑا مشکل ہو گیا سی تے میرا یہوواہ نال رشتہ کمزور ہو گیا سی۔ مینوں دل ای دل چ ایہہ احساس ہویا کہ مَیں دو مالکاں دی خدمت کرن دی کوشش کر رہی آں۔“‏ (‏متی 6:‏24‏)‏ بھین نے دُعا کیتی تے تنظیم دِیاں کتاباں تے رسالیاں وچوں تحقیق کیتی۔ اوہنے کہیا:‏ ”‏بزرگاں تے میری امی نے مینوں بڑے چنگے مشورے دِتے۔ ایس توں بعد مَیں اپنی یونیورسٹی دی پڑھائی نُوں چھڈن تے کُل وقتی خدمت کرن دا فیصلہ کیتا۔ مَیں اپنے فیصلے تے بوہت خوش آں تے مینوں کوئی پچھتاوا نئیں اے۔“‏

14.‏ موسیٰ تے داؤد دونواں نے کیہڑا خاص پیغام دِتا؟‏

¹⁴ موسیٰ تے داؤد یہوواہ نال بوہت پیار کردے سن تے اوہناں دی نظر چ اوہدے حکم مننا بوہت اہم سی۔ اوہناں دونواں نے مرن توں پہلاں لوکاں دا حوصلہ ودھایا کہ اوہ اوہناں دی مثال تے عمل کرن تے یہوواہ نال جُڑے رہن۔ اوہناں نے لوکاں نُوں ایس گل توں وی آگاہ کیتا کہ جے اوہ یہوواہ دے وفادار نئیں رہن گے تے اوہ اوہدے دوست نئیں رہ سکن گے تے اوہناں برکتاں نُوں گنوا دین گے جنہاں دا یہوواہ نے وعدہ کیتا اے۔ ایہہ نصیحت اَج ساڈے لئی وی بڑی فائدے مند اے۔ کئی صدیاں بعد یہوواہ دے اِک ہور بندے نے وی دَسیا کہ اوہدے وفادار رہنا کِنّاں ضروری اے۔‏

‏”‏ایس توں وڈی خوشی دی گل ہور کوئی نئیں“‏

15.‏ یوحنا رسول نے اپنی زندگی چ کیہہ کجھ ویکھیا سی؟‏

¹⁵ یوحنا رسول یسوع دا قریبی دوست سی۔ (‏متی 10:‏2؛‏ یوحنا 19:‏26‏)‏ اوہنے یسوع نال مِل کے مُنادی کیتی، اوہدے معجزے ویکھے تے مشکل ویلے چ اوہدے نال رہیا۔ اوہنے اپنے اَکھیں ویکھیا سی کہ یسوع نُوں سُولی تے چڑھایا گیا تے اوہ مُردیاں چوں زندہ ہو گیا۔ اوہنے مسیح دی تلیم نُوں پھیل دیاں تے مسیحیاں دی تعداد نُوں ودھدیاں ویکھیا سی۔ اوہ اپنی زندگی چ ایس گل دا وی گواہ سی کہ ”‏بادشاہی دی مُنادی اسمان دے تھلے ہر جگہ تے ہو گئی اے۔“‏—‏کُلسّیوں 1:‏23‏۔‏

16.‏ یوحنا دے خطاں توں کنہاں نُوں فائدہ ہویا؟‏

¹⁶ یوحنا رسول نے بڑی لمی عمر پائی تے جدوں اوہ وڈیرا ہو گیا تے اوہنوں مُکاشفہ دی کتاب نُوں لکھن دا اعزاز مِلیا۔ (‏مُکاشفہ 1:‏1‏)‏ اوہنے اِنجیل وی لکھی جیہڑی اوہدے ناں تے وے۔ ایہدے علاوہ اوہنے یہوواہ دی پاک روح دی رہنمائی چ تِن خط لکھے۔ اوہنے اپنا تیجا خط اِک وفادار مسیحی گِیُس نُوں لکھیا جیہڑا اوہدے لئی اوہدے بچیاں وانگوں سی۔ (‏3-‏یوحنا 1‏)‏ اوس ویلے بوہت سارے ایہو جہے مسیحی ہون گے جنہاں نُوں یوحنا اپنے بچیاں وانگوں پیار کردا ہوئے گا۔ یوحنا نے جیہڑے خط لکھے اوہناں توں اَج ساڈا وی حوصلہ ودھدا اے۔‏

17.‏ 3-‏یوحنا 4 دے مطابق کیس چیز توں دُوجیاں نُوں خوشی مِلدی اے؟‏

¹⁷ یوحنا نے کیہہ لکھیا؟‏ (‏3-‏یوحنا 4 نُوں پڑھو۔)‏ اوہنے لکھیا کہ اوہ ایس گل توں بوہت خوش اے کہ بھین بھرا یہوواہ دے فرمانبردار نیں۔ جدوں اوہنے اپنا تیجا خط لکھیا اوس ویلے کجھ لوک کلیسیا چ جھوٹھیاں گلاں پھیلا رہے سن تے بھین بھراواں دا ایکا توڑن دی کوشش کر رہے سن۔ پر فیر وی کئی بھین بھرا سچائی دی راہ تے چل رہے سن۔ اوہ یہوواہ دے فرمانبردار سن تے اوہدے حکماں تے چل رہے سن۔ (‏2-‏یوحنا 4،‏ 6‏)‏ یقیناً ایہناں مسیحیاں نُوں ویکھ کے نہ صرف یوحنا سگوں یہوواہ وی بوہت خوش سی۔—‏اَمثال 27:‏11۔‏

18.‏ اَسی یوحنا دی لکھی گل توں کیہہ سکھنے آں؟‏

¹⁸ یوحنا دی لکھی گل توں اَسی کیہہ سکھنے آں؟ جدوں اَسی یہوواہ دے وفادار رہواں گے تے سانوں تے دُوجیاں نُوں خوشی ملے گی۔‏ (‏1-‏یوحنا 5:‏3‏)‏ مثال لئی، سانوں ایس گل توں خوشی ملے گی کہ اَسی یہوواہ نُوں خوش کر رہے آں۔ تے یہوواہ ایہہ ویکھ کے خوش ہوئے گا کہ اَسی غلط کماں توں بچ رہے آں تے اوہدے حکماں تے چل رہے آں۔ (‏اَمثال 23:‏15)‏ فرشتے وی ایہہ ویکھ کے خوش ہوندے نیں۔ (‏لُوقا 15:‏10‏)‏ نالے جدوں اَسی ویکھنے آں کے ساڈے بھین بھرا ازمیشاں تے پریشانیاں دے باوجود یہوواہ دے وفادار نیں تے سانوں وی بڑی خوشی ہوندی اے۔ (‏2-‏تھسلُنیکیوں 1:‏4‏)‏ ایس دُنیا دے خاتمے توں بعد سانوں ایہہ سوچ کے خوشی ملے گی کہ اَسی اِک ایہو جہی دُنیا چ وی یہوواہ دے وفادار رہے جیہڑی شیطان دے قبضے چ سی۔‏

19.‏ بھین ریچل نُوں دُوجیاں نُوں یہوواہ بارے سکھانا کیہو جیہا لگدا اے تے ایس بارے اوہنے کیہہ کہیا؟ (‏تصویر نُوں وی ویکھو۔)‏

¹⁹ سانوں خاص طور تے اوس ویلے خوشی ہوندی اے جدوں اَسی دُوجیاں نُوں یہوواہ بارے سکھانے آں۔ ڈومینیکن ریپبلک چ رہن والی بھین ریچل محسوس کردی اے کہ دُوجیاں نُوں اپنے پیارے خدا یہوواہ بارے سکھانا بڑے مان دی گل اے۔ بھین ریچل نے بوہت سارے لوکاں دی یہوواہ دے گواہ بنن چ مدد کیتی اے۔ اوہناں بارے اوہ کہندی اے:‏ ”‏مَیں دَس نئیں سکدی کہ مینوں اوہدوں کِنّی خوشی ہوندی اے جدوں مَیں ویکھنی آں کہ اوہ لوک یہوواہ نُوں کِنّاں پیار کردے نیں، اوہدے تے کِنّاں بھروسا کردے نیں تے اوہنوں خوش کرن لئی اوہناں نے اپنی زندگی نُوں کِنّاں بدل لیا اے۔ اوہ کوششاں ایس خوشی دے اَگے کجھ وی نئیں نیں جیہڑیاں مَیں اوہناں دی مدد کرن لئی کیتیاں نیں۔“‏

یہوواہ دے وفادار بندیاں دِیاں نصیحتاں توں فائدہ حاصل کرو

20.‏ موسیٰ، داؤد،یوحنا تے ساڈے چ کیہڑیاں گلاں مِلدیاں جلدیاں نیں؟‏

²⁰ موسیٰ، داؤد تے یوحنا جیہڑے دَور چ رہندے سن، اوہ ساڈے زمانے توں بوہت فرق سی۔ اوہناں دے حالات وی ساڈے نالوں فرق سن۔ پر اوہناں چ تے ساڈے چ بوہت ساریاں گلاں مِلدیاں جلدیاں وی نیں جیویں کہ اوہ سچے خدا یہوواہ دی عبادت کردے سن تے اَسی وی اِنج ای کرنے آں۔ اوہناں وانگوں اَسی وی یہوواہ کولوں دُعا کرنے آں، اوہدے تے بھروسا کرنے آں تے اوہدے کولوں رہنمائی منگنے آں۔ اوہناں وانگوں سانوں وی ایس گل تے پورا بھروسا اے کہ جیہڑے لوک یہوواہ دے وفادار رہندے نیں، اوہ اوہناں نُوں برکتاں دیندا اے۔‏

21.‏ جے اَسی موسیٰ، داؤد تے یوحنا دی نصیحت تے عمل کراں گے تے سانوں کیہڑیاں برکتاں مِلن گیاں؟‏

²¹ ایس لئی آؤ اَسی موسیٰ، داؤد تے یوحنا دی نصیحت تے عمل کردے ہوئیاں یہوواہ دے حکماں تے چلدے رہیے۔ جدوں اَسی اِنج کراں گے تے سانوں ہر کم چ کامیابی ملے گی۔ اَسی بوہت لمی عمر پانواں گے یعنی ہمیشاں تک زندہ رہواں گے۔ (‏اِستثنا 30:‏20)‏ نالے سانوں ایس گل توں خوشی وی ملے گی کہ اَسی اپنے اسمانی باپ یہوواہ نُوں خوش کرنے آں جیہڑا اپنے وعدیاں نُوں اینے شاندار طریقے نال پورا کرے گا کہ اَسی سوچ وی نئیں سکدے۔—‏اِفسیوں 3:‏20‏۔‏