بائبل کورس کرن والیاں دی مدد کرو کہ اوہ یہوواہ دی خدمت کرن دا فیصلہ کرن

1، 2.‏ (‏الف)‏بائبل کورس کرن والے کجھ لوک یہوواہ دا گواہ بنن توں کیوں جھجک دے نیں؟ (‏ب)‏ایس مضمون چ اَسی کیس گل تے غور کراں گے؟‏

جدوں تُسی بائبل کورس کر رہے سو تے کیہہ تُسی یہوواہ دا گواہ بنن توں جھجک رہے سو؟ شاید توانوں ڈر سی کہ تواڈے نال کم کرن والے، تواڈے دوست یاں تواڈے گھر والے تواڈے خلاف ہو جان گے۔ یاں شاید توانوں ایہہ لگدا سی کہ تُسی کدی وی خدا دے معیاراں مطابق زندگی نئیں گزار سکو گے۔ جے ایہہ گل اے تے تُسی بائبل کورس کرن والے اوہناں لوکاں دے جذبات نُوں چنگی طرحاں سمجھ سکدے او جیہڑے یہوواہ دا گواہ بنن توں جھجک رہے نیں۔‏

² یسوع جان دا سی کہ ایہہ گلاں یہوواہ دی خدمت کرن دی راہ چ رُکاوٹ بن سکدیاں نیں۔ (‏متی 13:‏20-‏22‏)‏ پر فیر وی اوہ اوہناں لوکاں دی مدد کردا رہیا جیہڑے اوہدے پیروکار بنن توں جھجک رہے سن۔ یسوع نے دُوجیاں دی مدد کیتی تاکہ (‏1)‏اوہ پچھان سکن کہ کیہڑی چیز اوہناں دی ترقی دی راہ چ رُکاوٹ بن رہی اے، (‏2)‏یہوواہ لئی اپنے دل چ محبت نُوں ہور گُوڑھا کرن، (‏3)‏یہوواہ دی خدمت نُوں سب توں زیادہ اہمیت دین تے (‏4)‏مخالفت دا سامنا کر سکن۔ کسے نُوں کتاب ”‏خوشیاں بھری زندگی پاؤ“‏ توں بائبل کورس کراندے ویلے اَسی یسوع دی مثال تے کیویں عمل کر سکنے آں؟‏

بائبل کورس کرن والیاں دی مدد کرو کہ اوہ رُکاوٹاں نُوں پچھانن

3.‏ کیہڑی گل نیکُدیمس نُوں یسوع دا شاگرد بنن توں روک رہی سی؟‏

³ نیکُدیمس یہودیاں دا اِک مشہور پیشوا سی۔ اوہ یسوع دی خدمت دے چھ مہینے بعد ای سمجھ گیا کہ یسوع ای مسیح اے۔ (‏یوحنا 3:‏1، 2‏)‏ پر اوہ اوہدا شاگرد بنن توں جھجک رہیا سی۔ اوہنوں یہودیاں دا ڈر سی ایس لئی اوہ یسوع نُوں چھپ کے مِلن آیا سی۔ (‏یوحنا 7:‏13؛‏ 12:‏42‏)‏ شاید اوہ ایہہ سوچ رہیا سی کہ جے اوہ یسوع دا شاگرد بن گیا تے اوہنوں اپنا اِختیار چھڈنا پووے گا‏۔‏a

4.‏ یسوع نے ایہہ سمجھن چ نیکُدیمس دی مدد کیویں کیتی کہ خدا اوہدے کولوں کیہہ چاہندا اے؟‏

⁴ نیکُدیمس کول شریعت دا بڑا علم سی۔ پر اوہنوں ایہہ گل سمجھن دی لوڑ سی کہ یہوواہ اوہدے کولوں کیہہ چاہندا اے۔ ایس بارے یسوع نے اوہدی مدد کیویں کیتی؟ اوہ اوہنوں اپنا وقت دین لئی تیار سی، ایتھوں تک کہ اوہنے اوہنوں رات دے ویلے تلیم دِتی۔ یسوع نے نیکُدیمس نُوں کُھل کے دَسیا کہ اوہنوں اوہدا شاگرد بنن لئی کیہہ کجھ کرن دی لوڑ اے۔ مثال لئی اوہنے اوہنوں دَسیا کہ اوہنوں اپنے گُناہواں توں توبہ کرن، پانی چ بپتسمہ لین تے خدا دے پتر تے ایمان لیان دی لوڑ اے۔—‏یوحنا 3:‏5،‏ 14-‏21‏۔‏

5.‏ اَسی بائبل کورس کرن والے بندے دی مدد کیویں کر سکنے آں تاکہ اوہ ایہہ پچھان سکے کہ کیہڑی چیز اوہنوں اَگے ودھن توں روک رہی اے؟‏

⁵ بھانویں بائبل کورس کرن والا بندہ ایتاں نُوں بڑی چنگی طرحاں سمجھدا اے پر فیر وی ہوسکدا اے کہ اوہنوں ایہہ سمجھن دی لوڑ ہوئے کہ کیہڑی چیز اوہنوں یہوواہ دی خدمت کرن توں روک رہی اے۔ شاید اوہ اپنی نوکری یاں خاندان دی مخالفت دی وجہ توں اَگے نئیں ودھ پا رہیا۔ جے ایہہ گل اے تے اوہنوں اپنا وقت دین لئی تیار رہوو۔ شاید تُسی اوہنوں چاہ تے بلا سکدے او یاں اوہدے نال کِتے باہر گھمن پھرن جا سکدے او۔ اِنج تُسی اوہدی مدد کر رہے ہووو گے تاکہ اوہ توانوں کُھل کے دَس سکے کہ کیہڑی چیز اوہنوں یہوواہ دی خدمت کرن توں روک رہی اے۔ فیر اوہنوں ہلاشیری دَوو کہ اوہ توانوں نئیں سگوں یہوواہ نُوں خوش کرن لئی اپنے اندر تبدیلیاں لیائے۔‏

6.‏ تُسی بائبل کورس کرن والے بندے دی مدد کیویں کر سکدے او تاکہ اوہ اوہناں گلاں تے عمل کرے جیہڑیاں اوہ سکھ رہیا اے؟ (‏1-‏کُرنتھیوں 16:‏13‏)‏

⁶ جے بائبل کورس کرن والے بندے نُوں ایس گل دا یقین ہوئے گا کہ یہوواہ بائبل دے اصولاں مطابق زندگی گزارن چ اوہدی مدد کرے گا تے اوہنوں ایہناں مطابق چلن دی ہمت وی ملے گی۔ ‏(‏1-‏کُرنتھیوں 16:‏13 نُوں پڑھو۔)‏ ایس بارے تواڈا کردار سکول چ پڑھان والے اِک ٹیچر ورگا ہوئے گا۔ جدوں تُسی سکول چ پڑھدے سو تے توانوں کیہڑا ٹیچر پسند سی؟ ہوسکدا اے کہ ایہہ اوہ ٹیچر سی جنہے تواڈا حوصلہ ودھایا سی کہ تُسی کامیاب ہو سکدے او۔ ایسے طرحاں تُسی بائبل کورس کرن والے بندے نُوں صرف ایہہ نہ دَسو کہ یہوواہ اوہدے کولوں کیہہ چاہندا اے سگوں اوہدا حوصلہ وی ودھاؤ کہ یہوواہ اوہدی مدد کرے گا تاکہ اوہ اپنی زندگی چ ضروری تبدیلیاں لیا سکے۔ تُسی اِنج کیویں کر سکدے او؟‏

بائبل کورس کرن والیاں دی مدد کرو کہ اوہ اپنے دل چ یہوواہ لئی محبت نُوں ودھان

7.‏ یسوع نے لوکاں دی مدد کیویں کیتی تاکہ اوہناں دے دل چ یہوواہ لئی محبت ودھے؟‏

⁷ یسوع جان دا سی کہ جے اوہدے شاگرد یہوواہ نال محبت کرن گے تے فیر اوہ اوہناں گلاں تے عمل وی کرن گے جیہڑیاں اوہ سکھ رہے نیں۔ ایس لئی یسوع نے اکثر اوہناں نُوں ایہو جیہاں گلاں دی تلیم دِتی جنہاں توں اوہناں دے دل چ یہوواہ لئی محبت ودھے۔ مثال لئی، اوہنے اپنے شاگرداں نُوں دَسیا کہ یہوواہ اِک ایہو جہے باپ ورگا اے جیہڑا اپنے بچیاں نُوں چنگیاں چیزاں دیندا اے۔ (‏متی 7:‏9-‏11‏)‏ جیہڑے لوک یسوع دِیاں گلاں سُن رہے سن، اوہناں وچوں کجھ دے باپ شاید اینے پیار کرن والے نئیں سن۔ ذرا سوچو کہ جدوں یسوع نے لوکاں نُوں رحم‌دل باپ دی کہانی سُنائی ہوئے گی تے اوہناں نُوں کیہو جیہا لگیا ہوئے گا۔ ایس کہانی چ جدوں پتر اپنا سارا پیسہ عیاشی چ اُڈان توں بعد توبہ کر کے اپنے باپ کول واپس آ گیا تے باپ نے اوہنوں بڑے پیار نال گلے لایا۔ ایہدے توں اوہ لوک سمجھ گئے ہون گے کہ یہوواہ انساناں نال کِنّے رحم نال پیش آندا اے۔—‏لُوقا 15:‏20-‏24‏۔‏

8.‏ تُسی بائبل کورس کرن والے بندے دی مدد کیویں کر سکدے او تاکہ اوہ اپنے دل چ یہوواہ لئی محبت نُوں ودھائے؟‏

⁸ تُسی وی بائبل کورس کرن والے بندے دی مدد کر سکدے او تاکہ اوہدے دل چ یہوواہ لئی محبت ودھے۔ اِنج کرن لئی تُسی اکثر اوہدے نال یہوواہ دِیاں خوبیاں بارے گل کر سکدے او۔ ہر واری بائبل کورس دے دوران ایہہ سمجھن چ اوہدی مدد کرو کہ جیہڑی گل اوہنے سکھی اے، اوہدے توں یہوواہ دی محبت کیویں ظاہر ہوندی اے۔ اوہدے نال فدیے دے موضوع تے گل بات کردے ویلے ایس گل تے زور دَوو کہ ایس بندوبست توں اوہنوں ذاتی طور تے کیہہ فائدہ ہوندا اے۔ (‏رومیوں 5:‏8؛‏ 1-‏یوحنا 4:‏10‏)‏ جدوں اوہ ایس گل نُوں سمجھ جائے گا کہ یہوواہ نے اوہدے لئی محبت کیویں ظاہر کیتی اے تے اوہدے دل چ یہوواہ لئی محبت ہور ودھ جائے گی۔—‏گلتیوں 2:‏20‏۔‏

9.‏ مائیکل دے دل چ ایہہ خواہش کیویں پیدا ہوئی کہ اوہ اپنی زندگی نُوں بدلے؟‏

⁹ ذرا اِنڈونیشیا چ رہن والے مائیکل دی مثال تے غور کرو۔ اوہدے ماں پیو نے بچپن توں اوہنوں سچائی سکھائی سی پر اوہنے بپتسمہ نئیں لیا۔ جدوں اوہ 18 سال دا سی تے اوہ دُوجے ملک چ کم کرن لئی چلا گیا۔ بعد چ جدوں اوہدی شادی ہو گئی تے فیر وی اوہ باہر جا کے کم کردا رہیا۔ ایس عرصے دے دوران اوہدی بیوی تے اوہدی بیٹی نے بائبل کورس کرنا شروع کر دِتا تے سکھیاں ہوئیاں گلاں تے عمل کرنا شروع کر دِتا۔ جدوں مائیکل دی امی فوت ہو گئی تے اوہنے فیصلہ کیتا کہ اوہ اپنے ابو دی دیکھ بھال کرن لئی اپنے ملک واپس جائے گا۔ اوتھے جا کے اوہ بائبل کورس کرن لئی وی راضی ہو گیا۔ جدوں اوہ کتاب ‏”‏خوشیاں بھری زندگی پاؤ“‏ دے سبق نمبر 27 تے حصہ ”‏ہور سوچ وچار لئی“‏ تے غور کر رہیا سی تے اوہدے دل تے بڑا گُوڑھا اثر ہویا۔ جدوں اوہنے ایس گل تے غور کیتا کہ اپنے پتر نُوں تکلیف چ ویکھ کے یہوواہ نُوں کیہو جیہا محسوس ہویا ہوئے گا تے اوہدیاں اَکھاں چ آنسو آ گئے۔ اوہدے دل چ فدیے لئی شکرگزاری بوہت ودھ گئی تے اوہدے اندر ایہہ خواہش پیدا ہوئی کہ اوہ اپنی زندگی نُوں بدلے تے بپتسمہ لَوے۔‏

بائبل کورس کرن والیاں دی مدد کرو کہ اوہ یہوواہ دی خدمت نُوں سب توں زیادہ اہمیت دین

10.‏ یسوع نے اپنے شاگرداں دی مدد کیویں کیتی تاکہ اوہ مُنادی دے کم نُوں سب توں زیادہ اہمیت دین؟ (‏لُوقا 5:‏5-‏11‏)‏ (‏تصویر نُوں وی ویکھو۔)‏

¹⁰ یسوع دے شاگرد ایہہ چھیتی سمجھ گئے سن کہ اوہی اوہ مسیح اے جدے آن دا وعدہ کیتا گیا سی۔ پر اوہناں نُوں ایہہ گل سمجھن لئی مدد دی لوڑ سی کہ مُنادی دا کم اوہناں لئی سب توں اہم ہو نا چاہی دا اے۔ جدوں یسوع نے پطرس تے اندریاس نُوں کہیا کہ اوہ اوہدے نال مِل کے کل وقتی خدمت کرن تے اوہناں نُوں یسوع دا شاگرد بنے کجھ عرصہ ہو چُکیا سی۔ (‏متی 4:‏18، 19‏)‏ اِنج لگدا اے کہ اوہ یعقوب تے یوحنا نال مِل کے مچھیاں پھڑن دا کاروبار کردے سن جیہڑا بوہت اچھا چل رہیا سی۔ (‏مرقس 1:‏16-‏20‏)‏ پر پطرس تے اندریاس ‏”‏فوراً اپنے جال چھڈ کے“‏ یسوع دے پچھے پچھے ٹر پئے۔ ایہدے نال نال اوہناں نے ایہہ اِنتظام وی ضرور کیتا ہوئے گا کہ اوہناں دے گھر والیاں دِیاں ضرورتاں پوریاں ہوندیاں رہن۔ کیہڑی چیز نے ایہہ فیصلہ کرن چ اوہناں دی مدد کیتی؟ لُوقا دی اِنجیل توں پتہ چلدا اے کہ یسوع نے اِک معجزہ کیتا جدے توں اوہناں دا ایس گل تے ایمان مضبوط ہویا کہ یہوواہ اوہناں دِیاں ضرورتاں نُوں پورا کر سکدا اے۔‏‏—‏لُوقا 5:‏5-‏11 نُوں پڑھو۔‏

11.‏ اَسی کیہہ کر سکنے آں تاکہ بائبل کورس کرن والے بندے دا ایمان مضبوط ہوئے؟‏

¹¹ اَسی معجزے تے نئیں کر سکدے پر اَسی بائبل کورس کرن والیاں نُوں ایہو جہے تجربے ضرور دَس سکنے آں جنہاں توں پتہ چلدا اے کہ یہوواہ اوہناں لوکاں دی مدد کردا اے جیہڑے اوہدی خدمت نُوں اپنی زندگی چ سب توں زیادہ اہمیت دیندے نیں۔ مثال لئی، تُسی بائبل کورس کرن والے بندے نُوں دَس سکدے او کہ جدوں تُسی عبادتاں تے جانا شروع کیتا تے یہوواہ نے تواڈی مدد کیویں کیتی۔ شاید توانوں اپنے مالک نال گل کرنی پئی کہ ہُن تُسی اوور ٹائم نئیں کر سکدے۔ اوہنوں ایہہ وی دَسو کہ جدوں تُسی یہوواہ دی عبادت نُوں اپنی زندگی چ سب توں زیادہ اہمیت دِتی تے اوہنے تواڈی مدد کیویں کیتی تے ایہدے توں تواڈا ایمان کیویں مضبوط ہویا۔‏

12.‏ (‏الف)‏سانوں اپنے نال بائبل کورس تے فرق فرق بھین بھراواں نُوں کیوں لے کے جانا چاہی دا اے؟ (‏ب)‏تُسی بائبل کورس کرن والے بندے دی مدد کرن لئی ویڈیوز نُوں کیویں استمال کر سکدے او؟ اِک مثال دَوو۔‏

¹² بائبل کورس کرن والے بندے نُوں دُوجے بھین بھراواں دے تجربیاں توں وی بڑا فائدہ ہوئے گا۔ ایس لئی فرق فرق بھین بھراواں نُوں اپنے نال بائبل کورس تے لے کے جاؤ۔ اوہناں نُوں ایہہ دَسن دی دعوت دَوو کہ اوہناں نے سچائی کیویں سکھی تے یہوواہ دی خدمت نُوں اپنی زندگی چ سب توں زیادہ اہمیت دین لئی کیہہ کیتا۔ ایہدے علاوہ، بائبل کورس کرن والے بندے نال کتاب ”‏خوشیاں بھری زندگی پاؤ“‏ دے حصہ ”‏ہور سوچ وچار لئی“‏ یاں ”‏ہور جانن لئی“‏ چ دِتیاں ویڈیوز نُوں ویکھن لئی وقت کڈھو۔ مثال لئی، سبق نمبر 37 تے گل کردے ویلے جدوں تُسی ویڈیو ”‏یہوواہ ساڈیاں ضرورتاں نُوں پورا کردا اے‏“‏ نُوں ویکھو گے تے بائبل کورس کرن والے بندے دی توجہ ایہدے چ دِتے گئے اصولاں تے دَواؤ۔‏

بائبل کورس کرن والیاں دی مدد کرو تاکہ اوہ مخالفت دا سامنا کر سکن

13.‏ یسوع نے اپنے شاگرداں نُوں مخالفت دا سامنا کرن لئی کیویں تیار کیتا؟‏

¹³ یسوع نے وار وار اپنے شاگرداں نُوں دَسیا کہ اوہناں نُوں دُوجیاں وَلّوں مخالفت دا سامنا کرنا پئے گا، ایتھوں تک کہ اپنے رشتے‌داراں وَلّوں وی۔ (‏متی 5:‏11؛‏ 10:‏22،‏ 36‏)‏ یسوع نے زمین تے اپنی خدمت دے آخری دِناں چ اپنے شاگرداں نُوں آگاہ کیتا کہ اوہدے پیروکار ہون دی وجہ توں اوہناں نُوں موت دا سامنا وی کرنا پے سکدا اے۔ (‏متی 24:‏9؛‏ یوحنا 15:‏20؛‏ 16:‏2‏)‏ اوہنے اوہناں نُوں نصیحت کیتی کہ اوہ مُنادی کردے ویلے ہوشیار رہن۔ مثال لئی، یسوع نے اوہناں نُوں ایہہ ہدیت دِتی کہ اوہ مخالفت کرن والیاں نال بحث نہ کرن تے سمجھداری وکھان تاکہ مُنادی دا کم چلدا رہوے۔‏

14.‏ اَسی بائبل کورس کرن والے بندے دی مدد کیویں کر سکنے آں تاکہ اوہ مخالفت دا سامنا کرن لئی پہلاں توں ای تیار ہو سکے؟ (‏2-‏تیمُتھیُس 3:‏12‏)‏

¹⁴ اَسی بائبل کورس کرن والے بندے نُوں پہلاں توں ای تیار کرن لئی ایہہ دَس سکنے آں کہ اوہنوں اپنے نال کم کرن والیاں، اپنے دوستاں تے رشتے‌داراں وَلّوں کیہو جہیاں گلاں سننیاں پے سکدیاں نیں۔ ‏(‏2-‏تیمُتھیُس 3:‏12 نُوں پڑھو۔)‏ بائبل دے اصولاں تے عمل کرن دی وجہ توں اوہدے نال کم کرن والے کجھ لوک شاید اوہدا مذاق اُڈان۔ دُوجے لوک ایتھوں تک کہ اوہدے قریبی رشتے‌دار وی شاید اوہنوں کہن کہ تیرے عقیدے کِنّے عجیب نیں۔ جِنّی چھیتی اَسی بائبل کورس کرن والیاں نُوں مخالفت لئی تیار کراں گے، اونے بہتر طریقے نال اوہ ایہدا سامنا کر سکن گے۔‏

15.‏ کیہڑی چیز بائبل کورس کرن والے بندے دی مدد کرے گی تاکہ اوہ اپنے خاندان وَلّوں مخالفت دا سامنا کر سکے؟‏

¹⁵ جے بائبل کورس کرن والے بندے نُوں اپنے خاندان وَلّوں مخالفت دا سامنا اے تے اوہنوں کہوو کہ اوہ ایہہ سوچے کہ ایہدی کیہہ وجہ اے۔ شاید اوہدے گھر والیاں نُوں لگدا اے کہ اوہ گمراہ ہو گیا اے یاں فیر اوہ سوچدے نیں کہ یہوواہ دے گواہ چنگے لوک نئیں نیں۔ یسوع نُوں وی اپنے رشتے‌داراں وَلّوں ایسے طرحاں دِیاں گلاں دا سامنا کرنا پیا سی۔ (‏مرقس 3:‏21؛‏ یوحنا 7:‏5‏)‏ بائبل کورس کرن والے نُوں ہلاشیری دَوو کہ اوہ ایس صورتحال چ اپنے گھر دے جیاں نال صبر تے نرمی نال پیش آئے۔‏

16.‏ اَسی بائبل کورس کرن والے دی مدد کیویں کر سکنے آں تاکہ اوہ اپنے رشتے‌داراں نال اپنے عقیدیاں بارے گل کردے ویلے سمجھداری نال کم لَوے؟‏

¹⁶ جدوں بائبل کورس کرن والے دے رشتے‌دار بائبل چ دلچسپی وکھان تے اوہنوں اِکو ای وار چ اوہناں نُوں سارا کجھ نئیں دَسنا چاہی دا۔ جے اوہ اِنج کرے گا تے اوہدے رشتے‌داراں لئی ایہناں ساریاں گلاں نُوں سمجھنا مشکل ہو جائے گا جدی وجہ توں شاید اگلی وار اوہ بائبل بارے اوہدے نال گل ای نہ شروع کرن۔ بائبل کورس کرن والے بندے نُوں ہلاشیری دَوو کہ اوہ ایس طریقے نال اپنے رشتے‌داراں نال بائبل چوں گل بات کرے کہ اوہناں نال دُبارہ گل بات کرن دی راہ کُھلی رہوے۔ (‏کُلسّیوں 4:‏6‏)‏ ایہدے علاوہ اوہ اپنے رشتے‌داراں نُوں کہہ سکدا اے کہ اوہ ویب‌سائٹ jw.org نُوں ویکھن۔ اِنج اوہ یہوواہ دے گواہواں بارے ہولی ہولی اوہ سب کجھ جان سکن گے جو اوہ جاننا چاہندے نیں۔‏

17.‏ تُسی بائبل کورس کرن والے دی مدد کیویں کر سکدے او تاکہ اوہ دُوجیاں دے سوالاں دے جواب دے سکے؟ (‏تصویر نُوں وی ویکھو۔)‏

¹⁷ تُسی بائبل کورس کرن والے بندے دی مدد کر سکدے او تاکہ اوہ ساڈی ویب‌سائٹ jw.org تے دِتے مضموناں دے سلسلے ”‏اوہ سوال جیہڑے لوک اکثر ساڈے بارے پچھدے نیں‏“‏ چوں ایہو جہے کجھ سوالاں دے سادے جہے جواب تیار کرے جیہڑے اوہدے رشتے‌دار یاں اوہدے نال کم کرن والے لوک اوہدے کولوں پچھ سکدے نیں۔ (‏2-‏تیمُتھیُس 2:‏24، 25‏)‏ ہر واری بائبل کورس دے آخر تے کتاب ”‏خوشیاں بھری زندگی پاؤ“‏ دے ہر سبق چ دِتے گئے بکس ”‏کجھ لوکاں دی رائے“‏ تے گل کرو تے بائبل کورس کرن والے بندے نُوں ہلاشیری دَوو کہ اوہ اپنے لفظاں چ دَسے کہ اوہ کسے نُوں ایہناں سوالاں دے کیہہ جواب دَوے گا۔ فیر اوہنوں ایہہ دَسن توں نہ جھکو کہ اوہ اپنے جواب چ بہتری کیویں لیا سکدا اے۔ ایس مشق توں اوہنوں مدد ملے گی کہ اوہ دُوجیاں نُوں پورے اعتماد نال اپنے ایمان بارے دَس سکے۔‏

18.‏ تُسی بائبل کورس کرن والے نُوں ایہہ ہلاشیری کیویں دے سکدے او کہ اوہ مبشر بنے؟ (‏متی 10:‏27‏)‏

¹⁸ یسوع نے اپنے رسولاں نُوں حکم دِتا کہ اوہ لوکاں نُوں خدا دی بادشاہی دی خوش‌خبری سُنان۔ ‏(‏متی 10:‏27 نُوں پڑھو۔)‏ جِنّی چھیتی بائبل کورس کرن والا بندہ دُوجیاں نُوں اپنے ایمان بارے دَسے گا اونی چھیتی اوہ یہوواہ تے بھروسا کرنا سکھے گا۔ تُسی اِنج کرن چ اوہدی مدد کیویں کر سکدے او؟ جدوں کلیسیا چ مُنادی دی کسے مہم دا اعلان کیتا جاندا اے تے بائبل کورس کرن والے نُوں ہلاشیری دَوو کہ اوہ ایس بارے سوچے کہ اوہ مبشر بنن لئی کیہہ کر سکدا اے۔ اوہنوں دَسو کہ ایہناں مہماں چ مُنادی کرنا اسان ہوندا اے تے اوہ عبادت چ مُنادی بارے وکھائے جان والے منظراں توں وی بوہت کجھ سکھ سکدا اے۔ جدوں اوہ اپنے آپ نُوں کلیسیا چ حصے دین لئی تیار کرے گا تے اِنج اوہ چنگی طرحاں دُوجیاں نُوں اپنے ایمان بارے دَسنا سکھے گا۔‏

بائبل کورس کرن والے تے بھروسا ظاہر کرو

19.‏ یسوع نے اپنے شاگرداں تے بھروسا کیویں ظاہر کیتا تے اَسی اوہدی مثال تے کیویں عمل کر سکنے آں؟‏

¹⁹ اسمان تے جان توں پہلاں یسوع نے اپنے شاگرداں نُوں کہیا کہ اوہ اوہدے نال رہن گے۔ پر شاگرد یسوع دی ایس گل نُوں نئیں سمجھ سکے کہ اوہ اسمان تے رہن دی گل کر رہیا سی۔ بھانویں کہ شاگرد ساریاں گلاں نئیں سمجھدے سن پر فیر وی یسوع نے اوہناں دی وفاداری تے دھیان دِتا۔ (‏یوحنا 14:‏1-‏5،‏ 8‏)‏ یسوع جان دا سی کہ اوہدے شاگرداں نُوں کجھ گلاں نُوں سمجھن چ وقت لگے گا، جیویں کہ ایس گل نُوں کہ اوہ اسمان تے رہن گے۔ (‏یوحنا 16:‏12‏)‏ اَسی وی بائبل کورس کرن والے تے بھروسا ظاہر کر سکنے آں کہ اوہ یہوواہ نُوں خوش کرنا چاہندا اے۔‏

20.‏ ملاوی چ رہن والی اِک بھین نے بائبل کورس کرن والی عورت تے بھروسا کیویں ظاہر کیتا؟‏

²⁰ اَسی ایس گل تے بھروسا رکھ سکنے آں کہ بائبل کورس کرن والا بندہ یہوواہ نُوں خوش کرنا چاہندا اے۔ ذرا ملاوی چ رہن والی بھین شفونڈو دی مثال تے غور کرو۔ اوہنے اِک جوان عورت نُوں کتاب ”‏خوشیاں بھری زندگی پاؤ“‏ توں بائبل کورس کرانا شروع کیتا۔ اوہ عورت کیتھولک سی تے اوہدا ناں الینافے سی۔ سبق نمبر 14 تے گل کرن توں بعد بھین شفونڈو نے اوہنوں پچھیا کہ بُتاں تے تصویراں نُوں عبادت چ استمال کرن بارے اوہدے کیہہ سوچ اے۔ الینافے نے جذباتی ہو کے کہیا:‏ ”‏ایہہ میرا فیصلہ اے کہ مَیں کیہہ کراں گی۔“‏ بھین شفونڈو نُوں لگیا کہ ایہہ اوہدے بائبل کورس دا آخری دن اے۔ پر اوہ صبر نال الینافے نُوں بائبل کورس کراندی رہی تے اوہنے ایہہ امید نئیں چھڈی کہ اِک دن اوہ ایہہ گل سمجھ جائے گی۔ کجھ مہینیاں بعد جدوں اوہ سبق نمبر 34 تے گل کر رہیاں سن تے بھین نے الینافے کولوں پچھیا:‏ ”‏یہوواہ خدا بارے سکھن نال توانوں ہُن تک کیہہ فائدہ ہویا اے؟“‏ بھین شفونڈو نے دَسیا کہ الینافے نے بوہت ساریاں چنگیاں گلاں دا ذکر کیتا جنہاں وچوں اِک گل ایہہ سی کہ یہوواہ دے گواہ کوئی وی ایہو جیہا کم نئیں کردے جدے توں بائبل چ منع کیتا گیا اے۔ ایہدے تھوڑے چِر بعد ای الینافے نے بُتاں تے تصویراں نُوں استمال کرنا چھڈ دِتا تے بپتسمہ لے لیا۔‏

21.‏ اَسی بائبل کورس کرن والے دی مدد کیویں کرسکنے آں تاکہ اوہ یہوواہ دی خدمت کرن دا فیصلہ کرے؟‏

²¹ ایس گل چ کوئی شک نئیں کہ یہوواہ ای اِک شخص دے دل چ سچائی دے بیہہ نُوں ودھاندا اے۔ پر ساڈا کم ایہہ وے کہ اَسی بائبل کورس کرن والے دی اَگے ودھن چ مدد کرئیے۔ (‏1-‏کُرنتھیوں 3:‏7‏)‏ اَسی صرف اوہنوں ایہہ نئیں سکھاندے کہ یہوواہ اوہدے کولوں کیہہ چاہندا اے سگوں اَسی اوہدی مدد وی کرنے آں کہ اوہ یہوواہ نال گُوڑھی محبت کرے تے ایس محبت نُوں ظاہر کرن لئی اپنی زندگی چ اوہدی خدمت نُوں سب توں زیادہ اہمیت دَوے۔ اَسی اوہنوں ایہہ وی سکھانے آں کہ اوہ مخالفت دا سامنا کردے ویلے مدد لئی یہوواہ تے بھروسا کیویں ظاہر کر سکدا اے۔ نالے جدوں اَسی اوہدے تے بھروسا ظاہر کراں گے تے اوہنوں ہمت ملے گی کہ اوہ یہوواہ دے معیاراں مطابق زندگی گزارے تے اوہدی خدمت کرن دا فیصلہ کرے۔‏