اضافی معلومات 3
کتاب ”خوشیاں بھری زندگی پاؤ“ توں بائبل کورس کراؤ
کتاب ”خوشیاں بھری زندگی پاؤ“ نُوں بڑی دُعا، سوچ وچار تے تحقیق کرن توں بعد تیار کیتا گیا اے۔ ایس کتاب توں چنگی طرحاں بائبل کورس کران لئی ایہہ طریقے استمال کرو:
بائبل کورس توں پہلاں
1. چنگی تیاری کرو۔ تیاری کردے ویلے سوچو کہ بائبل کورس کرن والے بندے نُوں اَگے ودھن لئی کیہہ کرن دی لوڑ اے، اوہدے حالات کیہو جہے نیں تے اوہ کیہڑے عقیدیاں نُوں مندا اے۔ ایہہ وی سوچو کہ اوہنوں کیہڑیاں گلاں نُوں سمجھن یاں اوہناں تے عمل کرن لئی مدد دی لوڑ ہو سکدی اے۔ غور کرو کہ ”ہور جانن لئی“ والے حصے چ دِتیاں گئیاں ویڈیوز تے مضموناں توں بائبل کورس کرن والے بندے نُوں کیہہ فائدہ ہو سکدا اے۔ ضرورت پین تے ایس حصے نُوں بائبل کورس دے دوران استمال کرو۔
بائبل کورس دے دوران
2. جے بائبل کورس کرن والے بندے نُوں اِعتراض نئیں اے تے شروع تے آخر چ دُعا کرو۔
3. زیادہ نہ بولو۔ اوسے معلومات تے گل کرو جیہڑی کتاب چ دِتی گئی اے تے بائبل کورس کرن والے بندے نُوں بولن دا زیادہ موقع دَوو۔
4. جدوں تُسی اِک نواں حصہ شروع کردے او تے اوس حصے دے مقصد نُوں پڑھو تے اوہدے چ دِتے گئے مضموناں وچوں کجھ تے دھیان دَواؤ۔
5. جدوں اِک حصہ ختم ہو جاندا اے تے ایہدی دہرائی کرو تاکہ بائبل کورس کرن والا بندہ اوہناں گلاں نُوں یاد رکھ سکے جیہڑیاں اوہنے سکھیاں نیں۔
6. ایس طریقے نال بائبل کورس کراؤ:
● سبق چ دِتی گئی معلومات نُوں پڑھو۔
● اوہناں ایتاں نُوں پڑھو جنہاں نُوں پڑھن لئی کہیا گیا اے۔
● جے لوڑ ہووے تے پیراگراف چ دِتیاں دُوجیاں ایتاں نُوں وی پڑھو۔
● اوہ ویڈیوز وکھاؤ جنہاں نُوں چلان لئی کہیا گیا اے (جے تواڈے لئی ممکن ہووے تے)۔
● بائبل کورس کرن والے بندے کولوں سارے سوال پچھو۔
● ”ہور سوچ وچار لئی“ والے حصے چ دِتیاں گئیاں تصویراں تے دھیان دَواؤ تے بائبل کورس کرن والے بندے نُوں پچھو کہ اوہنے ایہناں تصویراں توں کیہہ سکھیا اے۔
● ”ہُن ایہہ کرو“ والے حصے دے ذریعے اوہدی مدد کرو تاکہ اوہ ویکھ سکے کہ کیہہ اوہ اَگے ودھ رہیا اے۔ اوہنوں ہلاشیری دَوو کہ اوہ ایس حصے چ دِتے گئے منصوبے نُوں ویکھ کے اپنے لئی ہور منصوبے وی بنائے۔
● اوہنوں پچھو کہ جدوں اوہنے سبق دی تیاری کردے ویلے ”ہور سوچ وچار لئی“ والے حصے تے غور کیتا تے اوہنوں ایہدے وچوں کیہڑا مضمون یاں ویڈیو بوہت پسند آئی۔
● اِک وار چ پورا سبق ختم کران دی کوشش کرو۔
بائبل کورس توں بعد
7. بائبل کورس کرن والے بندے نُوں بُھل نہ جاؤ سگوں اوہدے بارے سوچدے رہوو۔ یہوواہ کولوں دُعا کرو کہ اوہ اوس بندے دی اَگے ودھن چ مدد کرے تے توانوں وی سمجھداری دَوے تاکہ تُسی چنگی طرحاں اوہدی مدد کر سکو۔