یہوواہ مشکلاں نُوں برداشت کرن چ ساڈی مدد کیویں کردا اے؟‏

1.‏ سانوں صبر دی لوڑ کیوں اے تے ایس معاملے چ کون ساڈی مدد کر سکدا اے؟ (‏1-‏پطرس 5:‏10‏)‏

ایس آخری زمانے چ اَسی سارے کسے نہ کسے مشکل چوں لنگھ رہے آں۔ ایس لئی ہو سکدا اے کہ مشکلاں نُوں برداشت کردے کردے اَسی تھک جائیے۔ شاید کسے نُوں کوئی وڈی بیماری اے۔ شاید کوئی اپنے کسے عزیز دی موت دی وجہ توں دُکھی اے۔ کجھ نُوں اپنے ایمان دی وجہ توں اپنے گھر والیاں وَلّوں یاں حکومت وَلّوں مخالفت دا سامنا کرنا پے رہیا اے۔ (‏متی 10:‏18،‏ 36، 37‏)‏ بھانویں اَسی کسے وی مشکل دا سامنا کر رہے ہوئیے، پر اَسی ایس گل دا پکا یقین رکھ سکنے آں کہ یہوواہ ایہناں مشکلاں نُوں صبر نال برداشت کرن چ ساڈی مدد کرے گا۔‏‏—‏1-‏پطرس 5:‏10 نُوں پڑھو۔‏

2.‏ سانوں مشکلاں نُوں صبر نال برداشت کرن دی طاقت کتھوں مِلدی اے؟‏

² صبر نال برداشت کرن دا مطلب اے کہ اَسی مشکلاں، ظلم تے اَزمیشاں دا سامنا کردے ویلے خدا دے وفادار رہیے تے خوشی نال اوہدی خدمت کردے رہیے۔ نالے ایہدے چ ایہہ وی شامل اے کہ اَسی ایس گل دا یقین رکھئے کہ حالات بہتر ہو جان گے۔ اَسی اپنی طاقت نال ایہناں مشکا‌ں دا مقابلہ نئیں کر سکدے سگوں سانوں یہوواہ دی مدد دی ضرورت اے کیونکہ اوہ سانوں جیہڑی طاقت دیندا اے، اوہ انسانی طاقت نالوں کِتے ودھ کے وے۔ (‏2-‏کُرنتھیوں 4:‏7‏)‏ ایس مضمون چ اَسی اوہناں چار نعمتاں تے غور کراں گے جیہڑیاں مشکلاں نُوں صبر نال برداشت کرن چ ساڈی مدد کرن گیاں۔ اَسی ایہہ وی ویکھاں گے کہ اَسی ایہناں نعمتاں توں پورا فائدہ کیویں حاصل کر سکنے آں۔‏

دُعا

3.‏ اَسی ایہہ کیوں کہہ سکنے آں کہ دُعا اِک نعمت اے؟‏

³ یہوواہ نے صبر نال مشکلاں نُوں برداشت کرن لئی سانوں اِک ایہو جہی نعمت دِتی اے جیہڑی کسے معجزے توں گھٹ نئیں۔ اوہنے گُناہ‌گار انساناں نُوں موقع دِتا اے کہ اوہ اوہدے نال گل کر سکن۔ (‏عبرانیوں 4:‏16‏)‏ ذرا سوچو کہ اَسی کسے وی ویلے تے کسے وی معاملے بارے یہوواہ کولوں دُعا کر سکنے آں۔ اوہ ساڈے وچوں ہر اِک دی دُعا سُن سکدا اے۔ بھانویں اَسی کسے وی زبان چ دُعا کریئے یاں فیر کسے وی جگہ تے ہوئیے، ایتھوں تک کہ قید چ وی اوہ ساڈی دُعا سُن سکدا اے۔ (‏یُوناہ 2:‏1، 2؛‏ اعمال 16:‏25، 26‏)‏ نالے جدوں پریشانی دی وجہ توں سانوں ایہہ سمجھ نئیں آندا کہ اَسی دُعا چ یہوواہ نُوں کیہہ کہیے تے اوہدوں وی اوہ سمجھ جاندا اے کہ اَسی کیہہ کہنا چاہنے آں۔ (‏رومیوں 8:‏26، 27‏)‏ واقعی، دُعا اِک بڑی وڈی نعمت اے۔‏

4.‏ اَسی ایہہ یقین کیوں رکھ سکنے آں کہ جے اَسی مشکلاں چ یہوواہ کولوں مدد منگاں گے تے اوہ ساڈی ضرور سُنے گا؟‏

⁴ بائبل چ یہوواہ نے سانوں دَسیا اے کہ”‏اَسی اوہدی مرضی مطابق جو کجھ وی منگنے آں اوہ ساڈی سُن دا اے۔“‏ (‏1-‏یوحنا 5:‏14‏)‏ فیر کیہہ اَسی یہوواہ کولوں ایہہ دُعا کر سکنے آں کہ اوہ مشکلاں نُوں صبر نال برداشت کرن چ ساڈی مدد کرے؟ بالکل کر سکنے آں۔ جدوں اَسی مشکلاں چ یہوواہ دے وفادار رہنے آں تے یہوواہ نُوں شیطان اِبلیس نُوں جواب دین دا موقع مِلدا اے جیہڑا اوہنوں طعنے ماردا اے۔ (‏اَمثال 27:‏11)‏ بائبل چ ایہہ وی دَسیا گیا اے کہ یہوواہ چاہندا اے کہ اوہ اوہناں لوکاں دے ذریعے اپنی طاقت ظاہر کرے جیہڑے پورے دل نال اوہدی مرضی تے چلدے نیں۔ (‏2-‏تواریخ 16:‏9)‏ ایس لئی یقین رکھو کہ یہوواہ کول نہ صرف تواڈی مدد کرن دی طاقت اے سگوں اوہ تواڈی مدد کرنا وی چاہندا اے تاکہ تُسی مشکلاں نُوں صبر نال برداشت کر سکو۔—‏یسعیاہ 30:‏18؛ 41:‏10؛‏ لُوقا 11:‏13‏۔‏

5.‏ دُعا کرن نال سانوں ذہنی سکون کیویں مِلدا اے؟ (‏یسعیاہ 26:‏3)‏

⁵ بائبل چ دَسیا گیا اے کہ جدوں اَسی دل کھول کے یہوواہ کولوں دُعا کراں گے تے اوہ سانوں ”‏اوہ اِطمینان دَوے گا جیہڑا سمجھ توں باہر اے تے اوہ اِطمینان مسیح یسوع دے ذریعے[‏ساڈے]‏دِلاں تے سوچ دی حفاظت کرے گا۔“‏ (‏فِلپّیوں 4:‏7‏)‏ اَسی یہوواہ دی ایس نعمت لئی شکرگزار کیوں ہو سکنے آں؟ جدوں دُنیا دے لوک کسے مشکل چ ہوندے نیں تے اوہ فرق فرق طریقیاں نال ذہنی سکون حاصل کرن دی کوشش کردے نیں۔ مثال لئی، کجھ لوک سکون حاصل کرن لئی اپنے ذہن چوں نہ صرف پریشانیاں سگوں ہر طرحاں دی سوچ نُوں کڈھن دی کوشش کردے نیں۔ پر اپنے دماغ نُوں خالی کرنا خطرناک وی ہو سکدا اے کیونکہ اِنج باغی فرشتیاں نُوں اِک بندے دی سوچ نُوں خراب کرن دا موقع مِل جاندا اے۔ (‏متی 12:‏43-‏45 تے غور کرو۔)‏ نالے ایس طریقے نال لوکاں نُوں اوہ اِطمینان نئیں مِلدا جیہڑا یہوواہ اوہناں نُوں دینا چاہندا اے۔ یہوواہ اپنا اِطمینان صرف اوہناں لوکاں نُوں دیندا اے جیہڑے اوہدے تے بھروسا کردے نیں۔ ‏(‏یسعیاہ 26:‏3 نُوں پڑھو۔)‏ جدوں اَسی پریشانی چ یہوواہ کولوں دُعا کرنے آں تے اوہ سانوں پاک کلام دِیاں اوہ سچائیاں یاد دَواندا اے جنہاں توں پتہ چلدا اے کہ اوہ سانوں پیار کردا اے تے ساڈی مدد کرنا چاہندا اے۔ اِنج سانوں ذہنی سکون مِلدا اے۔—‏زبور 62:‏1، 2۔‏

6.‏ تُسی دُعا دی نعمت توں پورا فائدہ کیویں حاصل کر سکدے او؟ (‏تصویر نُوں وی ویکھو۔)‏

⁶ تُسی کیہہ کر سکدے او؟‏ جدوں تُسی کسے مشکل چ ہوندے او تے دُعا دے ذریعے اپنا بھار یہوواہ تے پا دَوو تے اوہدے کولوں اِطمینان منگو۔ (‏زبور 55:‏22)‏ ایہدے علاوہ، تُسی ایہہ وی دُعا کرو کہ اوہ چنگے فیصلے کرن چ تواڈی مدد کرے۔ (‏اَمثال 2:‏10، 11)‏ دُعا کردے ویلے یہوواہ دا شکر کرنا کدی نہ بُھلو۔ (‏فِلپّیوں 4:‏6‏)‏ ہر روز ایس گل تے غور کرو کہ یہوواہ صبر نال مشکلاں نُوں برداشت کرن چ تواڈی مدد کیویں کر رہیا اے۔ فیر دُعا چ اوہدی مدد لئی اوہدا شکریہ ادا کرو۔ کدی وی اپنیاں مشکلاں بارے ایناں نہ سوچو کہ تُسی اوہناں برکتاں نُوں ای بُھل جاؤ جیہڑیاں یہوواہ نے توانوں دِتیاں نیں۔—‏زبور 16:‏5، 6۔‏

خدا دا کلام

7.‏ بائبل پڑھن نال سانوں صبر نال مشکلاں نُوں برداشت کرن چ مدد کیویں مِلدی اے؟‏

⁷ یہوواہ اپنے کلام دے ذریعے مشکلاں نُوں صبر نال برداشت کرن چ ساڈی مدد کردا اے۔ بائبل دِیاں بوہت ساریاں ایتاں توں ایہہ ثابت ہوندا اے کہ یہوواہ ہمیشاں ساڈا ساتھ دیندا اے۔ ایہدی اِک مثال متی 6:‏8 اے جدے چ لکھیا اے:‏ ”‏تواڈے اسمانی باپ نُوں تواڈے منگن توں پہلاں ای پتہ اے کہ توانوں کیہڑیاں چیزاں دی لوڑ اے۔“‏ ایہہ گل یسوع مسیح نے کہی سی جیہڑا یہوواہ خدا نُوں سب توں چنگی طرحاں جان دا اے۔ ایس لئی ایہدے چ کوئی شک نئیں کہ یہوواہ ساڈیاں مشکلاں نُوں جان دا اے تے ساڈی مدد کرنا چاہندا اے۔ بائبل چ ہور وی ایہو جہیاں ایتاں نیں جنہاں توں سانوں حوصلہ مِلدا اے کہ اَسی مشکلاں چ وی یہوواہ دے وفادار رہ سکنے آں۔—‏زبور 94:‏19۔‏

8.‏ (‏الف)‏بائبل دا کوئی ایہو جیہا اصول دَسو جیہڑا مشکل ویلے چ ساڈے کم آ سکدا اے؟ (‏ب)‏اَسی کیہہ کر سکنے آں تاکہ بائبل دے اصول سانوں اوس ویلے یاد آن جدوں سانوں اوہناں دی لوڑ ہوندی اے؟‏

⁸ بائبل چ ایہو جہیاں بوہت ساریاں ہدیتاں تے مشورے نیں جیہڑے مشکل ویلے چ ساڈے کم آ سکدے نیں۔ ایہناں تے غور کرن نال سانوں چنگے فیصلے کرن چ مدد مِلدی اے۔(‏اَمثال 2:‏6، 7)‏ مثال لئی، بائبل چ دَسیا گیا اے کہ اَسی ہر دن یہوواہ تے بھروسا کریئے تے مستقبل بارے حدوں ودھ پریشان نہ ہوئیے۔ (‏متی 6:‏34‏)‏ جے اَسی روز بائبل پڑھاں گے تے اوہدے تے سوچ وچار کراں گے تے ساڈے لئی اوہناں ہدیتاں تے مشوریاں نُوں یاد رکھنا اسان ہوئے گا جیہڑے چنگے فیصلے کرن چ ساڈے کم آن گے۔ نالے اَسی صبر نال مشکلاں نُوں برداشت وی کر سکاں گے۔‏

9.‏ بائبل چ خدا دے بندیاں دِیاں مثالاں تے غور کرن نال ساڈا یہوواہ تے بھروسا کیویں ودھدا اے؟‏

⁹ بائبل چ ایہو جہے بوہت سارے لوکاں دِیاں مثالاں نیں جنہاں نے یہوواہ تے بھروسا رکھیا تے یہوواہ نے مشکل ویلے چ اوہناں دا ساتھ دِتا۔ (‏عبرانیوں 11:‏32-‏34؛‏ یعقوب 5:‏17‏)‏ جدوں اَسی غور کرنے آں کہ یہوواہ نے اوہناں دی مدد کیویں کیتی تے سانوں وی ایس گل دا پکا یقین ہو جاندا اے کہ یہوواہ ساڈی وی مدد کرے گا۔ (‏زبور 46:‏1)‏ جدوں اَسی غور کرنے آں کہ اوہناں لوکاں نے یہوواہ تے مضبوط ایمان کیویں ظاہر کیتا تے اوہدے وفادار کیویں رہے تے سانوں وی حوصلہ مِلدا اے کہ اَسی وی یہوواہ تے مضبوط ایمان رکھیے تے مشکلاں چ اوہدے وفادار رہیے۔—‏یعقوب 5:‏10، 11‏۔‏

10.‏ تُسی خدا دے کلام توں پورا فائدہ کیویں حاصل کر سکدے او؟‏

¹⁰ تُسی کیہہ کر سکدے او؟‏ ہر روز بائبل پڑھو تے اوہناں ایتاں دی اِک لسٹ بناؤ جیہڑیاں خاص طور تے تواڈے کم آ سکدیاں نیں۔ بوہت سارے بھین بھرا کتاب”‏ہر روز پاک کلام تے غور کرو“‏ چوں ایت تے تبصرے نُوں پڑھدے نیں۔ اِنج اوہ سارا دن حوصلہ ودھان والیاں گلاں تے سوچ‌وچار کر سکدے نیں۔ ایسے معاملے بارے ذرا بھین ماریاa دی مثال تے غور کرو۔ اوہدے ماں پیو نُوں کینسر ہو گیا۔ جدوں بھین ماریا اپنے ماں پیو دا خیال رکھ رہی سی تے اوس دوران کیہڑی چیز نے صبر نال ایس مشکل نُوں برداشت کرن چ اوہدی مدد کیتی؟ اوہنے کہیا:‏ ”‏مَیں ہر صبح کتاب ”‏ہر روز پاک کلام تے غور کرو“‏ چوں ایت پڑھنی ساں تے اوہدے تے سوچ‌وچار کرنی ساں۔ اِنج مَیں اپنا دھیان اپنیاں مشکلاں توں ہٹا کے یہوواہ تے اوہناں شاندار گلاں تے رکھن دے قابل ہوئی جیہڑیاں اوہ اپنے کلام دے ذریعے سانوں سکھاندا اے۔“‏—‏زبور 61:‏2۔‏

ساڈے بھین بھرا

11.‏ سانوں ایہہ جان کے تسلی کیوں مِلدی اے کہ اَسی کلّے ای مشکلاں نئیں سہہ رہے؟‏

¹¹ یہوواہ نے پوری دُنیا چ سانوں ایہو جہے بھین بھرا دِتے نیں جیہڑے صبر نال مشکلاں نُوں برداشت کرن چ ساڈی مدد کردے نیں۔ سانوں ایس گل توں بڑی تسلی مِلدی اے کہ پوری دُنیا چ ساڈے ایہو جہے بوہت سارے بھین بھرا ہے نیں جیہڑے ساڈے وانگوں مشکلاں چوں لنگھ رہے نیں۔ (‏1-‏پطرس 5:‏9‏)‏ اَسی ایس گل دا یقین رکھ سکنے آں کہ جے ساڈے بھین بھرا مشکلاں چ یہوواہ دے وفادار رہے نیں تے فیر اَسی وی رہ سکنے آں۔—‏اعمال 14:‏22‏۔‏

12.‏ ساڈے بھین بھرا ساڈی مدد کیویں کر سکدے نیں تے اَسی اوہناں دی مدد کیویں کر سکنے آں؟ (‏2-‏کُرنتھیوں 1:‏3، 4‏)‏

¹² ساڈے بھین بھرا اپنیاں گلاں تے کماں دے ذریعے ساڈا حوصلہ ودھاندے نیں تاکہ اَسی صبر نال مشکلاں نُوں برداشت کر سکئے۔ پولُس رسول نُوں وی بھین بھراواں توں بڑا حوصلہ ملیا۔ اوہنے اپنے خطاں چ کجھ بھین بھراواں دا ناں لے کے اوہناں نُوں شکریہ کہیا کیونکہ ایہناں بھین بھراواں نے اوس ویلے اوہدی مدد کیتی سی جدوں اوہ اِک گھر چ قید سی۔ اوہناں نے صرف مُونہہ زبانی اوہدا حوصلہ نئیں ودھایا سگوں اوہدیاں ضرورتاں نُوں وی پورا کیتا۔ (‏فِلپّیوں 2:‏25،‏ 29، 30؛‏ کُلسّیوں 4:‏10، 11‏)‏ اَج ساڈے بھین بھرا وی سانوں تسلی دیندے نیں تے مشکلاں نُوں صبر نال برداشت کرن چ ساڈی مدد کردے نیں تے جدوں اوہ کسے مشکل چ ہوندے نیں تے اَسی وی اوہناں دی مدد کرنے آں۔‏‏—‏2-‏کُرنتھیوں 1:‏3، 4 نُوں پڑھو۔‏

13.‏ کیہڑی چیز نے بھین مایا دی مدد کیتی تاکہ اوہ صبر نال مشکلاں نُوں برداشت کر سکے؟‏

¹³ ذرا روس چ رہن والی بھین مایا دی مثال تے غور کرو۔ 2020 چ کجھ افسراں نے اچانک اوہدے گھر تے چھاپا ماریا تے گھر دی تلاشی لئی۔ بعد چوں اوہنوں عدالت چ پیش کیتا گیا جتھے اوہنے اپنے ایمان بارے دَسیا۔ بھین مایا نے دَسیا کہ ایس مشکل وقت چ بھین بھراواں نے اوہدا حوصلہ ودھایا۔ اوہنے کہیا:‏”‏اوس ویلے مَیں بڑی پریشان تے دُکھی ساں۔ پر بھین بھراواں نے مینوں فون کیتا، خط لکھے تے میسج دے ذریعے مینوں دَسیا کہ اوہناں نُوں میری کِنّی فکر اے۔ مینوں پتہ سی کہ مَیں اِک وڈے خاندان دا حصہ واں تے میرے بھین بھرا مینوں بوہت پیار کردے نیں۔ پر 2020 توں میرا ایس گل تے یقین ہور وی ودھ گیا اے۔“‏

14.‏ اَسی کیہہ کر سکنے آں تاکہ سانوں بھین بھراواں دی مدد توں فائدہ ہوئے؟ (‏تصویر نُوں وی ویکھو۔)‏

¹⁴ تُسی کیہہ کر سکدے او؟‏ مشکلاں دا سامنا کردے ویلے بھین بھراواں دے نیڑے رہوو تے کلیسیا دے بزرگاں کولوں مدد منگو کیونکہ بزرگ نھیری توں لکن دی تھاں وانگوں تے طوفانی بارش چ پناہ وانگوں نیں۔ (‏یسعیاہ 32:‏2)‏ ایہہ وی یاد رکھو کہ تواڈے بھین بھرا وی صبر نال مشکلاں نُوں برداشت کر رہے نیں۔ جدوں تُسی ضرورت‌مند بھین بھراواں دی مدد کرو گے تے توانوں خوشی ملے گی تے تُسی صبر نال مشکلاں نُوں برداشت کر سکو گے۔—‏اعمال 20:‏35‏۔‏

مستقبل بارے امید

15.‏ یسوع دی امید نے اوہدی مدد کیویں کیتی تے مستقبل بارے ساڈی امید ساڈی مدد کیویں کردی اے؟ (‏عبرانیوں 12:‏2‏)‏

¹⁵ یہوواہ نے سانوں جیہڑی امید دِتی اے، اوہ ضرور پوری ہوئے گی۔ ایس امید دی وجہ توں اَسی صبر نال مشکلاں نُوں برداشت کر سکنے آں۔ (‏رومیوں 15:‏13‏)‏ یاد کرو کہ یسوع دی زندگی دے سب توں مشکل ویلے چ اوہدی امید نے اوہدی مدد کیویں کیتی۔ ‏(‏عبرانیوں 12:‏2 نُوں پڑھو۔)‏ یسوع جان دا سی کہ جے اوہ یہوواہ دا وفادار رہوے گا تے اوہدے باپ دے ناں دی وڈیائی ہوئے گی تے شیطان جھوٹھا ثابت ہوئے گا۔ یسوع اوس وقت دا اِنتظار کر رہیا سی جدوں اوہ واپس اسمان تے اپنے باپ کول جائے گا۔ اوہنوں اوس وقت دا وی اِنتظار سی جدوں اوہ بادشاہ بنے گا تے پاک روح نال مسح ہون والے اپنے بھراواں نال مِل کے حکمرانی کرے گا۔ اِنج جدوں اَسی وی اپنا دھیان ہمیشاں دی زندگی دی امید تے رکھاں گے تے اَسی شیطان دی دُنیا دا مقابلہ کر سکاں گے۔‏

16.‏ اِک بھین نُوں نوِیں دُنیا دی امید توں حوصلہ کیویں ملیا تے تُسی اوہدے توں کیہہ سکھیا اے؟‏

¹⁶ غور کرو کہ روس چ رہن والی بھین ایلا نُوں نوِیں دُنیا چ ہمیشاں دی زندگی دی امید توں کیویں حوصلہ ملیا۔ بھین دے شوہر نُوں گِرفتار کر کے جیل چ پا دِتا گیا۔ اوہ کہندی اے:‏”‏مَیں اپنی دُعا چ اکثر مستقبل دی امید دا ذکر کرنی ساں تے ایہدے بارے سوچ‌وچار کرنی ساں۔ اِنج مَیں حدوں ودھ پریشان نئیں ہنی ساں۔ مینوں پتہ اے کہ ایہہ مشکلاں ختم ہو جان گیاں۔ یہوواہ چھیتی اپنے دُشمناں نُوں ختم کرے گا تے سانوں اجر دَوے گا۔“‏

17.‏ اَسی اوس امید لئی قدر کیویں وکھا سکنے آں جیہڑی یہوواہ نے سانوں دِتی اے؟ (‏تصویر نُوں ویکھو۔)‏

¹⁷ تُسی کیہہ کر سکدے او؟‏ اوس شاندار مستقبل بارے سوچن لئی وقت کڈھو جدا یہوواہ نے وعدہ کیتا اے۔ سوچو کہ نوِیں دُنیا چ توانوں کِنّیاں شاندار برکتاں مِلن گیاں۔ اِنج توانوں محسوس ہوئے گا کہ اَج توانوں جیہڑیاں مشکلاں دا سامنا کرنا پے رہیا اے، اوہ تھوڑی دیر لئی نیں تے معمولی نیں۔ (‏2-‏کُرنتھیوں 4:‏17‏)‏ ایہدے علاوہ دُوجیاں نُوں وی خدا دے شاندار وعدیاں بارے دَسو۔ ذرا سوچو کہ جنہاں لوکاں کول کوئی امید نئیں، اوہناں لئی اپنیاں مشکلاں نُوں برداشت کرنا کِنّاں اوکھا اے۔ جے تُسی اوہناں نُوں اپنی امید بارے تھوڑا جیہا وی دَسو گے تے اوہناں دے دل چ یہوواہ تے اوہدے وعدیاں نُوں جانن دی خواہش پیدا ہوئے گی۔‏

18.‏ اَسی خدا دے وعدیاں تے بھروسا کیوں کر سکنے آں؟‏

¹⁸ ایوب بوہت ساریاں مشکلاں چ یہوواہ دا وفادار رہیا۔ اوہنے یہوواہ بارے کہیا:‏ ہُن مَیں جان گیا واں کہ تُوں سب کجھ کر سکنا ایں تے تُوں جو وی کرن دا ارادہ کرنا ایں، اوہنوں پورا کرنا ایں۔ (‏ایوب 42:‏2)‏ ایوب جان گیا سی کہ کوئی وی چیز یہوواہ نُوں اپنا مقصد پورا کرن توں نئیں روک سکدی۔ ایہی گل سانوں اوہدوں حوصلہ دیندی اے جدوں اَسی وی مشکلاں دا سامنا کر رہے ہُنے آں۔ ایہدے لئی ذرا ایس مثال تے غور کرو۔ فرض کرو کہ اِک عورت کافی لمے عرصے توں بیمار اے۔ اوہنے کئی ڈاکٹراں کولوں اپنا علاج کرایا اے پر اوہنوں کوئی فائدہ نئیں ہویا تے اوہ بوہت مایوس ہو گئی اے۔ پر فیر اوہنوں اِک ایہو جیہا ڈاکٹر مِلدا اے جیہڑا اوہنوں اوہدی بیماری دی وجہ دَسدا اے تے اوہنوں یقین دَواندا اے کہ اوہ اوہدا علاج کر سکدا اے۔ اوہ عورت ڈاکٹر دی ایہہ گل سُن کے بڑی خوش ہوندی اے۔ بھانویں کہ اوہنوں پتہ اے کہ اوہنوں ٹھیک ہون چ وقت لگے گا پر ہُن اوہ عورت ایس بیماری نُوں برداشت کر سکدی اے کیونکہ اوہنوں امید اے کہ اوہ ٹھیک ہو جائے گی۔ ایسے طرحاں جدوں اَسی وی مستقبل دی امید تے پکا یقین رکھنے آں تے اَسی وی مشکلاں نُوں صبر نال برداشت کرن دے قابل ہو جانے آں۔‏

19.‏ سانوں صبر نال مشکلاں نُوں برداشت کرن لئی کیہہ کرن دی لوڑ اے؟‏

¹⁹ ایس مضمون چ اَسی سکھیا اے کہ یہوواہ نے مشکلاں نُوں صبر نال برداشت کرن لئی سانوں چار نعمتاں دِتیاں نیں یعنی دُعا، پاک کلام،ساڈے بھین بھرا تے مستقبل بارے امید۔ جدوں اَسی ایہناں نعمتاں توں پورا فائدہ حاصل کراں گے تے یہوواہ ساڈی مدد کرے گا کہ اَسی اوہدوں تک صبر نال مشکلاں نُوں برداشت کریئے جدوں تک اوہ شیطان دی ایس بھیڑی دُنیا نُوں ختم نئیں کر دیندا۔—‏فِلپّیوں 4:‏13‏۔‏