یہوواہ دی محبت نُوں قبول کرو

1.‏ تُسی اپنی زندگی یہوواہ دے ناں کیوں کیتی سی؟ (‏تصویر نُوں وی ویکھو۔)‏

کیہہ توانوں اوہ وقت یاد اے جدوں تُسی دُعا چ اپنی زندگی یہوواہ دے ناں کیتی سی؟ تُسی ایہہ فیصلہ ایس لئی کیتا سی کیونکہ تُسی یہوواہ نُوں جان گئے سو تے توانوں اوہدے نال محبت ہو گئی سی۔ تُسی دُعا چ اوہدے نال ایہہ وعدہ کیتا سی کہ تُسی اپنی خوشی نُوں نئیں سگوں اوہدی خوشی نُوں زیادہ اہم سمجھو گے۔ تُسی اوہنوں اپنے سارے دل، جان، عقل تے طاقت نال پیار کردے رہوو گے۔ (‏مرقس 12:‏30‏)‏ اوہدوں توں لے کے ہُن تک تواڈے دل چ اوہدے لئی محبت ودھدی گئی اے۔ تے فیر جے کوئی توانوں پچھے کہ ”‏کیہہ تُسی واقعی یہوواہ نُوں محبت کردے او“‏ تے تُسی کیہہ جواب دَوو گے؟ تُسی بغیر کسے جھجک دے کہوو گے:‏ ”‏جِنّی محبت مَیں یہوواہ نال کرنا واں اونی مَیں کسے ہور چیز یاں انسان نال نئیں کردا۔“‏

2، 3.‏ یہوواہ سانوں کیس گل دا یقین دَوانا چاہندا اے تے ایس مضمون چ اَسی کیہڑی گل تے غور کراں گے؟ (‏یرمیاہ 31:‏3)‏

² جے تواڈے کولوں کوئی ایہہ سوال پچھے کہ ”‏کیہہ توانوں ایس گل دا پکا یقین اے کہ یہوواہ توانوں پیار کردا اے“‏ تے تُسی اوہنوں کیہہ جواب دَوو گے؟ کیہہ تُسی اوہنوں جواب دین چ جھجک محسوس کرو گے تے ایہہ کہوو گے کہ”‏مَیں یہوواہ دی محبت دے لائق نئیں آں؟“‏ ذرا اِک بھین دی گل تے غور کرو جدا بچپن بوہت بھیڑا گزریا سی۔ اوہنے کہیا:‏ ”‏مینوں ایس گل تے کوئی شک نئیں کہ مَیں دِلوں یہوواہ نال محبت کرنی آں۔ پر مینوں اکثر ایس گل تے یقین کرنا مشکل لگدا اے کہ یہوواہ میرے نال محبت کردا اے۔“‏ تُسی ایہہ کیویں جان سکدے او کہ یہوواہ تواڈے بارے کیہو جیہا محسوس کردا اے؟‏

³ یہوواہ چاہندا اے کہ تُسی ایس گل دا پکا یقین رکھو کہ اوہ توانوں پیار کردا اے۔ ‏(‏یرمیاہ 31:‏3 نُوں پڑھو۔)‏ سچ تے ایہہ وے کہ یہوواہ نے توانوں اپنے وَل کِھچیا اے تاکہ تُسی اوہدے بارے جانو تے اوہدے دوست بنو۔ جدوں تُسی دُعا چ اپنی زندگی اوہدے ناں کیتی سی تے بپتسمہ لیا سی تے اوہنے توانوں بڑا ای قیمتی تحفہ دِتا سی یعنی اپنی اَٹل محبت۔ ایہہ محبت بوہت ای گُوڑھی اے تے کدی ختم نئیں ہوندی۔ ایس محبت دی وجہ توں یہوواہ اپنے وفادار بندیاں نُوں اپنی خاص ملکیت سمجھدا اے جنہاں چ تُسی وی شامل او۔ (‏ملاکی 3:‏17)‏ یہوواہ چاہندا اے کہ تُسی وی پولُس وانگوں ایس گل دا پکا یقین رکھو کہ اوہ تواڈے نال بڑی محبت رکھدا اے۔ پولُس نے کہیا:‏ ”‏مینوں پورا یقین اے کہ نہ موت، نہ زندگی، نہ فرشتے، نہ حکومتاں، نہ ایس زمانے دِیاں چیزاں، نہ آن والے زمانے دِیاں چیزاں، نہ طاقتاں، نہ اُنچائی، نہ گہرائی تے نہ ای کوئی ہور شے خدا نُوں ساڈے نال محبت کرن توں روک سکدی اے۔“‏ (‏رومیوں 8:‏38، 39‏)‏ ایس مضمون چ اَسی ویکھاں گے کہ سانوں ایس گل تے اپنے یقین نُوں مضبوط کیوں کرنا چاہی دا اے کہ یہوواہ ساڈے نال محبت کردا اے تے ایس یقین نُوں مضبوط کرن چ کیہڑی چیز ساڈی مدد کر سکدی اے۔‏

ایہہ کیوں ضروری اے کہ اَسی یہوواہ دی محبت نُوں قبول کریئے؟‏

4.‏ شیطان سانوں کیس گل دا یقین دَوانا چاہندا اے تے اَسی اوہدیاں چالاں چ پھسن توں کیویں بچ سکنے آں؟‏

⁴ یہوواہ دی محبت نُوں قبول کرن نال اَسی اِبلیس دِیاں ‏”‏چالاں“‏ دا مقابلہ کر سکنے آں۔‏ (‏اِفسیوں 6:‏11‏)‏ شیطان سانوں یہوواہ دی خدمت توں روکن دی پوری کوشش کردا اے۔ اوہدی اِک چال ایہہ وے کہ اوہ ایہہ جھوٹھ پھیلاندا اے کہ یہوواہ سانوں پیار نئیں کردا۔ کدی نہ بُھلو کہ شیطان موقعے دی تلاش چ رہندا اے۔ اکثر اوہ ساڈے تے اوہدوں وار کردا اے جدوں اَسی کمزور ہُنے آں۔ شاید اَسی ماضی چ ہون والیاں کجھ گلاں دی وجہ توں دُکھی آں، شاید اَسی ہُن کسے مشکل چوں لنگھ رہے آں یاں اَسی ایس وجہ توں پریشان آں کہ اَگے چل کے ساڈے نال کیہہ ہوئے گا۔ (‏اَمثال 24:‏10)‏ شیطان اِک گرجدے ہوئے ببر شیر وانگوں اے۔ جیویں اِک شیر کمزور شکار تے حملہ کردا اے اونویں ای شیطان اوہدوں ساڈے تے حملہ کردا اے جدوں اَسی جذباتی طور تے کمزور ہُنے آں۔ جے اَسی ایس گل تے اپنے یقین نُوں ودھاواں گے کہ یہوواہ سانوں پیار کردا اے تے اَسی ڈٹ کے شیطان دا مقابلہ کر سکاں گے تے اوہدیاں چالاں چ نئیں پھساں گے۔—‏1-‏پطرس 5:‏8، 9؛‏ یعقوب 4:‏7‏۔‏

5.‏ ایہہ کیوں ضروری اے کہ اَسی یہوواہ دی محبت نُوں محسوس کریئے؟‏

⁵ یہوواہ دی محبت نُوں قبول کرن نال اَسی اوہدے ہور نیڑے ہو جانے آں۔‏ اَسی اِنج کیوں کہہ سکنے آں؟ یہوواہ نے سانوں اِنج بنایا اے کہ اَسی دُوجیاں نال محبت کریئے تے اَسی چاہنے آں کہ دُوجے وی ساڈے نال محبت کرن۔ جدوں کوئی ساڈے لئی محبت وکھاندا اے تے اَسی محبت دا جواب محبت نال ای دینے آں۔ ایسے طرحاں جِنّاں زیادہ اَسی ایہہ محسوس کراں گے کہ یہوواہ ساڈے نال محبت کردا اے تے ساڈی قدر کردا اے اوناں ای زیادہ اَسی وی اوہدے نال محبت کراں گے۔ (‏1-‏یوحنا 4:‏19‏)‏ جِنّی زیادہ ساڈے دل چ اوہدے لئی محبت ودھے گی اونی ای زیادہ اوہدی محبت ساڈے لئی ودھے گی۔ بائبل چ صاف لفظاں چ دَسیا گیا اے:‏ ”‏خدا دے نیڑے جاؤ تے اوہ تواڈے نیڑے آئے گا۔“‏ (‏یعقوب 4:‏8‏)‏ اَسی کیہہ کر سکنے آں تاکہ سانوں ایس گل دا پکا یقین ہو جائے کہ یہوواہ ساڈے نال محبت کردا اے؟‏

کیہڑی چیز یہوواہ دی محبت نُوں قبول کرن چ ساڈی مدد کرے گی؟‏

6.‏ جے سانوں ایس گل تے یقین کرنا مشکل لگدا اے کہ یہوواہ ساڈے نال محبت کردا اے تے اَسی کیس بارے دُعا کر سکنے آں؟‏

⁶ یہوواہ کولوں ایہہ دُعا کردے رہوو کہ اوہ تواڈی ایہہ سمجھن چ مدد کردا رہوے کہ اوہ تواڈے نال محبت کیوں کردا اے۔‏ (‏لُوقا 18:‏1؛‏ رومیوں 12:‏12‏)‏ یہوواہ کولوں دُعا کرو کہ اوہ تواڈی مدد کرے تاکہ تُسی اپنے آپ نُوں اوسے نظر نال ویکھ سکو جیس نظر نال اوہ توانوں ویکھدا اے۔ جے ضرورت محسوس ہوئے تے دن چ وار وار اِنج کرو۔ کدی کدار شاید اَسی اپنے بارے ایناں بُرا محسوس کرنے آں کہ سانوں ایس گل دا یقین ای نئیں آندا کہ خدا ساڈے نال پیار کردا اے۔ پر ایہہ یاد رکھو کہ خدا ساڈے دل نالوں وڈا اے۔ (‏1-‏یوحنا 3:‏19، 20‏)‏ جِنّاں اوہ توانوں جان دا اے، تُسی آپ وی اپنے آپ نُوں شاید اوناں نئیں جان دے ہووو گے۔ اوہ تواڈے چ اوہ چنگیاں گلاں ویکھدا اے جیہڑیاں توانوں آپ اپنے اندر نظر نئیں آندیاں۔ (‏1-‏سموئیل 16:‏7؛ 2-‏تواریخ 6:‏30)‏ دُعا چ اوہدے سامنے اپنا دل کھول دَوو تے اوہنوں کہوو کہ اوہ تواڈی مدد کرے تاکہ تُسی اوہدی محبت نُوں قبول کر سکو۔ (‏زبور 62:‏8)‏ فیر تُسی دُعا چ اوہدے کولوں جو کجھ وی منگیا اے، اوہدے مطابق عمل کرو۔‏

7، 8.‏ زبور چ لکھیاں ایتاں توں ساڈا ایہہ یقین ہور پکا کیویں ہوندا اے کہ یہوواہ سانوں پیار کردا اے؟‏

⁷ یہوواہ دی گل تے بھروسا کرو۔‏ یہوواہ نے بائبل لکھن والے بندیاں نُوں اپنی پاک روح دِتی تاکہ اوہ اوہدے بارے اوہی گلاں لکھن جیہڑیاں سچ نیں۔ غور کرو کہ داؤد نے جیہڑے زبور لکھے، اوہناں چوں اِک زبور چ اوہنے بڑے شاندار طریقے نال دَسیا کہ یہوواہ ساڈا کِنّاں خیال رکھدا اے۔ اوہنے کہیا:‏ یہوواہ دُکھ نال چُور لوکاں دے نیڑے وے۔ اوہ اوہناں لوکاں نُوں بچاندا اے جیہڑے بے‌حوصلہ ہو گئے نیں۔ (‏زبور 34:‏18)‏ جدوں ساڈا حوصلہ ٹُٹ جاندا اے تے شاید سانوں لگے کہ اَسی بالکل کلّے رہ گئے آں۔ پر یہوواہ نے ساڈے نال وعدہ کیتا اے کہ جدوں وی سانوں اِنج محسوس ہوئے گا تے اوہ ساڈے نیڑے آ جائے گا کیونکہ اوہ ویکھ سکدا اے کہ ہُن سانوں اوہدی پہلے نالوں وی زیادہ ضرورت اے۔ اِک ہور زبور چ داؤد نے لکھیا:‏ میرے آنسو اپنی مشک چ جمع کر لے۔ (‏زبور 56:‏8)‏ ایہدے توں پتہ چلدا اے کہ جدوں اَسی دُکھ یاں تکلیف چ ہنے آں تے یہوواہ سانوں ویکھ رہیا ہوندا اے۔ اوہ ساڈی بڑی فکر کردا اے تے اوہنوں پتہ ہوندا اے کہ اَسی کیس حال چ آں۔ جیس طرحاں مشک چ پانی دا اِک اِک قطرہ ریگستان چ سفر کرنے والے بندے لئی ضروری ہوندا اے اوسے طرحاں ساڈیاں اَکھاں چوں نکلیا ہویا اِک اِک آنسو یہوواہ لئی بڑا قیمتی ہوندا اے۔ اوہ ایہہ یاد رکھدا اے کہ اَسی دُکھی یاں مایوس ہون دی وجہ توں کدوں کدوں روئے آں۔ نالے زبور 139:‏3 چ لکھی داؤد دی اِک ہور گل تے غور کرو۔ اوہنے کہیا:‏ تُوں میریاں ساریاں راہواں نُوں جاننا ایں۔ یہوواہ ساڈے سارے کماں نُوں ویکھدا اے۔ پر اوہ دھیان صرف ساڈے چنگے کماں تے دیندا اے۔ (‏عبرانیوں 6:‏10‏)‏ کیوں؟ کیونکہ اَسی اوہنوں خوش کرن لئی جیہڑی محنت کرنے آں، اوہ اوہدی بڑی قدر کردا اے۔‏a

⁸ یہوواہ اپنے کلام دے ذریعے سانوں ایہہ کہہ رہیا ہوندا اے:‏ ”‏مَیں چاہنا واں کہ تُسی ایہہ جان جاؤ کہ مینوں تواڈے نال کِنّی محبت اے تے مینوں تواڈی کِنّی فکر اے۔“‏ پر جیویں اَسی پہلے ویکھیا کہ شیطان ایہہ جھوٹھ پھیلاندا اے کہ یہوواہ نُوں ساڈے نال کوئی محبت نئیں۔ ایس لئی جے کدی تواڈے دل چ ایہہ گل آئے کہ یہوواہ توانوں محبت نئیں کردا تے تھوڑی دیر لئی رُک کے اپنے آپ کولوں ایہہ پچھو:‏ ”‏مَیں کِدی گل تے یقین کراں گا، شیطان دی گل تے جیہڑا جھوٹھ دا پیو اے یاں یہوواہ دی گل تے جیہڑا سچائی دا خدا اے؟“‏—‏یوحنا 8:‏44؛‏ زبور 31:‏5۔‏

9.‏ یہوواہ نے اوہناں لوکاں نال کیہہ وعدہ کیتا اے جیہڑے اوہنوں محبت کردے نیں؟ (‏خروج 20:‏5، 6)‏

⁹ سوچو کہ یہوواہ اوہناں بارے کیہہ محسوس کردا اے جیہڑے اوہنوں پیار کردے نیں۔‏ غور کرو کہ یہوواہ نے موسیٰ تے بنی‌اِسرائیل نُوں کیہہ کہیا۔ ‏(‏خروج 20:‏5، 6 نُوں پڑھو۔)‏ یہوواہ نے وعدہ کیتا اے کہ جیہڑے لوک اوہنوں محبت کردے نیں، اوہ اوہناں لئی اپنا اَٹل پیار ظاہر کردا رہوے گا۔ کیونکہ ساڈا خدا یہوواہ وفادار خدا اے ایس لئی اِنج کدی ہو ای نئیں سکدا کہ اوہ اوہناں لوکاں نال محبت نہ کرے جیہڑے اوہنوں محبت کردے نیں۔ (‏نحمیاہ 1:‏5)‏ ایس لئی جے کدی کدار توانوں ایہہ محسوس ہوئے کہ یہوواہ توانوں محبت نئیں کردا تے تھوڑی دیر لئی رُک کے سوچو:‏ ”‏کیہہ مَیں یہوواہ نال محبت کرنا واں؟“‏ فیر غور کرو کہ جے تُسی اوہنوں محبت کردے او تے اوہنوں خوش کرن دی پوری کوشش کر رہے او تے فیر تُسی پکا یقین رکھ سکدے او کہ اوہ وی تواڈے نال بڑی محبت کردا اے۔ (‏دانی‌ایل 9:‏4؛‏ 1-‏کُرنتھیوں 8:‏3‏)‏ یاں اِنج کہہ لوو کہ جے توانوں ایس گل تے شک نئیں اے کہ تُسی یہوواہ نال محبت کردے او تے فیر کیہہ توانوں اوہدی محبت تے شک کرنا چاہی دا اے؟ تُسی اوہدی محبت تے وفاداری تے پورا بھروسا کر سکدے او۔‏

10، 11.‏ یہوواہ دے مطابق فدیے بارے ساڈی سوچ کیہہ ہونی چاہی دی اے؟ (‏گلتیوں 2:‏20‏)‏

¹⁰ ایس گل بارے سوچو کہ یہوواہ نے اپنا پُتر کدے لئی قربان کیتا۔‏ یہوواہ نے اپنا پُتر قربان کر کے انساناں لئی اپنی عظیم محبت ظاہر کیتی۔ ‏(‏یوحنا 3:‏16‏)‏ پر کیہہ یہوواہ نے ذاتی طور تے توانوں ایہہ تحفہ دِتا اے؟ واقعی دِتا اے۔ ایس بارے ذرا پولُس رسول دی مثال تے غور کرو۔ توانوں یاد ہوئے گا کہ پولُس نے مسیحی بنن توں پہلاں کجھ وڈے گُناہ کیتے سن تے مسیحی بنن دے بعد وی اوہ اپنیاں کجھ کمزوریاں دے خلاف لڑدا رہیا۔ (‏رومیوں 7:‏24، 25؛‏ 1-‏تیمُتھیُس 1:‏12-‏14‏)‏ پر اوہنوں ایس گل دا پورا یقین سی کہ یہوواہ نے اوہدے لئی اپنا پُتر قربان کیتا اے۔ ‏(‏گلتیوں 2:‏20 نُوں پڑھو۔)‏ یاد رکھو کہ یہوواہ نے اپنی پاک روح دے ذریعے پولُس کولوں ایہہ گل بائبل چ لکھوائی سی تے ایہدے چ جو کجھ وی لکھیا اے، اوہ ساڈی ہدیت لئی اے۔ (‏رومیوں 15:‏4‏)‏ پولُس دی گل توں پتہ چلدا اے کہ یہوواہ ایہہ چاہندا اے کہ تُسی فدیے نُوں اِک ایہو جیہا تحفہ سمجھو جیہڑا خاص توانوں دِتا گیا اے۔ جدوں تُسی فدیے بارے ایہہ سوچ رکھو گے تے ایس گل تے تواڈا یقین ہور پکا ہو جائے گا کہ یہوواہ تواڈے نال محبت کردا اے۔‏

¹¹ اَسی یہوواہ دے بڑے شکرگزار آں کہ اوہنے یسوع نُوں زمین تے گھلیا تاکہ اوہ ساڈے لئی اپنی جان قربان کرے۔ پر یسوع زمین تے دُوجیاں نُوں یہوواہ بارے سچائی دَسن لئی وی آیا سی۔ (‏یوحنا 18:‏37‏)‏ ایس سچائی چ ایہہ وی شامل اے کہ یہوواہ اپنے بچیاں نال بوہت زیادہ محبت کردا اے۔‏

یہوواہ دی محبت نُوں قبول کرن چ یسوع ساڈی مدد کیویں کردا اے‏؟‏

12.‏ یسوع نے یہوواہ بارے جو کجھ دَسیا، اَسی اوہدے تے بھروسا کیوں کر سکنے آں؟‏

¹² جدوں یسوع زمین تے سی تے اوہنوں لوکاں نُوں ایہہ گل دَس کے بڑی خوشی مِلدی سی کہ یہوواہ کیہو جیہا خدا اے۔ (‏لُوقا 10:‏22‏)‏ یسوع نے یہوواہ بارے جو کجھ دَسیا، اَسی اوہدے تے پورا بھروسا کر سکنے آں۔ کیوں؟ کیونکہ زمین تے آن توں پہلاں یسوع نے اسمان تے اپنے باپ نال کروڑاں سال گزارے سن۔ (‏کُلسّیوں 1:‏15‏)‏ اوہنے اپنیاں اَکھاں نال ویکھیا سی کہ یہوواہ اسمان تے فرشتیاں تے زمین تے اپنے وفادار پُتراں تے دِھیاں نال کِنّی محبت کردا اے تے اوہناں لئی اپنی محبت کیویں ظاہر کردا اے۔ یہوواہ دی محبت نُوں قبول کرن چ یسوع نے دُوجیاں دی مدد کیویں کیتی؟‏

13.‏ یسوع دے مطابق سانوں یہوواہ بارے کیہو جیہا محسوس کرنا چاہی دا اے؟‏

¹³ یسوع چاہندا اے کہ اَسی یہوواہ بارے اوہی جذبات رکھیے جیہڑے اوہ آپ رکھدا اے۔ اِنجیلاں چ اوہنے 160 توں زیادہ وار یہوواہ نُوں ”‏باپ“‏ کہیا۔ اوہنے اپنے شاگرداں نُوں وی کہیا کہ یہوواہ تواڈا اسمانی باپ اے۔ (‏متی 5:‏16؛‏ 6:‏26‏)‏ یسوع دے زمین تے آن توں پہلاں یہوواہ دے وفادار بندے اوہدے بارے گل کردے ویلے بوہت سارے وڈے وڈے لقب استمال کردے سن جیویں کہ قادرِمطلق، خدا تعالیٰ یاں عظیم خالق۔ پر یسوع نے اکثر یہوواہ نُوں باپ کہیا۔ ایہدے توں پتہ چلدا اے کہ یہوواہ چاہندا اے کہ اوہدے بندے اوہدے اوناں ای قریب محسوس کرن جِنّاں اِک بچہ اپنے پیو دے قریب محسوس کردا اے۔ آؤ، دو ایہو جہے موقعیاں بارے گل کریئے جدوں یسوع نے یہوواہ بارے گل کردے ویلے اوہدے لئی لفظ ”‏باپ“‏ استمال کیتا۔‏

14.‏ یسوع نے ایہہ کیویں ظاہر کیتا کہ اَسی سارے یہوواہ دی نظر چ بوہت قیمتی آں؟ (‏متی 10:‏29-‏31‏)‏ (‏تصویر نُوں وی ویکھو۔)‏

¹⁴ آؤ، سب توں پہلاں اَسی یسوع دے اوہناں لفظاں تے غور کرنے آں جیہڑے اوہنے متی 10:‏29-‏31 چ کہے۔ ‏(‏ایہناں ایتاں نُوں پڑھو۔)‏ چڑیاں بوہت چھوٹا پرندہ ہوندیاں نیں۔ اوہ نہ تے کدی یہوواہ نال محبت کرن گیاں تے نہ ای اوہدی عبادت۔ پر ساڈا اسمانی باپ چڑیاں دی اینی قدر کردا اے کہ جے ایہناں وچوں اِک وی زمین تے ڈِگ جاندی اے تے اوہنوں اوہدے بارے پتہ ہوندا اے۔ ذرا سوچو کہ یہوواہ اپنے ہر اوس بندے دی کِنّی قدر کردا ہوئے گا جیہڑا محبت دی وجہ توں اوہدی عبادت کردا اے۔ غور کرو کہ یسوع نے ایہہ وی کہیا سی کہ”‏ساڈے اسمانی باپ نُوں تے ایہہ وی پتہ اے کہ ساڈے سِر تے کِنّے وال نیں۔“‏ یہوواہ ساڈے وچوں ہر اِک بارے چھوٹی توں چھوٹی گل وی جان دا اے جدے توں سانوں ایس گل دا ثبوت مِلدا اے کہ اوہ ساڈی بڑی فکر کردا اے۔ ایہدے چ کوئی شک نئیں کہ یسوع ایہہ چاہندا سی کہ اَسی ایس گل نُوں قبول کریئے کہ ساڈے وچوں ہر اِک یہوواہ دی نظر چ بوہت قیمتی اے۔‏

15.‏ سانوں یوحنا 6:‏44 چ لکھی یسوع دی گل توں اپنے اسمانی باپ بارے کیہہ پتہ چلدا اے؟‏

¹⁵ آؤ ہُن دُوجے موقعے تے غور کرنے آں جدوں یسوع نے یہوواہ نُوں ”‏باپ“‏ کہیا۔ ‏(‏یوحنا 6:‏44 تے فٹ‌نوٹ نُوں پڑھو۔)‏ ایس توں پہلاں سوچو کہ تواڈے اسمانی باپ نے بڑے پیار نال توانوں اپنے وَل کِھچیا سی۔ اوہنے اِنج کیوں کیتا سی؟ کیونکہ اوہنے ویکھیا سی کہ تُسی ہمیشاں دی زندگی دی راہ تے چلن لئی دِلوں تیار او۔ (‏اعمال 13:‏48‏)‏ جدوں یسوع نے یوحنا 6:‏44 چ لکھی گل کہی تے شاید اوہ یہوواہ دی اوس گل دا حوالہ دے رہیا سی جیہڑی ساڈی مرکزی ایت چ لکھی اے۔ ایس ایت چ یہوواہ نے اپنے بندیاں نُوں کہیا:‏ مَیں اَٹل محبت نال تینوں اپنے وَل کِھچ لیا اے[‏یاں مَیں تیرے لئی اَٹل پیار ظاہر کردا رہیا واں۔]‏(‏یرمیاہ 31:‏3؛ ہوسیع 11:‏4)‏ ذرا ایس گل دی گہرائی چ جاؤ۔ ساڈا اسمانی باپ ساڈے چ اوہ چنگیاں گلاں ویکھدا رہوے گا جیہڑیاں شاید سانوں آپ وی نظر نہ آن۔‏

16.‏ (‏الف)‏یسوع نے سانوں کیہہ سکھایا تے سانوں اوہدی گل تے یقین کیوں کرنا چاہی دا اے؟ (‏ب)‏تُسی ایس گل تے اپنے یقین نُوں ہور پکا کیویں کر سکدے او کہ یہوواہ توں چنگا باپ ہور کوئی نئیں ہو سکدا؟ (‏ایس بکس نُوں ویکھو:‏ ‏”‏اِک ایہو جیہا باپ جدی سانوں ساریاں نُوں ضرورت اے۔‏‏“‏‏)‏

¹⁶ جدوں یسوع نے یہوواہ نُوں ساڈا باپ کہیا تے اِک لحاظ نال اوہ ایہہ کہہ رہیا سی کہ”‏یہوواہ صرف میرا ای نئیں سگوں تواڈا وی باپ اے۔ تے مَیں توانوں ایس گل دا یقین دَوانا چاہنا واں کہ اوہ ذاتی طور تے تواڈے نال بوہت پیار کردا اے تے تواڈی بڑی فکر کردا اے۔“‏ تے فیر جے کدی تواڈے دل چ یہوواہ دی محبت بارے شک پیدا ہوندا اے تے تھوڑا رُکو تے اپنے آپ کولوں ایہہ پچھو:‏ ”‏کیہہ مینوں اوس پُتر دی گل تے یقین نئیں کرنا چاہی دا جیہڑا ساڈے باپ نُوں بڑی چنگی طرحاں جان دا اے تے جیہڑا ہمیشاں اوہدے بارے سچ بولدا اے؟“‏—‏1-‏پطرس 2:‏22‏۔‏

اپنے یقین نُوں پکا کردے رہوو

17.‏ سانوں ایس گل تے اپنے یقین نُوں پکا کیوں کردے رہنا چاہی دا اے کہ یہوواہ سانوں پیار کردا اے؟‏

¹⁷ سانوں ایس گل تے اپنے یقین نُوں پکا کردے رہنا چاہی دا اے کہ یہوواہ سانوں پیار کردا اے۔ جیویں کہ اَسی سکھیا اے کہ ساڈا دُشمن شیطان بڑا ہوشیار اے تے اوہ سانوں یہوواہ توں دُور کرن لئی اپنی پوری کوشش کر رہیا اے۔ اوہ ساڈے ایس یقین نُوں کمزور کرن دی کوشش کردا رہوے گا کہ یہوواہ سانوں محبت کردا اے۔ پر سانوں شیطان نُوں کسے وی صورت چ جتن نئیں دینا چاہی دا۔—‏ایوب 27:‏5۔‏

18.‏ اَسی اپنے ایس یقین نُوں کیویں مضبوط کر سکنے آں کہ یہوواہ سانوں پیار کردا اے؟‏

¹⁸ ایس مضمون دے ذریعے تُسی سکھ لیا اے کہ تُسی یہوواہ دی محبت تے اپنے یقین نُوں کیویں ودھا سکدے او۔ تُسی دُعا چ اوہنوں کہہ سکدے او کہ اوہ تواڈی مدد کرے تاکہ تُسی اپنے آپ نُوں اوہدی نظر نال ویکھ سکو۔ بائبل دِیاں اوہناں ایتاں تے گہرائی نال سوچ‌وچار کرو جنہاں توں پتہ چلدا اے کہ یہوواہ سانوں کِنّی گُوڑھی محبت کردا اے۔ کدی نہ بُھلو کہ یہوواہ ہمیشاں محبت دا جواب محبت نال دیندا اے۔ اوہ کدی وی اوس شخص لئی محبت وکھان توں پچھے نئیں ہٹ دا جیہڑا اوہدے نال محبت کردا اے۔ ایہہ وی یاد رکھو کہ یہوواہ نے اپنا پُتر تواڈے لئی قربان کیتا اے۔ ایہدے علاوہ یسوع دی ایس گل تے بھروسا رکھو کہ یہوواہ تواڈا اسمانی باپ اے۔ فیر جدوں کوئی توانوں پچھے گا کہ ”‏کیہہ توانوں واقعی یقین اے کہ یہوواہ توانوں پیار کردا اے؟“‏ تے فیر تُسی اوہنوں پورے اعتماد نال کہہ سکو گے:‏ ”‏ہاں، مینوں یقین اے تے مَیں وی ہر روز اوہدے نال اپنے پیار نُوں ثابت کرن دی پوری کوشش کرنا واں۔“‏