جیہڑے لوک بے‌وقوف عورت دی آواز سُن دے نیں، اوہناں نُوں ایہہ فیصلہ کرنا پئے گا کہ کیہہ اوہ اوہدی دعوت نُوں قبول کرن گے یاں نئیں۔ ایہو جہیاں بوہت ساریاں گلاں نیں جنہاں دی وجہ توں سانوں حرام‌کاری توں بچنا چاہی دا اے۔ بے‌وقوف عورت کہندی اے کہ چوری دا پانی مٹھا اے۔ ‎(‏اَمثال 9:‏17)‎‏ چوری دے پانی دا کیہہ مطلب اے؟ میاں بیوی دے درمیان ہون والے جنسی تعلق نُوں بائبل چ تازہ پانی وانگوں کہیا گیا اے۔ ‎(‏اَمثال 5:‏15-‏18)‎‏ جنسی تعلق صرف ایہو جہے مرد تے عورت دے درمیان ہونے چاہی دے نیں جنہاں دی اِک دُوجے نال شادی ہوئی اے۔ پر چوری دے پانی دا اشارہ شاید ناجائز جنسی تعلقات وَل اے۔ جیہڑے لوک حرام‌کاری کردے نیں، اوہ ایہنوں دُوجیاں توں لُکا‌ن دی کوشش کردے نیں، بالکل اُنج ای جیویں اِک چور لُک کے چوری کردا اے۔ چوری دا پانی شاید اوس ویلے مٹھا لگدا اے جدوں لوک ایہہ سوچدے نیں کہ اوہناں دے گُناہ دا تے کسے نُوں نئیں پتہ۔ پر اصل چ اوہ اپنے آپ نُوں دھوکھا دے رہے ہوندے نیں کیونکہ یہوواہ تے سب کجھ ویکھ رہیا اے۔ بھلا یہوواہ نال دوستی ٹُٹن توں بعد زندگی چ کیہڑی مٹھاس رہ جاندی اے۔ ایس لئی چوری دا پانی اصل چ مٹھا نئیں اے۔—‏1-‏کُرنتھیوں 6:‏9، 10‏۔ م23.‏06 ص.‏ 22 پ.‏ 7-‏9

جے توانوں لگدا اے کہ ہُن تُسی دِلوں دُعا نئیں کردے یاں توانوں مُنادی کرن چ پہلے جِنّاں مزہ نئیں آندا تے تُسی کیہہ کر سکدے او؟ توانوں ایہہ نئیں سوچنا چاہی دا کہ ہُن یہوواہ توانوں پاک روح نئیں دے رہیا۔ عیب‌دار ہون دی وجہ توں اِک مسیحی دا جوش گھٹ ودھ ہو سکدا اے۔ جے توانوں محسوس ہوندا اے کہ تواڈا جوش ٹھنڈا پے رہیا اے تے پولُس رسول دی مثال تے غور کرو۔ اوہ وی یسوع دی مثال تے عمل کرن دی پوری کوشش کردا سی پر کدی کدار اوہدا اوہ کم کرن تے دل نئیں کردا سی جیہڑے ضروری نیں۔ بھانویں کہ پولُس نُوں وقتی طور تے لگدا سی کہ اوہدا جوش ٹھنڈا پے گیا اے پر فیر وی اوہنے اپنی خدمت نُوں پورا کیتا۔ ایسے طرحاں اپنے جذبات دی بنیاد تے ایہہ نہ سوچ لوو کہ ہُن تُسی یہوواہ دی خدمت نئیں کر سکدے۔ سگوں پکا عزم کرو کہ بھانویں توانوں لگے کہ تواڈا جوش ٹھنڈا پے گیا اے، فیر وی تُسی صحی کم کردے رہوو گے۔ جدوں تُسی اِنج کرو گے تے تواڈا جوش وی پہلے نالوں ودھ جائے گا۔—‏1-‏کُرنتھیوں 9:‏16‏۔ م24.‏03 ص.‏ 11، 12 پ.‏ 12، 13

اَسی بھین بھراواں نال دوستی کرن تے اوہناں نال وقت گزارن نال اوہناں لئی محبت ظاہر کر سکنے آں۔ ‎(‏2-‏کُرنتھیوں 6:‏11-‏13‏)‎‏ ساڈیاں کلیسیاواں چ ایہو جہے بھین بھرا نیں جنہاں دی شخصیت اِک دُوجے توں فرق اے۔ نالے اوہناں دی پرورش وی فرق فرق ماحول چ ہوئی اے۔ جے اَسی اوہناں دِیاں خوبیاں تے دھیان دَواں گے تے اَسی اپنے دل چ اوہناں لئی محبت نُوں ودھا سکاں گے۔ جدوں اَسی دُوجیاں نُوں اوس نظر نال ویکھنے آں جیس نظر نال یہوواہ اوہناں نُوں ویکھدا اے تے اَسی ثابت کرنے آں کہ اَسی اوہناں نُوں پیار کرنے آں۔وڈی مصیبت دے دوران ایہہ بوہت ضروری ہوئے گا کہ اَسی اپنے بھین بھراواں لئی محبت ظاہر کریئے۔ جدوں وڈی مصیبت شروع ہوئے گی تے یہوواہ ساڈی حفاظت کیویں کرے گا؟ غور کرو کہ یہوواہ نے اپنے بندیاں نُوں اوس ویلے کیہڑی ہدیت دِتی جدوں بابل تے حملہ ہویا۔ یہوواہ نے کہیا:‏ اَے میرے لوکو، جاؤ، اپنیاں کوٹھریاں چ وڑھ جاؤ تے اپنے بوہے بند کر لوو۔ اپنے آپ نُوں تھوڑی دیر لئی لُکا لوو۔ جدوں تک کہ قہر ٹل نئیں جاندا۔ ‎(‏یسعیاہ 26:‏20)‎‏ ہو سکدا اے کہ وڈی مصیبت دے دوران سانوں وی ایس ہدیت تے عمل کرنا پووے۔ م23.‏07 ص.‏ 6، 7 پ.‏ 14-‏16