جے توانوں لگدا اے کہ ہُن تُسی دِلوں دُعا نئیں کردے یاں توانوں مُنادی کرن چ پہلے جِنّاں مزہ نئیں آندا تے تُسی کیہہ کر سکدے او؟ توانوں ایہہ نئیں سوچنا چاہی دا کہ ہُن یہوواہ توانوں پاک روح نئیں دے رہیا۔ عیب‌دار ہون دی وجہ توں اِک مسیحی دا جوش گھٹ ودھ ہو سکدا اے۔ جے توانوں محسوس ہوندا اے کہ تواڈا جوش ٹھنڈا پے رہیا اے تے پولُس رسول دی مثال تے غور کرو۔ اوہ وی یسوع دی مثال تے عمل کرن دی پوری کوشش کردا سی پر کدی کدار اوہدا اوہ کم کرن تے دل نئیں کردا سی جیہڑے ضروری نیں۔ بھانویں کہ پولُس نُوں وقتی طور تے لگدا سی کہ اوہدا جوش ٹھنڈا پے گیا اے پر فیر وی اوہنے اپنی خدمت نُوں پورا کیتا۔ ایسے طرحاں اپنے جذبات دی بنیاد تے ایہہ نہ سوچ لوو کہ ہُن تُسی یہوواہ دی خدمت نئیں کر سکدے۔ سگوں پکا عزم کرو کہ بھانویں توانوں لگے کہ تواڈا جوش ٹھنڈا پے گیا اے، فیر وی تُسی صحی کم کردے رہوو گے۔ جدوں تُسی اِنج کرو گے تے تواڈا جوش وی پہلے نالوں ودھ جائے گا۔—‏1-‏کُرنتھیوں 9:‏16‏۔ م24.‏03 ص.‏ 11، 12 پ.‏ 12، 13

اَسی بھین بھراواں نال دوستی کرن تے اوہناں نال وقت گزارن نال اوہناں لئی محبت ظاہر کر سکنے آں۔ ‎(‏2-‏کُرنتھیوں 6:‏11-‏13‏)‎‏ ساڈیاں کلیسیاواں چ ایہو جہے بھین بھرا نیں جنہاں دی شخصیت اِک دُوجے توں فرق اے۔ نالے اوہناں دی پرورش وی فرق فرق ماحول چ ہوئی اے۔ جے اَسی اوہناں دِیاں خوبیاں تے دھیان دَواں گے تے اَسی اپنے دل چ اوہناں لئی محبت نُوں ودھا سکاں گے۔ جدوں اَسی دُوجیاں نُوں اوس نظر نال ویکھنے آں جیس نظر نال یہوواہ اوہناں نُوں ویکھدا اے تے اَسی ثابت کرنے آں کہ اَسی اوہناں نُوں پیار کرنے آں۔وڈی مصیبت دے دوران ایہہ بوہت ضروری ہوئے گا کہ اَسی اپنے بھین بھراواں لئی محبت ظاہر کریئے۔ جدوں وڈی مصیبت شروع ہوئے گی تے یہوواہ ساڈی حفاظت کیویں کرے گا؟ غور کرو کہ یہوواہ نے اپنے بندیاں نُوں اوس ویلے کیہڑی ہدیت دِتی جدوں بابل تے حملہ ہویا۔ یہوواہ نے کہیا:‏ اَے میرے لوکو، جاؤ، اپنیاں کوٹھریاں چ وڑھ جاؤ تے اپنے بوہے بند کر لوو۔ اپنے آپ نُوں تھوڑی دیر لئی لُکا لوو۔ جدوں تک کہ قہر ٹل نئیں جاندا۔ ‎(‏یسعیاہ 26:‏20)‎‏ ہو سکدا اے کہ وڈی مصیبت دے دوران سانوں وی ایس ہدیت تے عمل کرنا پووے۔ م23.‏07 ص.‏ 6، 7 پ.‏ 14-‏16

ساڈے کماں توں دُوجیاں نُوں نظر آنا چاہی دا اے کہ اَسی اِک لچک‌دار انسان آں۔ اپنے آپ کولوں پچھو:‏ ”‏کیہہ دُوجے ویکھ سکدے نیں کہ مَیں اِک لچک‌دار انسان آں تے میرے چ بوہت برداشت اے؟ یاں کیہہ مَیں سخت آں تے اپنی گل تے اَڑیا رہنا واں؟ یاں کیہہ مَیں دُوجیاں دی گل سُننا واں تے جتھوں تک ممکن ہوئے مننا وی آں؟“‏ جِنّاں زیادہ اَسی لچک‌دار ہوواں گے اوہناں ای زیادہ اَسی یہوواہ تے یسوع دی مثال تے عمل کر رہے ہوواں گے۔ سانوں اوہدوں وی لچک‌دار ہونا چاہی دا اے جدوں ساڈے حالات بدل جاندے نیں۔ حالات بدلن دی وجہ توں شاید سانوں ایہو جہیاں مشکلاں دا سامنا کرنا پووے جنہاں بارے اَسی سوچیا وی نہ ہووے۔ ہو سکدا اے کہ سانوں صحت دا کوئی وڈا مسئلہ ہو جائے۔ یاں شاید اچانک سیاسی حالات بدل جان یاں مہنگائی ودھ جائے جدی وجہ توں ساڈی زندگی مشکل ہو جائے۔ ‎(‏واعظ 9:‏11)‎‏ سانوں اوس ویلے وی مشکل دا سامنا کرنا پے سکدا اے جدوں کلیسیا چ ساڈی ذمے‌داری بدل جاندی اے۔ بھانویں ساڈے تے کوئی وی مشکل آئے اَسی ایہناں چار گلاں تے عمل کر کے اپنے آپ نُوں نویں حالاتاں مطابق ڈھال سکنے آں:‏ ‎(‏1)‎‏ حقیقت نُوں قبول کرو، ‎(‏2)‎‏ مستقبل بارے سوچو، ‎(‏3)‎‏ اپنی زندگی چ ہون والیاں چنگیاں گلاں تے دھیان دَوو تے ‎(‏4)‎‏ دُوجیاں دے کم آؤ۔ م23.‏07 ص.‏ 21، 22 پ.‏ 7، 8