سبق نمبر 51
تُسی اپنی گل بات نال یہوواہ نُوں کیویں خوش کر سکدے او؟
جدوں یہوواہ نے انسان نُوں بنایا تے اوہنے اوہنوں بولن دی شاندار صلاحیت دِتی۔ ایس لئی یہوواہ دی نظر چ ایہہ گل بڑی اہم اے کہ اَسی ایس صلاحیت نُوں کیویں استمال کرنے آں۔ (یعقوب 1:26 نُوں پڑھو۔) سانوں اپنی بولن دی صلاحیت نُوں اِنج استمال کرنا چاہی دا اے کہ یہوواہ ایہدے توں خوش ہووے۔ آؤ، ویکھئے کہ اَسی اِنج کیویں کر سکنے آں۔
1. سانوں بولن دی صلاحیت نُوں کیویں استمال کرنا چاہی دا اے؟
بائبل چ سانوں نصیحت کیتی گئی اے کہ اَسی اِک دُوجے نُوں تسلی دیندے رہیے تے اِک دُوجے دا حوصلہ ودھاندے رہیے۔ (1-تھسلُنیکیوں 5:11) کیہہ تواڈے ذہن چ کوئی ایہو جیہا بندہ ہے وے جنہوں تسلی دی لوڑ اے؟ تُسی اوہنوں تسلی کیویں دے سکدے او؟ اوہنوں یقین دَواؤ کہ توانوں اوہدی فکر اے۔ شاید تُسی اوہنوں دَس سکدے او کہ توانوں اوہدی کیہڑی گل پسند اے۔ تُسی اوہنوں کوئی ایہو جہی ایت وی پڑھ کے سُنا سکدے او جدے توں اوہنوں حوصلہ ملے۔ بائبل چ تسلی دین والیاں بوہت ساریاں ایتاں نیں تُسی اوہناں چوں کوئی وی چُن سکدے او۔ نالے ایہہ وی یاد رکھو کہ تواڈیاں گلاں دے نال نال تواڈے گل کرن دے طریقے دا وی دُوجیاں تے بڑا گُوڑھا اثر ہوندا اے۔ ایس لئی دُوجیاں نال ہمیشاں پیار تے نرمی نال گل کرو۔—امثال 15:1۔
2. سانوں کیہو جہیاں گلاں نئیں کرنیاں چاہی دِیاں؟
بائبل چ دَسیا گیا اے کہ تواڈے موُنہہ چوں کوئی بھیڑی گل نہ نکلے۔ (اِفسیوں 4:29 نُوں پڑھو۔) ایہدا مطلب اے کہ سانوں نہ تے گندیاں گلاں کرنیاں چاہی دِیاں نیں تے نہ ای سخت تے کوڑیاں گلاں کرنیاں چاہی دِیاں نیں جنہاں توں دُوجیاں دا دل دُکھے۔ ایہدے علاوہ سانوں دُوجیاں دِیاں چغلیاں وی نئیں کرنیاں چاہی دِیاں تے نہ ای ایہو جہیاں گلاں کرنیاں چاہی دِیاں نیں جنہاں توں کسے دا ناں خراب ہووے۔—امثال 16:28 نُوں پڑھو۔
3. اَسی کیہہ کر سکنے آں تاکہ ساڈے موُنہوں دُوجیاں دا حوصلہ ودھان والیاں گلاں نِکلن؟
اَسی اکثر اوہی گلاں کہنے آں جیہڑیاں ساڈے دل دماغ چ چل رہیاں ہوندیاں نیں۔ (لُوقا 6:45) ایس لئی سانوں کوشش کرنی چاہی دی اے کہ ساڈا دھیان چنگیاں گلاں تے رہوے یعنی اوہ گلاں جیہڑیاں نیک ہون، پاک ہون، محبت ودھان والیاں ہون تے تعریف دے قابل ہون۔ (فِلپّیوں 4:8) ایہدے لئی ضروری اے کہ اَسی تفریح تے دوست سمجھداری نال چنئے۔ (امثال 13:20) ایہدے علاوہ سانوں بولن توں پہلاں چنگی طرحاں سوچنا وی چاہی دا اے۔ سانوں ایہہ وی ویکھنا چاہی دا اے کہ ساڈیاں گلاں دا دُوجیاں تے کیہہ اثر پووے گا۔ پاک کلام چ دَسیا گیا اے کہ بِنا سوچےسمجھے بولن والے دِیاں گلاں تلوار وانگوں زخمی کردیاں نیں پر عقلمند دِیاں گلاں شفا بخش دِیاں نیں۔—امثال 12:18۔
ہور سوچوچار لئی
غور کرو کہ تُسی کیویں اپنی گل بات توں یہوواہ نُوں خوش کر سکدے او تے دُوجیاں دا حوصلہ وی ودھا سکدے او۔
4. سوچ سمجھ کے بولو
اَسی سارے اکثر ایہو جہیاں گلاں کہہ دینے آں جنہاں تے سانوں بعد چ پچھتانا پیندا اے۔ (یعقوب 3:2) گلتیوں 5:22، 23 نُوں پڑھو تے فیر ایہناں سوالاں تے گل بات کرو:
تُسی ایہناں وچوں کیہڑیاں خوبیاں اپنے اندر پیدا کرن لئی دُعا کر سکدے او تاکہ ایہہ سوچ سمجھ کے بولن چ تواڈی مدد کرن؟ ایہناں خوبیاں توں توانوں کیہہ فائدہ ہوئے گا؟
1-کُرنتھیوں 15:33 نُوں پڑھو تے فیر ایس سوال تے گل بات کرو:
تواڈے دوستاں تے تفریح دا تواڈی بولچال تے کیہہ اثر ہو سکدا اے؟
کیہڑیاں چیزاں تواڈی گل بات تے اثر پا سکدیاں نیں؟
واعظ 3:1، 7 نُوں پڑھو تے فیر ایس سوال تے گل بات کرو:
کیہڑے موقعیاں تے چپ رہنا تے صحی وقت دا اِنتظار کرنا چنگا ہو سکدا اے؟
5. دُوجیاں بارے چنگیاں گلاں کرو
اَسی ایہو جہیاں گلاں کہن توں کیویں بچ سکنے آں جنہاں توں دُوجیاں دی بےعزتی ہوئے یاں اوہناں نُوں دُکھ پونچے؟ ویڈیو چلاؤ تے فیر ایہناں سوالاں تے گل بات کرو:
ایس ویڈیو چ جیہڑا بندہ وکھایا گیا اے اوہ اپنی گل بات چ تبدیلی کیوں لیانا چاہندا سی؟
اوہنے ایہہ تبدیلی کرن لئی کیہہ کیتا؟
واعظ 7:16 نُوں پڑھو تے فیر ایس سوال تے گل بات کرو:
جدوں ساڈے اُتے دُوجیاں بارے غلط گلاں کرن دی ازمیش آندی اے تے سانوں کیہہ یاد رکھنا چاہی دا اے؟
واعظ 7:21، 22 نُوں پڑھو تے فیر ایس سوال تے گل بات کرو:
ایہناں ایتاں چ لکھی نصیحت اوس ویلے غصے توں بچن چ ساڈی مدد کیویں کرے گی جدوں کوئی ساڈے بارے غلط گلاں کردا اے؟
6. اپنے گھر دے جیاں نال پیار نال گل کرو
یہوواہ چاہندا اے کہ اَسی اپنے گھر والیاں نال پیار تے عزت نال گل کرئیے۔ ویڈیو چلاؤ تے فیر ایس سوال تے گل بات کرو:
اپنے گھر دے جیاں نال پیار نال گل کرن چ کیہڑی چیز تواڈی مدد کرے گی؟
اِفسیوں 4:31، 32 نُوں پڑھو تے فیر ایس سوال تے گل بات کرو:
سانوں کیہو جہیاں گلاں کرنیاں چاہی دِیاں نیں تاکہ ساڈے گھر دے جیاں چ پیار تے محبت ودھے؟
یہوواہ نے اپنے پُتر لئی اپنے پیار نُوں ظاہر کیتا۔ متی 17:5 نُوں پڑھو تے فیر ایس سوال تے گل بات کرو:
تُسی اپنے گھر والیاں نال گل بات کردے ویلے یہوواہ دی مثال تے کیویں عمل کر سکدے او؟
دُوجیاں دی تعریف کرن دے موقعے لبھو۔
کجھ لوکاں دی رائے: ”میرے دل چ جو آندا اے میں کہہ دینا واں بھانویں کسے نُوں چنگا لگے یاں بھیڑا۔“
کیہہ تواڈے خیال چ ایہہ صحی اے؟ جے ہاں تے کیوں؟ جے نئیں تے کیوں نئیں؟
خلاصہ
ساڈیاں گلاں دُوجیاں دے دل تے گُوڑھا اثر کر سکدیاں نیں۔ ایس لئی سانوں کجھ وی کہن توں پہلاں سوچنا چاہی دا اے کہ اَسی کیہہ کہہ رہے آں، کیس موقعے تے کہہ رہے آں تے کیس لہجے چ کہہ رہے آں۔
دہرائی
تُسی اپنی بولن دی صلاحیت نُوں دُوجیاں دی مدد لئی کیویں استمال کر سکدے او؟
تُسی کیہو جہیاں گلاں کرن توں بچنا چاہندے او؟
اَسی کیہہ کر سکنے آں تاکہ ساڈی گل بات توں ہمیشاں دُوجیاں لئی پیار ظاہر ہووے تے اوہناں دا حوصلہ ودھے؟
ہور جانن لئی
ایس ویڈیو چ ویکھو کہ اَسی کیہہ کر سکنے آں تاکہ ساڈیاں گلاں توں دُوجیاں دا حوصلہ ودھے۔
ایس مضمون چ پڑھو کہ تُسی گندی زبان استمال کرن توں کیویں بچ سکدے او۔
ایس ویڈیو چ ویکھو کہ تُسی دُوجیاں دِیاں چغلیاں کرن توں کیویں بچ سکدے او۔
ایس مضمون چ پڑھو کہ یہوواہ خدا نے اِک بندے دی مدد کیویں کیتی تاکہ اوہ گندی زبان استمال کرنا چھڈ دَوے۔
مَیں سوچنے لگا کہ آخر مَیں اپنی زندگی کے ساتھ کر کیا رہا ہوں (مینارِنگہبانی دا مضمون)