اپنی کلیسیا دی مدد کرو

پوری دُنیا چ یہوواہ دے گواہواں دِیاں کئی ہزار کلیسیاواں نیں جنہاں چ لکھاں لوک خوشی نال یہوواہ دی عبادت کردے نیں۔ اوہ ایس گل لئی بڑے شکرگزار نیں کہ ایہناں کلیسیاواں دے ذریعے اوہناں نُوں ودھیا تلیم تے تربیت مِل رہی اے۔ اوہ فرق فرق طریقیاں نال اپنی اپنی کلیسیا دی مدد کردے نیں۔ کیہہ تُسی وی اپنی کلیسیا دی مدد کر رہے او؟‏

1.‏ تُسی اپنے وقت تے طاقت نُوں کلیسیا دی مدد کرن لئی کیویں استمال کر سکدے او؟‏

اَسی سارے اپنی اپنی کلیسیا دے کم آ سکنے آں۔ مثال لئی، اَسی اپنی کلیسیا چ وڈیرے یاں بیمار بھین بھراواں دی مدد کر سکنے آں۔ شاید اَسی عبادتاں تے آن جان، سودا لیان یاں گھر دی صفائی وغیرہ کرن چ اوہناں دی مدد کر سکنے آں۔ (‏یعقوب 1:‏27 نُوں پڑھو۔)‏ اَسی اپنی عبادت‌گاہ نُوں صاف‌ستھرا رکھن تے ایہدی دیکھ‌بھال کرن چ وی مدد کر سکنے آں۔ اَسی ایہہ سارے کم کسے مجبوری دی وجہ توں نئیں کردے سگوں بھین بھراواں لئی محبت دی وجہ توں کرنے آں۔ اَسی خوشی نال اپنے آپ نُوں ایہناں کماں لئی پیش کرنے آں۔‏‏—‏زبور 110:‏3۔‏

بپتسمہ‌یافتہ یہوواہ دے گواہ ہور وی کئی طریقیاں نال کلیسیا دی مدد کر سکدے نیں۔ جیہڑے بھرا بائبل چ دَسیاں گئیاں شرطاں تے پورے اُتردے نیں، اوہ خادم بن سکدے نیں تے فیر کجھ عرصے بعد بزرگ بن کے کلیسیا دی خدمت کر سکدے نیں۔ بپتسمہ‌یافتہ بھین بھرا پہل‌کار بن سکدے نیں تے مُنادی دے کم چ ودھ چڑھ کے حصہ لے سکدے نیں۔ کجھ بھین بھرا عبادت‌گاہواں بنان دے کم چ مدد کر سکدے نیں یاں فیر کسے ہور علاقے چ جا کے کسے کلیسیا دی مدد کر سکدے نیں۔‏

2.‏ اَسی اپنے پیسے تے چیزاں نال کلیسیا دی مدد کیویں کر سکنے آں؟‏

اَسی اپنے مال نال یہوواہ دی وڈیائی کر سکنے آں۔ (‏امثال 3:‏9)‏ ایہہ ساڈے لئی بڑے مان دی گل اے کہ اَسی اپنی کلیسیا تے دُنیا بھر چ ہون والے مُنادی دے کم لئی پیسے یاں چیزاں عطیات دے طور تے دے سکنے آں۔ (‏2-‏کُرنتھیوں 9:‏7 نُوں پڑھو۔)‏ ساڈے عطیات نال قدرتی آفتاں دا شکار ہون والے بھین بھراواں دی وی مدد کیتی جاندی اے۔ کجھ بھین بھرا کجھ پیسے بچا کے رکھدے نیں تاکہ اوہ باقاعدگی نال عطیات دے سکن۔ (‏1-‏کُرنتھیوں 16:‏2 نُوں پڑھو۔)‏ اَسی اپنے عطیات اوہناں ڈبیاں چ پا سکنے آں جیہڑے ساڈیاں عبادت‌گاہواں چ رکھے ہوندے نیں یاں فیر اَسی donate.jw.org تے آن‌لائن عطیات دے سکنے آں۔ یہوواہ نے سانوں موقع دِتا اے کہ اَسی اپنے پیسیاں تے چیزاں نُوں اوہدی خدمت لئی استمال کر کے اوہدے لئی محبت ظاہر کرئیے۔‏

ہور سوچ‌وچار لئی

3.‏ اَسی اپنے مال نال کلیسیا دی مدد کر سکنے آں

یہوواہ خدا تے یسوع مسیح اوس بندے نُوں پیار کردے نیں جیہڑا خوشی نال عطیات دیندا اے۔ اِک وار یسوع نے اِک غریب بیوہ دی تعریف کیتی جنہے چھوٹا جیہا ہدیہ دِتا سی۔ لُوقا 21:‏1-‏4 نُوں پڑھو تے فیر ایہناں سوالاں تے گل بات کرو:‏

• کیہہ یہوواہ نُوں خوش کرن لئی ضروری اے کہ اَسی وڈے وڈے عطیات دَئیے؟‏

• جدوں اَسی خوشی نال عطیات دینے آں تے یہوواہ تے یسوع نُوں کیہو جیہا لگدا اے؟‏

ایہہ جانن لئی کہ ساڈے عطیات کیویں استمال ہوندے نیں ویڈیو چلاؤ‏۔‏ فیر ایس سوال تے گل بات کرو:‏

ویڈیو:‏ یہوواہ لئی نذرانہ (‏47:‏4)‏

• پوری دُنیا چ ساڈیاں کلیسیاواں دی مدد کرن لئی عطیات نُوں کیویں استمال کیتا جاندا اے؟‏

4.‏ اَسی پیسے لئے بغیر کم کر سکنے آں

پرانے زمانے چ یہوواہ دے لوک اپنیاں عبادت‌گاہواں دی بڑی دیکھ‌بھال کردے سن۔ ایہدے لئی اوہ عطیات دین دے علاوہ ہور وی بوہت کجھ کردے سن۔ 2-‏تواریخ 34:‏9-‏11 نُوں پڑھو تے فیر ایس سوال تے گل بات کرو:‏

• ہر اِسرائیلی یہوواہ دے گھر دی دیکھ‌بھال کرن چ کیویں مدد کردا سی؟‏

ایہہ جانن لئی کہ اَج یہوواہ دے گواہ پرانے زمانے دے وفادار بندیاں دی مثال تے کیویں چل رہے نیں ویڈیو چلاؤ‏۔‏ فیر ایہناں سوالاں تے گل بات کرو:‏

ویڈیو:‏ پورے دل نال اپنیاں عبادت‌گاہواں دی دیکھ‌بھال کرو (‏31:‏3)‏

• ایہہ کیوں ضروری اے کہ اَسی اپنیاں عبادت‌گاہواں نُوں صاف ستھرا تے چنگی حالت چ رکھئے؟‏

• تُسی ایس کم چ کیہڑے طریقیاں نال مدد کر سکدے او؟‏

5.‏ بھرا کلیسیا چ ذمے‌داریاں سنبھالن چ مدد کر سکدے نیں

بائبل چ مسیحی بھراواں نُوں ایہہ حوصلہ دِتا گیا اے کہ اوہ کلیسیا چ ذمے‌داریاں چُکن لئی اَگے ودھن۔ ایہدی اِک مثال ویکھن لئی ویڈیو چلاؤ‏۔‏ فیر ایس سوال تے گل بات کرو:‏

ویڈیو:‏ بھراوو—‏چنگے کم کرن دی خواہش پیدا کرو (‏19:‏5)‏

• ایس ویڈیو چ رائین نے کلیسیا دی زیادہ مدد کرن لئی کیہہ کیتا؟‏

جیہڑے بھرا خادماں تے بزرگاں دے طور تے خدمت کرنا چاہندے نیں اوہناں لئی بائبل چ کجھ شرطاں دَسیاں گئیاں نیں۔ 1-‏تیمُتھیُس 3:‏1-‏13 نُوں پڑھو تے فیر ایہناں سوالاں تے گل بات کرو:‏

• جیہڑے بھرا خادماں تے بزرگاں دے طور تے خدمت کرنا چاہندے نیں اوہناں لئی کیہڑیاں شرطاں تے پورا اُترنا ضروری اے؟‏

• اوہناں بھراواں دے گھر والیاں نُوں کیہہ کرنا چاہی دا اے؟—‏4 تے 11 ایت نُوں ویکھو۔‏

• جدوں بھرا ایہناں شرطاں تے پورا اُترن دی کوشش کردے نیں تے کلیسیا نُوں کیہہ فائدہ ہوندا اے؟‏

خلاصہ

یہوواہ ایس گل دی بڑی قدر کردا اے کہ اَسی اپنے وقت، طاقت، پیسے تے چیزاں نال کلیسیا دی مدد کرنے آں۔‏

دہرائی

• اَسی اپنے وقت تے طاقت نُوں کلیسیا دی مدد کرن لئی کیویں استمال کر سکنے آں؟‏

• اَسی اپنے پیسے تے چیزاں نال کلیسیا دی مدد کیویں کر سکنے آں؟‏

• تُسی کیہڑے طریقیاں نال کلیسیا دی مدد کرنا چاہندے او؟‏

ہور جانن لئی

ایس مضمون چ پڑھو کہ خدا ہُن ایہہ توقع کیوں نئیں کردا کہ اوہدے بندے دہ‌یکی دین۔‏

پاک کلام چ دہ‌یکی دین بارے کیہہ دَسیا گیا اے؟‏ (‏ویب‌سائٹ تے مضمون)‏

بائبل چ دَسیا گیا اے کہ کلیسیا چ کجھ ذمے‌داریاں بھراواں نُوں سنبھالنیاں چاہی دِیاں نیں۔ پر جے بھیناں نُوں ایہہ ذمے‌داریاں چکنیاں پین تے فیر؟‏

کلیسیا میں سربراہی کا بندوبست (‏مینارِنگہبانی،‏ فروری 2021)‏

ایس ویڈیو چ کجھ ایہو جہے دلیر یہوواہ دے گواہواں نال ملو جیہڑے اپنے بھین بھراواں تک کتاباں تے رسالے پونچان لئی بڑیاں قربانیاں دیندے نیں۔‏

کانگو دے کونے کونے چ کتاباں تے رسالے پونچانا (‏25:‏4)‏

ایس مضمون چ پڑھو کہ یہوواہ دے گواہواں دی تنظیم دے خرچے کیویں پورے ہوندے نیں تے اوہ ایس معاملے چ دُوجیاں تنظیماں نالوں فرق کیویں اے۔‏

یہوواہ دے گواہواں دی تنظیم دے خرچے کیویں پورے ہوندے نیں؟‏ (‏ویب‌سائٹ تے مضمون)‏