Keieun Kronikel

21 Sehdan* eri uhwongada Israel oh kamwakidada Depit en wadekedi uwen tohtohn Israel.+ 2 Depit ahpw ndaiong Sohap+ oh kaunen aramas ako: “Kumwail kohwei, wadekedi Israel sang Peersipa lel Dan;+ mwuri padahkihong ie pwe I en ese ia uwen tohtohn irail.” 3 Sohap ahpw nda: “Siohwa en ketin kadirehla sapwellime aramas akan pak 100! Maing ei kaun nanmwarki, irail koaros sou wialahr sapwellimomwi ladu? Dahme kahrehda ei kaun kupwurki wia met? Dahme kahrehda komw pahn kahrehiong Israel en dipada?”

4 Ahpw en nanmwarkio koasoi kan kehlail sang en Sohap. Sohap eri kohieila oh seiloaklahng wasa koaros nan Israel, mwurin mwo e pwurodo Serusalem.+ 5 Sohap eri padahkihong nanmwarkio uwen tohtohn aramas me kileldier. Ohlen Israel kan koaros me kin doadoahngki kedlahs lel meh 1,100,000, oh ohlen Suda kan me kin doadoahngki kedlahs iei meh 470,000.+ 6 Ahpw keinek en Lipai oh Pensamin sohte kileldi nanpwungarail,+ pwehki Sohap eh tatki en nanmwarkio lokaia ko.+

7 Met ahpw uhdahn kansensuwedihala Koht mehlelo, ih eri ketin kaloke Israel. 8 Depit eri patohwanohng Koht mehlelo: “I wiadahr dihp+ laud ni ei wia met. Eri met, komw ketin kalahngan oh mahkohng dipen sapwellimomwi laduet,+ pwe I wiadahr mwekid ehu me uhdahn pweipwei.”+ 9 Siohwa eri ketin mahsanihong Kad,+ nein Depit sounkilang kaudiahlo, mahsanih: 10 “Kohla oh ndaiong Depit, ‘Iet me Siohwa ketin mahsanihen: “I pahn kihong uhk pilipil siluh. Pilada me I pahn kihong uhk.”’” 11 Kad eri kohla rehn Depit oh ndaiong ih: “Iet me Siohwa ketin mahsanihen, ‘Pilada 12 ma erein sounpar siluh en lehk lapalap,+ de erein sounpwong siluh me ke pahn lohdi pahn omw imwintihti kan ni neirail kedlahs kan eh poweiukedi,+ de rahn siluh en kedlahs en Siohwa—soumwahu lusulus nan sahpwo+—me tohnleng en Siohwa pahn kamwomwala+ sapwen Israel pwon.’ Eri medemedewe dahme I pahn patohwan sapengki Mehmeno me ketin kadariehdo.” 13 Depit eri ndaiong Kad: “Met uhdahn kansensuwed ong ie. Menlau dehr mweidohng aramas en kalokei ie;+ mweidohng Siohwa en ketin kalokei ie pwehki sapwellime kadek kalahngan me uhdahn mwuledek.”+

14 Siohwa eri ketin kadaridiong pohn Israel soumwahu lusulus ehu,+ me kahrehda aramas 70,000 nan Israel mehla.+ 15 Oh pil, Koht mehlelo ketin kadarala tohnleng men Serusalem pwehn kasohrehla; ahpw ni tohnlengo eh pahn wia met, Siohwa ketin mahsanihada oh koluhkihla* kahpwal wet,+ oh e mahsanihong tohnleng me wahdo kahpwalo: “E itarehr!+ Kihdi pehmwen.” Sapwellimen Siohwa tohnlengo kesikesihnen karanih en Ornan mehn Sepuso+ eh wasahn kihsang kilin krein.+

16 Ni Depit eh sarada, e kilangada sapwellimen Siohwa tohnleng men eh kesikesihnen nanpwungen sampah oh pahnlahng oh kolokol kedlahs pwoat+ me uhlahng Serusalem. Depit oh ohl mah ko me likawih likoun nsensuwed*+ ahpw mwadangete poaridiong nanpwelo.+ 17 Depit eri patohwanohng Koht mehlelo: “Kaidehn ngehi me nda wadawad en aramas en wiawi? Ngehi me dipada, oh ngehi me wiahda sapwung;+ ahpw sihpw pwukat—dahme re wiadahr? Maing Siohwa ei Koht, komw kupwurkalahngan oh ketin mweidohng nin limomwi en uhwong ie oh peneinei en ei pahpao; a komw dehr ketikihdo kalokolok wet pohn sapwellimomwi aramas akan.”+

18 Sapwellimen Siohwa tohnlengo eri padahkihong Kad+ en ndaiong Depit en kohdahla oh kauwada ehu pei sarawi ong Siohwa pohn en Ornan mehn Sepuso eh wasahn kihsang kilin krein.+ 19 Depit eri kohdahla nin duwen dahme Kad nda ni mwaren Siohwa. 20 Ni ahnsowo, Ornan wie kihkihsang kilin krein, oh ni eh sohpeila oh kilangada tohnlengo, nah pwutak pahmeno me mi reh ahpw rukula. 21 Ni ahnsou me Depit kohdahdo reh, Ornan ahpw kilengla oh kilangada Depit, oh Ornan ahpw mwadangete kohieila sang ni wasahn kihsang kilin kreino oh poaridiong nanpwelo mwohn Depit. 22 Depit eri ndaiong Ornan: “Netikihong* ie pelien sahpwo, wasahn kihsang kilin kreino, pwe I en kauwada powe ehu pei sarawi ong Siohwa. Netikihong ie uwen pweine pwon, pwe kalokolok me kohwong aramas akan en kak uhdi.”+ 23 Ornan ahpw ndaiong Depit: “Komw sapwellimanikihla, oh ei kaun nanmwarki en wia nin duwen me e ketin kupwurki.* Iet I patohwanda kou kan mehn wia meirong isihs oh mehn wurahdeket+ mehn wia tuwi oh wihd mehn wia meirong en krein. I patohwanda mepwukat koaros.”

24 Ahpw Nanmwarki Depit ndaiong Ornan: “Soh, I anahne pwainda ni uwen pweine pwon, pwehki I sohte pahn ale dahme ahmw oh patohwanohng Siohwa de meirongki meirong isihs me I sohte pwainda.”+ 25 Depit eri kihong Ornan kohl me toutouki sekel* 600 nin duwen pweinen wasao. 26 Oh Depit kauwada pei sarawi ehu+ ong Siohwa wasao oh wiahda meirong isihs kan oh meirong en kaminimin kan, oh e likweriong Siohwa, me ketin sapengala ih sang ni eh ketin kadaridi kisiniei+ sang nanleng pohn pei sarawi en meirong isihso. 27 Siohwa eri ketin ruwese tohnlengo+ en kapwurehiong nah kedlahso nan kidipeo. 28 Ni ahnsowo, ni Depit eh tehkada me Siohwa ketin sapengala ih nan en Ornan mehn Sepuso eh wasahn kihsang kilin kreino, e ahpw pousehlahte wiahda meirong wasao. 29 Ahpw, ahnsowo impwal sarawi en Siohwa me Moses wiahda nan sapwtehno oh pei sarawi en meirong isihso kin mihmi pohn wasa ile nan Kipeon.+ 30 Ahpw Depit sohte kak kohla wasao pwehn peksawas rehn Koht, pwehki e masakada kedlahs en tohnleng en Siohwa.