Keieun Kronikel

26 Pwihn en silepen ewen kehl kan+ kileldi nin duwen met: kadaudok en Kora kan, Meselemaia+ nein Kore kadaudok en Asap. 2 Oh Meselemaia naineki pwutak kan: Sekaraia me mesenih, Sediael me keriemen, Sepadaia me kesilimen, Sadniel me kapahmen, 3 Elam me kelimmen, Sehohanan me kewenemen, Eliehoenai me keisimen. 4 Oh Oped-edom naineki pwutak kan: Semaia me mesenih, Sehosapad me keriemen, Soha me kesilimen, Sakar me kapahmen, Nedanel me kelimmen, 5 Ammiel me kewenemen, Isakar me keisimen, oh Peulledai me kawelimen; pwe Koht ketin kapaiahda ih.

6 Oh sang nah pwutak Semaia, mie pwutak kan me ipwidi oh wiahla kaunen peneinei kan, pwehki irail aramas kehlail oh koahiek kei. 7 Nein Semaia pwutak kan: Odni, Repael, Oped oh Elsapad; oh kisehn Elsapad ko Elihu oh Semakaia pil wia aramas koahiek kei. 8 Irail pwukat koaros wia kadaudok en Oped-edom; irail oh neirail pwutak oh kisehrail kan wia aramas koahiek oh warohng doadoahko, peneinei en Oped-edom meh 62. 9 Oh Meselemaia+ naineki pwutak kan oh mie kiseh kan, aramas koahiek 18. 10 Oh Osa nein Merari pil naineki pwutak kan. Simrai me kaun, mendahki kaidehn ih me mesenih, eh pahpao idihada ih nin duwen kaun, 11 Ilkaia me keriemen, Tepalaia me kesilimen, Sekaraia me kapahmen. Nein Osa pwutak kan oh kiseh kan koaros patpene meh 13.

12 Nan pwihn en silepen ewen kehl pwukat, kaun akan ahneki pwukoa duwehte me kisehrail ko ahneki, en papah ni tehnpesen Siohwa. 13 Sohte lipilipil ma peneinei tikitik de laud, irail usuhski+ ehuehu ewen kehl ko. 14 Usuhs ong palimese pwupwudiong Selemaia. Irail eri usuhski nah pwutako Sekaraia, sounkaweid loalokong men, oh eh usuhso kohdiong paliepeng. 15 En Oped-edom usuhso kohdiong palieir, oh nah pwutak kan+ alehdi pwukoa ong imwen nahk kan. 16 En Suppim oh Osa+ usuhso kohdiong palikapi, karanih Ewen Kehl Salleked limwahn ahl ukadao, pwihn en silasil kan mi pali koaros; 17 ehuehu rahn mehn Lipai wenemen kin mi palimese; meh pahmen paliepeng, meh pahmen palieir; oh ni imwen nahk kan,+ sounsilasil riemen kin mi limwahn sounsilasil riemen; 18 a palangk me mi ni palikapi, meh pahmen kin mi pohn ahlo+ oh meh riemen ni palangko. 19 Ih pwihn pwukat me wia silepen ewen kehl kan sang kadaudok en Kora oh Merari kan.

20 A duwen mehn Lipai kan, Ahisa me kin apwalih wasahn nahk dipwisou kesempwal kan en Koht mehlelo oh wasahn nahk dipwisou kan me kasarawihla.*+ 21 Kadaudok en Ladan kan: kadaudok en Kerson kan me kohsang Ladan, Sehiel+ iei emen kaunen peneinei kan me kohsang Ladan mehn Kerson 22 oh nein Sehiel pwutak kan iei Sedam oh rie Soel. Re kin apwalih wasahn nahk dipwisou kesempwal kan en tehnpesen Siohwa.+ 23 Sang mehn Amram kan, mehn Isar kan, mehn Ipron kan oh mehn Ussiel kan,+ 24 Sepuel nein Kersom nein Moses pwutak me wia kaun me kin apwalih imwen nahk kan. 25 A duwen kisehn Sepuel ko, kadaudok en Elieser+ kan iei Rehapaia,+ Sesaia, Soram, Sikri oh Selomod. 26 Selomod menet oh rie kan me kin apwalih wasahn nahk koaros,+ nan wasa me dipwisou kan me Nanmwarki Depit,+ kaunen peneinei kan,+ kaunen meh kid kan oh kaunen meh epwiki kan oh kaunen sounpei kan kasarawihala. 27 Re kasarawihala ekei dipwisou lohdi kan+ sang mahwen+ pwe ren doadoahngki ong apwalih tehnpesen Siohwa; 28 oh pil, soahng kan koaros me sounkilang kaudiahl+ Samuel, Sohl nein Kis, Apner+ nein Ner oh Sohap+ nein Seruaia+ kasarawihala. Mehkoaros me aramas kasarawihala kin kohdi pahn epwelpen Selomid oh rie kan.

29 A duwen mehn Isar kan,+ Kenanaia oh nah pwutak kan idihdida ren apwalih doadoahk teikan likin tehnpesen Koht nin duwen sounapwalih oh sounkopwung+ en Israel.

30 A duwen mehn Ipron kan,+ Asapaia oh kiseh kan, aramas koahiek 1,700, me kin tetehk mwekid en Israel nan sahpw me mi palikapi en Sordan ong doadoahk koaros en Siohwa oh papah nanmwarkio. 31 A duwen mehn Ipron kan, nanpwungen kadaudok en peneinei en Ipron, Seraisa+ me kaun. Ni kapahisek en sounpar en kaundahn Depit,+ repen aramas ahpw wiawi nanpwungen mehn Ipron kan, oh aramas kehlail oh koahiek ahpw dierekda nan Saser+ nan Kilead. 32 Oh kisehn Seraisa aramas koahiek kan meh 2,700, kaunen peneinei kei. Nanmwarki Depit eri idihirailda ren apwalih mehn Reupen kan, mehn Kad kan oh elep keinek en Manase, ong soahng koaros me pid Koht mehlelo oh nanmwarkio.