Sohp
27 Sohp ahpw doulahte nan eh koasoio,* nda:
2 “Nin duwen Koht me ketikihsang ie pwung pahrek+ eh ketin ieias,
Nin duwen me Keieu Manamano me ketin kahpwalihala ei mour+ eh ketin ieias,
3 Erein ei wie esiesingekte
Oh angin doauesen Koht eh mi loaleiet,+
4 Kilin eweiet sohte pahn koasoia mehkot me sohte pwung;
De loweiet sohte pahn pil mwengininginki likamw!
5 I sohte kak medewehda I en koasoia me kumwail aramas pwung!
I sohte pahn kesehla* ei loalopwoat lao I mehla!+
6 I pahn ngihtehtehki ei wia aramas pwung oh sohte mwahn pahn kesehla;+
Ei mohngiong sohte pahn kadeikiehda* erein ei momour.
7 Ei imwintihti en duwehla me suwed,
Irail me kin uhwong ie en duwehla me sohte pwung kan.
8 Pwe koapworopwor dah me mie ong aramas me kin pohnsehse Koht* ni eh mwomwla,+
Ni Koht eh ketikihsang eh mour?*
9 Ia duwe, Koht pahn ketin karonge eh likwer
Ni kahpwal eh lelohng ih?+
10 De e pahn diar peren pwehki me Keieu Manamano?
E pahn kin likweriong Koht ahnsou koaros?
11 I pahn padahkihong kumwail duwen manaman en* Koht;
I sohte pahn ekihla mehkot ehu duwen me Keieu Manamano.
12 Kilang! Ma kumwail koaros kilangehr kaudiahl kan,
Eri, dahme kahrehda sohte douluhl katepen amwail koasoi kan?
13 Iet pwaisen aramas suwed men sang rehn Koht,+
Sohso me kaun lemei kan alehdi sang me Keieu Manamano.
14 Mehnda ma nah pwutak kan tohtohla, re pahn mehkihla kedlahs,+
Oh mwenge sohte pahn itar ong kadaudoke kan.
15 Kadaudoke kan me pitila pahn serikihdi kalokolok,
Oh ar pwoud kan sohte pahn sengisengkin irail.
16 Mehnda ma e koasoakehda silper duwehte pwelpar
Oh nahkpene likou kaselel duwehte koasoakoasoak en pwehl,
17 Mendahki ih me kin kihpene likou kan,
Aramas pwung me pahn likawih,+
Oh aramas me sohte dipe me pahn nehkpeseng nah silper kan.
18 Ihmw me e kin kauwada luwet duwehte imwen kisin mahn tikitik men,*
Duwehte kisin pelien ihmw ehu+ me sounsilasil men wiahda.
19 E pahn kohla wendi ni eh kepwehpwe ahpw sohte mehkot e pahn kihpene;
Ni eh pehdpeseng, sohte mehkot pahn mi mwo.
20 Masak kin kipehdi ih rasehng lapake ehu;
Melimel kin ipirala ih nipwong.+
21 Kisinieng en palimese pahn wahsang ih, oh e pahn sohrala;
Kisiniengo pahn koahkoahsang ih nan eh wasa.+