Melkahka kan
En Depit melkahka.
35 Maing Siohwa, komw ketin utung ei repenpwung sang irail akan me kin uhwong ie;+
Komw ketin peiong irail kan me kin peiong ie.+
2 Komw ketikihda sapwellimomwi mehn sansar tikitiken oh mehn sansar lauden.+
Oh komw ketida oh pere ie.+
3 Komw ketikihda sapwellimomwi ketieuwen oh sile en mahwenen* oh uhwong irail kan me kin pwakipwakih ie.+
Komw ketin mahsanihong ie: “I pahn doareiukala.”+
4 Irail akan me kin songosong en kemeiehla en namenekla oh sarohdi.+
Irail akan me kin koasoakoasoane ren kauweiehla ren pweiekla ni ar sarohdi.
5 Ren duwehla kilin krein nan kisinieng;
Sapwellimen Siohwa tohnleng en kasareirailla.+
6 Alarail en rotala oh likekirisla
Nindoken sapwellimen Siohwa tohnleng eh pwakipwakih irail.
7 Pwe ni soh kahrepe re ekilahr uhk ehu pwe ren lidipih ie.
Ni soh kahrepe re weiradahr pwoahr ehu pwe ren koliehdi.
8 Kahpwal en kohdiong powe ni eh sasairki;
En lohdi nan uhk me e ekihlao;
En pwupwudiong loale oh mwomwla.+
9 Ahpw I pahn nsenamwahu pwehki Siohwa;
I pahn pereperen pwehki eh ketin doareiehla.
10 Tih kat koaros pahn nda:
“Maing Siohwa, ihs me duwei komwi?
Komw kin ketin doarehla me sohte sawasepe sang irail kan me kehlail,+
Komw kin ketin doarehla me sohte sawasepe oh me semwehmwe sang irail kan me kin pirapa irail.”+
12 Re kin dupungki ei wiewia mwahu me suwed,+
Re kin wiahiong ie I en pahtoula.
13 Ahpw ni ar soumwahuda, I pwuhriong nan likoun nsensuwed;*
I kalokehkin ie kaisihsol,
Oh ni ei kapakap eh sohte pasapengla,*
14 I alialuseli duwehte ei kin mwahieiki kompoakepahi men de riei men;
I itiekidi ni nsensuwed, duwehte emen me mwahieiki eh nohno.
15 Ahpw ni ei dipekelekel, re perenda oh kohpene;
Re kohpene pwe ren rukihiehdi oh peiong ie;
Re tehriepeseng oh sohte tokedihsang met.
16 Aramas kan me sohte kin wauneki Koht kin kepitkin ie,*
Ngihrail kan kin tehtehrek pwehki ar lingeringer pahi.+
17 Maing Siohwa, ia erein omwi pahn ketin mahmahsanihete?+
Komw ketin doareiehla pwe re de kemeiehla,+
Komw ketin doarehla ei mour kesempwal sang laion pwulopwul kan.*+
18 I ahpw pahn kapingkalahngan ong komwi nan mwomwohdiso laud;+
I pahn kapinga komwi nanpwungen pokon en aramas akan.
19 Komw dehr ketin mweidohng irail kan me wiahla ei imwintihti ni soh kahrepe ren perenkihda ei lokolok;
Komw dehr ketin mweidohng irail kan me kin kailongkin ie ni soh kahrepe+ ren manih ie ni widing.+
20 Pwe re sohte kin lokaia kadek,
Re kin koasoakoasoane soahng widing kan ong irail me kin kousoan nan sahpwo ni popohl.+
21 Re kin sarapeseng pwehn kedipa ie,
Ndinda: “Ke les! Se kilangkiher met masat kat.”
22 Maing Siohwa, komw ketin mahsaniher met. Komw dehr ketin nennenla.+
Maing Siohwa, komw dehr ketin dohweisang ie.+
23 Maing Siohwa ei Koht, komw ketida oh pere ie,
Komw ketin utung ie nan ei repenpwung.
24 Maing Siohwa ei Koht, komw ketin kadeik ie nin duwen sapwellimomwi pwung;+
Komw dehr ketin mweidohng ren perenkihda ei lokolok.
25 Komw dehr ketin mweidohng ren ndinda:
“Ia uwen mwahu! Kitail alehdier dahme kitail mwahuki. Kitail kadallelahr ih.”+
26 Irail koaros en namenekla oh mwamwahlla,
Irail akan me kin perenkihda ei kahpwal.
Irail akan me kin aklapalapiong ie en namenekla oh sarohdi.
27 Ahpw irail akan me kin perenkihda ei wiewia pwung kan en weriwerki peren;
Ren kin usehlahte ndinda:
“Siohwa en ketin linganla, me kin ketin kupwurperenki popohl en sapwellime ladu.”+