Eklesiasdes

2 Ngehi eri nda nan ei mohngiong: “Kohdo oh mweidohng ie I en song dahkot nsenamwahu* oh kilang ma mie kamwahupe.” Ahpw kilang! met pil sohte katepe.

 2 I ndahki duwen kouruhr, “Met mwekid en sahliel!”

Oh duwen nsenamwahu,* “Ia katepen met?”

3 I pilada I en kilang soahng mwahu dah me kin kohsang pereperenki wain,+ ni ei kolokolete ei erpit; I pil wia soahng pweipwei kan pwe I en diarada dahme keieu mwahu ong aramas akan ren wia erein ar mour mwotomwot nin sampah. 4 I tepida wia doadoahk laud kan.+ I kauwadahr imwei ihmw kan;+ I wiadahr ei mwetin kreip kan.+ 5 I wiahda ei mwetuwel laud oh tikitik kan, oh I padokedier nan mwetuwel pwukat soangen tuhke koaros me mie wah. 6 I wiahda ei lepin lehn pihl kei pwe I en kakusehng pihl nan mwetuwel* en tuhke kan. 7 I alehda ladu ohl oh lih akan+ oh mie ladu kei me ipwidi nan imwei. I pil alehda pelinmen kan—kou oh sihpw kan+—tohtohsang nein irail me kin kakaun nan Serusalem mwohi. 8 I katohtohwehla nei silper oh kohl,+ kepwe kesempwal kan sang* nanmwarki kan oh soangsoangen wehi kan.+ I kihpene sounkoul ohl oh lih akan, oh pil mehkot me kin wahdo peren kowahlap rehn aramas akan—lih, ei, lih tohto. 9 Eri I uhdahn lapalapala oh siksang meteikan koaros me mi mwohi nan Serusalem.+ Oh ei erpit kin mihmihte rehi.

10 Soahng koaros me I kin inengieng,* I kin wiahda.+ I sohte kin irehdi sang ei mohngiong soangen peren* koaros, pwe ei mohngiong kin peren pwehki ei doadoahk laud koaros, oh iei met ketingpen* ei doadoahk laud koaros. + 11 Ahpw ni ei medemedewe doadoahk koaros me pehi kat wiadahr oh doadoahk laud koaros me I nantihong wiahda,+ I kilang me mehkoaros sohte katepe, rasehng pwakipwakih kisinieng;+ sohte mehkot me uhdahn katapan* nin sampah.*+

12 Ngehi eri kasawih erpit oh iahk oh pweipwei.+ (Pwe dahme aramas me kin kohdo mwurin nanmwarki kak wia? Ihte soahng kan me aramas akan wiadahr.) 13 Oh I esehla me erpit mwahusang pweipwei,+ duwehte marain eh mwahusang rotorot.

14 Me loalokong kin kilang soahng kan ni sansal;*+ ahpw me pweipwei kin alialu nan rotorot.+ I pil esehda me ira koaros pahn kin lelohng imwilateieu.+ 15 Ngehi eri nda nan ei mohngiong: “Dahme kin wiawihong me pweipwei kan pil pahn wiawihong ie.”+ Eri, dahme I alehdi ni ei uhdahn loalokongla? Ngehi eri nda nan ei mohngiong: “Met pil sohte katepe.” 16 Pwe sohte me pahn tamataman me loalokong men oh pil me pweipwei men kohkohlahte.+ Ni rahn akan me pahn kohdo, koaros pahn manokonokla. Oh ia mwomwen me loalokong men eh pahn mehla? Duwehte me pweipwei men eh pahn mehla.+

17 Eri I tepida kailongki mour,+ pwehki soahng koaros me wiawiher nin sampah* mwomwen kapwunod ong ie, pwe mehkoaros sohte katepe,+ rasehng pwakipwakih kisinieng.+ 18 I tepida kailongki soahng koaros me I alehdi sang ni ei doadoahk laud pahn ketipin,+ pwehki I anahne pwilikihdi mepwukat ong aramas me pahn kohdo mwuri.+ 19 Oh ihs me ese ma e pahn loalokong de pweipwei?+ Ahpw e pahn alehdi mehkoaros me I ahnekihda sang nan ei doadoahk laud oh erpit nin sampah.* Met pil sohte katepe. 20 Eri I uhdahn nsensuwedkihla doadoahk laud koaros me I nannanti wiahda nin sampah.* 21 Pwe aramas men ele kin doadoahk laud ni eh doadoahngki erpit oh loalokong oh koahiek, ahpw e anahne kihong aramas me sohte wia doadoahk wet pwaise.*+ Met pil sohte katepe oh kansensuwed* laud ehu.

22 Dahme aramas emen kin alehdi sang eh doadoahk laud koaros oh ineng me kin kamwakid ih* en doadoahk laud pahn ketipin?+ 23 Pwe erein eh mour, eh doadoahk kin wahdo medek oh pwunod,+ oh eh mohngiong sohte pil kin kommoal nipwong.+ Met pil sohte katepe.

24 Sohte mehkot mwahusang aramas men en mwenge oh nim oh nsenamwahuki eh doadoahk laud.+ I esehda me met pil kohsang nin limen Koht mehlelo.+ 25 Ihs me kin tungoale oh nim mehkot mwahusang ie?+

26 Koht ketikihong aramas me kin kaperenda kupwure erpit oh loalokong oh peren,+ ahpw e ketikihong me dipan doadoahk en kihpene kepwe pwehn kihong aramas me kin kaperenda kupwuren Koht mehlelo.+ Met pil sohte katepe, rasehng pwakipwakih kisinieng.