Esekiel
26 Ni kaeisek ehun pahr, ni keieun rahn en sounpwongo, Siohwa ketin mahsanihong ie: 2 “Nein-aramas, pwehki Dair kin ndahki duwen Serusalem,+ ‘Iao! Ewen kehl en aramas akan ohlahr!+ Mehkoaros pahn kodohng ie, oh I pahn kepwehpwehla met pwehki eh mwomwlahr’; 3 kahrehda iet me Kaun Wasa Lapalahpie Siohwa ketin mahsanih: ‘Dair, I kin uhwong uhk, oh I pahn wahdo wehi tohto ren uhwong uhk, rasehng sehd eh kin wahdo ilok kan. 4 Re pahn kauwehla dihd en Dair kan oh karangkehdi eh imwen doulik kan,+ oh I pahn koahkoahsang pwehl oh wiahkihla ih takai melengileng mahsahs ehu. 5 E pahn wiahla wasahn palang uhk kan nanwerengen sehdo.’+
“Kaun Wasa Lapalahpie Siohwa ketin mahsanih, ‘Pwe ngehi me mahmahsen, oh Dair pahn wiahla dipwisou lohdi ong wehi kan. 6 Oh tohn eh kisin kahnimw kan* me mi nansapw pahn kamakamkihla kedlahs, oh aramas akan pahn anahne ese me ngehi me Siohwa.’
7 “Pwe iet me Kaun Wasa Lapalahpie Siohwa ketin mahsanih: ‘I pahn wadohng Dair Nanmwarki Nepukadnesar* en Papilon sang paliepeng;+ ih me nanmwarkien nanmwarki kan,+ oh e pahn kohdo iangahki oahs kan,+ kurumahn mahwen kan,+ soundak oahs kan oh karis ehu me sounpei* tohto. 8 E pahn kamwomwkihla omw kisin kahnimw kan me mi nansapw kedlahs, oh e pahn kauwada dihd en kapilpene oh wiahda koasoakoasoak ehu ong uhk oh kauwada mehn sansar laud ehu ong uhk. 9 E pahn sukeki omw kehl kan nah mehn kauwehla kehl,* oh e pahn karangkehkihdi omw imwen doulik kan nah sile kan.* 10 Nah oahs kan pahn tohto me kahrehda re pahn pwainkinuhkedi pwelpar, oh ngilen soundak oahs kan, daia kan oh kuruma kan pahn itikada omw dihd kan ni eh pedolong ni ewen omw kehl kan, rasehng aramas akan ar tangolong nan kahnimw ehu me dihd kan ohla. 11 Nehn nah oahs kan pahn tiakpeseng omw ahl akan koaros;+ e pahn kemehkihla noumw aramas akan kedlahs, oh omw uhr kehlail kan pahn pwupwudi nanpwel. 12 Re pahn pirapahsang omw kepwe kan, kulihasang omw kepwehn net kan,+ kauwehla omw dihd kan, oh karangkehdi imwomw ihmw kaselel kan; mwuri re pahn keselahng omw takai kan oh tuhkehn imwomwo oh omw pwehl nan pihlo.’
13 “‘I pahn katokehdi ngilen omw koul kan, oh sohla pahn mie ngilen noumw arp kan.+ 14 Oh I pahn wiahkinuhkala takai melengileng mahsahs ehu, oh ke pahn wiahla wasahn palang uhk kan.+ Ke sohte pahn onohnsapahlda, pwe ngehi, Siohwa, me mahmahsen,’ Kaun Wasa Lapalahpie Siohwa me ketin mahmahsen.
15 “Iet me Kaun Wasa Lapalahpie Siohwa ketin mahsanihong Dair: ‘Sang ni ngilen omw pwupwudi, ni ahnsou me irail me pahn melahr kan* ingihngtik, ni ahnsou me kamakamala wiawi rehmw, ia duwe, deke kan sou pahn rerrer?+ 16 Lapalap* koaros en sehd pahn kohdihdo sang pohn mwoalarail kan oh kihsang arail likou reirei kan* oh kapwuhrasang arail likou deiad kan, oh re pahn rerrerki ar masak. Re pahn mwohd pohn pwehl oh wie rerrer oh kangkakil uhk ni pwuriamwei.+ 17 Oh re pahn koulkihong uhk koulen kedepwidepw pwoat*+ oh ndaiong uhk:
“Ke sohralahr,+ kowe me towe kan kohsang sehd kan, kahnimw me aramas kin kapinga;
Kowe oh towe kan me mi rehmw kin kehlail nansed,+
Oh kin kamasak koaros me kin koukousoan nin sampah!
18 Deke kan pahn rerrer ni rahn me ke pahn pwupwudi,
Dekehn nansed kan pahn pwunodada ni omw sohrala.”’+
19 “Pwe iet me Kaun Wasa Lapalahpie Siohwa ketin mahsanih: ‘Ni ahnsou me I kamwomwuhkala rasehng kahnimw kan me sohte towe, ni ahnsou me I kauwehkinuhkala ilok laud kan oh pihl kehlail kan ar koaduhpwaleiukedi,+ 20 I pahn waiukdihla oh irail me pahn iang uhk kohdihla nan pwoahr* rehn aramas en mahs ako; I pahn wiahiong uhk ken kousoan wasa me keieu karakarahk, duwehte wasa kan me mwomwlahr mahso, iangahki irail me pahn kohdihla nan pwoahro,+ pwehn sohla me pahn kousoan rehmw. Eri I pahn kalinganahla* sapwen me momour kan.
21 “‘I pahn wahdo pohmw soahng kamasepwehk kan ni soh kasikpe, oh ke pahn sohrala.+ Re pahn rapahkin uhk, ahpw ke sohte mwahn pahn pwurehng dierek,’ Kaun Wasa Lapalahpie Siohwa me ketin mahmahsen.”