Esekiel

36 “A kowe, nein-aramas, kohpada duwen nahna kan en Israel oh nda, ‘Nahna kan en Israel, kumwail rong mahsen en Siohwa. 2 Iet me Kaun Wasa Lapalahpie Siohwa ketin mahsanih: “Imwintihtio ndaiong kumwail, ‘Iao! Se pil ahnekilahr wasa ile kan en kawa ko!’”’+

3 “Eri wia kokohp oh nda, ‘Iet me Kaun Wasa Lapalahpie Siohwa ketin mahsanih: “Re kamwomwala oh mahweniong kumwail sang wasa koaros, pwe me pitila kan* sang wehi kan en nainekinkumwailla oh aramas akan en kin koasoakoasoia kumwail oh karaunlikamwih kumwail.+ 4 Kahrehda, nahna kan en Israel, kumwail rong mahsen en Kaun Wasa Lapalahpie Siohwa! Iet me Kaun Wasa Lapalahpie Siohwa ketin mahsanihong nahna kan oh dohl kan, piletik kan oh wahu kan, wasa tehn kan,+ oh kahnimw lekdekla kan me audepe kan kulsangehr oh mwamwahllahr pahn irail me pitila kan en wehi kan me kapilirailpene;+ 5 Kaun Wasa Lapalahpie Siohwa ketin mahsanihong irail pwukat: ‘Sang ni kisiniei en ei engieng+ I pahn kadeikada irail me pitila kan en wehi kan oh Edom pwon, irail kan me nda ni peren mwuledek oh kepit laud+ me dene sapweio iei sapwarail, pwe ren kihsang mohs kan oh kulihasang.’”’+

6 “Eri kohpada duwen sapwen Israel, oh ndaiong nahna kan oh dohl kan, piletik kan oh wahu kan, ‘Iet me Kaun Wasa Lapalahpie Siohwa ketin mahsanih: “Kilang! I pahn mahsen ni ei ngoang oh ei engieng, pwehki wehi kan kanamenekihkumwaillahr.”’+

7 “Kahrehda iet me Kaun Wasa Lapalahpie Siohwa ketin mahsanih: ‘I kapahda limeiet oh kahukihla me wehi kan me kapilkumwailpene pahn namenekla.+ 8 Ahpw kumwail, nahna kan en Israel, pahn kapwarehda rah kan oh wahmwail kan ong nei aramas en Israel kan,+ pwe re pahn kereniong pwurodo. 9 Pwe I kin ieiang kumwail, oh I pahn sohpeiong kumwail, oh kumwail pahn deideida oh werentuhke kan pahn kamweremwerdi. 10 I pahn katohtohwehla noumwail aramas akan—aramas en Israel kan pwon, irail koaros—oh kahnimw kan pahn miehla towe+ oh mohn ihmw kan pahn onohnsapahlda.+ 11 Ei, I pahn katohtohwehla noumwail aramas akan oh noumwail pelinmen kan;+ re pahn tohtohla oh paraparala. Oh I pahn wiahiong aramas akan ren kousoan rehmwail duwehte mahso,+ oh I pahn wiahiong kumwail en pweida sang mahso;+ oh kumwail pahn anahne ese me ngehi me Siohwa.+ 12 I pahn kahrehiong aramas akan—nei aramas en Israel kan—ren alu pohmwail, oh re pahn sapwenikinkumwailla.+ Kumwail pahn wiahla arail sohso, oh kumwail sohla pahn pwurehng kihsang irail neirail seri kan.’”+

13 “Iet me Kaun Wasa Lapalahpie Siohwa ketin mahsanih: ‘Pwehki re kin ndaiong kumwail, “Kowe sahpw ehu me kin kadallehla aramas akan oh kihsang nein omw wehi kan seri kan,”’ 14 ‘kahrehda, ke solahr pahn kadallehla aramas akan de kihsang nein omw wehi kan seri kan,’ Kaun Wasa Lapalahpie Siohwa me ketin mahmahsen. 15 ‘I solahr pahn mweidohng wehi kan ren kapailokeiuk de aramas akan ren kepitkin uhk,+ oh ke sohla pahn kadipekelekele omw wehi kan,’ Kaun Wasa Lapalahpie Siohwa me ketin mahmahsen.”

16 Oh Siohwa ketin pwurehng mahsanihong ie: 17 “Nein-aramas, ni ahnsou me aramas en Israel kan koukousoan nan sapwarailo, re kasaminehkihla sahpwo elen arail mour oh ar wiewia kan.+ Elen arail mour duwehte samin en soumwahu en lih ong ie.+ 18 Eri I wudekihdi ei engieng pohrail pwehki ar kakerehdi nta pohn sahpwo+ oh pwehki ar kasaminehkihla sahpwo ar dikedik kasaut kan.*+ 19 Eri I kamwarakirailpeseng nan wehi kan oh kihirailpeseng nan sahpw kan.+ I kadeikirailda nin duwen elen arail mour oh ar wiewia kan. 20 Ahpw ni ar kohla ni wehi pwuko, aramas akan kasaminehla mwarei sarawi+ ni ar ndahkin irail, ‘Irail pwukat me sapwellimen Siohwa aramas, ahpw re anahne kohkohsang sapweo.’ 21 Eri I pahn kasalehda ei nsenohki mwarei sarawi, me aramas en Israel kan kasaminehla nan wehi kan me re kohla ie.”+

22 “Kahrehda, ndaiong aramas en Israel kan, ‘Iet me Kaun Wasa Lapalahpie Siohwa ketin mahsanih: “Aramas en Israel kan, I mwekid kaidehn pwehki kumwail, ahpw pwehki mwarei sarawi me kumwail kasaminehla nan wehi kan me kumwail kohla ie.”’+ 23 Kaun Wasa Lapalahpie Siohwa ketin mahsanih, ‘I uhdahn pahn kasarawihala mwarei lapalap,+ me sohla wahupe nan wehi kan, me kumwail kasaminehla nanpwungarail; oh wehi kan pahn anahne ese me ngehi me Siohwa,+ ni ei sarawihla nanpwungamwail mwohn masarail kan. 24 I pahn waikumwailsang wehi kan oh kihkumwailpene sang sahpw akan koaros oh waikumwaildo nan sapwamwailo.+ 25 I pahn usupihkin kumwail pihl mwakelekel, oh kumwail pahn mwakelekella;+ I pahn kamwakeleikumwailda sang amwail samin koaros+ oh amwail dikedik kasaut kan koaros.+ 26 I pahn kihong kumwail mohngiong kapw ehu+ oh kihong loalamwail elen madamadau* kapw.+ I pahn kihsang ni paliwaramwail kan mohngiong me kekeluwak duwehte takai+ oh kihong kumwail mohngiong mwuterek.* 27 I pahn kihong ei ngehn sarawi* loalamwail, oh I pahn wiahiong kumwail en keid nan ei koasoandi kan,+ oh kumwail pahn peikiong oh kapwaiada ei kosonned kan. 28 Oh kumwail pahn kousoanla nan sahpw me I kihong samamwail mehn mahs ako, oh kumwail pahn wiahla nei aramas oh I pahn wiahla amwail Koht.’+

29 “‘I pahn doareikumwailsang amwail samin koaros oh I pahn eker krein* en kapwarehda wah tohto, oh I sohte pahn wadohng kumwail lehk lapalap.+ 30 I pahn katohtohwehla wahntuhke oh wahnsahpw kan, pwe kumwail en dehr pwurehng lokolongki kanamenekpen lehk lapalap nan wehi kan.+ 31 Kumwail ahpw pahn tamataman amwail ahl suwed kan oh amwail wiewia sohte mwahu kan, oh kumwail pahn pein kasautkin kumwail pwehki dipamwail kan oh amwail wiewia kasaut kan.+ 32 Ahpw kumwail en ese met: I sohte pahn wia met ong kumwail.+ Aramas en Israel kan, kumwail en namenekla oh sarohdi pwehki elen amwail mour kan,’ Kaun Wasa Lapalahpie Siohwa me ketin mahmahsen.

33 “Iet me Kaun Wasa Lapalahpie Siohwa ketin mahsanih: ‘Rahn me I pahn kamwakeleikumwailda sang dipamwail kan koaros, I pahn wiahiong kahnimw kan en miehla towe+ oh mohn kahnimw kan en onohnsapahlda.+ 34 Sahpw tehnlao me aramas koaros me keid wasao kin kilang pahn koadoahkda. 35 Oh aramas akan pahn nda: “Sahpw tehnlao duwelahr mwetuwel en Ihden,+ oh kahnimw ko me mwomwla, tehnla oh rengkidi, met re kelpene kehlail oh miehla towe.”+ 36 Oh wehi kan me luhwehdi limwahmwail pahn anahne ese me ngehi, Siohwa, me kauwadahr dahme rengkidi, oh I pwurehng padok sahpw tehnlao. Ngehi, Siohwa me mahmahsen, oh I uhdahn pahn wia met.’+

37 “Iet me Kaun Wasa Lapalahpie Siohwa ketin mahsanih: ‘I pil pahn mweidohng aramas en Israel kan ren peki I en wiahiong irail met: I pahn katohtohwehla neirail aramas akan rasehng pelinmen ehu. 38 Rasehng pokon en aramas sarawi kan, rasehng pokon en aramas me kodohng Serusalem* erein kasarawi kan,+ kahnimw mwomwla kan pahn direkihla pokon en aramas akan;+ oh re pahn anahne ese me ngehi me Siohwa.’”