Rongamwahu en Sohn

19 Pailet eri ale Sises oh wokih.+ 2 Sounpei ko eri pahda elin tek ehu oh kidahng pohn tapwi oh kalikawihkihda likou reirei pohn ntahnmwel,+ 3 re ahpw kin keiong mpe oh nda: “Rahn kaselel, komwi Nanmwarkien mehn Suhs akan!” Oh re pil kin pohr silangi.+ 4 Pailet pil pwurehng pedoila oh ndaiong irail: “Kilang! I wahieido ih rehmwail pwe kumwail en ese me I sohte diarada sapwung ehu reh.”+ 5 Sises eri ketieila ni eh kapwatkidahr elin teko oh likawih likou reirei pohn ntahnmwel. Oh Pailet ndaiong irail: “Kilang! Iet Ohlo!” 6 Ahpw ni kaunen samworo ko oh silepe ko ar kilangada ih, re ahpw werkihda: “Kidahng ih nin tuhke! Kidahng ih nin tuhke!”*+ Pailet eri ndaiong irail: “Kumwail pein ale ih oh kemehla,* pwe I sohte diarada mehkot sapwung reh.”+ 7 Mehn Suhs ako ahpw sapeng ih, nda: “At kosonned ehu mie, oh nin duwen kosonnedo, e anahne mehla,+ pwehki eh wiahki pein ih sapwellimen Koht.”+

8 Ni Pailet eh rongada dahme re nda, e ahpwte masepwehkada, 9 oh e pwurolong nan imwen kepinao oh ndaiong Sises: “Ia wasa ke kohsang ie?” Ahpw Sises sohte ketin sapeng ih.+ 10 Pailet eri ndaiong: “Ke sohte pahn koasoiong ie? Ke sehse me I ahneki manaman en lapwaiukada oh manaman en kemeiukala?”* 11 Sises ketin sapeng ih mahsanih: “Ke sohte mwahn pahn ahneki manaman pohi ma e sohte mweimweiong uhk sang powe. Ihme kahrehda dipen aramas me pangiedohng uhko laudsang dipomw.”

12 Pwehki kahrepe wet, Pailet kin songosong en lapwahda ih, ahpw mehn Suhs ako werkihda: “Ma ke lapwahda ohl menet, kaidehn kowe kompoakepahn Sihsar. Mehmen me wiahki pein ih nanmwarki men kin pelian* Sihsar.”+ 13 Mwurin Pailet eh rong koasoi pwukat, e ahpw kahrehla Sises likio oh mwohndiong nan mwoalen kadeik nan wasa ehu me adaneki Tat Takai, ahpw ni lokaiahn Ipru, Kappada. 14 Eri rahno iei rahnen kaunopadahng+ Pahsohpa; mpen awa keweneu.* E ahpw ndaiong mehn Suhs ako: “Kilang! Iet ih amwail nanmwarki!” 15 Re ahpw werkihda: “En kamala! En kamala! Kidahng ih nin tuhke!”* Pailet ndaiong irail: “I en kemehla amwail nanmwarki?” Kaunen samworo ko ahpw sapengki: “Sohte at nanmwarki, pwe Sihsarte.” 16 Ih eri pangala ih rehrail pwe ren kemehla ih nin tuhke.+

Irail eri wahsang Sises. 17 Pein ih ketiki sapwellime tuhkehn kalokolok,* e ahpw ketilahng wasa me adaneki Wasahn Tihn Moang,+ ni lokaiahn Ipru e adaneki Kolkoda.+ 18 Iei wasao me re pasurdiong ih nin tuhkeo+ limwahn ohl riemen, emen apali a emen apali, a Sises ket nanpwungara.+ 19 Pailet eri ntingihedi oaralap ehu oh kidahng nin tuhkehn kalokoloko.* E ketihtihki: “Sises mehn Nasaret Nanmwarkien mehn Suhs akan.”+ 20 Mehn Suhs tohto wadek oaralap wet, pwehki wasa me Sises ketin posdahng ie nin tuhkeo karanih kahnimwo, oh e ntingdi ni lokaiahn Ipru, Latin oh Krihs. 21 Kaunen samworo en mehn Suhs ako ahpw ndaiong Pailet: “Ke dehr ntingihedi, ‘Nanmwarkien mehn Suhs akan,’ ahpw ntingihedi ‘Ohl menet nda, ngehi me Nanmwarkien mehn Suhs akan.’” 22 Pailet ahpw sapengki: “Dahme I ntingihedier, ihte.”

23 A ni sounpei ko ar pasurdiong Sises nin tuhkeo, re ahpw ale sapwellime likou puhp ko oh nehkpeseng ni pwais pahieu, ehu ong emenemen sounpei. Re pil ale likou reireio. Ahpw likou reireio sohte deideipene pwehki e peipeida sang powe lel pah. 24 Irail eri ndapene nanpwungarail: “Kitail dehr tehrpeseng, ahpw kitail usuhski ihs me pahn ahneki.”+ Met wiawiher pwehn kapwaiada nting sarawio me mahsanih: “Re nehkpeseng ei likou ko nanpwungarail oh re usuhski ei likou.”+ Eri sounpei ko uhdahn wia mepwukat.

25 Eri, inen Sises+ oh rien ineo lih; Mery en Klopas eh pwoud oh Mery mehn Makdala,+ uh limwahn sapwellimen Sises tuhkehn kalokoloko.* 26 Eri ni Sises eh mahsanihada me ineo oh tohnpadahk me e kin ketin poakohng+ ara uh limwah, e ahpw mahsanihong ineo: “Lih, kilang! Noumw pwutaken!” 27 Mwuri e ahpw mahsanihong tohnpadahko: “Kilang! Omw nohno!” Oh sang ahnsowo kohla, tohnpadahko kahrehda liho walahng ni imweo.

28 Mwurin met, ni Sises eh mwahngiher me ahnsowo mehkoaros pweidahier, oh pwe en kapwaiada nting sarawio, e mahsanih: “I men nimpil.”+ 29 Sah ehu mihmi wasao me diren wain me karer. Irail eri kaduhdi lihmw ehu nan wain karero, re ahpw kihong ni rahntuhke isop* pwoat oh kidahng nin doauese.+ 30 Ni Sises eh ketikiher wain karero, e ahpw mahsanih: “Mehkoaros pweidahr!”+ oh kamwatawihedi tapwi, e ahpw imwisekla.*+

31 Eri pwe kahleparail ko en dehr mihmi pohn tuhkehn kalokolok ko+ ni rahnen Sapad oh pwehki rahno iei rahnen kaunopada+ (oh mandahn rahno iei rahnen Sapad tohrohr),+ mehn Suhs ako eri peki rehn Pailet en katimpeseng aluweluwerail ko oh wahsang kahleparail ko. 32 Sounpei ko eri kohla oh katimpeseng nehn keieun ohlo oh nehn ohl teio me mi pohn tuhkeo limwahn Sises. 33 Ahpw ni arail patohla rehn Sises, re kilangada me e pwoulahr, irail eri sohte katimpeseng aluweluwe ko. 34 Ahpw emen sounpei ko doakoahki ketieu ni pengepenge+ oh ahnsowohte nta oh pihl ahpw kusieisang. 35 Oh aramaso me kilangehr met me wiadahr kadehde wet, oh eh kadehde me mehlel, oh e ese me dahme e nda me mehlel, pwe kumwail en pil kak kamehlele.+ 36 Ni mehlel, mepwukat wiawiher pwe nting sarawio en pweida: “Sohte tih pwoat reh pahn timpeseng.”*+ 37 Oh pil ehu nting sarawi mahsanih: “Re pahn kangkakil me re doakoadiero.”+

38 A mwurin mepwukat koaros, Sosep mehn Arimadea, emen sapwellimen Sises tohnpadahk ko, ahpw ni rir, pwehki eh masak mehn Suhs ako,*+ peki Pailet ma e kak wahlahsang kahlap en Sises, Pailet eri mweidohng. Ih eri kohla oh wahsang kahlapo.+ 39 Nikodihmus,+ ohl me patohdo reh ehu pwohngo, pil kohdo wa mehn kapwohtik me doalkihda* mir oh aloi* me toutouki paun* epwiki.+ 40 Ira eri ale kahlap en Sises oh kidimkipene likou linen kei iangahki mehn kapwohtik ko,+ nin duwen tiahk en seridi en mehn Suhs. 41 A mie mwetuwel ehu wasa me e ketin kamakamala* ie, oh nan mwetuwelo, mie sousou* kapw ehu+ me saikinte emen nekinekdi ie. 42 Pwehki rahno iei rahnen Kaunopada+ en mehn Suhs oh sousowo karanih wasao, ira eri nekidedi Sises wasao.