Rongamwahu en Luk

2 Eri ni rahn ako, Sihsar Akustus ahpw wiahda koasoandi ehu me tohnsampah pwon en kileldi. 2 (Keieun kileldi wet wiawi ni ahnsou me Kirinius wia kepinahn Siria.) 3 Oh aramas koaros ahpw mwekidlahng nan wasa me re ipwidi ie pwe ren iang kileldi. 4 Pwehki Sosep+ eh kisehn peneinei oh tohnimwen Depit, e pil mweselsang Kalili, sang nan kahnimw en Nasaret oh kolahng Sudia nan kahnimw en Depit me adaneki Pedleem.+ 5 E ahpw kolahng kileldi iangahki eh pwoud+ Mery me pahn kereniong neitik+ ni ahnsowo. 6 Ni ara mihmi mwo, e lelehr ahnsoun eh pahn neitik. 7 Ih eri naitikihada nah mesenih pwutak men,+ e ahpw kidimkipene likou oh pwilikihdi nan dewen kamwenge mahn ehu+ pwehki solahr pere nan wasahn pweidio.

8 Pil nan sahpwohte silepen sihpw kei mihmi nan mohs oh sinsile neirail pelin sihpw kan nipwongo. 9 A sapwellimen Siohwa* tohnleng men pa uh mwohrail oh sapwellimen Siohwa* marain dakerirailda oh kapilirailpene, irail ahpw uhdahn masepwehkada. 10 Tohnlengo ahpw ndaiong irail: “Kumwail dehr masak, pwe kilang! I kodohng lohkihong kumwail rongamwahu me pahn wahdo peren laud ong aramas koaros. 11 Pwe rahnwet, sounkomour men,+ me iei Kaun Krais,+ ipwidiongkumwailehr nan kahnimw en Depit.+ 12 A iet kilel ehu ong kumwail: Kumwail pahn diar seri pwelel men me kidikidkipene likou oh wonohn nan dewen kamwenge mahn ehu.” 13 Ni ahnsowohte karis ehu en tohnleng ngedehrie+ ahpw iang tohnlengo kapikapinga Koht, ndinda: 14 “Lingan ong Koht wasa ileile, oh pohn sampah, popohl nanpwungen aramas akan me e kin ketin kupwurperenki.”

15 Eri ni ahnsou me tohnleng ko kohkohlahsang irail oh kohkohdahla nanleng, silepen sihpw ko ahpw tepida ndindapene: “Nna kitail kohla Pedleem met oh kilang dahme wiawiher wasao nin duwen me Siohwa* ketin kasalehiong kitail.” 16 Irail ahpw mwadang kohkohla oh diarada Mery oh Sosep oh pil seri pwelelo me wie wonohn nan dewen kamwenge mahn. 17 Ni arail kilangada met, re ahpw koasoiahda dahme tohnlengo koasoia me pid kisin serio. 18 Oh koaros me rong ahpw pwuriamweikihla dahme silepen sihpw ko ndaiong irail, 19 Mery ahpw tepida kihdiong koasoi pwukat koaros nan eh mohngiong ni eh medemedewe ia wehwehn mepwukat.+ 20 Silepen sihpw ko eri pwurala, kalikalingana oh kapikapingahki Koht mehkoaros me re rongehr oh kilangehr, duwehte me lohkdahr ong irail.

21 Ni kawaluhn rahn mwurin eh ipwidi, re ahpw sirkumsaisihala ih+ oh kihong ede Sises. Ih ahd wet me tohnlengo kihong mwohn Mery eh liseianda.+

22 Oh pil ni eh lel ahnsoun ara kamwakel nin duwen Kosonned en Moses,+ ira wahdahla ih nan Serusalem pwe en kasalehiong Siohwa,* 23 duwehte eh ntingdi nan sapwellimen Siohwa* Kosonned: “Mesenih ohl koaros* anahne en kin kasarawihong Siohwa.”*+ 24 Oh ira meirongki meirong nin duwen dahme sapwellimen Siohwa* Kosonned mahsanih: “mwuroi riemen de pitsin pwulopwul riemen.”+

25 A kilang! ohl emen kin mihmi Serusalem me ede Simion. Ohl menet me pwung oh poadidi oh e kin awiawih ahnsou me Koht pahn ketin kansenamwahwih Israel+ oh ngehn sarawi* kin kaukaweid ih. 26 Patehng met, Koht ketin kasalehiong ih sang ni ngehn sarawi* me e sohte pahn mehla lao e kilang sapwellimen Siohwa* Kraiso. 27 Ngehn sarawi* eri kaweidki en kohla nan tehnpas sarawio, oh ni semen oh inen seri pwelelo Sises ara wahdo ih pwe ira en kapwaiada ong ih tiahk en Kosonnedo,+ 28 Simion ahpw alehte serio oh pwekada oh kapinga Koht, patohwan: 29 “Maing Kaun Wasa Lapalahpie, komw ketin mweidala sapwellimomwi ladu en mehla ni popohl+ nin duwen me komwi mahsaniher, 30 pwe pwoaren mesei kat kilangehr sapwellimomwi elen komour+ 31 me komw ketin kaunopadahr mwohn mesen aramas koaros,+ 32 marain ehu+ me pahn kihsang koaduhpwel me pwaindi mehn liki kan+ oh lingan ehu ong sapwellimomwi aramas en Israel kan.” 33 A ni semen oh inen serio ara kin rong koasoipen serio, ira kin pwuriamweikihla. 34 Simion pil kapaiahda ira oh ndaiong Mery, inen serio: “Kilang! Seri menet idihdidahr pwe mehn Israel tohto pahn pwupwudi+ oh pil pwurehng kesihnenda,+ oh e pahn wia kilel ehu me aramas pahn mwamwahliki+ 35 (ei, kedlahs reirei pwoat pahn doakoaiukedi lel apali),+ pwe madamadau oh pepehm en aramas tohto pahn sansalda.”

36 Pil mie lih soukohp men me ede Ana, nein Panuel serepein, kisehn keinek en Aser. Lih menet likeilapalahr oh e mihmihki rehn eh pwoud sounpar isuh mwurin ara pwopwoudida,* 37 a met e liohdilahr oh sounparehr 84. Ahnsou koaros, e kin kohla ni tehnpas sarawio, wasa me ni rahn oh nipwong e kin kaisihsol oh kapakap ni ngidingid ni eh kin papah Koht. 38 Ni ahnsowohte, e keila rehrail oh tepida kalahngankihong Koht oh koasoia duwen serio ong koaros me awiawihodo komourpen Serusalem.+

39 Eri mwurin ara kapwaiadahr mehkoaros nin duwen sapwellimen Siohwa* Kosonned,+ ira ahpw pwurala Kalili nan pein ara kahnimwo, Nasaret.+ 40 Oh kisin serio ahpw wie lalaudla oh rosorosonla oh kekeirda ni erpit, oh Koht kin ketin pousehlahte kupwuramwahwih.+

41 Nan pahr koaros, seme oh ine kin kohla Serusalem pwe ira en iang kasarawien Pahsohpa.+ 42 Eri ni ahnsou me e mahkier sounpar 12, irail ahpw kohdahla iang kasarawio nin duwen me re kin wia.+ 43 Ni ahnsou me kasarawio imwisekla oh re pwurupwurala, a Sises mihmihte Serusalem, oh seme oh ine sehse met. 44 Ira medewe me e iangehr pwihno me re wiahki ehu seiseiloak. Irail ahpw seiseiloangki rahn ehu pwon, ira eri tepida rapahki ih nanpwungen kisehra ko oh kompoakepahra ko. 45 Ni ara sohte diar ih, ira eri pwuralahng Serusalem oh nannanti rapahkiseli. 46 Eri rahn siluh mwuri, ira ahpw diarada ih nan tehnpas sarawio, mwomwohd nanpwungen sounpadahk ko, rongorong irail oh idihdek rehrail peidek kan. 47 Irail koaros me rongorong ih ahpw kin pwuriamweikihla eh koahiek en wehwehki ire kan oh eh pasapeng kan.+ 48 Ni seme oh ine ara kilangada ih, ira inenen pwuriamweikihla. Ineo eri ndaiong: “Lao, dahme ke wiahkihong kiht met? Ngehi oh semomw inenen tihwohkilahr at raparapahkinuhkseli.” 49 E ahpw ndaiong ira: “Dahme kumwa raparapahkiniehki? Kumwa sohte ese me I uhdahn pahn mi nan tehnpesen Semei?”+ 50 Ahpw ira sohte wehwehki dahme e ndindaiong ira.

51 Ih eri iang ira pwuredihlahng Nasaret, e ahpw kin pousehlahte uhpahiong* ira.+ Oh ineo kihdiong mepwukat koaros nan eh mohngiong.+ 52 Oh Sises pousehlahte kekeirda oh koahiekla ni erpit oh kenikenla rehn Koht oh aramas akan.