Keieun Kronikel
27 Iet uwen tohtohn mehn Israel kan, kaunen peneinei kan, kaunen meh kid kan oh kaunen meh epwiki kan,+ oh kaun akan me kin papah nanmwarki+ ni ar apwalih mehkoaros me pidada pwihn akan me kin weliali* nan ehuehu sounpwong erein sounpar ehu; aramas 24,000 mi nan ehuehu pwihn.
2 Sasopeam+ nein Sapdiel me kin kaun keieun pwihn me kin doadoahk ni keieun sounpwong oh aramas 24,000 mi nan eh pwihn. 3 Ih emen kadaudok en Peres.+ Ih me kaunen kaun akan koaros nan pwihn akan me idihdida ren papah ni keieun sounpwong. 4 Dodai+ mehn Ahoi+ me kin kaun pwihn me kin doadoahk ni keriaun sounpwong, oh Miklod me keriemen en kaun, oh aramas 24,000 mi nan eh pwihn. 5 Penaia+ nein Sehoiada+ kaunen samworo, me kin kaun kesiluhwen pwihn me idihdida ren papah nan erein kesiluhwen sounpwong, oh aramas 24,000 mi nan eh pwihn. 6 Penaia menet iei emen kisehn sounpei kehlail siliakano oh ih me kin apwalih meh siliakano oh nah pwutak Amissapad me kin apwalih eh pwihn. 7 Asahel+ rien Sohap+ me kapahmen en kaun ong kapahieun sounpwong, oh nah pwutak Sepadaia me wiliandi ih, oh aramas 24,000 mi nan eh pwihn. 8 Samud mehn Israhaia me kelimmen en kaun ong kelimaun sounpwong, oh aramas 24,000 mi nan eh pwihn. 9 Aira+ nein Ikkes mehn Tekoa+ me kewenemen en kaun ong keweneun sounpwong, oh aramas 24,000 mi nan eh pwihn. 10 Eles+ mehn Pelon kadaudok en Epraim me keisimen en kaun ong keisuhwen sounpwong, oh aramas 24,000 mi nan eh pwihn. 11 Sippekai+ mehn Usa kadaudok en Sera+ me kawelimen en kaun ong kawaluhn sounpwong, oh aramas 24,000 mi nan eh pwihn. 12 Apieser+ mehn Anadod+ kadaudok en Pensamin me keduwemen en kaun ong keduwaun sounpwong, oh aramas 24,000 mi nan eh pwihn. 13 Maharai+ mehn Netopa kadaudok en Sera+ me kaeisek en kaun ong kaeisek en sounpwong, oh aramas 24,000 mi nan eh pwihn. 14 Penaia+ mehn Piradon kadaudok en Epraim me kaeisek ehun kaun ong kaeisek ehun sounpwong, oh aramas 24,000 mi nan eh pwihn. 15 Eldai mehn Netopa kadaudok en Odniel me kaeisek riaun kaun ong kaeisek riaun sounpwong, oh aramas 24,000 mi nan eh pwihn.
16 Iet kaunen keinek en Israel kan: keinek en Reupen, Elieser nein Sikri me kaun; keinek en Simion, Sepataia nein Maaka; 17 keinek en Lipai, Asapaia nein Kemuel; kadaudok en Aaron, Sadok; 18 keinek en Suda, Elihu,+ emen rien Depit; keinek en Isakar, Omri nein Maikel; 19 keinek en Sepulon, Ismaia nein Opadaia; keinek en Napdali, Serimod nein Asriel; 20 keinek en Epraim, Osea nein Asasaia; elep keinek en Manase, Soel nein Pedaia; 21 elep keinek en Manase nan Kilead, Iddo nein Sekaraia; keinek en Pensamin, Saasiel nein Apner;+ 22 keinek en Dan, Asarel nein Seroham. Ih irail pwukat me lapalap en keinek en Israel.
23 Depit sohte wadekedi irail kan me mahki sounpar 20 kohdi, pwehki Siohwa ketin inoukihda en wiahiong Israel en tohtohla duwehte usuhn nanleng.+ 24 Sohap nein Seruaia eri tepida wadawad, ahpw e sohte kanekehla; oh sapwellimen Koht engieng ahpw kohwong Israel* pwehki met,+ oh uwen tohto me wadawadedi ko sohte ntingdi nan pwuhken poadopoad en Nanmwarki Depit.
25 Asmaped nein Adiel me kin apwalih en nanmwarki wasahn nahk dipwisou kesempwal kan.+ Sonadan nein Usaia me kin apwalih imwen nahk kan* me mi nan mohs kan, nan kahnimw kan, nan kisin kahnimw kan oh nan imwen doulik kan. 26 Esri nein Kilep me kin apwalih tohndoadoahk kan me kin koadoahke mwahto. 27 Simei mehn Rama me kin apwalih mwetin kreip kan; Sapdi mehn Sipmod me kin apwalih wasa me kin nekidala wain kan. 28 Paal-anan mehn Kider me kin apwalih mwetin olip kan oh tuhke sikamor* kan+ nan Sepihla;+ Sohas me kin apwalih wasa me kin nekidala leh kan. 29 Sitrai mehn Saron+ me kin apwalih pelin kou kan me kin mwengemwenge nan Saron, oh Sapad nein Adlai me kin apwalih pelin kou kan nan wasa patapat en wahu* kan. 30 Opil mehn Ismael me kin apwalih kamel kan; Sedeia mehn Meronod me kin apwalih dongki* kan. 31 Sasis mehn Akar me kin apwalih pelin sihpw oh kuht kan. Irail pwukat koaros kaun kei me kin apwalih en Nanmwarki Depit kepwe kan.
32 Sonadan,+ nein rien Depit, wia sounkaweid men, ohl emen me ahneki dehde mwahu oh wia sekteri men, oh Seheiel nein Akmoni me kin apwalih nein nanmwarkio pwutak kan.+ 33 Ahidopel+ me sounkaweid ong nanmwarkio, oh Usai+ mehn Ark me wia kompoakepahn* nanmwarkio. 34 Mwurin Ahidopel, Sehoiada nein Penaia,+ oh pil Apaiadar+ wiliandi ih; oh Sohap+ me wia kaunen nein nanmwarkio karis en sounpei kan.