Melkahka kan
KERIAUN PWUHK
(Melkahka kan 42-72)
Ong sounpihtih keseng. En kadaudok en Kora kan melkahka.+ Maskil.*
42 Duwehte tie men eh kin ngoangki nim pilen piletik kan,
Maing Koht, ih duwen ei kin ngoangki papah komwi.
2 Duwehte aramas men me kin men nimpil, ih duwen ei kin uhdahn anahne Koht, Koht ieias.+
Iahd me I kak patohdo oh uh mwohn silangin Koht?+
3 Pilen mesei kat wiahla kenei mwenge nin rahn oh nipwong;
Rahn ehu pwon, aramas akan kin kapailokehkin ie: “Ia omw Kohten?”+
4 I kin tamataman mepwukat, I kin kasalehiong komwi ei pepehm,
Mie pak me I iang pokon ehu oh alu;
I kin alu wawai mwohrail kolahng tehnpesen Koht,
Ni ngilen peren oh kapingkalahngan,
Ngilen pokon ehu me wiewia kasarawi ehu.+
5 Dahme sohkilahr ei koapworopwor?+
Dahme I kin nohn pwunodki?
6 Maing ei Koht, solahr ei koapworopwor.+
7 I kin rong ngilen ngirisek en pihl kan
Iei ngilen sapwellimomwi tenihr kan.
Sapwellimomwi ilok sawa kan koaros koaduhpwalihiedier.+
8 Siohwa pahn ketin kasalehiong ie sapwellime limpoak loalopwoat nin rahn,
Oh I pahn kokoulki duwen ih nipwong—kapakap ehu ong Koht me ketikihong ie mour.+
9 I pahn patohwanohng Koht, ei paipalapo:
“Dahme komw ketin likidmeliekiniehla?+
Dahme kahrehda I en nsensuwed alialuseli pwehki kalokolok sang ei imwintihti?”+
10 Ei imwintihti kan kin kapailoke ie ni kailok;*
Rahn ehu pwon re kin kapailokehkin ie: “Ia omw Kohten?”+
11 Dahme sohkilahr ei koapworopwor?
Dahme I kin nohn pwunodki?