Keieun Kronikel

17 Ni ahnsowohte me Depit soandier nan pein tehnpese, e ahpw ndaiong soukohp Nadan:+ “I kin koukousoan nan ihmw me wiawihkihda sidar,+ a kohpwahn inou lap en Siohwa kin mi nan ihmw likou ehu.”+ 2 Nadan ahpw sapengki Depit: “Wia dahme mi nan omw mohngiong pwe Koht mehlelo kin ketin ieiang uhk.”

3 Pwohngohte, Koht ketin mahsanihong Nadan: 4 “Kohwei oh padahkihong ei ladu Depit, ‘Iet me Siohwa ketin mahsanihen: “Kaidehn kowe me pahn kauwadahng ie tehnpas ehu pwe I en kousoan loale.+ 5 Pwe I sohte kin kousoan nan tehnpas ehu sangete rahn me I kahluwahdo Israel lel rahnwet, ahpw I kin pousehlahte keseu sang ehu impwal lel ehu impwal oh sang ehu impwal sarawi lel ehu impwal sarawi.*+ 6 Erein ahnsowo pwon me I kin ieiang Israel pwon, mie pak me I ndahla mehkot ong sounkopwung en Israel kan me I idihadahr ren apwalih nei aramas akan, oh nda: ‘Dahme kumwail sohte kauwekidahng ie ehu tehnpas me wiawihkihda sidar?’”

7 “Eri ndaiong ei ladu Depit met, ‘Iet me Siohwa kaunen karis en sounpei ketin mahsanih: “I ketikihsang uhk nan mohs akan, sang omw kin apwahpwalih pelinmen kan, pwe ken wiahla kaunen nei aramas en Israel kan.+ 8 Oh I pahn ieiang uhk wasa koaros me ke pahn kohla ie,+ oh I pahn kasohrehsang* omw imwintihti kan koaros mwohmw,+ oh I pahn kahrehiong edomwen en duwehte eden aramas lapalap kan en sampah.+ 9 I pahn pilada ehu wasa ong nei aramas en Israel kan oh koasoaneiraildi, oh re pahn kousoanla mwo oh sohla me pahn lidere irail; oh aramas suwed kan sohla pahn pwurehng kaloke irail* duwehte me re kin wia mahso,+ 10 sang ni rahn me I idihada sounkopwung kan ong nei aramas en Israel kan.+ Oh I pahn kalowehdi omw imwintihti kan koaros.+ Oh I pil mahsanihong uhk, ‘Siohwa pahn ketin wiahiong omw peneinei en wiahla peneinei en nanmwarki ehu.’

11 “‘“Ni omw rahn akan eh pahn imwisekla oh ke pahn kohla rehn semomw mehn mahs ako, I ahpw pahn kihda kadaudokomw men me pahn kohdo mwurimw, emen noumw pwutak kan,+ oh I pahn kauwada oh katengehdi eh manaman en nanmwarki.+ 12 Ih me pahn kauwada tehnpas ehu ong ie,+ oh I pahn kauwada teng mwoale kohkohlahte.+ 13 I pahn wiahla seme oh e pahn wiahla nei pwutak.+ I sohte pahn kihsang ei limpoak loalopwoat reh+ duwehte ei kihsangehr rehn nanmwarkio me momour mwohmw.+ 14 I pahn idihada ih nan tehnpesei oh nan ei wehi kohkohlahte,+ oh mwoale pahn mihmi kohkohlahte.”’”+

15 Nadan eri padahkihong Depit mahsen pwukat koaros oh kasansal wet pwon.

16 Nanmwarki Depit eri patohla oh patohdi mwohn silangin Siohwa oh patohwan: “Ihs ngehi, Maing Siohwa Koht? Oh dahkot ei peneinei me komw ketin wiahkihong ie mepwukat koaros?+ 17 Mwomwen me met sohte itar, Maing Koht, komwi pil ketin mahsanih duwen kadaudok en omwi laduet lellahng ni ahnsou reirei ehu me kohkohdo,+ oh Maing Siohwa Koht, komw ketin wiahkinielahr emen me uhdahn pahn waunla.* 18 Dahme omwi laduet Depit pil kak patohwanohng komwi duwen wahu me kohieng ie, ni omwi uhdahn mwahngih omwi laduet?+ 19 Maing Siohwa, pwehki sapwellimomwi laduet oh nin duwen kupwuromwien,* komw ketin wiadahr soahng kapwuriamwei pwukat koaros sang ni omwi ketin kasalehda omwi lapalap.+ 20 Maing Siohwa, sohte emen me duwehte komwi,+ oh sohte Koht emen likin komwi;+ soahng koaros me se rongkiher salengat ka kadehdedahr met. 21 Oh mehnia wehi nin sampah me duwehte sapwellimomwi aramas en Israel kan?+ Koht mehlelo ketila oh ketin kasaledekirailla* nin duwen sapwellime aramas.+ Komw ketin kahrehiong mwaromwi en ndandla sang ni omwi wiewia manaman kan me inenen kapwuriamwei+ oh ketin pwakihasang wehi kan mwohn sapwellimomwi aramas akan+ me komw ketin kasaledekala* sang Isip. 22 Komw ketin wiahkihla mehn Israel kan sapwellimomwi aramas kohkohlahte;+ oh komwi, Maing Siohwa, ketin wialahr arail Koht.+ 23 Eri, Maing Siohwa, komwi en ketin kapwaiada inou me komw ketin wiadahr me pid sapwellimomwi laduet oh kadaudoke kohkohlahte, oh komwi en ketin wia duwehte me komw ketin inoukidahr.+ 24 Mwaromwi en mihmihte* oh lapalapala+ kohkohlahte, pwe aramas akan en patohwan, ‘Siohwa kaunen karis en sounpei, Koht en Israel iei Koht ong Israel,’ oh kadaudok en sapwellimomwi ladu Depit en kokouda teng kohkohlahte mwohn silangomwi.+ 25 Komwi, ei Koht, ketin kasalehiongehr sapwellimomwi laduet kupwuromwi me iei en wiahiong ei peneinei en wiahla peneinei en nanmwarki. Ihme kahrehda sapwellimomwi laduet eh kak wia kapakap wet ong komwi. 26 Eri met, Maing Siohwa, komwi me Koht mehlel, oh komw ketin inoukihongehr sapwellimomwi laduet soahng mwahu pwukat. 27 Eri, komw kupwurkalahngan oh ketin kapaiahda kadaudok en sapwellimomwi laduet, oh en mihmi kohkohlahte mwohn silangomwi, pwe Maing Siohwa, komw ketin kapaiadahr, oh kapai en kin ieiang kohkohlahte.”