LIPAI

1 Oh Siohwa ketin malipe Moses oh mahseniong ih sang nan impwal en mihtingo,+ mahsanih: 2 “Koasoiong mehn Israel kan* oh ndaiong irail, ‘Ma emen kumwail pahn patohwanohng Siohwa meirong ehu sang mahn mand kan, kumwail pahn kihda amwail meirongo sang pelin kou de pelin sihpw.+

3 “‘Ma eh meirongo iei meirong isihs ehu sang pelin kou, e pahn kihda kouwol men me roson mwahu.+ E pahn kihda meirongo sang ni pein nsene+ mwohn silangin Siohwa ni wasahn pedolong en impwal en mihtingo. 4 E pahn pwil peho pohn moangen meirong isihso, oh Koht ahpw pahn ketin kupwurki meirong wet pwehn wia tomw ong ih.

5 “‘Mwuri, koupwul wolo pahn kamakamala mwohn silangin Siohwa, oh samworo kan me iei nein Aaron pwutak kan,+ pahn kihda ntao oh usupihki ntao pohn keilen pei sarawio pwon,+ me mi ni wasahn pedolong en impwal en mihtingo. 6 Re pahn kihsang kilin meirong isihso oh lupukpene.+ 7 Samworo kan, iei nein Aaron pwutak kan, pahn kihdi kisiniei* pohn pei sarawio+ oh koasoanehdi tuwi pohn kisinieio. 8 Samworo kan, iei nein Aaron pwutak kan, pahn koasoanehdi uduk en meirongo me lopdier+ iangahki moangeo oh wihe ko* pohn tuwi me mi pohn kisiniei en pei sarawio. 9 Mwasahle kan oh neh kan* pahn wideudkihda pihl, oh samworo pahn wiahiong mepwukat koaros en edinieida pohn pei sarawio nin duwen meirong isihs ehu, meirong ehu sang kisiniei, pwoh kansenamwahu ehu ong Siohwa.+

10 “‘Ma eh meirongo ong meirong isihs ehu sang pelinmen,+ sang sihpw wol pwulopwul kan de kuht kan, e pahn kihda mahn wol men me roson mwahu.+ 11 E pahn kamakamala ni paliepeng en pei sarawio mwohn silangin Siohwa, oh samworo kan, iei nein Aaron pwutak kan, pahn usupihki ntao pohn keilen pei sarawio pwon.+ 12 E pahn lupukpene mahno, oh iangahki moangeo oh wihe ko,* samworo pahn koasoaneiraildi pohn tuwi ko pohn kisiniei en pei sarawio. 13 E pahn widenkihda mwasahle ko oh neh ko* pihl, oh samworo pahn kihda mepwukat koaros oh wiahiong met en edinieida pohn pei sarawio. Met iei meirong isihs ehu, meirong ehu sang kisiniei, pwoh kansenamwahu ehu ong Siohwa.

14 “‘Ahpw, ma e patohwanohng Siohwa menpihr kan nin duwen meirong isihs ehu, e pahn kihda eh meirongo sang mwuroi kan de pitsin pwulopwul kan.+ 15 Samworo pahn kihda menpihro pohn pei sarawio oh pirer tepinwereo oh wiahiong met en edinieida pohn pei sarawio, ahpw eh ntao pahn kakerekerdi pohn keilen pei sarawio. 16 E pahn kihsang edin mwenge me mi ni tepinwereo oh wune ko oh kesehla limwahn pei sarawio, ni palimese, wasahn pehs ko.*+ 17 E pahn dapengpeseng menpihro nanpwungen eh pehn pihr ko ahpw e sohte pahn pwalangpeseng ni pali riau. Samworo eri pahn wiahiong met en edinieida pohn pei sarawio pohn tuwi ko me mi pohn kisinieio. Met iei meirong isihs ehu, meirong ehu sang kisiniei, pwoh kansenamwahu ehu ong Siohwa.

2 “‘Eri ma mehmen* pahn kihda meirong en krein*+ ong Siohwa, eh meirongo pahn pilawa amas mwahu, oh e pahn widekihong leh powe oh kihong warpwohmwahu pwetepwet* powe.+ 2 E ahpw pahn wahdo rehn samworo kan, iei nein Aaron pwutak kan, oh samworo pahn ale oaroahr en pilawa amas mwahwo oh leho oh koaros warpwohmwahu pwetepweto, oh e pahn wiahiong met en edinieida nin duwen wiliepen meirongo pwon+ pohn pei sarawio, meirong ehu sang kisiniei, pwoh kansenamwahu ehu ong Siohwa. 3 Luhwen meirong en kreino pahn kohieng Aaron oh nah pwutak kan+ nin duwen mehkot me uhdahn sarawi+ sang ni meirong kisiniei kan ong Siohwa.

4 “‘Ma ke kihda meirong en krein ehu me umwda, e pahn wiawihdahsang pilawa amas mwahu, lopwon me mwomwen rihng me sohte doal ihs ahpw doal leh, oh pilawa menipinip me sohte doal ihs me irihrkihla leh.+

5 “‘Ma omw meirongo iei meirong en krein ehu me kuk pohn mete patapat,+ e pahn wiawihdahsang pilawa amas mwahu me sohte doal ihs ahpw doal leh. 6 E pahn pilitikpeseng, oh ke pahn widekihong leh powe.+ Met iei meirong en krein.

7 “‘Ma omw meirongo iei meirong en krein ehu me kuk nan mehn pirain, e pahn wiawihdahsang pilawa amas mwahu me doal leh. 8 Ke pahn patohwanohng Siohwa meirong en kreino me wiawihdahsang mepwukat, oh e pahn kohieng samworo, me pahn walahng meirongo limwahn pei sarawio. 9 Oh samworo pahn kihsang ekis meirong en kreino nin duwen wiliepen meirongo pwon+ oh wiahiong met en edinieida pohn pei sarawio nin duwen meirong ehu sang kisiniei, pwoh kansenamwahu ehu ong Siohwa.+ 10 Luhwen meirong en kreino pahn kohieng Aaron oh nah pwutak kan nin duwen mehkot me uhdahn sarawi sang ni meirong kisiniei kan ong Siohwa.+

11 “‘Meirong en krein me ke patohwanohng Siohwa sohte pahn doal ihs,+ pwe ke sohte pahn wiahiong ihs* de pilen wahntuhke kan* en edinieida nin duwen meirong ehu sang kisiniei ong Siohwa.

12 “‘Ke pahn patohwanohng Siohwa mepwukat nin duwen meirong en tepin wahnsahpw,+ ahpw mepwukat sohte pahn wisiklahng pohn pei sarawio pwehn wiahda pwoh kansenamwahu.

13 “‘Meirong en krein koaros me ke wiahda pahn doalki soahl; oh ke dehr manokehla doaloahki soahl omw meirong en kreino, soahl me pahn katamankin uhk sapwellimen Koht inou lap. Ke pahn kihong soahl nan omw meirong koaros.+

14 “‘Ma ke patohwanohng Siohwa meirong en krein sang tepin wahnsahpw, ke pahn kihda krein kapw me inihn pohn kisiniei, krein kapw me ngidarpene ni pisalap, nin duwen meirong en krein sang omw tepin wahnsahpw.+ 15 Ke pahn kihong leh powe oh kihong warpwohmwahu pwetepwet powe. Met iei meirong en krein. 16 Samworo pahn wiahiong met en edinieida nin duwen wiliepen meirongo pwon,+ me iei, ekei krein pisalap ko oh leho iangahki koaros warpwohmwahu pwetepweto, nin duwen meirong ehu sang kisiniei ong Siohwa.

3 “‘Ma eh meirongo iei meirong en kaminimin ehu*+ oh ma e kihda meirongo sang pelin kou, mehnda ma ohl de lih men, e pahn kihda mwohn silangin Siohwa mahn men me roson mwahu. 2 E pahn pwil peho pohn moangen eh meirongo, oh mahno pahn kamakamala ni wasahn pedolong en impwal en mihtingo; oh samworo kan, iei nein Aaron pwutak kan, pahn usupihki ntao pohn keilen pei sarawio pwon. 3 E pahn kihda ekei wasa en meirong en kaminimino nin duwen meirong ehu sang kisiniei ong Siohwa:+ wih+ me pwaindi mwasahle ko, wih koaros me kapil mwasahle ko, 4 oh mwidihlik riauo iangahki wih ko me mi pohn mwidihlik ko me mi limwahn lukopeo. E pil pahn kihsang wih en eho iangahki mwidihlik ko.+ 5 Nein Aaron pwutak ko pahn wiahiong mepwukat en edinieida pohn pei sarawio, pohn meirong isihs me mi pohn tuwi ko me mi pohn kisinieio;+ met iei meirong ehu sang kisiniei, pwoh kansenamwahu ehu ong Siohwa.+

6 “‘Ma e patohwanohng Siohwa sihpw men de kuht men nin duwen meirong en kaminimin ehu, e pahn kihda mahn ohl de lih me roson mwahu.+ 7 Ma e pahn meirongki sihpw wol pwulopwul men, eri e pahn kihda mwohn silangin Siohwa. 8 E pahn pwil peho pohn moangen eh meirongo, oh mahno pahn kamakamala mwohn impwal en mihtingo. Nein Aaron pwutak kan pahn usupihki ntao pohn keilen pei sarawio pwon. 9 E pahn kihda wih sang ni meirong en kaminimino nin duwen meirong ehu sang kisiniei ong Siohwa.+ E pahn kihsang pwadaiki wiho pwon me mi limwahn tihnsewe, wih me pwaindi mwasahle kan, wih koaros me kapil mwasahle kan, 10 oh mwidihlik riauo iangahki wih ko me mi pohn mwidihlik ko me mi limwahn lukopeo. E pil pahn kihsang wih en eho iangahki mwidihlik ko.+ 11 Oh samworo pahn wiahiong mepwukat en edinieida pohn pei sarawio nin duwen konot,* meirong ehu sang kisiniei ong Siohwa.+

12 “‘Ma eh meirongo iei kuht men, eri e pahn kihda mwohn silangin Siohwa. 13 E pahn pwil peho pohn moangen eh meirongo, oh mahno pahn kamakamala mwohn impwal en mihtingo, oh nein Aaron pwutak kan pahn usupihki ntao pohn keilen pei sarawio pwon. 14 Wasa me e pahn kihda nin duwen eh meirong sang kisiniei ong Siohwa iei wih me pwaindi mwasahle kan, wih koaros me kapil mwasahle kan,+ 15 oh mwidihlik riauo iangahki wih ko me mi pohn mwidihlik ko me mi limwahn lukopeo. E pil pahn kihsang wih en eho iangahki mwidihlik ko. 16 Samworo pahn wiahiong mepwukat en edinieida pohn pei sarawio nin duwen konot,* meirong ehu sang kisiniei, pwoh kansenamwahu. Wih koaros iei sapwellimen Siohwa.+

17 “‘Met iei koasoandi poatopoat ehu ong kumwail oh kadaudokamwail kan, nan amwail wasahn kousoan kan koaros: Kumwail sohte douluhl pahn tungoale wih de nta.’”+

4 Siohwa ketin doula mahsanihong Moses: 2 “Ndaiong mehn Israel kan, ‘Ma mehmen* wiahda dihp ni eh sohte nsenki+ oh wia soahng kan me Siohwa ketin kehkehlingki en dehr wia:

3 “‘Ma samworo keidio*+ dipada+ oh kahrehiong aramas akan en pwukoahkihdi dihp, e pahn patohwanohng Siohwa koupwul wol men me roson mwahu nin duwen meirong en dihp ong dihp me e wiahdao.+ 4 E pahn wahdo kouwolo ni wasahn pedolong en impwal en mihtingo+ mwohn silangin Siohwa oh pwil peho pohn moangen kouwolo, oh e pahn kemehla kouwolo mwohn silangin Siohwa.+ 5 Eri, samworo keidio+ pahn ale ekis ntahn kouwolo oh wahlong nan impwal en mihtingo; 6 oh samworo pahn kaduh sendin peho nan ntao+ oh usupihki ekis ntao pahn pak isuh+ mwohn silangin Siohwa mwohn kahdeng en wasa sarawio. 7 Samworo pil pahn kihong ekis ntao ni kod kan en pei sarawi en warpwohmwahwo,+ me mi mwohn silangin Siohwa nan impwal en mihtingo; oh e pahn wudekihdiong luhwen ntahn kouwolo pwon ni poahsoan en pei sarawi en meirong isihso,+ me mi ni wasahn pedolong en impwal en mihtingo.

8 “‘Mwuri e pahn kihsang wih koaros en kouwol en meirong en dihpo, iangahki wih me pwaindi mwasahle ko, wih koaros me kapil mwasahle ko, 9 oh mwidihlik riauo iangahki wih ko me mi pohn mwidihlik ko me mi limwahn lukopeo. Oh e pahn kihsang wih en eho iangahki mwidihlik ko.+ 10 E pahn duwehte dahme kohsang kouwol en meirong en kaminimino.+ Oh samworo pahn wiahiong mepwukat en edinieida pohn pei sarawi en meirong isihso.

11 “‘Ahpw kilin kouwolo oh uduke koaros iangahki moange, neh ko,* mwasahle ko, oh kanengen kapehdeo+— 12 luhwen kouwolo pwon—e pahn wahla likin kahnimpwalo, wasa mwakelekel ehu me pehs kan* kin lekdekla ie, oh e pahn isikala mepwukat pohn tuwi ko nan kisiniei.+ Mepwukat pahn isihsla wasa me pehs ko lekdekla ie.

13 “‘Eri ma mwomwohdisohn Israel pwon pwukoahkihdi dihp ni ar sohte nsenki wiahda dihp ehu,+ ahpw re* sasairki me re wiahda mehkot me Siohwa ketin kehkehlingki ren dehr wia,+ 14 oh mwuhr dihpo sansalda, mwomwohdiso* pahn anahne kihda koupwul wol men ong meirong en dihp oh wahdo mahno mwohn impwal en mihtingo. 15 Ohl mah kan en mwomwohdiso pahn pwil pehrail kan pohn moangen kouwolo mwohn silangin Siohwa, oh kouwolo pahn kamakamala mwohn silangin Siohwa.

16 “‘Mwuri samworo keidio pahn wahdo ekis ntahn kouwolo nan impwal en mihtingo. 17 Samworo pahn kaduh sendin peho nan ntao oh usupihki ekis ntao pahn pak isuh mwohn silangin Siohwa mwohn kahdengo.+ 18 Mwuri e pahn kihong ekis ntao ni kod kan en pei sarawio+ me mi mwohn silangin Siohwa, me mi nan impwal en mihtingo; oh e pahn wudekihdiong luhwen ntahn kouwolo pwon ni poahsoan en pei sarawi en meirong isihso, me mi ni wasahn pedolong en impwal en mihtingo.+ 19 E pahn kihsang wihe koaros oh wiahiong met en edinieida pohn pei sarawio.+ 20 E pahn wiahiong kouwolo duwehte me e wiahiong kouwol teio me wia meirong en dihpo. Ih mwomwen eh pahn wiahn met, oh samworo pahn wiahda tomw ong irail,+ oh irail ahpw pahn ale mahk. 21 E pahn wahla kouwolo likin kahnimpwalo oh isikala, duwehte eh isikala keieun kouwolo.+ Met iei meirong en dihp ehu ong mwomwohdiso.+

22 “‘Ni kaun emen+ eh wiahda dihp ehu ni eh sohte nsenki oh wia mehkot ehu sang nanpwungen soahng koaros me Siohwa eh Koht ketin kehkehlingki en dehr wia oh e pwukoahkihdi dihp, 23 de ma e esehda me e wiahda dihp me uhwong kehkehliko, eri e pahn wahdo kuht wol pwulopwul men me roson mwahu nin duwen eh meirong. 24 E pahn pwil peho pohn moangen kuht pwulopwulo oh kemehla kuhto nan wasa me meirong isihso kin kamakamala ie mwohn silangin Siohwa.+ Met iei meirong en dihp. 25 Samworo pahn ale ekis ntahn meirong en dihpo ni sendin peho oh kihong ni kod kan+ en pei sarawi en meirong isihso, oh e pahn wudekihdiong luhwen ntao ni poahsoan en pei sarawi en meirong isihso.+ 26 E pahn wiahiong wihe koaros en edinieida pohn pei sarawio duwehte wih en meirong en kaminimino;+ oh samworo pahn wiahda tomw ong dipeo, oh e ahpw pahn ale mahk.

27 “‘Ma emen* aramas en sahpwo wiahda dihp ni eh sohte nsenki oh pwukoahkihdi dihp ni eh wiahda ehu rehn soahng kan me Siohwa ketin kehkehlingki en dehr wia,+ 28 de ma e esehda dihp me e wiahdao, eri e pahn wahdo kuht lih pwulopwul men me roson mwahu nin duwen eh meirong ong dihp me e wiahdao. 29 E pahn pwil peho pohn moangen meirong en dihpo oh kemehla meirong en dihpo nan wasaohte me meirong isihso kin kamakamala ie.+ 30 Samworo pahn ale ekis ntahn meirongo ni sendin peho oh kihong ni kod kan en pei sarawi en meirong isihso, oh e pahn wudekihdiong luhwen ntao pwon ni poahsoan en pei sarawio.+ 31 E pahn kihsang wihe koaros,+ duwehte wih ko me kohsang ni meirong en kaminimino,+ oh samworo pahn wiahiong met en edinieida pohn pei sarawio nin duwen pwoh kansenamwahu ehu ong Siohwa; oh samworo pahn wiahda tomw ong ih, oh e ahpw pahn ale mahk.

32 “‘Ahpw ma e meirongki sihmpwul men nin duwen eh meirong en dihp, e pahn wahdo sihmpwul lih men me roson mwahu. 33 E pahn pwil peho pohn moangen meirong en dihpo oh kemehla mahno nin duwen meirong en dihp ehu nan wasa me meirong isihso kin kamakamala ie.+ 34 Samworo pahn ale ekis ntahn meirong en dihpo ni sendin peho oh kihong ni kod kan en pei sarawi en meirong isihso,+ oh e pahn wudekihdiong luhwen ntao pwon ni poahsoan en pei sarawio. 35 E pahn kihsang wihe koaros duwehte eh kin kihsang wih en sihpw wol pwulopwul me wia meirong en kaminimino, oh samworo pahn wiahiong mepwukat en edinieida pohn pei sarawio pohn meirong kisiniei kan ong Siohwa;+ oh samworo pahn wiahda tomw ong ih ong dihp me e wiahdao, oh e ahpw pahn ale mahk.+

5 “‘Ma emen* dipada pwehki eh rongehr pakair ehu pwe en wia kadehde*+ oh ih emen sounkadehde de kilangehr de eseier duwen met oh e sohte kasalehda duwen met, eri e pahn dolung imwilahn eh sapwung.

2 “‘De ni aramas* emen eh pahn doahke mehkot samin, mehnda ma paliwar mehla en mahn lawalo samin men, mahn mand samin men, de mahn samin men me uhdahn tikitik,*+ e saminlahr oh pwukoahkihdi dihp mehnda ma e sehse duwen met. 3 De ma mehmen sairada samin en aramas ni eh sasairki+—mehkot me samin me kak kasaminehla ih—oh mwuhr e esehda met, eri e pwukoahkihdi dihp.

4 “‘De ma mehmen* karuwaru en kahukihla en wia mehkot—mehnda ma en wia mehkot mwahu de suwed, sohte lipilipil dahieu mwo—oh e sasairki duwen met, ahpw e esehda me e karuwaru en kahula, eri e pwukoahkihdi dihp.*+

5 “‘Ma e pwukoahkihdi dihp me pid ehu rehn soahng pwukat, eri e pahn wehkada+ dahme e dipikihdao. 6 E pil pahn patohwanohng Siohwa eh meirong en tomwki dihp ong dihp me e wiahdao,+ me iei, sihmpwul lih men de kuht lih pwulopwul men, ong meirong en dihp ehu. Eri samworo ahpw pahn wiahda tomw ong dipeo.

7 “‘Ahpw, ma e sohte kak kihda sihpw men, e pahn patohwanohng Siohwa mwuroi riemen de pitsin pwulopwul riemen+ nin duwen eh meirong en tomwki dihp ong dipeo, emen ong meirong en dihp a emen ong meirong isihs.+ 8 E pahn wahdo mepwukat rehn samworo, samworo ahpw pahn kihda mahs emen ong meirong en dihp oh pirer moangen menpihro ni tepinwereo, ahpw e sohte pahn dolungasang moangeo. 9 E pahn usupihki ekis ntahn meirong en dihpo pohn keilen pei sarawio, ahpw luhwen ntao pahn kakerekerdi ni poahsoan en pei sarawio.+ Met iei meirong en dihp. 10 E pahn wiahiong meteio nin duwen meirong isihs ehu nin duwen me koasoandiero;+ oh samworo pahn wiahda tomw ong ih ong dihp me e wiahdao, oh e ahpw pahn ale mahk.+

11 “‘Eri ma e sohte kak kihda mwuroi riemen de pitsin pwulopwul riemen, e pahn wahdo eh meirong ong dipe eisek kis ehun ihpah*+ en pilawa amas mwahu ong meirong en dihp. E sohte pahn doaloiong leh de kihong warpwohmwahu pwetepwet* powe, pwe met iei meirong en dihp. 12 E pahn wahdo met rehn samworo, oh samworo pahn ale oaroahr en pilawa amaso nin duwen wiliepen meirongo pwon oh wiahiong met en edinieida pohn pei sarawio pohn meirong kisiniei kan ong Siohwa. Met iei meirong en dihp. 13 Samworo pahn wiahda tomw ong ih ong dihp me e wiahda, ehu rehn dihp ko me sansalda mwoweo, oh e ahpw pahn ale mahk.+ Luhwen meirongo pahn kohieng samworo,+ duwehte meirong en krein.’”+

14 Siohwa ketin doula mahsanihong Moses: 15 “Ma mehmen* wiahda mwekid salelepek ni eh sohte nsenki dipada ong sapwellimen Siohwa soahng sarawi kan,*+ e pahn patohwanohng Siohwa sihpw wol me roson mwahu sang pelin sihpw nin duwen meirong en tomwki dihp;+ pweinen sihpwo mi ni silper sekel* me koasoandier nin duwen wadawad en sekel en wasa sarawio.*+ 16 Oh e pahn kapwungala pweinen dihp me e wiahda ong wasa sarawio oh e pil pahn kapatahiong limakis ehun pweineo.+ E pahn kihong mepwukat rehn samworo, pwe samworo en wiahda tomw+ ong ih ni eh doadoahngki sihpw wol en meirong en tomwki dihpo, oh e ahpw pahn ale mahk.+

17 “Ma mehmen* dipada ni eh wiahda ehu rehn soahng kan me Siohwa ketin kehkehlingki en dehr wia, mehnda ma e sasairki duwen met, e pwukoahkihte dihp oh e pahn dolung imwilahn eh sapwung.+ 18 E pahn wahdo rehn samworo sihpw wol men me roson mwahu sang pelin sihpwo ni uwen pweine me koasoandier, ong meirong en tomwki dihp.+ Eri samworo ahpw pahn wiahda tomw ong sapwung me e wiahdao ni eh sohte nsenki oh sasairki, eri e ahpw pahn ale mahk. 19 Met iei meirong en tomwki dihp. E uhdahn pwukoahkihdi dihp ni eh dipada ong Siohwa.

6 Siohwa ketin doula mahsanihong Moses: 2 “Ma mehmen* dipada oh wiahda mwekid salelepek ong Siohwa+ ni eh pitihedi mehn mpe men me pid mehkot me mehn mpeo likihong ih,+ de mehkot me kohieng ih en kolokol, de e pirapa de widingehdi mehn mpeo, 3 de e diarada mehkot salongala oh e likamwkihda duwen met, oh ma e kahula oh likamwkihda duwen soangen dihp me e wiahda,+ iet me e pahn wiahn: 4 Ma e dipada oh pwukoahkihdi dihp, e pahn anahne kapwurehla dahme e pirapahla, dahme e kulihada, dahme e ale ni widing, dahme mehn mpeo likihong ih, de mehkot salongala me e diarada, 5 de mehkot me e kahula oh likamwkihda, e pahn kapwurehla uwen pweineo pwon,+ oh e pahn kapatahiong limakis ehun uwen pweineo. E pahn kihong me nainekio ni rahn me dipeo sansalda. 6 Oh e pahn wahdo rehn samworo nin duwen eh meirong en tomwki dihp ong Siohwa sihpw wol men me roson mwahu sang pelin sihpwo, me uwehte uwen pweine me koasoandier, ong meirong en tomwki dihp.+ 7 Samworo ahpw pahn wiahda tomw ong ih mwohn silangin Siohwa, oh e pahn alehdi mahk ong soahng sohte lipilipil me e wiahda oh kahrehiong en pwukoahkihdi dihp.”+

8 Siohwa ketin doula mahsanihong Moses: 9 “Kehkehlingkihong Aaron oh nah pwutak kan oh nda, ‘Iet kosonned en meirong isihs:+ Meirong isihso pahn mi pohn kisinieio pohn pei sarawio pwohng ehu pwon lao lel nimenseng, oh kisinieio pahn wie lullul pohn pei sarawio. 10 Samworo pahn likawihada eh likoun doadoahk lineno,+ oh e pahn likawihada lepin rausis* linen.+ Mwuri e pahn kihsang pehs kan*+ en meirong isihso me kisinieio isikala pohn pei sarawio oh kihdiong limwahn pei sarawio. 11 Mwuri e pahn kihsang eh likowo+ oh likawihada likou teio oh wahla pehs ko ni wasa mwakelekel ehu likin kahnimpwalo.+ 12 Kisinieio pahn wie lullul pohn pei sarawio. E sohte pahn kunla. Samworo pahn kin kihong tuwi+ nan kisinieio nimenseng koaros oh koasoanehdi meirong isihso pohn kisinieio, oh e pahn wiahiong wih en meirong en kaminimino en edinieida powe.+ 13 Kisiniei pahn kin wie lullul pohn pei sarawio. E sohte pahn kunla.

14 “‘Eri iet kosonned en meirong en krein:+ Kumwail nein Aaron pwutak kan pahn kihda met mwohn silangin Siohwa mwohn pei sarawio. 15 Emen irail pahn ale oaroahr en pilawa amas mwahu sang meirong en kreino oh ekis leh oh warpwohmwahu pwetepwet* koaros me mi pohn meirong en kreino, oh e pahn wiahiong met en edinieida pohn pei sarawio nin duwen pwoh kansenamwahu ehu ong wiliepen meirongo pwon ong Siohwa.+ 16 Aaron oh nah pwutak kan pahn tungoale dahme luhwehdi.+ Re pahn tungoale nin duwen pilawa me sohte doal ihs nan wasa sarawi ehu. Re pahn tungoale nan wasa me kelepene impwal en mihtingo.+ 17 E sohte pahn umwda iangahki mehkot me doal ihs.+ I kihda met ong pwaisarail sang ei meirong en kisiniei kan.+ Met iei mehkot me uhdahn sarawi,+ duwehte meirong en dihp oh meirong en tomwki dihp. 18 Ohl koaros sang nein Aaron pwutak kan pahn tungoale met.+ Met pahn wia pwaisarail kohkohlahte erein dih kan me pahn kohdo sang ni meirong kisiniei kan ong Siohwa.+ Soahng koaros me pahn sair mepwukat* pahn sarawihla.’”

19 Siohwa pil ketin pwurehng mahsanihong Moses: 20 “Iet meirong me Aaron oh nah pwutak kan pahn patohwanohng Siohwa ni rahn me e keidi:+ eisek kis ehun ihpah*+ en pilawa amas mwahu nin duwen meirong en krein me kin kaukaule wiawi,+ elep nimenseng oh elep nin soutik. 21 Met pahn doal leh oh kuk pohn mete patapat ehu.+ Ke pahn wahdo met ni eh doalkidahr leh oh kihda pilitik en meirong en krein umwda nin duwen pwoh kansenamwahu ehu ong Siohwa. 22 Nanpwungen nein Aaron pwutak kan, samworo keidio me wiliandi ih,+ me pahn wiahda met. Met iei koasoandi poatopoat ehu: E pahn wiahiong meirongo pwon en edinieida ong Siohwa. 23 En samworo meirong en krein koaros pahn pwonte isihsla. Sohte me pahn tungoale.”

24 Siohwa pil ketin pwurehng mahsanihong Moses: 25 “Ndaiong Aaron oh nah pwutak kan, ‘Iet kosonned en meirong en dihp:+ Wasa me meirong isihso kin kamakamala ie,+ ih wasa me meirong en dihpo pil pahn kamakamala ie mwohn silangin Siohwa. Met iei mehkot ehu me uhdahn sarawi. 26 Samworo me kihda meirong wet ong dihp pahn tungoale meirongo.+ E pahn tungoale nan wasa sarawi ehu, nan wasa me kelepene impwal en mihtingo.+

27 “‘Soahng koaros me sair uduk en meirongo pahn sarawihla, oh ni emen eh pahn kasikdahng ekis nta ni eh likou, likowo pahn lopwolopwda nan wasa sarawi ehu. 28 Einpwoat me wiawihkihda pwehl me uduko pwoail loale, kumwail pahn pwalangpeseng. Ahpw ma kumwail pwoail nan einpwoat prons ehu, eri kumwail pahn irisada oh widenki pihl.

29 “‘Ohl koaros me wia samworo pahn tungoale uduko.+ Met iei mehkot me uhdahn sarawi.+ 30 Ahpw, sohte me pahn tungoale meirong en dihp ma ekis ntao wisikdohng nan impwal en mihtingo pwehn wiahda tomw nan wasa sarawio.+ E pahn isihsla.

7 “‘Iet kosonned en meirong en tomwki dihp:+ Met iei mehkot me uhdahn sarawi. 2 Re pahn kemehla meirong en tomwki dihpo nan wasa me re kin kemehla meirong isihs ko, oh eh ntao+ pahn usupiong pohn keilen pei sarawio pwon.+ 3 E pahn kihda wihe koaros, iangahki pwadaiki wiho,+ wih me pwaindi mwasahle ko, 4 oh mwidihlik riau ko iangahki wih ko me mi limwahn lukopeo. E pil pahn kihsang wih en eho iangahki mwidihlik ko.+ 5 Samworo pahn wiahiong mepwukat en edinieida pohn pei sarawio nin duwen meirong ehu sang kisiniei ong Siohwa.+ Met iei meirong en tomwki dihp. 6 Ohl koaros me wia samworo pahn tungoale uduko,+ oh re pahn tungoale nan wasa sarawi ehu. Met iei mehkot me uhdahn sarawi.+ 7 Kosonned me pid meirong en dihp pil duwehte meirong en tomwki dihp; uduk en meirongo pahn kohieng samworo me wiahda tomw ni eh doadoahngki met.+

8 “‘Ni samworo eh pahn wiahda meirong isihs ong emen, kilin+ meirong isihso me aramaso kihong samworo pahn wiahla pwaisen samworo.

9 “‘Meirong en krein koaros me umwda de kuk nan mehn pirain de pohn mete patapat+ pahn kohieng samworo me wia meirongo. E pahn wiahla pwaise.+ 10 Ahpw meirong en krein koaros me doal leh+ de madekeng+ pahn kohieng nein Aaron pwutak kan koaros; met pahn nehne pahrek nanpwungarail.

11 “‘Eri iet kosonned en meirong en kaminimin+ me aramas emen pahn patohwanohng Siohwa: 12 Ma e kihda met ong kasalepen eh kapingkalahngan,+ patehngete meirong en kapingkalahngan, e pahn kihda lopwon me mwomwen rihng me sohte doal ihs ahpw doal leh, pilawa menipinip me sohte doal ihs me irihrkihla leh, oh lopwon me mwomwen rihng me wiawihkihda pilawa amas mwahu, me kapalda mwahu oh doalkihda leh. 13 E pahn kihda eh meirongo iangahki lopwon me mwomwen rihng me doal ihs oh eh meirong en kaminimin en kapingkalahngan. 14 E pahn kihda ehuehu soangen pilawa* nin duwen meirong sarawi ehu ong Siohwa sang mepwukat; met pahn kohieng samworo me usupihki ntahn meirong en kaminimin ko pohn pei sarawio.+ 15 E pahn tungoale uduken eh meirong en kaminimin ko, me iei meirong en kapingkalahngan, ni rahn me e meirongkihla. E sohte pahn nekidala ekis lel nimenseng en mandahn rahno.+

16 “‘Ma meirong me e wiahda iei meirong en kahula ehu+ de meirong ehu sang ni pein nsene,+ e pahn tungoale ni rahn me e kihda meirongo, oh e pil kak tungoale luhwen uduko mandahn rahno. 17 Ahpw dahme luhwehdi sang uduken meirongo ni kesiluhwen rahn pahn isihsla.+ 18 Ahpw ma emen pahn tungoale uduken eh meirong en kaminimino ni kesiluhwen rahn, Koht sohte pahn ketin kupwurki ih me kihda meirongo. E sohte pahn paiekihda met; e wia mehkot kasaut, aramaso* me tungoale met pahn dolung imwilahn eh sapwung.+ 19 Sohte me pahn tungoale uduk me sair mehkot samin. Uduko pahn isihsla. Mehmen me mwakelekel kak tungoale uduk mwakelekel.

20 “‘Ahpw mehmen* me samin oh tungoale uduk en meirong en kaminimin, me iei ong Siohwa, aramaso* pahn anahne kamakamala.+ 21 Ma mehmen* doahke mehkot samin, sohte lipilipil samin en aramas+ de mahn samin+ de mehkot me samin oh kasaut,+ oh tungoale ekis uduken meirong en kaminimino, me iei ong Siohwa, aramaso* pahn anahne kamakamala.’”

22 Siohwa ketin doula mahsanihong Moses: 23 “Ndaiong mehn Israel kan, ‘Kumwail sohte pahn tungoale wih+ en kouwol men de sihpw wol pwulopwul men de kuht men. 24 Wih en mahn me dierek mehla oh wih en mahn me emen mahn kemehla kak kadoadoahk ong soahng teikan, ahpw kumwail sohte mwahn pahn tungoale met.+ 25 Pwe mehmen me tungoale wih en mahno me e kihda nin duwen meirong ehu sang kisiniei ong Siohwa pahn anahne kamakamala.

26 “‘Kumwail sohte pahn tungoale nta+ nan amwail wasahn kousoan kan, mehnda ma ntahn menpihr kan de ntahn mahn akan. 27 Mehmen* me tungoale nta pahn anahne kamakamala.’”+

28 Siohwa ketin doula mahsanihong Moses: 29 “Ndaiong mehn Israel kan, ‘Mehmen me patohwanohng Siohwa eh meirong en kaminimin pahn patohwanohng Siohwa ekis kisehn eh meirong en kaminimino.+ 30 Pein ih pahn wahdo wiho+ iangahki mwaremwareo nin duwen meirong ehu sang kisiniei ong Siohwa, oh e pahn kamwakid kohwei kohdo nin duwen meirong en oaloahl ehu+ mwohn silangin Siohwa. 31 Samworo pahn wiahiong wiho en edinieida pohn pei sarawio,+ ahpw mwaremwareo pahn kohieng Aaron oh nah pwutak kan.+

32 “‘Kumwail pahn kihong samworo palimaun en neho nin duwen meirong sarawi sang amwail meirong en kaminimin ko.+ 33 Nein Aaron pwutak me patohwanohng Koht ntahn meirong en kaminimino oh wiho pahn ale palimaun en neho nin duwen pwaise.+ 34 Pwe I kin ale mwaremwaren meirong en oaloahlo oh nehn meirong sarawio sang ahn mehn Israel kan meirong en kaminimin kan, oh I kin kihong mepwukat rehn samworo Aaron oh nah pwutak kan nin duwen koasoandi poatopoat ehu ong mehn Israel kan.+

35 “‘Met iei wasa me kohsang ni meirong kisiniei kan ong Siohwa me pahn katohrohrla ong samworo kan, ong Aaron oh nah pwutak kan, ni rahn me e kasapwilirailda pwe ren papah Siohwa nin duwen samworo kei.+ 36 Siohwa ketin kehkehlingki en kihong irail pwais wet sang rehn mehn Israel kan ni rahn me e keieiraildi.+ Met iei koasoandi poatopoat ehu ong irail oh kadaudokarail kan.’”

37 Ih met kosonned me pid meirong isihs,+ meirong en krein,+ meirong en dihp,+ meirong en tomwki dihp,+ meirong en kesepwil,+ oh meirong en kaminimin,+ 38 duwehte me Siohwa ketin kehkehlingkihong Moses pohn Nahna Sainai+ ni rahn me e kehkehlingkihong mehn Israel kan ren patohwanohng Siohwa arail meirong kan nan sapwtehn en Sainai.+

8 Siohwa ketin doula mahsanihong Moses: 2 “Kahrehdo Aaron iangahki nah pwutak kan,+ oh wahdo likou kan,+ lehn kei,+ kouwol en meirong en dihp, sihpw wol riemen, oh kopwoun pilawa me sohte doal ihs,+ 3 oh kapokonepene mwomwohdiso pwon ni wasahn pedolong en impwal en mihtingo.”

4 Moses eri kapwaiada duwehte me Siohwa ketin kehkehlingkihong ih, oh mwomwohdiso pokonpene ni wasahn pedolong en impwal en mihtingo. 5 Moses eri ndaiong mwomwohdiso: “Iet me Siohwa ketin kehkehlingkihong kitail en wia.” 6 Moses eri kahrehdo Aaron oh nah pwutak ko wasao oh widenirailkihda pihl.+ 7 Mwurin mwo e kalikawihkihda Aaron likou reireio,+ pirekipene ih katengo,+ kalikawihkihda ih likou reirei me sohte peho,+ oh kidahng ihpodo+ powe oh pirehkihdi kateng peipeida*+ en ihpodo, oh pirehdi teng ni paliwereo. 8 Mwuri e kidahng perehpen mwaremware+ powe oh kihong Urim oh Dumim+ ni perehpen mwaremwareo. 9 Ih eri kidahng lisoaropo+ pohn moangeo, oh kihong mete patapat lingaling kohlo mwohn lisoaropo, kilel en kasarawio,*+ duwehte me Siohwa ketin kehkehlingkihong Moses.

10 Moses eri ale lehn keio oh keiehdi impwal sarawio oh mehkoaros me mi loale+ oh kasarawihala mepwukat. 11 Mwurin mwo e usupihki ekis leho pahn pak isuh pohn pei sarawio oh keiehdi pei sarawio oh dipwisawi koaros oh peisino oh neh ko pwehn kasarawihala mepwukat. 12 Ih eri wudekihdi ekis lehn keio pohn moangen Aarono oh keiehdi ih pwehn kasarawihala.+

13 Moses eri kahrehdo nein Aaron pwutak ko wasao oh kalikawihkinirailda likou reirei ko oh pirehkinirailpene kateng ko oh kidahng* likoun moange ko pohrail,+ duwehte me Siohwa ketin kehkehlingkihong Moses.

14 Ih eri wahdo kouwol en meirong en dihp, oh Aaron oh nah pwutak ko pwil pehrail ko pohn moangen kouwol en meirong en dihpo.+ 15 Moses eri kemehla kouwolo oh ale ntao+ ni eh kaduh sendin peho oh kihong pohn kod kan en pei sarawio ni keimw ko koaros, oh e kamwakelehda pei sarawio sang dihp, ahpw e wudekihdiong luhwen ntao ni poahsoan en pei sarawio, pwehn kasarawihala pei sarawio pwe en wiahda tomw powe. 16 Mwurin mwo e ale wih koaros me mi ni mwasahle ko, wih en eho, oh mwidihlik riau ko oh wihe ko, oh Moses wiahiong mepwukat en edinieida pohn pei sarawio.+ 17 Luhwen kouwolo, kilio, udukeo, oh kanengen kapehdeo isihsla likin kahnimpwalo,+ duwehte me Siohwa ketin kehkehlingkihong Moses.

18 Ih eri wahdo sihpw wol en meirong isihso limwahrail, oh Aaron oh nah pwutak ko pwil pehrail ko pohn moangen sihpw wolo.+ 19 Moses eri kemehla sihpw wolo oh usupihki ntao pohn keilen pei sarawio pwon. 20 E lupukpene sihpw wolo, oh Moses wiahiong moangeo, uduke ko, oh wih ko* en edinieida. 21 E widenkihda mwasahle ko oh neh ko* pihl, oh Moses wiahiong sihpw wolo pwon en edinieida pohn pei sarawio. Met iei meirong isihs ehu nin duwen pwoh kansenamwahu ehu. Met iei meirong ehu sang kisiniei ong Siohwa, duwehte me Siohwa ketin kehkehlingkihong Moses.

22 Ih eri wahdo keriemen en sihpw wolo, sihpw wol en kesepwilo,+ oh Aaron oh nah pwutak ko pwil pehrail ko pohn moangen sihpw wolo.+ 23 Moses eri kemehla sihpw wolo oh ale ekis ntao oh kihong ni palimaun en imwin salengen Aaron oh ni palimaun en sendilap en peho oh ni palimaun en sendilap en neho. 24 Mwuri Moses kahrehdo nein Aaron pwutak ko mwowe oh kihong ekis ntao ni palimaun en imwin salengarail ko oh ni palimaun en sendinpehlaparail ko oh ni palimaun en sendinnehlaparail ko; ahpw Moses usupihki luhwen ntao pohn keilen pei sarawio pwon.+

25 Ih eri ale wiho, pwadaiki wiho, wih koaros me mi ni mwasahle ko, wih en eho, mwidihlik riau ko oh wihe ko, oh palimaun en neho.+ 26 E kihsang nan kopwoun pilawa me sohte doal ihso me mi mwohn silangin Siohwa pilawa ehu me mwomwen rihng me sohte doal ihs,+ pilawa ehu me mwomwen rihng me doal leh,+ oh pilawa menipinip ehu. Ih eri kihdiong mepwukat pohn wih ko oh pohn palimaun en neho. 27 Mwurin mwo e kihong mepwukat koaros nan pehn Aaron oh nan pehn nah pwutak ko oh tepida kamwakid kohwei kohdo nin duwen meirong en oaloahl ehu mwohn silangin Siohwa. 28 Moses eri ale mepwukat sang nan pehrail ko oh wiahiong ren edinieida pohn pei sarawio pohn meirong isihso. Mepwukat iei meirong en kesepwil nin duwen pwoh kansenamwahu ehu. Met iei meirong ehu sang kisiniei ong Siohwa.

29 Moses eri ale mwaremwareo oh kamwakid kohwei kohdo nin duwen meirong en oaloahl ehu mwohn silangin Siohwa.+ Mwaremwaren sihpw wol ong kesepwil en samworo wiahla pwaisen Moses, duwehte me Siohwa ketin kehkehlingkihong Moses.+

30 Moses eri ale ekis lehn keio+ oh ekis nta me mi pohn pei sarawio oh usupihki Aaron oh eh likou ko oh pil nah pwutak ko me mi reh oh arail likou ko. Ih eri kasarawihala Aaron oh eh likou ko oh nah pwutak ko+ oh arail likou ko.+

31 Moses eri ndaiong Aaron oh nah pwutak ko: “Pwoailih+ uduko ni wasahn pedolong en impwal en mihtingo, oh kumwail pahn tungoale met wasao iangahki pilawa me mi nan kopwoun kesepwilo, duwehte kehkehlik me I alehdio, ‘Aaron oh nah pwutak kan pahn tungoale met.’+ 32 Kumwail pahn isikala luhwen uduko oh pilawao.+ 33 Kumwail sohte pahn kohkohsang ni wasahn pedolong en impwal en mihtingo erein rahn isuh, lao rahn akan ong amwail kesepwilo imwisekla, pwehki e pahn reireiki rahn isuh pwehn kasapwilkumwailda nin duwen samworo kei.*+ 34 Siohwa ketin kehkehlingki me kitail en wia dahme kitail wiahier rahnwet pwehn wiahda tomw ong kumwail.+ 35 Kumwail pahn mi ni wasahn pedolong en impwal en mihtingo ni rahn oh nipwong erein rahn isuh+ oh kapwaiada amwail pwukoa ong Siohwa,+ pwe kumwail en dehr mehla; ih kehkehlik wet me I alehdi.”

36 Aaron oh nah pwutak ko eri kapwaiada mehkoaros me Siohwa ketin kehkehlingki, ni eh ketin doadoahngki Moses.

9 Ni kawaluhn rahn,+ Moses ekerodo Aaron oh nah pwutak kan oh ohl mah kan en Israel. 2 E ndaiong Aaron: “Ale emen koupwul ong meirong en dihp+ oh sihpw wol men ong meirong isihs, me roson mwahu, oh patohwanda mepwukat mwohn silangin Siohwa. 3 Ahpw ke pahn ndaiong mehn Israel kan, ‘Ale emen kuht wol ong meirong en dihp oh koupwul men oh sihpw wol pwulopwul men, emenemen sounpar ehu oh roson mwahu, ong meirong isihs, 4 oh emen kouwol oh emen sihpw wol ong meirong en kaminimin kan,+ pwehn meirongki mepwukat mwohn silangin Siohwa, oh meirong en krein+ me doal leh, pwe rahnwet Siohwa pahn ketin pwarohng kumwail.’”+

5 Irail eri wapene dahme Moses kehkehlingki ko mwohn impwal en mihtingo. Mwomwohdiso pwon eri kohdo mwowe oh uh mwohn silangin Siohwa. 6 Oh Moses nda: “Iet me Siohwa ketin kehkehlingkihong kumwail en wia, pwe sapwellimen Siohwa lingan en pwarohng kumwail.”+ 7 Moses eri ndaiong Aaron: “Kohwei ni pei sarawio oh kihda omw meirong en dihp+ oh omw meirong isihs, oh wiahda tomw ong kowe+ oh omw peneinei;* oh kihda en aramas akan meirong,+ oh wiahda tomw ong irail,+ duwehte me Siohwa ketin kehkehlingki.”

8 Aaron eri mwadangete kohla ni pei sarawio oh kemehla koupwul en meirong en dihpo ong ih.+ 9 Nein Aaron pwutak ko eri wahdo ntao+ reh, oh e kaduh sendin peho nan ntao oh kihong ni kod kan en pei sarawio, oh e wudekihdiong luhwen ntao ni poahsoan en pei sarawio.+ 10 E wiahiong wiho oh mwidihlik ko oh wih en eho me kohsang meirong en dihpo en edinieida pohn pei sarawio, duwehte me Siohwa ketin kehkehlingkihong Moses.+ 11 Oh e isikala uduko oh kilio likin kahnimpwalo.+

12 Aaron eri kemehla meirong isihso, oh nein Aaron pwutak ko kihong ih ntao, ih eri usupihki pohn keilen pei sarawio pwon.+ 13 Irail eri kihong ih uduk ko en meirong isihso iangahki moangeo, oh e wiahiong mepwukat en edinieida pohn pei sarawio. 14 Oh pil, e widenda mwasahle ko oh neh ko* oh wiahiong mepwukat en edinieida pohn meirong isihso me mi pohn pei sarawio.

15 Ih eri kihda en aramas akan meirong oh ale kuht en meirong en dihp ong aramas akan oh kemehla oh wiahda meirong en dihp duwehte mehn nin tapio. 16 Oh e kihda meirong isihso oh wiahiong met nin duwen me koasoandiero.+

17 Mwuri e kihda meirong en krein,+ e oarehda ekis krein oh wiahiong en edinieida pohn pei sarawio, patehngete meirong isihs en nimensengo.+

18 Mwurin mwo e kemehla kouwol oh sihpw wol en meirong en kaminimin ong aramas akan. Nein Aaron pwutak ko eri kihong ih ntao, oh e usupihki pohn keilen pei sarawio pwon.+ 19 A wih ko en kouwolo,+ pwadaiki wih en sihpw wolo, wih me pwaindi kepwehn loale kan, mwidihlik ko, oh wih en eho,+ 20 re kihdiong wih pwukat koaros pohn mwaremware ko, oh mwurin mwo e wiahiong wih pwukat en edinieida pohn pei sarawio.+ 21 Ahpw mwaremware ko oh neh palimauno, Aaron kamwakid kohwei kohdo nin duwen meirong en oaloahl ehu mwohn silangin Siohwa, duwehte me Moses kehkehlingki.+

22 Aaron eri kapahla peh ko rehn aramas ako oh kapaiairailda+ oh kohdihdo mwurin eh wiahda meirong en dihp oh meirong isihs oh meirong en kaminimin ko. 23 Moses oh Aaron eri kohlongala nan impwal en mihtingo oh pwureido oh kapaiahda aramas ako.+

Sapwellimen Siohwa lingan eri pwarohng aramas ako koaros,+ 24 oh kisiniei ahpw pwilisang rehn Siohwa+ oh tepida isikala meirong isihso oh wih ko pohn pei sarawio. Ni aramas ako koaros ar kilangada met, re ahpw tepida weriwer oh poaridiong nanpwelo.+

10 Mwuhr nein Aaron pwutak ko Nadap oh Apihu+ ahpw ale neira dewen mwoalus oh kihong kisiniei* loale oh kihong warpwohmwahu+ powe. Ira ahpw tepida meirongki mwohn silangin Siohwa kisiniei keinepwi,+ me e sohte ketin kehkehlingki ira en wia. 2 Kisiniei ehu ahpw kohsang rehn Siohwa oh isikirahla,+ ira eri mehla mwohn silangin Siohwa.+ 3 Moses eri ndaiong Aaron: “Iet me Siohwa ketin mahsanihen, ‘I pahn sarawihla nanpwungen irail kan me karanih ie,+ oh I pahn linganla mwohn aramas koaros.’” Aaron eri nennenlahte.

4 Moses eri ekerodo Misael oh Elisapan, nein Ussiel,+ me Aaron pahn pahpahki, oh ndaiong ira: “Kumwa kohdo wasaht, wahsang riamwa ko mwohn wasa sarawio oh wahla wasa ehu likin kahnimpwalo.” 5 Ira eri kohdo oh wahsang ohl ako ni ara mihmihte nan ara likou reirei, oh wahla wasa ehu likin kahnimpwalo, duwehte me Moses ndaiong ira.

6 Moses eri ndaiong Aaron oh nah pwutak teiko Eliesar oh Idamar: “Kumwail dehpa mweidohng pitenmoangamwail kan en pingida de tehrpeseng amwail likou kan,+ pwe kumwail en dehr mehla oh Koht en dehr ketin engiengda pahn mwomwohdiso wet pwon. Riamwail kan, mwomwohdisohn Israel pwon pahn sengisengki ira me Siohwa ketin kemehkihla kisiniei. 7 Kumwail dehr kohieisang ni wasahn pedolong en impwal en mihtingo pwe kumwail de mehla, pwe sapwellimen Siohwa lehn keio mi pohmwail.”+ Irail eri kapwaiada dahme Moses ndao.

8 Siohwa eri ketin mahsanihong Aaron: 9 “Kowe oh noumw pwutak kan me mi rehmw, kumwail dehr nim wain de sakau teikan ni amwail pahn pedolong nan impwal en mihtingo,+ pwe kumwail de mehla. Met iei koasoandi poatopoat ehu ong kumwail oh kadaudokamwail kan. 10 Met pahn kasalehda wekpeseng en nanpwungen mehkot sarawi oh sohte sarawi oh nanpwungen mehkot samin oh mwakelekel,+ 11 oh padahkihong mehn Israel kan koasoandi koaros me Siohwa ketin mahsanihong irail ni eh ketin doadoahngki Moses.”+

12 Moses eri koasoiong Aaron oh nah pwutak ko me luhwehdi, Eliesar oh Idamar: “Ale dahme luhwehdi sang meirong en kreino sang ni meirong kisiniei ko ong Siohwa oh tungoale nin duwen pilawa me sohte doal ihs limwahn pei sarawio,+ pwehki met iei mehkot me uhdahn sarawi.+ 13 Kumwail pahn tungoale met nan wasa sarawi ehu,+ pwehki met iei pwaisomw oh pwaisen noumw pwutak kan sang ni meirong kisiniei kan ong Siohwa, pwe ih kehkehlik wet me I alehdi. 14 Kumwail pil pahn tungoale mwaremwaren meirong en oaloahlo oh nehn meirong sarawio+ nan wasa mwakelekel ehu, kowe oh noumw pwutak kan oh noumw serepein kan me mi rehmw,+ pwehki mepwukat kohieng kumwail nin duwen pwaisomw oh pwaisen noumw pwutak kan sang ni meirong en kaminimin en mehn Israel kan. 15 Re pahn wahdo nehn meirong sarawio oh mwaremwaren meirong en oaloahlo iangahki meirong en wih kan sang kisiniei, pwehn kamwakid meirong en oaloahlo kohwei kohdo mwohn silangin Siohwa; oh mepwukat pahn wia pwais ehu ong uhk oh noumw pwutak kan me mi rehmw kohkohlahte,+ duwehte me Siohwa ketin kehkehlingki.”

16 Moses eri rapahki kuht en meirong en dihpo,+ oh e diarada me e isihslahr. Ih eri lingeringerda pahn nein Aaron pwutak ko me luhwehdi, Eliesar oh Idamar, oh e nda: 17 “Dahme kumwa sohte tungoalehki meirong en dihpo nan wasa sarawio?+ Pwehki met iei mehkot me uhdahn sarawi oh e ketikihong kumwa pwe kumwa en pwukoahki sapwung en mwomwohdiso oh wiahda tomw ong irail mwohn silangin Siohwa. 18 Kilang! Ntahn meirongo sohte wisiklongodo nan wasa sarawio.+ Kumwa uhdahn pahn tungoalehla meirongo nan wasa sarawio, duwehte kehkehlik me I alehdio.” 19 Aaron eri sapengki Moses: “Kilang! Rahnwet re patohwanda arail meirong en dihp oh arail meirong isihs mwohn silangin Siohwa,+ a mepwukat ahpw wiawihong ie. Ma I tungoalehla meirong en dihpo rahnwet, ia duwe, met pahn kaperenda Siohwa?” 20 Ni Moses eh rongada met, e ahpw wehwehkihda.

11 Siohwa eri ketin mahsanihong Moses oh Aaron: 2 “Ndaiong mehn Israel kan, ‘Iet menmour kan nin sampah* me kumwail kak tungoale:+ 3 Kumwail kak tungoale mahn koaros me kikin nehrail kan kasangpeseng oh wehwe nanpwungen kikin neh kan oh me kin pwurupwurehng rukoa kanarail mwenge.

4 “‘Ahpw kumwail sohte pahn tungoale mahn pwukat me kin pwurupwurehng rukoa kanarail mwenge de kikin nehrail kan kasangpeseng: kamel, me kin pwurupwurehng rukoa kene mwenge ahpw kikin neh kan sohte kasangpeseng. Met samin ong kumwail.+ 5 Oh pil rak padser,*+ pwehki e kin pwurupwurehng rukoa kene mwenge ahpw kikin neh kan sohte kasangpeseng. Met samin ong kumwail. 6 Pil rapit, pwehki e kin pwurupwurehng rukoa kene mwenge ahpw kikin neh kan sohte kasangpeseng. Met samin ong kumwail. 7 Pil pwihk,+ pwehki kikin neh kan kasangpeseng oh wehwe nanpwungen kikin neh ko ahpw e sohte kin pwurupwurehng rukoa kene mwenge. Met samin ong kumwail. 8 Kumwail sohte pahn tungoale udukarail kan de sair paliweren mahn mehla pwukat. Re samin ong kumwail.+

9 “‘Iet soahng kan me kumwail kak tungoale me mi nan pihl kan: Soahng kan me mi nan pihl kan me mie sikarail oh wunarail, sohte lipilipil ma e mi nansed de nan pillap, kumwail kak tungoale.+ 10 Ahpw soahng kan me mi nansed oh nan pillap me sohte sikarail oh wunarail, nanpwungen mahn tikitik* koaros oh menmour* teikan koaros me mi nan pihl kan, met mehkot kasaut ong kumwail. 11 Ei, re kasaut ong kumwail, oh kumwail sohte pahn tungoale udukarail kan+ oh kumwail pahn sautki paliweren mahn mehla pwukat. 12 Soahng koaros me mi nan pihl kan me sohte sikarail oh wunarail wia mehkot kasaut ong kumwail.

13 “‘Iet mahn akan me kin pihr me kumwail pahn sautki; kumwail sohte pahn tungoale pwe re kasaut: ikel,+ oahk, puldur toantoal,+ 14 kaid weitahta oh soangen kaid toantoal koaros, 15 soangen reipen* koaros, 16 ostris, likoht, kall, soangen palkon koaros, 17 likoht tikitik, kormorant, likoht me saleng reirei, 18 swan, pelikan, puldur, 19 sidoahk, soangen kewelik koaros, uhpoah, oh pwehk. 20 Soangen mahn tikitik koaros me mie ar pehnpihr ahpw kin aluhki neh pahieu wia mehkot kasaut ong kumwail.

21 “‘Nanpwungen mahn tikitik kan me mie ar pehnpihr oh kin aluhki neh pahieu, kumwail kak tungoalehte mahn akan me mie neh reirei riau ong lus pohn pwehl. 22 Kumwail kak tungoale mepwukat: soangsoangen loukust kan,+ oh tenter kan, oh mensiek kan. 23 Mahn tikitik teikan koaros me mie ar pehnpihr oh neh pahieu wia mehkot kasaut ong kumwail. 24 Kumwail pahn kasamineikumwailla sang ni mepwukat. Mehmen me pahn sair paliweren mahn mehla pwukat pahn samin lao lel nin soutik.+ 25 Mehmen me wa paliweren mahn mehla pwukat pahn lopworada eh likou kan;+ e pahn samin lao lel nin soutik.

26 “‘Mahn akan me kikin neh kan kasangpeseng ahpw sohte wehwe nanpwungen kikin neh kan oh sohte kin pwurupwurehng rukoa kene mwenge samin ong kumwail. Mehmen me sair mahn pwukat pahn saminla.+ 27 Menmour koaros me kin aluhki kumwuten neh nanpwungen menmour kan me kin aluhki neh pahieu samin ong kumwail. Mehmen me sair paliweren mahn mehla pwukat pahn samin lao lel nin soutik. 28 Mehmen me wa paliweren mahn mehla pwukat pahn lopworada eh likou kan,+ e pahn samin lao lel nin soutik.+ Re samin ong kumwail.

29 “‘Iet mahn tikitik kan nin sampah me samin ong kumwail: kitik me kin weirda pwoahr, kitik me kin lus,+ soangen kieil koaros, 30 lamwer, kieil laud, nuhd,* kieil en nan pihk, oh kamihlion. 31 Mahn tikitik pwukat samin ong kumwail.+ Mehmen me sair paliweren mahn mehla pwukat pahn samin lao lel nin soutik.+

32 “‘Mehkot me re pwupwudiong powe ni ar melahr pahn saminla, mehnda ma dipwisou tuhke ehu, likou ehu, kilin mahn ehu, de mwein likoun nsensuwed* ehu. Sohte lipilipil dipwisoun doadoahk me kumwail kin doadoahngki pahn kaduhdi nan pihl, oh e pahn samin lao lel nin soutik; mwuri e ahpw pahn mwakelekella. 33 Ma re pwupwudiong nan pwohl me wiawihkihda pwehl, kumwail pahn pwalangpeseng pwohlo, oh mehkoaros me mi loale pahn saminla.+ 34 Soangen mwenge koaros me pilen pwohlo wudekiong powe pahn saminla, oh pilen nimpil koaros me mi nan soangen pwohlo pahn saminla. 35 Mehkot me paliweren mahn mehla pwukat pwupwudiong powe pahn saminla. Mehnda ma mehn uhmw de sidohp tikitik, kumwail pahn kauwehla. Mepwukat samin, oh re pahn kin samin ong kumwail. 36 Ihte utuhnpihl ehu oh pwoaren nahk pihl ehu me pahn wie mwakmwakelekelte, ahpw mehmen me sair paliweren mahn mehla pwukat pahn saminla. 37 Ma paliweren mahn mehla pwukat pwupwudiong pohn werentuhke ehu me pahn poad, e mwakelekel. 38 Ahpw ma pihl wudekiong pohn werentuhke ehu oh kisehn paliweren mahn mehla pwukat pwupwudiong powe, werentuhkeo samin ong kumwail.

39 “‘Ma mahn emen me kumwail kin tungoale mehla, mehmen me sair paliweren mahn mehlao pahn samin lao lel nin soutik.+ 40 Mehmen me tungoale ekis uduken mahn mehlao pahn lopworada eh likou kan, oh e pahn samin lao lel nin soutik.+ Mehmen me wa paliweren mahn mehlao pahn lopworada eh likou kan, oh e pahn samin lao lel nin soutik. 41 Mahn tikitik koaros nin sampah wia mehkot kasaut.+ Sohte me pahn tungoale mepwukat. 42 Kumwail sohte pahn tungoale mahn me kin limwahdek, mahn me kin aluhki neh pahieu, de mahn tikitik nin sampah me mie neh tohto, pwe mepwukat wia mehkot kasaut.+ 43 Kumwail dehr kasautehkinkumwailla mahn tikitik pwukat, oh dehr kasamineikumwailla oh saminkihla mepwukat.+ 44 Pwe ngehi me Siohwa amwail Koht,+ oh kumwail pahn kasarawihala pein kumwail oh sarawihla,+ pwehki ngehi me sarawi.+ Eri kumwail dehr wiahiong kumwail en saminkihla mahn tikitik kan me kin mwekid nin sampah. 45 Pwe ngehi me Siohwa, me kahluweikumwailsang nan sapwen Isip pwehn kasalehiong kumwail me ngehi me Koht,+ oh kumwail pahn sarawihla,+ pwehki ngehi me sarawi.+

46 “‘Ih met kosonned me pid duwen mahn akan, mahn akan me kin pihr, menmour* koaros me kin mwekid nan pihl kan, oh duwen mahn* koaros me kin mwutumwutpene nin sampah, 47 pwe en kasalehda wekpeseng en nanpwungen me samin oh me mwakelekel, oh nanpwungen menmour kan me kumwail kak tungoale oh me kumwail sohte kak tungoale.’”+

12 Siohwa ketin doula mahsanihong Moses: 2 “Ndaiong mehn Israel kan, ‘Ma lih emen liseianda oh naitikihada pwutak emen, e pahn samin erein rahn isuh, duwehte eh kin samin erein rahn akan me e kin wia eh soumwahu en lih.+ 3 Ni kawaluhn rahn, kilin imwin en serio dipwisoun kaparaparo pahn sirkumsaisla.+ 4 Mwurin met, liho pahn usehlahte kamwakelehsang ih ntao erein rahn 33. E sohte pahn sair mehkot sarawi, oh e sohte pahn kohdo nan wasa sarawio lao rahn akan en eh kamwakel imwisekla.

5 “‘Ma e pahn naitikihada serepein men, e pahn samin erein rahn 14, duwehte eh kin samin erein eh kin wia eh soumwahu en lih. Mwurin met, e pahn usehlahte kamwakelehsang ih ntao erein rahn 66. 6 Ni rahn akan en eh kamwakel ong pwutak men de serepein men eh imwisekla, e pahn wahdo rehn samworo sihpw wol pwulopwul men me sounpar ehu ong meirong isihs+ oh pitsin pwulopwul men de mwuroi men ong meirong en dihp ni wasahn pedolong en impwal en mihtingo. 7 Samworo pahn kihda mwohn silangin Siohwa oh wiahda tomw ong liho, oh e pahn mwakelekelda sang eh pwilipwil en nta. Ih met kosonned duwen lih emen me pahn kin naitikihada pwutak men de serepein men. 8 Ahpw ma liho sohte kak kihda sihpw men, e pahn wahla mwuroi riemen de pitsin pwulopwul riemen,+ emen ong meirong isihs oh emen ong meirong en dihp, oh samworo pahn wiahda tomw ong liho, oh e ahpw pahn mwakelekelda.’”

13 Siohwa ketin doula mahsanihong Moses oh Aaron: 2 “Ma mpwos ehu, rihpw ehu, de mwahi ehu kohda ni kilin* aramas emen oh met kakete wiahla soumwahu tokutok*+ ni kilio, e pahn wisikdohng rehn samworo Aaron de rehn emen nah pwutak samworo ko.+ 3 Samworo pahn kasawih kenso ni kilio. Ma wune me mi ni kenso pahn pwetepwetala oh kenso mwomwen loaldi ni kilio, met iei soumwahu tokutok ehu. Samworo pahn kasawih met oh nda me e saminlahr. 4 Ahpw ma mwahi en kilio poh pwetepwet oh e mwomwen sohte loaldi ni kilio oh wuneo sohte pwetepwetala, samworo eri pahn katohrehla aramas kenso erein rahn isuh.+ 5 Samworo pahn kasawih ih ni keisuhwen rahn, oh ma e mwomwen me kenso uhdi oh sohte doupeseng ni kilio, samworo pahn katohrehla ih pil erein rahn isuh.

6 “Samworo pahn pwurehng kasawih ih ni keisuhwen rahn, oh ma kenso sosohrala oh sohte doupeseng ni kilio, samworo pahn nda me e mwakelekel;+ rihpw ehu met. Eri aramaso pahn lopworada eh likou ko oh e pahn mwakelekella. 7 Ahpw ma rihpwo* uhdahn doupesengier ni kilio mwurin eh pwaralahr rehn samworo pwe en kadehde ma e mwakelekel, e pahn pwurehng pwarala* rehn samworo. 8 Samworo pahn kasawih met, oh ma rihpwo doupesengier ni kilio, eri samworo pahn nda me e samin. Met iei soumwahu tokutok.+

9 “Ma soumwahu tokutok pwarada rehn aramas emen, e pahn wisikdohng rehn samworo, 10 oh samworo pahn kasawih ih.+ Ma mie mpwos pwetepwet ehu ni kilio oh wunen mpwoso pwetepwetala oh mpwoso sawapeseng,+ 11 met iei soumwahu tokutok me pahn mihmi werei ni kilio, oh samworo pahn nda me e saminlahr. E sohte anahne katohrehla ih,+ pwe e samin. 12 Eri ma tokutoko doupeseng ni kilio pwon oh tokutoko kipehdi aramaso sang ni moange lel ni neh, wasa koaros me samworo kak kilang, 13 oh samworo kasawiher aramaso oh kilang me tokutoko kipehdier kilio pwon, eri e pahn nda me aramas kenso mwakelekel.* Kilio pwon pwetepwetala, oh e mwakelekel. 14 Ahpw ma ehu wasa ni kilio sawapeseng, e pahn saminla. 15 Ni samworo eh pahn kilang wasa me sawapesengo, e pahn nda me e samin.+ Wasa me sawapesengo me saminla. Met iei soumwahu tokutok.+ 16 Ahpw ma wasa me sawapesengo pwurehng pwetepwetala, e pahn pwurala rehn samworo. 17 Samworo pahn kasawih ih,+ oh ma kenso pwetepwetala, eri samworo pahn nda me aramas kenso mwakelekel. E mwakelekel.

18 “Ma mpwos ehu kohda ni kilin aramas emen oh e mwahula, 19 ahpw mpwos pwetepwet ehu de mwahi pwetepwet-weitahta ehu kohda ni wasa mpwoso, eri e pahn pwarala rehn samworo. 20 Samworo pahn kasawih met,+ oh ma e mwomwen loaldi ni kilio oh wunen wasao pwetepwetala, eri samworo pahn nda me e saminlahr. Met iei soumwahu tokutok me pwarada ni mpwoso. 21 Ahpw ma samworo kasawih met oh e kilang me wunen wasao sohte pwetepwet oh e sohte loaldi ni kilio oh e mwomwen sosohrala, eri samworo pahn katohrehla ih erein rahn isuh.+ 22 Oh ma e sansal me e doupeseng ni kilio, eri samworo pahn nda me e saminlahr. Met iei soumwahu ehu. 23 Ahpw ma mwahio mihmihte wasatehkis oh sohte doupeseng, met ihte weitahtahn mpwoso, oh samworo pahn nda me e mwakelekel.+

24 “De ma mie lipwen mwasikala ehu rehn aramas emen oh uduk me mi ni lipwen wasa mwasikalao wiahla mwahi pwetepwet-weitahta ehu de mwahi pwetepwet ehu, 25 eri samworo pahn kasawih mwahio. Ma wunen mwahio pwetepwetala oh e mwomwen loaldi ni kilio, met iei tokutok me pwarada sang ni lipwen mwasikalao, oh samworo pahn nda me e saminla. Met iei soumwahu tokutok. 26 Ahpw ma samworo kasawih met oh kilang me wunen mwahio sohte pwetepwetla oh e sohte loaldi ni kilio oh e sosohrala, eri samworo pahn katohrehla ih erein rahn isuh.+ 27 Samworo pahn kasawih ih ni keisuhwen rahn, oh ma e sansal me e doupeseng ni kilio, eri samworo pahn nda me e saminlahr. Soumwahu tokutok ehu mwo. 28 Ahpw ma mwahio mihmihte wasatehkis oh e sohte doupeseng ni kilio oh e sosohrala, met ihte mpwos en lipwen mwasikalao. Samworo pahn nda me aramaso mwakelekel.

29 “Ni ahnsou me kens ehu kohda ni moangen de ni kaikaihn ohl emen de lih emen, 30 eri samworo pahn kasawih kenso.+ Ma e mwomwen loaldi ni kilio oh wunen wasao oangoahng oh menipinip, eri samworo pahn nda me aramaso saminlahr; met iei kens en kilin moang de alis. Met iei tokutok en moahng de kaikai. 31 Ahpw ma samworo kilang me kenso sohte mwomwen loaldi ni kilio oh wunen wasao sohte toantoal, samworo pahn katohrehla aramas kenso erein rahn isuh.+ 32 Samworo pahn kasawih kenso ni keisuhwen rahn, oh ma wasa me kenso sohte doupeseng oh sohte wune oangoahng kohda wasao oh mwomwen wasa me kenso sohte loaldi ni kilio, 33 aramaso pahn sihpla, ahpw e sohte pahn sihpihla wasa me kenso. Samworo eri pahn katohrehla aramas kenso erein rahn isuh.

34 “Samworo pahn pwurehng kasawih wasa me kenso ni keisuhwen rahn, oh ma kens en kilin moangeo oh aliso sohte doupeseng ni kilio oh e sohte mwomwen loaldi ni kilio, samworo eri pahn nda me e mwakelekel, oh e pahn lopworada eh likou ko oh e pahn mwakelekel. 35 Ahpw ma e sansal me kenso doupeseng ni kilio mwurin eh mwakelekelda, 36 samworo pahn kasawih ih, oh ma kenso doupeseng ni kilio, samworo sohte anahne rapahki wunen wasa me oangoahng; aramaso samin. 37 Ahpw ma keseuo kasalehda me kenso sohte doupeseng oh wunen wasao wosada toantoal, kenso mwahulahr. E mwakelekel, oh samworo pahn nda me e mwakelekel.+

38 “Ma mwahi kei kohda ni kilin* ohl emen de lih emen oh mwahi pwukat pwetepwet, 39 samworo pahn kasawih mepwukat.+ Ma mwahi en kilio pwetepwet poh reirei, met ihte pwudong ehu me pwarada ni kilio. Aramaso mwakelekel.

40 “Ma pitenmoangen ohl emen mwerasang oh moangamadla, e mwakelekel. 41 Ma pitenmoange mwerasang pohn temwe oh moangamadla wasao, e mwakelekel. 42 Ahpw ma kens pwetepwet-weitahta ehu kohda ni mad en kilin moangeo de ni temweo, met iei tokutok me pwarada ni kilin moangeo de ni temweo. 43 Samworo pahn kasawih ih, oh ma mpwos en kenso pwetepwet-weitahta ni mad en kadoken moangeo de ni temweo oh e mwomwen tokutok ni kilio, 44 e tokutok. E samin, oh samworo pahn nda me e samin pwehki soumwahu me mi ni moangeo. 45 Aramas emen me ahneki soumwahu tokutok pahn likawih likou kan me tei oh sohte pahn karada moange oh e pahn pwaindi eh alis oh likwerkiseli, ‘Samin, samin!’ 46 E pahn samin erein ahnsowo pwon me e ahneki soumwahwo. Pwehki eh samin, e pahn kousoan kelehpw. Eh wasahn kousoan pahn mi likin kahnimpwalo.+

47 “Ma soumwahu tokutok kasaminehla likou ehu, mehnda ma likou sang wunen sihpw ehu de likou linen ehu, 48 mehnda ma dereht en likou linen peipeida ehu de likou wunen sihpw peipeida ehu, de kilin mahn ehu de mehkot me wiawihkihda kilin mahn, 49 oh eniep oangoahng-pohn dihpw de weitahta sang soumwahwo kasaminehla likowo, kilin mahn ehu, dereht en likou peipeida ehu, de mehkot me wiawihkihda kilin mahn, met iei samin sang tokutok, oh met pahn wisiklahng samworo pwe en kilang. 50 Samworo pahn kasawih soumwahwo, oh e pahn katohrehla dipwisou me soumwahwo pwarada ie erein rahn isuh.+ 51 Ni eh pahn kasawih soumwahwo ni keisuhwen rahn oh kilang me e doupesengier ni likowo, dereht en likou peipeidao, de kilin mahno (sohte lipilipil dahme kilin mahno kin kadoadoahk ong), soumwahwo iei tokutok me kin douseli, oh e samin.+ 52 E pahn isikala likowo de dereht en likou wunen sihpw peipeidao de likou linen peipeidao de mehkot me wiawihkihda kilin mahn me soumwahwo pwarada ie, pwe met iei tokutok me kin douseli. E pahn isihsla.

53 “Ahpw ma samworo kasawih met oh soumwahwo sohte doupeseng ni likowo de ni dereht en likou peipeidao de ni mehkot me wiawihkihda kilin mahn, 54 eri samworo pahn kehkehlingkihong irail en lopworada dipwisou me saminlao, oh e pahn katohrehla dipwisowo pil erein rahn isuh. 55 Eri samworo pahn kasawih dipwisou me saminlao mwurin eh lopwolopwda nei. Ma mwomwen samino sohte wekila, mehnda ma soumwahwo sohte doupeseng, dipwisowo samin. Ke pahn isikala dipwisowo pwehki e menipiniplahr sang masloale de maslikin dipwisowo.

56 “Ahpw ma samworo kasawih met oh wasa saminlao sosohrala mwurin eh lopwolopwda nei, eri e pahn tehrasang wasao sang ni likowo de ni kilin mahno de ni dereht en likou peipeidao. 57 Ahpw, ma e pwurehng pwarada ehu wasa tohrohr ni likowo de ni dereht en likou peipeidao de ni mehkot me wiawihkihda kilin mahn, eri e doudoupeseng, oh ke pahn isikala dipwisou me saminlao.+ 58 Ahpw ni samino eh pahn sohrala sang ni likowo de dereht en likou peipeidao de ni mehkot me wiawihkihda kilin mahn me ke lopworada, eri dipwisowo pahn lopwolopwda keriapak, oh e ahpw pahn mwakelekella.

59 “Ih met kosonned en soumwahu tokutok me pwarada ni likou wunen sihpw ehu de likou linen ehu, de dereht en likou peipeida ehu, de ni mehkot me wiawihkihda kilin mahn, pwe en nda me dipwisowo mwakelekel de samin.”

14 Siohwa ketin doula mahsanihong Moses: 2 “Ih met me pahn wia kosonned en me tokutok men ni rahn me eh mwakelekel pahn dehdehda, ni eh pahn wisikdohng rehn samworo.+ 3 Samworo pahn kohieila likin kahnimpwalo oh kasawih ih. Ma me tokutoko mwahula sang tokutok, 4 samworo pahn kehkehlingkihong ih en wahdo menpihr mwakelekel riemen me momour, rahntuhke sidar, dereht weitahta,* oh isop ong eh kamwakel.+ 5 Samworo pahn kehkehlingki emen menpihr en kamakamala pohn pwohl ehu me wiawihkihda pwehl me pilen utuhnpihl mi loale. 6 Ahpw samworo pahn ale menpihr momouro iangahki rahntuhke sidaro, dereht weitahtao, oh isopo, oh kaduh mepwukat nan ntahn menpihr me kamakamala pohn pilen utuhnpihlo. 7 Mwuri e pahn usupihki ntao pak isuh pohn aramas me kamwakamwakele pein ih sang eh tokutoko oh nda me aramaso mwakelekellahr, oh e pahn kasaledekala menpihr mouro nan mohso.+

8 “Aramas me kamwakamwakele pein iho pahn lopworada eh likou kan oh sihpihsang wune kan koaros oh duhdu nan pihl, oh e ahpw pahn mwakelekella. Mwurin mwo, e pahn kak kohdo nan kahnimpwalo, ahpw e pahn kousoan likin imwe impwalo erein rahn isuh. 9 Ni keisuhwen rahn, e pahn sihpihsang pitenmoange, eh alis oh padi kan koaros. Mwurin eh sihpihsang wune kan koaros, e pahn lopworada eh likou kan oh duhdu nan pihl, oh e ahpw pahn mwakelekella.

10 “Ni kawaluhn rahn, e pahn ale sihpw wol pwulopwul riemen me roson mwahu, emen sihmpwul lih+ sounpar ehu me roson mwahu, eisek kis siluhn ihpah* en pilawa amas mwahu me doal leh nin duwen meirong en krein,+ oh sosohng en lok* en leh;+ 11 oh samworo me nda me aramaso mwakelekel pahn wahla aramaso me kamwakamwakele pein ih oh eh meirong ko mwohn silangin Siohwa ni wasahn pedolong en impwal en mihtingo. 12 Samworo pahn ale emen sihpw wol pwulopwul oh wiahda nin duwen meirong en tomwki dihp+ iangahki sosohng en lok en leho, oh e pahn kamwakid mepwukat kohwei kohdo nin duwen meirong en oaloahl ehu mwohn silangin Siohwa.+ 13 Mwuri e pahn kemehla sihpw wol pwulopwulo nan wasa me meirong en dihpo oh meirong isihso kin kamakamala ie,+ nan wasa sarawi ehu, pwehki, duwehte meirong en dihp, meirong en tomwki dihp kin kohieng samworo.+ Met iei mehkot me uhdahn sarawi.+

14 “Eri samworo pahn ale ekis ntahn meirong en tomwki dihpo, oh samworo pahn kihong ni palimaun en imwin salengen aramas me kamwakamwakele pein ih oh ni palimaun en sendilap en peho oh ni palimaun en sendilap en neho. 15 Oh samworo pahn ale ekis sang sosohng en lok en leho+ oh wudekiong nan peh palimeing. 16 Samworo ahpw pahn kaduh sendin peh palimauno nan leh me mi nan peh palimeingo oh usupihki ekis leho pak isuh mwohn silangin Siohwa. 17 Eri samworo pahn kihong ekis luhwen leh me mi nan peho ni palimaun en salengen aramas me kamwakamwakele pein ih oh ni palimaun en sendilap en peho oh ni palimaun en sendilap en neho pohn ntahn meirong en tomwki dihpo. 18 Samworo pahn kihong luhwen leh me mi nan peho pohn moangen aramas me kamwakamwakele pein ih, oh samworo pahn wiahda tomw ong ih mwohn silangin Siohwa.+

19 “Samworo pahn meirongkihla meirong en dihpo+ oh wiahda tomw ong aramas me kamwakamwakele pein ih sang eh samin, oh mwurin mwo e pahn kemehla meirong isihso. 20 Oh samworo pahn wiahda meirong isihs oh meirong en krein+ pohn pei sarawio, oh samworo pahn wiahda tomw ong ih,+ oh e ahpw pahn mwakelekella.+

21 “Ahpw, ma aramaso semwehmwe oh sohte ahneki soahng pwukat, eri e pahn ale emen sihpw wol pwulopwul nin duwen meirong en tomwki dihp ong meirong en oaloahl ehu, pwehn wiahda tomw ong ih, iangahki eisek kis ehun ihpah* en pilawa amas mwahu me doal leh nin duwen meirong en krein, sosohng en lok en leh, 22 oh mwuroi riemen de pitsin pwulopwul riemen, nin duwen soahng kan me e ahneki. Emen mehn wia meirong en dihp, a meteio mehn wia meirong isihs.+ 23 Ni kawaluhn rahn,+ aramaso pahn wahdo mepwukat rehn samworo pwehn kadehde eh mwakelekel ni wasahn pedolong en impwal en mihtingo mwohn silangin Siohwa.+

24 “Samworo pahn ale sihpw wol pwulopwul en meirong en tomwki dihpo+ oh sosohng en lok en leho, oh samworo pahn kamwakid mepwukat kohwei kohdo nin duwen meirong en oaloahl ehu mwohn silangin Siohwa.+ 25 Mwuri e pahn kemehla sihpw wol pwulopwul en meirong en tomwki dihpo, oh samworo pahn ale ekis ntahn meirong en tomwki dihpo oh kihong ni palimaun en imwin salengen aramas me kamwakamwakele pein ih oh ni palimaun en sendilap en peho oh ni palimaun en sendilap en neho.+ 26 Samworo pahn wudekihdiong ekis leho nan peh palimeing,+ 27 oh mwuri e pahn doadoahngki sendin peh palimauno oh usupihki leh me mi nan peh palimeingo pak isuh mwohn silangin Siohwa. 28 Oh samworo pahn kihong ekis leh me mi nan peho ni palimaun en imwin salengen aramas me kamwakamwakele pein ih oh ni palimaun en sendilap en peho oh ni palimaun en sendilap en neho, ni wasa kohte me e kihong ntahn meirong en tomwki dihpo. 29 Eri samworo pahn kihong luhwen leh me mi nan peho pohn moangen aramas me kamwakamwakele pein ih, pwe en wiahda tomw ong ih mwohn silangin Siohwa.

30 “Samworo pahn kihda emen mwuroi ko de emen pitsin pwulopwul ko, nin duwen me aramaso ahneki,+ 31 emen me e kak kihda, nin duwen meirong en dihp ehu oh meteio nin duwen meirong isihs ehu+ iangahki meirong en krein; oh samworo pahn wiahda tomw ong aramas me kamwakamwakele pein ih mwohn silangin Siohwa.+

32 “Ih met kosonned ong emen me soumwahu tokutok ahpw sohte ahneki soahng kan me anahn pwehn kadehdehda eh mwakelekel.”

33 Siohwa eri ketin mahsanihong Moses oh Aaron: 34 “Ni amwail pedolong nan sapwen Kenan,+ wasa me I pahn kihong kumwail en sapwenikihla,+ oh I kasaminehkihla ihmw ehu soumwahu tokutok nan sapwamwail,+ 35 aramas me imwaneki ihmwo pahn kohdo oh ndaiong samworo, ‘Mie mehkot me mwomwen eniep pwarada nan imweio.’ 36 Samworo pahn ruwese irail en kihsang soahng koaros nan ihmwo mwohn eh pahn kohdo kasawih eniepo, pwe en dehr nda me mehkoaros nan ihmwo samin; oh mwurin mwo samworo pahn pedolong oh dawih ihmwo. 37 E pahn kasawih wasa me eniepo, oh ma dihd en ihmwo saminkihla oangoahng-pohn dihpw de weitahta oh mepwukat mwomwen loaldi sang dihd teikan, 38 eri samworo pahn pedoisang nan ihmwo oh loakehdi ihmwo erein rahn isuh.+

39 “Mwuri samworo pahn pwurodo ni keisuhwen rahn oh dawih. Ma eniepo doupeseng ni dihd en ihmwo, 40 eri samworo pahn ruwese irail en poakihasang takai eniep ko oh kesehla likin kahnimwo nan wasa samin ehu. 41 Mwuri e pahn ruwese irail en korehdasang dihden loalen ihmwo pwon, oh plasder oh siment me kohsang ko pahn lekdeklahng likin kahnimwo nan wasa samin ehu. 42 Eri irail pahn kihlong takai teikan nan wasa me re kihsang takai ko, oh e pahn doadoahngki ehu siment tohrohr oh plasderihala ihmwo.

43 “Ahpw, ma eniepo pwurehng pwarada nan ihmwo mwurin takai ko ar poaksangehr oh ihmwo koroiroier oh pwurehng plasderla, 44 eri samworo pahn pedolongala oh dawih ihmwo. Ma eniepo doupesengier nan ihmwo, met iei tokutok+ me kin douseli nan ihmw. Ihmwo samin. 45 Eri e pahn ruwese irail en karangkehdi ihmwo—takai kan, tuhke kan, oh plasder oh siment en ihmwo pwon—oh wahieila likin kahnimwo wasa samin ehu.+ 46 Ahpw mehmen me pedolong nan ihmwo erein rahn kan me e loakdier+ pahn samin lao lel nin soutik;+ 47 oh mehmen me wendi nan ihmwo pahn lopworada eh likou kan, oh mehmen me mwenge nan ihmwo pahn lopworada eh likou kan.

48 “Ahpw, ma samworo kohdo oh kilang me eniepo sohte doupeseng nan ihmwo mwurin ihmwo eh pwurehng plasderla, samworo pahn nda me ihmwo mwakelekel, pwehki eniepo sohralahr. 49 Pwehn kamwakelehda ihmwo sang samin,* e pahn ale menpihr riemen, rahntuhke sidar, dereht weitahta, oh isop.+ 50 E pahn kemehla emen menpihr pohn pwohl ehu me wiawihkihda pwehl me pilen utuhnpihl mi loale. 51 Mwuri e pahn ale rahntuhkehn sidaro, isopo, dereht weitahtao oh menpihr mouro, oh kaduh mepwukat nan ntahn menpihr me kamakamalahro oh nan pilen utuhnpihlo, oh e pahn usupihki ihmwo pak isuh.+ 52 Oh e pahn kamwakelehkihda ihmwo sang samin* ntahn menpihro, pilen utuhnpihlo, menpihr mouro, rahntuhkehn sidaro, isopo, oh dereht weitahtao. 53 Ih eri pahn kasaledekala menpihr mouro likin kahnimwo nan mohso oh wiahda tomw ong ihmwo, oh e ahpw pahn mwakelekella.

54 “Ih met kosonned me pid soangsoangen tokutok, kens en kilin moahng de alis,+ 55 tokutok en likou+ de ihmw,+ 56 oh me pid mpwos, rihpw, oh mwahi,+ 57 pwehn kadehdehda ahnsou me mehkot kin samin oh ahnsou me mehkot kin mwakelekel.+ Met iei kosonned en tokutok.”+

15 Siohwa ketin doula mahsanihong Moses oh Aaron: 2 “Koasoiong mehn Israel kan oh ndaiong irail, ‘Ma ohl emen mie nahn pwilipwilsang eh dipwisoun kaparaparo,* pwilipwil en nahn wet kahrehda eh samin.+ 3 E saminkihla pwilipwil en nahno, mehnda ma nahno pousehlahte pwilipwilsang ni eh dipwisoun kaparaparo de e pinahla, e saminte.

4 “‘Peht me ohl me nahn kin pwilipwilsango wendi powe pahn saminla, oh mehkot me e mwohndi powe pahn saminla. 5 Aramas emen me sair en ohlo peht pahn lopworada eh likou kan, oh e pahn duhdu nan pihl oh e pahn samin lao lel nin soutik.+ 6 Mehmen me mwohndi pohn mehkot me ohl me nahn kin pwilipwilsango mwohndi powe pahn lopworada eh likou kan, duhdu nan pihl, oh e pahn samin lao lel nin soutik. 7 Mehmen me pahn sair paliweren ohl me nahn kin pwilipwilsang pahn lopworada eh likou kan, duhdu nan pihl, oh e pahn samin lao lel nin soutik. 8 Ma ohl me nahn kin pwilipwilsango kendipiong pohn aramas mwakelekel men, aramaso pahn lopworada eh likou kan, duhdu nan pihl, oh e pahn samin lao lel nin soutik. 9 Mehn mwomwohd* koaros me ohl me nahn kin pwilipwilsango mwohndi powe pahn saminla. 10 Mehmen me pahn sair mehkot me ohlo mwohndi powe pahn samin lao lel nin soutik, oh mehmen me wa dipwisou pwukat pahn lopworada eh likou kan, duhdu nan pihl, oh e pahn samin lao lel nin soutik. 11 Ma ohl me nahn kin pwilipwilsango+ sohte omwiomw mahs oh e doahke emen, aramaso pahn anahne lopworada eh likou kan, duhdu nan pihl, oh e pahn samin lao lel nin soutik. 12 Pwohl ehu me wiawihkihda pwehl me ohl me nahn kin pwilipwilsango doahke pahn anahne pwalpeseng, oh pwohl koaros me wiawihkihda tuhke pahn anahne wideudkihda pihl.+

13 “‘Ni pwilipwil en nahno eh uhdi oh aramaso mwakelekella sang met, eri e pahn awih erein rahn isuh ong eh kamwakel, oh e pahn lopworada eh likou kan, duhdu nan pilen utuhnpihl, oh e pahn mwakelekella.+ 14 Ni kawaluhn rahn, e pahn ale mwuroi riemen de pitsin pwulopwul riemen+ oh kohdo mwohn silangin Siohwa ni wasahn pedolong en impwal en mihtingo oh kihong samworo mepwukat. 15 Oh samworo pahn meirongki mepwukat, emen nin duwen meirong en dihp oh meteio nin duwen meirong isihs ehu, oh samworo pahn wiahda tomw ong aramaso mwohn silangin Siohwa me pid eh pwilipwil en nahno.

16 “‘Ma ohl emen pahn kakusiei pilen newe, paliwere pwon pahn duhdu nan pihl oh e pahn samin lao lel nin soutik.+ 17 E pahn widenkihda pihl likou oh mehkot me wiawihkihda kilin mahn me pilen newe kohieng powe, oh met pahn samin lao lel nin soutik.

18 “‘Ni ohl emen pahn wendi rehn lih emen oh kakusiei pilen newe, ira pahn duhdu nan pihl oh ira pahn samin lao lel nin soutik.+

19 “‘Ma lih emen mie pwilipwil en nta sang ni paliwere, e pahn kin samin pwehki eh soumwahu en lih erein rahn isuh.+ Mehmen me pahn sair ih pahn samin lao lel nin soutik.+ 20 Mehkot me liho wendi powe ni eh wia eh soumwahu en lih pahn saminla, oh mehkoaros me e mwohndi powe pahn saminla.+ 21 Mehmen me pahn sair en liho peht pahn lopworada eh likou kan, duhdu nan pihl, oh e pahn samin lao lel nin soutik. 22 Mehmen me pahn sair mehkot me liho mwohndi powe pahn lopworada eh likou kan, duhdu nan pihl, oh e pahn samin lao lel nin soutik. 23 Ma liho mwohndi pohn peht de mehkot tohrohr ehu, aramas me doahke met pahn samin lao lel nin soutik.+ 24 Oh ma ohl emen wendi rehn liho oh ntahn eh soumwahu en lih sairada ohlo,+ eri ohlo pahn samin erein rahn isuh, oh peht koaros me ohlo pahn wendi powe pahn samin.

25 “‘Ni lih emen eh pahn pwilipwil en nta erein rahn tohto+ ni eh kaidehn eh ahnsoun soumwahu en lih,+ de ma e pahn pwilipwil en nta reireisang eh ahnsou en soumwahu en lih, e pahn samin erein rahn akan koaros me e pwilipwil en nta, duwehte eh kin samin erein rahn akan en eh soumwahu en lih. 26 Peht koaros me liho wendi powe erein rahn akan en eh pwilipwil en nta pahn duwehla peht me saminkihla eh soumwahu en lih,+ oh sohte lipilipil mehkot me e mwohndi powe pahn saminla duwehte eh kin samin erein eh kin wia eh soumwahu en lih. 27 Mehmen me pahn sair mepwukat pahn saminla, oh e pahn lopworada eh likou kan, duhdu nan pihl, oh e pahn samin lao lel nin soutik.+

28 “‘Ahpw, ni eh pahn mwakelekelda sang eh pwilipwil en nta, e pahn awih erein rahn isuh, oh mwurin mwo e pahn mwakelekella.+ 29 Ni kawaluhn rahn, e pahn ale mwuroi riemen de pitsin pwulopwul riemen,+ oh e pahn wahdo mepwukat rehn samworo ni wasahn pedolong en impwal en mihtingo.+ 30 Samworo pahn wiahda emen ong meirong en dihp oh meteio ong meirong isihs, oh samworo pahn wiahda tomw ong liho mwohn silangin Siohwa me pid duwen eh pwilipwil samin en nta.+

31 “‘Kahrehda kumwa pahn katohrehla mehn Israel kan sang ar samin, pwe ren dehr mehla nan ar samin sang ni ar pahn kasaminehla ei impwal sarawio, me mi nanpwungarail.+

32 “‘Ih met kosonned me pid duwen ohl emen me nahn pwilipwilsang, ohl emen me samin pwehki eh kakusiei pilen newe,+ 33 lih emen me saminki eh soumwahu en lih,+ ohl emen de lih emen me mie mehkot pwilipwilsang ni paliwere,+ oh ohl emen me wendi rehn lih samin men.’”

16 Siohwa ketin mahseniong Moses mwurin mehlahn nein Aaron pwutak riemeno me mehla ni ara patohla rehn Siohwa.+ 2 Siohwa ketin mahsanihong Moses: “Ndaiong riomwo Aaron me e sohte pahn kin kohdo nan wasa sarawio+ loalen kahdengo,+ mwohn pweinen Kohpwao ahnsou sohte lipilipil, pwe en dehr mehla,+ pwe I pahn pwarada pohn pweineo+ nan pelien depwek ehu.+

3 “Iet me Aaron pahn wahdo ni eh pahn kohdo nan wasa sarawio: koupwul wol men ong meirong en dihp+ oh sihpw wol men ong meirong isihs.+ 4 E pahn likawihada likou reirei linen sarawi,+ oh lepin rausis* linen+ pahn pwaindi paliwere, oh e pahn pirehkihdi ih kateng linen+ oh moangeo lisoarop linen.+ Mepwukat likou sarawi kei.+ E pahn duhdu nan pihl+ oh likawihada mepwukat.

5 “E pahn alehsang mwomwohdisohn mehn Israel kan+ kuht wol pwulopwul riemen ong meirong en dihp oh emen sihpw wol ong meirong isihs.

6 “Aaron pahn kihda kouwol en meirong en dihp ong pein ih, oh e pahn wiahda tomw ong pein ih+ oh eh peneinei.*

7 “Eri e pahn ale kuht riemeno oh wairahla mwohn silangin Siohwa ni wasahn pedolong en impwal en mihtingo. 8 Aaron pahn wia usuhs pohn kuht riemeno, emen kuht ong Siohwa a meteio ong Asasel.* 9 Aaron pahn kihda kuht me pilipilda sang ni usuhso+ ong Siohwa oh wiahkihda meirong en dihp. 10 Ahpw kuht me pilipilda sang ni usuhso ong Asasel pahn wisikdo ni eh momourte pwehn kesihnenda mwohn silangin Siohwa pwe tomw en wiawi powe, pwe en pekederlahng nan sapwtehno ong Asasel.+

11 “Aaron pahn kihda kouwol en meirong en dihp ong pein ih, oh wiahda tomw ong pein ih oh eh peneinei;* mwurin mwo e pahn kemehla kouwol en meirong en dihpo, me iei ong ih.+

12 “Eri e pahn ale dewen mwoaluso+ me diren mwoalus okohk sang pei sarawio+ mwohn silangin Siohwa oh oaroahr riau en warpwohmwahu kaselel,+ oh e pahn wahlongala mepwukat nan kahdengo.+ 13 E pil pahn kihong warpwohmwahu pohn kisinieio mwohn silangin Siohwa,+ oh ediniei en warpwohmwahwo pahn kipehdi pweinen+ Kohpwahn Kadehdeo,+ pwe en dehr mehla.

14 “E pahn ale ekis ntahn kouwolo+ oh doadoahngki sendin peho oh usupihki mwohn pweineo ni palimese, oh e pahn doadoahngki sendin peho oh usupihki ekis ntao pak isuh mwohn pweineo.+

15 “Mwuri e pahn kemehla kuht en meirong en dihp, me iei ong aramas ako,+ oh wahlongala ntahn kuhto nan kahdengo+ oh wiahiong ntao+ duwehte me e wiahiong ntahn kouwolo; e pahn usupihki ntao mwohn pweineo.

16 “E pahn wiahda tomw ong wasa sarawio me pid wiewia samin en mehn Israel kan oh me pid arail kauwehla kosonned kan oh diparail kan,+ oh ih met me e pahn wiahiong impwal en mihtingo me mi nanpwungarail me kin wia wiewia samin kan.

17 “Sohte aramas emen likin Aaron pahn mi nan impwal en mihtingo sang ni ahnsou me e kohlongala pwe en wiahda tomw nan wasa sarawio lao e pedoila. E pahn wiahda tomw ong pein ih oh eh peneinei*+ oh ong mwomwohdisohn Israel pwon.+

18 “Eri e pahn kohieila ni pei sarawio,+ me mi mwohn silangin Siohwa oh kasarawihala pei sarawio. E pahn ale ekis ntahn kouwolo oh ekis ntahn kuhto oh kihong pohn kod kan en pei sarawio ni keimw ko koaros. 19 E pil pahn doadoahngki sendin peho oh usupihki ekis ntao pei sarawio pak isuh oh kamwakelehda oh kasarawihala pei sarawio sang wiewia samin en mehn Israel kan.

20 “Ni eh kanekehla eh wiahda tomw+ ong wasa sarawio oh impwal en mihtingo oh pei sarawio,+ e pil pahn kihda kuht momouro.+ 21 Aaron pahn pwil peh ko koaros pohn moangen kuht momouro oh wehkada sapwung koaros en mehn Israel kan oh arail kauwehla kosonned kan koaros oh diparail kan koaros pohn kuhto,+ oh e pahn kihdi dihp pwukat koaros pohn moangen kuhto oh kadarala kuhto nan sapwtehno sang ni pehn ohl emen me pilipildahr en wia met.* 22 Oh e pahn kadarala+ kuhto, oh kuhto pahn wahla arail sapwung kan koaros+ nan sapwtehno.+

23 “Eri Aaron pahn pedolong nan impwal en mihtingo oh kihsang eh likou linen ko me e likawihada ni eh kohlongala nan wasa sarawio, oh e pahn pwilikihdi mepwukat wasao. 24 E pahn duhdu nan pihl+ nan wasa sarawi ehu oh likawihada eh likou kan;+ mwuri e pahn kohieila oh wiahda eh meirong isihs+ oh en aramas akan meirong isihs+ oh wiahda tomw ong pein ih oh ong aramas akan.+ 25 E pahn wiahiong wih en meirong en dihpo en edinieida pohn pei sarawio.

26 “Ohl me kadarala kuhto ong Asasel+ pahn lopworada eh likou kan oh duhdu nan pihl, oh mwurin mwo e pahn kak kohlongala nan kahnimpwalo.

27 “Oh kouwol en meirong en dihpo oh kuht en meirong en dihpo, me ntahra ko wisikdohng nan wasa sarawio pwehn wiahda tomw, pahn wisikieila likin kahnimpwalo, oh kilira ko oh udukara ko oh kanengen kapehdara ko pahn isihsla.+ 28 Aramas me isikala mepwukat pahn lopworada eh likou kan oh duhdu nan pihl, oh mwurin mwo e pahn kak kohlongala nan kahnimpwalo.

29 “Met pahn wia koasoandi poatopoat ehu ong kumwail: Ni keisuhwen sounpwong, ni kaeisek en rahn en sounpwongo, kumwail pahn kaloke pein kumwail,* oh kumwail sohte pahn wia doadoahk sohte lipilipil,+ mehnda ma pwilidak men de mehn liki men me kin kousoan nanpwungamwail. 30 Ni rahn wet tomw+ pahn wiawihda ong kumwail, pwehn kasalehda me kumwail mwakelekel. Kumwail pahn mwakelekeldahsang dipamwail kan koaros mwohn silangin Siohwa.+ 31 Met iei sapad rahnen kommoal unsek ehu ong kumwail, oh kumwail pahn kaloke pein kumwail.+ Met iei koasoandi poatopoat ehu.

32 “Samworo me keidi+ oh kesepwilda* pwehn papah nin duwen samworo+ ni eh wiliandi eh pahpao,+ me pahn wiahda tomw oh likawihada likou linen kan,+ me iei likou sarawi kan.+ 33 E pahn wiahda tomw ong wasa sarawio,+ impwal en mihtingo,+ oh pei sarawio;+ oh e pahn wiahda tomw ong samworo kan oh ong aramas koaros en mwomwohdiso.+ 34 Met pahn wia koasoandi poatopoat ehu ong kumwail,+ pwehn wiahda tomw ong mehn Israel kan me pid diparail kan koaros pak ehu nan ehuehu sounpar.”+

Ih eri kapwaiada duwehte me Siohwa ketin kehkehlingkihong Moses.

17 Siohwa ketin doula mahsanihong Moses: 2 “Koasoiong Aaron oh nah pwutak kan oh mehn Israel kan koaros oh ndaiong irail, ‘Iet me Siohwa ketin kehkehlingki:

3 “‘“Ma aramas en Israel men kemehla kouwol men de sihpw wol pwulopwul men de kuht men nan kahnimpwalo de ma e kemehla likin kahnimpwalo, 4 ahpw sohte wahdo ni wasahn pedolong en impwal en mihtingo pwehn kihda nin duwen meirong ehu ong Siohwa mwohn impwal sarawi en Siohwa, aramaso pahn pwukoahkihdi dihp. E kakerehdi nta, oh aramaso pahn anahne kamakamala. 5 Met wiawi pwe mehn Israel kan en wahdo meirong kan, me re kin epwehnki kemehla nan mohso ong Siohwa, rehn samworo ni wasahn pedolong en impwal en mihtingo. Re pahn meirongkihla mepwukat nin duwen meirong en kaminimin kei ong Siohwa.+ 6 Oh samworo pahn usupihki ntao pohn sapwellimen Siohwa pei sarawio ni wasahn pedolong en impwal en mihtingo oh wiahiong wiho en edinieida nin duwen pwoh kansenamwahu ehu ong Siohwa.+ 7 Pwe ren sohla wiahda meirong ong ngehn suwed kan me mwomwen kuht*+ me re salelepekla oh kin kaudokiong.*+ Met pahn wia koasoandi poatopoat ehu ong kumwail erein dih kan me pahn kohdo.”’

8 “Ke pahn ndaiong irail, ‘Ma aramas en Israel men de mehn liki men me kin kousoan nanpwungamwail me kin wiahda meirong isihs de meirong ehu 9 oh sohte wahdo ni wasahn pedolong en impwal en mihtingo pwehn patohwanohng Siohwa, eri e pahn anahne kamakamala.+

10 “‘Ma aramas en Israel men de mehn liki men me kin kousoan nanpwungamwail tungoale nta sohte lipilipil,+ I uhdahn pahn soikala aramas* me tungoale ntao, oh I pahn kemehla ih. 11 Pwe mour* en soahng kan me momour kin mi ni nta,+ oh I kihong kumwail met pwe kumwail en wiahda tomw ong kumwail pohn pei sarawio,+ pwehki nta me wiahda tomw+ sang ni mour* me mi loale. 12 Ihme kahrehda I ndaiong mehn Israel kan: “Sohte emen kumwail pahn tungoale nta, oh sohte mehn liki men me kin kousoan nanpwungamwail+ pahn tungoale nta.”+

13 “‘Ma emen mehn Israel kan de mehn liki men me kin kousoan nanpwungamwail kin kesikmen oh koledi mahn lawalo men de menpihr men me kak tungoal, e pahn kakerehdi ntahn mahno+ oh pwainkihdi pwehl. 14 Pwe mour* en mehkoaros me momour kin mi ni nta, pwehki mour* mi loale. Eri, I ndaiong mehn Israel kan: “Kumwail sohte pahn tungoale nta sohte lipilipil pwehki mour* en mehkoaros me momour kin mi ni nta. Mehmen me tungoale nta pahn kamakamala.”+ 15 Ma mehmen,* mehnda ma pwilidak men de mehn liki men, tungoale mahn emen me dierek mehla de mahn emen me mahn lawalo men tehrpeseng,+ e pahn lopworada eh likou kan oh duhdu nan pihl oh e pahn samin lao lel nin soutik;+ mwuri e ahpw pahn mwakelekella. 16 Ahpw ma e sohte pahn lopworada likou pwukat oh sohte duhdu, e pahn dolung imwilahn eh sapwung.’”+

18 Siohwa ketin doula mahsanihong Moses: 2 “Koasoiong mehn Israel kan oh ndaiong irail, ‘Ngehi me Siohwa amwail Koht.+ 3 Kumwail sohte pahn alasang mwekid kan me re kin wia nan sapwen Isip, wasa me kumwail kousoan ie mahso, oh kumwail sohte pahn wia dahme re kin wia nan sapwen Kenan, wasa me I pahn kahreikumwailla ie.+ Oh kumwail sohte pahn keid nan arail koasoandi kan. 4 Kumwail pahn kapwaiada ei kosonned kan, oh kumwail pahn kolokol ei koasoandi kan oh kekeidki mepwukat.+ Ngehi me Siohwa amwail Koht. 5 Kumwail pahn kapwaiada ei koasoandi kan oh ei kosonned kan; mehmen me kin kapwaiada mepwukat pahn momour pwehki mepwukat.+ Ngehi me Siohwa.

6 “‘Sohte aramas emen rehmwail pahn wia nsenen pwopwoud* rehn emen kiseh me keren.+ Ngehi me Siohwa. 7 Ke sohte pahn wia nsenen pwopwoud rehn omw pahpa, oh ke sohte pahn wia nsenen pwopwoud rehn omw nohno. Ih omw nohno, oh ke sohte pahn wia nsenen pwopwoud reh.

8 “‘Ke sohte pahn wia nsenen pwopwoud rehn en omw pahpao pwoud.+ Met pahn kanamenekihala omw pahpa.*

9 “‘Ke sohte pahn wia nsenen pwopwoud rehn riomw serepein, mehnda ma nein omw pahpao serepein de nein omw nohno, mehnda ma e ipwidi nan peneinei ehute de ehu peneinei tohrohr.+

10 “‘Ke sohte pahn wia nsenen pwopwoud rehn noumw pwutak nah serepein de rehn noumw serepein nah serepein, pwehki met pahn kasohwauwihiukala.

11 “‘Ke sohte pahn wia nsenen pwopwoud rehn en omw pahpao pwoudo nah serepein, kadaudok en omw pahpao, pwehki ih riomw serepein.

12 “‘Ke sohte pahn wia nsenen pwopwoud rehn rien omw pahpao lih. Ih kisehn ntahn omw pahpa.+

13 “‘Ke sohte pahn wia nsenen pwopwoud rehn rien omw nohno lih, pwehki ih kisehn ntahn omw nohno.

14 “‘Ke sohte pahn kanamenekihala rien omw pahpao ohl* ni omw pahn wia nsenen pwopwoud rehn eh pwoud. Ke pahn nohnohki liho.+

15 “‘Ke sohte pahn wia nsenen pwopwoud rehn en noumw pwutak eh pwoud.+ Ih en noumw pwutak eh pwoud, oh ke sohte pahn wendi reh.

16 “‘Ke sohte pahn wia nsenen pwopwoud rehn en riomw pwutak eh pwoud,+ pwehki met pahn kanamenekihala riomw pwutako.*

17 “‘Ke sohte pahn wia nsenen pwopwoud rehn lih emen oh nah serepein.+ Ke sohte pahn ale nein nah pwutako serepein de nein nah serepeino serepein pwe ken wendi reh. Irail kiseh keren kei; met wiewia samin ehu.*

18 “‘Ke sohte pahn ale rien omw pwoudo serepein pwehn wia keriemen en omw pwoud+ oh wia nsenen pwopwoud reh erein omw pwoud eh momour.

19 “‘Ke sohte pahn wia nsenen pwopwoud rehn lih emen erein eh saminki eh soumwahu en lih.+

20 “‘Ke sohte pahn wia nsenen pwopwoud rehn en iengomw ohl* eh pwoud, met pahn kasamineiukala.+

21 “‘Ke sohte pahn mweidohng kadaudokomw en meirongala ong Molek.+ Ke sohte pahn kasaminehla mwaren omw Koht ni ahl wet.+ Ngehi me Siohwa.

22 “‘Ke sohte pahn wendi rehn ohl emen duwehte omw kin wendi rehn lih emen.+ Met wiewia kasaut ehu.

23 “‘Ohl emen sohte pahn eng rehn mahn emen pwe e pahn saminkihla met; de pil lih emen sohte pahn song eng rehn mahn emen.+ Met uhwong dahme pwung.

24 “‘Dehr kasaminehkinkumwailla mepwukat koaros, pwe ih mepwukat me wehi kan me I pahn kasarehla mwohmwail kasaminehkinirailla.+ 25 Ihme kahrehda sahpwo samin, oh I pahn wahdo kalokolok powe pwehki eh sapwung kan, oh towe kan pahn lekdekla sang sapwarail.+ 26 Ahpw kumwail pahn kapwaiada ei koasoandi kan oh ei kosonned kan,+ oh kumwail sohte pahn wia soahng kasaut pwukat, mehnda ma pwilidak men de mehn liki men me kin kousoan nanpwungamwail.+ 27 Pwe soahng kasaut pwukat koaros kin wiawi rehn aramas akan me kin kousoan nan sahpwo mwohmwail,+ eri sahpwo samin. 28 Eri kumwail sohte pahn anahne lekdekla sang sahpwo pwehki amwail kasaminehla sahpwo ni ahlohte me wehi kan me kousoan nan sahpwo mwohmwail pahn lekdekla sang sahpwo. 29 Ma mehmen kin wia soahng kasaut pwukat, irail* koaros me kin wia mepwukat pahn kamakamala. 30 Kumwail pahn kapwaiada amwail pwukoa ong ie sang ni amwail sohte pahn wia tiahk kasaut koaros me kin wiawi mwohmwail,+ pwe kumwail en dehr kasaminehkinkumwailla mepwukat. Ngehi me Siohwa amwail Koht.’”

19 Siohwa ketin doula mahsanihong Moses: 2 “Koasoiong mwomwohdisohn mehn Israel kan pwon oh ndaiong irail, ‘Kumwail pahn sarawihla, pwehki ngehi, Siohwa amwail Koht, me sarawi.+

3 “‘Emenemen kumwail pahn wauneki* ine oh seme,+ oh kumwail pahn kapwaiada ei sapad.+ Ngehi me Siohwa amwail Koht. 4 Dehr sohpeiong koht soh katepe kan+ de wiahiong kumwail koht kan sang mete.+ Ngehi me Siohwa amwail Koht.

5 “‘Eri ma kumwail wiahda meirong en kaminimin ong Siohwa,+ kumwail pahn meirongki met ni ahl ehu me e pahn ketin kupwurki.+ 6 Kumwail pahn tungoale met ni rahnen amwail meirongo oh mandahn rahno, ahpw dahme luhwehdi ni kesiluhwen rahn pahn isihsla.+ 7 Ahpw, ma kumwail tungoale met ni kesiluhwen rahn, met pahn wia mehkot kasaut me Koht sohte pahn ketin kupwurki. 8 Aramas me tungoale met pahn dolung imwilahn eh sapwung pwehki e kasaminehla mehkot sarawi ong Siohwa, oh aramaso* pahn anahne kamakamala.

9 “‘Ni amwail pahn dolung wahn amwail sahpw kan, kumwail sohte pahn dolungasang ni keilen amwail mwahto pwon oh kumwail sohte pahn rikada luhwen amwail wahnsahpw kan.+ 10 Oh pil, kumwail sohte pahn rikpene luhwen kreip kan nan amwail mwetin kreip de rikada kreip kan me mwerpeseng nan amwail mwetin kreip. Kumwail pahn kihdihte mepwukat ong me semwehmwe kan*+ oh mehn liki kan. Ngehi me Siohwa amwail Koht.

11 “‘Kumwail sohte pahn pirap,+ kumwail sohte pahn mwersuwed,+ oh kumwail sohte pahn pitih emenemen. 12 Kumwail dehr kahukihla likamw ehu ni mwarei+ oh kasaminehla mwaren amwail Koht. Ngehi me Siohwa. 13 Ke sohte pahn widingehdi iengomw men,+ oh ke sohte pahn pirap.+ Ke sohte pahn kolokol pweinen tohndoadoahk alahlda men pwohng ehu pwon lao lel nimenseng.+

14 “‘Ke sohte pahn keriahla* aramas salengepon men de kihdi mehkot mwohn aramas maskun men,+ oh ke pahn lemmwiki omw Koht.+ Ngehi me Siohwa.

15 “‘Kumwail sohte pahn kopwung sapahrek nan amwail kopwung. Ke sohte pahn kasalehda me ke lipilipilki me semwehmwe de kasalehda me ke uhki me kepwehpwe.+ Ke pahn kopwung iengomw men ni pwung pahrek.

16 “‘Ke sohte pahn waseli karaunlikamw nanpwungen omw aramas akan.+ Ke sohte pahn wia mehkot me pahn kahrehiong mouren* iengomw men nan keper.*+ Ngehi me Siohwa.

17 “‘Ke sohte pahn kailongki riomw nan omw mohngiong.+ Ke uhdahn pahn panawih iengomw men,+ pwe ke sohte pahn pil pwukoahki dihp duwehte ih.

18 “‘Ke sohte pahn dupuk+ de pil kadakadaur omw lingeringer pahn omw aramas akan, oh ke pahn poakohng iengomw men duwehte omw kin poakohng pein uhk.+ Ngehi me Siohwa.

19 “‘Kumwail pahn kapwaiada ei koasoandi kan: Ke sohte pahn kowarakiheki noumw mahn mand men ong ehu soangen mahn mand tohrohr. Ke sohte pahn kamwarak nan omw mwaht soangen werentuhke riau,+ oh ke sohte pahn likawih likou ehu me wiawihkihda soangen dereht riau.+

20 “‘Eri ma ohl emen wendi rehn lih emen oh wia nsenen pwopwoud reh oh liho lidu men me pilipildahr ong emen ohl tohrohr, ahpw liho saikinte pweipweida sapahl de alehdi eh saledek, ira pahn kalokolok. Ahpw, ira sohte pahn kamakamala, pwe liho saikinte saledekla. 21 Ohlo pahn patohwanohng Siohwa eh meirong en tomwki dihp, sihpw wol men en meirong en tomwki dihp, ni wasahn pedolong en impwal en mihtingo.+ 22 Samworo pahn wiahda tomw ong ih mwohn silangin Siohwa ni eh doadoahngki sihpw wol en meirong en tomwki dihp ong dihp me e wiahdao, oh e pahn alehdi mahk ong dihp me e wiahdao.

23 “‘Ni amwail pahn pedolong nan sahpwo oh kumwail padokedi tuhke sohte lipilipil ong mwenge, kumwail pahn wiahki wahntuhkeo samin oh keinepwi. Pwe sounpar siluh e pahn keinapwidi ong kumwail. Met sohte pahn tungoal. 24 Ahpw ni kapahieun sounpar wahntuhke koaros pahn sarawihla, oh met pahn wia ahnsoun peren mwohn silangin Siohwa.+ 25 Ni kelimaun sounpar, kumwail pahn kakehr tungoale wahntuhke kan pwehn kapatahiong wah kan ong dahme kumwail dolungada. Ngehi me Siohwa amwail Koht.

26 “‘Kumwail sohte pahn tungoale mehkot me mie nta.+

“‘Kumwail sohte pahn rapahki kilel kan me kin kasalehda duwen ahnsou kohkohdo de wia akmanaman.+

27 “‘Kumwail sohte pahn sihpih* ni pengepengen moangamwail kan de kauwehla* imwin amwail alis kan.+

28 “‘Kumwail sohte pahn leke paliwaramwail* kan pwehki aramas mehla men,*+ oh kumwail sohte pahn wiahda pelipel ni paliwaramwail kan. Ngehi me Siohwa.

29 “‘Dehr kasohwauwih noumw serepein sang ni omw pahn wiahkin ih lihen netiki paliwere men,+ pwe sapwamwail en dehr saminkihla tiahk en netiki paliwar oh direkihla tiahk suwed kan.+

30 “‘Kumwail pahn kapwaiada ei sapad,+ oh kumwail pahn kasalehda amwail lemmwiki* ei wasa sarawio. Ngehi me Siohwa.

31 “‘Dehr kohla rehn sounwunahni kan,+ oh dehr peki sawas rehn sounkosetipw kan+ pwe kumwail de saminkihla mepwukat. Ngehi me Siohwa amwail Koht.

32 “‘Ke pahn kesihnenda mwohn me moangepwet,+ oh ke pahn kasalehda wahu ong aramas mah kan,+ oh ke pahn lemmwiki omw Koht.+ Ngehi me Siohwa.

33 “‘Ma mehn liki men kin kousoan rehmw nan sapwamwail, kumwail sohte pahn wiakauwe.+ 34 Mehn liki men me kin kousoan rehmwail pahn duwehla pwilidak men nanpwungamwail;+ oh ke pahn poakohng ih duwehte omw kin poakohng pein uhk, pwe kumwail wia mehn liki kei nan sapwen Isip mahso.+ Ngehi me Siohwa amwail Koht.

35 “‘Kumwail sohte pahn doadoahngki mehn sosohng sapwung ni amwail kin sohng uwen reirei, toutou, de laud.+ 36 Kumwail pahn doadoahngki mehn tenek pwung, mehn paun pwung, mehn sosohng pwung.*+ Ngehi me Siohwa amwail Koht, me waikumwaildo sang nan sapwen Isip. 37 Eri kumwail pahn kapwaiada ei koasoandi kan koaros oh ei kosonned kan koaros, oh kumwail pahn idawehn mepwukat.+ Ngehi me Siohwa.’”

20 Siohwa ketin doula mahsanihong Moses: 2 “Ke pahn ndaiong mehn Israel kan, ‘Mehn Israel men oh mehn liki men me kin kousoan nan Israel me kihong emen nah seri rehn Molek uhdahn pahn kamakamala.+ Aramas en sahpwo pahn katehki takai lao e mehla. 3 I pahn soikala aramaso, oh I pahn kemehla ih, pwehki e kihong ekei nah seri kan rehn Molek oh kasaminehla ei wasa sarawio+ oh kasaminehla mwarei sarawi. 4 Ma aramas en sahpwo kilang dahme aramaso wia ni eh kihong nah seri rehn Molek ahpw re pohnsehsehla met oh re sohte kemehla ih,+ 5 eri, I uhdahn pahn soikala aramaso oh eh peneinei.+ I pahn kemehla ih iangahki koaros me iang ih salelepekla oh kaudokiong Molek.*

6 “‘Aramas* me salelepekla* ni eh likih sounwunahni kan+ oh sounkosetipw kan,+ I uhdahn pahn soikala aramaso* oh kemehla ih.+

7 “‘Kumwail pahn kasarawihala pein kumwail oh sarawihla,+ pwehki ngehi me Siohwa amwail Koht. 8 Oh kumwail pahn kolokol ei koasoandi kan oh kapwaiada mepwukat.+ Ngehi me Siohwa, me kin kasarawihkumwailla.+

9 “‘Ma mie emen me keriahla* seme de ine, e uhdahn pahn kamakamala.+ Pwehki e keriahla seme de ine, pein ih me pwukoahki eh mehla.*

10 “‘Eri me pid ohl emen me kamwahl rehn en emen ohl tohrohr eh pwoud: Ohl me kamwahl rehn en iengeo pwoudo uhdahn pahn kamakamala, ira* pahn kamakamala.+ 11 Ohl emen me wendi rehn en eh pahpa pwoud kanamenekihalahr eh pahpao.*+ Ira koaros uhdahn pahn kamakamala. Pein ira me pwukoahki ara mehla.* 12 Ma ohl emen wendi rehn en nah pwutak eh pwoud, ira koaros uhdahn pahn kamakamala. Ira kauwelahr dahme pwung. Pein ira me pwukoahki ara mehla.*+

13 “‘Ma ohl emen wendi rehn ohl emen duwehte eh wendi rehn lih men, ira koaros wiadahr mehkot kasaut.+ Ira uhdahn pahn kamakamala. Pein ira me pwukoahki ara mehla.*

14 “‘Ma ohl emen alehdi lih emen oh en liho nohno, met wiewia samin ehu.*+ Irail pahn isikala ohlo oh lih ako,+ pwe wiewia samino en dehr mihmihte nanpwungamwail.

15 “‘Ma ohl emen eng rehn mahn emen, e uhdahn pahn kamakamala, oh kumwail pahn kemehla mahno.+ 16 Ma lih emen pahn song eng rehn mahn emen,+ ke pahn kemehla liho oh mahno. Ira uhdahn pahn kamakamala. Pein ira me pwukoahki ara mehla.*

17 “‘Ma ohl emen wia nsenen pwopwoud rehn rie serepein, nein eh pahpao serepein de nein eh nohno serepein, oh e kilang en rieo kilisou oh rieo kilang eh kilisou, met wia mehkot kanamenek ehu.+ Ira pahn kamakamala mwohn mesen ara aramas akan. E kanamenekihalahr rie serepeino.* Ohlo pahn dolung imwilahn eh sapwung.

18 “‘Ma ohl emen wendi rehn lih emen me wia eh soumwahu en lih oh wia nsenen pwopwoud reh, ohlo oh liho koaros kasalehda eh pwilipwil en nta.+ Ira koaros pahn kamakamala.

19 “‘Ke sohte pahn wia nsenen pwopwoud rehn rien omw nohno lih de rien omw pahpa lih, pwehki met pahn kanamenekihala liho me kisehn omw nta.+ Kumwa koaros pahn dolung imwilahn amwa sapwung. 20 Ohl emen me wendi rehn en ohl me e pahn pahpahki eh pwoud kanamenekihalahr ohl me e pahn pahpahkio.*+ Ira pahn dolung imwilahn ara dihp. Ira pahn mehla sohte neira seri. 21 Ma ohl emen alehdi en rie pwutak eh pwoud, met wia mehkot kasaut.+ E kanamenekihalahr rie pwutako.* Ira sohte pahn naineki seri.

22 “‘Kumwail pahn kolokol ei koasoandi kan koaros oh ei kosonned kan koaros+ oh kapwaiada mepwukat,+ pwe kumwail en dehr lekdeksang nan sahpw me I pahn waikumwaildo pwe kumwail en kousoanla ie.+ 23 Kumwail sohte pahn weid nan koasoandien wehi kan me I pahn kasarehla mwohmwail;+ pwe irail wiahier soahng pwukat koaros oh I kalahdekin irail.+ 24 Ihme kahrehda I ndaiong kumwail: “Kumwail pahn sapwenikihla sapwarailo, oh I pahn kihong kumwail en sapwenikihla, sahpw ehu me inenen pwelmwahu.*+ Ngehi me Siohwa amwail Koht, me katohreikumwailla sang aramas teikan koaros.”+ 25 Kumwail pahn kasalehda wekpeseng en nanpwungen mahn mwakelekel oh me samin oh nanpwungen menpihr samin oh me mwakelekel;+ kumwail sohte pahn kasautehkinkumwailla mahn emen de menpihr men de mehkot me kin kerep pohn pwehl me I katohrehla ong kumwail nin duwen mehkot samin.+ 26 Kumwail pahn sarawihla mwohi, pwehki ngehi, Siohwa, me sarawi,+ oh I pahn katohreikumwailla sang aramas teikan koaros pwe kumwail en wiahla nei.+

27 “‘Ohl emen de lih emen me kin wia sounwunahni men de sounkosetipw men uhdahn pahn kamakamala.+ Aramas akan pahn katehkin irail takai lao re mehla. Pein irail me pwukoahki arail mehla.’”*

21 Siohwa ketin doula mahsanihong Moses: “Koasoiong samworo kan, iei nein Aaron pwutak kan, oh ndaiong irail, ‘Sohte me pahn kasaminehkihla pein ih aramas* mehla men nanpwungen eh aramas akan.+ 2 Ahpw e kak wia met ong kisehn eh nta me keren, ong eh nohno, eh pahpa, nah pwutak, nah serepein, rie ohl, 3 oh e kak kasaminehkihla pein ih rie serepein ma ih meipwon men me karanih ih oh saikinte pwopwoudida. 4 E sohte pahn kak kasaminehkihla pein ih oh wiahiong ih en saminkihla lih emen me pwoudiki emen ohl sang rehn eh aramas akan. 5 Samworo kan sohte pahn koimadla+ de sihpihsang keilen arail alis kan de leke paliwararail kan.+ 6 Irail pahn sarawihla ong arail Koht,+ oh re sohte pahn kasaminehla mwaren arail Koht,+ pwe re kin kihda meirong kisiniei kan ong Siohwa, pilawa* ong arail Koht, oh irail pahn anahne sarawihla.+ 7 Samworo sohte pahn pwoudiki lihen netiki paliwere men,+ lih emen me saminla, de lih emen me mweisang eh pwoud,+ pwehki eh kin sarawi ong eh Koht. 8 Ke pahn kasarawihla ih,+ pwehki ih me kin kihda pilawa ong omw Koht. E pahn sarawi ong uhk, pwehki ngehi, Siohwa, me kin kasarawihkumwailla, me sarawi.+

9 “‘Eri ma nein samworo serepein pahn kasaminehla pein ih ni eh pahn netiki paliwere, e pahn kasaminehla eh pahpao. Serepeino pahn isihsla.+

10 “‘Nanpwungen samworo kan,* samworo lapalap me lehn keio wudekdiong pohn moangeo+ oh me kesepwilda* pwehn likawih likoun samworo kan,+ sohte pahn kapingada pitenmoange de tehrpeseng eh likou kan.+ 11 E sohte pahn karanih aramas* mehla men;+ e sohte pahn kak kasaminehkihla pein ih mehnda ma pil eh pahpa de eh nohno. 12 E sohte pahn pedoisang nan wasa sarawio oh kasaminehla wasa sarawi en eh Koht,+ pwe kilel en kasarawio me iei lehn kei en eh Koht,+ mi powe. Ngehi me Siohwa.

13 “‘E pahn pwoudiki lih meipwon men.+ 14 E sohte pahn pwoudiki liohdi men, lih men me mweisang eh pwoud, emen me saminla, de lihen netiki paliwere men; ahpw e pahn pwoudiki lih meipwon men sang rehn eh aramas akan. 15 E sohte pahn kasaminehla kadaudoke sang rehn eh aramas akan,+ pwe ngehi me Siohwa, me kin kasarawihala ih.’”

16 Siohwa ketin doula mahsanihong Moses: 17 “Ndaiong Aaron, ‘Erein dih kan me pahn kohdo, sohte emen sang kadaudokomw me mie mehkot sapwung ni paliwere pahn kak kohla ni pei sarawio pwehn kihda pilawa ong eh Koht. 18 Ma mie ohl emen me mie mehkot sapwung ni paliwere, e sohte pahn kak kohla ni pei sarawio: ohl emen me maskun de dangepel de mese ohla* de kiaweliwel, 19 ohl emen me neh ohla de peh ohla, 20 me mpwokos de me sokolei,* de ohl me sakanakan nan pwoaren mese de pwudong de kilin kutuwa, de wusole ohla.+ 21 Sohte ohl emen sang kadaudok en samworo Aaron me mie mehkot sapwung ni paliwere pahn kihda meirong kisiniei kan ong Siohwa. Pwehki mie mehkot sapwung ni paliwere, e sohte pahn kak kihda pilawa ong eh Koht. 22 E pahn kak tungoale pilawa ong eh Koht sang soahng kan me uhdahn sarawi+ oh sang soahng sarawi kan.+ 23 Ahpw, e sohte pahn kak kohdo limwahn kahdengo,+ oh e sohte pahn kak kohdo ni pei sarawio,+ pwehki mie mehkot sapwung ni paliwere; oh e sohte pahn kasaminehla ei wasa sarawio,+ pwe ngehi me Siohwa, me kin kasarawihirailla.’”+

24 Moses eri koasoiong Aaron oh nah pwutak ko oh mehn Israel ko koaros.

22 Siohwa ketin doula mahsanihong Moses: 2 “Ndaiong Aaron oh nah pwutak kan me re anahne kanahieng mwomwen arail kin apwalih* en mehn Israel kan soahng sarawi kan oh sohte pahn kasaminehla mwarei sarawi+ me pid duwen soahng kan me re kin kasarawihong ie.+ Ngehi me Siohwa. 3 Ndaiong irail, ‘Erein dih kan me pahn kohdo, ma kadaudokomw men kohdo limwahn soahng sarawi kan me mehn Israel kan kasarawihong Siohwa ni eh samin, aramaso* pahn kamakamala mwohi.+ Ngehi me Siohwa. 4 Sohte aramas emen sang kadaudok en Aaron me ahneki soumwahu tokutok+ de mie pwilipwil en nahn+ pahn kak tungoale soahng sarawi kan lao e mwakelekella,+ oh pil aramas me sairada emen me saminkihla aramas* mehla,+ oh pil ohl me kakusiei pilen newe,+ 5 oh pil aramas emen me sairada mahn samin men me tikitik*+ oh me sairada aramas emen me saminkihla kahrepe sohte lipilipil.+ 6 Aramas* me sairada mepwukat pahn samin lao lel nin soutik oh sohte pahn kak tungoale soahng sarawi kan, ahpw e pahn duhdu nan pihl.+ 7 Ni ketipino eh pahn kihrla, e pahn mwakelekella, oh mwurin mwo e pahn kak tungoale soahng sarawi kan pwehki ih met kene mwenge.+ 8 Oh pil, e sohte pahn tungoale mahn sohte lipilipil men me dierek mehla de mehkot me mahn lawalo kan tehrpeseng oh saminkihla met.+ Ngehi me Siohwa.

9 “‘Irail pahn kapwaiada arail pwukoa ong ie, pwe ren dehr wahdo dihp pwehki met oh pahn mehkihla met pwehki ar kasaminehla soahng sarawi kan. Ngehi me Siohwa, me kin kasarawihirailla.

10 “‘Emen me sohte mweimwei* sohte pahn kak tungoale mehkot sarawi.+ Mehn liki men me kin kousoan rehn samworo erein ahnsou kis de tohndoadoahk alahlda men sohte pahn kak tungoale mehkot sarawi. 11 Ahpw ma samworo men pahn pwainkihda emen* pein nah mwohni, aramaso kak iang ih tungoale met. Lidu kan me ipwidi nan imweo pil kak iang tungoale kene mwenge.+ 12 Ma nein samworo men serepein pahn pwoudikihda emen me kaidehn samworo,* serepeino sohte pahn kak tungoale kisakis sarawi kan. 13 Ahpw ma nein samworo serepein pahn liohdihla de mweisang eh pwoud oh sohte kadaudoke oh e pwurala ni imwen eh pahpao duwehte ni eh pwulopwulo, serepeino pahn kak iang tungoale ekis kenen eh pahpao mwenge;+ ahpw emen me sohte mweimwei* sohte pahn kak tungoale met.

14 “‘Eri ma aramas emen sapwungala tungoalehda mehkot sarawi ehu, e pahn anahne kapatahiong limakis ehun pweinen mehkot sarawio oh kihong samworo meirong sarawio.+ 15 Eri irail sohte pahn kasaminehla en mehn Israel kan soahng sarawi kan me re kisekisehki Siohwa+ 16 oh kahrehiong irail en wahdo kalokepen diparail pwehki arail tungoale soahng sarawi kan; pwe ngehi me Siohwa, me kin kasarawihirailla.’”

17 Siohwa ketin doula mahsanihong Moses: 18 “Koasoiong Aaron oh nah pwutak kan oh mehn Israel kan koaros oh ndaiong irail, ‘Ni mehn Israel men de mehn liki men me kin kousoan nan Israel pahn kihda meirong isihs ehu+ ong Siohwa pwehn kapwaiada eh inou kan me e kahukihla de wiahda meirong ehu sang ni pein nsene,+ 19 e pahn kihda mahn wol men me roson mwahu+ sang ni pelinmeno, sihpw wol pwulopwul kan, de kuht kan, pwehn kak alehdi kupwuramwahu en Koht. 20 Kumwail sohte pahn kihda mahn akan me mie sapwung ni paliwere,+ pwe met sohte pahn kihong kumwail kupwuramwahu en Koht.

21 “‘Ma aramas emen kihda meirong en kaminimin ehu+ ong Siohwa pwehn kapwaiada inou ehu me e kahukihla de nin duwen meirong ehu sang ni pein nsene, meirongo pahn anahne mahn emen me roson mwahu sang nanpwungen kou kan, sihpw kan, de kuht kan, pwehn kak alehdi kupwuramwahu en Koht. Sohte kisin sapwung kis pahn mi rehn mahno. 22 Sohte meirong ehu pahn maskun, mie ohla ehu, lek ehu, mehme ehu, ripwiripw, de kilin kutuwa; kumwail sohte pahn kihda soahng pwukat ong Siohwa de wiahda soangen meirong wet pohn pei sarawio ong Siohwa. 23 Ke kak kihda kouwol men de sihpw men me apali neh de peh reirei de mwotomwot nin duwen meirong ehu sang ni nsenomw, ahpw Koht sohte pahn ketin kupwurki met nin duwen meirong en kahula ehu. 24 Kumwail sohte pahn meirongkihong Siohwa mahn emen me wusole ohla de mwutpene de weweiksang de leksang, oh kumwail sohte pahn meirongki soangen mahn pwukat nan sapwamwail. 25 Oh kumwail sohte pahn kihda mepwukat sang rehn mehn liki men nin duwen pilawa* ong amwail Koht, pwe mepwukat mie sapwung oh ohla ie. Koht sohte pahn ketin kupwurki meirong pwukat oh sohte kupwuramwahwih kumwail.’”

26 Siohwa ketin doula mahsanihong Moses: 27 “Ni kouwol men de sihpw wol pwulopwul men de kuht men eh ipwidi, e pahn mihmihte rehn eh nohno erein rahn isuh,+ ahpw sang ni kawaluhn rahn kohla e pahn kak wia mehn meirong ehu me Koht ketin kupwurki, meirong ehu sang kisiniei ong Siohwa. 28 A duwen kouwol men de sihpw men, kumwail sohte pahn kemehla mahno iangahki naho ni rahnteieu.+

29 “Ma kumwail kihda meirong en kapingkalahngan ong Siohwa,+ kumwail pahn meirongki met pwe kumwail en alehdi kupwuramwahu en Koht ong kumwail. 30 Kumwail pahn tungoalehla met rahnohte. Kumwail sohte pahn luhwehkihdi ekis lao lel nimenseng.+ Ngehi me Siohwa.

31 “Kumwail pahn anahne kolokolete ei kehkehlik kan oh kapwaiada mepwukat.+ Ngehi me Siohwa. 32 Kumwail sohte pahn kasaminehla mwarei sarawi,+ oh I pahn sarawihla nanpwungen mehn Israel kan.+ Ngehi me Siohwa, me kin kasarawihkumwailla,+ 33 me waikumwaildo sang nan sapwen Isip pwehn kasalehiong kumwail me ngehi me Koht.+ Ngehi me Siohwa.”

23 Siohwa ketin doula mahsanihong Moses: 2 “Koasoiong mehn Israel kan oh ndaiong irail, ‘Kasarawi kan+ en Siohwa me kumwail pahn pakairki+ iei kapokon sarawi kei. Mepwukat iei ei kasarawi kan:

3 “‘Doadoahk pahn wiawi erein rahn weneu, ahpw ni keisuhwen rahn iei sapad rahnen kommoal unsek ehu,+ kapokon sarawi ehu. Kumwail sohte pahn wia doadoahk sohte lipilipil. Met pahn wia sapad ehu ong Siohwa wasa koaros me kumwail kousoan ie.+

4 “‘Iet kasarawi kan en Siohwa, kapokon sarawi kan me kumwail pahn pakairki ni ahnsou kan me kileldi ong mepwukat: 5 Ni keieun sounpwong, ni 14 en sounpwongo,+ nin soutik mwohn eh pahn rotorotala* iei Pahsohpa+ ong Siohwa.

6 “‘Ni 15 en sounpwong wet iei Kasarawien Pilawa me Sohte Doal Ihs ong Siohwa.+ Rahn isuh kumwail pahn tungoale pilawa me sohte doal ihs.+ 7 Ni keieun rahn, kumwail pahn wia kapokon sarawi ehu.+ Kumwail sohte pahn wia doadoahk laud kan.* 8 Ahpw kumwail pahn kihda meirong ehu sang kisiniei ong Siohwa erein rahn isuh. Kapokon sarawi ehu pahn wiawi ni keisuhwen rahn. Kumwail sohte pahn wia doadoahk laud kan.’”

9 Siohwa ketin doula mahsanihong Moses: 10 “Koasoiong mehn Israel kan oh ndaiong irail, ‘Ni amwail pahn pedolong nan sahpw me I pahn kihong kumwail oh kumwail dolung wahn amwail mwaht, kumwail pahn wahdo rehn samworo+ kapakap en tepin wahnsahpw kan+ me kumwail dolungada. 11 Oh e pahn kamwakid kapakapo kohwei kohdo mwohn silangin Siohwa pwehn alehdi kupwuramwahu ong kumwail. Samworo pahn kamwakid met ni rahn mwurin rahnen Sapad. 12 Ni rahn me samworo kamwakid kapakapo ong kumwail, kumwail pahn meirongki sihpw wol pwulopwul men me roson mwahu oh sounpar ehu, nin duwen meirong isihs ong Siohwa. 13 Meirong en krein me iangete meirong isihso pahn wiawihkihda eisek kis riaun ihpah* en pilawa amas mwahu me doal leh, nin duwen meirong ehu sang kisiniei ong Siohwa, pwoh kansenamwahu ehu. Meirong en wain me iangete meirong isihso pahn wiawihkihda pahkis ehun ihn* en wain. 14 Kumwail sohte pahn tungoale pilawa, krein inihn, de krein kapw lao lel rahn wet, lao kumwail wahdo meirong ong amwail Koht. Met iei koasoandi poatopoat ehu ong kumwail oh kadaudokamwail kan wasa koaros me kumwail kousoan ie.

15 “‘Kumwail pahn wadek sapad isuh sang ni keieun rahn mwurin rahnen Sapad, sang ni rahn me kumwail wahdo kapakap en meirong en oaloahlo.+ E pahn wia wihk isuh unsek. 16 Kumwail pahn wadek rahn 50+ lao lel rahn mwurin keisuhwen rahnen Sapad, oh mwuri kumwail pahn kihda meirong en krein kapw ehu ong Siohwa.+ 17 Kumwail pahn wahdo sang amwail wasahn kousoan kan lopwon riau nin duwen meirong en oaloahl ehu. Mepwukat pahn wiawihkihda eisek kis riaun ihpah* en pilawa amas mwahu. E pahn doalkihda ihs oh umwda,+ nin duwen tepin wahnsahpw ong Siohwa.+ 18 Oh kumwail pahn kihda lopwon ko oh pil sihmpwul wol isimen me roson mwahu oh sounpar ehu, oh emen koupwul wol oh sihpw wol riemen.+ Mahn pwukat pahn wia mehn meirong isihs ong Siohwa iangahki meirong en krein oh meirong en wain me pahn iangete meirong isihs ko, nin duwen meirong ehu sang kisiniei, pwoh kansenamwahu ehu ong Siohwa. 19 Oh kumwail pahn kihda emen kuht pwulopwul nin duwen meirong en dihp+ oh sihmpwul wol riemen me sounpar ehu, nin duwen meirong en kaminimin.+ 20 Samworo pahn kamwakid sihmpwul wol riemeno kohwei kohdo iangahki lopwon en tepin wahnsahpw ko, nin duwen meirong oaloahl ehu mwohn silangin Siohwa. Mepwukat pahn wia mehkot sarawi ong Siohwa oh kohieng samworo.+ 21 Ni rahn wet kumwail pahn wia pakair ehu+ ong kapokon sarawi ehu ong kumwail. Kumwail sohte pahn wia doadoahk laud kan. Met iei koasoandi poatopoat ehu ong kumwail oh kadaudokamwail kan nan amwail wasahn kousoan kan koaros.

22 “Ni amwail pahn dolung wahn amwail sahpw kan, kumwail sohte pahn dolungasang ni keilen amwail mwahto pwon oh kumwail sohte pahn rikada luhwen amwail wahnsahpw kan.+ Kumwail pahn kihdihte met ong me semwehmwe kan*+ oh mehn liki kan.+ Ngehi me Siohwa amwail Koht.’”

23 Siohwa ketin doula mahsanihong Moses: 24 “Ndaiong mehn Israel kan, ‘Ni keisuhwen sounpwong, ni keieun rahn en sounpwongo, kumwail pahn kommoal sang amwail doadoahk koaros. Met pahn wia rahnen kataman ehu sang ni pepeuk en sowi,+ kapokon sarawi ehu. 25 Kumwail sohte pahn wia doadoahk laud kan, oh kumwail pahn kihda meirong ehu sang kisiniei ong Siohwa.’”

26 Siohwa ketin doula mahsanihong Moses: 27 “Ahpw, ni rahn kaeisek en keisuhwen sounpwong wet iei Rahnen Tomw.+ Kumwail pahn wia kapokon sarawi ehu, oh kumwail pahn kaloke pein kumwail*+ oh kihda meirong ehu sang kisiniei ong Siohwa. 28 Kumwail sohte pahn wia doadoahk sohte lipilipil ni rahn tohrohr wet pwehki met iei rahnen tomw ehu pwehn wiahda tomw+ ong kumwail mwohn silangin Siohwa amwail Koht. 29 Mehmen* me sohte pahn kaloke pein ih* ni rahno pahn kamakamala.+ 30 Oh I pahn kamwomwala aramas* koaros me wia doadoahk sohte lipilipil ni rahno. 31 Kumwail sohte pahn wia doadoahk sohte lipilipil. Met iei koasoandi poatopoat ehu ong kumwail oh kadaudokamwail kan wasa koaros me kumwail kousoan ie. 32 Met iei sapad rahnen kommoal unsek ehu ong kumwail, oh kumwail pahn kaloke pein kumwail+ ni rahn keduwaun sounpwongo nin soutik. Kumwail pahn wia amwail sapad sang nin soutik lel nin soutik.”

33 Siohwa ketin doula mahsanihong Moses: 34 “Ndaiong mehn Israel kan, ‘Ni 15 en keisuhwen sounpwong wet iei Kasarawien Impwal kan* ong Siohwa erein rahn isuh.+ 35 Kapokon sarawi ehu pahn wiawi ni keieun rahn, oh kumwail sohte pahn wia doadoahk laud kan. 36 Erein rahn isuh kumwail pahn patohwanda meirong ehu sang kisiniei ong Siohwa. Ni kawaluhn rahn, kumwail pahn wia kapokon sarawi ehu,+ oh kumwail pahn patohwanda meirong ehu sang kisiniei ong Siohwa. Met iei kapokon sarawi ehu. Kumwail sohte pahn wia doadoahk laud kan.

37 “‘Mepwukat iei kasarawi kan+ en Siohwa me kumwail pahn pakairki nin duwen kapokon sarawi kan+ pwehn kihda meirong ehu sang kisiniei ong Siohwa: meirong isihs+ oh meirong en krein+ me iang meirong en mahn oh meirong en wain kan+ nin duwen koasoandien ehuehu rahn. 38 Mepwukat pahn kapatapatohng dahme meirongala ni sapwellimen Siohwa sapad,+ oh amwail kisakis kan,+ amwail meirong en kahula+ oh amwail meirong kan me kumwail nsenki wia,+ me kumwail pahn patohwanohng Siohwa. 39 Ahpw ni 15 en keisuhwen sounpwong, ni amwail kihpenehr wahnsahpw kan, kumwail pahn wia kasarawien Siohwa erein rahn isuh.+ Ni keieun rahn iei rahnen kommoal unsek ehu oh ni kawaluhn rahn iei rahnen kommoal unsek ehu.+ 40 Ni keieun rahn, kumwail pahn ale wahntuhke me keieu mwahu, tehntuhke pahm,*+ rahntuhke losolos oh rahntuhke poplar en nan wahu, oh kumwail pahn pereperen+ mwohn silangin Siohwa amwail Koht erein rahn isuh.+ 41 Kumwail pahn wia met nin duwen kasarawi ehu ong Siohwa erein rahn isuh nan pahro.+ Kumwail pahn kasarawih met nan keisuhwen sounpwong nin duwen koasoandi poatopoat ehu erein dih kan me pahn kohdo. 42 Kumwail pahn kousoan nan impwal kan erein rahn isuh.+ Pwilidak kan koaros nan Israel pahn kousoan nan impwal kan, 43 pwe kadaudokamwail kan en ahnsou kohkohdo en ese+ me I wiahiong mehn Israel kan en kousoan nan impwal kan ni ei kahluwairailsang nan sapwen Isip.+ Ngehi me Siohwa amwail Koht.’”

44 Moses eri koasoiaiong mehn Israel kan duwen kasarawi kan en Siohwa.

24 Siohwa ketin doula mahsanihong Moses: 2 “Kehkehlingkihong mehn Israel kan ren wahdo rehmw lehn olip tohr ong lamp kan, pwe lamp kan en kin wie ngkengken.+ 3 Likin kahdeng en kohpwahn Kadehdeo nan impwal en mihtingo, Aaron pahn koasoanehdi pwe lamp kan en kin ngkengken sang nin soutik lel nimenseng mwohn silangin Siohwa. Met iei koasoandi poatopoat ehu ong kumwail oh kadaudokamwail kan. 4 E pahn kin kaukaule apwalih lamp ko pohn dewen lamp+ kohl tohro mwohn silangin Siohwa.

5 “Ke pahn ale pilawa amas mwahu oh umwunda ni lopwon me mwomwen rihng 12. Eisek kis riaun ihpah* pahn kohieng nan ehuehu lopwon. 6 Ke pahn kihdi mepwukat ni koasoakoasoak riau, lopwon weneu ni ehu koasoakoasoak,+ pohn tehpel kohl tohro mwohn silangin Siohwa.+ 7 Ke pahn kihdi warpwohmwahu pwetepwet* tohr pohn ehuehu koasoakoasoak, oh e pahn meirongala pwehn wiliandi pilawao nin duwen meirong ehu+ sang kisiniei ong Siohwa. 8 Ni ehuehu rahnen Sapad, e pahn kaukaule koasoanehdi met mwohn silangin Siohwa.+ Met iei inou lap poatopoat ehu rehn mehn Israel kan. 9 Met pahn wiahla pweisen Aaron oh nah pwutak kan,+ oh irail pahn tungoale nan wasa sarawi ehu,+ pwehki met iei mehkot me uhdahn sarawi ong samworo sang ni meirong kisiniei kan ong Siohwa, nin duwen koasoandi poatopoat ehu.”

10 Eri nanpwungen mehn Israel kan mie pwutak emen nein lihen Israel men oh eh pahpa mehn Isip men,+ oh pei wiawi nanpwungen ih oh ohlen Israel men nan kahnimpwalo. 11 Nein lihen Israel pwutako ahpw tepida lahlahwe Mwaro* oh keriahla* met.+ Irail eri wahla ih rehn Moses.+ Eh nohno Selomid, nein Dipri sang keinek en Dan. 12 Irail salihedi ih lao sapwellimen Siohwa pilipil pahn sansalda ong irail.+

13 Siohwa eri ketin mahsanihong Moses: 14 “Wahieido aramas me wia keriao likin kahnimpwalo, oh irail koaros me rong ih pahn pwil pehrail kan pohn moange, oh mwuri mwomwohdiso pwon pahn katehki takai.+ 15 Oh ke pahn ndaiong mehn Israel kan, ‘Ma aramas emen keriahla eh Koht, e pahn dolung imwilahn dipe. 16 Aramas me lahlahwe mwaren Siohwa uhdahn pahn kamakamala.+ Mwomwohdiso pwon uhdahn pahn katehki takai. Mehn liki men pahn kamakamala duwehte pwilidak men ni eh lahlahwe Mwaro.

17 “‘Ma aramas emen kihsang mour en aramas emen, e uhdahn pahn kamakamala.+ 18 Mehmen me keme oh kemehla mahn mand emen pahn kapwungala met, mour ong mour.* 19 Ma aramas emen kauwehla ienge men, eri dahme e wiahdao pahn pil wiawihong ih.+ 20 Tih ong tih,* pwoaren mas ong pwoaren mas, ngih pwoat ong ngih pwoat, soangen ohlaohte me e wiahda pahn pil wiawihong ih.+ 21 Aramas emen me keme oh kemehla mahn emen pahn kapwungala met,+ ahpw mehmen me keme oh kemehla aramas emen pahn kamakamala.+

22 “‘Kosonned tehieu pahn doadoahk ong kumwail, mehnda ma mehn liki men de pwilidak men,+ pwehki ngehi me Siohwa amwail Koht.’”

23 Moses eri koasoiong mehn Israel kan, oh re wahla aramas me wia keriao likin kahnimpwalo oh katehki takai.+ Eri mehn Israel kan kapwaiada duwehte me Siohwa ketin kehkehlingkihong Moses.

25 Siohwa ketin doula mahsanihong Moses pohn Nahna Sainai: 2 “Koasoiong mehn Israel kan oh ndaiong irail, ‘Ni amwail pahn pedolong nan sahpw me I pahn kihong kumwail,+ kumwail sohte pahn koadoahke sahpwo pwehki met iei sapad ehu ong Siohwa.+ 3 Sounpar weneu ke pahn kamwarak werentuhke nan omw mwaht, oh sounpar weneu ke pahn kamwakele omw mwetin kreip, oh ke pahn kihpene wahn sahpwo.+ 4 Ahpw ni keisuhwen pahr, e pahn mie sapad en kommoal unsek ehu ong sahpwo, sapad ehu ong Siohwa. Ke sohte pahn kamwarak werentuhke nan omw mwaht de kamwakele omw mwetin kreip. 5 Ke sohte pahn dolung dahme pein wosada sang krein kan me luhwehdi mwurin dondol, oh ke sohte pahn kihpene kreip kan sang omw tuhkehn kreip me sohte kamwakelda. E pahn mie pahr en kommoal unsek ehu ong sahpwo. 6 Ahpw, kumwail pahn kak tungoale mwenge kan me keirda nan sahpwo erein sapad; kowe, noumw lidu ohl oh lih akan, noumw tohndoadoahk alahlda, oh mehn liki kan me kousoan rehmw kak iang tungoale met, 7 oh pil mahn mand oh mahn lawalo kan nan sapwomw. Soahng koaros me sahpwo kapwarehda kak wia mehn tungoal.

8 “‘Ke pahn wadek pahr en sapad isuh, pak isuh sounpar isuh, oh patpene koaros wiahda sounpar 49. 9 Mwuri ke pahn peuk mehn pepeuko* ni ngihl laud ni keisuhwen sounpwong, ni rahn kaeisek en sounpwongo; ni Rahnen Tomwo,+ kumwail pahn wiahiong ngilen mehn pepeuko en lella wasa koaros nan sapwamwail. 10 Kumwail pahn kasarawihala pahr kalimeisek oh lohkiseli saledek nan sahpwo ong towe kan koaros.+ E pahn wiahla pahr en Supilih ong kumwail, oh emenemen kumwail pahn pwurala nan sapwe oh emenemen kumwail pahn pwurala rehn eh peneinei.+ 11 Pahr kalimeisek pahn wia pahr en Supilih ong kumwail. Kumwail sohte pahn kamwarak werentuhke de dolung dahme pein wosada sang luhwen krein kan de pil kihpene kreip kan sang tuhkehn kreip me sohte kamwakelda.+ 12 Pwe met pahr en Supilih ehu. E pahn sarawi ong kumwail. Ihte me kumwail pahn kak tungoale iei wahnsahpw me pein wosada.+

13 “‘Nan pahr en Supilih wet, emenemen kumwail pahn pwurala nan sapwe.+ 14 Ma kumwail netikihla mehkot ehu rehn iengomw men de ma kumwail pwainsang ih, dehr isaneki pitih emenemen.+ 15 Ni omw pahn pwainsang sahpwo rehn iengomwo, ke pahn wadek sounpar kan me dauliher pahr en Supilih, oh e pahn koasoanehdi pweineo nin duwen sounpar kan me luhwehdi ong dolung wahnsahpw kan.+ 16 Ma sounpar tohto luhwehdi, e kak kalaudehla pweineo, oh ma sounpar malaulau me luhwehdi, e pahn katikala pweineo, pwehki e netikihong uhk uwen tohtohn wahnsahpw kan me sahpwo pahn kihda. 17 Sohte emen kumwail pahn isaneki pitih ienge men,+ oh ke pahn lemmwiki omw Koht,+ pwe ngehi me Siohwa amwail Koht.+ 18 Ni amwail pahn kapwaiada ei koasoandi kan oh kolokol ei kosonned kan, kumwail pahn kousoan nan sahpwo ni amwail sohte perki mehkot.+ 19 Sahpwo pahn kapwarehda wah,+ oh kumwail pahn tungoal lao kumwail medla oh kumwail pahn kousoan wasao ni amwail sohte perki mehkot.+

20 “‘Ahpw ma kumwail pahn nda: “Dahme se pahn tungoale ni keisuhwen pahr ma se sohte kamwarak werentuhke de kihpene wahnsahpw kan?”+ 21 I pahn kihong kumwail ei kapai ni keweneun pahr, oh sahpwo pahn kihda wahnsahpw me itar ong sounpar siluh.+ 22 Mwuri kumwail pahn kamwarak werentuhke ni kawaluhn pahr oh tungoale wahnsahpw en keweneun pahro lao lel ni keduwaun pahr. Kumwail pahn tungutungoale wahnsahpw en mwowe ko lao ahnsoun rahk kapw leledo.

23 “‘Sahpwo sohte pahn netila kohkohlahte,+ pwehki sapwei sahpwo.+ Pwe ong ngehi, kumwail mehn liki kei oh aramas kei me kousoanla nan sahpwet.+ 24 Nan sahpwo pwon me kumwail sapwenikihla, aramas me pahn netikihla sapweo pahn ahneki pwuhng en pwainda sapahl sapweo.

25 “‘Ma riomw men semwehmwehla oh anahne netikihla ekis kisehn sapweo, emen kiseh keren me ahneki pwuhng en pwainda sapahl pahn kohdo oh pwainda sapahl dahme rieo netikihlao.+ 26 Ma mehmen sohte kiseh me ahneki pwuhng en pwainda sapahl, ahpw e kepwehpwehla oh diarada mwohni en pwainda sapahl dahme netilao, 27 e pahn kapatahda uwen pweineo erein sounpar kan me e netikihla sapweo oh pwainla luhweo rehn aramas me e netikihong sahpwo. Mwuri e ahpw pahn pwuralahng nan sapweo.+

28 “‘Ahpw ma e sohte diarada mwohni en kapwurehsang sapweo reh, dahme e netikihlao pahn mihmihte rehn me pwainsango lao lel pahr en Supilih;+ oh sahpwo pahn kapwurupwurlahng ih ni pahr en Supilih, oh e pahn pwuralahng nan sapweo.+

29 “‘Eri ma aramas emen pahn netikihla ihmw ehu me mi nan kahnimw ehu me kelpene, eh pwuhng en pwainda sapahl pil pahn mihmihte lao lel ni imwin pahr ehu sang ahnsou me e netila; e pahn ahnekihte pwuhng en pwainda sapahl+ erein pahr ehu pwon. 30 Ahpw ma ihmwo sohte pweipweida sapahl mwohn imwin sounpar ehu pwon, ihmw me mi nan kahnimw me kelpeneo pahn wiahla imwen me pwaindao kohkohlahte erein dih kan me pahn kohdo. Ihmwo sohte pahn kapwurupwurla ni pahr en Supilih. 31 Ahpw ma ihmw me pahn netila mi nan wasahn kousoan ehu me sohte kelpene, e pahn wia kisehn mohs en nansapw. Pwuhng en pwainda sapahl pahn mihmihte, oh ihmwo pahn kapwurupwurla ni pahr en Supilih.

32 “‘Ahpw imwen mehn Lipai kan me mi nan arail kahnimw kan,+ mehn Lipai kan pahn ahneki pwuhng en pwainda sapahl ihmw pwukat kohkohlahte. 33 Ma imwen mehn Lipai kan sohte pweipweida sapahl, imwarail ihmw me netila nan kahnimwo pil pahn kapwurupwurla ni pahr en Supilih,+ pwehki ihmw kan me mi nan kahnimw en mehn Lipai kan iei imwarail nanpwungen mehn Israel kan.+ 34 Oh pil, mohs kan+ me kapilpene arail kahnimw kan sohte pahn netila, pwe sapwarail met kohkohlahte.

35 “‘Ma riomw men me kin kousoan limwahmw semwehmwehla oh sohte kak pein komokomour ih, ke pahn sewese ih+ duwehte omw pahn sewese mehn liki men oh aramas men me kousoanla rehmw,+ pwe en kak iang uhk momour. 36 Ke dehr ale wihn en mwohni me ke kihongehr.+ Ke pahn lemmwiki omw Koht,+ oh riomwo ahpw pahn iang uhk momour. 37 Ke sohte pahn kapatahiong wihn ni noumw mwohni me ke kamangaiong ih+ de kihong wihn ni mwenge me ke kihong. 38 Ngehi me Siohwa amwail Koht, me waikumwaildo sang nan sapwen Isip+ pwehn kihong kumwail sapwen Kenan, pwehn kasalehda me ngehi amwail Koht.+

39 “‘Ma riomw men me kin kousoan limwahmw semwehmwehla oh e anahne netikihong uhk pein ih,+ ke sohte pahn itonehng ih en wia doadoahk en lidu.+ 40 Ke pahn wiahkin ih duwehte tohndoadoahk alahlda men,+ duwehte emen me kousoanla rehmw. E pahn papahiuk lao lel pahr en Supilih. 41 Mwuri e pahn kohkohsang rehmw, ih oh nah seri kan* me mi reh, oh e pahn pwurala rehn eh peneinei. E pahn pwurala nan sapwen seme mehn mahs ako.+ 42 Pwe irail nei lidu kei me I wahdo sang nan sapwen Isip.+ Irail sohte pahn netikihla pein irail ni ahl me lidu men kin netila. 43 Ke sohte pahn wiakauwe ih,+ oh ke pahn lemmwiki omw Koht.+ 44 Noumw lidu ohl oh lih akan pahn kohsang wehi kan me kapilkumwailpene, kumwail kak pwainda ohl de lih lidu men sang rehrail. 45 Oh pil kumwail kak pwainda lidu kan sang mehn liki kan me kin kousoan rehmwail+ oh sang arail peneinei kan me ipwidiong irail nan sapwamwail, oh kumwail pahn nainekinirailla. 46 Mwurin amwail mehla, noumwail seri kan kak sohsohkin irail, oh re pahn usehlahte wia lidu ong noumwail seri kan. Kumwail kak wiahkin irail nin duwen tohndoadoahk kei, ahpw ke sohte pahn wiakauwe riamwail mehn Israel kan.+

47 “‘Ahpw ma mehn liki men me kin kousoan rehmw kepwehpwehla oh riomw me kousoan limwah semwehmwehla oh pahn netikihla pein ih rehn mehn liki men me kin kousoan rehmw, de rehn kisehn peneinei en mehn liki men me kin kousoan rehmw, 48 e pahn ahnekihte pwuhng en pwainda sapahl mwurin eh netikihla pein ih. Emen rie pwutak kan kak pwainda sapahl ih,+ 49 de ohl me e pahn pahpahki de nein ohlo pwutak kak pwainda sapahl ih, de emen kiseh me keren,* emen eh peneinei, kak pwainda sapahl ih.

“‘De ma e kepwehpwehla, e pil kak pwainda sapahl pein ih.+ 50 E pahn iang aramas me pwainda iho oh wadek sounpar akan sang ahnsou me e netikihla pein ih lao lel pahr en Supilih,+ oh uwen pweine pahn pahrekiong sounpar akan.+ Pweinen eh rahnen doadoahk erein ahnsowo pahn duwehte pweinen tohndoadoahk alahlda men.+ 51 Ma miehte sounpar tohto luhwehdi, e pahn kapwurehla pweinen eh pweipwei sapahl nin duwen pahr kan me luhwe. 52 Ahpw ihte ma sounpar keite me luhwe lao lel pahr en Supilih, e pahn pein wadek oh kapwurehla pweinen eh pweipwei sapahl nin duwen pahr kan me luhwe. 53 E pahn pousehlahte papah ih nin duwen tohndoadoahk alahlda men ehuehu sounpar; oh ke pahn tehk me eh soumaso sohte pahn wiakauwe ih.+ 54 Ahpw, ma e sohte kak pwainda sapahl pein ih ni ahl pwukat, eri e pahn saledekla ni pahr en Supilih,+ ih oh nah seri kan* me mi reh.

55 “‘Pwe mehn Israel kan iei nei lidu. Irail nei lidu kei me I wahdo sang nan sapwen Isip.+ Ngehi me Siohwa amwail Koht.

26 “‘Kumwail sohte pahn wiahda koht soh katepe kan ong pein kumwail,+ oh kumwail sohte pahn kauwada sansal perperda ehu+ de uhr sarawi ehu ong pein kumwail, oh kumwail sohte pahn kihdi takai perperda+ nan sapwamwail pwe kumwail en poaridiong mwowe;+ pwe ngehi me Siohwa amwail Koht. 2 Kumwail pahn kapwaiada ei sapad oh kasalehda amwail lemmwiki* ei wasa sarawio. Ngehi me Siohwa.

3 “‘Ma kumwail pousehlahte weweid nan ei koasoandi kan oh kolokol ei kehkehlik kan oh kapwaiada mepwukat,+ 4 I pahn kamwerehdiong kumwail keteu ni ahnsou me konehng,+ oh sahpwo pahn kapwarehda wah kan,+ oh tuhkehn nansapw akan pahn kapwarehda wahrail. 5 Amwail ahnsoun kihsang kilin krein kan pahn reireila lao lel ahnsoun amwail dolung kreip, oh ahnsoun dolung kreip pahn reireila lao lel ni ahnsoun kamwarak; oh kumwail pahn tungoale pilawa lao kumwail medla oh kousoan nan sapwamwail ni amwail sohte perki mehkot.+ 6 I pahn kihdiong popohl nan sahpwo,+ oh kumwail pahn wendi oh sohte me pahn kamasak kumwail;+ oh I pahn kihsang nan sahpwo mahn lawalo keper kan, oh sohte me pahn mahwenkihong kumwail kedlahs. 7 Kumwail uhdahn pahn pwakih amwail imwintihti kan, oh kumwail pahn kemehkinirailla kedlahs. 8 Meh limmen rehmwail pahn pwakih meh 100, oh meh 100 rehmwail pahn pwakih meh 10,000, oh kumwail pahn kemehkihla amwail imwintihti kan kedlahs.+

9 “‘I pahn kapaia* kumwail oh kahrehiong kumwail en kaparaparala oh kihong kadaudokamwail tohto,+ oh I pahn kapwaiada ei inou lapo rehmwail.+ 10 Nindoken amwail kin tungutungoalehte wahnsahpw en sounpar en mwoweo, kumwail pahn anahne kihsang wahnsahpw en mwowe ko pwehn wiahda wasa ong me kapw kan. 11 Oh I pahn kihdi ei impwal sarawio nanpwungamwail,+ oh I sohte pahn soikumwailla. 12 I pahn weweid nanpwungamwail oh wiahla amwail Koht,+ oh kumwail pahn wiahla nei aramas.+ 13 Ngehi me Siohwa amwail Koht, me waikumwaildo sang nan sapwen Isip pwe kumwail en sohla wia ar lidu, oh I kauwehla amwail tuhkehn wisik oh wiahiong kumwail en alu duwehte aramas saledek kei.*

14 “‘Ahpw, ma kumwail sohte pahn rong ie de kapwaiada kehkehlik pwukat koaros,+ 15 oh ma kumwail soikala ei koasoandi kan,+ oh ma kumwail tatki ei kosonned kan me kahrehiong amwail sohte kapwaiada ei kehkehlik kan koaros, oh kumwail kauwehla ei inou lapo,+ 16 I pahn wiahiong kumwail mepwukat: I pahn kalokehkin kumwail lokolok, limengimeng oh soumwahu karakar, I pahn wiahiong pwoaren masamwail kan en edied oh kapwangeikumwailda lao sohla amwail kehl. Kumwail pahn kamwarak amwail werentuhke kan ahpw sohte katepe, pwe amwail imwintihti kan pahn kangasang wahn sapwamwail kan.+ 17 I pahn soikumwailla, oh kumwail pahn lohdi pahn amwail imwintihti kan;+ oh irail me kin kailongkin kumwail pahn sokpohmwail,+ oh kumwail pahn tang ni eh sohte me pwakipwakih kumwail.+

18 “‘Ma pil met sohte kahrehiong kumwail en rong ie, I pahn anahne kaloke kumwail pak isuh laudsang mahs pwehki dipamwail kan. 19 I pahn kauwehla amwail keptakai pohnmwahso kan oh wiahiong amwail nanleng en duwehla mete*+ oh amwail sampah en duwehla prons.* 20 Amwail doadoahngki amwail kehl pahn sohte katepe, pwe sapwamwail sohte pahn kapwarehda wah kan,+ oh tuhkehn sahpwo sohte pahn kapwarehda wah.

21 “‘Ahpw ma kumwail kin usehlahte uhwong ie oh kahng rong ie, eri I pahn anahne kaloke kumwail pak isuh laudsang mahs pwehki dipamwail kan. 22 I pahn kadarewei mahn lawalo en nansapw kan nanpwungamwail,+ oh re pahn kemehla noumwail seri kan+ oh kamwomwala noumwail mahn mand kan oh kamalaulauwihkumwailla oh amwail ahl kan pahn tehnla.+

23 “‘Mendahki mepwukat, ma kumwail kahng ale ei kopwung kan+ oh kumwail ngihtehtehki amwail uhwong ie, 24 eri I pil pahn uhwong kumwail, oh I pahn kaloke kumwail pak isuh laudsang mahs pwehki dipamwail kan. 25 I pahn wiahiong amwail imwintihti kan ren mahwenkihong kumwail kedlahs pwehki amwail kauwehla inou lapo.+ Ma kumwail kohpene nan amwail kahnimw kan, I pahn kadarewei soumwahu nanpwungamwail,+ oh kumwail pahn lohdi pahn amwail imwintihti kan.+ 26 Ni ei pahn lupukala reken pilawa* ong kumwail,+ lih ehk pahn kak umwunda kenomwail pilawa nan mehn uhmw ehute oh mwuri irail pahn teneki pilawao oh kihong kumwail ekis;+ oh kumwail pahn tungoale ahpw kumwail sohte pahn medkihla.+

27 “‘Mendahki met, ma kumwail sohte pahn rong ie oh kumwail ngihtehtehki amwail uhwong ie, 28 I pahn kalaudehla ei uhwong kumwail,+ oh I pahn anahne kaloke kumwail pak isuh laudsang mahs pwehki dipamwail kan. 29 Eri kumwail pahn anahne kangala uduken noumwail pwutak kan, oh kumwail pahn kangala uduken noumwail serepein kan.+ 30 I pahn kamwomwala amwail wasa ile sarawi kan+ oh karangkehdi amwail dewen warpwohmwahu kan oh koasoakehda paliwaramwail mehla kan pohn amwail dikedik kasaut kan* me sohte momour,+ oh I pahn sohpeisang kumwail pwehki amwail kasaut.+ 31 I pahn kamwomwala amwail kahnimw kan+ oh wiahiong amwail wasa sarawi kan en tehnla, oh I sohte pahn kupwurehla pwoh kansenamwahu en amwail meirong kan. 32 I pahn wiahiong sahpwo en tehnla,+ oh amwail imwintihti kan me kin kousoan loale pahn kangkakil sahpwo ni pwuriamwei.+ 33 Oh I pahn kamwarangkumwailpeseng nan wehi kan,+ oh I pahn usada kedlahs pwoat oh mweidohng en pwakih mwurimwail;+ oh sapwamwail pahn tehnla,+ oh amwail kahnimw kan pahn mwomwla.

34 “‘Ni ahnsowo sahpwo pahn kapwungala eh sapad erein rahn akan koaros me e tehnla, erein ahnsou me kumwail mihmi nan sapwen amwail imwintihti kan. Ni ahnsowo sahpwo pahn kommoal,* pwe e pahn anahne kapwungala eh sapad.+ 35 Sahpwo pahn kommoaldi erein rahn akan koaros me e tehnla, pwehki e sohte kommoal erein amwail sapad ni ahnsou me kumwail kin kousoan loale.

36 “‘A ong irail kan me pitila,+ I pahn audehkihda arail mohngiong masak nan sapwen arail imwintihti kan; oh ngilen tehntuhke me ipihpseli pahn kahrehiong irail en tangdoaui, oh re pahn tang duwehte emen me tangasang kedlahs oh pwupwudi ni eh sohte me pwakipwakih irail.+ 37 Irail pahn dipekelekel pohn emenemen duwehte irail me tangasang kedlahs pwoat, mendahki eh sohte me pwakipwakih irail. Kumwail sohte pahn kak pelianda amwail imwintihti kan.+ 38 Kumwail pahn sohrala nan wehi kan,+ oh sapwen amwail imwintihti kan pahn kadalleikumwailla. 39 Irail me luhwehdi kan pahn matala nan sapwen amwail imwintihti kan+ pwehki amwail sapwung. Ei, re pahn matala pwehki sapwung en arail pahpa kan.+ 40 Eri irail pahn wehkada arail sapwung kan+ oh pil sapwung oh salelepek en arail pahpa kan oh pohnese me re wiahda mwekid salelepek ni arail uhwong ie.+ 41 Ngehi eri uhwong irail+ ni ei wairaillahng nan sapwen arail imwintihti kan.+

“‘Mweinele arail mohngiong me sohte sirkumsaisla* pahn aktikitikla,+ oh eri irail pahn kapwungala arail sapwung kan. 42 Oh I pahn tamataman ei inou lap rehn Seikop,+ oh ei inou lap rehn Aisek,+ oh I pahn tamataman ei inou lap rehn Eipraam,+ oh I pahn tamataman sahpwo. 43 Erein ar kesehla sahpwo, sahpwo pahn kapwungala eh sapad+ oh tehnla ni ar sohte mi mwo, oh re pahn kapwungala ar sapwung, pwehki re soikala ei kosonned kan oh re tatki ei koasoandi kan.+ 44 Ahpw mendahki mepwukat koaros, erein arail mihmi nan sapwen arail imwintihti kan, I sohte mwahn pahn soikirailla douluhl+ de pil keseirailla lao re kamwomwmwomwla, pwe met pahn kauwehla ei inou lapo+ rehrail, pwe ngehi me Siohwa arail Koht. 45 Pwehki irail, I pahn tamataman inou lap rehn samarail mehn mahs ako+ me I wahsang nan sapwen Isip nindoken wehi kan ar kilikilang,+ pwehn kasalehda me ngehi arail Koht. Ngehi me Siohwa.’”

46 Mepwukat iei koasoandi kan, kopwung kan oh kosonned kan me Siohwa ketin koasoanehdi nanpwungen ih oh mehn Israel kan pohn Nahna Sainai ni eh ketin doadoahngki Moses.+

27 Siohwa ketin doula mahsanihong Moses: 2 “Koasoiong mehn Israel kan oh ndaiong irail, ‘Ma aramas emen kahukihla inou tohrohr ehu+ en patohwanohng Siohwa uwen pweipwei ehu me koasoandier ong aramas* emen, 3 uwen pweipwei me koasoandier ong ohl emen me sang sounpar 20 lel 60 pahn mi ni silper sekel* 50 nin duwen wadawad en sekel en wasa sarawio.* 4 Ahpw ma lih emen, uwen pweine me koasoandier pahn mi ni sekel 30. 5 Ma e mahki sounpar 5 lel 20, uwen pweipwei me koasoandier ong ohl emen pahn mi ni sekel 20 oh sekel 10 ong lih emen. 6 Ma e mahki sounpwong ehu kohda lel sounpar limau, uwen pweipwei me koasoandier ong pwutak men pahn mi ni silper sekel limau oh silper sekel siluh ong serepein men.

7 “‘Ma e mahki sounpar 60 kohda, uwen pweipwei me koasoandier ong ohl emen pahn mi ni sekel 15 oh sekel 10 ong lih emen. 8 Ahpw ma e uhdahn semwehmwe oh sohte kak pwainla pweineo,+ aramaso pahn kesihnenda mwohn samworo, oh samworo pahn koasoanehdi uwen pweine. Samworo pahn wiahda uwen pweipwei ehu me aramas me kahukihla inowo kak pwain.+

9 “‘Ma inou me e kahukihlao pid mahn emen me mwahuwong meirongala ong Siohwa, soahng koaros me kohieng Siohwa pahn wiahla mehkot sarawi. 10 E sohte pahn kak wahdo emen mahn tohrohr de wiliandi mahno ni me mwahu ong me suwed de me suwed ong me mwahu. Ahpw ma e pahn wiliankihdi mahno ong emen mahn tohrohr, mehn tapio oh me wiliandio koaros pahn sarawihla. 11 Ma inou me e kahukihlao pid mahn samin men+ me sohte pahn meirongala nin duwen meirong ong Siohwa, eri e pahn kasihnenihada mahno mwohn samworo. 12 Samworo ahpw pahn koasoanehdi pweinen mahno, nin duwen mwomwen mahno ma e mwahu de suwed. Uwen pweine me samworo koasoanehdi ihme pahn doadoahk. 13 Ahpw ma e men pwainda sapahl mahno, eri e pahn anahne kapatahiong limakis ehun pweine me koasoandiero.+

14 “‘Eri ma aramas emen pahn kasarawih imwe nin duwen mehkot sarawi ong Siohwa, samworo pahn koasoanehdi pweinen ihmwo, nin duwen mwomwen ihmwo ma e mwahu de suwed. Uwen pweipwei ehu me samworo koasoanehdi, ih met me pahn wia pweine.+ 15 Ahpw ma aramas me kasarawih imweo men pwainda sapahl ihmwo, eri e pahn kapatahiong limakis ehun pweine me koasoandiero, oh e pahn imwanekihla.

16 “‘Ma aramas emen kasarawihong Siohwa ekei mwaht me e ahneki, pweine pahn koasoandi nin duwen tohtohn werentuhke me anahne kamwarakdi nan mwahto: ohmer ehu* en werentuhke parli pahn mi ni silper sekel 50. 17 Ma e kasarawih eh mwahto sang pahr en Supilih,+ uwen pweine me koasoandiero ihme pahn doadoahk. 18 Ma e kasarawih eh mwahto mwurin pahr en Supilih, samworo pahn koasoanediong ih pweine me pahn pahrekiong luhwen sounpar kan lao lel pahr en Supilih kohkohdo, oh uwen pweine me koasoandiero pahn tikitikla.+ 19 Ahpw ma aramas me kasarawih mwahto pahn pwainda sapahl, e pahn kapatahiong limakis ehun pweine me koasoandier, oh e pahn ahnekihte mwahto. 20 Eri ma e sohte pahn pwainda sapahl mwahto oh mwahto netila rehn emen aramas tohrohr, mwahto sohte pahn pwurehng pweipweida sapahl. 21 Ni mwahto eh pahn saledekla nan pahr en Supilih, e pahn wiahla mehkot sarawi ong Siohwa, nin duwen mwaht ehu me koasoandier ong ih. E pahn wiahla sapwen samworo kan.+

22 “‘Ma aramas emen kasarawihong Siohwa mwaht ehu me e pwainda me kaidehn kisehn sahpw me e sohsohki,+ 23 samworo pahn koasoanediong ih uwen pweine lao lel pahr en Supilih, oh e pahn kihda uwen pweine me koasoandier ni rahno.+ Met iei mehkot me sarawi ong Siohwa. 24 Ni pahr en Supilih, mwahto pahn kapwurpwurala rehn aramas me e pwaindahsango, aramas me uhdahn ahneki mwahto.+

25 “‘Pweine koaros pahn koasoandi nin duwen wadawad en sekel en wasa sarawio. Sekel ehu pahn pahrekiong kera* 20.

26 “‘Ahpw, sohte me pahn kasarawih mesenihen mahn akan, pwehki e ipwidi nin duwen mesenih ong Siohwa.+ Mehnda ma kouwol de sihpw, Siohwa me sapwellimanki.+ 27 Ma mahno kohsang mahn samin kan oh e pwainda sapahl mahno ni uwen pweipwei me koasoandier, e pahn kapatahiong limakis ehun pweineo.+ Ahpw ma e sohte pahn pwainda sapahl, mahno pahn netila ni uwen pweipwei me koasoandier.

28 “‘Ahpw mehkot me aramas emen koasoanehdi ong Siohwa kohkohlahte* sang ni eh kepwe kan sohte pahn kak netila de pweipweida sapahl, mehnda ma aramas de mahn akan de mwaht me e ahneki. Soahng koaros me koasoandier iei mehkot me uhdahn sarawi ong Siohwa.+ 29 Oh pil, sohte aramas emen me pakadeikda* oh katohrohrla pwe en kasohrala pahn pweipweida sapahl.+ E uhdahn pahn kamakamala.+

30 “‘Eisek kis ehu koaros+ en sahpwo, mehnda ma wahn mwahto de wahntuhke kan, iei sapwellimen Siohwa. Met iei mehkot me sarawi ong Siohwa. 31 Ma aramas emen men pwainda sapahl eh eisek kis ehun mepwukat, e pahn kapatahiong limakis ehun pweineo. 32 A duwen eisek kis ehun pelin kou oh pelin sihpw koaros, sang mahn pwukat koaros me alu daulih pahn nein silepeo sokon, kaeisek en mahno* pahn wiahla mehkot sarawi ong Siohwa. 33 E sohte pahn kasawih ma e mwahu de suwed, de pil wiliandi mahno. Ahpw ma e song en wiliandi mahno, mehn tapio oh me wiliandio koaros pahn wiahla mehkot sarawi.+ E sohte pahn pweipweida sapahl.’”

34 Ih kehkehlik pwukat me Siohwa ketikihong Moses ong mehn Israel kan pohn Nahna Sainai.+