NEMPE KAN
1 Siohwa ketin mahseniong Moses nan sapwtehn en Sainai,+ nan impwal en mihtingo,+ ni keieun rahnen keriaun sounpwong, ni keriaun sounpar en arail pedoisang nan sapwen Isip.+ E ketin mahsanih: 2 “Wia wadawad+ en mwomwohdisohn mehn Israel kan* pwon emenemen nin duwen arail peneinei kan, nin duwen samarail mehn mahs ako, sang ni kileldien eden ohl akan koaros. 3 Kowe oh Aaron pahn kilelehdi irail koaros me mahki sounpar 20 kohda+ oh kak iang karis en sounpei nan Israel nin duwen arail pwihn kan.*
4 “Ale emen ohl sang ehuehu keinek en iang kumwa; emenemen me pahn wia kaunen eh keinek.+ 5 Iet eden ohl akan me pahn sewese kumwa: sang keinek en Reupen, Elisur+ nein Sedeur; 6 sang keinek en Simion, Selumiel+ nein Surisadai; 7 sang keinek en Suda, Nahson+ nein Aminadap; 8 sang keinek en Isakar, Nedanel+ nein Suar; 9 sang keinek en Sepulon, Eliap+ nein Ihlon; 10 sang nein Sosep pwutak kan: sang keinek en Epraim,+ Elisama nein Ammihud; sang keinek en Manase, Kameliel nein Pedasur; 11 sang keinek en Pensamin, Apidan+ nein Kideoni; 12 sang keinek en Dan, Ahieser+ nein Amisadai; 13 sang keinek en Aser, Pakiel+ nein Okran; 14 sang keinek en Kad, Eliasap+ nein Deuel; 15 sang keinek en Napdali, Aira+ nein Enan. 16 Ih irail pwukat me likwerdo sang mwomwohdiso. Irail me kaunen+ keinek kan en arail pahpa kan, kaunen mehn Israel kid kan.”+
17 Eri Moses oh Aaron ale ohl pwukat me pilipilda sang rehn Koht. 18 Irail kapokonepene mwomwohdiso pwon ni keieun rahnen keriaun sounpwong, pwe emenemen me mahki sounpar 20 kohda en kileldi ni adarail,+ ni arail peneinei oh nin duwen samarail mehn mahs ako, 19 duwehte me Siohwa ketin kehkehlingkihong Moses. Moses eri kileleiraildi nan sapwtehn en Sainai.+
20 Kadaudok kan en Reupen nein Israel mesenih,+ kileldi ni adarail, ni arail peneinei, oh nin duwen samarail mehn mahs ako. Emenemen ohl koaros me mahki sounpar 20 kohda oh kak iang karis en sounpei wadawadedi, 21 oh aramas me kileldi nan keinek en Reupen patpene meh 46,500.
22 Kadaudok en Simion kan+ kileldi ni adarail, ni arail peneinei, oh nin duwen samarail mehn mahs ako. Emenemen ohl koaros me mahki sounpar 20 kohda oh kak iang karis en sounpei wadawadedi, 23 oh aramas me kileldi nan keinek en Simion patpene meh 59,300.
24 Kadaudok en Kad kan+ kileldi ni adarail, ni arail peneinei, oh nin duwen samarail mehn mahs ako. Ohl koaros me mahki sounpar 20 kohda oh kak iang karis en sounpei wadawadedi, 25 oh aramas me kileldi nan keinek en Kad patpene meh 45,650.
26 Kadaudok en Suda kan+ kileldi ni adarail, ni arail peneinei, oh nin duwen samarail mehn mahs ako. Ohl koaros me mahki sounpar 20 kohda oh kak iang karis en sounpei wadawadedi, 27 oh aramas me kileldi nan keinek en Suda patpene meh 74,600.
28 Kadaudok en Isakar kan+ kileldi ni adarail, ni arail peneinei, oh nin duwen samarail mehn mahs ako. Ohl koaros me mahki sounpar 20 kohda oh kak iang karis en sounpei wadawadedi, 29 oh aramas me kileldi nan keinek en Isakar patpene meh 54,400.
30 Kadaudok en Sepulon kan+ kileldi ni adarail, ni arail peneinei, oh nin duwen samarail mehn mahs ako. Ohl koaros me mahki sounpar 20 kohda oh kak iang karis en sounpei wadawadedi, 31 oh aramas me kileldi nan keinek en Sepulon patpene meh 57,400.
32 Kadaudok en Sosep kan sang Epraim+ kileldi ni adarail, ni arail peneinei, oh nin duwen samarail mehn mahs ako. Ohl koaros me mahki sounpar 20 kohda oh kak iang karis en sounpei wadawadedi, 33 oh aramas me kileldi nan keinek en Epraim patpene meh 40,500.
34 Kadaudok en Manase kan+ kileldi ni adarail, ni arail peneinei, oh nin duwen samarail mehn mahs ako. Ohl koaros me mahki sounpar 20 kohda oh kak iang karis en sounpei wadawadedi, 35 oh aramas me kileldi nan keinek en Manase patpene meh 32,200.
36 Kadaudok en Pensamin kan+ kileldi ni adarail, ni arail peneinei, oh nin duwen samarail mehn mahs ako. Ohl koaros me mahki sounpar 20 kohda oh kak iang karis en sounpei wadawadedi, 37 oh aramas me kileldi nan keinek en Pensamin patpene meh 35,400.
38 Kadaudok en Dan kan+ kileldi ni adarail, ni arail peneinei, oh nin duwen samarail mehn mahs ako. Ohl koaros me mahki sounpar 20 kohda oh kak iang karis en sounpei wadawadedi, 39 oh aramas me kileldi nan keinek en Dan patpene meh 62,700.
40 Kadaudok en Aser kan+ kileldi ni adarail, ni arail peneinei, oh nin duwen samarail mehn mahs ako. Ohl koaros me mahki sounpar 20 kohda oh kak iang karis en sounpei wadawadedi, 41 oh aramas me kileldi nan keinek en Aser patpene meh 41,500.
42 Kadaudok en Napdali kan+ kileldi ni adarail, ni arail peneinei, oh nin duwen samarail mehn mahs ako. Ohl koaros me mahki sounpar 20 kohda oh kak iang karis en sounpei wadawadedi, 43 oh aramas me kileldi nan keinek en Napdali patpene meh 53,400.
44 Ih irail pwukat me kileldi sang rehn Moses iangahki Aaron oh kaun 12 en Israel, emenemen wiliandi eh keinek. 45 Mehn Israel kan koaros me mahki sounpar 20 kohda oh kak iang karis en sounpei nan Israel kileldi nin duwen samarail mehn mahs ako, 46 oh koaros me kileldi patpene meh 603,550.+
47 Ahpw mehn Lipai kan+ sohte kileldi nanpwungarail nin duwen keinek en arail pahpa kan.+ 48 Siohwa eri ketin mahsanihong Moses: 49 “Ihte keinek en Lipai me ke sohte pahn kilelehdi, oh ke sohte pahn kapatahiong irail mehn Israel teikan.+ 50 Ke pahn idihada mehn Lipai kan ren apwalih impwal sarawi en Kadehdeo+ oh dipwisawi kan koaros oh mehkoaros me kisehn impwal sarawio.+ Irail pahn wa impwal sarawio oh dipwisawi kan koaros+ oh re pahn papah ni impwal sarawio,+ oh re pahn kauwada arail impwal kan kapilpene impwal sarawio.+ 51 Ahnsou koaros me impwal sarawio pahn mwekid, mehn Lipai kan pahn kin kamwerehdi impwal sarawio;+ oh ni impwal sarawio eh pahn pwurehng kohpene, mehn Lipai kan pahn kin kauwada; oh emen me sohte mweimwei* me kohdo keren pahn kamakamala.+
52 “Emenemen mehn Israel pahn kauwada eh impwal nan eh kahnimpwal me koasoandier, emenemen ohl nin duwen eh keinek siluh*+ ni arail pwihn kan.* 53 Oh mehn Lipai kan pahn kauwada imwarail impwal kan kapil impwal sarawi en Kadehdeo, pwe ei engieng en dehr kohwong mwomwohdisohn mehn Israel kan;+ oh mehn Lipai kan pahn pwukoahki apwalih* impwal sarawi en Kadehdeo.”+
54 Aramas en Israel ko eri kapwaiada mehkoaros me Siohwa ketin kehkehlingkihong Moses. Irail uhdahn kapwaiada.
2 Siohwa eri ketin mahsanihong Moses oh Aaron: 2 “Mehn Israel kan pahn kauwada imwarail impwal kan wasa me arail keinek siluh kan+ kileldiong ie, emenemen pahn mi limwahn pilaik* en seme mehn mahs ako. Irail pahn kauwada imwarail impwal sallahng impwal en mihtingo, kapilpene impwalo.
3 “Irail kan me kauwada imwarail impwal kan ni palimese me sallahng wasa me ketipino kin dakada ie, iei keinek siluh en kahnimpwal en Suda nin duwen arail pwihn kan;* kaunen kadaudok en Suda kan iei Nahson+ nein Aminadap. 4 Irail kan me kileldi nan eh karis en sounpei iei meh 74,600.+ 5 Irail me kauwada imwarail impwal limwah iei keinek en Isakar; kaunen kadaudok en Isakar kan iei Nedanel+ nein Suar. 6 Irail kan me kileldi nan eh karis en sounpei iei meh 54,400.+ 7 Ni pali teio iei keinek en Sepulon; kaunen kadaudok en Sepulon kan iei Eliap+ nein Ihlon. 8 Irail kan me kileldi nan eh karis en sounpei iei meh 57,400.+
9 “Irail koaros me kileldi nan karis en sounpei en kahnimpwal en Suda iei meh 186,400. Irail me pahn tepin kihpene imwarail impwal kan.+
10 “Keinek siluh en kahnimpwal en Reupen+ nin duwen arail pwihn kan* pahn mi ni palieir; kaunen kadaudok en Reupen kan iei Elisur+ nein Sedeur. 11 Irail kan me kileldi nan eh karis en sounpei iei meh 46,500.+ 12 Irail me kauwada imwarail impwal limwah iei keinek en Simion; kaunen kadaudok en Simion kan iei Selumiel+ nein Surisadai. 13 Irail kan me kileldi nan eh karis en sounpei iei meh 59,300.+ 14 Ni pali teio iei keinek en Kad; kaunen kadaudok en Kad kan iei Eliasap+ nein Reuel. 15 Irail kan me kileldi nan eh karis en sounpei iei meh 45,650.+
16 “Irail koaros me kileldi nan karis en sounpei en kahnimpwal en Reupen iei meh 151,450, oh irail me pahn keriaun kihpene imwarail impwal kan.+
17 “Ni ahnsou me impwal en mihtingo pahn mwekid,+ kahnimpwal en mehn Lipai kan me pahn mi nanwerengen kahnimpwal teikan.
“Keinek kan pahn seiloak ni soangen koasoandiohte me irail kauwada imwarail impwal kan,+ ehuehu keinek nan eh wasa, nin duwen arail keinek siluh.
18 “Keinek siluh en kahnimpwal en Epraim nin duwen arail pwihn kan* pahn mi ni palikapi; kaunen kadaudok en Epraim kan iei Elisama+ nein Ammihud. 19 Irail kan me kileldi nan eh karis en sounpei iei meh 40,500.+ 20 Irail me mi limwah iei keinek en Manase;+ kaunen kadaudok en Manase kan iei Kameliel+ nein Pedasur. 21 Irail kan me kileldi nan eh karis en sounpei iei meh 32,200.+ 22 Ni pali teio iei keinek en Pensamin; kaunen kadaudok en Pensamin kan iei Apidan+ nein Kideoni. 23 Irail kan me kileldi nan eh karis en sounpei iei meh 35,400.+
24 “Irail koaros me kileldi nan karis en sounpei en kahnimpwal en Epraim iei meh 108,100, oh irail me pahn kesiluhwen kihpene imwarail impwal kan.+
25 “Keinek siluh en kahnimpwal en Dan nin duwen arail pwihn kan* pahn mi ni paliepeng; kaunen kadaudok en Dan kan iei Ahieser+ nein Amisadai. 26 Irail kan me kileldi nan eh karis en sounpei iei meh 62,700.+ 27 Irail me kauwada imwarail impwal limwah iei keinek en Aser; kaunen kadaudok en Aser kan iei Pakiel+ nein Okran. 28 Irail kan me kileldi nan eh karis en sounpei iei meh 41,500.+ 29 Ni pali teio iei keinek en Napdali; kaunen kadaudok en Napdali kan iei Aira+ nein Enan. 30 Irail kan me kileldi nan eh karis en sounpei iei meh 53,400.+
31 “Irail koaros me kileldi nan kahnimpwal en Dan iei meh 157,600. Irail pahn kihpene imwarail impwal kan keieu mwuhr,+ nin duwen arail keinek siluh.”
32 Ih mehn Israel pwukat me kileldi nin duwen samarail mehn mahs ako; patpene uwen irail me kileldiong karis en sounpei nan kahnimpwal kan iei meh 603,550.+ 33 Ahpw mehn Lipai kan sohte iang mehn Israel teikan kileldi,+ duwehte me Siohwa ketin kehkehlingkihong Moses. 34 Mehn Israel kan kapwaiada mehkoaros me Siohwa ketin kehkehlingkihong Moses. Ih met mwomwen arail kauwada imwarail impwal kan nin duwen arail keinek siluh+ oh mwomwen arail kihpene imwarail impwal kan,+ emenemen nin duwen eh peneinei oh nin duwen samarail mehn mahs akan.
3 Eri iet irekidien* peneinei en Aaron oh Moses ni rahn me Siohwa ketin mahseniong Moses pohn Nahna Sainai.+ 2 Iet eden nein Aaron pwutak kan: Nadap me mesenih, oh Apihu,+ Eliesar+ oh Idamar.+ 3 Ih eden nein Aaron pwutak kan met, samworo keidi kan me kesepwilda* pwe ren papah nin duwen samworo kei.+ 4 Ahpw, Nadap oh Apihu mehla mwohn silangin Siohwa ni ahnsou me ira meirongki kisiniei keinepwi mwohn silangin Siohwa+ nan sapwtehn en Sainai, oh sohte neira pwutak. Ahpw Eliesar+ oh Idamar+ pousehlahte iang ara pahpao Aaron papah nin duwen samworo kei.
5 Siohwa eri ketin mahsanihong Moses: 6 “Kahrehdo keinek en Lipai+ mwowe, oh kasihnenihrailda mwohn samworo Aaron, oh irail pahn papah+ ih. 7 Irail pahn kapwaiada arail pwukoa kan ong ih oh ong mwomwohdiso pwon mwohn impwal en mihtingo ni ar pahn kapwaiada arail doadoahk me pid impwal sarawio. 8 Irail pahn apwalih dipwisou kan koaros+ en impwal en mihtingo oh kapwaiada arail pwukoa kan ong mehn Israel kan ni ar pahn apwalih doadoahk kan me pid impwal sarawio.+ 9 Ke pahn kihla mehn Lipai kan rehn Aaron oh nah pwutak kan. Mehn Lipai kan idihdida sang mehn Israel kan pwe ren sewese ih.+ 10 Ke pahn idihada Aaron oh nah pwutak kan, oh re pahn kapwaiada arail pwukoahn samworo kan,+ oh emen me sohte mweimwei* me kohdo keren pahn kamakamala.”+
11 Siohwa ketin doula mahsanihong Moses: 12 “Kilang! I pahn ale mehn Lipai kan sang mehn Israel kan pwehn wiliankihdi mesenih koaros* en mehn Israel,+ oh mehn Lipai kan pahn wiahla nei. 13 Pwe mesenih koaros iei nei.+ Ni rahn me I kemehla mesenih koaros nan sapwen Isip,+ I kasarawihong ie mesenih koaros nan Israel sang aramas lel mahn.+ Irail pahn wiahla nei. Ngehi me Siohwa.”
14 Siohwa ketin doula mahsanihong Moses nan sapwtehn en Sainai:+ 15 “Kilelehdi mehn Lipai kan nin duwen samarail mehn mahs ako oh nin duwen arail peneinei kan. Ke pahn kilelehdi ohl koaros me mahki sounpwong ehu kohda.”+ 16 Moses eri kileleiraildi duwehte me Siohwa ketin kehkehlingki. 17 Iet eden nein Lipai pwutak kan: Kerson, Kohad oh Merari.+
18 Eri iet eden nein Kerson pwutak kan nin duwen ara peneinei kan: Lipni oh Simei.+
19 Nein Kohad pwutak kan nin duwen arail peneinei kan iei Amram, Isar, Ipron oh Ussiel.+
20 Nein Merari pwutak kan nin duwen ara peneinei kan iei Mahli+ oh Musi.+
Ih peneinei en mehn Lipai kan met nin duwen samarail mehn mahs ako.
21 Peneinei en mehn Lipni kan+ oh peneinei en mehn Simei kan kohsang rehn Kerson. Ih peneinei en mehn Kerson kan met. 22 Uwen tohtohn neirail ohl akan koaros me mahki sounpwong ehu kohda me kileldi iei meh 7,500.+ 23 Peneinei en mehn Kerson kan kauwada imwarail impwal kan mwurin impwal sarawio+ ni palikapi. 24 Kaunen peneinei en pwihnen mehn Kerson kan iei Eliasap nein Lael. 25 Pwukoa me mehn Kerson kan+ ahneki nan impwal en mihtingo iei en apwalih impwal sarawio oh pwelengen masloale oh masliki,+ kahdeng+ en wasahn pedolong en impwal en mihtingo, 26 kahdeng langalang kan+ en wasa me kelpeneo, kahdeng+ en wasahn pedolong en wasa me kelpeneo me kapil impwal sarawio oh pei sarawio, sahl kan en impwalo, oh doadoahk koaros me pid mepwukat.
27 Peneinei en mehn Amram kan, peneinei en mehn Isar kan, peneinei en mehn Ipron kan, oh peneinei en mehn Ussiel kan kohsang rehn Kohad. Ih peneinei en mehn Kohad kan met.+ 28 Uwen tohtohn ohl akan koaros me mahki sounpwong ehu kohda iei meh 8,600; irail me pwukoahki apwalih wasa sarawio.+ 29 Peneinei en kadaudok en Kohad kan kauwada imwarail impwal kan ni palieir en impwal sarawio.+ 30 Kaunen peneinei en pwihnen mehn Kohad kan iei Elisapan nein Ussiel.+ 31 Arail pwukoa iei en apwalih Kohpwao,+ tehpelo,+ dewen lampo,+ pei sarawi kan,+ dipwisou kan+ me kin kadoadoahk ong papah nan wasa sarawio, kahdengo,+ oh doadoahk koaros me pid mepwukat.+
32 Kaunen kaun akan en mehn Lipai kan iei Eliesar+ nein samworo Aaron, oh e kin apwalih irail me kin wia pwukoa kan nan wasa sarawio.
33 Peneinei en mehn Mahli kan oh peneinei en mehn Musi kan kohsang rehn Merari. Ih peneinei en Merari kan met.+ 34 Uwen tohtohn ohl akan koaros me mahki sounpwong ehu kohda me kileldi iei meh 6,200.+ 35 Kaunen peneinei en pwihnen Merari kan iei Suriel nein Apieil. Irail kauwada imwarail impwal kan ni paliepeng en impwal sarawio.+ 36 Mehn Merari kan me pwukoahki apwalih lepin uhr kan*+ en impwal sarawio, tuhkehn ndape kan,+ uhr kan,+ poahsoan kan, dipwisawi kan koaros,+ oh doadoahk koaros me pid mepwukat,+ 37 oh pil uhr kan me kapil wasa me kelpeneo oh poahsoane kan,+ metehn kateng impwalo, oh sahl kan en impwalo.
38 Irail me kauwada imwarail impwal kan mwohn impwal sarawio ni palimese, mwohn impwal en mihtingo me sallahng wasa me ketipino kin dakada ie, iei Moses oh Aaron oh nah pwutak kan. Irail me pwukoahki apwalih wasa sarawio nin duwen arail pwukoa ong mehn Israel kan. Emen me sohte mweimwei* me kohdo keren pahn kamakamala.+
39 Ohl en mehn Lipai kan koaros me mahki sounpwong ehu kohda, me Moses oh Aaron kilelehdi nin duwen arail peneinei kan sang ni ruwes en Siohwa, iei meh 22,000.
40 Siohwa eri ketin mahsanihong Moses: “Kilelehdi mesenih pwutak koaros en mehn Israel kan me mahki sounpwong ehu kohda,+ wadekiraildi, oh ntingihedi adarail kan. 41 Ke pahn ale mehn Lipai kan ong ie, pwe ren wiliandi mesenih koaros en mehn Israel kan,+ oh ale nein mehn Lipai kan mahn mand kan pwehn wiliandi mesenih koaros en nein mehn Israel kan mahn mand kan.+ Ngehi me Siohwa.” 42 Moses eri kilelehdi mesenih koaros en mehn Israel kan, duwehte me Siohwa ketin kehkehlingkihong ih. 43 Uwen tohtohn mesenih ohl koaros me mahki sounpwong ehu kohda me kileldi ni adarail iei meh 22,273.
44 Siohwa ketin doula mahsanihong Moses: 45 “Ale mehn Lipai kan pwehn wiliandi mesenih koaros en mehn Israel kan, oh ale nein mehn Lipai kan mahn mand kan pwehn wiliandi nein mehn Israel mahn mand kan, oh mehn Lipai kan pahn wiahla nei. Ngehi me Siohwa. 46 Nin duwen pweinen pweipwei sapahl+ ong mesenihen mehn Israel 273 me tohtohsang mehn Lipai kan,+ 47 ke pahn ale sekel* limau ong emenemen,+ nin duwen wadawad en sekel en wasa sarawio.* Sekel ehu iei kera* 20.+ 48 Ke pahn kihong Aaron oh nah pwutak kan mwohnio nin duwen pweinen pweipwei sapahl ong irail me tohtohsang mehn Lipai kan.” 49 Moses eri kihpene mwohni en pweinen pweipwei sapahlo pwe en pwainda sapahl irail kan me tohtohsang mehn Lipai kan. 50 E ale mwohni sang rehn mesenihen mehn Israel kan, sekel 1,365, nin duwen wadawad en sekel en wasa sarawio. 51 Moses eri kihong Aaron oh nah pwutak kan mwohni ong pweinen pweipwei sapahlo nin duwen mahsen* en Siohwa, duwehte me Siohwa ketin kehkehlingkihong Moses.
4 Siohwa eri ketin mahsanihong Moses oh Aaron: 2 “Wadawad en kadaudok en Kohad kan+ sang nanpwungen nein Lipai pwutak kan en wiawi, nin duwen arail peneinei kan oh nin duwen samarail mehn mahs ako, 3 irail koaros me mahki sounpar 30+ lel 50+ me mi nan pwihn me kin wia doadoahk nan impwal en mihtingo.+
4 “Iet doadoahk me kadaudok en Kohad kan pahn wia nan impwal en mihtingo.+ Met iei mehkot me uhdahn sarawi: 5 Ni ahnsou me mehn Israel kan pahn kihpene impwalo oh mwesel, Aaron oh nah pwutak kan pahn pedolong oh kihsang kahdeng en perehpeo+ oh pwainkihdi met kohpwahn+ Kadehdeo. 6 Irail pahn pwainkihdi powe kilin sihlo oh perekipeseng powe lepin likou poh mei tohr oh kadilong tuhkehn wisik kan+ nan dewe.
7 “Irail pil pahn perekipeseng lepin likou poh mei ehu pohn tehpel en pilawahn kasansalo,+ oh re pahn kihdiong powe dahl kan, kep kan, pwohl kan, oh sah kan en meirong en wain;+ pilawa me kin kaukaule meirongalao+ pahn mihmihte powe. 8 Irail pahn perekipeseng lepin likou weitahta ehu pohn mepwukat oh pwainkihdi kilin sihlo oh kadilong tuhkehn wisik kan+ nan dewe. 9 Mwuri irail pahn ale lepin likou poh mei ehu oh pwainkihdi dewen lampo,+ iangahki lamp kan,+ tihpw kan, dewen mwoalus kan,+ oh deupen leh koaros me re kin doadoahngkihong lamp ko. 10 Irail pahn kidimkipene kilin sihlo met oh dipwisawi kan koaros oh kihdiong pohn tuhkehn wisik ehu. 11 Oh irail pahn perekipeseng lepin likou poh mei ehu pohn pei sarawi kohlo,+ pwainkihdi kilin sihlo met oh kadilong tuhkehn wisik kan+ nan dewe. 12 Irail eri ale dipwisoun+ papah kan koaros me re kin kaukaule doadoahngki ni ar kin papah nan wasa sarawio oh kihong mepwukat nan lepin likou poh mei ehu oh pwainkihdi kilin sihlo met oh kihdiong mepwukat pohn tuhkehn wisik ehu.
13 “Irail pahn kihsang pehs kan* pohn pei sarawio+ oh perekipeseng powe lepin likou poh ntahnmwel ehu sang wunen sihpw.* 14 Irail pahn kihdi powe dipwisou kan koaros me kin kadoadoahk ni ar kin papah ni pei sarawio: dewen mwoalus kan, pwohk kan, sapwel kan, oh pwohl kan, dipwisoun pei sarawio koaros;+ oh irail pahn perekipeseng powe kilin sihlo oh kadilong tuhkehn wisik kan+ nan dewe.
15 “Aaron oh nah pwutak kan pahn anahne kanekehla ar pwaindi wasa sarawio+ oh dipwisou kan koaros en wasa sarawio ni ahnsou me kahnimpwalo pahn mwesel. Kadaudok en Kohad kan pahn pedolong oh wahda mepwukat,+ ahpw irail sohte pahn doahke wasa sarawio pwe re de mehla.+ Mepwukat iei pwukoahn* kadaudok en Kohad kan me pid impwal en mihtingo.
16 “Eliesar+ nein samworo Aaron pahn pwukoahki apwalih lehn lampo,+ warpwohmwahu,+ meirong en krein* me kin kaukaule wiawi, oh lehn keio.+ E pahn apwalih impwal sarawio pwon oh mehkoaros me mi loale, iangahki wasa sarawio oh dipwisawi kan.”
17 Siohwa ketin doula mahsanihong Moses oh Aaron: 18 “Dehr mweidohng peneinei en mehn Kohad kan+ ren kasohrala sang rehn mehn Lipai kan. 19 Ahpw wia met ong irail pwe ren momourte oh sohte mehla pwehki ar keidohng soahng kan me uhdahn sarawi.+ Aaron oh nah pwutak kan pahn pedolongala oh kilelehiong emenemen irail eh doadoahk oh dahme e pahn wa. 20 Irail sohte pahn pedolong oh kilang soahng sarawi kan mehnda ma ahnsoutehkis, pwe re de mehla.”+
21 Siohwa eri ketin mahsanihong Moses: 22 “Wadawad en kadaudok en Kerson kan+ en wiawi nin duwen samarail mehn mahs ako oh arail peneinei kan. 23 Ke pahn kilelehdi irail koaros me mahki sounpar 30 lel 50 me mi nan pwihn me kin papah nan impwal en mihtingo. 24 Iet me peneinei en mehn Kerson kan kileldiong ren apwalih oh wa:+ 25 Irail pahn wa lepin likoun impwal kan en impwal sarawio,+ impwal en mihtingo, pweineo oh kilin sihl me mi powe,+ kahdeng en wasahn pedolong en impwal en mihtingo,+ 26 kahdeng langalang en wasa me kelpeneo,+ kahdeng en wasahn pedolong en wasa me kelpene+ me kapil impwal sarawio oh pei sarawio, sahl kan en impwalo oh dipwisawi kan koaros oh mehkoaros me kin kadoadoahk ong papah. Ih met me arail pwukoa. 27 Aaron oh nah pwutak kan pahn apwalih doadoahk oh wisik koaros en mehn Kerson kan;+ kumwail pahn kilelehiong irail en pwukoahki wisik pwukat koaros. 28 Ih doadoahk wet me peneinei en mehn Kerson kan pahn kapwaiada nan impwal en mihtingo,+ oh arail pwukoa kan mi pahn kaweid en Idamar+ nein samworo Aaron.
29 “Me pid kadaudok en Merari kan,+ ke pahn kileleiraildi nin duwen arail peneinei oh nin duwen samarail mehn mahs ako. 30 Ke pahn kilelehdi irail me mahki sounpar 30 lel 50, irail koaros me mi nan pwihn me kin papah nan impwal en mihtingo. 31 Iet me re pwukoahki wa+ me pid arail doadoahk ni impwal en mihtingo: lepin uhr kan*+ en impwal sarawio, tuhkehn ndape kan,+ uhr kan,+ poahsoane kan;+ 32 uhr kan+ me kapilpene wasa me kelpeneo, poahsoane kan,+ metehn kateng impwalo,+ oh sahl kan en impwalo iangahki dipwisawi kan koaros oh doadoahk koaros me pid mepwukat. Kumwail pahn kilelehiong emenemen irail dipwisou kan me re pwukoahki wa. 33 Ih met mwomwen peneinei kan me kohsang Merari+ ar pahn papah ni impwal en mihtingo, pahn kaweid en Idamar nein samworo Aaron.”+
34 Moses oh Aaron oh kaunen+ mwomwohdiso kan eri kilelehdi kadaudok en Kohad kan+ nin duwen arail peneinei kan oh nin duwen samarail mehn mahs ako, 35 irail koaros me mahki sounpar 30 lel 50 me mi nan pwihn me kin papah nan impwal en mihtingo.+ 36 Uwen tohtohn irail me kileldi nin duwen arail peneinei kan iei meh 2,750.+ 37 Irail pwukat kileldi sang peneinei en mehn Kohad kan, irail koaros me kin doadoahk ni impwal en mihtingo. Moses oh Aaron kileleiraildi sang ni ruwes me Siohwa ketikihong Moses.+
38 Kadaudok en Kerson kan+ kileldi nin duwen arail peneinei kan oh nin duwen samarail mehn mahs ako, 39 irail koaros me mahki sounpar 30 lel 50 me mi nan pwihn me kin papah ni impwal en mihtingo. 40 Uwen tohtohn irail me kileldi nin duwen arail peneinei kan oh nin duwen samarail mehn mahs ako iei meh 2,630.+ 41 Ih met kileldien peneinei en mehn Kerson kan, irail koaros me kin doadoahk ni impwal en mihtingo. Moses oh Aaron kileleiraildi sang ni ruwes en Siohwa.+
42 Kadaudok en Merari kan kileldi nin duwen arail peneinei kan oh nin duwen samarail mehn mahs ako, 43 irail koaros me mahki sounpar 30 lel 50 me mi nan pwihn me kin papah ni impwal en mihtingo.+ 44 Uwen tohtohn irail me kileldi nin duwen arail peneinei kan iei meh 3,200.+ 45 Ih met kileldien peneinei kan me kohsang Merari me Moses oh Aaron kilelehdi sang ni ruwes me Siohwa ketikihong Moses.+
46 Moses oh Aaron oh kaunen Israel kan kilelehdi mehn Lipai pwukat koaros nin duwen arail peneinei kan oh nin duwen samarail mehn mahs ako; 47 irail mahki sounpar 30 lel 50, oh irail koaros kileldi pwe ren doadoahk oh wa wisik kan me pid impwal en mihtingo.+ 48 Uwen tohtohn irail me kileldi iei meh 8,580. + 49 Irail kileldi duwehte me Siohwa ketin kehkehlingkihong Moses, emenemen nin duwen eh doadoahk oh wisik me kileldiong ih; irail kileldi duwehte me Siohwa ketin kehkehlingkihong Moses.
5 Siohwa ketin doula mahsanihong Moses: 2 “Kehkehlingkihong mehn Israel kan ren kadarieila sang nan kahnimpwalo koaros me tokutok+ oh koaros me mie pwilipwil en nahn+ oh koaros me saminkihla aramas mehla men.*+ 3 Sohte lipilipil ma ohl emen de lih emen, kumwail pahn kadarirailla. Kumwail pahn kadarirailla likin kahnimpwalo, pwe ren dehr kasaminehla+ kahnimpwal en irail kan me I kin kousoan nanpwungarail.”+ 4 Kahrehda, mehn Israel kan kapwaiada met oh kadarirailla likin kahnimpwalo. Mehn Israel kan eri kapwaiada duwehte me Siohwa ketin mahsanihong Moses.
5 Siohwa ketin doula mahsanihong Moses: 6 “Ndaiong mehn Israel kan, ‘Ma ohl emen de lih emen wiahda dihp ehu oh wiahda mwekid salelepek ehu ong Siohwa, aramaso* pwukoahkihdi dihpo.+ 7 E* pahn wehkada+ dihp me e* wiahdao oh kapwungala ni unsek dahme e pwukoahkihdio nin duwen pweinen dipeo oh pil kapatahiong limakis ehun pweineo;+ e pahn kihong met rehn aramas me e wiahiong sapwungo. 8 Ahpw ma aramas me sapwungo wiawihong sohte kiseh keren men me pahn alehdi pweipweio,* met pahn kapwurupwurlahng rehn Siohwa oh pahn kohieng samworo, patehng sihpw wol en meirong en tomwo me e pahn wiahkihda tomw ong ih.+
9 “‘Kisakis sarawi koaros+ sang mehn Israel kan me kohieng samworo pahn wiahla pwaise.+ 10 Soahng sarawi kan me emenemen pahn kihda pahn mihmihte reh.* Sohte lipilipil dahme emen kihong samworo, met pahn wiahla pwaisen samworo.’”
11 Siohwa ketin doula mahsanihong Moses: 12 “Koasoiong mehn Israel kan oh ndaiong irail, ‘Iet me pahn wiawi ma en ohl emen eh pwoud pahn wiahda dihp ehu oh sohte lelepek ong ih 13 oh emen ohl tohrohr wia nsenen pwopwoud rehn liho,+ ahpw eh pwoudo sehse oh met sohte sansalda, eri liho kasaminehla pein ih ahpw sohte sounkadehde oh sohte me diarada eh wiewia tiahko: 14 Ma ohlo luwakada oh lemelemehngki ma eh pwoudo kin lelepek ni liho eh kasaminehla pein ih, de ma ohlo luwakada de lemelemehngki ma eh pwoudo kin lelepek ni liho eh sohte kasaminehla pein ih, 15 ohlo pahn wahdo eh pwoudo rehn samworo, iangahki meirong ong liho, eisek kis ehun ihpah* en pilawa amas parli. Ohlo sohte pahn wudekiong leh powe de kihong warpwohmwahu pwetepwet* powe, pwehki met iei meirong en krein en luwak, meirong en krein ehu me kin katamando dihpo.
16 “‘Samworo pahn kahrehdo liho mwowe oh kasihnenihada mwohn silangin Siohwa.+ 17 Samworo pahn kihong pihl sarawi nan pwohl ehu me wiawihkihda pwehl, oh samworo pahn ale ekis pwelpar sang taht en impwal sarawio oh kihong nan pihlo. 18 Oh samworo pahn kasihnenihada liho mwohn silangin Siohwa oh sapwadpeseng pitenmoangen liho oh kihong nan peh ko meirong en krein ong mehn kataman ehu, me iei, meirong en krein en luwak,+ oh samworo pahn kolokol nan peho pihl katiko me kin wahdo keria.+
19 “‘Samworo ahpw pahn wiahiong liho en kahula, ni eh pahn ndaiong liho: “Ma sohte emen ohl wia nsenen pwopwoud rehmw erein omw mi pahn manaman en omw pwoud+ oh ke sohte wiahda dihp oh saminla, ke pahn saledeksang imwilahn pihl katik wet me kin wahdo keria. 20 Ahpw ma ke wiahda dihp erein omw mi pahn manaman en omw pwoud sang ni omw kasaminehla pein kowe, oh ke wiadahr nsenen pwopwoud rehn emen ohl+ likin omw pwoud—” 21 Samworo eri pahn wiahiong liho en kahukihla inou ehu me pahn pidada keria ehu, oh samworo pahn ndaiong liho: “Siohwa en ketin wiahkinuhkala mehn keria ehu oh mehn kahula ehu nanpwungen omw aramas akan, ni Siohwa eh pahn ketin kahrehiong uhk ken sohla naineki seri* oh kahrehiong kapehdomwen en mpwospeseng. 22 Pihl wet me kin wahdo keria pahn kohlong nan mwasahlomw kan pwehn kampwosepeseng kapehdomwen oh kahrehiong uhk ken sohla naineki seri.”* Liho ahpw pahn sapengki: “Amen! Amen!”*
23 “‘Samworo ahpw pahn ntingihedi keria pwukat nan pwuhko oh widensang nting ko nan pihl katiko. 24 Mwuri e pahn kihong liho en nim pihl katiko me kin wahdo keria, oh pihl me kin wahdo keriao pahn kohlong loale oh kahrehiong en katik. 25 Oh samworo pahn ale meirong en krein en luwak+ sang nan pehn liho oh kamwakid meirong en kreino kohwei kohdo mwohn silangin Siohwa, oh e pahn wahla met limwahn pei sarawio. 26 Samworo pahn ale oaroahr en meirong en krein nin duwen wiliepen meirongo pwon oh wiahiong en edinieida pohn pei sarawio,+ oh mwurin mwo e pahn kihong liho en nim pihlo. 27 Ni eh pahn kihong liho en nim pihlo, ma liho kasaminehla pein ih oh wiahda mwekid salelepek ehu ong eh pwoudo, pihl me kin wahdo keriao pahn kohlong loale oh wiahla mehkot katik, oh kapehde pahn mpwospeseng, oh e sohla pahn naineki seri,* oh liho pahn wiahla mehn keria ehu nanpwungen eh aramas akan. 28 Ahpw, ma liho sohte kasaminehla pein ih oh mwakelekel, eri e pahn saledeksang soangen kalokolok wet, oh e pahn kak liseianda oh naineki seri.
29 “‘Iet kosonned me pid luwak,+ ni lih emen eh pahn wiahda dihp oh kasaminehla pein ih erein eh mi pahn manaman en eh pwoud, 30 de ma ohl emen luwakada oh lemelemehngki ma eh pwoudo kin lelepek; ohlo pahn kasihnenihada eh pwoudo mwohn silangin Siohwa, oh samworo pahn kapwaiada kosonned wet pwon rehn liho. 31 Ohlo pahn saledeksang dihp, ahpw eh pwoudo pahn dolung imwilahn dipeo.’”
6 Siohwa ketin doula mahsanihong Moses: 2 “Koasoiong mehn Israel kan oh ndaiong irail, ‘Ma ohl emen de lih emen kahukihla inou tohrohr ehu en momour nin duwen Nasaraid*+ men ong Siohwa, 3 e pahn liksang wain oh sakau teikan. E sohte pahn nim pinike en wain de pinike en sakau teikan.+ E sohte pahn nim mehkot me wiawihdahsang kreip, de pil kang kreip kan, mehnda ma kapw de madekeng. 4 Erein rahn akan koaros me e wia Nasaraid men, e sohte pahn kang mehkot me wiawihdahsang tuhkehn kreip, sang ni kreip kan me saik mat lel kilin kreip.
5 “‘Erein rahn akan koaros en inou me e kahukihla nin duwen Nasaraid men, sohte reise pahn sair moange.+ E pahn kolokolete eh sarawi ni eh pahn mweidohng pitenmoange en reireila lao lel rahn akan me e tohrohrala ong Siohwa imwisekla. 6 E sohte pahn keiong mpen* aramas* mehla men erein rahn akan koaros me e tohrohrala ong Siohwa. 7 Mehnda ma eh pahpa de eh nohno de rie pwutak de rie serepein pahn mehla, e sohte pahn kak kasaminehla pein ih,+ pwehki pitenmoange iei kilel en eh wia Nasaraid men ong eh Koht.
8 “‘E sarawi ong Siohwa erein rahn akan koaros me e wia Nasaraid men. 9 Ahpw ma emen mwadangete mehla ni eh mi limwah+ oh e kasaminehla pitenmoange me wia kasalepen eh tohrohrala ong Koht,* e pahn sihpih moange+ ni rahn me e kadehdehda eh mwakelekel. E pahn sihpih moange ni keisuhwen rahn. 10 Oh ni kawaluhn rahn, e pahn wahla mwuroi riemen de pitsin pwulopwul riemen rehn samworo ni wasahn pedolong en impwal en mihtingo. 11 Samworo pahn kaunopada emen nin duwen meirong en dihp oh meteio nin duwen meirong isihs oh wiahda tomw ong dipeo+ me pid aramas mehla.* Mwuri e pahn kasarawihala moangeo ni rahno. 12 Oh e pahn pwurehng katohrehla pein ih ong Siohwa ong rahn akan me e wia Nasaraid men, oh e pahn wahdo sihpw wol pwulopwul men me sounpar ehu nin duwen meirong en dihp. Ahpw, rahn en mwowe ko pahn sohla wad pwehki eh kasaminehla eh wia Nasaraid men.
13 “‘Eri iet kosonned me pid Nasaraid men: Ni eh pahn kanekehla rahn akan en eh wia Nasaraid men,+ e pahn wisikdo ni wasahn pedolong en impwal en mihtingo. 14 Wasao e pahn kihda eh meirong ong Siohwa: sihpw wol pwulopwul men me roson mwahu oh sounpar ehu nin duwen meirong isihs,+ emen sihmpwul lih sounpar ehu me roson mwahu nin duwen meirong en dihp,+ emen sihpw wol roson mwahu nin duwen meirong en kaminimin,+ 15 ehu kopwoun pilawa me mwomwen rihng me sohte doal ihs me wiawihkihda pilawa amas mwahu me doal leh, pilawa menipinip me sohte doal ihs me irihrkihla leh, oh iangahki meirong en krein+ oh meirong en wain kan.+ 16 Samworo pahn kihda mepwukat mwohn silangin Siohwa oh pahn meirongkihla eh meirong en dihpo oh eh meirong isihso. 17 E pahn meirongki sihpw wolo nin duwen meirong en kaminimin ong Siohwa iangahki kopwoun lopwon en pilawa me sohte doal ihs, oh samworo pahn kihda meirong en krein+ oh meirong en wain me iangete meirong en sihpw wolo.
18 “‘Nasaraido ahpw pahn sihpihsang pitenmoange me sohte seiseilao+ ni wasahn pedolong en impwal en mihtingo, oh e pahn ale pitenmoange me reireila erein eh wia Nasaraid men oh isikala nan kisiniei me mi pahn meirong en kaminimino. 19 Oh samworo pahn ale apali pwopwen sihpw wolo me pwoaildahr,+ ehu lopwon me mwomwen rihng me sohte doal ihs sang nan kopwowo, oh ehu pilawa menipinip me sohte doal ihs, oh kihong mepwukat nan pehn Nasaraido mwurin eh sihpihla kilelepen eh wia Nasaraid men. 20 Oh samworo pahn kamwakid mepwukat kohwei kohdo nin duwen meirong en oaloahl ehu mwohn silangin Siohwa.+ Met iei mehkot sarawi ong samworo, iangahki mwaremwaren meirong en oaloahlo oh neh me kohieng nin duwen kisakis.+ Mwurin mwo, Nasaraido kakehr nim wain.
21 “‘Iet kosonned me pid duwen Nasaraid men+ me kahukihla inou ehu: Ma e kahula oh kak wiahda meirong ehu ong Siohwa me laudsang dahme koasoandier ong Nasaraid men, eri e pahn kapwaiada inou me e kahukihlao pwehki eh wauneki kosonned en Nasaraid men.’”
22 Siohwa eri ketin mahsanihong Moses: 23 “Ndaiong Aaron oh nah pwutak kan, ‘Iet mwomwen amwail pahn kapaia+ aramas en Israel kan. Ndaiong irail:
24 “Siohwa en ketin kapaiaiukada+ oh sinsileiuk.
25 Siohwa en ketin dakerkinuhkada silangi,+ oh en ketin kupwuramwahwihiuk.
26 Siohwa en ketin kilengwohng uhk ni kadek* oh ketikihong uhk popohl.”’+
27 Oh irail pahn likwerih mwarei nin duwen kapai ehu pohn aramas en Israel kan,+ pwe I en kapaiairailda.”+
7 Ni rahn me Moses kanekehla eh kauwada impwal sarawio,+ e keiehdi+ oh kasarawihala impwal sarawio, iangahki kepwe kan koaros loale, pei sarawio, oh dipwisawi kan koaros.+ Ni eh keiehdi oh kasarawihala mepwukat koaros,+ 2 kaunen Israel kan,+ me iei kaunen arail keinek kan, ahpw wiahda meirong ehu. Kaunen keinek pwukat me apwalih kileldien aramas akan 3 ahpw patohwando mwohn silangin Siohwa arail meirong en kuruma* wenepwoat oh kouwol 12, kuruma pwoat ong kaun riemen oh emen kouwol ong kaun emen; oh irail wahdo mepwukat mwohn impwal sarawio. 4 Siohwa ketin mahsanihong Moses: 5 “Ale mepwukat sang rehrail, pwe re pahn kadoadoahk ong doadoahk en impwal en mihtingo, oh ke pahn kihong mepwukat rehn mehn Lipai kan, ong emenemen nin duwen me anahn ong eh pwukoa kan.”
6 Moses eri ale kuruma ko oh kou ko oh kihong mepwukat rehn mehn Lipai kan. 7 E kihong kadaudok en Kerson kan kuruma riapwoat oh kouwol pahmen, nin duwen dahme anahn ong arail pwukoa kan;+ 8 oh e kihong kadaudok en Merari kan kuruma pahpwoat oh kouwol welimen, nin duwen dahme anahn ong arail pwukoa kan, pahn kaweid en Idamar nein samworo Aaron pwutak.+ 9 Ahpw sohte me e kihong kadaudok en Kohad kan pwehki arail pwukoa kan pidada doadoahk en wasa sarawio,+ oh irail kin kapaik soahng sarawi kan.+
10 Kaun akan eri wiahda arail meirong kan ni kasarawien+ pei sarawio ni rahn me e keidi. Ni kaun ako ar kihda arail meirong kan mwohn pei sarawio, 11 Siohwa ketin mahsanihong Moses: “Ehuehu rahn emen kaun pahn kihda eh meirong ong kasarawien pei sarawio.”
12 Aramas me kihda eh meirong ni keieun rahn iei Nahson+ nein Aminadap sang keinek en Suda. 13 Eh meirong iei dahl pileit silper ehu me toutouki sekel* 130 oh pwohl silper ehu me toutouki sekel 70 nin duwen wadawad en sekel en wasa sarawio,*+ koaros diren pilawa amas mwahu me doal leh ong meirong en krein;+ 14 kep* kohl ehu me toutouki sekel 10, diren warpwohmwahu; 15 emen koupwul wol, emen sihpw wol, oh emen sihmpwul wol me sounpar ehu ong meirong isihs;+ 16 emen kuht pwulopwul ong meirong en dihp;+ 17 oh ong meirong en kaminimin,+ kou riemen, sihpw wol limmen, kuht wol limmen, oh sihmpwul wol limmen me sounpar ehu. Met iei meirong en Nahson nein Aminadap.+
18 Ni keriaun rahn, Nedanel+ nein Suar, kaunen kadaudok en Isakar ahpw wiahda meirong ehu. 19 E kihda nin duwen eh meirong dahl pileit silper ehu me toutouki sekel 130 oh pwohl silper ehu me toutouki sekel 70 nin duwen wadawad en sekel en wasa sarawio,+ koaros diren pilawa amas mwahu me doal leh ong meirong en krein;+ 20 kep kohl ehu me toutouki sekel 10, diren warpwohmwahu; 21 emen koupwul wol, emen sihpw wol, oh emen sihmpwul wol me sounpar ehu ong meirong isihs;+ 22 emen kuht pwulopwul ong meirong en dihp;+ 23 oh ong meirong en kaminimin,+ kou riemen, sihpw wol limmen, kuht wol limmen, oh sihmpwul wol limmen me sounpar ehu. Met iei meirong en Nedanel nein Suar.
24 Ni kesiluhwen rahn, kaunen kadaudok en Sepulon kan, Eliap+ nein Ihlon, 25 ahpw wiahda eh meirong en dahl pileit silper ehu me toutouki sekel 130 oh pwohl silper ehu me toutouki sekel 70 nin duwen wadawad en sekel en wasa sarawio,+ koaros diren pilawa amas mwahu me doal leh ong meirong en krein;+ 26 kep kohl ehu me toutouki sekel 10, diren warpwohmwahu; 27 emen koupwul wol, emen sihpw wol, oh emen sihmpwul wol me sounpar ehu ong meirong isihs;+ 28 emen kuht pwulopwul ong meirong en dihp;+ 29 oh ong meirong en kaminimin,+ kou riemen, sihpw wol limmen, kuht wol limmen, oh sihmpwul wol limmen me sounpar ehu. Met iei meirong en Eliap+ nein Ihlon.
30 Ni kapahieun rahn, kaunen kadaudok en Reupen kan, Elisur+ nein Sedeur, 31 ahpw wiahda eh meirong en dahl pileit silper ehu me toutouki sekel 130 oh pwohl silper ehu me toutouki sekel 70 nin duwen wadawad en sekel en wasa sarawio,+ koaros diren pilawa amas mwahu me doal leh ong meirong en krein;+ 32 kep kohl ehu me toutouki sekel 10, diren warpwohmwahu; 33 emen koupwul wol, emen sihpw wol, oh emen sihmpwul wol me sounpar ehu ong meirong isihs;+ 34 emen kuht pwulopwul ong meirong en dihp;+ 35 oh ong meirong en kaminimin,+ kou riemen, sihpw wol limmen, kuht wol limmen, oh sihmpwul wol limmen me sounpar ehu. Met iei meirong en Elisur+ nein Sedeur.
36 Ni kelimaun rahn, kaunen kadaudok en Simion kan, Selumiel+ nein Surisadai, 37 ahpw wiahda eh meirong en dahl pileit silper ehu me toutouki sekel 130 oh pwohl silper ehu me toutouki sekel 70 nin duwen wadawad en sekel en wasa sarawio,+ koaros diren pilawa amas mwahu me doal leh ong meirong en krein;+ 38 kep kohl ehu me toutouki sekel 10, diren warpwohmwahu; 39 emen koupwul wol, emen sihpw wol, oh emen sihmpwul wol me sounpar ehu ong meirong isihs;+ 40 emen kuht pwulopwul ong meirong en dihp;+ 41 oh ong meirong en kaminimin,+ kou riemen, sihpw wol limmen, kuht wol limmen, oh sihmpwul wol limmen me sounpar ehu. Met iei meirong en Selumiel+ nein Surisadai.
42 Ni keweneun rahn, kaunen kadaudok en Kad kan, Eliasap+ nein Deuel, 43 ahpw wiahda eh meirong en dahl pileit silper ehu me toutouki sekel 130 oh pwohl silper ehu me toutouki sekel 70 nin duwen wadawad en sekel en wasa sarawio,+ koaros diren pilawa amas mwahu me doal leh ong meirong en krein;+ 44 kep kohl ehu me toutouki sekel 10, diren warpwohmwahu; 45 emen koupwul wol, emen sihpw wol, oh emen sihmpwul wol me sounpar ehu ong meirong isihs;+ 46 emen kuht pwulopwul ong meirong en dihp;+ 47 oh ong meirong en kaminimin,+ kou riemen, sihpw wol limmen, kuht wol limmen, oh sihmpwul wol limmen me sounpar ehu. Met iei meirong en Eliasap+ nein Deuel.
48 Ni keisuhwen rahn, kaunen kadaudok en Epraim kan, Elisama+ nein Ammihud, 49 ahpw wiahda eh meirong en dahl pileit silper ehu me toutouki sekel 130 oh pwohl silper ehu me toutouki sekel 70 nin duwen wadawad en sekel en wasa sarawio,+ koaros diren pilawa amas mwahu me doal leh ong meirong en krein;+ 50 kep kohl ehu me toutouki sekel 10, diren warpwohmwahu; 51 emen koupwul wol, emen sihpw wol, oh emen sihmpwul wol me sounpar ehu ong meirong isihs;+ 52 emen kuht pwulopwul ong meirong en dihp;+ 53 oh ong meirong en kaminimin,+ kou riemen, sihpw wol limmen, kuht wol limmen, oh sihmpwul wol limmen me sounpar ehu. Met iei meirong en Elisama+ nein Ammihud.
54 Ni kawaluhn rahn, kaunen kadaudok en Manase kan, Kameliel+ nein Pedasur, 55 ahpw wiahda eh meirong en dahl pileit silper ehu me toutouki sekel 130 oh pwohl silper ehu me toutouki sekel 70 nin duwen wadawad en sekel en wasa sarawio,+ koaros diren pilawa amas mwahu me doal leh ong meirong en krein;+ 56 kep kohl ehu me toutouki sekel 10, diren warpwohmwahu; 57 emen koupwul wol, emen sihpw wol, oh emen sihmpwul wol me sounpar ehu ong meirong isihs;+ 58 emen kuht pwulopwul ong meirong en dihp;+ 59 oh ong meirong en kaminimin,+ kou riemen, sihpw wol limmen, kuht wol limmen, oh sihmpwul wol limmen me sounpar ehu. Met iei meirong en Kameliel+ nein Pedasur.
60 Ni keduwaun rahn, kaunen+ kadaudok en Pensamin kan, Apidan+ nein Kideoni, 61 ahpw wiahda eh meirong en dahl pileit silper ehu me toutouki sekel 130 oh pwohl silper ehu me toutouki sekel 70 nin duwen wadawad en sekel en wasa sarawio,+ koaros diren pilawa amas mwahu me doal leh ong meirong en krein;+ 62 kep kohl ehu me toutouki sekel 10, diren warpwohmwahu; 63 emen koupwul wol, emen sihpw wol, oh emen sihmpwul wol me sounpar ehu ong meirong isihs;+ 64 emen kuht pwulopwul ong meirong en dihp;+ 65 oh ong meirong en kaminimin,+ kou riemen, sihpw wol limmen, kuht wol limmen, oh sihmpwul wol limmen me sounpar ehu. Met iei meirong en Apidan+ nein Kideoni.
66 Ni kaeisek en rahn, kaunen kadaudok en Dan kan, Ahieser+ nein Amisadai, 67 ahpw wiahda eh meirong en dahl pileit silper ehu me toutouki sekel 130 oh pwohl silper ehu me toutouki sekel 70 nin duwen wadawad en sekel en wasa sarawio,+ koaros diren pilawa amas mwahu me doal leh ong meirong en krein;+ 68 kep kohl ehu me toutouki sekel 10, diren warpwohmwahu; 69 emen koupwul wol, emen sihpw wol, oh emen sihmpwul wol me sounpar ehu ong meirong isihs;+ 70 emen kuht pwulopwul ong meirong en dihp;+ 71 oh ong meirong en kaminimin,+ kou riemen, sihpw wol limmen, kuht wol limmen, oh sihmpwul wol limmen me sounpar ehu. Met iei meirong en Ahieser+ nein Amisadai.
72 Ni kaeisek ehun rahn, kaunen kadaudok en Aser kan, Pakiel+ nein Okran, 73 ahpw wiahda eh meirong en dahl pileit silper ehu me toutouki sekel 130 oh pwohl silper ehu me toutouki sekel 70 nin duwen wadawad en sekel en wasa sarawio,+ koaros diren pilawa amas mwahu me doal leh ong meirong en krein;+ 74 kep kohl ehu me toutouki sekel 10, diren warpwohmwahu; 75 emen koupwul wol, emen sihpw wol, oh emen sihmpwul wol me sounpar ehu ong meirong isihs;+ 76 emen kuht pwulopwul ong meirong en dihp;+ 77 oh ong meirong en kaminimin,+ kou riemen, sihpw wol limmen, kuht wol limmen, oh sihmpwul wol limmen me sounpar ehu. Met iei meirong en Pakiel+ nein Okran.
78 Ni kaeisek riaun rahn, kaunen kadaudok en Napdali kan, Aira+ nein Enan, 79 ahpw wiahda eh meirong en dahl pileit silper ehu me toutouki sekel 130 oh pwohl silper ehu me toutouki sekel 70 nin duwen wadawad en sekel en wasa sarawio,+ koaros diren pilawa amas mwahu me doal leh ong meirong en krein;+ 80 kep kohl ehu me toutouki sekel 10, diren warpwohmwahu; 81 emen koupwul wol, emen sihpw wol, oh emen sihmpwul wol me sounpar ehu ong meirong isihs;+ 82 emen kuht pwulopwul ong meirong en dihp;+ 83 oh ong meirong en kaminimin,+ kou riemen, sihpw wol limmen, kuht wol limmen, oh sihmpwul wol limmen me sounpar ehu. Met iei meirong en Aira+ nein Enan.
84 Iei met meirong ong kasarawien+ pei sarawio sang rehn kaunen Israel kan ni ahnsou me pei sarawio keidi: dahl pileit silper 12, pwohl silper 12, kep kohl 12;+ 85 ehuehu dahl pileit silper toutouki sekel 130 oh ehuehu pwohl toutouki sekel 70, silper en dahl koaros patpene sekel 2,400 nin duwen wadawad en sekel en wasa sarawio;+ 86 ehuehu kep kohl 12 me diren warpwohmwahu toutouki sekel 10 nin duwen wadawad en sekel en wasa sarawio, kohl en kep koaros patpene sekel 120. 87 Mahn akan koaros ong meirong isihs iei kouwol 12, sihpw wol 12, sihmpwul wol 12 me sounpar ehu oh meirong en krein kan me iangete meirong pwukat, oh kuht pwulopwul 12 ong meirong en dihp; 88 oh mahn akan koaros en meirong en kaminimino patpene kouwol 24, sihpw wol 60, kuht wol 60, oh sihmpwul wol 60 me sounpar ehu. Met iei meirong ong kasarawien+ pei sarawio mwurin eh keidi.+
89 Ahnsou koaros me Moses kin pedolongala nan impwal en mihtingo pwehn patohong Koht,*+ e kin rong kapitie eh mahmahseniong ih sang pohnangin pweinen+ kohpwahn Kadehdeo, sang nanpwungen kerup riemeno;+ oh Koht kin ketin mahseniong ih.
8 Siohwa ketin mahsanihong Moses: 2 “Koasoiong Aaron oh ndaiong ih, ‘Ni omw pahn isikada lamp kan, lamp isuh ko pahn kamarainih wasa me mi mwohn dewen lampo.’”+ 3 Aaron eri wia met: E isikada lamp ko ong wasa me mi mwohn dewen lampo,+ duwehte me Siohwa ketin kehkehlingkihong Moses. 4 Iet mwomwen dewen lampo eh wiawihda: E sukusukda sang kohl; sang ni pwuloio lel ni masal, e sukusukda sang kohl.+ Dewen lampo wiawihda nin duwen kaudiahl+ me Siohwa ketin kasalehiong Moses.
5 Siohwa ketin pwurehng mahsanihong Moses: 6 “Ale mehn Lipai kan sang mehn Israel kan, oh kamwakeleirailda.+ 7 Iet mwomwen omw pahn kamwakeleirailda: Usupihki pohrail pilen kamwakele dihp, oh irail pahn sihpihki reise paliwararail pwon, lopworada arail likou kan, oh kamwakeleirailda.+ 8 Mwuri re pahn ale koupwul wol men+ iangahki meirong en krein+ en pilawa amas mwahu me doal leh, oh ke pahn pil ale emen koupwul wol ong meirong en dihp.+ 9 Oh ke pahn wahla mehn Lipai kan mwohn impwal en mihtingo oh kapokonepene mwomwohdisohn mehn Israel kan pwon.+ 10 Ni omw pahn wahla mehn Lipai kan mwohn silangin Siohwa, mehn Israel kan pahn pwil pehrail kan pohn mehn Lipai kan.+ 11 Oh Aaron pahn meirongki* mehn Lipai kan mwohn silangin Siohwa nin duwen meirong en oaloahl ehu+ sang rehn mehn Israel kan, oh irail pahn kapwaiada doadoahk en Siohwa.+
12 “Mwuri mehn Lipai kan pahn pwil pehrail kan pohn moangen kouwol kan.+ Mwurin mwo, meirongki emen nin duwen meirong en dihp oh meteio nin duwen meirong isihs ong Siohwa pwehn wiahda tomw+ ong mehn Lipai kan. 13 Oh ke pahn kasihnenihada mehn Lipai kan mwohn Aaron oh nah pwutak kan oh meirongki* irail nin duwen meirong en oaloahl ehu ong Siohwa. 14 Ke pahn katohrehla mehn Lipai kan sang nanpwungen mehn Israel kan, oh mehn Lipai kan pahn wiahla nei.+ 15 Mwurin mwo, mehn Lipai kan pahn pedolong pwe ren papah ni impwal en mihtingo. Ih met mwomwen omw pahn kamwakeleirailda oh meirongki* irail nin duwen meirong en oaloahl ehu. 16 Pwe irail katohrohrla ong ie sang mehn Israel kan. I pahn ale irail ong pein ngehi pwehn wiliandi mesenih koaros* en mehn Israel kan.+ 17 Pwe mesenih koaros en mehn Israel kan iei nei, aramas oh pil mahn.+ I kasarawihirailla ong ie ni rahn me I kemehla mesenih koaros nan sapwen Isip.+ 18 I pahn ale mehn Lipai kan pwehn wiliandi mesenih koaros en mehn Israel kan. 19 I pahn kihong Aaron oh nah pwutak kan mehn Lipai kan nin duwen kisakis kei sang rehn mehn Israel kan, pwe ren kapwaiada doadoahk ni impwal en mihtingo ni arail wiliandi mehn Israel kan+ oh wiahda tomw ong mehn Israel kan, pwe kalokolok en dehr wiawi nanpwungen mehn Israel kan+ pwehki aramas en Israel kan keidohng limwahn wasa sarawio.”
20 Moses oh Aaron oh mwomwohdisohn mehn Israel kan pwon ahpw wiahiong mehn Lipai kan met. Nin duwen soahng koaros me Siohwa ketin kehkehlingkihong Moses me pid mehn Lipai kan, ih met me mehn Israel kan wiahiong irail. 21 Mehn Lipai kan eri kamwakeleirailda oh lopworada arail likou kan.+ Mwurin mwo Aaron meirongki* irail nin duwen meirong en oaloahl ehu mwohn silangin Siohwa.+ Mwuri Aaron wiahda tomw ong irail pwehn kamwakeleirailda.+ 22 Mwurin mwo, mehn Lipai ko pedolongala pwehn kapwaiada arail doadoahk ni impwal en mihtingo mwohn Aaron oh nah pwutak kan. Duwehte me Siohwa ketin kehkehlingkihong Moses me pid mehn Lipai kan, ihme re wiahiong irail.
23 Siohwa eri ketin mahsanihong Moses: 24 “Iet koasoandi me pid mehn Lipai kan: Sang sounpar 25 kohda, ohl emen pahn kin iang pwihn me kin doadoahk nan impwal en mihtingo. 25 Ahpw mwurin sounpar 50, e pahn kommoaldihsang iang pwihnen doadoahko oh sohla iang papah. 26 E pahn kak papah rie kan me kin apwalih pwukoa kan ni impwal en mihtingo, ahpw e sohte pahn wia doadoahk wasao. Ih met me ke pahn wia me pid mehn Lipai kan oh arail pwukoa kan.”+
9 Siohwa ketin mahsanihong Moses nan sapwtehn en Sainai ni keieun sounpwong+ en keriaun pahr mwurin ar pedoisang nan sapwen Isip: 2 “Mehn Israel kan pahn kaunopada meirong en Pahsohpa+ ni ahnsou me kileldi.+ 3 Ni 14 en sounpwong wet nin soutik mwohn eh pahn rotorotala,* kumwail pahn kaunopada met ni ahnsou me kileldi. Kumwail pahn kaunopada met, nin duwen koasoandi koaros oh wiepe koaros me koasoandier.”+
4 Moses eri ndaiong mehn Israel kan ren kaunopada meirong en Pahsohpao. 5 Irail eri kaunopada meirong en Pahsohpao ni keieun sounpwong, ni 14 en sounpwongo nin soutik mwohn eh rotorotala,* nan sapwtehn en Sainai. Mehn Israel ko kapwaiada soahng koaros nin duwen me Siohwa ketin kehkehlingkihong Moses.
6 Eri mie aramas akan me saminkihla arail sair paliwar mehla,+ kahrehda irail sohte kak kaunopada meirong en Pahsohpa ni rahno. Irail eri kohdo mwohn Moses oh Aaron ni rahno+ 7 oh ndaiong Moses: “Se me samin pwehki at sairada paliwar mehla. Ahpw dahme kahrehda se pahn irairdi sang at iang mehn Israel kan patohwanohng Siohwa meirong ni ahnsou me kileldi?”+ 8 Eri Moses ndaiong irail: “Kumwail awih wasaht, oh I pahn ese sang rehn Siohwa dahme e pahn ketin mahsanih duwen kumwail.”+
9 Siohwa eri ketin mahsanihong Moses: 10 “Ndaiong mehn Israel kan, ‘Ma mehmen rehmwail de kadaudokamwail kan pahn saminkihla eh sair paliwar mehla+ de seiloakla wasa doh, e pahn pil kaunopada meirong en Pahsohpa ong Siohwa. 11 Irail pahn kaunopada met ni 14 en keriaun sounpwong,+ nin soutik mwohn eh pahn rotorotala.* Irail pahn tungoale met iangahki pilawa me sohte doal ihs oh tehntuhke katik kan.+ 12 Irail sohte pahn mweidohng mehkot en luhwehdi lel nimenseng,+ oh irail sohte pahn katimpeseng tih pwoat loale.+ Irail pahn kaunopada met nin duwen koasoandi koaros me pid Pahsohpa. 13 Ahpw ma aramas emen me mwakelekel de sohte seiloak oh seukautihong kaunopada meirong en Pahsohpa, aramaso* pahn kamakamala,+ pwehki eh sohte kihda meirong ong Siohwa ni ahnsou me kileldi. Aramaso pahn dolung imwilahn dipe.
14 “‘Oh ma mehn liki men kin kousoan rehmwail, e pil pahn kaunopada meirong en Pahsohpa ong Siohwa.+ E pahn wia met nin duwen koasoandi en Pahsohpa oh wiepe me koasoandier.+ E pahn mie koasoandi ehu ong kumwail, ong mehn liki kan oh pil ong pwilidak kan.’”+
15 Eri ni rahn me impwal sarawio kokouda,+ pelien depwek kipehdi impwal sarawio, impwal en Kadehdeo, ahpw nin soutik mehkot me mwomwen kisiniei kin mihmi pohn impwal sarawio lel nimenseng.+ 16 Ih met me kin usehlahte wiawi: Pelien depweko kin kipehdi impwal sarawio nin rahn, oh me mwomwen kisinieio nipwong.+ 17 Ni ahnsou me pelien depweko kin pwekipwekdahsang pohn impwalo, mehn Israel kan kin mwadang mweselda,+ oh wasa me pelien depweko kin mi ie, ih wasa me mehn Israel kan kin kauwada imwarail impwal kan.+ 18 Sang ni ruwes en Siohwa mehn Israel kan kin mweselda, oh sang ni ruwes en Siohwa irail kin kauwada imwarail impwal kan.+ Erein ahnsou me pelien depweko mihmi pohn impwal sarawio, irail kin mihmi wasaohte. 19 Ni ahnsou me pelien depweko kin mihmi pohn impwal sarawio erein rahn tohto, mehn Israel kan kin peikiong Siohwa oh sohte mweselda.+ 20 Ekei ahnsou pelien depweko kin mihmi pohn impwal sarawio erein rahn kei. Sang ni ruwes en Siohwa irail kin mihmihte wasao, oh sang ni ruwes en Siohwa irail kin mwesel. 21 Ekei ahnsou pelien depweko kin mihmihte sang nin soutik lel nimenseng, oh ni pelien depweko eh kin pwekipwekda nimenseng, irail kin mwesel. Mehnda ma nin rahn de nipwong ni pelien depweko eh kin pwekipwekda, irail kin mwesel.+ 22 Mehnda ma rahn riau, sounpwong ehu, de reireisang, erein ahnsou me pelien depweko kin mihmi pohn impwal sarawio, mehn Israel kan kin mihmihte wasao oh sohte mweselda. Ahpw ni pelien depweko eh kin pwekipwekda, irail kin mwesel. 23 Sang ni ruwes en Siohwa irail kin kauwada imwarail impwal kan, oh sang ni ruwes en Siohwa irail kin mweselda. Irail kin kapwaiada arail pwukoa ong Siohwa sang ni ruwes me Siohwa ketikihong Moses.
10 Siohwa ketin mahsanihong Moses: 2 “Wiahda sowi riau+ ong pein kowe; wiahkihda mepwukat silper sukusukda, oh doadoahngki mepwukat pwehn ekerpene mwomwohdiso oh pwehn wia kilel en kihpene imwarail impwal kan. 3 Ni ahnsou me sowi ko koaros pahn pepeuk, mwomwohdiso pwon pahn likwerdo rehmw ni wasahn pedolong en impwal en mihtingo.+ 4 Ma ehute me pepeuk, kaun akante, kaunen mehn Israel kid kan, me pahn likwerdo rehmw.+
5 “Ni ahnsou me kumwail pahn peuk sowi ni ngihl marahra oh toutou, kahnimpwal en irail kan me mi palimese+ pahn mweselda. 6 Ni keriapak en amwail pahn peuk sowi ni ngihl marahra oh toutou, kahnimpwal en irail kan me mi palieir+ pahn mweselda. Irail pahn peuk sowi ni ahl wet ehuehu ahnsou me ehu pwihn pahn mweselda.
7 “Eri ni ahnsoun likwerpenehn mwomwohdiso, kumwail pahn peuk sowi kan,+ ahpw kaidehn ni ngihl marahra oh toutou. 8 Nein Aaron pwutak kan, me iei samworo kan, pahn peuk sowi kan,+ oh wiepen doadoahngki mepwukat pahn wia koasoandi poatopoat ehu ong kumwail erein dih kan me pahn kohdo.
9 “Ma kumwail pahn kohla mahweniong imwintihti kan me kin kaloke kumwail nan sapwamwail, kumwail pahn peuk sowi kan ni ngilen mahwen,+ oh Siohwa amwail Koht pahn ketin tamataman kumwail oh doareikumwailsang amwail imwintihti kan.
10 “Oh pil, ni amwail ahnsoun peren kan+—amwail kasarawi kan+ oh tepin amwail sounpwong kan—kumwail pahn peuk sowi ko ni ahnsou me kumwail pahn wiahda amwail meirong isihs kan+ oh amwail meirong en kaminimin kan;+ met pahn wia mehn kataman ehu ong kumwail mwohn silangin amwail Koht. Ngehi me Siohwa amwail Koht.”+
11 Eri ni keriaun pahr, ni keriaun sounpwong, ni 20 en sounpwongo,+ pelien depweko saradasang pohn impwal sarawi+ en Kadehdeo. 12 Eri mehn Israel kan ahpw tepida mweselsang nan sapwtehn en Sainai nin duwen koasoandien arail pahn mwesel,+ oh pelien depweko soandi nan sapwtehn en Paran.+ 13 Iei met tepin ar mwesel ni ar idawehn kehkehlik me Siohwa ketikihong Moses.+
14 Eri keinek siluh en kahnimpwal en kadaudok en Suda kan me tepin mweselda nin duwen arail pwihn kan,* oh Nahson+ nein Aminadap me pwukoahki keinek en Suda. 15 Nedanel+ nein Suar me pwukoahki keinek en Isakar. 16 Eliap+ nein Ihlon me pwukoahki keinek en Sepulon.
17 Ni impwal sarawio eh kamweremwerdi,+ kadaudok en Kerson kan+ oh kadaudok en Merari kan+ me wa impwal sarawio, ahpw mweselda.
18 Mwuri keinek siluh en kahnimpwal en Reupen mweselda nin duwen arail pwihn kan,* oh Elisur+ nein Sedeur me pwukoahki keinek en Reupen. 19 Selumiel+ nein Surisadai me pwukoahki keinek en Simion. 20 Eliasap+ nein Deuel me pwukoahki keinek en Kad.
21 Mwuri mehn Kohad kan, me wa dipwisou kan en wasa sarawio,+ ahpw mweselda. Impwal sarawio pahn kokoudahr ni ahnsou me re lella wasao.
22 Mwuri keinek siluh en kahnimpwal en kadaudok en Epraim kan mweselda nin duwen arail pwihn kan,* oh Elisama+ nein Ammihud me pwukoahki keinek en Epraim. 23 Kameliel+ nein Pedasur me pwukoahki keinek en Manase. 24 Apidan+ nein Kideoni me pwukoahki keinek en Pensamin.
25 Mwuri keinek siluh en kahnimpwal en kadaudok en Dan kan mweselda nin duwen arail pwihn kan.* Irail me mi keieu mwuhr oh wia silepen kahnimpwal ko koaros, oh Ahieser+ nein Amisadai me pwukoahki keinek en Dan. 26 Pakiel+ nein Okran me pwukoahki keinek en Aser. 27 Aira+ nein Enan me pwukoahki keinek en Napdali. 28 Ih met koasoandi en mwesel me mehn Israel kan oh arail pwihn kan* kin idawehn ni ar kin mweselda.+
29 Moses eri ndaiong Opap nein Reuel*+ mehn Midian, semen en Moses pwoudo: “Se pahn kohkolahng wasa me Siohwa ketin mahsanih, ‘I pahn kihong kumwail sahpwo.’+ Kohdo iangkitada,+ oh se pahn apwalihiuk mwahu, pwehki Siohwa ketin inoukidahr soahng mwahu kan ong Israel.”+ 30 Ahpw Opap ndaiong ih: “I sohte pahn iang kohla. I pahn pwuralahng nan uhdakeio oh rehn kisehi kan.” 31 Moses eri nda: “Menlau dehr kohkohsang kiht, pwe ke ese wasa me se pahn kauwada imwat impwal kan nan sapwtehnet, oh ke kak wia at sounkaweid.* 32 Oh ma ke kohdo iangkitada,+ sohte lipilipil soahng mwahu kan me Siohwa ketin kasalehiong kiht, se uhdahn pahn kasalehiong uhk.”
33 Irail eri tepida karis sang ni nahnahn Siohwa+ ong ni seiloak en rahn siluh, oh kohpwahn+ inou lap en Siohwa tieng mwohrail ong ni seiloak en rahn siluhwo pwehn rapahki wasahn kommoal ong irail.+ 34 Oh sapwellimen Siohwa pelien depweko+ mi pohrail nin rahn ni ahnsou me irail mweselsang wasa me irail kauwada imwarail impwal kan.
35 Ahnsou koaros me Kohpwao kin wisikda, Moses kin patohwan: “Maing Siohwa,+ komw ketida, oh sapwellimomwi imwintihti kan en mwarahkpeseng, oh irail me kin kailongkin komwi en tangpeseng mwohmwi.” 36 Oh ni Kohpwao eh kin uhdi, e kin patohwan: “Maing Siohwa, komw ketin sapahldo rehn aramas en Israel kan me sohte kak wadawadedi.”*+
11 Aramas ako ahpw tepida kaulim ni lingeringer mwohn silangin Siohwa. Ni Siohwa eh ketin karongehda met, e ahpw engiengda, oh kisiniei ehu sang Siohwa ahpw tepida lulda nanpwungarail oh kamwasikahla ekei aramas me mi ni irepen kahnimpwalo. 2 Ni aramas ako ar tepida likweriong Moses, e kapakapohng Siohwa ni ngidingid,+ oh kisinieio ahpw kunla. 3 Eri wasao adanekihla Taperah,* pwehki kisiniei ehu sang Siohwa lulda nanpwungarail.+
4 Pokon en mehn liki kei*+ me mi nanpwungarail ahpw kasalehda arail ineng roporop,+ oh mehn Israel kan pil pwurehng tepida sengiseng oh nda: “Ihs me pahn kihong kitail uduk pwe kitail en tungoale?+ 5 Ia uwen kaperen en atail tamataman mwahmw me kitail kin tungoale nan Isip ni atail sohte pwain, pil kiuhri, wasmelen, anien, oh karlik!+ 6 Ahpw met kitail luwetalahr. Sohte douluhl mehkot kitail kilang ihte manna wet.”+
7 Manna+ duwehte werentuhke koriander,*+ oh e duwehte pwilin tuhke delium.* 8 Aramas ako ahpw kin kohpeseng oh rikada manna oh ngidarpene* de sukpene nan takai ehu. Mwuri irail pwoailih nan einpwoat en kuk de wiahkihda pilawa pwonopwon kei,+ oh nemeneme duwehte keik mem me doalkihda leh. 9 Ni pwoaik eh kin mweredi ni kahnimpwalo nipwong, manna pil kin mweredi powe.+
10 Moses rongada aramas ako sang peneinei koaros ar wie sengiseng, emenemen aramas ni wasahn pedolong en eh impwal. Siohwa ahpw engiengda kowahlap,+ oh Moses pil uhdahn nsensuwedkihla. 11 Moses eri patohwanohng Siohwa: “Dahme komw ketin kalokehki sapwellimomwi ladu? Dahme komw sohte ketin kupwurehkin ie, pwe komw ketikihdi wisik toutou en aramas pwukat koaros pohi?+ 12 Ngehi me inen aramas pwukat koaros? Ngehi me naitikihiraildi, pwe komw en ketin mahsanihong ie, ‘Wa irail pahnadimw, duwehte sounpapah* men eh kin wa seri pwelel,’ kolahng nan sahpw me komw ketin kahukihla en ketikihong samarail mehn mahs ako?+ 13 I pahn kihsang ia uduk pwe I en kihong aramas pwukat koaros? Pwe irail kin wie sengiseng mwohi, ndinda, ‘Kihdo kanat uduk sen tungoale!’ 14 I sohte kak kelehpw apwalih aramas pwukat koaros; e me nohn toutou ong ie.+ 15 Ma ih duwen me komw pahn ketin wiahiongiehn met, a komw kupwurkalahngan oh ketin kemeiehla ni ahnsou wet.+ Ma komw kupwurkin ie, a komw dehr ketin mweidohng ien pousehlahte kilikilang kahpwal kan.”
16 Siohwa ketin sapeng Moses, mahsanih: “Kapokonepene ohl 70 sang ohl mah kan en Israel, ohl akan me ke ese* me mah oh me lapalap en aramas akan,+ oh wairailla ni impwal en mihtingo, oh ren iang uhk kesihnenda wasao. 17 I pahn kohdihdo+ oh mahseniong uhk wasao,+ oh I pahn kihsang ekis ei ngehn sarawi*+ me mi pohmw oh kihdiong pohrail, oh irail pahn seweseiuk apwalih aramas akan pwe ken dehr kelehpw apwalih pwukoa wet.+ 18 Ke pahn ndaiong aramas akan, ‘Kasarawihala pein kumwail ong lakapw,+ pwe kumwail uhdahn pahn tungoale uduk, pwehki kumwail sengiseng ong Siohwa+ oh nda: “Ihs me pahn kihong kiht uduk pwe sen tungoale? E mwahu at mi nan Isip.”+ Eri, Siohwa uhdahn pahn ketikihong kumwail uduk, oh kumwail pahn tungoale.+ 19 Kumwail pahn tungoale, kaidehkin rahn ehu de rahn 2 de rahn 5 de rahn 10 de rahn 20, 20 ahpw erein sounpwong ehu pwon, lao e kohieisang nan tumwamwail kan oh wiahla mehkot kasaut ong kumwail,+ pwe kumwail soikala Siohwa, me ketiket nanpwungamwail, oh kumwail wie sengiseng mwowe, ndinda: “Dahme se kohkohdosangki Isip?”’”+
21 Moses eri patohwan: “Aramas akan me I mi nanpwungarail iei ohl 600,000+ me alu, ahpw komw ketin mahsanih, ‘I pahn kihong irail uduk, oh re pahn tungoale uwen me itar erein sounpwong ehu pwon’! 22 Ma pelin sihpw koaros oh pelin kou koaros pahn kamakamala, e pahn itar ong irail? De ma mwahmw akan koaros en nansed pahn lohdi, e pahn itar ong irail?”
23 Siohwa eri ketin mahsanihong Moses: “Ia duwe, limen Siohwa me nohn mwotomwot?+ Eri ke pahn kilang ma dahme I ndao pahn wiawihong uhk de soh.”
24 Moses eri kohieila oh koasoiaiong aramas akan mahsen en Siohwa kan. Oh e kapokonepene ohl 70 sang ohl mah kan en aramas ako oh kasihnenihirailda pidakihpene impwalo.+ 25 Siohwa eri ketidihdo nan pelien depwek ehu+ oh ketin mahseniong ih+ oh ketikihsang ekis ngehn sarawi*+ me mi powe oh ketikihdiong pohn emenemen ohl mah 70 ko. Oh ni ahnsowohte me ngehn sarawi* kohdiong pohrail, re ahpw tepida wiewia mwomwen soukohp,*+ ahpw re sohte pwurehng wia met.
26 Mie ohl riemen me mihmihte nan kahnimpwalo. Adara iei Eldad oh Medad. Oh ngehn sarawi* ahpw tepida kohdiong pohra, pwe ira iang aramas ako me adarail kan ntingdi, ahpw ira sohte kohieila ni impwalo. Ira eri tepida wiewia mwomwen soukohp nan kahnimpwalo. 27 Oh mwahnakapw men ahpw tenge Moses oh ndaiong: “Eldad oh Medad wiewia mwomwen soukohp kei nan kahnimpwalo!” 28 Sosua nein Nun,+ nein Moses sounpapah sangete ni eh pwulopwul, ahpw nda: “Maing ei kaun Moses, komw katokeirahdi!”+ 29 Ahpw Moses ndaiong ih: “Ke pwunodki dahme met pahn wiahiong ie? Ke dehr pwunodki, pwe I men sapwellimen Siohwa aramas akan koaros en wia soukohp kei oh Siohwa en ketikihdiong sapwellime ngehn sarawi* pohrail!” 30 Mwuhr Moses eri pwurala ni kahnimpwalo iangahki ohl mah kan en Israel.
31 Mwuri kisinieng ehu sang Siohwa ahpw ipido oh tepida wahdo kuail kan* sang nansedo oh kamwereiraildi pidakihpene kahnimpwalo,+ me dohki uwen reirei en seiloak en rahn ehu ni ehu pali oh uwen reirei en seiloak en rahn ehu ni pali teio, oh re koasoakoasoakda ni kiupid* riau sang pohn pwehl. 32 Eri rahno pwon oh pwohngo pwon oh mandahn rahno pwon, aramas ako wie pepehd oh rikirikpene kuail ko. Sohte me rikpene tikitik sang ohmer* eisek, oh re doulahte kihirailpeseng* kapilpene kahnimpwalo ong pein irail. 33 Ahpw erein ahnsou me uduk ko mihmihte nanpwungen ngihrail kan, mwohn ar pahn kak rukoa, Siohwa ketin engiengda pahn aramas ako, oh Siohwa ketin tepida kemehkihla aramas ako kalokolok laud ehu.+
34 Irail eri kihong eden wasao Kiprod-attapa,*+ pwehki wasao irail sarepedi aramas ako me kasalehda ineng roporop.+ 35 Aramas ako eri mweselsang Kiprod-attapa kolahng Aserod, oh re mihmihte nan Aserod.+
12 Miriam oh Aaron ahpw tepida lipahnede Moses pwehki eh pwoudikihda lihen Kus men.+ 2 Ira kin ndinda: “Dah, Moses kelehpw me Siohwa ketin doadoahngki pwehn mahsen? E soh pil ketin doadoahngki kita pwehn mahsen?”+ Oh Siohwa ketin karokaronge.+ 3 Moses iei ohl me keieu opampap nanpwungen aramas koaros*+ nin sampah.
4 Ni ahnsowohte Siohwa ahpw ketin mahsanihong Moses, Aaron oh Miriam: “Kumwail silimenen, kumwail kohieila ni impwal en mihtingo.” Irail silimeno eri kohieila. 5 Siohwa eri ketidihdo nan uhren depwek ehu+ oh ket ni wasahn pedolong en impwalo oh malipe Aaron oh Miriam. Ira koaros eri patohla mwowe. 6 Ih eri ketin mahsanih: “Kumwa rong ei mahsen kat, menlau. Ma mie soukohp en Siohwa men nanpwungamwail, I pahn mweidohng ih en ese ihs ngehi nan kaudiahl ehu,+ oh I pahn mahseniong ih nan ouraman ehu.+ 7 Ahpw I sohte wia met ong ei ladu Moses! Tehnpesei pwon kohieng ih.*+ 8 I koasoiong Moses duwehte ohl emen eh pahn lokaiaiong emen ohl tohrohr,*+ ni sansal, kaidehn ni kahk kan; oh e kilang mwomwen Siohwa. Eri, dahme kumwa sohte masangki lipahnede ei ladu Moses?”
9 Siohwa eri ketin engiengda pahra, oh e ketilahsang ira. 10 Pelien depweko ahpw kohkohsang pohn impwalo, oh kilang! Miriam tokutokla pwetepwet duwehte sinoh.+ Aaron eri sohpeilahng Miriam, oh e kilang me e tokutoklahr.+ 11 Ni ahnsowohte Aaron ndaiong Moses: “I peki rehmwi, ei kaun! Menlau komw dehr kihdi kalokepen dihp wet poht! Se mwekid pweipwei sang dahme se wiadahr. 12 Menlau komw dehr mweidohng ih en doulahte wia duwehte emen me mehla, me elep en uduke mwengesangehr ni eh ipwidi!” 13 Oh Moses ahpw tepida likweriong Siohwa patohwanohng: “Maing Koht, komw kupwurkalahngan oh ketin kamwahwihala ih!”+
14 Siohwa ketin sapeng Moses, mahsanih: “Ma eh pahpa pahn kendipiong ni mese, e sou pahn namenekla erein rahn isuh? Mweidohng ih en katohrohrla erein rahn isuh likin kahnimpwalo,+ oh mwurin mwo e pahn kak kapwurupwurdo.” 15 Miriam eri katohrohrla likin kahnimpwalo erein rahn isuh,+ oh aramas ako sohte kihpene imwarail impwal ko lao Miriam kapwurupwurdo. 16 Aramas ako eri mweselsang Aserod+ oh tepida kauwada imwarail impwal kan nan sapwtehn en Paran.+
13 Siohwa eri ketin mahsanihong Moses: 2 “Kadarala ohl akan pwe ren lipoahroke sapwen Kenan, me I pahn kihong mehn Israel kan. Kumwail pahn kadarala ohl emen sang ehuehu keinek, emen kaun+ nanpwungarail.”+
3 Moses eri kadarirailla sang sapwtehn en Paran+ ni ruwes en Siohwa. Ohl ako koaros wia kaun akan en mehn Israel kan. 4 Iet adarail kan: sang keinek en Reupen, Samua nein Sakur; 5 sang keinek en Simion, Sapad nein Ori; 6 sang keinek en Suda, Kalep+ nein Sepune; 7 sang keinek en Isakar, Ikal nein Sosep; 8 sang keinek en Epraim, Osea+ nein Nun; 9 sang keinek en Pensamin, Palti nein Rapu; 10 sang keinek en Sepulon, Kadiel nein Sodi; 11 sang keinek en Sosep,+ ong keinek en Manase,+ Kaddi nein Susi; 12 sang keinek en Dan, Ammiel nein Kemalli; 13 sang keinek en Aser, Sedur nein Maikel; 14 sang keinek en Napdali, Napi nein Popsi; 15 sang keinek en Kad, Keuel nein Makai. 16 Ih eden ohl pwukat me Moses kadarala pwe ren lipoahroke sahpwo. Oh Moses kihong Osea nein Nun ede Sosua.*+
17 Ni Moses eh kadarirailla pwe ren lipoahroke sapwen Kenan, e ndaiong irail: “Kumwail kohdahla Nekep, oh mwuri kumwail kohdahla wasa nahnahn kan.+ 18 Kumwail pahn kilang soangen sahpw dahieu mwo+ oh ma aramas akan me kin kousoan mwo kehlail de luwet, malaulau de tohto, 19 oh ma sahpwo mwahu de suwed oh ma kahnimw kan me re kin kousoan loale sohte kelpene de kelpene kehlail. 20 Oh kilang ma sahpwo pwelmwahu* de pwelsuwed*+ oh ma mie tuhke kan loale de sohte. Kumwail pahn kommwad+ oh ale ekei wahnsahpwo.” Eri met iei ahnsoun tepin wahn kreip kan.+
21 Irail eri kohdahla oh lipoahroke sahpwo sang ni sapwtehn en Sinn+ lel Rehop+ limwahn Lepo-amad.*+ 22 Ni ahnsou me irail kohdahla Nekep, irail lella Ipron,+ wasa me mehn Anak ko,+ Aiman, Sihsai oh Talmai+ kin kousoan ie. Ipron kokoudahr sounpar isuh mwohn Soan en Isip. 23 Ni ahnsou me re leledo nan Wahun Eskol,+ re ahpw pelehdi rahn dunen kreip pwoat wasao, me ohl riemen pahn iniehda, iangahki ekei pwohmakraneid oh pik kan.+ 24 Irail kahdaneki wasao Wahun Eskol*+ pwehki dunen kreip me mehn Israel ko pelehdi wasao.
25 Ni kaimwiseklahn rahn 40,+ irail pwurodo sang arail lipoahroke sahpwo. 26 Irail eri pwurodo rehn Moses, Aaron oh mwomwohdisohn mehn Israel kan pwon nan Kades+ nan sapwtehn en Paran. Irail wahdo rohng ehu ong mwomwohdiso pwon oh kasalehiong irail wahn sahpwo. 27 Iet me re pakairkihong Moses: “Se pedolong nan sahpw me komw kadarkitalahng ie, oh sahpwo me inenen pwelmwahu,*+ oh iet wahnsahpwo.+ 28 Ahpw, aramas akan me kin kousoan nan sahpwo me kehlail, oh kahnimw kehl kehlail kan me inenen laud. Se pil kilangada mehn Anak wasao.+ 29 Mehn Amalek kan+ kin kousoan nan sapwen Nekep,+ oh mehn Id kan, mehn Sepus kan+ oh mehn Amor kan+ kin kousoan nan wasa nahnahn kan, oh mehn Kenan kan+ kin kousoan limwahn sehdo+ oh ni keilen Sordan.”
30 Kalep eri song en kameleileidi aramas ako ni ar uh mwohn Moses, ni eh nda: “Kitail mwadang kohdahla, oh kitail uhdahn pahn sapwenikihla sahpwo, pwehki kitail uhdahn kak kalowehdi.”+ 31 Ahpw ohl ako me iang ih kohdahla ahpw nda: “Kitail sohte kak kohdahla mahweniong aramas ako, pwehki re kehlailsang kitail.”+ 32 Oh irail kin pousehlahte ndaiong mehn Israel kan rohng suwed+ duwen sahpw me re lipoahrokeo: “Sahpw me se kohla pwehn lipoahrokeo iei sahpw ehu me aramas akan sohte pahn pitsang, oh aramas koaros me se kilangada nan sahpwo inenen lapala.+ 33 Oh se kilangada Nepilim kei wasao, me iei nein Anak kan,+ kadaudok en* Nepilim kan, oh ni at kapahrekiong kiht ong irail, se duwehte mensiek, ong kiht oh pil ong irail.”
14 Mwomwohdiso pwon ahpw ngihl laudida, oh aramas ako usehlahte wie sengiseng oh mwahmwahiei erein pwohngo pwon.+ 2 Mehn Israel kan pwon ahpw tepida lipahnede Moses oh Aaron,+ oh mwomwohdiso pwon uhwongirahda, nda: “E pahn mwahu ma kitail mehlahte nan sapwen Isip de mehlahte nan sapwtehnet! 3 Dahme Siohwa kahluweikitaildohki nan sahpwet pwe kitail en mehkihla kedlahs?+ Atail pwoud kan oh neitail seri kan pahn wiahla dipwisou lohdi kan.+ E sou mwahu kitail en pwurala Isip?”+ 4 Irail pil ndapene: “Kitail idihada emen kaun oh pwurala Isip!”+
5 Moses oh Aaron eri poaridiong nanpwelo mwohn mwomwohdisohn mehn Israel kan pwon. 6 Sosua+ nein Nun oh Kalep+ nein Sepune, me iang irail ako me lipoahroke sahpwo, ahpw tehrpeseng ara likou ko, 7 oh ira ndaiong mwomwohdisohn mehn Israel ko pwon: “Sahpw me se kohla pwehn lipoahrokeo uhdahn, uhdahn sahpw mwahu ehu.+ 8 Ma Siohwa ketin kupwurkin kitail, e uhdahn pahn ketin kahluweikitaillahng nan sahpwo oh ketikihong kitail sahpw ehu me inenen pwelmwahu.*+ 9 Ahpw kumwail dehr uhwongada Siohwa, oh dehr masak aramas en sahpwo,+ pwe kitail pahn kaloweiraildi.* Solahr mie pereparail, oh Siohwa ketin ieiang kitail.+ Kumwail dehr masak irail.”
10 Ahpw, mwomwohdiso pwon koasoakoasoia ren katehkin ira takai.+ Ahpw sapwellimen Siohwa lingan pwarada pohn impwal en mihtingo ong aramas en Israel ko koaros.+
11 Siohwa eri ketin mahsanihong Moses: “Ia erein aramas pwukat ar pahn mwamwahlikin ie,+ oh ia erein ar sohte pahn pwoson ie mendahki kilel kan koaros me I wiahda nanpwungarail?+ 12 I pahn kalokehkin irail soumwahu lusulus oh kasareirailla, oh I pahn wiahiong uhk en wiahla wehi ehu me laudsang oh kehlailsang irail.”+
13 Ahpw Moses patohwanohng Siohwa: “Komw ketin kahluwahsangehr aramas pwukat nan Isip sang ni sapwellimomwi manaman. Ni mehn Isip kan ar pahn rong dahme komw ketin wiadahr,+ 14 re pahn koasoiaiong tohn sahpw wet. Irail pil rong me komwi, Siohwa, ketiket nanpwungen aramas+ pwukat oh pwarada ni sansal* mwohrail.+ Komwi me Siohwa, oh sapwellimomwi pelien depweko uh pohrail, oh komw kin ketin tiengla mwohrail ni uhren depwek nin rahn oh nipwong ni uhren kisiniei.+ 15 Ma komw ketin kemehla aramas pwukat ni ahnsou ehute,* wehi kan me rongehr duwen omwi ndand pahn nda: 16 ‘Siohwa sohte kak kahluwahla aramas pwukat nan sahpw me e kahukihla en kihong irail, eri e kemeirailla nan sapwtehno.’+ 17 Eri, maing Siohwa, komw kupwurkalahngan oh ketin kahrehiong sapwellimomwi manaman en lapalapala, nin duwen me komw ketin inoukihda ni omw ketin mahsanih: 18 ‘Siohwa, sohte kin mwadang lingeringerda, oh diren limpoak loalopwoat,*+ me kin mahkohng sapwung oh kauwehla kosonned kan, ahpw e sohte mwahn pahn mweidohng me suwed en sohte ale kalokepe, e pahn wadohng seri kan kalokepen sapwung en ar pahpa kan, lel dih kesiluh oh dih kapahieu.’+ 19 Komw kupwurkalahngan oh ketin mahkohng sapwung en aramas pwukat nin duwen sapwellimomwi limpoak loalopwoat laud, duwehte omwi ketin mahkohngehr aramas pwukat sang Isip lel met.”+
20 Siohwa eri ketin mahsanih: “I mahkohng irail nin duwen me ke ndahn.+ 21 Ahpw ni ahnsowohte, nin duwen ei ieias, sampah pwon pahn direkihla lingan en Siohwa.+ 22 Ahpw, sohte emen rehn aramas ako me kilangehr ei lingan oh ei kilel kan+ me I wiadahr nan Isip oh nan sapwtehno, oh kin usehlahte kasonge ie+ pak eisek pwukat oh sohte rong kapitiei+ 23 pahn kilang sahpw me I kahukihong samarail ko. Soh, sohte emen irail me kin mwamwahlikin ie pahn kilang sahpwo.+ 24 Ahpw pwehki ei ladu Kalep+ ahneki elen madamadau* tohrohr ehu oh doulahte idawehn ie ni mohngiong unsek, I uhdahn pahn wahla ih nan sahpwo wasa me e kohla ieo, oh kadaudoke kan pahn sapwenikihla.+ 25 Pwehki mehn Amalek kan oh mehn Kenan kan+ kin kousoan nan wahwo,* kumwail pahn pwurala lakapw oh seiloaklahng sapwtehno sang ni ahl en Sehd Weitahtao.”+
26 Siohwa eri ketin mahsanihong Moses oh Aaron: 27 “Ia erein mwomwohdiso suwed wet ar pahn usehlahte lipilipahnede ie?+ I rongehr dahme mehn Israel kan lipilipahnedehkin ie.+ 28 Ndaiong irail, ‘Siohwa mahsanih: “Nin duwen ei ieias, I pahn wiahiong kumwail duwehte dahme I rong kumwail nda!+ 29 Nan sapwtehnet paliwaramwail mehla kan pahn pwupwudiong pohn pwehl,+ ei, kumwail koaros me mahki sounpar 20 kohda me kileldier, kumwail koaros me kin lipahnede ie.+ 30 Sohte emen kumwail pahn pedolong nan sahpw me I kahukihla* kumwail en kousoan loale,+ ihte Kalep nein Sepune oh Sosua nein Nun.+
31 “‘“Oh I pahn wahdo noumwail seri kan, me kumwail nda pahn wiahla dipwisou lohdi kan,+ oh re pahn esehla sahpw me kumwail soikalao.+ 32 Ahpw paliwaramwail mehla kan pahn pwupwudi nan sapwtehnet. 33 Eri noumwail seri kan pahn wiahla silepen sihpw kei nan sapwtehno erein sounpar 40,+ oh re pahn anahne dolung imwilahn amwail wiewia salelepek kan* lao paliwaramwail mehla kan koaros pwupwudi nan sapwtehno.+ 34 Pwehki uwen rahn akan me kumwail lipoahroke sahpwo iei rahn 40,+ rahn ehu ong sounpar ehu, rahn ehu ong sounpar ehu, kumwail pahn dolung imwilahn amwail sapwung kan erein sounpar 40,+ pwe kumwail pahn esehda wehwehn amwail uhwong ie.*
35 “‘“Ngehi, Siohwa, me mahmahsen. Iet me I pahn wiahiong mwomwohdiso suwed wet pwon, irail me pokonpene uhwong ie: Irail pahn imwisekla nan sapwtehnet, oh irail pahn mehla wasaht.+ 36 Ohl ako me Moses kadarala pwehn lipoahroke sahpwo oh kahrehiong mwomwohdiso pwon ren lipahnede ih ni ar pwurekihdo rohng suwed ehu duwen sahpwo,+ 37 ei, ohl ako me wahdo rohng suwed duwen sahpwo pahn ale kalokolok oh mehla mwohn silangin Siohwa.+ 38 Ahpw Sosua nein Nun oh Kalep nein Sepune, me iang irail ako me kolahng lipoahroke sahpwo, uhdahn pahn momourte.”’”+
39 Ni Moses eh koasoiaiong mehn Israel ko koaros mahsen pwukat, aramas ako ahpw tepida mwahiei kowahlap. 40 Oh pil, irail sangkenei pirida oh song en kohdahla pohn kadoken nahnao, nda: “Iet se onopadahr en kohdahla wasa me Siohwa ketin mahsanih duwe, pwe se dipadahr.”+ 41 Ahpw Moses nda: “Dahme kumwail daulihki sapwellimen Siohwa kehkehliko? Met sohte pahn pweida. 42 Kumwail dehr kohdahla, pwe Siohwa sohte ketin ieiang kumwail; oh kumwail pahn lohdi pahn amwail imwintihti kan.+ 43 Pwe mehn Amalek kan oh mehn Kenan kan mi wasao mwohmwail,+ oh kumwail pahn mehkihla kedlahs. Pwehki kumwail solahr idawehn Siohwa, Siohwa sohte pahn ketin ieiang kumwail.”+
44 Ahpw, irail aklapalapda* oh kohdahla pohn kadoken nahnao,+ ahpw kohpwahn inou lap en Siohwa oh Moses sohte mwekidsang nanwerengen kahnimpwalo.+ 45 Mehn Amalek ko oh mehn Kenan ko me koukousoan pohn nahnao ahpw kohdihdo oh kaloweiraildi, kamwarakirailpeseng lao lel Orma.+
15 Siohwa ketin doula mahsanihong Moses: 2 “Koasoiong mehn Israel kan oh ndaiong irail, ‘Ni amwail pahn pedolong nan sahpw me I pahn kihong kumwail pwe kumwail en kousoan loale+ 3 oh kumwail pahn wiahda meirong ehu sang kisiniei ong Siohwa sang pelin kou de pelin sihpw—sohte lipilipil ma meirong isihs+ de meirong ehu pwehn kahukihla inou tohrohr ehu de meirong ehu sang ni nsenamwail+ de meirong ehu erein ahnsoun amwail kasarawi kan,+ pwehn wiahda pwoh kansenamwahu ehu ong Siohwa+— 4 aramas me wiahda eh meirong pil pahn meirongkihong Siohwa meirong en krein ehu me kohsang eisek kis ehun ihpah* en pilawa amas mwahu,+ doalki pahkis ehun ihn* en leh. 5 Ke pil pahn meirongki pahkis ehun ihn en wain nin duwen meirong en wain, iangahki meirong isihs+ de meirong en emenemen sihmpwul wol. 6 De ong sihpw wol men, ke pahn wiahda meirong en krein ehu me kohsang eisek kis riaun sosohng en ihpah en pilawa amas mwahu me doalki silikis ehun ihn en leh. 7 Oh ke pahn kihda silikis ehun ihn en wain nin duwen meirong en wain, nin duwen pwoh kansenamwahu ehu ong Siohwa.
8 “‘Ahpw ma ke pahn meirongki kouwol men nin duwen meirong isihs ehu+ de meirong ehu pwehn kahukihla inou tohrohr ehu+ de meirong en kaminimin ong Siohwa,+ 9 ke pahn pil kihda meirong en krein+ me kohsang eisek kis siluhn sosohng en ihpah en pilawa amas mwahu me doalki elep en ihn en leh iangahki kouwolo. 10 Ke pahn pil kihda elep en ihn en wain nin duwen meirong en wain,+ nin duwen meirong ehu sang kisiniei, nin duwen pwoh kansenamwahu ehu ong Siohwa. 11 Ih met me pahn wiawihong emenemen kouwol de sihpw wol de sihmpwul wol de kuht. 12 Sohte lipilipil uwen tohtohn mahn me ke meirongki, ih met me ke pahn wiahiong emenemen irail. 13 Ih mwomwen pwilidak en mehn Israel kan koaros ar pahn wiahda meirong ehu sang kisiniei, nin duwen pwoh kansenamwahu ehu ong Siohwa.
14 “‘Ma mehn liki men me kin kousoan rehmwail de emen me mi rehmwail ahnsou werei pahn pil wiahda meirong ehu sang kisiniei, nin duwen pwoh kansenamwahu ehu ong Siohwa, e pahn wia duwehte dahme kumwail kin wia.+ 15 Kumwail kan me kisehn mwomwohdiso oh mehn liki me kin kousoan rehmwail pahn ahneki koasoandi tehieu. Met pahn wia koasoandi poatopoat ehu ong kumwail oh kadaudokamwail kan. Mwohn silangin Siohwa mehn liki kan oh kumwail duwepenehte.+ 16 E pahn mie kosonned tehieu oh kopwung tehieu ong kumwail oh mehn liki me kin kousoan rehmwail.’”
17 Siohwa ketin doula mahsanihong Moses: 18 “Koasoiong mehn Israel kan oh ndaiong irail, ‘Ni amwail pahn kohdo nan sahpw me I pahn waikumwaildo ieo 19 oh kumwail tungoale pilawahn* sahpwo,+ kumwail pahn wiahda kisakis ehu ong Siohwa. 20 Kumwail pahn wiahda kisakis en tepin kanamwail krein+ pisalap kan nin duwen lopwon me mwomwen rihng kan. Duwehte kisakis sang wasahn kihsang kilin krein ehu, ih mwomwen amwail pahn kihda kisakis. 21 Ekei tepin kanamwail krein pisalap kan, kumwail pahn kihda nin duwen kisakis ehu ong Siohwa erein dih kan me pahn kohdo.
22 “‘Eri ma kumwail wiahda sapwung ehu oh sohte kapwaiada kehkehlik pwukat koaros me Siohwa ketin mahsanihongehr Moses, 23 soahng koaros me Siohwa ketin kehkehlingkihong kumwail sang rehn Moses sangete rahn me Siohwa ketin kehkehlingki met oh kohkohlahte ong kadaudokamwail kan, 24 oh ma sapwung wet wiawi oh mwomwohdiso sohte dehdehki, mwomwohdiso pwon pahn meirongki emen koupwul wol nin duwen meirong isihs ong pwoh kansenamwahu ehu ong Siohwa, iangahki meirong en krein oh meirong en wain nin duwen me koasoandiero,+ oh emen kuht pwulopwul nin duwen meirong en dihp.+ 25 Samworo pahn wiahda tomw ong mwomwohdisohn mehn Israel pwon, oh re pahn alehdi mahk,+ pwehki sapwung ehu mwo, oh irail wahdo nin duwen arail meirong, meirong ehu sang kisiniei ong Siohwa oh arail meirong en dihp mwohn silangin Siohwa ong arail sapwung. 26 Mwomwohdisohn mehn Israel kan pwon oh mehn liki kan me kin kousoan nanpwungarail pahn alehdi mahk, pwehki sapwung ehu mwo me aramas ako koaros wiahda.
27 “‘Ma mehmen* sapwungala wiahda dihp, eri e pahn kihda kuht lih men me sounpar ehu ong meirong en dihp.+ 28 Oh samworo pahn wiahda tomw ong aramas* me wiahda sapwungo ni eh sohte nsenki dipada mwohn silangin Siohwa, oh e ahpw pahn ale mahk.+ 29 A ong pwilidak en mehn Israel kan oh mehn liki me kin kousoan nanpwungarail, e pahn mie kosonned tehieu ong kumwail me pid mehkot me e sohte nsenki wia.+
30 “‘Ahpw aramas* me wia mehkot sang ni pein nsene,+ sohte lipilipil ma ih pwilidak men de mehn liki men, e kin lahlahwe Siohwa oh e pahn kamakamala. 31 Pwehki e mwamwahlikihla mahsen en Siohwa oh kauwehla sapwellime kehkehlik, aramaso* uhdahn pahn kamakamala.+ E pahn dolung imwilahn eh sapwung.’”+
32 Nindoken mehn Israel ko ar mihmi nan sapwtehno, irail kilangada ohl emen me wesewesei tuwi ni rahnen Sapad.+ 33 Irail ako me kilangada ohlo eh wesewesei tuwi ahpw wahdahla ih rehn Moses, Aaron oh mwomwohdiso pwon. 34 Irail salihedi ih+ pwehki e sohte sansalda nan kosonnedo dahme pahn wiawihong ih.
35 Oh Siohwa ketin mahsanihong Moses: “Ohlo uhdahn pahn kamakamala,+ oh mwomwohdiso pwon pahn katehki takai likin kahnimpwalo.”+ 36 Eri mwomwohdiso pwon wahla ih likin kahnimpwalo oh katehki takai pwe en mehla, duwehte me Siohwa ketin kehkehlingkihong Moses.
37 Siohwa ketin doula mahsanihong Moses: 38 “Koasoiong mehn Israel kan oh ndaiong irail me irail pahn anahne wiahda pengkir ni pwungipen arail likou kan ong pein irail, erein dih kan me pahn kohdo, oh irail pahn kihong sahl poh mei ehu pohnangin pengkir en pwungipen likowo.+ 39 ‘Kumwail pahn kolokol pengkir en pwungipen likou wet pwe kumwail en kilang oh tamataman sapwellimen Siohwa kehkehlik kan koaros oh kapwaiada.+ Kumwail dehr idawehn amwail mohngiong oh masamwail kan, me kin kahrehiong kumwail en kaudokiong* koht en liki kan.+ 40 Met pahn sewese kumwail en tamataman ei kehkehlik kan koaros oh kapwaiada mepwukat oh kumwail pahn sarawihla ong amwail Koht.+ 41 Ngehi me Siohwa amwail Koht, me waikumwaildo sang nan sapwen Isip pwehn kasalehda me ngehi amwail Koht.+ Ngehi me Siohwa amwail Koht.’”+
16 Kora+ nein Isar,+ nein Kohad,+ nein Lipai+ ahpw iangala Dadan oh Apiram nein Eliap pwutak kan,+ oh On nein Peled, kadaudok en Reupen kan.+ 2 Irail oh ohlen Israel 250 ahpw kohpene uhwong Moses, irail kaun akan en mwomwohdiso, me pilipilda kan en mwomwohdiso, me iei ohl lapalap akan. 3 Irail eri pokonpene uhwong+ Moses oh Aaron oh ndaiong ira: “Se pwangahkinkumwadahr! Mwomwohdiso pwon, irail koaros sarawi,+ oh Siohwa ketiket nanpwungarail.+ Eri dahme kahrehda kumwa pein kasapwilkumwahda pohn mwomwohdisohn Siohwa?”
4 Ni Moses eh rongada met, e ahpw mwadangete poaridiong nanpwel. 5 Ih eri ndaiong Kora oh koaros me kin utung ih: “Nimenseng Siohwa pahn ketin kasalehda ihs me e ketin sapwellimanki+ oh ihs me sarawi oh ihs me pahn keiong mpe,+ oh mehmen me e ketin pilada+ pahn keiong mpe. 6 Kumwail wia met: Kora oh koaros me kin utung uhk,+ ale dewen mwoalus kan,+ 7 oh kihong kisiniei* loale oh kihong warpwohmwahu powe mwohn silangin Siohwa lakapw, oh ohl me Siohwa pahn ketin pilada,+ ih me sarawi. Kumwail nein Lipai kan,+ kumwail me nohn daulihalahr!”
8 Moses eri ndaiong Kora: “Menlau, kumwail rong, kumwail kadaudok en Lipai kan. 9 Ia duwe, e mwomwen mehkot tikitik ong kumwail me Koht en Israel ketin katohreikumwailsang mwomwohdisohn Israel+ oh ketin mweidohng kumwail en keiong mpe pwe kumwail en wia doadoahk nan sapwellimen Siohwa impwalo oh uh mwohn mwomwohdiso pwe kumwail en papah irail,+ 10 oh e ketin waiukodo limwah iangahki riomw pwutak kan koaros, kadaudok en Lipai kan? Ia duwe, kumwail pil pahn song ale pwukoahn samworo?+ 11 Pwehki kahrepe wet, kowe oh koaros me kin utung uhk me pokopokonpene, uhwongadahr Siohwa. A duwen Aaron, ihs ih pwe kumwail en lipahnede?”+
12 Mwuhr Moses ileklahng Dadan oh Apiram+ nein Eliap pwutak ko, ahpw ira nda: “Se sohte pahn kohwei! 13 Ia duwe, met uhdahn mehkot tikitik me ke waikitodo sang sahpw ehu me inenen pwelmwahu* pwehn kemeikitala nan sapwtehnet?+ Met ke pil men kaunkitada?* 14 Ni mehlel, ke sohte waikitodohng nan sahpw ehu me inenen pwelmwahu*+ de kihong kiht sohsohn mwaht oh mwetin kreip. Ke pahn pwadikasang pwoaren mesen ohl pwukat?* Se sohte pahn kohwei!”
15 Moses eri uhdahn lingeringerda oh patohwanohng Siohwa: “Komw dehr ketin tehk arail meirong en krein. Sohte dongki men me I kihsang irail, de I pil sohte kauwehla emen irail.”+
16 Moses eri ndaiong Kora: “Kowe oh koaros me kin utung uhk en patohla mwohn silangin Siohwa lakapw, kowe oh irail oh Aaron. 17 Emenemen pahn ale nah dewen mwoalus oh kihong warpwohmwahu loale, oh emenemen pahn patohwanda nah dewen mwoalus mwohn silangin Siohwa, dewen mwoalus 250, oh pil kowe oh Aaron pahn wa noumwa dewen mwoalus.” 18 Eri emenemen irail ahpw ale nah dewen mwoalus, oh re kihong kisiniei* oh warpwohmwahu loale oh kesihnenda ni wasahn pedolong en impwal en mihtingo iangahki Moses oh Aaron. 19 Ni Kora eh kapokonepene irail ako me kin utung ih+ oh sohpeiong ira ni wasahn pedolong en impwal en mihtingo, sapwellimen Siohwa lingan ahpw pwaradahng mwomwohdiso pwon.+
20 Siohwa eri ketin mahsanihong Moses oh Aaron: 21 “Katohreikumwahsang pwihn wet, pwe I pahn mwadang kasohreirailla.”+ 22 Ira eri poaridiong nanpwel oh patohwan: “Maing Koht, komwi me kin ketikihong aramas koaros mour,+ dipen aramastehmen pahn kahrehiong komwi en engiengda pahn mwomwohdiso pwon?”+
23 Siohwa eri ketin mahsanihong Moses: 24 “Koasoiong mwomwohdiso oh ndaiong irail, ‘Keisang limwahn en Kora, Dadan oh Apiram ar impwal kan!’”+
25 Moses eri uhda oh kohla rehn Dadan oh Apiram, oh ohl mah kan+ en Israel iangih kohla. 26 E ndaiong mwomwohdiso: “Menlau, kumwail keiweisang en ohl suwed pwukat impwal kan oh dehr doahke mehkot me arail, pwe kumwail en dehr kamwomwmwomwla pwehki diparail kan.” 27 Irail eri mwadangete keilahsang en Kora, Dadan oh Apiram ar impwal ko ni pali koaros. Dadan oh Apiram ahpw pedoido oh kesihnenda ni wasahn pedolong en imwara impwal ko iangahki ara pwoud ko, neira seri kan, oh neira seri pwelel kan.
28 Moses eri nda: “Sang ni met kumwail pahn ese me Siohwa ketin poaroneiehdo I en wia mepwukat koaros, me kaidehkin sang ni ei mohngiong:* 29 Ma aramas pwukat mehla nin duwen aramas eh kin mehla oh ma kalokeparail duwehte kalokepen aramas koaros, eri Siohwa sohte ketin poaroneiehdo.+ 30 Ahpw ma Siohwa ketin wia mehkot kapwuriamwei ong irail oh pwehl kohpeseng* oh kadalleirailla oh mehkoaros me arail oh irail kohdihla nan Sousou* ni ar momourte, kumwail uhdahn pahn ese me aramas pwukat mwamwahliki Siohwa.”
31 Ni ahnsowohte me e nek koasoia mepwukat koaros, pwehl me mi pahrail ahpw pwalpeseng.+ 32 Oh sampah kohpeseng* oh kadalleirailla, iangahki tohnimwarail kan oh koaros me iangala Kora+ oh arail kepwe kan koaros. 33 Eri irail oh koaros me iangirailla ahpw kohdihla nan Sousou* ni ar momourte, oh sampah pwainiraildi, irail eri sohrala sang nanpwungen mwomwohdiso.+ 34 Mehn Israel ko koaros me mi limwahrail tangdoaui pwehki arail weriwer, re nda: “Kitail masak pwe sampah pahn kakete kadalleikitailla!” 35 Kisiniei ehu ahpw kohsang rehn Siohwa+ oh isikala ohl 250 ko me meirongki warpwohmwahu.+
36 Siohwa eri ketin mahsanihong Moses: 37 “Ndaiong Eliesar nein samworo Aaron en kihsang dewen mwoalus ko+ nan kisinieio, pwe re sarawi. Pil ndaiong ih en kamwarakpeseng kisiniei ko ekis wasa doh. 38 Nein ohl ako dewen mwoalus ko, me mehkihla diparail kan, pahn wiahla mete menipinip mehn pwaindi pei sarawio,+ pwehki re meirongki mepwukat mwohn silangin Siohwa, oh mepwukat sarawihla. Met pahn wia kilel ehu ong mehn Israel kan.”+ 39 Eri, samworo Eliesar ahpw ale dewen mwoalus prons ko me irail me isihsla ko meirongki, oh sukpene mepwukat pwehn pwainkihdi pei sarawio, 40 duwehte me Siohwa ketin mahsanihong ih sang Moses. Met wia mehn kataman ehu ong mehn Israel kan me emen me sohte mweimwei* me kaidehn kisehn kadaudok en Aaron sohte pahn kohla isik warpwohmwahu mwohn silangin Siohwa+ oh sohte me pahn duwehla Kora oh irail ako me kin utung ih.+
41 Mandahn rahnohte, mwomwohdisohn mehn Israel kan pwon ahpw tepida lipahnede Moses oh Aaron,+ nda: “Kumwa kahrehiong sapwellimen Siohwa aramas akan en mehla.” 42 Ni mwomwohdiso ar pokonpene uhwong Moses oh Aaron, irail eri sohpeilahng impwal en mihtingo, oh kilang! pelien depweko pwaindier impwalo, oh sapwellimen Siohwa lingan ahpw tepida pwarada.+
43 Moses oh Aaron ahpw kohla mwohn impwal en mihtingo,+ 44 oh Siohwa ketin mahsanihong Moses: 45 “Kumwa keiweisang rehn mwomwohdiso wet, pwe I pahn mwadang kasohreirailla.”+ Ira eri poaridiong nanpwelo.+ 46 Moses eri ndaiong Aaron: “Ale dewen mwoaluso oh kihong loale kisiniei* sang pei sarawio+ oh kihong warpwohmwahu powe oh mwadang kohla rehn mwomwohdiso oh wiahda tomw ong irail,+ pwehki Siohwa ketin engiengdahr. Kalokoloko tepidahr!” 47 Ni ahnsowohte Aaron ahpw ale dewen mwoaluso duwehte me Moses ndao, oh tangala nanpwungen mwomwohdiso, oh kilang! kalokoloko tepidahr rehn aramas ako. Ih eri kihong warpwohmwahwo nan dewen mwoaluso oh tepida wiahda tomw ong aramas ako. 48 E wie kesikesihnen nanpwungen me melahr oh me momour, oh kalokoloko ahpw uhdi. 49 Irail me mehkihla kalokoloko patpene meh 14,700, likin irail ako me mehla pwehki Kora. 50 Ni Aaron eh pwurala rehn Moses ni wasahn pedolong en impwal en mihtingo, kalokoloko uhdier.
17 Siohwa eri ketin mahsanihong Moses: 2 “Koasoiong mehn Israel kan oh alehsang irail ehu sokon ong ehuehu keinek, sang kaunen ehuehu keinek kan,+ sokon 12. Ntingihedi eden emenemen ni eh sokon. 3 Ke pahn ntingihedi eden Aaron ni en Lipai sokono, pwehki ehu sokon ong kaunen ehuehu keinek. 4 Kihdi sokon ko nan impwal en mihtingo mwohn kohpwahn Kadehdeo,+ wasa me I kin kaukaule kasalehiong kumwail pein ngehi.+ 5 Oh sokon en ohl me I pilada+ pahn masalpeseng, oh I pahn katokehdi lipahned en mehn Israel kan,+ me kin lipahnedih ngehi oh pil kumwa.”+
6 Moses eri koasoiong mehn Israel ko, oh arail kaun ako koaros ahpw kihong ih sokon kan—sokon ehu ong emenemen kaunen keinek, sokon 12—oh en Aaron sokono mi nanpwungen arail sokon ko. 7 Moses eri patohwandiong sokon ko mwohn silangin Siohwa nan impwal en Kadehdeo.
8 Mandahn rahno, ni Moses eh kohlongala nan impwal en Kadehdeo, a kilang! en Aaron sokon ong peneinei en Lipai me poahnsda oh mpwekda oh rohs kan masalpeseng oh kapwarehda wahn almond kei me mahier. 9 Moses eri wahieisang sokon ko koaros mwohn silangin Siohwa oh wahieila rehn aramas en Israel ko koaros. Irail eri kilang sokon ko, oh emenemen ohl ale eh sokon.
10 Siohwa eri ketin mahsanihong Moses: “Kapwurehla en Aaron sokonen+ mwohn kohpwahn Kadehdeo pwehn wia mehkot me pahn nekinekdi nin duwen kilel ehu+ ong me uhwong kan,+ pwe arail lipahnede ie en uhdi oh re sohte pahn mehla.” 11 Moses eri mwadangete kapwaiada duwehte me Siohwa ketin kehkehlingkihong ih. E uhdahn kapwaiada.
12 Mehn Israel ko eri ndaiong Moses: “Eri se pahn mehla, se uhdahn pahn sohrala, kiht koaros pahn sohrala! 13 Mehmen me pahn keido limwahn sapwellimen Siohwa impwal sarawio pahn mehla!+ Ia duwe, kiht koaros pahn mehla?”+
18 Siohwa eri ketin mahsanihong Aaron: “Kowe, noumw pwutak kan oh kadaudokomw kan pahn pwukoahki sapwung kan me wiawi ong wasa sarawio,+ oh kowe oh noumw pwutak kan pahn pwukoahki sapwung kan ong amwail pwukoahn samworo.+ 2 Pil wahdo riomw kan sang keinek en Lipai, keinek en semomw mehn mahso, pwe ren iang uhk oh papah kowe+ oh noumw pwutak kan mwohn impwal en Kadehdeo.+ 3 Irail pahn kapwaiada arail pwukoa kan ong uhk oh ong impwalo pwon.+ Ahpw re sohte pahn kohdo limwahn dipwisou kan en wasa sarawio oh pei sarawio, pwe irail oh pil kumwail en dehr mehla.+ 4 Re pahn iang uhk oh kapwaiada arail pwukoa kan me pid impwal en mihtingo oh doadoahk koaros en impwalo, oh emen me sohte mweimwei* sohte pahn kohdo limwahmw.+ 5 Kumwail pahn kapwaiada amwail pwukoa ong wasa sarawio+ oh pei sarawio,+ pwe ei engieng+ en dehr pil kohwong aramas en Israel kan. 6 Pein ngehi me kihsang riamwail kan, mehn Lipai kan, sang rehn mehn Israel kan nin duwen kisakis ehu ong kumwail.+ Re pahn wiahla sapwellimen Siohwa oh re pahn papah nan impwal en mihtingo.+ 7 Kowe oh noumw pwutak kan pwukoahki amwail pwukoahn samworo kan me pid pei sarawio oh dahme mi loalen kahdengo,+ oh kumwail pahn wia pwukoa wet.+ I kihongkumwailehr pwukoahn samworo nin duwen kisakis ehu, oh emen me sohte mweimwei* me kohdo pahn kamakamala.”+
8 Siohwa ketin doula mahsanihong Aaron: “I kihong uhk en apwalih kisakis kan ong ie.+ I kihong uhk oh noumw pwutak kan ekei soahng sarawi kan koaros me mehn Israel kan kisakiski nin duwen pwaisamwail kohkohlahte.+ 9 Met pahn wiahla pwaisomw sang ni meirong me keieu sarawi kan sang kisiniei: meirong koaros me re wiahda, iangahki arail meirong en krein kan+ oh arail meirong en dihp kan+ oh arail meirong en tomwki dihp kan+ me re kin wadohng rehi. Met iei mehkot me uhdahn sarawi ong uhk oh noumw pwutak kan. 10 Ke pahn tungoale met nan wasa ehu me uhdahn sarawi.+ Ohl koaros pahn kak tungoale. E pahn wia mehkot sarawi ong uhk.+ 11 Met pil wiahla pwaisomw: kisakis kan me re kihda+ iangahki en mehn Israel kan meirong en oaloahl kan koaros.+ I kihong uhk, noumw pwutak kan oh noumw serepein kan mepwukat nin duwen pwaisamwail kohkohlahte.+ Koaros me mwakelekel nan imwomw pahn kak tungoale.+
12 “Leh koaros me keieu mwahu oh wain kapw koaros oh krein koaros me keieu mwahu, tepin wahnsapwarail kan+ me re patohwanohng Siohwa, I kihong uhk mepwukat.+ 13 Tepin wahn soahng koaros sang nan sapwarail, me re pahn patohwando rehn Siohwa, pahn wiahla pwaisomw.+ Aramas koaros me mwakelekel nan imwomw pahn kak tungoale.
14 “Mehkoaros me koasoandier ong Koht* nan Israel pahn wiahla pwaisomw.+
15 “Mesenihen soahng mour kan koaros,*+ me re pahn patohwanohng Siohwa, sohte lipilipil aramas de mahn, pahn wiahla pwaisomw. Ahpw ke uhdahn pahn pwainda sapahl mesenihen aramas,+ oh ke pahn pwainda sapahl mesenihen mahn akan me samin.+ 16 Ke pahn pwainkihda sapahl met pweinen pweipwei sapahl ni eh mahki sounpwong ehu kohda, silper sekel* limau sang ni uwen pweine me koasoandier,+ nin duwen wadawad en sekel en wasa sarawio.* Me iei kera* 20. 17 Ihte mesenihen kouwol de mesenihen sihmpwul wol de mesenihen kuht me ke sohte pahn pwainda sapahl.+ Mahn pwukat wia mehkot sarawi. Ke pahn usupihki ntahrail kan pohn pei sarawio,+ oh ke pahn wiahiong wihrail kan en edinieida nin duwen meirong ehu sang kisiniei ong pwoh kansenamwahu ehu ong Siohwa.+ 18 Oh udukarail kan pahn wiahla pwaisomw. Duwehte mwaremwaren meirong en oaloahlo oh duwehte neh palimaun, re pahn wiahla pwaisomw.+ 19 Kisakis sarawi kan koaros me mehn Israel kan pahn patohwanohng Siohwa,+ I kihong uhk, noumw pwutak kan oh noumw serepein kan nin duwen pwaisamwail kohkohlahte.+ Met iei inou lap en soahl poatopoat ehu* mwohn silangin Siohwa ong uhk oh kadaudokomw kan.”
20 Siohwa ketin doula mahsanihong Aaron: “Ke sohte pahn ale sohso ehu sang sapwarail, oh sohte pelien sahpw nanpwungen sapwarail pahn wiahla sapwomw.+ Ngehi me pwaisomw oh omw sohso nanpwungen mehn Israel kan.+
21 “Eri kilang, I kihong mehn Lipai kan eisek kis ehun+ wahn soahng koaros nan Israel nin duwen sohso ong doadoahk me re kin wiewia, doadoahk en impwal en mihtingo. 22 Aramas en Israel kan solahr pahn keidohng impwal en mihtingo, ma re keido, re pahn dipada oh mehla. 23 Mehn Lipai kan pahn kapwaiada doadoahk en impwal en mihtingo, oh irail me pahn dolung imwilahn arail sapwung kan.+ Re sohte pahn alehdi pelien sahpw nin duwen sohso ehu nanpwungen mehn Israel kan, met iei koasoandi poatopoat ehu erein dih kan me pahn kohdo.+ 24 Pwe I kihong mehn Lipai kan nin duwen sohso ehu eisek kis ehun kisakis kan me aramas en Israel kan kin kihda, me re pahn kisekisehki Siohwa. Ihme kahrehda I ndaiong irail, ‘Re sohte pahn alehdi pelien sahpw nin duwen sohso ehu nanpwungen mehn Israel kan.’”+
25 Siohwa eri ketin mahsanihong Moses: 26 “Ke pahn ndaiong mehn Lipai kan, ‘Kumwail pahn alehsang mehn Israel kan eisek kis ehu me I kihong kumwail sang rehrail ong amwail sohso,+ oh kumwail pahn kihda sang met eisek kis ehu nin duwen kisakis ong Siohwa.+ 27 Oh Koht pahn ketin wiahki met amwail kisakis, duwehte krein en wasahn kihsang kilin krein ehu+ de reken wain de leh me kumwail wiahda. 28 Ih duwen met amwail pahn pil patohwanohng Siohwa kisakis ehu sang eisek kis ehun soahng koaros me kumwail alehdihsang mehn Israel kan, oh sang mepwukat, kumwail ahpw pahn kihong samworo Aaron kisakis ong Siohwa. 29 Kumwail pahn wiahda soangsoangen kisakis ong Siohwa sang me keieu mwahu en kisakis koaros me kohieng kumwail+ nin duwen mehkot sarawi.’
30 “Oh ke pahn ndaiong irail, ‘Ni ahnsou me kumwail pahn kisakiski me keieu mwahu sang mepwukat, Koht pahn ketin wiahki met ong mehn Lipai kan duwehte krein en wasahn kihsang kilin krein ehu de wain de leh me kumwail wiahda. 31 Kumwail oh tohnimwamwail kan pahn kak tungoale met nan wasa koaros, pwehki iei met pweinamwail ong amwail doadoahk ni impwal en mihtingo.+ 32 Kumwail sohte pahn dipada ni amwail kin kisakiski me keieu mwahu sang mepwukat, oh kumwail dehr kasaminehla en mehn Israel kan soahng sarawi kan, pwe ma kumwail pahn wia met, kumwail pahn mehla.’”+
19 Siohwa ketin pwurehng mahsanihong Moses oh Aaron: 2 “Iet kosonned me Siohwa ketin kehkehlingki, ‘Ndaiong mehn Israel kan me re pahn ale ong uhk kou weitahta men me sohte kisin sapwung kis ni paliwere+ oh saikinte mehn wisik mi powe. 3 Kumwa pahn kihong samworo Eliesar kouo, oh e pahn kahrehla likin kahnimpwalo, oh kouo pahn kamakamala mwohn ih. 4 Eri samworo Eliesar pahn ale ekis ntahn kouo ni sendin peho oh usupihki ntao pak isuh inenlahng mwohn impwal en mihtingo.+ 5 Kouo eri pahn isihsla mwohn mese. Kilio oh uduko oh ntao iangahki kanengen kapehdeo pahn isihsla.+ 6 Oh samworo pahn ale rahntuhke sidar, isop+ oh dereht weitahta* oh kesehdiong mepwukat nan kisiniei wasa me kouo isihsla ie. 7 Eri samworo pahn lopworada eh likou kan oh duhdu nan pihl, oh mwuri e pahn kak pedolong nan kahnimpwalo; ahpw samworo pahn samin lao lel nin soutik.
8 “‘Aramas me isikala kouo pahn lopworada eh likou kan nan pihl oh duhdu nan pihl, oh e pahn samin lao lel nin soutik.
9 “‘Aramas mwakelekel men pahn kihpene pehs en kouo+ oh kihdiong nan wasa mwakelekel ehu likin kahnimpwalo, oh mwomwohdisohn mehn Israel kan pahn nekidala met pwe ren kaunopada pihl me pahn kadoadoahk ong kamwakel.+ Met iei meirong en dihp. 10 Aramas me kihpene pehs en kouo pahn lopworada eh likou kan oh e pahn samin lao lel nin soutik.
“‘Met pahn wia koasoandi poatopoat ehu ong mehn Israel kan oh mehn liki me kin kousoan nanpwungarail.+ 11 Mehmen me doahke aramas mehla men pahn samin erein rahn isuh.+ 12 Soangen aramaso pahn kamwakelehkihda pein ih pihlo ni kesiluhwen rahn, oh e pahn mwakelekelda ni keisuhwen rahn. Ahpw ma e sohte kamwakele pein ih ni kesiluhwen rahn, e sohte pahn mwakelekel ni keisuhwen rahn. 13 Koaros me doahke paliweren aramas mehla men oh sohte kamwakelehda pein ih pahn kasaminehla sapwellimen Siohwa impwalo,+ oh aramaso* pahn kamakamala.+ Pwehki pilen kamwakel+ sohte usupiong ih, e pahn samisaminte. Eh samino mihmihte reh.
14 “‘Iet kosonned me kadoadoahk ni ahnsou me aramas emen mehla nan impwal ehu: Koaros me pedolong nan impwalo oh koaros me mihmi nan impwalo pahn samin erein rahn isuh. 15 Mehn deudeu koaros me pweine kohsang oh sohte pirapirdi kin samin.+ 16 Koaros me mi nan mohs oh doahke emen me kamakamkihla kedlahs de paliwar mehla ehu de tihn aramas emen de wasahn seridi ehu pahn samin erein rahn isuh.+ 17 Re pahn ale ekis pehs en meirong en dihp me isihsla ong aramas samino oh wudekihdiong pilen utuhnpihl pohn pehso nan mehn deudeu ehu. 18 Eri aramas mwakelekel men+ pahn ale isop+ oh kaduh nan pihlo oh usupihki pihlo impwalo oh mehn deudeu koaros oh aramas akan* me mi mwo oh aramas me doahke tiho de emen me kamakamala de paliwar mehlao de wasahn seridio. 19 Aramas mwakelekelo pahn usupihki pihlo aramas samino ni kesiluhwen rahn oh keisuhwen rahn, oh e pahn kamwakele ih sang dihp ni keisuhwen rahn;+ eri e pahn lopworada eh likou kan oh duhdu nan pihl, oh e pahn mwakelekelda nin soutik.
20 “‘Ahpw aramas men me samin oh sohte pahn kamwakelehda pein ih, aramaso* pahn kamakamala,+ pwehki e kasaminehla sapwellimen Siohwa wasa sarawio. Pilen kamwakelo sohte usupiong ih, eri e samin.
21 “‘Met pahn wia koasoandi poatopoat ehu ong irail: Aramas me usupih pilen kamwakelo+ pahn lopworada eh likou kan, oh aramas me doahke pilen kamwakelo pahn samin lao lel nin soutik. 22 Soahng koaros me aramas samin men doahke pahn samin, oh aramas* me doahke mepwukat pahn samin lao lel nin soutik.’”+
20 Ni keieun sounpwong, mwomwohdisohn mehn Israel kan pwon kohdo nan sapwtehn en Sinn, oh aramas ako tepida kousoanla nan Kades.+ Ih wasa me Miriam+ mehla oh seridi ie.
2 Eri sohla pihl ong mwomwohdiso,+ oh re pokonpene uhwong Moses oh Aaron. 3 Aramas ako akamaiong Moses+ oh nda: “E pahn mwahu ma se mehlahte ni riat kan ar mehla mwohn silangin Siohwa! 4 Dahme ke wahkihdo sapwellimen Siohwa mwomwohdiso nan sapwtehnet pwe kiht oh nait pelinmen kan en mehla wasaht?+ 5 Oh dahme ke wahkinkitasang Isip pwehn waikitodohng nan sahpw sakanakan wet?+ Sohte wasa ong werentuhke oh pik kan oh kreip kan oh pwohmakraneid kan, oh sohte pihl sen nim.”+ 6 Moses oh Aaron eri kohsang mwohn mwomwohdiso oh kohdo ni wasahn pedolong en impwal en mihtingo oh poaridiong nanpwelo, oh sapwellimen Siohwa lingan ahpw tepida pwarohng ira.+
7 Siohwa eri ketin mahsanihong Moses: 8 “Ale sokono oh kowe oh riomw Aaron ekerpene mwomwohdiso, oh lokaiaiong paipalapen mwohn masarail kan pwe en kakusiei pihl, oh ke pahn kapwilasang pihl nan paipalapen ong irail oh kihong mwomwohdiso oh neirail pelinmen kan mehkot ren nim.”+
9 Moses eri ale sokono sang mwohn silangin Siohwa,+ duwehte me E ketin kehkehlingkihong ih. 10 Moses oh Aaron eri ekerpene mwomwohdiso mwohn paipalapo, oh e ndaiong irail: “Kumwail me uhwong kan, rong! Se pahn kakusieisang pihl nan paipalapet ong kumwail?”+ 11 Moses eri kolada peho oh poakiheki paipalapo eh sokono pak riau, oh lapalahn pihl ahpw tepida kusiei, oh mwomwohdiso oh neirail pelinmen kan ahpw tepida nimpil.+
12 Mwuhr Siohwa ketin mahsanihong Moses oh Aaron: “Pwehki amwa sohte kasalehda amwa pwoson ie oh sohte kasarawihiehla mwohn mesen aramas en Israel kan, kumwa sohte pahn wahla mwomwohdiso wet nan sahpw me I pahn kihong irail.”+ 13 Ih pihl en Meripa*+ met, wasa me mehn Israel kan akamaiong Siohwa, kahrehda e ketin kasarawihala pein ih nanpwungarail.
14 Moses eri kadarala meninkeder kei rehn nanmwarkien Edom sang Kades:+ “Iet me riomw ohl Israel+ patohwan en, ‘Komw uhdahn mwahngih apwal akan me se lelohngehr. 15 Samat mehn mahs ako kohla Isip,+ oh se kousoan nan Isip sounpar* tohto,+ oh mehn Isip kan wiakauwe kiht oh samat mehn mahs ako.+ 16 Eri se likweriong Siohwa,+ oh e ketin karongei kiht oh poaronehdo tohnleng men+ oh kahluweikitasang nan Isip, oh met se mi nan Kades, kahnimw ehu ni irepen sapwomw. 17 Komw kupwurkalahngan oh mweidohng kiht sen kotehla sapwomwen. Se sohte pahn keid nan mwaht de mwetin kreip kan, oh se sohte pahn nim pihl sang nan pwarer kan. Se pahn karis nan Ahl en Nanmwarki oh sohte wetla ni palimaun de palimeing lao se kotehla sapwomwen.’”+
18 Ahpw, nanmwarkien Edom ndaiong ih: “Ke sohte pahn kotehla sapwatet. Ma ke pahn, I pahn kohieido tuhkihong uhk kedlahs.” 19 Mehn Israel ko eri ndaiong ih: “Se pahn keidweite ni ahlo, oh ma kiht oh nait pelinmen kan nim amwail pihl kan, se pahn pwain.+ Ihte se men alu kotehwei sahpwen.”+ 20 Ahpw nanmwarkien Edom nda: “Ke sohte pahn kotehla.”+ Nanmwarkien Edom eri kohieido pwehn tuhwong ih iangahki aramas tohto oh karis en sounpei* kehlail ehu. 21 Eri, Edom kahng mweidohng Israel en kotehla sapweo; kahrehda, Israel sohpeisang ih.+
22 Aramas en Israel ko, mwomwohdiso pwon, ahpw mweselsang Kades oh kohdo ni Nahna Or.+ 23 Siohwa eri ketin mahsanihong Moses oh Aaron ni Nahna Or limwahn irepen sapwen Edom: 24 “Aaron pahn mehla oh seridi duwehte seme mehn mahs ako.+ E sohte pahn pedolong nan sahpw me I pahn kihong mehn Israel ko, pwehki kumwa koaros uhwongada ei kehkehlik me pid pihl en Meripa.+ 25 Ale Aaron oh nah pwutak Eliesar oh wairahla ni Nahna Or. 26 Kihsang en Aaron likowo+ oh kalikawihkihda nah pwutak Eliesar,+ oh Aaron pahn mehla wasao.”
27 Moses eri kapwaiada duwehte me Siohwa ketin kehkehlingkier, oh irail kohdahla Nahna Or mwohn mesen mwomwohdiso pwon. 28 Moses eri kihsang en Aaron likou ko oh kalikawihkihda nah pwutak Eliesar. Mwurin mwo Aaron mehla wasao pohn kadoken nahnao.+ Moses oh Eliesar eri kohdihdo sang pohn nahnao. 29 Ni mwomwohdiso pwon ar kilang me Aaron melahr, mehn Israel kan pwon ahpw sengisengki Aaron erein rahn 30.+
21 Ni nanmwarkien Arad,+ mehn Kenan men, me kin kousoan nan Nekep, eh rongada me Israel kohdo ni ahl en Adarim, e mahweniong Israel oh wahsang ekei irail nin duwen me selidi kei. 2 Eri Israel kahukihong Siohwa inou wet: “Ma komw ketikihong aramas pwukat nan pehiet, I uhdahn pahn kamwomwala arail kahnimw kan.” 3 Siohwa eri ketin karonge ngilen Israel oh ketikihong irail mehn Kenan kan, oh Israel kamwomwirailla oh arail kahnimw kan. Ihme kahrehda, irail kahdanekihla wasao Orma.*+
4 Ni ar usehlahte ar seiloako sang Nahna Or+ ni ahl en Sehd Weitahtao pwe ren pidakih sapwen Edom,+ aramas ako ahpw pwangada nan seiloako. 5 Oh aramas ako ahpw kin usehlahte lipahnede Koht oh Moses,+ nda: “Dahme kumwa waikinkitodohsang Isip pwe sen mehla nan sapwtehnet? Sohte mwenge oh sohte pihl,+ oh se kailongkilahr pilawa kasaut wet.”+ 6 Siohwa eri ketin kadarala serpent pwoisin* kei nanpwungen aramas ako, oh re kin ngalis aramas ako, kahrehda mehn Israel tohto mehla.+
7 Aramas ako eri kohdo rehn Moses oh nda: “Se dipadahr ni at lipahnede Siohwa oh komwi.+ Komw kapakapkin kiht rehn Siohwa pwe en ketikihsang serpent kat reht.” Moses eri kapakapki aramas ako.+ 8 Siohwa eri ketin mahsanihong Moses: “Wiahda sansal en sineik pwoisin* men oh kidahng pohn tuhke pwoat. Eri ni emen eh pahn ngelingeldi, e pahn anahne kilang sansalo pwe en momourte.” 9 Moses eri mwadangete wiahda serpent prons men+ oh kidahng pohn tuhkeo,+ oh ahnsou me serpent men ngalispene aramas emen oh e kilenglahng serpent pronso, e kin mourla.+
10 Mwurin mwo mehn Israel ko mweselda oh kauwada imwarail impwal kan nan Opod.+ 11 Mwuri irail mweselsang Opod oh kauwada imwarail impwal kan nan Aie-aparim,+ nan sapwtehn me sallahng Mohap, ni palimese. 12 Irail mweselsang wasao oh kauwada imwarail impwal kan limwahn Wahun Sihred.+ 13 Irail mweselsang wasao oh kauwada imwarail impwal kan nan sapwen Arnon,+ me mi nan sapwtehn me kohsang irepen mehn Amor kan, pwe Arnon iei irepen Mohap, nanpwungen Mohap oh mehn Amor kan. 14 Ihme kahrehda pwuhken Mahwen kan en Siohwa koasoia “Pahep en Supa oh wahu kan en Arnon, 15 oh ukedien* wahu kan, me kohla lel wasa me Ar kin mi ie oh mi limwahn irepen Mohap.”
16 Mwuri irail ahpw kohkohla Peer. Ih pwarer wet me Siohwa ketin mahsanihong Moses: “Kapokonepene aramas akan, oh I pahn kihong irail pihl.”
17 Ni ahnsowo, Israel koulki koul pwoatet:
“Pwarer, kusda!—Kouliong met!
18 Pwarer me kaun akan weirada, lapalap en aramas akan weirada,
Sang ni sokon en kaun emen oh arail sokon kan.”
Irail eri kohsang ni sapwtehno kohla Madana, 19 sang Madana re kohla Nahaliel, oh sang Nahaliel re kohla Pamod.+ 20 Re kohsang Pamod kohla ni wahu me mi nan sapwen* Mohap,+ pohn kadoken Piska,+ me sallahng Sesaimon.*+
21 Israel eri kadarala meninkeder kei rehn Sihon, nanmwarkien mehn Amor kan, oh nda:+ 22 “Mweidohng kiht sen kotehla sapwomwen. Se sohte pahn wetla nan mwaht ehu de mwetin kreip ehu. Se sohte pahn nim pihl sang nan pwarer kan. Se pahn karis kohwei nan Ahl en Nanmwarki lao se kotehla sapwomwen.”+ 23 Ahpw Sihon sohte mweidohng Israel en kotehla sapweo. Sihon eri kapokonepene nah aramas ako koaros oh kohieila mahweniong Israel nan sapwtehno oh kohdo Sahas oh tepida peiong Israel.+ 24 Ahpw Israel kalowehkihdi ih kedlahs+ oh sapwenikihla sapweo+ sang Arnon+ lel Sappok,+ limwahn mehn Ammon kan, pwehki Saser+ iei irepen sapwen mehn Ammon kan.+
25 Israel eri ale kahnimw pwukat koaros, oh re tepida kousoanla nan kahnimw en mehn Amor kan koaros,+ nan Espon oh kisin kahnimw kan koaros me kapilpene. 26 Pwe Espon iei kahnimw en Sihon, nanmwarkien mehn Amor kan, me peiong nanmwarkien Mohap oh kihsang ih sapwe ko koaros lellahng Arnon. 27 Ihme kahrehda irail nda lokaiahn kepit pwukat:
“Kohdo Espon.
Kahnimw en Sihon en kokouda oh tengedi.
28 Pwe kisiniei ehu kohieisang Espon, mpwul ehu sang nan kisin kahnimw en Sihon.
E kamwasikahla Ar en Mohap, kaun akan en wasa ile kan en Arnon.
29 Meid suwediong uhk, Mohap! Ke pahn mwomwla, aramas en Kemos kan!+
E kahrehiong nah pwutak kan ren tangasang sahpwo oh nah serepein kan ren wia me selidi kei en Sihon, nanmwarkien mehn Amor kan.
30 Kitail kasikih irail;
Espon pahn mwomwla lella Dipon;+
Kitail kauwehla met lella Nohpa;
Kisiniei pahn kohpeseng lella Medepa.”+
31 Israel eri tepida kousoan nan sapwen mehn Amor kan. 32 Moses eri kadarala ohl ekei pwe ren lipoahroke Saser.+ Irail kalowehdi kisin kahnimw kan me kapilpene Saser oh kasarehsang mehn Amor kan me kin mi wasao. 33 Mwurin mwo irail sohpeila oh kohdahla ni Ahl en Pasan. Oh Ok+ nanmwarkien Pasan ahpw kohieido iangahki nah aramas ako koaros pwe ren mahweniong irail nan Edrei.+ 34 Siohwa eri ketin mahsanihong Moses: “Ke dehr masak ih,+ pwe I pahn kihong ih oh nah aramas akan koaros oh sapwe nan pehmwen,+ oh ke pahn wiahiong ih duwehte me ke wiahiong Sihon nanmwarkien mehn Amor kan, me kin kousoan nan Espon.”+ 35 Irail eri kemehla ih, iangahki nah pwutak kan oh nah aramas akan koaros, lao sohte emen nah aramas me luhwehdi,+ oh irail sapwenikihla sapweo.+
22 Mehn Israel kan eri mweselda oh kauwada imwarail impwal kan nan sapwtehn en Mohap paliet Sordan, sallahng Seriko.+ 2 Eri Palak+ nein Sippor esehda soahng koaros me Israel wiahiongehr mehn Amor kan, 3 oh Mohap uhdahn masakada aramas ako, pwehki ar nohn tohto; ni mehlel, Mohap uhdahn masakada oh kailongkihla mehn Israel ko.+ 4 Mohap eri ndaiong ohl mah kan en Midian:+ “Mwomwohdiso wet pahn kadallehla wasa kan koaros me kapilkitailpene, duwehte kouwol men eh kin kadallehla dihpw kan nan mohs.”
Palak nein Sippor me wia nanmwarkien Mohap ni ahnsowo. 5 E kadarala meninkeder kei rehn Palaam nein Peor nan Pedor,+ me mi limwahn Pillapo* nan uhdakeo. Palak eri ekerodo Palaam, nda: “Kilang! Pwihnen aramas ehu kohdo sang Isip. Kilang! Irail kipehdier sampah*+ ni uwen me emen kak kilang,* oh re koukousoan mwohi. 6 Eri, menlau, kohdo oh keriahla aramas pwukat ong ie,+ pwe irail kehlailsang ie. Mweinele I kak kaloweiraildi oh kasareirailla sang sahpwo, pwe I uhdahn ese me emen me komw kin kapaia kin paiamwahula oh me komw kin keriahla kin riahla.”
7 Eri ohl mah kan en Mohap oh ohl mah kan en Midian ahpw seiloakla rehn Palaam+ wa pweinen kosetipwo oh ndaiong ih dahme Palak ndao. 8 Palaam eri ndaiong irail: “Kumwail pweidi wasaht pwohnget, oh I ahpw pahn padahkihong kumwail soahng koaros me Siohwa ketin mahsanihong ie.” Lapalap en Mohap ko eri mihmi rehn Palaam.
9 Koht eri ketido rehn Palaam oh mahsanih:+ “Ihs ohl pwukat me mihmi rehmw?” 10 Palaam eri patohwanohng Koht mehlelo: “Palak nein Sippor, nanmwarkien Mohap, kadarodohng ie rohng ehu, nda, 11 ‘Kilang! Aramas ako me kohkohsang Isip kipehdi sampah* ni uwen me emen kak kilang.* Eri kohdo oh kihdiong keria ehu pohrail ong ie.+ Mweinele I pahn kak peiong irail oh kasareirailla.’” 12 Ahpw Koht ketin mahsanihong Palaam: “Ke sohte pahn iang irail kohla. Ke sohte pahn keriahla aramas ako, pwe I kapaiairaildahr.”+
13 Palaam eri pirida nimensengo oh ndaiong nein Palak lapalap ako: “Kumwail pwurala sapwamwailo, pwe Siohwa sohte ketin mweidohng ie I en iang kumwail kohla.” 14 Eri lapalap en Mohap ko ahpw mweselda oh pwurala rehn Palak oh nda: “Palaam kahng iang kiht kohdo.”
15 Ahpw, Palak pwurehng kadarala lapalap kei, me tohtohsang oh lapalapasang pwihnen nin tapio. 16 Irail eri kohla rehn Palaam oh ndaiong ih: “Iet me Palak nein Sippor ndahn, ‘Menlau dehr mweidohng mehkot en irehdihsang uhk en kohdo rehi, 17 pwe I uhdahn pahn kawauwihiukala oh I pahn wia mehkoaros me ke pahn padahkihong ie I en wia. Eri menlau kohdo, oh keriahla aramas pwukat ong ie.’” 18 Ahpw Palaam sapengki nein Palak ladu ko: “Mehnda ma Palak pahn kihong ie imweo me diren silper oh kohl, I sohte pahn kak wia mehkot likin ruwes en Siohwa ei Koht, mehnda ma tikitik de laud.+ 19 Ahpw, menlau kumwail pil pweidi wasaht pwohnget, pwe I en kak esehda dahme Siohwa pahn pil ketin mahsanihong ie.”+
20 Koht eri ketido rehn Palaam nipwongo oh mahsanihong ih: “Ma ohl pwukat kodohn eker uhk, eri iangirailda. Ahpw ke pahn koasoiahte mahsen kan me I pahn ndaiong uhk.”+ 21 Palaam eri pirida nimensengo oh kaunopada were dongkio* oh iangada lapalap en Mohap ko.+
22 Koht eri ketin engiengda pwehki eh kohkohla, oh sapwellimen Siohwa tohnleng men ahpw uh nanialo pwehn pelian ih. Palaam eri dakedake nah dongkio, oh nah sounpapah riemen me iang ih. 23 Oh ni dongkio eh kilangada sapwellimen Siohwa tohnlengo eh kesikesihnen nanialo kolokol kedlahs pwoat, e song en wetsang nanialo kohla nan mohso. Ahpw Palaam tepida wokih dongkio pwe en kapwurelahng nanialo. 24 Sapwellimen Siohwa tohnlengo eri uhda nan ahl wetikitik ehu nanpwungen mwetin kreip riau ko, me dihd takai mi pali koaros. 25 Ni dongkio eh kilangada sapwellimen Siohwa tohnlengo, e ahpw tepida idangehng ih ni dihdo oh idangehng nehn Palaamo ni dihdo, oh Palaam ahpw pwurehng tepida wokih dongkio.
26 Sapwellimen Siohwa tohnlengo eri pwurehng kohla mwowe oh uh nan wasa wetikitik ehu, wasa me sohte kak wetla palimaun de palimeing. 27 Ni dongkio eh kilangada sapwellimen Siohwa tohnlengo, e wendi pahn Palaam, Palaam eri lingeringerda oh wokiwokihki dongkio eh sokono. 28 Siohwa eri ketin kahrehiong dongkio en lokaia,*+ oh e ndaiong Palaam: “Dahme I wiahiong uhk me ke wokihkin ie pak siluh pwukat?”+ 29 Palaam eri sapengki dongkio: “Pwehki ke kahrehiong ie ei mwomwen pweipwei. Ma miehte kedlahs nan pehiet, I pahn kemeiukala!” 30 Dongkio eri ndaiong Palaam: “Kaidehn ngehi noumw dongki me ke kin dakedake erein omw mour pwon leledo rahnwet? Mie pak I wiahiong uhk soahng wet?” Palaam eri sapengki: “Soh!” 31 Siohwa eri ketin kapehdpeseng mesen Palaam ko,+ oh e kilangada sapwellimen Siohwa tohnlengo kesikesihnen nanialo kolokol kedlahs pwoat. Ni ahnsowohte e ahpw dairukedi oh lukupoardiong nanpwelo.
32 Sapwellimen Siohwa tohnlengo eri ndaiong ih: “Dahme ke wokihki noumw dongkien pak siluh pwukat? Kilang! I kodohn pelian uhk, pwehki dahme ke wiewiahn uhwong kupwurei.+ 33 Dongkio kilangiehda oh song en sohpeisang ie pak siluh pwukat.+ Medewehla dahme pahn wiawi ma e sohte sohpeisang ie! I kemeiukalahr oh mweidohng dongkien en momour.” 34 Palaam eri ndaiong sapwellimen Siohwa tohnlengo: “I dipadahr, pwehki I sehse me komwi me ketiket nanialo pwehn tuhwong ie. Eri ma met suwed mwohn silangomwi, eri I pahn pwurala.” 35 Ahpw sapwellimen Siohwa tohnlengo ndaiong Palaam: “Iangada ohl ako kohla, ahpw ke pahn koasoiahte dahme I pahn ndaiong uhk.” Palaam eri doulahte ieiang nein Palak lapalap ako.
36 Ni Palak eh rongada me Palaam samwadohr, e mwadangete kohieila pwehn tuhwong ih nan kahnimw en Mohap, me mi ni keilen Arnon ni irepen sahpwo. 37 Palak ndaiong Palaam: “I sou ileklahng uhk? Dahme ke sohte kohkihdo rehi? Ke lemeleme me I sohte kak uhdahn kawauwihiukala?”+ 38 Palaam eri sapengki Palak: “Eri, I kohdo rehmw met. Ahpw ia duwe, e pahn mweimwei I en koasoia mehkot? I kak koasoiahte mahsen kan me Koht ketikihong nan eweiet.”+
39 Palaam eri iang Palak kohla, oh ira kohla Kiriad-usod. 40 Palak eri meirongkihla kou oh sihpw kan oh e kadaralahng Palaam oh lapalap akan me mi reh uduk kei. 41 Nimenseng Palak eri ale Palaam oh kahredalahng ih Pamod-paal; sang wasao e kak kilang aramas akan koaros.+
23 Palaam eri ndaiong Palak: “Kauwada wasaht pei sarawi isuh,+ oh kaunopadahng ie kouwol isimen oh sihpw wol isimen.” 2 Palak eri mwadangete kapwaiada duwehte me Palaam ndao. Palak oh Palaam eri meirongkihla kouwol men oh sihpw wol men pohn ehuehu pei sarawi ko.+ 3 Palaam eri ndaiong Palak: “Mihmihte wasaht limwahn omw meirong isihsen, oh I pahn kohla. Mweinele Siohwa pahn ketido tuhwong ie. Mehkoaros me e ketin kasalehiong ie, I pahn padahkihong komwi.” Ih eri kohla pohn kadoken dohl ehu.
4 Koht eri ketido tuhwong Palaam,+ me patohwanohng Ih: “I kauwada pei sarawi isuh oh meirongkihla kouwol men oh sihpw wol men pohn ehuehu pei sarawi ko.” 5 Siohwa ketikihong mahsen wet nan ewen Palaamo:+ “Pwurala rehn Palak, oh iet me ke pahn ndahn.” 6 Ih eri pwurala oh kilangada me Palak oh lapalap en Mohap ko koaros wie kesikesihnen limwahn eh meirong isihso. 7 Ih eri koasoia mahsen en melkahka wet:+
“Palak nanmwarkien Mohap waiehdo sang Aram,+
Sang nahna kan en palimese:
‘Kohdo keriahla Seikop ong ie.
Ei, kohdo kedipa Israel.’+
8 Ia duwen ei pahn kak kihdiong keria ehu pohn irail kan me Koht sohte ketin keriahla?
Oh ia duwen ei pahn kak kedipa irail kan me Siohwa sohte ketin kedipa?+
9 Sang pohn kadoken paip kan I kilang irail,
Oh sang pohn dohl kan I kilang irail.
Nin duwen pwihnen aramas ehu irail kin kousoan kelehpw wasao;+
Irail kin wiahki pein irail weksang wehi teikan.+
10 Ihs me kak wadekedi pwelpar en Seikop+
De pil wadek pahkis ehun Israel?
I en mehla duwehte mehlahn me pwung men,
Oh imwin ei mour en duwehte arail.”
11 Palak eri ndaiong Palaam: “Dahme ke wiahiong ie? I waiukodo pwe ken kihdiong keria pohn ei imwintihti kan, ahpw ke kapaiairailda.”+ 12 E sapengki: “I sou pahn koasoia dahme Siohwa ketikihong nan eweiet?”+
13 Palak eri ndaiong ih: “Menlau iang ie kohla ehu wasa tohrohr me ke kak kilang irail. Ke pahn kilangete ekei irail; ke sohte pahn kilangedi irail koaros. Kihdiong keria pohrail ong ie sang wasao.”+ 14 Ih eri kahrehla Palaam ni mohsen Sopim, ni kadoken Piska,+ oh kauwada pei sarawi isuh oh meirongkihla kouwol men oh sihpw wol men pohn ehuehu pei sarawi ko.+ 15 Palaam eri ndaiong Palak: “Mihmihte wasaht limwahn omw meirong isihsen erein ei pahn patohong Ih wasao.” 16 Siohwa eri ketido tuhwong Palaam oh ketikidiong mahsen wet nan ewe:+ “Pwurala rehn Palak, oh iet me ke pahn ndahn.” 17 Palaam eri pwurodo rehn Palak oh kilangada me e awiawih limwahn eh meirong isihso, oh lapalap en Mohap ko mihmi reh. Palak eri idek reh: “Dahme Siohwa ketin mahsanih?” 18 Palaam eri koasoia mahsen en melkahka wet:+
“Palak, uhda oh rong.
Rong ie, nein Sippor.
19 Koht kaidehn aramas emen me kin lokaia likamw,+
Ni eh kin ketin mahsanih mehkot, e sou pahn ketin wia?
Ni eh kin ketin mahsen, e sou pahn ketin kapwaiada?+
21 E sohte ketin mweidohng wiewiahn akmanaman ehu en uhwong Seikop,
Oh e sohte ketin mweidohng kahpwal en lelohng Israel.
Siohwa arail Koht ketin ieiang irail,+
Oh irail kin kapinga ih ni ngihl laud nin duwen nanmwarki.
22 Koht ketin wairaildo sang nan Isip.+
E rasehng koden kouwol lawalo men ong irail.+
Ni ahnsou wet aramas pahn kak ndahki duwen Seikop oh Israel:
‘Kilang dahme Koht ketin wiadahr!’
24 Iet pwihnen aramas ehu me pahn uhda rasehng laion men,
Oh rasehng laiono, e pahn pein uhda.+
E sohte pahn wendi lao e kangala seike
Oh nimala ntahn mahn kan me e kemehla.”
25 Palak eri ndaiong Palaam: “Ma ke sohte kak kerieirailla, eri ke sohte pil pahn kapaiairailda.” 26 Palaam eri sapengki Palak: “I sou ndaiong komwi, ‘I pahn wia mehkoaros me Siohwa ketin mahsanih’?”+
27 Palak eri ndaiong Palaam: “Menlau kohdo oh I pahn kareiukalahng ehu wasa tohrohr. Mweinele e pahn pwung mwohn silangin Koht mehlelo ken keriahla aramas ako ong ie sang wasao.”+ 28 Palak eri kahrehla Palaam pohn kadoken Pihor, me sallahng Sesaimon.*+ 29 Palaam eri ndaiong Palak: “Kauwada pei sarawi isuh wasaht, oh kaunopadahng ie kouwol isimen oh sihpw wol isimen.”+ 30 Palak eri kapwaiada duwehte me Palaam ndao, oh e meirongkihla kouwol men oh sihpw wol men pohn ehuehu pei sarawi ko.
24 Ni Palaam eh tehkada me en kapaia Israel kin kaperenda* Siohwa, e sohte pwurehng kohla rapahki kokohp suwed,+ ahpw e sohpeilahng ni sapwtehno. 2 Ni Palaam eh kilengla oh kilangada Israel eh kauwada imwe impwal kan nin duwen eh keinek kan,+ sapwellimen Koht ngehn sarawi* ahpw tiada powe.+ 3 Ih eri koasoia mahsen en melkahka wet:+
“Lepin kahs en Palaam nein Peor,
Oh lepin kahs en aramas emen me mese kan pehdpeseng,
4 Lepin kahs en emen me rongorong mahsen en Koht,
Me kilang kaudiahl ehu sang rehn me Keieu Manaman,
Me poaridi ni mese kan ar pehdpeseng:+
5 Ia uwen kaselel en omw impwal kan, Seikop,
Omw impwal sarawi kan, Israel!+
6 Rasehng wahu kan re irihrek kohwei,+
Rasehng mwetuwel kan limwahn pillap,
Rasehng aloi* kan me Siohwa ketin padokedi,
Rasehng sidar kan limwahn pihl kan.
7 Pihl kin wie dingiding sang nan eh pekid riau ko,
8 Koht ketin wairailsang nan Isip;
E rasehng koden kouwol lawalo men ong irail.
E pahn kangala uduken wehi kan, eh sounkalokolok kan,+
Oh e pahn ngalispene arail tih kan, oh e pahn kauwehkinirailla nah arep kan.
9 E karahkidi, e wendi rasehng laion,
Oh rasehng laion men, ihs me kak kedirapwa?
Irail me kin kapaiaiukada kin paiamwahula,
Oh irail me kin keriaiukala kin riahla.”+
10 Palak eri lingeringerda pahn Palaam. Palak eri lopw ni lingeringer oh ndaiong Palaam: “I ekeruhkodo pwe ken kihdiong keria pohn ei imwintihti kan,+ ahpw ke kapaiairailda pak siluh pwukat. 11 Eri mwadang kohkohla ni imwomwo. I uhdahn pahn kawauwihiukala,+ ahpw kilang! Siohwa ketikihsangehr wahu wet rehmw.”
12 Palaam eri sapeng Palak: “I sou ndaiong meninkeder ko me komw kadarodo, 13 ‘Mehnda ma Palak pahn kihong ie imweo me diren silper oh kohl, I sohte kak wia mehkot sang ni nsenei* likin ruwes en Siohwa, mehnda ma mwahu de suwed. I pahn koasoiahte dahme Siohwa pahn ketin mahsanihong ie’?+ 14 Oh met I pahn kohkohla rehn nei aramas ako. Kohdo oh I pahn padahkihong komwi dahme aramas pwukat pahn wiahiong noumw aramas akan ni ahnsou kohkohdo.”* 15 Ih eri koasoia mahsen en melkahka wet:+
“Lepin kahs en Palaam nein Peor,
Oh lepin kahs en aramas emen me mese kan pehdpeseng,+
16 Lepin kahs en emen me rongorong mahsen en Koht,
Oh emen me ahneki loalokong me Wasa Lapalahpie sapwellimanki,
E kilang kaudiahl ehu sang rehn me Keieu Manaman,
Nindoken eh poaridi ni mese kan ar pehdpeseng:
17 I pahn kilang ih, ahpw kaidehn met;
I pahn kilikilang ih, ahpw e saik kerendo.
Oh e uhdahn pahn pwalangpeseng temwen Mohap+
Oh tihn moangen sounpei lemei kan koaros.
18 Oh e pahn ale Edom pwehn sapwenikihla,+
Ei, imwintihti+ en Seir+ pahn ale ih pwehn sapwenikihla,
Nindoken Israel eh kaskasale eh eimah.
19 Oh emen sang Seikop pahn kalowehdi,+
Oh e pahn kamwomwala koaros me pitsang kahnimwo.”
20 Ni eh kilangada Amalek, e usehlahte eh mahsen en melkahkao:
21 Ni eh kilangada mehn Ken kan,+ e usehlahte eh mahsen en melkahkao:
“Omw wasahn kousoan teng, rasehng pesen menpihr men pohn paipalap.
22 Ahpw emen pahn isikala Keien.
Ia uwen werei mwohn Asiria eh pahn waiukasang nin duwen me selidi men?”
23 Oh e usehlahte eh mahsen en melkahkao:
“Meid suwed! Ihs me pahn pitila ni ahnsou me Koht pahn ketin wia met?
24 Sohp kan pahn kohsang oaroahr en Kittim,+
Oh re pahn kahpwalihala Asiria,+
Oh re pahn kahpwalihala Eper.
Ahpw e pil pahn sohrala douluhl.”
25 Palaam eri+ uhda oh pwurala eh wasao. Palak pil kohkohla.
25 Ni ahnsou me Israel koukousoan nan Sidem,+ aramas ako ahpw tepida wia tiahk samin me pid wia nsenen pwopwoud rehn lihen Mohap kan.+ 2 Lih ako luke aramas ako ong meirong kan ong arail koht kan,+ oh aramas ako tepida iang tungoal oh poaridiong arail koht kan.+ 3 Israel eri iang kaudokiong* Paal en Pihor,+ oh Siohwa eri ketin engiengda pahn Israel. 4 Siohwa eri ketin mahsanihong Moses: “Ale kaunen* aramas pwukat koaros oh langahda irail mwohn Siohwa ni rahn,* pwe sapwellimen Siohwa engieng kowahlap en kohsang Israel.” 5 Moses eri ndaiong sounkopwung en Israel kan:+ “Emenemen kumwail pahn kemehla nah ohl akan me iang kaudokiong* Paal en Pihor.”+
6 Ahpw ni ahnsowohte, emen mehn Israel ko ahpw kahrehdo lihen Midian men limwahn rie ko+ mwohn mesen Moses oh mwohn mwomwohdisohn mehn Israel ko pwon, erein ar wie sengiseng ni wasahn pedolong en impwal en mihtingo. 7 Ni Pineas+ nein Eliesar nein samworo Aaron eh kilangada met, e ahpw mwadangete uhda sang nanpwungen mwomwohdiso oh ale ketieu pwoat. 8 Ih eri kohla mwurin ohlen Israelo nan impwalo oh doakoahte pwar ira koaros, ohl en Israelo oh kapehden* liho. Ni ahnsowo kalokolok ong mehn Israel kan ahpw tokedi.+ 9 Irail me mehkihla kalokoloko patpene meh 24,000.+
10 Siohwa eri ketin mahsanihong Moses: 11 “Pineas+ nein Eliesar nein samworo Aaron kihsang ei engieng pahn aramas en Israel kan pwehki e sohte mweidohng salelepek ong ie en wiawi nanpwungarail.+ Kahrehda I sohte kasohrehla mehn Israel kan, mendahki ei kupwurki irail en poadidiong ie kelehpw.+ 12 Kahrehda, ndaiong, ‘I pahn kihong ih ei inou lap en popohl. 13 Oh met pahn wia inou lap en pwukoahn samworo poatopoat ehu ong ih oh kadaudoke kan,+ pwehki e sohte mweidada salelepek ong eh Koht+ oh e wiahda tomw ong aramas en Israel kan.’”
14 Eden ohlen Israel me kamakamala iangahki lihen Midiano iei Simri nein Salu, kaunen peneinei en mehn Simion kan. 15 Eden lihen Midian me kamakamalao iei Kospi nein Ser;+ Ser me kaunen peneinei en keinek en Midian.+
16 Mwuhr Siohwa ketin mahsanihong Moses: 17 “Kaloke mehn Midian kan oh kemeirailla,+ 18 pwehki re kin kalokei kumwail sang ni ar kin widinge kumwail me pid Pihor+ oh pil Kospi nein kaunen Midian me kamakamala+ ni rahn me kalokolok wiawi pwehki Pihor.”+
26 Mwurin kalokoloko,+ Siohwa ahpw ketin mahsanihong Moses oh Eliesar nein samworo Aaron: 2 “Wia wadawad en mwomwohdisohn mehn Israel kan pwon sang sounpar 20 kohda, nin duwen samarail mehn mahs ako, wadekedi irail koaros me kak iang karis en sounpei nan Israel.”+ 3 Moses oh samworo Eliesar+ eri koasoiong irail nan sapwtehn en Mohap+ limwahn Sordan sallahng Seriko,+ nda: 4 “Wia wadawad en irail me mahki sounpar 20 kohda, duwehte me Siohwa ketin kehkehlingkihong Moses.”+
Iet kadaudok en Israel kan me kohsang sapwen Isip: 5 Keinek en Reupen,+ nein Israel mesenih; kadaudok en Reupen kan+ iei: sang Anok, peneinei en mehn Anok kan; sang Pallu, peneinei en mehn Pallu kan; 6 sang Esron, peneinei en mehn Esron kan; sang Karmi, peneinei en mehn Karmi kan. 7 Ih peneinei en mehn Reupen kan met, oh irail kan me kileldi patpene meh 43,730.+
8 Nein Pallu pwutak iei Eliap. 9 Oh nein Eliap pwutak kan iei Nemuel, Dadan, oh Apiram. Ih Dadan oh Apiram met me pilipilda sang mwomwohdiso, me iangala en Kora pwihno+ uhwongada Moses+ oh Aaron ni ahnsou me re uhwongada Siohwa.+
10 Sampah eri kohpeseng* oh kadalleirailla. A me pid duwen Kora, e mehla iangahki irail ako me kin utung ih ni ahnsou me kisinieio isikala ohl 250 ko.+ Oh irail wiahla mehn kataman ehu ong meteikan.+ 11 Ahpw, nein Kora pwutak kan sohte mehla.+
12 Kadaudok en Simion kan+ nin duwen arail peneinei kan iei: sang Nemuel, peneinei en mehn Nemuel kan; sang Seimin, peneinei en mehn Seimin kan; sang Sakin, peneinei en mehn Sakin kan; 13 sang Sera, peneinei en mehn Sera kan; sang Saul peneinei en mehn Saul kan. 14 Ih peneinei en mehn Simion kan met: 22,200.+
15 Kadaudok en Kad kan+ nin duwen arail peneinei kan iei: sang Sepon, peneinei en mehn Sepon kan; sang Aki, peneinei en mehn Aki kan; sang Suni, peneinei en mehn Suni kan; 16 sang Osni, peneinei en mehn Osni kan; sang Eri, peneinei en mehn Eri kan; 17 sang Arod, peneinei en mehn Arod kan; sang Areli, peneinei en mehn Areli kan. 18 Ih peneinei en kadaudok en Kad kan met, oh irail kan me kileldi iei meh 40,500.+
19 Nein Suda pwutak kan+ iei Er oh Onan.+ Ahpw, Er oh Onan mehla nan sapwen Kenan.+ 20 Oh kadaudok en Suda kan nin duwen arail peneinei kan iei: sang Sela,+ peneinei en mehn Sela kan; sang Peres,+ peneinei en mehn Peres kan; sang Sera,+ peneinei en mehn Sera kan. 21 Oh kadaudok en Peres kan iei: sang Esron,+ peneinei en mehn Esron kan; sang Amul,+ peneinei en mehn Amul kan. 22 Ih peneinei en Suda kan met, oh irail kan me kileldi iei meh 76,500.+
23 Kadaudok en Isakar kan+ nin duwen arail peneinei kan iei: sang Tola,+ peneinei en mehn Tola kan; sang Pupa, peneinei en mehn Pupa kan; 24 sang Sasup, peneinei en mehn Sasup kan; sang Simron, peneinei en mehn Simron kan. 25 Ih peneinei en Isakar kan met, oh irail kan me kileldi iei meh 64,300.+
26 Kadaudok en Sepulon kan+ nin duwen arail peneinei kan iei: sang Sered, peneinei en mehn Sered kan; sang Elon, peneinei en mehn Elon kan; sang Saleel, peneinei en mehn Saleel kan. 27 Ih peneinei en mehn Sepulon kan met, oh irail kan me kileldi iei meh 60,500.+
28 Kadaudok en Sosep kan+ nin duwen arail peneinei kan iei: keinek en Manase oh Epraim.+ 29 Kadaudok en Manase kan+ iei: sang Makir,+ peneinei en mehn Makir kan; oh Makir iei semen Kilead;+ sang Kilead, peneinei en mehn Kilead kan. 30 Iet kadaudok en Kilead kan: sang Ieser, peneinei en mehn Ieser kan; sang Elek, peneinei en mehn Elek kan; 31 sang Asriel, peneinei en mehn Asriel kan; sang Sekem, peneinei en mehn Sekem kan; 32 sang Semida, peneinei en mehn Semida kan; sang Ehper, peneinei en mehn Ehper kan. 33 Eri Selopehad nein Ehper sohte nah pwutak, ihte serepein kan,+ oh eden nein Selopehad serepein kan+ iei Mala, Noha, Okla, Milka oh Tirsa. 34 Ih peneinei en Manase kan met, oh irail kan me kileldi iei meh 52,700.+
35 Iet kadaudok en Epraim kan+ nin duwen arail peneinei kan: sang Sudela,+ peneinei en mehn Sudela kan; sang Pihker, peneinei en mehn Pihker kan; sang Tahan, peneinei en mehn Tahan kan. 36 Oh iet kadaudok en Sudela kan: sang Eran, peneinei en mehn Eran kan. 37 Ih peneinei en kadaudok en Epraim kan met, oh irail kan me kileldi iei meh 32,500.+ Ih kadaudok en Sosep kan met nin duwen arail peneinei kan.
38 Kadaudok en Pensamin kan+ nin duwen arail peneinei kan iei: sang Pela,+ peneinei en mehn Pela kan; sang Aspel, peneinei en mehn Aspel kan; sang Aihram, peneinei en mehn Aihram kan; 39 sang Sepupam, peneinei en mehn Suppim kan; sang Upam, peneinei en mehn Upam kan. 40 Nein Pela pwutak kan iei Ard oh Nahman:+ sang Ard, peneinei en mehn Ard kan; sang Nahman, peneinei en mehn Nahman kan. 41 Ih kadaudok en Pensamin kan met nin duwen arail peneinei kan, oh irail kan me kileldi iei meh 45,600.+
42 Iet kadaudok en Dan kan+ nin duwen arail peneinei kan: sang Suham, peneinei en mehn Suham kan. Ih peneinei en Dan kan met nin duwen arail peneinei kan. 43 Irail kan me kileldi sang peneinei koaros en mehn Suham kan iei meh 64,400.+
44 Kadaudok en Aser kan+ nin duwen arail peneinei kan iei: sang Imnah, peneinei en mehn Imnah kan; sang Ispi, peneinei en mehn Ispi kan; sang Peraia, peneinei en mehn Peraia kan; 45 sang nein Peraia pwutak kan: sang Iper, peneinei en mehn Iper kan; sang Malkiel, peneinei en mehn Malkiel kan. 46 Eden nein Aser serepeino iei Sihra. 47 Ih peneinei en kadaudok en Aser kan met, oh irail kan me kileldi iei meh 53,400.+
48 Kadaudok en Napdali kan+ nin duwen arail peneinei kan iei: sang Sasehl, peneinei en mehn Sasehl kan; sang Kuni, peneinei en mehn Kuni kan; 49 sang Seser, peneinei en mehn Seser kan; sang Sillem, peneinei en mehn Sillem kan. 50 Ih peneinei en Napdali kan met nin duwen arail peneinei kan, oh irail kan me kileldi iei meh 45,400.+
51 Iet uwen tohtohn mehn Israel kan me kileldi: 601,730.+
52 Mwurin mwo Siohwa ketin mahsanihong Moses: 53 “Sahpwo pahn nehnepeseng nanpwungarail nin duwen sohso ehu ni uwen tohtohn adarail kan me kileldi.*+ 54 Ong pwihn laud kan, ke pahn kalaudehla sohso, oh ong pwihn tikitik kan, ke pahn katikala sohso.+ Ehuehu pwihn kan pahn alehdi sohso me pahrekiong uwen tohtohn irail me kileldi. 55 Ahpw, sahpwo pahn nehnepeseng ni usuhs.+ Irail pahn alehdi arail sohso nin duwen eden keinek en samarail ko. 56 Ehuehu sohso pahn wiawi ni usuhs oh nehnepeseng nanpwungen pwihn laud oh tikitik kan.”
57 Eri iet mehn Lipai kan me kileldi+ nin duwen arail peneinei kan: sang Kerson, peneinei en mehn Kerson kan; sang Kohad,+ peneinei en mehn Kohad kan; sang Merari, peneinei en mehn Merari kan. 58 Iet peneinei en mehn Lipai kan: peneinei en mehn Lipni kan,+ peneinei en mehn Ipron kan,+ peneinei en mehn Mahli kan,+ peneinei en mehn Musi kan,+ peneinei en mehn Kora kan.+
Kohad iei semen Amram.+ 59 Oh eden en Amram pwoudo iei Sokeped,+ nein Lipai serepein, me en Lipai pwoudo naitikihong ih nan Isip. Oh ong Amram Sokeped naitikihada Aaron oh Moses oh riara serepein Miriam.+ 60 A me ipwidiong Aaron iei Nadap, Apihu, Eliesar oh Idamar.+ 61 Ahpw Nadap oh Apihu mehkihla ara meirongki kisiniei keinepwi mwohn silangin Siohwa.+
62 Uwen tohtohn irail kan me kileldi iei meh 23,000, ohl koaros me mahki sounpwong ehu kohda.+ Irail sohte kileldi rehn mehn Israel kan,+ pwehki irail sohte ale sohso nanpwungen mehn Israel kan.+
63 Ih irail pwukat me Moses oh samworo Eliesar kilelehdi ni ahnsou me ira kilelehdi mehn Israel kan nan sapwtehn en Mohap limwahn Sordan sallahng Seriko. 64 Ahpw sohte emen nanpwungarail me Moses oh samworo Aaron kilelehdi ni ahnsou me wadawad en mehn Israel kan wiawi nan sapwtehn en Sainai.+ 65 Pwe Siohwa ketin mahsaniheki duwen irail: “Irail uhdahn pahn mehla nan sapwtehnet.”+ Eri sohte emen irail me luhwehdi ihte Kalep nein Sepune oh Sosua nein Nun.+
27 Nein Selopehad serepein kan+ ahpw kohdo. Selopehad nein Ehper, me nein Kilead, me nein Makir, me nein Manase, peneinei en Manase nein Sosep. Eden nah serepein ko iei Mala, Noha, Okla, Milka oh Tirsa. 2 Irail eri kesihnenda mwohn Moses, samworo Eliesar, kaun akan,+ oh mwohn mwomwohdiso pwon ni wasahn pedolong en impwal en mihtingo oh nda: 3 “At pahpao mehla nan sapwtehno, ahpw e sohte iang kisehn pwihn me kohpene uhwongada Siohwa, irail me utung Kora ko,+ ahpw e mehkihla pein dipe oh sohte nah pwutak. 4 Dahme kahrehda eden at pahpao pahn sohrala sang eh peneinei kan pwehki eh sohte nah pwutak? Kumwail ketikidohng kiht sahpw ehu nanpwungen rien at pahpao ohl ako.” 5 Moses eri patohwanda ar repenpwungo mwohn silangin Siohwa.+
6 Siohwa eri ketin mahsanihong Moses met: 7 “Nein Selopehad serepein ko me pwung. Ke uhdahn anahne kihong irail sapwarail nin duwen sohso ehu nanpwungen rien arail pahpao ohl ako oh kihong irail en arail pahpao sohso.+ 8 Oh ndaiong mehn Israel kan, ‘Ma aramas emen mehla oh sohte nah pwutak, kumwail pahn kihong eh sohso rehn nah serepein. 9 Oh ma sohte nah serepein, kumwail pahn kihong eh sohso rehn rie pwutak kan. 10 Oh ma sohte rie pwutak, kumwail pahn kihong eh sohso rehn rien eh pahpao ohl akan. 11 Oh ma sohte rien eh pahpao ohl, kumwail pahn kihong eh sohso rehn kisehn eh nta me keieu keren nan eh peneinei, oh e pahn sapwenikihla met. Kosonned wet pahn wia koasoandi ehu ong mehn Israel kan, duwehte me Siohwa ketin kehkehlingkihong Moses.’”
12 Siohwa eri ketin mahsanihong Moses: “Kohdahla pohn nahna wet nan sapwen Aparim,+ oh kilang sahpw me I pahn kihong mehn Israel kan.+ 13 Ni omw pahn kilang met, ke pil pahn mehla oh seridi duwehte semomw mehn mahs ako,+ duwehte riomw Aaron,+ 14 pwehki ni mwomwohdiso ar akamaiong ie nan sapwtehn en Sinn, kumwa uhwongada ei ruwes oh sohte kasarawihiehla mwohrail ni ei kihda pihl.+ Ih met pihl en Meripa+ ni Kades+ nan sapwtehn en Sinn.”+
15 Moses eri patohwanohng Siohwa: 16 “Maing Siohwa, Koht me kin ketikihong aramas koaros mour, komw kupwurkalahngan oh ketin idihada pohn mwomwohdiso aramas emen 17 me pahn kin kohieila oh kohlongodo mwohrail oh me pahn kin kahluwa irail oh wairailongodo, pwe sapwellimen Siohwa mwomwohdiso en dehr duwehla sihpw me sohte silepe.” 18 Siohwa eri ketin mahsanihong Moses: “Ale Sosua nein Nun, ohl emen me ahneki elen madamadau* tohrohr ehu, oh pwil pehmwen powe.+ 19 Mwuri kasihnenihada mwohn samworo Eliesar oh mwohn mwomwohdiso pwon, oh ke pahn idihada ih mwohn masarail kan.+ 20 Ke pahn kihong ih ekei omw manaman,*+ pwe mwomwohdisohn mehn Israel kan pwon en rong ih.+ 21 E pahn kesihnenda mwohn samworo Eliesar, me pahn peki kaweid sang rehn Siohwa ong ih, ni eh doadoahngki Urim.+ Sang ni eh ruwes irail pahn kohieila oh sang ni eh ruwes irail pahn kohlongodo, ih oh mehn Israel kan koaros me iangih oh mwomwohdiso pwon.”
22 Moses eri kapwaiada duwehte me Siohwa ketin kehkehlingkihong ih. E ale Sosua oh kasihnenihada mwohn samworo Eliesar oh mwohn mwomwohdiso pwon, 23 oh e pwil peh ko powe oh idihada ih,+ duwehte me Siohwa ketin mahsaniher sang rehn Moses.+
28 Mwuri Siohwa ketin mahsanihong Moses: 2 “Kehkehlingkihong mehn Israel kan oh ndaiong irail, ‘Kumwail kanahieng amwail kin kihong ie meirong, ei pilawa. Ei meirong kisiniei kan nin duwen pwoh kansenamwahu ehu ong ie pahn kin wiawi ni ahnsou kan me kileldier.’+
3 “Oh ndaiong irail, ‘Iet meirong sang kisiniei me kumwail pahn meirongkihong Siohwa: sihmpwul wol riemen me roson mwahu oh sounpar ehu, nin duwen meirong isihs me kin kaukaule wiawi rahn koaros.+ 4 Emen sihmpwul wol ke pahn meirongki nimenseng, a sihmpwul wol teio ke pahn meirongki nin soutik mwohn eh pahn rotorotala,*+ 5 iangahki eisek kis ehun ihpah* en pilawa amas mwahu me doalki pahkis ehun ihn* en lehn olip nin duwen meirong en krein ehu.+ 6 Met iei meirong isihs me kin kaukaule wiawi,+ me koasoansoandi ni Nahna Sainai nin duwen pwoh kansenamwahu ehu, meirong ehu sang kisiniei ong Siohwa, 7 iangahki meirong en wain ni uwen pahkis ehun ihn ong emenemen sihmpwul wol.+ Wudekihla sakau en waio nan wasa sarawio nin duwen meirong en wain ehu ong Siohwa. 8 Oh ke pahn meirongki sihmpwul wol teio nin soutik mwohn eh pahn rotorotala.* Ke pahn meirongki met iangahki meirong en krein oh wain duwehte me wiawihda nimensengo, nin duwen meirong ehu sang kisiniei, pwoh kansenamwahu ehu ong Siohwa.+
9 “‘Ahpw, ni rahnen Sapad,+ ke pahn meirongki sihmpwul wol riemen me roson mwahu oh sounpar ehu oh eisek kis riaun sosohng en ihpah en pilawa amas mwahu me doal leh nin duwen meirong en krein ehu, iangahki meirong en wain. 10 Ih met meirong isihs en Sapad, patehng meirong isihs me kin kaukaule wiawi oh meirong en wain me iangete meirong isihso.+
11 “‘Ni tepin ehuehu sounpwong* kumwail pahn meirongkihong Siohwa koupwul wol riemen, emen sihpw wol, oh sihmpwul wol isimen me roson mwahu oh sounpar ehu nin duwen meirong isihs ehu,+ 12 oh eisek kis siluhn ihpah en pilawa amas mwahu me doal leh nin duwen meirong en krein+ ong emenemen kouwol oh eisek kis riaun ihpah en pilawa amas mwahu me doal leh nin duwen meirong en krein ong emen sihpw wol,+ 13 oh eisek kis ehun ihpah en pilawa amas mwahu me doal leh nin duwen meirong en krein ong emenemen sihmpwul wol, nin duwen meirong isihs ehu, pwoh kansenamwahu ehu,+ meirong ehu sang kisiniei ong Siohwa. 14 Oh me pid meirong en wain, elep en ihn en wain ong emen kouwol+ oh silikis ehun ihn en wain ong sihpw wolo+ oh pahkis ehun ihn en wain ong emen sihmpwul wol.+ Met iei meirong isihs me kin wiawi ehuehu sounpwong erein pahr ehu. 15 Oh pil, emen kuht pwulopwul pahn meirongala nin duwen meirong en dihp ong Siohwa patehngete meirong isihs me kin kaukaule wiawi iangahki meirong en waino.
16 “‘Ni keieun sounpwong, ni 14 en sounpwongo, pahn wia Pahsohpa ong Siohwa.+ 17 Oh ni 15 en sounpwong wet, e pahn mie kasarawi ehu. Aramas pahn tungoale pilawa me sohte doal ihs erein rahn isuh.+ 18 Ni keieun rahn e pahn mie kapokon sarawi ehu. Kumwail sohte pahn wia doadoahk laud kan.* 19 Oh kumwail pahn meirongkihong Siohwa koupwul wol riemen, emen sihpw wol, oh sihmpwul wol isimen me sounpar ehu nin duwen meirong isihs ehu. Kumwail pahn meirongki mahn akan me roson mwahu.+ 20 Kumwail pahn meirongki mahn pwukat iangahki meirong en krein en pilawa amas mwahu me doal leh,+ eisek kis siluhn ihpah ong emen kouwol oh eisek kis riaun ihpah ong sihpw wolo. 21 Ke pahn meirongki eisek kis ehun ihpah ong emenemen sihmpwul wol isimen ko, 22 oh pil emen kuht nin duwen meirong en dihp ehu pwehn wiahda tomw ong kumwail. 23 Kumwail pahn meirongki mepwukat, patehng meirong isihs en nimensengo, me wia kisehn meirong isihs me kin kaukaule wiawi. 24 Kumwail pahn meirongki mepwukat ni soangen ahlohte ni ehuehu rahn erein rahn isuh nin duwen konot,* meirong ehu sang kisiniei nin duwen pwoh kansenamwahu ehu ong Siohwa. Met pahn meirongala iangahki meirong isihs me kin kaukaule wiawi oh meirong en wain me iang meirong isihso. 25 Ni keisuhwen rahn kumwail pahn wia kapokon sarawi ehu.+ Kumwail sohte pahn wia doadoahk laud kan.+
26 “‘Ni rahnen tepin wahnsahpw kan,+ ni amwail pahn meirongkihong Siohwa meirong en krein kapw,+ kumwail pahn wia kapokon sarawi ehu nan amwail kamadipw en wihk kan.+ Kumwail sohte pahn wia doadoahk laud kan.+ 27 Kumwail pahn meirongkihong Siohwa koupwul wol riemen, emen sihpw wol, oh sihmpwul wol isimen me sounpar ehu nin duwen meirong isihs ong pwoh kansenamwahu ehu.+ 28 A me pid meirong en krein en pilawa amas mwahu me doal leh, me iangete meirong isihso, eisek kis siluhn ihpah ong emen kouwol, eisek kis riaun ihpah ong emen sihpw wol, 29 eisek kis ehun ihpah ong emenemen sihmpwul wol isimen ko, 30 oh pil emen kuht pwulopwul pwehn wiahda tomw ong kumwail.+ 31 Kumwail pahn meirongki mepwukat patehngete meirong isihs me kin kaukaule wiawi oh meirong en krein me iangete meirong isihso. Mahn pwukat pahn roson mwahu,+ iangahki meirong en wain kan.
29 “‘Oh ni keisuhwen sounpwong, ni keieun rahn en sounpwongo, kumwail pahn wia kapokon sarawi ehu. Kumwail sohte pahn wia doadoahk laud kan.*+ Met iei rahn me kumwail pahn peuk sowi.+ 2 Kumwail pahn meirongkihong Siohwa emen koupwul wol, emen sihpw wol, oh sihmpwul wol isimen me sounpar ehu, koaros pahn roson mwahu, nin duwen meirong isihs ong pwoh kansenamwahu ehu, 3 oh meirong en krein en pilawa amas mwahu me doal leh, me iangete meirong isihso, eisek kis siluhn ihpah ong kouwolo, eisek kis riaun ihpah ong sihpw wolo, 4 oh eisek kis ehun ihpah ong emenemen sihmpwul wol isimen ko, 5 oh emen kuht wol pwulopwul nin duwen meirong en dihp pwehn wiahda tomw ong kumwail. 6 Met pahn patehngete meirong isihs en ehuehu sounpwong iangahki meirong en krein+ oh meirong isihs me kin kaukaule wiawi iangahki meirong en krein,+ oh meirong en wain kan+ me iang meirong isihs pwukat, nin duwen me koasoandier ong mepwukat, nin duwen pwoh kansenamwahu ehu, meirong ehu sang kisiniei ong Siohwa.
7 “‘Oh ni rahn kaeisek en keisuhwen sounpwong wet, kumwail pahn wia kapokon sarawi ehu,+ oh kumwail pahn kaloke pein kumwail.* Kumwail sohte pahn wia doadoahk sohte lipilipil.+ 8 Oh kumwail pahn meirongkihong Siohwa emen koupwul wol, emen sihpw wol, oh sihmpwul wol isimen me sounpar ehu, koaros pahn roson mwahu,+ nin duwen meirong isihs ehu, pwoh kansenamwahu ehu. 9 A nin duwen meirong en krein en pilawa amas mwahu me doal leh, eisek kis siluhn ihpah ong kouwolo, eisek kis riaun ihpah ong sihpw wolo, 10 eisek kis ehun ihpah ong emenemen sihmpwul wol isimen ko, 11 oh pil emen kuht pwulopwul nin duwen meirong en dihp ehu, likin meirong en dihp ong tomw+ iangahki meirong en wain oh meirong isihs me kin kaukaule wiawi oh meirong en krein oh wain me iangete meirong isihso.
12 “‘Oh ni 15 en keisuhwen sounpwong, kumwail pahn wia kapokon sarawi ehu. Kumwail sohte pahn wia doadoahk laud kan, oh kumwail pahn wia kasarawi ehu ong Siohwa erein rahn isuh.+ 13 Oh kumwail pahn meirongkihong Siohwa koupwul wol 13, sihpw wol 2, oh sihmpwul wol 14 me sounpar ehu, koaros pahn roson mwahu,+ nin duwen meirong isihs ehu,+ meirong ehu sang kisiniei, pwoh kansenamwahu ehu. 14 A nin duwen meirong en krein en pilawa amas mwahu me doal leh, eisek kis siluhn ihpah ong emenemen kouwol 13 ko, eisek kis riaun ihpah ong emenemen sihpw wol 2 ko, 15 oh eisek kis ehun ihpah ong emenemen sihmpwul wol 14 ko, 16 oh pil emen kuht pwulopwul nin duwen meirong en dihp, likin meirong isihs me kin kaukaule wiawi, meirong en krein oh wain me iangete meirong isihso.+
17 “‘Oh ni keriaun rahn, kumwail pahn meirongki koupwul wol 12, sihpw wol 2, oh sihmpwul wol 14 me sounpar ehu, koaros pahn roson mwahu,+ 18 oh meirong en krein oh meirong en wain kan ong kouwol kan, sihpw wol kan, oh sihmpwul wol kan uwen tohtohn mahn akan nin duwen me koasoandier, 19 oh pil emen kuht pwulopwul nin duwen meirong en dihp ehu, likin meirong isihs me kin kaukaule wiawi oh meirong en krein me iangete meirong isihso iangahki meirong en wain ko.+
20 “‘Oh ni kesiluhwen rahn, kumwail pahn meirongki kouwol 11, sihpw wol 2, oh sihmpwul wol 14 me sounpar ehu, koaros pahn roson mwahu,+ 21 oh meirong en krein oh meirong en wain kan ong kouwol kan, sihpw wol kan, oh sihmpwul wol kan ni uwen tohtohn mahn akan nin duwen me koasoandier, 22 oh pil emen kuht nin duwen meirong en dihp, likin meirong isihs me kin kaukaule wiawi oh meirong en krein oh wain me iangete meirong isihso.+
23 “‘Oh ni kapahieun rahn, kumwail pahn meirongki kouwol 10, sihpw wol 2, oh sihmpwul wol 14 me sounpar ehu, koaros pahn roson mwahu,+ 24 oh meirong en krein oh meirong en wain kan ong kouwol kan, sihpw wol kan, oh sihmpwul wol kan ni uwen tohtohn mahn akan nin duwen me koasoandier, 25 oh pil emen kuht pwulopwul nin duwen meirong en dihp, likin meirong isihs me kin kaukaule wiawi, meirong en krein oh wain me iangete meirong isihso.+
26 “‘Oh ni kelimaun rahn, kumwail pahn meirongki kouwol 9, sihpw wol 2, oh sihmpwul wol 14 me sounpar ehu, koaros pahn roson mwahu,+ 27 oh meirong en krein oh meirong en wain kan ong kouwol kan, sihpw wol kan, oh sihmpwul wol kan ni uwen tohtohn mahn akan nin duwen me koasoandier, 28 oh pil emen kuht nin duwen meirong en dihp, likin meirong isihs me kin kaukaule wiawi oh meirong en krein oh wain me iangete meirong isihso.+
29 “‘Oh ni keweneun rahn, kumwail pahn meirongki kouwol 8, sihpw wol 2, oh sihmpwul wol 14 me sounpar ehu, koaros pahn roson mwahu,+ 30 oh meirong en krein oh meirong en wain kan ong kouwol kan, sihpw wol kan, oh sihmpwul wol kan ni uwen tohtohn mahn akan nin duwen me koasoandier, 31 oh pil emen kuht nin duwen meirong en dihp, likin meirong isihs me kin kaukaule wiawi, meirong en krein oh wain me iangete meirong isihso.+
32 “‘Oh ni keisuhwen rahn, kumwail pahn meirongki kouwol 7, sihpw wol 2, oh sihmpwul wol 14 me sounpar ehu, koaros pahn roson mwahu,+ 33 oh meirong en krein oh meirong en wain kan ong kouwol kan, sihpw wol kan, oh sihmpwul wol kan ni uwen tohtohn mahn akan nin duwen me koasoandier ong mepwukat, 34 oh pil emen kuht nin duwen meirong en dihp, likin meirong isihs me kin kaukaule wiawi, meirong en krein oh wain me iangete meirong isihso.+
35 “‘Ni kawaluhn rahn, kumwail pahn wia kapokon sarawi ehu. Kumwail sohte pahn wia doadoahk laud kan.+ 36 Kumwail pahn meirongkihong Siohwa emen kouwol, emen sihpw wol, oh sihmpwul wol isimen me sounpar ehu, koaros pahn roson mwahu,+ nin duwen meirong isihs, meirong ehu sang kisiniei, pwoh kansenamwahu ehu, 37 oh meirong en krein oh meirong en wain kan ong kouwolo, sihpw wolo, oh sihmpwul wol kan ni uwen tohtohn mahn akan nin duwen me koasoandier, 38 oh pil emen kuht nin duwen meirong en dihp, likin meirong isihs me kin kaukaule wiawi oh meirong en krein oh wain me iangete meirong isihso.+
39 “‘Kumwail pahn meirongkihong Siohwa mepwukat ni ahnsoun amwail kasarawi kan,+ patehngete amwail meirong en kahula+ oh amwail meirong kan me kumwail nsenki wia+ nin duwen amwail meirong isihs kan+ oh amwail meirong en krein kan+ oh amwail meirong en wain kan+ oh amwail meirong en kaminimin kan.’”+ 40 Moses eri ndaiong mehn Israel ko mehkoaros me Siohwa ketin kehkehlingkihong ih.
30 Moses eri koasoiaiong kaunen+ keinek en Israel kan: “Iet mahsen me Siohwa ketin kehkehlingki en: 2 Ma ohl emen kahukihong Siohwa inou ehu+ de kahukihla inou ehu+ en idingkihong pein ih inou en liksang mehkot, e sohte pahn kauwehla dahme e ndao.+ E pahn wia mehkoaros me e kahukihla me e pahn wia.+
3 “Ma lih emen kahukihong Siohwa inou ehu de e idingkihong pein ih inou en liksang mehkot me e kahukihla ni eh pwulopwul oh mihmi nan imwen eh pahpao 4 oh eh pahpao rong eh kahukihla eh inowo de eh inou en liksang mehkot me e idingkihong pein ih oh eh pahpao sohte uhwong, eh inou koaros me e kahukihla pahn manaman, oh inou koaros en liksang mehkot me e kahukihla oh idingkihong pein ih pahn manaman. 5 Ahpw ma eh pahpao keinapwihdi ih ni eh rong me liho idingkihong pein ih inou ko de inou en liksang mehkot me e kahukihla, e sohte pahn manaman. Siohwa pahn ketin mahkohng liho pwehki eh pahpao eh keinapwihdi ih.+
6 “Ahpw, ma liho pwoudikihda ohl emen ni liho eh kahukihla inou de inou mwahl me e idingkihong pein ih 7 oh eh pwoudo rong met oh sohte uhwong ni rahn me e rongadao, en liho inou ko de inou en liksang mehkot me e kahukihla oh idingkihong pein ih pahn manaman. 8 Ahpw ma eh pwoudo keinapwihdi liho ni rahn me e rongada met, e kak kauwehla inou me liho kahukihla de inou mwahlo me liho idingkihong pein ih,+ oh Siohwa pahn ketin mahkohng liho.
9 “Ahpw ma liohdi men de lih emen me mweisang eh pwoud kahukihla inou ehu, mehkoaros me e idingkihong pein ih pahn manaman ong ih.
10 “Ahpw, ma lih emen kahukihla oh idingkihong pein ih inou de inou en liksang mehkot ni eh mihmi nan imwen eh pwoud 11 oh eh pwoudo rongada met oh sohte uhwong de sohte sapwungki, eh inou ko koaros de inou en liksang mehkot me e kahukihla oh idingkihong pein ih pahn wie manamante. 12 Ahpw ma ni rahn me eh pwoudo rongada mepwukat e kauwehla douluhl inou koaros de inou en liksang mehkot me liho kahukihla, eri met sohte pahn manamante.+ Eh pwoudo kauwehla mepwukat, oh Siohwa pahn ketin mahkohng liho. 13 Me pid inou koaros me e kahukihla de inou en liksang mehkot me liho kahukihla en kalokehki pein ih,* eh pwoudo pahn pilada ma liho pahn kapwaiada eh inou ko de soh. 14 Ahpw ma erein rahn akan eh pwoudo sohte douluhl uhwong, e pil mweidohng liho en kapwaiada inou kan koaros de eh inou koaros en liksang mehkot me e kahukihla oh kohieng ih. E mweidohng liho en wia met pwehki e sohte uhwong ni rahn me e rong liho wiahda mepwukat. 15 Ahpw ma ohlo kauwehla mepwukat mwuhr, mwurin rahn me e rongada mepwukat, e pahn pwukoahki imwilahn en liho dihp.+
16 “Ih koasoandi pwukat me Siohwa ketin kehkehlingkihong Moses me pid ohl pwopwoud men oh eh pwoud, oh me pid pahpa men oh nah serepein pwulopwul me kin mihmi nan imwe.”
31 Siohwa eri ketin mahsanihong Moses: 2 “Dupungkihong+ mehn Midian kan+ dahme irail wiahiong mehn Israel kan. Mwurin mwo ke pahn mehla oh seridi duwehte semomw mehn mahs ako.”+
3 Moses eri koasoiong aramas ako: “Kaunopada ohl akan sang nanpwungamwail pwe ren mahweniong* Midian oh kapwaiada sapwellimen Siohwa kaweid oh dupukohng Midian. 4 Kumwail pahn kadarala meh 1,000 sang ehuehu keinek en Israel koaros nan karis en sounpeio.” 5 Eri sang keinek en Israel kan,*+ meh 1,000 me pilipilda sang ehuehu keinek, patpene meh 12,000 me onopada ong mahwen.*
6 Moses eri kadarirailla, meh 1,000 sang ehuehu keinek ong karis en sounpeio. Pineas+ nein samworo Eliesar iang karis en sounpeio, oh ih me kolokol dipwisou sarawi ko oh sowi en mahwen ko.+ 7 Irail mahweniong Midian, duwehte me Siohwa ketin kehkehlingkihong Moses, oh re kemehla ohl koaros. 8 Patehng irail ko me kamakamala, re kemehla nanmwarkien Midian kan, me iei, Epi, Rekem, Ser, Urr oh Repa, nanmwarki limmen en Midian. Re pil kemehkihla Palaam+ nein Peor kedlahs. 9 Ahpw mehn Israel kan wahsang me selidi kan, lih oh serien Midian kan. Irail pil kulihasang neirail mahn mand kan koaros, neirail pelinmen koaros, oh arail kepwe kan koaros. 10 Oh irail isikala arail kahnimw kan koaros me re kousoan loale oh arail kahnimpwal kan koaros.* 11 Irail wahsang dipwisou lohdi kan koaros, aramas oh mahn akan. 12 Irail eri wahdo me selidi kan oh dipwisou lohdi kan rehn Moses oh samworo Eliesar oh rehn mwomwohdisohn mehn Israel kan, ni kahnimpwal nan sapwtehn en Mohap+ limwahn Sordan sallahng Seriko.
13 Moses oh samworo Eliesar oh kaun akan koaros en mwomwohdiso ahpw kohieilahng tuhwong irail likin kahnimpwalo. 14 Ahpw Moses lingeringerda pahn ohl ako me idihdida pohn karis ko, kaunen meh kid ko oh kaunen meh epwiki ko me kohkohdo sang mahweno. 15 Moses eri ndaiong irail: “Kumwail mweidohng lih akan koaros ren momour? 16 Kilang! Ih irail me kasonge mehn Israel kan ren wia mwekid salelepek+ ong Siohwa me pid Pihor+ sang ni en Palaam lokaia ko, kahrehda kalokoloko eh lelohng mwomwohdisohn Siohwa.+ 17 Eri kumwail pahn kemehla pwutak koaros nanpwungen seri kan oh kemehla lih koaros me wiahier nsenen pwopwoud rehn ohl emen. 18 Ahpw kumwail kak mweidohng serepein pwulopwul kan koaros me saikinte wia nsenen pwopwoud rehn ohl emen ren momour.+ 19 Oh kumwail pahn mi likin kahnimpwalo erein rahn isuh. Emenemen kumwail me kemehla aramas* oh emenemen kumwail me doahke aramas me kamakamala+ pahn kamwakelehda pein ih+ ni kesiluhwen rahn oh ni keisuhwen rahn, kumwail oh irail me selidi kan. 20 Oh kumwail pahn kamwakelehsang dihp likou koaros, mehkoaros me wiawihkihda kilin mahn, mehkoaros me wiawihkihda wunen kuht, oh mehkoaros me wiawihkihda tuhke.”
21 Samworo Eliesar eri ndaiong ohl ako me iang karis en sounpeio kohla mahwen: “Iet kosonned me Siohwa ketin kehkehlingkihong Moses, 22 ‘Ihte kohl, silper, prons, mete, dihn oh leht, 23 mehkoaros me kak kohlong nan kisiniei, kumwail pahn kihong nan kisiniei, oh mepwukat ahpw pahn mwakelekella. Ahpw, mepwukat pil pahn kamwakelkihda pilen kamwakel.+ Mehkoaros me sohte kak kohlong nan kisiniei, kumwail pahn kihong nan pihl. 24 Oh kumwail pahn lopworada amwail likou kan ni keisuhwen rahn oh mwakelekella, oh mwuri kumwail pahn pedolong nan kahnimpwalo.’”+
25 Siohwa eri ketin mahsanihong Moses met: 26 “Kilelehdi dipwisou lohdi kan, wadekedi me selidi kan aramas oh mahn akan; wia met iangahki samworo Eliesar oh kaunen peneinei kan en mwomwohdiso. 27 Nehkpeseng dipwisou lohdi kan ni pali riau nanpwungen irail me iang karis en sounpeio me iang mahweno oh meteikan koaros nan mwomwohdiso.+ 28 Nin duwen daksis ong Siohwa, ke pahn kihsang rehn sounpei kan me iang kohla mahwen, emen sang meh 500, nanpwungen aramas akan, pelin kou, dongki kan, oh pelin sihpw. 29 Kumwail pahn ale daksis sang pwaisarail kan oh kihong samworo Eliesar nin duwen kisakis ong Siohwa.+ 30 Sang pwais me kohieng mehn Israel kan, ke pahn kihsang emen sang meh 50, nanpwungen aramas akan, pelin kou, dongki kan, pelin sihpw, oh soangen mahn mand koaros, oh kihong mehn Lipai kan,+ me kin apwalih pwukoa kan me pid sapwellimen Siohwa impwal sarawio.”+
31 Moses oh samworo Eliesar eri kapwaiada duwehte me Siohwa ketin kehkehlingkihong Moses. 32 Dipwisou lohdi kan me luhwehdi sang dahme aramas ako me iang mahwen kulihasang, patpene sihpw 675,000, 33 kou 72,000, 34 oh dongki 61,000. 35 Lih akan me sohte wia nsenen pwopwoud rehn ohl emen+ patpene meh 32,000. 36 Pwais me kohieng irail ko me iang kohieila mahwen patpene sihpw 337,500. 37 Daksis ong Siohwa sang sihpw ko patpene meh 675. 38 Oh mie kou 36,000, oh daksis ong Siohwa sang kou ko meh 72. 39 Oh mie dongki 30,500, oh daksis ong Siohwa sang dongki ko meh 61. 40 Oh mie aramas 16,000, oh daksis ong Siohwa sang aramas ako meh 32. 41 Moses eri kihong samworo Eliesar+ daksiso nin duwen kisakis ong Siohwa, duwehte me Siohwa ketin kehkehlingkihong Moses.
42 Sang pwais me kohieng mehn Israel kan, me Moses nehkpeseng sang pwaisen ohl ako me iang mahweno, 43 elep en sihpw kan patpene meh 337,500, 44 oh elep en kou kan meh 36,000, 45 oh elep en dongki kan meh 30,500, 46 oh elep en aramas akan meh 16,000. 47 Sang pwais me kohieng mehn Israel kan Moses kihsang emen sang meh 50, nanpwungen aramas oh mahn akan, oh kihirailla rehn mehn Lipai kan,+ me kin apwalih pwukoahn sapwellimen Siohwa impwal sarawio,+ duwehte me Siohwa ketin kehkehlingkihong Moses.
48 Mwuri ohl ako me idihdida pohn pwihnen* karis en sounpei ko,+ me iei kaunen meh kid kan oh kaunen meh epwiki kan, ahpw kohdo rehn Moses, 49 irail eri ndaiong Moses: “Noumw ladu kan wadekedier ohl akan me iang mahwen me mi pahn at manaman, oh sohte emen reht me salongala.+ 50 Eri mweidohng emenemen kiht en kihda dahme se diarada nin duwen meirong ong Siohwa, mehn kapwat kohl kan, sein en neh, luwou kan, rihng en sidamp kan, tiati kan, oh mehn kapwat teikan, pwehn wiahda tomw ong pein kiht mwohn silangin Siohwa.”
51 Moses oh samworo Eliesar eri ale kohl ko sang irail, mehn kapwat ko koaros. 52 Kohl en kisakis ko koaros me re patohwanohng Siohwa patpene sekel* 16,750, sang kaunen meh kid ko oh kaunen meh epwiki ko. 53 Emenemen ohl me iang karis en sounpeio ale eh dipwisou lohdi. 54 Moses oh samworo Eliesar ale kohl ko sang kaunen meh kid ko oh kaunen meh epwiki ko oh wahla nan impwal en mihtingo nin duwen mehn kataman ehu ong aramas en Israel kan mwohn silangin Siohwa.
32 Kadaudok en Reupen kan+ oh kadaudok en Kad kan+ naineki kiden pelinmen kan, oh re kilang me sapwen Saser+ oh Kilead wia wasa mwahu ehu ong pelinmen kan. 2 Eri kadaudok en Kad kan oh kadaudok en Reupen kan kohdo rehn Moses, samworo Eliesar, oh kaun akan en mwomwohdiso oh nda: 3 “Atarod, Dipon, Saser, Nimra, Espon,+ Eleale, Sipam, Nepo+ oh Peon,+ 4 sahpw me Siohwa ketin kalowehdi mwohn mwomwohdisohn Israel,+ iei sahpw mwahu ehu ong pelinmen kan, oh noumw ladu kat naineki pelinmen tohto.”+ 5 Re doula nda: “Ma se kenikenla rehmwi, sahpwet en kohieng noumwi ladu kat pwe sen sapwenikihla. Komw dehr kahrehiong kiht en kotehla Sordan.”
6 Moses eri ndaiong kadaudok en Kad ko oh kadaudok en Reupen ko: “Riamwail kan pahn kohla mahwen nindoken amwail mihmihte wasaht? 7 Dahme kahrehda kumwail pahn wiahiong aramas en Israel kan ren mworusala, kahrehda ren sohte kohla nan sahpw me Siohwa uhdahn pahn ketikihong irail? 8 Ih met me samamwail ko wia ni ei kadarirailla sang Kades-parnea pwe ren kilang sahpwo.+ 9 Ni ar kohdahla nan Wahun Eskol+ oh kilang sahpwo, re wiahiong aramas en Israel ko ren mworusala kahrehda re sohte men kohla nan sahpw me Siohwa pahn ketikihong irail.+ 10 Siohwa ketin engiengda rahno kahrehda e ketin kahukihla:+ 11 ‘Aramas me iang kohsang Isip sang sounpar 20 kohda sohte pahn kilang sahpw+ me I kahukihong Eipraam, Aisek oh Seikop,+ pwehki re sohte kin idawehn ie ni mohngiong unsek— 12 ihte Kalep+ nein Sepune mehn Kenis oh Sosua+ nein Nun me pahn kilang sahpwo, pwehki ira kin idawehn Siohwa ni mohngiong unsek.’+ 13 Siohwa eri ketin engiengda pahn Israel oh e ketin kahrehiong irail en kohkohseli nan sapwtehno erein sounpar 40,+ lao lel dih koaros me wia me suwed mwohn silangin Siohwa mehla.+ 14 Eri met kumwail uhda oh wiliandi samamwail ko nin duwen kadaudok en aramas dipan kei, me kalaudehla sapwellimen Siohwa engieng kowahlap pahn Israel. 15 Ma kumwail sohla pahn idawehn ih, e uhdahn pahn ketin pwurehng kesehla aramas pwukat nan sapwtehno, oh kumwail pahn kahrehiong irail koaros ren mwomwla.”
16 Mwuri re ahpw kohla rehn Moses oh nda: “Se pahn kauwada wasaht kehl takai kan ong nait pelinmen kan oh kahnimw kan ong nait seri kan. 17 Ahpw se pahn pousehlahte onopadahng mahwen+ oh se pahn kohla mwohn mehn Israel kan lao se wairaildo nan dewerail. Oh erein ahnsowo nait seri kan pahn koukousoan nan kahnimw kehl kehlail kan oh sohte perki tohn sahpwo. 18 Se sohte pahn pwurodo ni imwat kan lao emenemen mehn Israel kan alehdi sapwe nin duwen sohso.+ 19 Pwe se sohte pahn iang irail ale sohso palio Sordan, pwehki se aleier at sohso ni palimesehn Sordan.”+
20 Moses eri sapengkin irail: “Ma kumwail pahn wia met: Onopadahng mahwen mwohn silangin Siohwa;+ 21 oh ma emenemen kumwail onopada oh kotehla Sordan mwohn silangin Siohwa ni eh ketin kasarehla sapwellime imwintihti kan mwowe+ 22 lao sahpwo pahn lohdi mwohn silangin Siohwa,+ mwurin mwo kumwail kak pwurala+ oh saledeksang dihp mwohn silangin Siohwa oh Israel. Oh sahpwet pahn wiahla sapwamwail mwohn silangin Siohwa.+ 23 Ahpw ma kumwail sohte wia met, kumwail pahn dipada ong Siohwa. Ma met wiawi, kumwail en ese me kumwail pahn ale kalokepen dipamwail kan. 24 Eri kumwail pahn kak kauwada kahnimw kan ong noumwail seri kan oh kehl kan ong noumwail pelinmen kan,+ ahpw kumwail anahne wia dahme kumwail inoukihda.”
25 Kadaudok en Kad ko oh kadaudok en Reupen ko eri ndaiong Moses met: “Noumw ladu kat pahn wia duwehte me at kaun kehkehlingki. 26 Nait seri kan, at pwoud kan, nait pelinmen kan, oh nait mahn mand kan koaros pahn mihmihte wasao nan kahnimw kan en Kilead,+ 27 ahpw noumw ladu kat, ohl koaros me onopadahr pahn kotehwei, pwe sen iang mahwen mwohn silangin Siohwa,+ duwehte me at kaun mahsanih.”
28 Moses eri kihong samworo Eliesar, Sosua nein Nun, oh kaunen peneinei en keinek en Israel kan kehkehlik ehu duwen irail. 29 Moses eri ndaiong irail: “Ma kadaudok en Kad kan oh kadaudok en Reupen kan, ohl koaros me onopadahng mahwen mwohn silangin Siohwa, iang kumwail kotehla Sordan, oh sahpwo lohdi mwohmwail, eri kumwail pahn kihong irail sapwen Kilead pwe ren sapwenikihla.+ 30 Ahpw ma irail sohte onopadahng mahwen oh sohte iang kumwail kotehwei, eri irail pahn kousoanla rehmwail nan sapwen Kenan.”
31 Kadaudok en Kad kan oh kadaudok en Reupen kan ahpw sapengki: “Dahme Siohwa ketin mahsanihong noumw ladu kat, ih me se pahn wia. 32 Se pahn onopadahng mahwen oh kohla nan sapwen Kenan mwohn silangin Siohwa,+ ahpw sahpw me se pahn sohsohki pahn mi paliet Sordan.” 33 Moses eri kihong irail—kadaudok en Kad kan, kadaudok en Reupen kan,+ oh elep keinek en Manase+ nein Sosep—wehin Sihon+ nanmwarkien mehn Amor kan oh wehin Ok+ nanmwarkien Pasan, sahpw me kisehn kahnimw kan nan sahpw pwukat, oh kahnimw kan me kapilpene sahpwo.
34 Oh kadaudok en Kad kan kauwada* Dipon,+ Atarod,+ Aroer,+ 35 Atrod-sopan, Saser,+ Sokpea,+ 36 Ped-nimra+ oh Ped-aran,+ kahnimw kehl kehlail kan, oh re kauwada kehl takai kan ong pelinmen kan. 37 Oh kadaudok en Reupen kan kauwada Espon,+ Eleale,+ Kiriadaim,+ 38 Nepo+ oh Paal-meon+—adarail kan wekila—oh Sipma; oh re tepida kihong ahd kapw kei ong kahnimw kan me re onehda sapahl.
39 Kadaudok en Makir+ nein Manase ahpw karis kohla Kilead oh kalowehdi oh kasarehla mehn Amor kan me kin kousoan loale. 40 Moses eri kihla Kilead rehn kadaudok en Makir nein Manase, oh re tepida kousoanla loale.+ 41 Oh Sair kadaudok en Manase ahpw karis kohla rehrail oh kalowehdi arail kahnimpwal kan, oh e tepida kahdaneki kahnimpwal ko Apod-sair.*+ 42 Oh Nopa karis kohla oh kalowehdi Kenad oh kisin kahnimw kan me kapilpene, oh e tepida kahdaneki kahnimwo Nopa, me iei ede.
33 Iet seiloak en aramas en Israel kan ni ahnsou me re kohieisang nan sapwen Isip+ nin duwen arail pwihn kan*+ pahn kaweid en Moses oh Aaron.+ 2 Moses eri pousehlahte kilelehdi wasa kan me re mweselsang ie erein arail seiloak sang ni ruwes en Siohwa, oh iet seiloak me re wia sang ehu wasa lel ehu wasa:+ 3 Irail mweselsang Rameses+ ni keieun sounpwong, ni 15 en sounpwongo.+ Rahnohte mwurin Pahsohpao,+ mehn Israel kan kohkohieila ni eimah* mwohn mesen mehn Isip kan koaros. 4 Erein ahnsowo, mehn Isip kan sansarepedi mesenih koaros me Siohwa ketin kemehla nanpwungarail,+ pwe Siohwa ketin kadeikada arail koht kan.+
5 Mehn Israel kan eri mweselsang Rameses oh kauwada imwarail impwal kan nan Sukot.+ 6 Irail eri mweselsang Sukot oh kauwada imwarail impwal kan nan Edam,+ me mi ni keilen sapwtehno. 7 Irail eri mweselsang Edam oh pwuralahng Piairod, me sallahng Paal-sepon,+ oh irail kauwada imwarail impwal kan mwohn Mikdol.+ 8 Mwurin mwo re mweselsang Piairod oh kotehla nanwerengen sehdo+ kohla nan sapwtehno+ oh pousehla seiloangki rahn siluh nan sapwtehn en Edam+ oh kauwada imwarail impwal kan nan Marah.+
9 Irail eri mweselsang Marah oh kohdo Elim. Nan Elim mie utuhnpihl 12 oh tuhke pahm* 70, irail eri kauwada imwarail impwal kan wasao.+ 10 Mwuri irail mweselsang Elim oh kauwada imwarail impwal kan limwahn Sehd Weitahtao. 11 Mwurin mwo irail mweselsang Sehd Weitahtao oh kauwada imwarail impwal kan nan sapwtehn en Sin.+ 12 Irail eri mweselsang nan sapwtehn en Sin oh kauwada imwarail impwal kan nan Dopka. 13 Mwuhr irail mweselsang Dopka oh kauwada imwarail impwal kan nan Alus. 14 Mwuri irail mweselsang Alus oh kauwada imwarail impwal kan nan Repidim,+ wasa me sohte pihl me aramas ako kak nim. 15 Mwurin mwo irail mweselsang Repidim oh kauwada imwarail impwal kan nan sapwtehn en Sainai.+
16 Irail eri mweselsang sapwtehn en Sainai oh kauwada imwarail impwal kan nan Kiprod-attapa.+ 17 Irail eri mweselsang Kiprod-attapa oh kauwada imwarail impwal kan nan Aserod.+ 18 Mwurin mwo irail mweselsang Aserod oh kauwada imwarail impwal kan nan Ridma. 19 Mwuri irail mweselsang Ridma oh kauwada imwarail impwal kan nan Rimmon-peres. 20 Irail eri mweselsang Rimmon-peres oh kauwada imwarail impwal kan nan Lipna. 21 Irail mweselsang Lipna oh kauwada imwarail impwal kan nan Rissa. 22 Mwuri irail mweselsang Rissa oh kauwada imwarail impwal kan nan Kehelada. 23 Mwuri irail mweselsang Kehelada oh kauwada imwarail impwal kan ni Nahna Sihper.
24 Mwurin mwo irail mweselsang Nahna Sihper oh kauwada imwarail impwal kan nan Arada. 25 Mwuri irail mweselsang Arada oh kauwada imwarail impwal kan nan Makelod. 26 Mwuri irail mweselsang+ Makelod oh kauwada imwarail impwal kan nan Tahad. 27 Mwurin mwo irail mweselsang Tahad oh kauwada imwarail impwal kan nan Tera. 28 Irail eri mweselsang Tera oh kauwada imwarail impwal kan nan Midka. 29 Mwuhr irail mweselsang Midka oh kauwada imwarail impwal kan nan Asmona. 30 Mwuri irail mweselsang Asmona oh kauwada imwarail impwal kan nan Moserod. 31 Irail eri mweselsang Moserod oh kauwada imwarail impwal kan nan Pen-sahkan.+ 32 Oh irail mweselsang Pen-sahkan oh kauwada imwarail impwal kan nan Or-akkidkad. 33 Mwuri irail mweselsang Or-akkidkad oh kauwada imwarail impwal kan nan Sotpada.+ 34 Mwuhr irail mweselsang Sotpada oh kauwada imwarail impwal kan nan Aprona. 35 Irail eri mweselsang Aprona oh kauwada imwarail impwal kan nan Esiongkeper.+ 36 Mwurin mwo irail mweselsang Esiongkeper oh kauwada imwarail impwal kan nan sapwtehn en Sinn,+ me iei Kades.
37 Mwuhr irail mweselsang Kades oh kauwada imwarail impwal kan ni Nahna Or,+ ni irepen sapwen Edom. 38 Oh samworo Aaron kohdahla ni Nahna Or sang ni ruwes en Siohwa oh mehla wasao ni kapahisek en pahr mwurin mehn Israel kan ar mweselsang sapwen Isip, ni kelimaun sounpwong, ni keieun rahn en sounpwongo.+ 39 Aaron mahki sounpar 123 ni eh mehla pohn Nahna Or.
40 Nanmwarkien Arad,+ mehn Kenan men me kin kousoan nan Nekep nan sapwen Kenan, ahpw rongada duwen mehn Israel kan ar kohkohdo.
41 Kedekedeo irail mweselsang Nahna Or+ oh kauwada imwarail impwal kan nan Salmona. 42 Mwurin mwo irail mweselsang Salmona oh kauwada imwarail impwal kan nan Punon. 43 Mwuri irail mweselsang Punon oh kauwada imwarail impwal kan nan Opod.+ 44 Mwuri irail mweselsang Opod oh kauwada imwarail impwal kan nan Aie-aparim, ni irepen Mohap.+ 45 Mwuhr irail mweselsang Aiam* oh kauwada imwarail impwal kan nan Dipon-kad.+ 46 Mwurin mwo irail mweselsang Dipon-kad oh kauwada imwarail impwal kan nan Almon-dipladaim. 47 Mwuri irail mweselsang Almon-dipladaim oh kauwada imwarail impwal kan ni nahna kan en Aparim+ mwohn Nepo.+ 48 Irail eri mweselsang nahna kan en Aparim oh kauwada imwarail impwal kan nan sapwtehn en Mohap limwahn Sordan sallahng Seriko.+ 49 Irail pousehlahte mihmi nan imwarail impwal kan limwahn Sordan, sang Ped-sesimod lellahng Apel-sidem,+ nan sapwtehn en Mohap.
50 Siohwa eri ketin mahseniong Moses nan sapwtehn en Mohap limwahn Sordan sallahng Seriko: 51 “Koasoiong mehn Israel kan oh ndaiong irail, ‘Kumwail pahn kotehla Sordan kohla nan sapwen Kenan.+ 52 Kumwail pahn kasarehla tohn sahpwo pwon sang mwohmwail oh kauwehla arail takai perperda kan koaros+ oh arail sansal mete kan koaros,+ oh kumwail pahn kauwehla arail wasa ile sarawi kan koaros.+ 53 Oh kumwail pahn sapwenikihla sahpwo oh kousoanla loale, pwehki I uhdahn pahn kihong kumwail sahpwo nin duwen sohso ehu.+ 54 Kumwail pahn nehkpeseng sahpwo ni usuhs+ nin duwen sohso ehu nanpwungen amwail peneinei kan. Ong pwihn laud kumwail pahn kalaudehla eh sohso, oh ong pwihn tikitik kumwail pahn katikala eh sohso.+ Wasa me usuhs pahn pwupwudi ie ih wasa me pahn wia eh sohso. Kumwail pahn alehdi sapwamwail nin duwen sohso ehu sang keinek en samamwail ko.+
55 “‘Ahpw, ma kumwail sohte kasarehla tohn sahpwo sang mwohmwail,+ irail kan me kumwail mweidohng ren mihmi pahn wiahla kisin tek kis nan masamwail oh dihpw tekatek kan ni pengepengamwail, oh re pahn kaloke kumwail nan sahpw me kumwail pahn kousoan ie.+ 56 Oh I pahn wiahiong kumwail dahme I koasoanehdi en wiahiong irail.’”+
34 Oh Siohwa ketin doula mahsanihong Moses: 2 “Kihong mehn Israel kan kaweid pwukat: ‘Ni amwail pahn kohla nan sapwen Kenan,+ iet irepen sapwen Kenan kan me pahn kohieng kumwail nin duwen sohso ehu.+
3 “‘Irepen palieir en sapwamwail pahn sang sapwtehn en Sinn peianla Edom, oh irepen palieir en sapwamwail ni palimese pahn sang imwin Sehd Soahl.*+ 4 Irepen sapwamwail pahn wetla oh daulih palieir en ukada en Akrappim+ oh douluhllahng Sinn, oh e pahn ididi ni palieir en Kades-parnea.+ Mwuri e pahn kolahng Asar-addar+ oh douluhllahng Asmon. 5 Irepen sahpwo pahn wetla Asmon kohla ni Wahun Isip, oh e pahn ididi ni Sehdo.*+
6 “‘Irepen palikapi en sapwamwail pahn mi ni Sehd Laud* oh oaroahro. Met pahn wiahla irepen palikapi en sapwamwail.+
7 “‘Iet irepen paliepeng en sapwamwail: Sang Sehd Laud kumwail pahn kilelehdi irepen sapwamwail kohla lel Nahna Or. 8 Sang Nahna Or kumwail pahn kilelehdi irepen sahpwo kolahng Lepo-amad,*+ oh imwin irepen sahpwo pahn mi Sedad.+ 9 Oh irepen sahpwo pahn kolahng Sipron, oh e pahn ididi Asar-enan.+ Met pahn wiahla irepen paliepeng en sapwamwail.
10 “‘Mwuri kumwail pahn kilelehdi irepen sapwamwail ni palimese sang Asar-enan kolahng Sepahm. 11 Irepen sahpwo pahn sang Sepahm kohla Ripla ni palimesehn Ain, oh irepen sahpwo pahn kohdihla oh kotehla ukada en palimesehn Sehden Kinnered.*+ 12 Irepen sahpwo pahn kolahng Sordan, oh e pahn ididi ni Sehd Soahl.+ Met pahn wiahla sapwamwail+ oh irepen sapwamwail.’”
13 Moses eri padahkihong mehn Israel ko: “Iet sahpw me kumwail pahn nehkpeseng nin duwen amwail sohso sang ni usuhs,+ duwehte me Siohwa ketin kehkehlingki en ketikihong keinek duwau elepo. 14 Pwe keinek en Reupen, keinek en Kad, oh elep keinek en Manase alehdier arail sohso.+ 15 Keinek riau elepo alehdier arail sohso ni palimesehn sapwen Sordan limwahn Seriko, sallahng wasa me ketipino kin dakada ie.”+
16 Siohwa ketin doula mahsanihong Moses: 17 “Iet eden ohl akan me pahn nehkpeseng sahpw me kumwail pahn sapwenikihla: samworo Eliesar+ oh Sosua+ nein Nun. 18 Oh kumwail pahn ale kaun emen sang ehuehu keinek pwehn nehkpeseng sahpwo nin duwen amwail sohso.+ 19 Iet eden ohl akan: sang keinek en Suda,+ Kalep+ nein Sepune; 20 sang keinek en Simion,+ Semiuel nein Ammihud; 21 sang keinek en Pensamin,+ Elidad nein Kislon; 22 sang keinek en Dan,+ kaun emen, Pukki nein Sokli; 23 me pid kadaudok en Sosep kan,+ sang keinek en Manase,+ kaun emen, Anniel nein Epod; 24 sang keinek en Epraim,+ kaun emen, Kemuel nein Siptan; 25 sang keinek en Sepulon,+ kaun emen, Elisapan nein Parnak; 26 sang keinek en Isakar,+ kaun emen, Paltiel nein Assan; 27 sang keinek en Aser,+ kaun emen, Aihud nein Selomi; 28 sang keinek en Napdali,+ kaun emen, Pedael nein Ammihud.” 29 Ih irail pwukat me Siohwa ketin kehkehlingki ren nehkpeseng sahpwo ong mehn Israel kan nan sapwen Kenan.+
35 Siohwa eri ketin doula mahsanihong Moses nan sapwtehn en Mohap limwahn Sordan+ sallahng Seriko: 2 “Padahkihong mehn Israel kan me re pahn kihong mehn Lipai kan kahnimw kan pwe ren kousoan loale sang sahpw kan me re pahn sohsohki,+ oh re pahn kihong mehn Lipai kan mohs kan me kapil kahnimw kan.+ 3 Mehn Lipai kan pahn kousoanla nan kahnimw ko, oh mohs kan pahn ong neirail pelinmen kan, arail kepwe kan, oh neirail mahn teikan koaros. 4 Mohs en kahnimw ko me kumwail pahn kihong mehn Lipai kan pahn reireiki kiupid* 1,000 sang ni kehl me kapilpene kahnimwo. 5 Kumwail pahn sohngedi likin kahnimwo kiupid 2,000 ni palimese, kiupid 2,000 ni palieir, kiupid 2,000 ni palikapi, oh kiupid 2,000 ni paliepeng, oh kahnimwo mi nanwerenge. Ih mohs en arail kahnimw kan met.
6 “Kahnimw kan me kumwail pahn kihong mehn Lipai kan pahn wia kahnimw en rukula 6,+ wasa me emen me kemehla aramas en tangala ie,+ oh pil kahnimw 42 teikan. 7 Kumwail pahn kihong mehn Lipai kan kahnimw 48, iangahki arail mohs kan.+ 8 Kahnimw kan me kumwail kihong irail pahn kohsang sapwen mehn Israel kan.+ Sang pwihn laud kan kumwail pahn ale me tohto, oh sang pwihn tikitik kan kumwail pahn ale me malaulau.+ Ehuehu pwihn pahn kihla ekei ar kahnimw kan rehn mehn Lipai kan me pahrekiong sohso me re alehdi.”
9 Siohwa ketin doula mahsanihong Moses: 10 “Koasoiong mehn Israel kan oh ndaiong irail, ‘Kumwail pahn kotehla Sordan kohla nan sapwen Kenan.+ 11 Kumwail pahn pilada kahnimw kan me mengeiong kumwail en kohla ie, nin duwen kahnimw en rukula kan, wasa me emen me sohte nsenki kemehla emen aramas* pahn tangala ie.+ 12 Kahnimw pwukat pahn wia wasahn amwail ruksang aramas me pahn ikih me mehlao,*+ pwe me kemehla aramaso sohte pahn mehla mwohn eh pahn ale kopwung mwohn mwomwohdiso.+ 13 Kahnimw en rukula weneu me kumwail kihda pahn wia met. 14 Kumwail pahn kihda kahnimw siluh ni paliet Sordan+ oh kahnimw siluh nan sapwen Kenan+ pwehn wia kahnimw en rukula kan. 15 Kahnimw weneu pwukat pahn wia wasahn rukula ong mehn Israel kan, ong mehn liki kan me kin kousoan rehrail+ oh ong aramas me kousoanla rehrail, pwe mehmen me sohte nsenki kemehla emen aramas* en tangala ie.+
16 “‘Ahpw ma e wokiheki ih mehkot me wiawihkihda mete oh e mehla, ih sounkam aramas emen. Sounkam aramaso uhdahn pahn kamakamala.+ 17 Oh ma e sungki ih takai ehu me kak kahrehda mehla oh e mehla, ih sounkam aramas emen. Sounkam aramaso uhdahn pahn kamakamala. 18 Oh ma e wokiheki ih mehkot me wiawihkihda tuhke me kak kahrehda mehla oh e mehla, ih sounkam aramas emen. Sounkam aramaso uhdahn pahn kamakamala.
19 “‘Aramas me pahn ikih me mehlao me pahn kemehla sounkam aramaso. Ni eh pahn tuhwongedi, pein ih me pahn kemehla ih. 20 Ma mehla wiawi pwehki e siken ih sang ni kailok de katehki mehkot ni eh men kauwehla ih,*+ 21 de sang ni kailok e pakere ih, oh e mehla, aramas me pakere iho uhdahn pahn kamakamala. Ih sounkam aramas emen. Aramas me pahn ikih me mehlao pahn kemehla sounkam aramaso ni eh pahn tuhwongedi.
22 “‘Ahpw ma met sapwungala ehu oh e siken ih kaidehn sang ni kailok de katehki mehkot ehu ni eh sohte men kauwehla ih,*+ 23 de e sohte kilang ih oh kahrehda takai ehu eh pwupwudiong powe oh kaidehn ih imwintihti men de e sohte songosong en kamedekihala, oh aramaso mehla, 24 eri, mwomwohdiso pahn kopwung nanpwungen aramas me wokihedi iho oh aramas me pahn ikih me mehlao, me pahrekiong koasoandi pwukat.+ 25 Mwomwohdiso pahn doarehla ih me kemehla aramaso sang rehn aramas me pahn ikih me mehlao oh kapwurehla ih nan eh kahnimw en rukula me e tangala ieo, oh e pahn kousoan nan kahnimwo lao samworo lapalap me keikihdi leh sarawio pahn mehla.+
26 “‘Ahpw ma me kemehla aramaso kohieila sang ni irepen eh kahnimw en rukula me e tangala ieo 27 oh aramas me pahn ikih me mehlao diar ih likin eh kahnimw en rukulao oh kemehla ih, e sohte pwukoahkihdi dipen kamaramas. 28 Pwe e pahn anahne mihmihte nan eh kahnimw en rukula lao samworo lapalapo mehla. Ahpw mwurin samworo lapalapo eh mehla, me kemehla aramaso pahn kak pwurala nan sapweo.+ 29 Mepwukat pahn wia koasoandi en kopwung ong kumwail, erein dih kan me pahn kohdo nan amwail wasahn kousoan kan koaros.
30 “‘Mehmen me kemehla aramas* emen pahn kamakamala nin duwen sounkam aramas emen+ sang ni kadehde*+ en sounkadehde kan; ahpw sohte me pahn kamakamala sang ni kadehde en sounkadehde emente. 31 Kumwail sohte pahn ale pweinen pweipwei sapahl ong mour* en sounkam aramas men me konehng en mehla, pwe e uhdahn pahn kamakamala.+ 32 Oh kumwail sohte pahn ale pweinen pweipwei sapahl ong emen me tangala nan eh kahnimw en rukula, pwehn mweidohng ih en pwurehng kousoan nan sapwe mwohn samworo lapalapo eh mehla.
33 “‘Kumwail sohte pahn kasaminehla sahpw me kumwail kousoan ieo, pwe nta kin kasaminehla sahpwo,+ oh sohte tomw ong nta me keredi nan sahpwo ihte ntahn aramas me kakerehdi ntao.+ 34 Kumwail sohte pahn kasaminehla sahpw me kumwail kin kousoan loale, wasa me I kin kousoan ie; pwe ngehi, Siohwa, kin kousoan nanpwungen aramas en Israel kan.’”+
36 Moangen peneinei kan en kadaudok en Kilead nein Makir+ nein Manase peneinei en nein Sosep pwutak kan ahpw kohdo oh koasoi mwohn Moses oh kaun akan, moangen peneinei en mehn Israel kan. 2 Irail eri nda: “Siohwa ketin kehkehlingkihong ei kaun en nehkpeseng sahpw ni usuhs+ nin duwen sohso ehu ong mehn Israel kan; oh Siohwa ketin kehkehlingkihong ei kaun en kihong sohsohn riat Selopehad rehn nah serepein kan.+ 3 Ma irail pahn pwoudikihda ohl akan sang ehu keinek tohrohr en Israel, en lih ako sohso pahn kohsang sohsohn at pahpa ko oh kapatapatohng sohsohn keinek me re pahn pwopwoudla ieo, kahrehda se pahn luhssang kisehn at sohso me kileldi ni usuhs. 4 Eri ni pahr en Supilih+ eh pahn wiawi ong aramas en Israel kan, en lih ako sohso pil pahn kapatapatohng sohsohn keinek me re pwopwoudla ieo, kahrehda se pahn luhssang kisehn sohsohn keinek en at pahpa ko.”
5 Moses eri kehkehlingkihong mehn Israel kan sang ni ruwes en Siohwa: “Dahme keinek en nein Sosep kan ndindahn me pwung. 6 Iet mahsen me Siohwa ketin kehkehlingkihong nein Selopehad serepein kan: ‘Irail kak pwoudikihda emen sohte lipilipil me re mwahuki. Ahpw, irail pahn pwoudiki emen sang peneinei en keinek en arail pahpao. 7 Sohso en mehn Israel kan sohte pahn kohsang ehu keinek kolahng ehu keinek, pwe mehn Israel kan pahn kolokolete sohso en keinek en samarail mehn mahs ako. 8 Oh serepein koaros me ahneki sohso ehu nanpwungen keinek en Israel kan pahn pwoudikihda emen kadaudok en keinek en eh pahpao,+ pwe mehn Israel kan en kak kolokolete sohsohn samarail mehn mahs ako. 9 Sohte sohso ehu pahn kohsang ehu keinek kolahng ehu keinek tohrohr, pwe keinek en Israel kan pahn kolokolete pein arail sohso.’”
10 Nein Selopehad serepein ko eri kapwaiada duwehte me Siohwa ketin kehkehlingkihong Moses.+ 11 Eri Mala, Tirsa, Okla, Milka oh Noha, nein Selopehad serepein ko,+ pwoudikihda nein rien arail pahpao pwutak kan. 12 Irail pwoudikihda ohl akan sang peneinei kan en Manase nein Sosep pwe arail sohso en mihmihte nan keinek en arail pahpao peneinei.
13 Ih kehkehlik oh kosonned pwukat me Siohwa ketikihong mehn Israel kan sang rehn Moses nan sapwtehn en Mohap limwahn Sordan sallahng Seriko.+
LI, “nein Israel pwutak kan.”
LI, “nin duwen arail karis en sounpei kan.”
LI, “emen aramas tohrohr,” me iei, emen me kaidehn mehn Lipai.
De “pahn eh pilaik me koasoansoandi.”
LI, “nin duwen arail karis en sounpei kan.”
De “sile; kapwaiada arail doadoahk ni.”
De “kilel.”
LI, “nin duwen arail karis en sounpei kan.”
LI, “nin duwen arail karis en sounpei kan.”
LI, “nin duwen arail karis en sounpei kan.”
LI, “nin duwen arail karis en sounpei kan.”
LI, “dih kan en.”
LI, “me peh kan audauda.”
LI, “emen aramas tohrohr,” me iei, aramas emen me kaidehn peneinei en Aaron.
LI, “mesenih koaros me kawahsek kapehden ine.”
LI, “emen aramas tohrohr,” me iei, emen me kaidehn mehn Lipai.
Sekel ehu kin pahrekiong 11.4 g (0.367 oz t). Kilang Ortk B14.
De “uwehte sekel sarawio.”
Kera ehu kin pahrekiong 0.57 g (0.01835 oz t). Kilang Ortk B14.
LI, “doauese.”
De “pehs me kirihsla kan,” me iei, pehs kan me direkihla kirihs en meirong kan.
Met iei likou me wiawihdahsang wunen sihpw oh kaduh nan poh ntahnmwel.
LI, “wisik en.”
Kilang KLL.
LI, neʹphesh. Kilang KLL.
LI, neʹphesh. Kilang KLL.
LI, “Irail.”
LI, “irail.”
E sansal me nan ire wet, aramas me sapwungo wiawihong melahr.
Kakete dokedoke samworo.
Eisek kis ehun ihpah kin pahrekiong 2.2 L (2 dry qt). Kilang Ortk B14.
Kilang KLL.
LI, “tepin dengemwen en tihtihla.”
LI, “tepin dengemwen en tihtihla.”
De “En wiawi! En wiawi!”
LI, “tepin denge pahn tihtihla.”
Lokaiahn Ipru na·zir′, wehwehki “Emen me Pilipilda; Emen me Inouda; Emen me Tohrohrala.”
De “kohdo karanih.”
LI, neʹphesh. Kilang KLL.
De “kasaminehla moange ni eh wia Nasaraid men.”
LI, neʹphesh. Kilang KLL.
LI, “silangi en saradahng uhk.”
LI, “kuruma me pweipweidi.”
Sekel ehu kin pahrekiong 11.4 g (0.367 oz t). Kilang Ortk B14.
De “uwehte sekel sarawio.”
De “pwohl tikitik.”
LI, “ih.”
LI, “oaloahl,” me iei, kahrehiong ren mwekid kohwei kohdo.
LI, “oaloahl,” me iei, kahrehiong ren mwekid kohwei kohdo.
LI, “oaloahl,” me iei, kahrehiong ren mwekid kohwei kohdo.
De “mesenih koaros me kawahsek kapehden ine.”
LI, “oaloahl,” me iei, kahrehiong ren mwekid kohwei kohdo.
LI, “nanpwungen nin soutik riau,” ele met wehwehki erein ahnsoun kihrlahn ketipin lao rotorotala.
LI, “nanpwungen nin soutik riau,” ele met wehwehki erein ahnsoun kihrlahn ketipin lao rotorotala.
LI, “nanpwungen nin soutik riau,” ele met wehwehki erein ahnsoun kihrlahn ketipin lao rotorotala.
LI, neʹphesh. Kilang KLL.
LI, “nin duwen arail karis en sounpei kan.”
LI, “nin duwen arail karis en sounpei kan.”
LI, “nin duwen arail karis en sounpei kan.”
LI, “nin duwen arail karis en sounpei kan.”
LI, “nin duwen arail karis en sounpei kan.”
Me iei, Sedro.
De “wia masat.”
De “nen kei pak kid kei.”
Wehwehki “Lullul,” me iei, kisiniei ehu.
E sansal me irail me kaidehn mehn Israel kan me mi nanpwungarail.
Koriander iei tuhke pwoat me were kan poh pehsehs oh pwetepwet.
Delium iei pwilin kisin tuhke pwohmwahu ehu sang ekei kisin tuhke kan me kin kekeirda nan wasa karakar kan.
LI, “ngidarpene ni mehn ngidar pilawa.”
De “ohl emen me kin apwalih seri pwelel.”
De “me ke pohnese.”
De “ei manaman.” LI, ruʹach. Kilang KLL “pneuʹma; ruʹach.”
De “sapwellimen Koht manaman.” LI, ruʹach. Kilang KLL “pneuʹma; ruʹach.”
De “sapwellimen Koht manaman.” LI, ruʹach. Kilang KLL “pneuʹma; ruʹach.”
De “tepida wiewia kokohp.”
De “manamano.” LI, ruʹach. Kilang KLL “pneuʹma; ruʹach.”
De “sapwellime manaman.” LI, ruʹach. Kilang KLL “pneuʹma; ruʹach.”
Menpihr tikitik pwonopwon men me reireiki mpen 18 cm (7 in.). Uduke kak tungoal.
Kiupid ehu kin pahrekiong 44.5 cm (17.5 in.). Kilang Ortk B14.
Ohmer ehu kin pahrekiong 220 L (200 dry qt). Kilang Ortk B14.
Ele met ong kamadahda uduk.
Wehwehki “Wasahn Seridi kan en Ineng.”
De “uhdahn aktikitik (mpahi), laudsang aramas teikan koaros.”
LI, “Nan tehnpesei pwon, e kin kadehdehda pein eh lelepek.”
LI, “Ewe ong ewe.”
De “Seoasua,” wehwehki “Siohwa Iei Komour.”
LI, “mworourou.”
LI, “tihti.”
De “wasahn pedolong en Amad.”
Wehwehki “Dunen Kreip kan.”
LI, “e kin kapwilewei milik oh sukehn loangalap.”
De “me kohsang.”
LI, “sahpw ehu me kin kapwilewei milik oh sukehn loangalap.”
LI, “pwe irail pilawa ong kitail.”
LI, “pwoaren mas ong pwoaren mas.”
LI, “duwehte emen aramas.”
De “limpoak kadek.”
LI, ruʹach. Kilang KLL “pneuʹma; ruʹach.”
De “wasa patapat pah.”
LI, “I kapahda pehiet.”
LI, “tiahk en netiki paliwar.”
De “wiahkin ie nin duwen imwintihti men.”
Lepin lokaiahn Ipru ehu me kadoadoahk wasaht pil kin pidada wiewia oh madamadau en kommwad ni sapwung, daulih en emen pwuhng, oh wia mehkot ni sohte mweimwei.
Eisek kis ehun ihpah kin pahrekiong 2.2 L (2 dry qt). Kilang Ortk B14.
Ihn ehu kin pahrekiong 3.67 L (7.75 pt). Kilang Ortk B14.
De “mwengehn.”
LI, neʹphesh. Kilang KLL.
LI, neʹphesh. Kilang KLL.
LI, neʹphesh. Kilang KLL.
LI, neʹphesh. Kilang KLL.
De “netiki paliwaramwail rehn.” Kilang KLL, “Ohlen/Lihen netiki paliwere.”
Met kakete dokedoke mwoalus okohk.
LI, “sahpw ehu me kin kapwilewei milik oh sukehn loangalap.”
De “wiahkinuhkala kaun unsek men poht.”
LI, “sahpw ehu me kin kapwilewei milik oh sukehn loangalap.”
Mwein met wehwehki me Moses men irail en idawehn ih duwehte me maskun kan.
Met kakete dokedoke mwoalus okohk.
De “sang ni nsenei.”
LI, “sarapeseng.”
LI, sheʼohl′. Kilang KLL.
LI, “sarapeseng.”
LI, sheʼohl′. Kilang KLL.
LI, “emen aramas tohrohr.”
Met kakete dokedoke mwoalus okohk.
LI, “emen aramas tohrohr,” me iei, aramas emen me kaidehn peneinei en Aaron.
LI, “emen aramas tohrohr,” me iei, aramas emen me kaidehn peneinei en Aaron.
Met iei, mehkoaros me kasarawihong Koht kohkohlahte oh sohte kak pwainda sapahl.
LI, “uduk koaros.”
Sekel ehu kin pahrekiong 11.4 g (0.367 oz t). Kilang Ortk B14.
De “sekel sarawi.”
Kera ehu kin pahrekiong 0.57 g (0.01835 oz t). Kilang Ortk B14.
Me iei, inou lap ehu me poatopoat oh sohte pahn wekila.
Mehn kaduh me kadoadoahk ong dereht wet kohsang kisin mahn me adaneki kokoas.
LI, neʹphesh. Kilang KLL.
LI, neʹphesh. Kilang KLL.
LI, neʹphesh. Kilang KLL.
LI, neʹphesh. Kilang KLL.
Wehwehki “Akamai.”
LI, “rahn.”
LI, “peh.”
Wehwehki “Kamwomwmwomwla.”
De “kisiniei.”
De “kisiniei.”
LI, “ewen.”
LI, “mohs en.”
De kakete, “sapwtehno.”
E sansal, Iupreitis.
De “sahpw.”
LI, “pwoaren mesen sampah.”
De “sahpw.”
LI, “pwoaren mesen sampah.”
LI, “dongki lih.”
LI, “kihpeseng ewen dongki lih.”
De “me kin koluhla.”
De kakete, “sapwtehno.”
LI, “mwahu mwohn silangin.”
De “sapwellimen Koht manaman.” LI, ruʹach. Kilang KLL “pneuʹma; ruʹach.”
Ahd wet dokedoke tuhke pwoat me mie soahng pwohmwahu ehu me kin kadoadoahk ong mehn kapwohmwahu ni mwehin Paipel.
De “kadaudoke.”
LI, “sang ei mohngiong.”
De “ni kaimwiseklahn rahn akan.”
De “poadidiong.”
LI, “moangen.”
LI, “mwohn ketipin.”
De “poadidiong.”
LI, “dipwisoun kaparapar en.”
LI, “sarapeseng.”
De “pahrekiong uwen tohtohn ahd kan me kileldi.”
LI, ruʹach. Kilang KLL “pneuʹma; ruʹach.”
De “wahu.”
LI, “nanpwungen nin soutik riau,” ele met wehwehki erein ahnsoun kihrlahn ketipin lao rotorotala.
Eisek kis ehun ihpah kin pahrekiong 2.2 L (2 dry qt). Kilang Ortk B14.
Ihn ehu kin pahrekiong 3.67 L (7.75 pt). Kilang Ortk B14.
LI, “nanpwungen nin soutik riau,” ele met wehwehki erein ahnsoun kihrlahn ketipin lao rotorotala.
LI, “amwail sounpwong.”
Met wehwehki me doadoahk ong mwohni sohte pahn wiawi, ahpw kuk, kaunopada ong kasarawi kan, oh soangen doadoahk tikitik en ehuehu rahn mweimwei en wiawi.
LI, “pilawa.”
Met wehwehki me doadoahk ong mwohni sohte pahn wiawi, ahpw kuk, kaunopada ong kasarawi kan, oh soangen doadoahk tikitik en ehuehu rahn mweimwei en wiawi.
En “kaloke pein emen” kin wehwehki soangsoangen keinepwi kan, iangahki kaisihsol.
LI, neʹphesh. Kilang KLL.
De “ong karis en sounpei ong.”
LI, “kid kei en Israel.”
De “ong karis en sounpei.”
De “kahnimpwal kan koaros me kelpene.”
LI, neʹphesh. Kilang KLL.
LI, “pwihnen kid en.”
Sekel ehu kin pahrekiong 11.4 g (0.367 oz t). Kilang Ortk B14.
De “onehda sapahl.”
Wehwehki “Kahnimpwal kan en Sair.”
LI, “nin duwen arail karis en sounpei kan.”
LI, “ni ar kauwada pehrail.”
Tuhke me duwehte tuhkehn oahs.
E sansal me met kamwotepen Aie-aparim.
Me iei, Sehden Mehla.
Me iei, Sehd Laud, Mediderenien.
Me iei, Mediderenien.
De “wasahn pedolong en Amad.”
Me iei, lehn Kenesaret, de Sehden Kalili.
Kiupid ehu kin pahrekiong 44.5 cm (17.5 in.). Kilang Ortk B14.
LI, neʹphesh. Kilang KLL.
LI, “me pahn dupungki nta.”
LI, neʹphesh. Kilang KLL.
LI, “ni eh awihedi.”
LI, “ni eh sohte awihedi.”
LI, neʹphesh. Kilang KLL.
LI, “au.”
LI, neʹphesh. Kilang KLL.