KERIAUN NANMWARKI

1 Mwurin Eihap eh mehla, Mohap+ ahpw uhwongada Israel.

2 Ehu rahno Ahasaia ahpw pwupwudihdohsang nanpwungen pasapas* en perehn tehnpeseo nan Sameria oh ohla. Ih eri kadarala meninkeder kei oh ndaiong irail: “Kumwail kohla oh idekda rehn Paalsepup koht en Ekron+ pwehn kadierekda ma I pahn kak mwahula sang ohla wet de soh.”+ 3 Ahpw tohnleng en Siohwa men ahpw ndaiong Elaisa*+ mehn Tispeo: “Uhda, kohla tuhwong meninkeder en Sameria ko oh ndaiong irail, ‘Ia duwe, sohte Koht nan Israel me kumwail kohkolahng peidengki rehn Paalsepup koht en Ekron?+ 4 Eri iet me Siohwa ketin mahsanih: “Ke sohte pahn kohkohsang nan omw peht me ke wonohn powehn, pwe ke uhdahn pahn mehla.”’” Elaisa eri mwesel kohkohla.

5 Ni meninkeder ko ar pwurodo reh, Ahasaia ahpw mwadangete ndaiong irail: “Dahme kumwail pwurekihdo?” 6 Re ahpw sapengki: “Mie ohl emen me kohdo tuhwong kiht oh ndaiong kiht, ‘Kumwail pwurala rehn nanmwarki me kadarkumwaildo oh ndaiong ih, “Iet me Siohwa ketin mahsanih: ‘Ia duwe, sohte Koht nan Israel me ke ileklahng peidengki rehn Paalsepup koht en Ekron? Eri, ke sohte pahn kohkohsang nan omw peht me ke wonohn powehn, pwe ke uhdahn pahn mehla.’”’”+ 7 Ahasaia eri idek rehrail: “Ia mwomwen ohl me kohdo tuhwong kumwailen oh ndaiong kumwail mahsen pwukat?” 8 Irail eri ndaiong ih: “E likawih likou reirei me wiawihkihda wunen mahn+ oh kateng kilin mahn me pirapir ni lukopeo.”+ E ahpw mwadangete nda: “Elaisa mwo mehn Tispeo.”

9 Nanmwarkio eri kadaralahng Elaisa emen kaunen meh 50 iangahki nah ohl 50. Ni eh kohdahla reh, e wie mwomwohd pohn kadoken nahnao. E ahpw ndalahng Elaisa: “Maing ohlen Koht mehlelo,+ nanmwarkio mahsanih, ‘Kohdihdo.’” 10 Ahpw Elaisa sapengki kaunen meh 50 ko: “Eri, ma ngehi ohlen Koht emen, a kisiniei en kohdihdo sang nanleng+ oh isikala kowe oh noumw ohl 50 kan.” Kisiniei pa kohdihdo sang nanleng oh isikala ih oh nah ohl 50 ko.

11 Nanmwarkio eri pwurehng kadaralahng Elaisa pil emen kaunen meh 50 iangahki nah ohl 50. E kohla oh ndaiong Elaisa: “Maing ohlen Koht mehlelo, iet me nanmwarkio mahsanih, ‘Mwadang kohdihdo.’” 12 Ahpw Elaisa sapengkin irail: “Ma ngehi ohlen Koht mehlelo, a kisiniei en kohdihdo sang nanleng oh isikala kowe oh noumw ohl 50 kan.” Sapwellimen Koht kisinieio pa kohdihdo sang nanleng oh isikala ih oh nah ohl 50 ko.

13 Nanmwarkio eri pil pwurehng kadarala kesilimen en kaunen meh 50 oh nah ohl 50. Ahpw kesilimen en kaunen meh 50 ko kohdahla oh kelepwikihdi mwohn Elaisa oh tepida peki kupwuramwahu oh nda: “Maing ohlen Koht mehlelo, komw kalahngan oh kesempwalki ei mour oh mour en noumwi ladu 50 pwukat. 14 Kisiniei kohdihdosangehr nanleng oh isikalahr kaun riemen en meh 50 oh neira pwihnen meh 50 kan, ahpw met I peki komwi en kesempwalki ei mour.”*

15 Tohnleng en Siohwa ahpw ndaiong Elaisa: “Iangih kohdihla. Ke dehr masak ih.” Ih eri uhda oh iangih kohdihla rehn nanmwarkio. 16 Elaisa eri ndaiong nanmwarkio, “Iet me Siohwa ketin mahsanih: ‘Ke kadarala meninkeder kan pwe ren peidek rehn Paalsepup koht en Ekron.+ Pwekida, pwehki sohte Koht nan Israel?+ Dahme kahrehda ke sohte peki kaweid reh? Eri, ke sohte pahn kohkohsang nan peht me ke wonohn powehn, pwe ke uhdahn pahn mehla.’” 17 Ih eri mehla, nin duwen mahsen en Siohwa me Elaisa koasoiaier; oh pwehki sohte nah pwutak, Sehoram*+ wiliandi ih wiahla nanmwarki, ni keriaun sounpar en mwehin Sehoram+ nein Seosopat, nanmwarkien Suda.

18 A duwen soahng teikan nan poadopoad en Ahasaia,+ dahme e wiadahr, e sou ntinting nan pwuhken poadopoad en nanmwarkien Israel kan?

2 Ni ahnsou me Siohwa pahn ketikidahla Elaisa+ nanleng* ni elipip ehu,+ Elaisa oh Elisa+ ahpw mweselsang Kilkal.+ 2 Elaisa ahpw ndaiong Elisa: “Menlau, mihmihte wasaht, pwehki Siohwa ketin poaroneielahng Pedel.” Ahpw Elisa ndaiong: “Nin duwen Siohwa eh ketin ieias oh pil komwi, I sohte pahn mweisang komwi.” Ira eri kodilahng Pedel.+ 3 Kadaudok en soukohp akan* nan Pedel ahpw kohieidohng Elisa oh ndaiong ih: “Ke ese me rahnwet Siohwa pahn ketikihsang omw soumaso, omw tapwi pahn kohkohsang uhk?”+ Ih eri nda: “I eseier. Kumwail dehr mweseisei.”

4 Elaisa eri ndaiong ih: “Elisa, menlau mihmihte wasaht, pwehki Siohwa ketin poaroneielahng Seriko.”+ Ahpw e nda: “Nin duwen Siohwa eh ketin ieias oh pil komwi, I sohte pahn mweisang komwi.” Ira eri kohdo Seriko. 5 Kadaudok en soukohp akan me kin mi nan Seriko ahpw keiong mpen Elisa oh ndaiong ih: “Ke ese me rahnwet Siohwa pahn ketikihsang omw soumaso, omw tapwi pahn kohkohsang uhk?” Ih eri nda: “I eseier. Kumwail dehr mweseisei.”

6 Elaisa eri ndaiong ih: “Menlau mihmihte wasaht, pwehki Siohwa ketin poaroneielahng Sordan.” Ahpw e nda: “Nin duwen Siohwa eh ketin ieias oh pil komwi, I sohte pahn mweisang komwi.” Ira eri douluhlla. 7 Oh kadaudok en soukohp 50 pil iang kohla oh re kesihnen ekis dohsang ira oh re kilikilang ira ni ara kesikesihnen limwahn Sordan. 8 Elaisa eri kihsang eh likowo*+ oh limpene oh poakiheki pihlo, pihlo ahpw kohpeseng ni palimeing oh palimaun, ira eri kotehla pohn ngalangal.+

9 Mwurinte ara kotehla pihlo, Elaisa ahpw ndaiong Elisa: “Peki rehi dahme ke men I en wiahiong uhk mwohn ei pahn wisiksang uhk.” Elisa eri nda: “I kak menlau alehdi pak riapak+ ngehn sarawi*+ me komw ahneki?” 10 E ahpw sapengki: “Soahng apwal ehu me ke pekien. Ma ke kilang ie ni ei wisiksang uhk, eri dahme ke pekien pahn pweiong uhk; ahpw ma ke sohte kilang ie, e sohte pahn wiawi.”

11 Ni ara alialu oh koasoakoasoi kohla, kuruma kisiniei ehu oh oahs kisiniei kei+ pa katohreirapeseng, oh elipipo ahpw wahdahla Elaisa nanleng.*+ 12 Ni Elisa eh kilikilang, e ahpw likwerkihla: “Semei, semei! Kuruma oh soundak oahs en Israel kan!”+ Ni eh solahr kak kilang Elaisa, e ahpw poarehng eh likou ko oh tehrpeseng wiahda riau.+ 13 Mwurin mwo e ahpw pwekada en Elaisa likou*+ me pwupwsang iho oh pwurala oh kesihnenda ni keilen Sordan. 14 Ih eri ale en Elaisa likou* me pwupwsang iho oh poakiheki pihlo oh nda: “Ia Siohwa, Koht en Elaisa?” Ni eh poakih pihlo, pihlo ahpw kohpeseng ni palimeing oh palimaun, Elisa eri kotehla.+

15 Kadaudok en soukohp ako me kin kousoan nan Seriko ar kilangada ih sang wasa doh, re ahpw nda: “Elisa alehdier ngehn sarawi* me Elaisa ahneki.”+ Irail eri kohla tuhwong ih oh poaridiong mwowe. 16 Re ndaiong ih: “Iet ohl koahiek 50 nanpwungat. Menlau mweidohng irail en kohla rapahki omw soumaso. Mweinele sapwellimen Siohwa ngehn sarawi* ketikidalahr oh mwuri kesehdiongehr pohn ehu nahnahn de nan ehu wahuwen.”+ Ahpw Elisa nda: “Dehr kadarirailla.” 17 Ahpw re ngihtehtehki ar pekipeko lao e suwedkihda, ih eri nda: “Kadarirailla.” Re ahpw kadarala ohl 50 ko, me raparapahki Elaisa erein rahn siluh ahpw sohte diar. 18 Re ahpw pwurodo rehn Elisa nan Seriko wasa me e mihmi ie.+ E ahpw ndaiong irail: “I soh ndaiong kumwail en dehr kohla?”

19 Kedekedeo, aramas akan en kahnimwo eri ndaiong Elisa: “At soumas kak kilang me kahnimw wet mihmi wasa mwahu;+ ahpw pihl me sakanakan, oh sahpwet sohte kin wa.”* 20 E ahpw nda: “Kumwail wadohng ie ehu kisin pwohl kapw oh kihong soahl loale.” Irail eri wadohng pwohlo. 21 Ih eri kohieila ni utuhnpihlo oh kesehdiong soahl loale+ oh nda: “Iet me Siohwa ketin mahsanih, ‘I kamwahwihalahr pihlet. E solahr pahn kahrehda mehla de kahrehiong sahpwo en sohla wa.’”* 22 Oh pihlo mwakelekella leledo rahnwet, nin duwen mahsen en Elisa.

23 Elisa ahpw kohdahla Pedel sang wasao. Ni eh kekeid nanialo, ekei pwutak kan ahpw kohieido sang nan kahnimwo oh tepida kapailoke+ oh ndindaiong: “Kohkohdahla, moangamad! Kohkohdahla, moangamad!” 24 Ih eri sohpeila oh kilenglahng irail oh kerieirailla ni mwaren Siohwa. Pehr lih riemen+ ahpw kohieido sang nanwelo oh tehrpeseng seri 42 rehrail.+ 25 E ahpw douluhlsang mwo kohla Nahna Karmel,+ oh sang wasao e pwurala Sameria.

3 Sehoram+ nein Eihap wiahla nanmwarkien Israel nan Sameria ni kaeisek waluhn sounpar en Nanmwarki Seosopat en Suda, oh e kakaunki erein sounpar 12. 2 E kin wia dahme suwed mwohn silangin Siohwa, ahpw e sohte suwed duwehte eh pahpa de nohno, pwe e kihsang uhr sarawi en Paal me eh pahpao wiahda.+ 3 Ahpw e wiewiahte dihp kan me Seropoham nein Nepat kahrehiong Israel en wiahda.+ E sohte tokedihsang.

4 Mesa nanmwarkien Mohap kin apwalihada sihpw kan, oh e kin kihong nanmwarkien Israel sihmpwul 100,000 oh sihpw wol 100,000 me saikinte seiseisang wune nin duwen kisakis.* 5 Mwurinte Eihap eh mehla,+ nanmwarkien Mohap uhwongada nanmwarkien Israel.+ 6 Eri ahnsowo, Nanmwarki Sehoram kohieila sang Sameria oh kapokonepene Israel pwon. 7 E pil ileklahng Nanmwarki Seosopat en Suda, ndinda: “Nanmwarkien Mohap uhwongiehda. Komw pahn iang ie ketila mahweniong Mohap?” Seosopat ahpw sapengki: “I pahn patohwei.+ I pahn iang komwi ketila iangahki nei aramas akan oh nei oahs akan.”+ 8 Ih eri idek: “Mehnia ahl me kitail pahn keid ie?” E sapengki: “Ni ahl en sapwtehn en Edom.”

9 Nanmwarkien Israel eri kohieila iangahki nanmwarkien Suda oh nanmwarkien Edom.+ Mwurin arail seiseiloangki erein rahn isuh, solahr pihl ong karis en sounpei kan oh mahn akan me ideidawehn irail. 10 Nanmwarkien Israel ahpw nda: “Meid suwed! Siohwa ketin malipeikitaildo, kitail nanmwarki silimen, pwehn ketikihong kitail nan pehn nanmwarkien Mohap!” 11 Seosopat ahpw nda: “Sohte soukohp en Siohwa men wasaht pwe kitail en kak kalelapak rehn Siohwa?”+ Emen ladu en nanmwarkien Israel ahpw sapengki: “Elisa+ nein Sapad me mi wasaht, ih me kin wudekihdiong pihl pohn pehn Elaisa.”*+ 12 Seosopat eri nda: “Mahsen en Siohwa kin mi reh.” Nanmwarkien Israel oh Seosopat oh nanmwarkien Edom eri kohdihla reh.

13 Elisa ahpw ndaiong nanmwarkien Israel: “Dahme komw kohkihdo rehi?*+ Kohla rehn nein semomwo soukohp ko oh nein inomwo soukohp ko.”+ Ahpw nanmwarkien Israel ndaiong ih: “Ke dehr nda men, pwe Siohwa me ketin malipeikitodo, kiht nanmwarki silimen, pwehn ketikihong kiht nan pehn nanmwarkien Mohap.” 14 Elisa eri nda: “Nin duwen Siohwa kaunen karis en sounpei me I kin papah* eh ketin ieias, ma I sohte wauneki Nanmwarki Seosopat+ en Suda, I sohte pahn kilang komwi de tehk komwi.+ 15 Eri wadohng ie emen sounkesengen.”+ Ni ahnsowohte me sounkesengo tepida kesengki nah arpo, limen Siohwa ahpw kohdiong powe.+ 16 Elisa ahpw nda: “Iet me Siohwa ketin mahsanih: ‘Kumwail weirada warawar tohto nan wahu wet, 17 pwe iet me Siohwa ketin mahsanih: “Kumwail sohte pahn kilang kisinieng, oh kumwail sohte pahn kilang keteu; ahpw wahu wet pahn direkihla pihl, oh kumwail pahn nimpil sang loale,+ kumwail, noumwail pelinmen, oh noumwail mahn teikan.”’ 18 Ahpw met mehkot mengei ong Siohwa,+ pwe e pil pahn ketikihong Mohap nan pehmwail.+ 19 Kumwail anahne kalowehdi kahnimw kehl kehlail kan koaros+ oh kahnimw kesempwal kan koaros, kumwail pahn pelehdi tuhke mwahu koaros, kumwail pahn pinahla utuhnpihl koaros, oh kumwail pahn kauwehkihla sahpw mwahu koaros takai kan.”+

20 Oh nimensengo, ni ahnsoun meirong en krein* nimenseng,+ pihl pa pwildohsang pali Edom, oh sahpwo direkihla pihl.

21 Mehn Mohap kan koaros rongada me nanmwarki ko kodohng peiong irail, eri re kapokonepene ohl koaros me kak wa tehtehn pei kan,* irail eri koasoaneiraildi ni irepen sapwarailo. 22 Ni ar sangkenei pirida nimensengo, ketipin wie linglingaling pohn pihlo, oh pihlo weitahta likamwete nta ong mehn Mohap ko ni pali teio. 23 Re ahpw nda: “Nta mwo! Nanmwarki ko kemehkilahr emenemen kedlahs. Eri Mohap, kohla ale dipwisou lohdi kan!”+ 24 Ni ar kohla nan kahnimpwal en Israel, mehn Israel ko ahpw uhda oh tepida kemehla mehn Mohap ko, oh re tangasang irail.+ Mehn Israel ko pedolong nan Mohap, kemekemehla mehn Mohap ko ni ar kohkohwei. 25 Re karangkehdi kahnimw kan, oh emenemen ohl ako ahpw kesehdiong takai nan sahpw mwahu kan koaros, oh re kadirehkihla sahpw ko takai kan; re pinahla utuhnpihl koaros,+ oh re pelehdi tuhke mwahu koaros.+ Eri ihte kehl takai en Kir-aresed+ me mihmihte, oh irail ako me kin peiki pahi ahpw kapilpene kahnimwo oh mahweniong.

26 Ni ahnsou me nanmwarkien Mohap tehkada me e lohdier nan mahweno, e ahpw kihpene sounpei 700 me kin wisik kedlahs pwe ren kotehla karis en sounpei ko kolahng nanmwarkien Edom;+ ahpw re sohte kak. 27 Ih eri ale nah pwutak mesenih me pahn wiliandi ih kakaun oh meirongkihla nin duwen meirong isihs+ pohn kehlo. Oh aramas ako* uhdahn lingeringerda pahn Israel, irail eri pweiekla sang reh oh pwuralahng nan sapwarail.

4 Lih emen me eh pwoudo kisehn kadaudok en soukohp ako*+ ahpw likwerlahng Elisa, oh nda: “Maing, ei pwoud noumw laduwo melahr, oh komw kin mwahngih me noumw ladu menet kin lemmwiki Siohwa ahnsou koaros.+ Eri met, ohl emen me e pweipwandohng ahpw kohdo pwehn kihsang nei seri riemen pwehn wiahkihla nah lidu.” 2 Elisa ahpw ndaiong liho: “Dahme I kak wiahiong uhk? Ndaiong ie, dahme mie nan imwomwo?” A liho sapengki: “Sohte mehkot nan imwen noumw ladu menet ihte sahen leh ehu.”+ 3 Ih eri nda: “Kohieila likio, peki rehn mehn mpomw kan koaros sah kan, sah me sohte kanenge. Ale sah tohto uwen me ke kak. 4 Eri, kowe oh noumw pwutak kan pahn pedolong nan imwamwailo oh ritingedi wenihmwo. Audehda sah pwukat koaros, oh katohrehla me audaudahr ko.” 5 Liho eri kohkohsang ih.

Ni ahnsou me ih oh nah pwutak ko pedolong nan imwarailo oh ritingedi wenihmwo, pwutak ko eri kin dendelingekidohng reh sah ko, ih eri kin audaude.+ 6 Ni sah ko ar dirala, liho ahpw ndaiong emen nah pwutak ko: “Wadohng ie pil ehu sahen.”+ Ahpw e ndalahng liho: “Solahr sah.” Ahnsowohte leho ahpw sohla pwilipwildi.+ 7 Liho eri kohla oh ndaiong ohlen Koht mehlelo, oh ohlo ahpw nda: “Kohla, netikihla leho oh pwainla omw pweipwand kan, oh kowe oh noumw pwutak kan kak momourki dahme luhwehdi.”

8 Rahn ehu Elisa ahpw kohla Sunem,+ wasa me lih ndand men kin mihmi ie, oh liho ngidingidkihong en iang tungoal wasao.+ Ahnsou koaros me Elisa kin keid wasao, e kin uhdi pwehn tungoal. 9 Liho eri ndaiong eh pwoudo: “I ese me ohl menet me kin kalapw keidido wasaht iei ohl sarawi en Koht men. 10 Menlau, kita wiahda kisin pere ehu pohn ihmwo+ oh kihdiong peht, tehpel, sehr oh dewen lamp wasao. Eri, ahnsou koaros me e kin kohdo rehta, e kak kommoal wasao.”+

11 Rahn ehu Elisa ahpw kohdo wasao, oh e kohla nan pere me mi pohn ihmwo pwehn wendi. 12 Ih eri ndaiong Keasi+ nah sounpapaho: “Ekerodo lih en Sunemo.”+ Eri e ekerodo liho, oh liho kohdo reh. 13 Elisa eri ndaiong Keasi: “Menlau ndaiong liho, ‘Ke wiadahr tounmetei pwukat koaros ong kiht.+ Dahme I kak wiahiong uhk?+ I en koasoikin uhk rehn nanmwarki+ de rehn kaunen karis en sounpeio?’” Ahpw liho sapengki: “I kin nsenamwahu ni ei kin kousoan nanpwungen ei aramas kan.” 14 Elisa eri nda: “Dahme I kak wiahiong liho?” Keasi eri nda: “Sohte nah pwutak,+ oh eh pwoudo likeilapalahr.” 15 Ni ahnsowohte Elisa ahpw nda: “Ekerodo liho.” Keasi eri ekerodo liho oh e kohdo kesihnenda ni wenihmwo. 16 Elisa eri nda: “Ni soangen ahnsou wet nan sounpar kohkohdo, ke pahn ropworopwohnge kisin pwutak emen.”+ Ahpw liho nda: “Soh, ei soumas, ohlen Koht mehlelo! Komw dehr kihong ie koapworopwor likamw.”

17 Ahpw, liho liseianda oh naitikihada pwutak emen ni soangen ahnsowohte nan pahr en mwurio, duwehte me Elisa ndaiong ih. 18 Serio eri laudla, oh ehu rahno e ahpw kohieila rehn eh pahpao me mihmi rehn soundondol kan. 19 E kin ndindahng eh pahpao: “I moangmedek, I moangmedek!” Eh pahpao eri ndalahng sounpapaho: “Wahla ih rehn eh nohno.” 20 Sounpapaho eri kapwurehla pwutako rehn eh nohno, oh pwutako ahpw mwohndi pohn kepen liho lao lel nin souwas, ih eri mehla.+ 21 Liho eri kohdahla oh kaunehdiong pwutako pohn en ohlen Koht mehlelo+ pehto, ih eri ritingedi wenihmwo oh pedoila. 22 Ih eri ekerodo eh pwoudo oh nda: “Menlau kadarodo rehi emen sounpapahn oh emen dongkien, oh mweidohng ie I en mwadang kohla rehn ohlen Koht mehlelo oh pwurodo.” 23 Ahpw ohlo nda: “Dahme ke pahn tuhkihong ih rahnwet? Kaidehn rahnen maram pwul+ de sapad.” Ahpw liho nda: “Soahng koaros mwahu.” 24 Liho eri kaunopada dongkio oh ndaiong nah sounpapaho: “Nna, katanga marahra. Ke dehpa wawaila pwehki ngehi, lao I ndawei.”

25 Ih eri kohla rehn ohlen Koht mehlelo me mi ni Nahna Karmel. Ni ohlen Koht mehlelo eh kilenglahte kilangada liho sang wasa doh, e ahpw ndaiong Keasi nah sounpapaho: “Kilang! Lih en Sunemo mwo. 26 Menlau tangewei reh oh idek reh, ‘Ia iromw, komw mwahu? Omw pwoudo mwahu? Noumw serio mwahu?’” Liho ahpw sapengki: “Soahng koaros mwahu.” 27 Ni liho eh leledo rehn ohlen Koht mehlelo ni nahnao, e ahpw poaralahngete koledi neh ko.+ Keasi ahpw keilahng mpe pwehn sikenla ih, ahpw ohlen Koht mehlelo nda: “Dehr kedirepwe lihet, pwe e nsensuwed laud, oh Siohwa ketin ekihsang ie met oh sohte ketin mahsanihong ie.” 28 Liho eri nda: “Ia duwe, ngehi me pekihda rehn ei kaun pwutak emen? I sou nda, ‘Komw dehr kihong ie koapworopwor likamw’?”+

29 Elisa ahpw mwadangete ndaiong Keasi: “Pirehdi omw likou kan ni lukopomwen+ oh ale nei sokono oh kohla. Ma ke pahn tuhwong aramas emen, dehr rahnmwahwih; oh ma mehmen pahn rahnmwahwihiuk, dehr sapeng. Kohwei oh kihdiong nei sokono pohn mesen pwutako.” 30 En pwutako nohno ahpw nda: “Nin duwen Siohwa eh ketin ieias oh pil komwi, I sohte pahn mweisang komwi.”+ Elisa eri uhda oh iang liho kohla. 31 Keasi tiengla mwohra oh kihdiong sokono pohn mesen pwutako, ahpw sohte mwomwen mour kis reh.+ E ahpw pwurala tuhwong Elisa oh ndaiong ih: “Pwutako sohte pirida.”

32 Ni Elisa eh pedolong nan ihmwo, pwutako wonohn pohn eh pehto, melahr.+ 33 E pedolong oh ritingedi wenihmwen pereo. Irahte me mi nan pereo, e ahpw kapakapohng Siohwa.+ 34 Elisa eri doudahng pohn pehto oh wendiong pohn serio oh kainenehdiong ewe pohn ewen pwutako, mese ko pohn mese ko, oh peh ko pohn peh ko oh idihdang ih, oh paliweren serio ahpw tepida karakarada.+ 35 Elisa eri aluseli nan ihmwo, oh pwurehng doudahng pohn pehto oh idang serio. Pwutako eri asi pak isuh, mwurin mwo e ahpw pehdpeseng.+ 36 Elisa eri ekerodo Keasi oh nda: “Ekerodo lih en Sunemo.” Ih eri ekerodo liho, liho eri kohla rehn Elisa. Elisa ahpw nda: “Pwekada noumw pwutaken.”+ 37 Liho eri pedolongala oh kelepwikihdiong ni neh ko oh poaridiong mwowe, mwurin mwo e ahpw pwekada nah pwutako oh pedoila.

38 Ni Elisa eh pwuralahng Kilkal, lehk lapalap ehu ahpw kipehdi sahpwo.+ Kadaudok en soukohp ako+ wie mwomwohd mwowe, oh e ndaiong nah sounpapaho:+ “Kihda einpwoat lauden pohn kisinieien oh wiahda suhpw ong kadaudok en soukohp ako.” 39 Emen irail ahpw kohieila nan mohso pwehn dar tehndipw, oh e diarada tuhke kord* en nanwel oh dolungada wah kan, audehkihda eh likowo. E ahpw pwurala oh serediong nan einpwoat en suhpwo, ni eh sehse dahkei mwo. 40 Mwuhr re toukada suhpwo pwe ren tungoale, ahpw ni ahnsowohte me re tungoale suhpwo, re ahpw werkihda: “Maing ohlen Koht mehlelo, mie pwoisin nan einpwoatet.” Oh re sohla kak tungoale. 41 Elisa eri nda: “Wahdo ekis pilawa amasen.” Ih eri kesehdiong nan einpwoato oh nda: “Nehkohng aramas akan suhpwen.” Oh sohla mehkot keper nan einpwoato.+

42 Ohl emen ahpw kohdo sang Paal-salisa,+ oh e wadohng ohlen Koht mehlelo lopwon en pilawa parli 20+ me wiawihda sang tepin dondol en parli kan, iangahki ehd en krein kapw ehu.+ Elisa eri nda: “Kihong aramas akan pwe ren tungoale.” 43 Ahpw, nah sounpapaho nda: “Ia duwen ei kak pwil met mwohn aramas 100?”+ Elisa eri nda: “Kihong aramas akan pwe ren tungoale, pwe iet me Siohwa ketin mahsanihen, ‘Re pahn tungoale oh e pahn mie luhwe.’”+ 44 Sounpapaho eri kihdiong mwohrail, oh re tungoale oh pil mie luhwarail,+ duwehte me Siohwa ketin mahsanih.

5 Nahman kaunen karis en sounpei en nanmwarkien Siria wia ohl lapalap men me eh kauno kin kesempwalki, pwehki Siohwa kin ketikihong Siria kana* sang reh. Ih sounpei kehlail men, ahpw e wia ohl tokutok men.* 2 Nan ehu ar pei ko, mehn Siria kan wahsang nan sapwen Israel kisin serepein kis me wiahla lidu en ahn Nahman pwoudo. 3 Serepeino eri ndaiong eh lih soumaso: “Ma ei kaun pahn kohla rehn soukohpo+ nan Sameria! E pahn kamwahwihala eh tokutoko.”+ 4 Ih* eri kohla rehn eh kauno oh kairehki ih dahme serepein en Israelo ndao.

5 Nanmwarkien Siria eri nda: “Kohla met! Oh I pahn kadarohng nanmwarkien Israel ehu kisinlikowen.” Nahman eri mweselda, oh e wa silper dalend* eisek, mwohni kohl 6,000 oh likou kaselel eisek. 6 E walahng nanmwarkien Israel kisinlikowo me koasoia: “I kadarewei nei ladu Nahman me patohwanwei kisinlikou kiset pwe komwi en kamwahwihala eh tokutok.” 7 Ni ahnsowohte me nanmwarkien Israel wadek kisinlikowo, e ahpw tehrpeseng eh likowo oh nda: “Dah ngehi Koht, me sapwellimanki manaman en kemehla oh komourala aramas?+ E kadarodohng ie ohl menet, ndinda I en kamwahwihala eh tokutok! Kumwail kak kilang duwen eh songosong en akamaiong ie.”

8 Ahpw ni Elisa ohlen Koht mehlelo eh rongada me nanmwarkien Israel tehrpeseng eh likowo, e ahpw mwadangete kadaralahng pakair wet rehn nanmwarkio: “Dahme komw ketin tehrkipeseng sapwellimomwi likowen? Komw kalahngan oh ketin kadarodohng ie ohl menen pwe en ese me mie soukohp men nan Israel.”+ 9 Nahman eri kohla iangahki were oahs kan oh were kurumahn mahwen kan oh uh ni wasahn pedolong en imwen Elisao. 10 Ahpw, Elisa kadarala meninkeder men en ndaiong ih: “Kohwei duhdu pak isuh+ nan Sordan,+ oh kilimwen* pahn pwurehng mwahula oh ke pahn mwakelekella.” 11 Nahman ahpw lingeringerda oh alialuhla, ndinda: “I kihkihong me e pahn kohieido rehi oh kesihnenda wasaht oh likweriong mwaren Siohwa eh Koht oh katanga peho pohn tokutoko pwehn kamwahwihala. 12 Pillap en Damaskus+ kan, Apana oh Parpar, sou mwahusang pihl en Israel kan koaros? I sou kak duhduhte nan pillap pwukat oh mwakelekella?” Ih eri sohpeila oh kohkohla ni eh lingeringer.

13 Nah ladu ko ahpw keiong mpe oh nda: “Semei, ma soukohpo patohwanohng komwi en wia mehkot apwal, komw sou pahn wia met? Ahpw ihte me e patohwanohng komwi, ‘Duhdu oh mwakelekelda.’ Met sou mengei?” 14 Ih eri kohdihla oh duhdi nan* Sordan pak isuh, nin duwen me ohlen Koht mehlelo ndaiong.+ Kilio eri mwahula duwehte kilin kisin pwutak men,+ ih eri mwakelekelda.+

15 Mwurin mwo e ahpw pwurala rehn ohlen Koht mehlelo,+ ih oh nah sounpei ko koaros, oh e kesihnenda mwowe oh nda: “Met I eseier me sohte Koht emen nan sampah pwon ahpw ihte nan Israel.+ Eri komw kupwurkalahngan oh ale kisakis* wet sang sapwellimomwi laduet.” 16 Ahpw Elisa nda: “Nin duwen Siohwa me I kin papah* eh ketin ieias, I sohte pahn ale kisakis wet.”+ Nahman ngidingidkihong en ale, ahpw Elisa kin soikala. 17 Nahman eri nda: “Ma soh, a komw kalahngan oh mweidohng sapwellimomwi ladu menet en wahda pwehl en sahpwet ni uwen me dongki riemen kak wahda, pwe sapwellimomwi ladu menet solahr pahn wiahda meirong isihs de meirong ehu ong koht teikan likin Siohwa. 18 Ahpw, Siohwa en ketin mahkikihong sapwellimomwi laduet mehkotet: Ni ei kaun eh kin ketilongala nan imwen kaudok en Rimmon pwehn poaridi wasao, e kin kol pehie, kahrehda I anahne poaridi nan imwen Rimmon. Ni ei poaridi nan imwen Rimmon, Siohwa en ketin kalahngan oh mahkohng sapwellimomwi ladu menet.” 19 Elisa eri ndaiong ih: “Kohkohwei ni popohl.” Mwurin Nahman eh mweselsang Elisa oh ekis dohla, 20 Keasi,+ nein Elisa ohlen Koht mehlelo sounpapaho,+ ahpw mengimengloalki: ‘Ei soumaso mweidala mehn Siria menet Nahman+ en kohkohla, ni eh sohte alehsang reh mehkot me e wahdo. Nin duwen Siohwa eh ketin ieias, I pahn pwakih oh alehsang mehkot reh.’ 21 Keasi eri pwakih Nahman. Ni Nahman eh kilangada aramas emen eh tangatang kolahng reh, e ahpw doudihsang pohn were kurumao pwehn tuhwong oh nda: “Soahng koaros mwahu?” 22 Keasi eri nda: “Soahng koaros mwahu. Ei soumaso kadariehdo, patohwan: ‘Kilang! Mwahnakapw riemen me kisehn kadaudok en soukohp akan* ahpwtehn kohdo rehi sang wasa nahnahn Epraim kan. Menlau, komw kihong ira silper dalend ehu oh likou kaselel riau.’”+ 23 Nahman eri nda: “Me mwahu, ale dalend riau.” E kin ngidingidkihong en ale,+ ih eri kihong silper dalend riau oh likou kaselel riau nan ehd riau, oh kihong nah sounpapah riemen, oh ira kapaikada oh tiengla mwohn Keasi.

24 Ni Keasi eh lella Opel,* e kihsang ira ehd ko oh kihdi nan ihmwo oh kadarirahla. Mwurin ara kohkohla, 25 e ahpw kohlongala oh kesihnenda limwahn eh soumaso. Elisa eri ndaiong ih: “Keasi, ke kohsang ia?” Ahpw e nda: “Sapwellimomwi ladu menet sohte kohla wasa kis.”+ 26 Elisa ahpw ndaiong: “Ke medewe me I sehse me ke pwakihewei ohlo oh e lusdihsang pohn were kurumao pwe en tuhwong uhk? Dah, met ahnsoun ale silper de ale likou de mwetin olip de mwetin kreip de sihpw de kou de ladu ohl de lih?+ 27 Eri met en Nahman tokutoko+ pahn douwong uhk oh kadaudokomw kan kohkohlahte.” Ni ahnsowohte Keasi ahpw tokutokda, pwetepwet duwehte sinoh. Ih eri kohkohlahsang mwohn Elisa.+

6 Kadaudok en soukohp ako*+ ahpw ndalahng Elisa: “Kilang! Wasa me se kin mihmi rehmwo, me nohn tikitik ong kitail. 2 Menlau mweidohng kiht sen kohla Sordan. Emenemen kiht pahn ale tuhke sang wasao oh wiahda wasa me se kak kousoan ie.” Elisa eri nda: “Nna kohla.” 3 Emen irail ahpw nda: “Komw kak menlau iang kiht* kohla?” A e nda: “I pahn iang.” 4 Ih eri iangirailda, oh re lella Sordan oh tepida pelehdi tuhke kan. 5 Ni emen irail eh pelepele tuhke pwoat, moangen sileo pa pwupwudihla nan pihlo, oh e werkihda: “Maing ei soumas, kaidehn nei sileo, I pekihda!” 6 Ohlen Koht mehlelo ahpw nda: “Ia wasa e pwupwudi ie?” Ih eri kasalehiong ih wasao. Elisa eri lupukada kisin lepin tuhke kis oh kesedilahng wasao oh kahrehiong moangen sileo en peida. 7 Ih eri nda: “Pwekada.” Ohlo eri kapahla peho oh pwekada.

8 Nanmwarkien Siria eri kohla mahweniong Israel.+ Ih oh nah lapalap akan koasoipene oh e ndaiong irail wasa me re pahn kauwada imwarail impwal kan ie. 9 Ohlen Koht mehlelo+ ahpw kadarala pakair ehu ong nanmwarkien Israel, nda: “Komw kanahieng, komw dehr ketila wasaht, pwehki ih wasaht me mehn Siria kan kohkohdihdo ie.” 10 Nanmwarkien Israel ahpw ileklahng aramas akan me kin kousoan wasa me ohlen Koht mehlelo kaparki ih. E kin usehlahte kaparki ih duwen met, oh nanmwarkio kin soikala wasao pak kei.*+

11 Met kalingeringerihada nanmwarkien* Siria, ih eri kapokonepene nah lapalap akan oh ndaiong irail: “Kumwail ndaiong ie! Ihs nanpwungatail me iangalahr nanmwarkien Israel?” 12 Emen nah lapalap ako ahpw nda: “Maing ei kaun nanmwarki, kaidehk kiht! Iei Elisa, soukohpo me mi nan Israel me kin patohwanohng nanmwarkien Israel soahng kan me komw kin mahsanih nan sapwellimomwi perehn seimwok.”+ 13 Ih eri nda: “Kumwail kohla oh rapahki wasa me e mi ie, pwe I en kadarewei aramas en salihedi.” Mwuhr pakair ehu ahpw kolahng ih: “E mihmi nan Dodan.”+ 14 E ahpw mwadangete kadarala oahs oh kurumahn mahwen kan wasao, iangahki lapalahn karis en sounpei ehu; irail lella wasao nipwong oh kapilpene kahnimwo.

15 Ni nein ohlen Koht mehlelo sounpapaho eh sangkenei pirida oh kohieila likio, e ahpw kilangada me karis en sounpei ehu iangahki oahs kan oh kurumahn mahwen kan kapilpenehr kahnimwo. Ni ahnsowohte sounpapaho ndaiong ih: “Maing ei soumas! Dahme kita pahn wia?” 16 Elisa ahpw nda: “Ke dehr masak!+ Pwe me iang kita tohtohsang me iang irail.”+ 17 Elisa eri tepida kapakap oh patohwan: “Maing Siohwa, komw kupwurkalahngan oh ketin kapehdpeseng mese pwe en kilang.”+ Ni ahnsowohte me Siohwa ketin kapehdpeseng mesen sounpapaho oh e kilengla, a kilang! wasa nahnahn kan ahpw direkihla oahs oh kurumahn mahwen kisiniei kan+ me kapilpene Elisa.+

18 Ni mehn Siria kan ar kohdihdo reh, Elisa ahpw kapakapohng Siohwa oh patohwanohng: “Komw kupwurkalahngan oh ketin karotongehla mesen aramas pwukat.”*+ Ih eri ketin karotongehla masarail ko duwen me Elisa pekidahr. 19 Elisa eri ndaiong irail: “Kaidehkin ih ahlo met, oh kaidehkin ih kahnimwo met. Idawehniehdo oh I pahn kahreikumwaillahng rehn aramaso me kumwail raparapahki.” Ahpw, e kahreiraillahng Sameria.+

20 Ni ar lella Sameria, Elisa ahpw patohwan: “Maing Siohwa, komw ketin kapehdpeseng masarail kan pwe ren kilang.” Siohwa eri ketin kapehdpeseng masarail ko, oh re kilangada me re mihmi nan Sameria. 21 Ni nanmwarkien Israel eh kilangirailda, e ahpw ndaiong Elisa: “Semei, I en kemeirailla, I en kemeirailla?” 22 Elisa ahpw nda: “Komw dehr kemeirailla. Ia duwe, komw pahn kemehla irail kan me komw kalowehkihdi sapwellimomwi kedlahs oh kesik ketieu? Komw katungoalehkin irail pilawa oh pihl, pwe ren tungoale oh nim+ oh pwuralahng rehn arail kaun.” 23 Nanmwarkio eri wiahiong irail lapalahn kamadipw ehu, oh re tungoal oh nim, mwurin mwo e kadarirailla pwe ren pwurala rehn arail kaun. Oh pwihnen loallap en mehn Siria kan+ sohla pwurehng kohla nan sapwen Israel.

24 Mwuhr Penadad nanmwarkien Siria ahpw kapokonepene nah karis en sounpei* koaros oh kohdahla oh kapilpene Sameria.+ 25 Lehk lapalap ehu ahpw wiawi+ nan Sameria, oh irail kapilpene wasao lao moangen dongki emen+ kin netila ni mwohni silper 80, oh pahkis ehun sosohng en kap* en pwisehn mwuroi kin netila ni mwohni silper 5. 26 Ni nanmwarkien Israel eh alialu pohn kelen kahnimwo, lih emen ahpw werkilahng ih: “Maing ei kaun, nanmwarki, komw ketin sewese kiht!” 27 E ahpw sapengki: “Ma Siohwa sohte ketin seweseiuk, ia wasa I kak kihsang ie sawas ong uhk? Sang ni wasahn kihsang kilin krein? De sang ni wasahn tiak kreip de olip?” 28 Nanmwarkio ahpw idek reh: “Dahme wiawihong uhk?” Liho ahpw sapengki: “Lih menet ndaiong ie, ‘Kihdo noumw pwutaken, oh kita pahn kangala ih rahnwet a kita pahn kangala nei pwutako lakapw.’+ 29 Eri se pwoailihada nei pwutako oh kangala.+ Mandahn rahno I ndaiong ih, ‘Kihdo noumw pwutaken, pwe kita en kangala.’ Ahpw e ekihla nah pwutako.”

30 Ni ahnsowohte me nanmwarkio rongada en liho lokaia ko, e ahpw tehrpeseng eh likowo.+ Ni eh alu pohn kehlo, aramas akan kilang me e likawih likoun nsensuwed* masloalen eh likou ko. 31 Ih eri nda: “Eri Koht en ketin kaloke ie oh pil wia laudsang met, ma moangen Elisa nein Sapad sohte lupsang rahnwet!”+

32 Elisa mwomwohd nan imweo, oh ohl mah kan mwomwohd reh. Nanmwarkio ahpw kadarala meninkeder men mwowe, ahpw mwohn meninkedero eh lella, Elisa ndaiong ohl mah ko: “Kumwail kilangehr nein sounkam aramas menet+ eh kadarodohr emen en lupukasang moangeiet? Kumwail kanahieng ni meninkedero eh leledo, ritingedi wenihmwen oh idangewei pwe e de pedolong. Kaidehn ngilen kahk en eh kauno me kohkohdo mwurin ih?” 33 Ni eh koasoakoasoiong irail, meninkedero pa leledo reh, oh nanmwarkio pil leledo oh nda: “Kahpwal wet kohsang rehn Siohwa. Dahme kahrehda I en awiawih Siohwa?”

7 Elisa eri nda, “Kumwail rong mahsen en Siohwa. Iet me Siohwa ketin mahsanih: ‘Soangen ahnsou wet lakapw, ni ewen kehl* en Sameria, sia* ehu en pilawa amas mwahu pahn netila ni sekel* ehu, oh sia riau en parli pahn netila ni sekel ehu.’”+ 2 Opiser men me nanmwarkio kin likih ahpw ndaiong ohlen Koht mehlelo: “Mehnda ma Siohwa pahn ketin ritingada ewen kehl en pihl en nanleng, ia duwe, met* kak wiawi?”+ Elisa ahpw sapengki: “Ke pahn kilangki met mesomwen,+ ahpw ke sohte pahn tungoale.”+

3 Mie ohl tokutok pahmen ni wasahn pedolong en ewen kelen kahnimwo,+ oh irail ndapene: “Ia kahrepen atail pahn mwomwohd wasaht lao kitail mehla? 4 Ma kitail nda, ‘Kitail kohlongala nan kahnimwo,’ ni lehk lapalap eh wiawi nan kahnimwo,+ kitail pahn mehla. Oh ma kitail mwomwohd wasaht, kitail pahn pil mehla. Eri met, kitail pahn kohla nan kahnimpwal en mehn Siria kan. Ma re mweidohng kitail en mour, kitail pahn mour, ahpw ma re kemeikitailla, eri kitail pahn mehla.” 5 Irail ahpw uhda nin soutik ni eh rotorotala oh kohlongala nan kahnimpwal en mehn Siria ko. Ni ar lel ni irepen kahnimpwal en mehn Siria ko, sohte aramas emen wasao.

6 Siohwa ketin kahrehiong kahnimpwal en mehn Siria ko ren rong ngilen kurumahn mahwen oh oahs kan, ngilen lapalahn karis ehu.+ Irail eri ndapene nanpwungarail: “Kilang! Nanmwarkien Israel pwain nanmwarkien Id kan oh nanmwarkien Isip kan pwe ren mahweniong kitail!” 7 Irail eri mwadangete uhda oh tangdoaui nan rotorot en nin soutiko, re kesehla imwarail impwal kan, oahs kan, dongki kan oh kahnimpwalo pwon, oh re tang repen mour.*

8 Ni ohl tokutok ko ar lella ni irepen kahnimpwalo, re ahpw pedolong nan ehu impwal ko oh tepida mwenge oh nim. Re wahsang silper, kohl oh likou kan wasao oh kohla ekihla. Mwuri re ahpw pwurala oh pedolong nan ehu impwal tohrohr oh wahsang dipwisou kan wasao oh kohla ekihla.

9 Re ahpw ndapene nanpwungarail: “Sapwung ehu me kitail wiewiaht. Rahnwet rahnen rohng mwahu ehu! Ma kitail sohte mweseisei oh awiawih lao lel nin sohrahn, kitail uhdahn pahn ale kalokolok. Nna kitail kohla oh pakairki met ni tehnpesen nanmwarkio.” 10 Irail eri kohla oh likwerlahng silepen ewen kelen kahnimw ko oh pakairkilahng irail: “Se pedolongala nan kahnimpwal en mehn Siria ko, ahpw sohte aramas emen wasao—sohte mwahn ngilen aramas. Ihte oahs kei oh dongki kei me wie sensel oh impwal kan mihmihte wasao.” 11 Ni ahnsowohte silepen ewen kehl ko ahpw pakairkihong aramas ako nan tehnpesen nanmwarkio rohng wet.

12 Nanmwarkio ahpw mwadangete pirida nipwongo oh ndaiong nah lapalap ako: “Menlau I pahn ndaiong kumwail dahme mehn Siria ko koasoakoasoane. Re ese me kitail duhpek,+ eri re kohkohsang kahnimpwalo pwe ren rukula nan mohso, ndinda, ‘Re pahn pedoisang nan kahnimwo oh kitail pahn koliraildi ni ar momour oh pedolong nan kahnimwo.’”+ 13 Emen nah lapalap ako ahpw nda: “Komw kalahngan oh ketin mweidohng ekei ohl akan ren wahda oahs limmen sang rehn me luhwehdi ko nan kahnimw wet. Kilang! Re pahn mehla duwehte pokon en mehn Israel koaros me mihmihte wasaht. Kilang! Re pahn mehla duwehte pokon en mehn Israel koaros me sohralahr. Eri, kitail kadarirailla oh kilang.” 14 Irail eri ale kuruma riau iangahki oahs ko, oh nanmwarkio kadarirailla nan kahnimpwal en mehn Siria ko, ndinda: “Kohla oh kilang.” 15 Irail eri idawehnla mehn Siria ko lel Sordan, oh ahlo pwon diren likou oh dipwisou me mehn Siria ko keseseli nan ar karuwaruwen tangdoaui. Meninkeder ko eri pwurodo oh pakairkihong nanmwarkio met.

16 Aramas ako eri kohieila oh kulih kahnimpwal en mehn Siria ko, kahrehda sia ehu en pilawa amas mwahu netila ni sekel ehu, oh sia riau en parli netila ni sekel ehu, duwehte me Siohwa ketin mahsanih.+ 17 Nanmwarkio idihada opiser me e kin likih en apwalih ewen kehlo, ahpw aramas ako tiakedi ih lao e mehla ni ewen kehlo, duwehte me ohlen Koht mehlelo ndaiong nanmwarkio ni eh kohdihla reh. 18 Met eri pweida duwehte me ohlen Koht mehlelo ndaiong nanmwarkio: “Sia riau en parli pahn netila ni sekel ehu, oh sia ehu en pilawa amas mwahu pahn netila ni sekel ehu ni soangen ahnsou wet lakapw ni ewen kehl en Sameria.”+ 19 Ahpw opisero ndaiong ohlen Koht mehlelo: “Mehnda ma Siohwa pahn ketin ritingada ewen kehl en pihl en nanleng, ia duwe, soahng wet* kak wiawi?” Elisa ahpw sapengki: “Ke pahn kilangki met mesomwen, ahpw ke sohte pahn tungoale.” 20 Iei met me pweida reh, pwehki aramas ako tiakedi ih lao e mehla ni ewen kehlo.

8 Elisa eri ndalahng lih me e kaiasada nah pwutako:+ “Uhda oh kohla, kowe oh omw peneinei, oh kousoan wasa sohte lipilipil me ke kak nin duwen mehn liki men, pwe Siohwa ketin lohkidahr lehk lapalap ehu,+ oh e pahn wiawi nan sahpwet erein sounpar isuh.” 2 Liho eri uhda oh wia dahme ohlen Koht mehlelo ndao. Ih oh eh peneineio eri kohla oh kousoanla nan sapwen mehn Pilisdia kan+ erein sounpar isuh.

3 Ni kaimwiseklahn sounpar isuhwo, liho eri pwurodo sang nan sapwen mehn Pilisdia kan oh kohla rehn nanmwarkio pwehn peki imweo oh sapweo. 4 Nanmwarkio wie koasoakoasoiong Keasi, sounpapah en ohlen Koht mehlelo, ndinda: “Menlau, padahkihong ie soahng kapwuriamwei koaros me Elisa wiadahr.”+ 5 Nindoken Keasi eh koasoakoasoiaiong nanmwarkio duwen Elisa eh kaiasada me melahr men,+ lih me Elisa kaiasada nah pwutako pa leledo rehn nanmwarkio, pekipeki imweo oh sapweo.+ Ni ahnsowohte Keasi ahpw nda: “Maing ei kaun nanmwarki, ih liho met, oh ih nah pwutako met, me Elisa kaiasada.” 6 Nanmwarkio eri idekda rehn liho, oh liho ahpw koasoiaiong ih dahme wiawi. Nanmwarkio eri ekerodo emen lapalap en tehnpaso oh ndaiong ih: “Kapwurehiong liho mehkoaros me ah oh wahn sahpwo koaros sang rahn me e kohkohsang sahpwo lel met.”

7 Elisa eri lella Damaskus+ ni ahnsou me Penadad+ nanmwarkien Siria wie sousoumwahu. Pakair ahpw lellahng nanmwarkio: “Ohlen Koht mehlelo+ patopato wasaht.” 8 Nanmwarkio eri ndaiong Asael:+ “Wahda kisakis oh kohla tuhwong ohlen Koht mehlelo.+ Peki reh en kalelapak rehn Siohwa, patohwan, ‘I pahn mwahula sang soumwahu wet?’” 9 Asael eri kohla pwehn tuhwong Elisa oh e wahda soangsoangen kepwe kaselel koaros en Damaskus nin duwen kisakis kei oh kidahng pohn kamel 40. Ih eri kohla oh kesihnenda mwowe oh nda: “Omwi ladu* Penadad, nanmwarkien Siria poaroneiehdo rehmwi oh kalelapak, ‘I pahn mwahula sang soumwahu wet?’” 10 Elisa eri sapengki: “Kohwei oh ndaiong ih, ‘Ke uhdahn pahn mwahula,’ ahpw Siohwa ketin kasalehiong ie me e uhdahn pahn mehla.”+ 11 Elisa eri kangkakil Asael lao e salohda. Ohlen Koht mehlelo eri sengiseng. 12 Asael eri idek: “Dahme ei kaun wie sengisengki?” E ahpw sapengki: “Pwehki I ese soahng suwed me ke pahn wiahiong aramas en Israel kan.+ Ke pahn isikala ar wasa kelpene kehlail kan, ke pahn kemehkihla neirail ohl kehlail kan kedlahs, ke pahn kemehla neirail seri kan ni lemei oh ke pahn tehrpeseng neirail lih liseian kan.”+ 13 Asael eri nda: “Ia duwen noumwi laduet me sohte katepe duwehte kidi men eh kak wia soahng wet?” Ahpw Elisa nda: “Siohwa ketin kasalehiong ie me ke pahn wiahla nanmwarkien Siria.”+

14 Asael eri mweselsang Elisa oh pwurala rehn eh kauno, me ndaiong ih: “Dahme Elisa ndaiong uhk?” Asael ahpw sapengki: “E patohwanohng ie me komwi uhdahn pahn mwahula.”+ 15 Ahpw ni mandahn rahno, Asael ahpw ale pilangkes ehu oh kaduhdi nan pihlo oh kolehng* pohn meseo lao e mehla.+ Asael eri wiliandi ih wiahla nanmwarki.+

16 Ni kelimaun sounpar en mwehin Sehoram+ nein Eihap nanmwarkien Israel, ni ahnsou me Seosopat wiewiahte nanmwarkien Suda, Sehoram+ nein Nanmwarki Seosopat en Suda ahpw wiahla nanmwarki. 17 E sounpar 32 ni ahnsou me e wiahla nanmwarki, oh e kakaunki sounpar waluh nan Serusalem. 18 E kin idawehn elen nanmwarkien Israel kan,+ duwehte peneinei en Eihap ko,+ pwe e pwoudikihda nein Eihap serepein;+ oh Sehoram kin wiewia dahme suwed mwohn silangin Siohwa.+ 19 Ahpw Siohwa sohte ketin kupwurki kamwomwala Suda pwehki sapwellime ladu Depit,+ pwe e ketin inoukihong me e pahn ketikihong ih+ oh nah pwutak kan lamp ehu ahnsou koaros.

20 Ni mwehin Sehoram, Edom ahpw uhwongada Suda+ oh kasapwilada pein eh nanmwarki.+ 21 Sehoram eri kohla Sair iangahki were kuruma ko koaros, e ahpw uhda nipwongo oh kalowehdi mehn Edom kan me kapilpene ih oh kaunen kuruma ko; oh karis en sounpei ko ahpw tangalahng ni arail impwal kan. 22 Ahpw Edom kin usehlahte uhwong Suda leledo rahnwet. Lipna+ pil uhwongada Suda ni ahnsowo.

23 A duwen soahng teikan nan poadopoad en Sehoram, soahng koaros me e wiahda, e sou ntinting nan pwuhken poadopoad en nanmwarkien Suda kan? 24 Sehoram eri kommoaldi rehn seme mehn mahs ako oh seridi rehn seme mehn mahs ako nan Kahnimw en Depit.+ Oh nah pwutak Ahasaia+ wiliandi ih wiahla nanmwarki.

25 Ni kaeisek riaun sounpar en Sehoram nein Eihap nanmwarkien Israel, Ahasaia nein Nanmwarki Sehoram en Suda ahpw wiahla nanmwarki.+ 26 Ahasaia sounpar 22 ni ahnsou me e wiahla nanmwarki, oh e kakaunki sounpar ehu nan Serusalem. Eden eh nohno iei Adalaia+ me pahpa kahlapki Nanmwarki Omri*+ en Israel. 27 E kin idawehn elen peneinei en Eihap+ oh kin usehlahte wia dahme suwed mwohn silangin Siohwa, duwehte peneinei en Eihap, pwehki e wia kisehn peneinei en Eihap sang ni pwopwoud.+ 28 Ih eri iang Sehoram nein Eihap kohla mahweniong Nanmwarki Asael en Siria nan Ramod-kilead,+ ahpw mehn Siria kan kauwehla Sehoram.+ 29 Nanmwarki Sehoram ahpw pwurala Sesreel+ pwehn kamwahwihala ohla ko me mehn Siria kan wiahiong ih nan Rama* ni eh mahweniong Nanmwarki Asael en Siria.+ Ahasaia nein Sehoram nanmwarkien Suda ahpw kohdihla Sesreel pwehn tuhwong Sehoram nein Eihap, pwehki eh ohla.*

9 Soukohp Elisa eri ekerodo emen kadaudok en soukohp ako* oh ndaiong ih: “Pirehiong omw likou kan ni lukopomwen, mwadang ale pwoatol en leh wet oh kohwei Ramod-kilead.+ 2 Ni omw lella wasao, rapahki Sehu+ nein Seosopat, nein Nimsi; pedolongala oh kahrehsang ih rehn ienge ko oh kahrehla nan perehn masloaleo. 3 Kowe eri ale pwoatol en leho oh wudekihdiong pohn moangeo oh nda, ‘Iet me Siohwa ketin mahsanihen: “I keieiukedier nin duwen nanmwarkien Israel.”’+ Mwuri ritingada wenihmwo oh mwadang tang.”

4 Nein soukohpo sounpapaho eri kohkohla Ramod-kilead. 5 Ni eh lella mwo, kaunen sounpei ko mwomwohd wasao. Sounpapaho ahpw nda: “Maing kaun, mie rohng ong komwi.” Sehu ahpw idek: “Ihs reht?” E ahpw nda: “Komwi, Maing kaun.” 6 Sehu eri uhda oh pedolongala nan ihmwo; sounpapaho eri wudekihdiong leho pohn moangeo oh ndaiong ih, “Iet me Siohwa, Koht en Israel ketin mahsanih: ‘I keieiukedier nin duwen nanmwarkien Israel, pohn sapwellimen Siohwa aramas akan.+ 7 Ke pahn kemehla peneinei en Eihap omw kaun, oh I pahn ikih ntahn ei ladu soukohp kan oh sapwellimen Siohwa ladu teikan koaros me mehla nan pehn Sesepel.+ 8 Oh peneinei en Eihap pwon pahn sohrala; oh I pahn kamwomwala ohl koaros* nan peneinei en Eihap, iangahki me sohte sawasepe oh me luwet kan nan Israel.+ 9 Oh I pahn wiahiong peneinei en Eihap en duwehla peneinei en Seropoham+ nein Nepat oh duwehla peneinei en Paasa+ nein Ahisa. 10 A duwen Sesepel, kidi kan pahn kangala ih nan pelien sahpw en Sesreel,+ oh sohte me pahn sarepedi.’” Mwurinte mwo e ahpw ritingada wenihmwo oh tangdoaui.+

11 Ni Sehu eh pwurala rehn nein nanmwarkio kaunen karis en sounpei teiko, re ahpw idek reh: “Soahng koaros mwahu? Dahme ohl sahliel menet kohkihdo rehmw?” E ahpw sapengkin irail: “Kumwail eseier soangen aramas menet oh mwomwen eh koasoi kan.” 12 Ahpw irail nda: “Soh! Menlau ndaiong kiht dahme e nda.” Sehu eri nda: “Iet me e ndaiongiehn, oh doula koasoia, ‘Iet me Siohwa ketin mahsanih: “I keieiukedier nin duwen nanmwarkien Israel.”’”+ 13 Emenemen irail ahpw mwadangete kihsang ar likou reirei kan oh kihdiong pahn neh ko pohn kehndakeo,+ oh re peuk mehn pepeuk* oh nda: “Sehu wialahr nanmwarki!”+ 14 Sehu+ nein Seosopat, nein Nimsi eri koasoanehdi en uhwongada Sehoram.

Sehoram oh karis en sounpei en Israel pwon mihmi nan Ramod-kilead,+ pwe ren pere Israel sang Asael+ nanmwarkien Siria. 15 Mwuhr Nanmwarki Sehoram ahpw pwurala Sesreel+ pwehn kamwahwihala ohla ko me mehn Siria kan wiahiong ih ni eh mahweniong Nanmwarki Asael en Siria.+

Sehu eri nda: “Ma kumwail pwungki, kumwail dehpa mweidohng emen en pedoisang nan kahnimwo oh kohla pakairki met nan Sesreel.” 16 Sehu eri douda pohn were kurumao oh kohla Sesreel, pwe Sehoram wonohn wasao pwehki eh ohla, oh Nanmwarki Ahasaia en Suda kohdilahr pwehn tuhwong Sehoram. 17 Sounsilasil men kesikesihnen pohn wasahn iroir en Sesreel. E ahpw kilangada Sehu oh nah ohl ako ar kohkohdo. Ih eri nda: “I kilang pwihnen aramas ekei.” Sehoram eri nda: “Kadarala emen ohl me dake oahs pwehn tuhwong irail, oh en nda, ‘Komw kohkohdo ni popohl?’” 18 Eri emen soundak oahs ahpw kohla pwehn tuhwong ih oh nda: “Iet me nanmwarki mahsanih, ‘Komw kohkohdo ni popohl?’” Ahpw Sehu nda: “Dahme ke koasoakoasoiahki duwen ‘popohl’? Keido mwuri oh idawehn ie!”

Sounsilasilo eri pakairki: “Meninkedero lella rehrail, ahpw e sohte pwurodo.” 19 Sehoram eri kadarala keriemen en soundak oahs, me nda ni eh lella rehrail: “Iet me nanmwarkio mahsanih, ‘Komw kohkohdo ni popohl?’” Ahpw Sehu nda: “Dahme ke koasoakoasoiahki duwen ‘popohl’? Keido mwuri oh idawehn ie!”

20 Sounsilasilo eri pakairki: “E lella rehrail, ahpw e sohte pwurodo, tengetengen kurumao likamwete mwomwen Sehu me pahpa kahlapki Nimsi* eh kin tangahki kuruma, pwe e tangatang en aramas sahliel.” 21 Sehoram eri nda: “Kaunopada werei kurumao!” Were kurumahn mahweno eri kaunopadahng oh Nanmwarki Sehoram en Israel oh Nanmwarki Ahasaia+ en Suda ahpw kohieila nan warara kurumahn mahwen ko pwehn tuhwong Sehu. Ira tuhwong ih nan sapwen Napod+ mehn Sesreelo.

22 Ni ahnsowohte me Sehoram kilangada Sehu, e ahpw nda: “Sehu, komw ketido ni popohl?” Sehu ahpw nda: “Ia duwen popohl eh kak mie ni omw nohno Sesepel+ eh kin netiki paliwere oh akmanaman tohto me e kin wia?”+ 23 Sehoram eri mwadangete kawetala were kurumao pwehn tangdoaui, oh e ndalahng Ahasaia: “Tiahk en pengpengla ehu met, Ahasaia!” 24 Sehu eri ale nah kesik ketieuwo oh kasikihdi tihnsewen Sehoramo, oh arepo pwar eh mohngiong. Ih eri pwupwudi nan were kurumahn mahweno. 25 Sehu eri ndalahng Pidkar nah opisero: “Pwekada oh keselahng nan mwaht en Napod mehn Sesreelo.+ Taman, kita me dake kurumao* oh tang mwurin semeo Eihap ni ahnsou me Siohwa ketin wiahda kadeik wet ong ih:+ 26 ‘Siohwa ketin mahsanih, “Duwehte ei kilangehr ntahn Napod+ oh ntahn nah pwutak kan aio,” Siohwa ketin mahsanih, “I uhdahn pahn dupukohng+ nan pelien sahpw wet.”’ Eri pwekada oh keselahng nan pelien sahpwo, nin duwen mahsen en Siohwa.”+

27 Ni ahnsou me Nanmwarki Ahasaia+ en Suda kilangada dahme wiewiawi, e ahpw tangdoaui ni ahl me kolahng imwen mwetuwel. (Mwuhr Sehu pwakihala ih oh nda: “Kumwail pil kemehla ih!” Eri re kasikihdi ih nan kurumao ni eh kohkohdalahng Kur, me mi limwahn Ipleam.+ Ahpw e usehlahte tangalahng Mekiddo oh e mehla wasao. 28 Nah ladu ko ahpw walahng ih Serusalem nan kuruma ehu, oh re sarepedi nan eh sousowo rehn seme mehn mahs ako nan Kahnimw en Depit.+ 29 Ni kaeisek ehun sounpar en Sehoram nein Eihap, Ahasaia+ wiahla nanmwarkien Suda.)

30 Ni Sehu eh leledo Sesreel,+ Sesepel+ ahpw rongada met. Ih eri katoantoalihala pwoaren mese ko oh kapwatahda pitenmoange oh kilengdihla sang ni wenihmwtoko. 31 Ni Sehu eh pedolong ni ewen kehlo, liho ahpw nda: “Soahng koaros mwahu rehn Simri, me kemehla eh kauno?”+ 32 Ni Sehu eh kilengdalahng ni wenihmwtoko, e nda: “Ihs me iang ei pali? Ihs?”+ Ni ahnsowohte lapalap riemen de silimen en tehnpaso ahpw kilengdiong ih. 33 E nda: “Kesehdihdo lihen!” Irail eri kesehdihla liho, oh ntahn liho ahpw siklahng ni dihdo oh pohn oahs ko, oh e tiangkipeseng liho nah oahs ko. 34 Mwurin mwo Sehu ahpw pedolongala oh tungoal oh nim. Ih eri nda: “Menlau, wahla lih riahlao oh sarepedi. Pwehki ih nein nanmwarki men.”+ 35 Ahpw ni ar kolahng sarepedi, re sohte diar mehkot ihte tihn moange oh neh oh peh ko.+ 36 Ni ar pwurala oh ndaiong ih, Sehu ahpw nda: “Met kapwaiada mahsen en Siohwa+ me e ketin mahsanih sang sapwellime ladu Elaisa mehn Tispe, me mahsanih, ‘Nan pelien sahpw en Sesreel, kidi kan pahn kangala uduken Sesepel.+ 37 Oh paliweren Sesepel me melahro pahn wiahla koiasi nan mwaht en pelien sahpw en Sesreel, kahrehda sohte me kak nda: “Iet Sesepel.”’”

10 Eri, mie nein Eihap+ pwutak 70 nan Sameria. Sehu ahpw ntingihada kisinlikou kan oh kadarala rehn lapalap akan en Sesreel oh ohl mah kan+ oh silepen nein Eihap seri kan* nan Sameria, koasoia: 2 “Nein amwail kauno pwutak kan, iangahki kurumahn mahwen kan, oahs kan, oh tehtehn mahwen kan kin mihmi rehmwail oh kumwail mi nan kahnimw kehl kehlail. Ni kisinlikou wet eh lelewei rehmwail, 3 kumwail pilada emen me keieu mwahu oh koahiek* rehn nein amwail kauno pwutak kan oh kidahng ih pohn mwoalen semeo. Eri kumwail pei oh pere peneinei en amwail kauno.”

4 Ahpw re masepwehkada oh nda: “Kilang! Ma nanmwarki riemen sohte kak uhwong ih,+ a ia duwen atail kak uhwong?” 5 Sounapwalih tehnpaso,* kepinahn kahnimwo, ohl mah kan oh sounsilasil ko ahpw kadaralahng Sehu rohng wet: “Kiht sapwellimomwi ladu, oh se pahn wia mehkoaros me komw mahsanihong kiht. Se sohte pahn kasapwilada emen en wia nanmwarki. Komw wiahiong kiht dahme komw kupwukupwure.”

6 Ih eri ntingilahng irail keriaun kisinlikou, nda: “Ma kumwail iang ei pali oh men peikiong ie, a kumwail wahdo moangen nein amwail kauno pwutak kan oh kohdo rehi lakapw ni soangen ahnsouwet nan Sesreel.”

Nein nanmwarkio pwutak 70 ko mihmi rehn ohl lapalap akan en kahnimwo me apwalihirailda. 7 Ni ahnsowohte me kisinlikowo lella rehrail, re ahpw ale nein nanmwarkio pwutak kan oh kemeirailla, pwutak 70,+ oh kihong moangarail kan nan kopwou oh kadarala rehn Sehu nan Sesreel. 8 Meninkedero eri kohdo oh ndaiong ih: “Irail wadohr moangen nein nanmwarkio pwutak ko.” Sehu eri nda: “Koasoakehda moangarail ko ni koasoakoasoak riau ni wasahn pedolong en ewen kelen kahnimwo lao lel nimenseng.” 9 Ni Sehu eh pedoila nimensengo, e kesihnenda mwohn aramas ako koaros oh nda: “Kumwail sohte wiahda dihp.* Ei, ngehi me koasoanehdi I en uhwongada ei kauno oh kemehla ih,+ ahpw ihs me kemehla aramas pwukat koaros? 10 Eri, kumwail en ese me sohte ehu mahsen en Siohwa me Siohwa ketin mahsanihong peneinei en Eihap sohte pahn pweida,*+ oh Siohwa ketin kapwaiadahr dahme e ketin mahsanih sang rehn sapwellime ladu Elaisa.”+ 11 Oh pil, Sehu kemehla luhwen peneinei en Eihap koaros nan Sesreel, iangahki koaros nah lapalap akan, kompoakepah kan oh nah samworo kan,+ sohte emen me pitila.+

12 Sehu eri uhda oh kohkohla Sameria. En silepen sihpw kan imwen pirapir* mi nanialo. 13 Sehu eri tuhwongedi rien Nanmwarki Ahasaia+ en Suda kan, oh e ndaiong irail: “Ihs kumwail?” Re ahpw nda: “Kiht rien Ahasaia, se kohkohdihla pwe sen idek ma soahng koaros mwahu rehn nein nanmwarki pwutak kan oh nein lih nanmwarki* pwutak kan.” 14 Sehu ahpw mwadangete nda: “Kumwail poarmourihiraildi!” Irail eri poarmourihiraildi oh kemeirailla ni pwoaren nahk pihl en imwen pirapir, aramas 42. E sohte mweidohng emen irail en pitila.+

15 Ni Sehu eh kohkohsang wasao, e ahpw tuhwong Sehonadap+ nein Rekap,+ me kohkodohng tuhwong ih. Ni eh rahnmwahwih,* e nda: “Omw mohngiong kin loalopwoatohng* ie, duwehte ei mohngiong eh kin loalopwoatohng omw mohngiong?”

Sehonadap ahpw sapengki: “Ei.”

Sehu eri nda: “Ma ei, kapahdo pehmwen.”

Ih eri kapahla peho oh Sehu waikada ih reh pohn kurumao. 16 Sehu eri nda: “Iangiehda oh kilang duwen ei sohte kin mweidada salelepek ong* Siohwa.”+ Sehu eri wahda Sehonadap nan were kurumahn mahweno. 17 Sehu eri lel Sameria oh kemehla luhwen peneinei en Eihap koaros nan Sameria, lao e kamwomwirailla,+ duwehte mahsen en Siohwa me e ketin mahsanihong Elaisa.+

18 Oh pil, Sehu kapokonepene aramas ako koaros oh ndaiong irail: “En Eihap kaudokiong Paal me tikitik,+ ahpw Sehu pahn kaudokiong ih laudsang. 19 Eri ekerodo rehi soukohp en Paal kan koaros,+ nah tohnkaudok kan koaros oh nah samworo kan koaros.+ Dehr mweidohng emen en sohte iang, pwehki I pahn wiahiong Paal lapalahn meirong ehu. Mehmen me sohte iang sohte pahn momour.” Ahpw Sehu widwidinge irail pwehn kamwomwala tohnkaudok en Paal kan.

20 Sehu eri pousehla nda: “Kumwail kalohkihda* kapokon sarawi ehu ong Paal.” Irail eri lohkiseli. 21 Mwurin mwo Sehu eri kadarpeseng pakair nan Israel pwon, oh tohnkaudok en Paal kan koaros ahpw kohpene. Sohte emen me sohte iang. Irail eri pedolongala nan imwen kaudok en Paal,+ oh imwen kaudok en Paalo ahpw dirala sang apali lel apali. 22 Ih eri ndalahng me kin apwalih perehn likou ko: “Wahieido likou ong tohnkaudok en Paal kan koaros.” Ih eri wahieido ar likou ko. 23 Sehu oh Sehonadap+ nein Rekap eri kohlongala nan imwen kaudok en Paalo. Ih eri ndaiong tohnkaudok en Paal ko: “Kumwail tehk mwahu pwe tohnkaudok en Paal kante me pahn mi wasaht, sohte tohnkaudok en Siohwa pahn iang.” 24 Irail eri kohlongala pwe ren wiahda meirong kan oh meirong isihs kan. Sehu pwilikihdi nah ohl 80 likio oh nda: “Ma emen kumwail pahn mweidala emen irail en pitila, eri e pahn pwainki eh mour.”

25 Ni ahnsowohte me e kanekehla eh wiahda meirong isihs ko, Sehu ahpw ndalahng nah sounsilasil ko* oh opiser ko: “Kumwail pedolong oh kemeirailla! Kumwail dehpa mweidohng emen en pitila!”+ Sounsilasil ko oh opiser ko eri kemehkinirailla kedlahs oh keseirailla likio, oh re kohkohlongala lel masloalen wasa sarawio* nan imwen kaudok en Paalo. 26 Irail eri wahieila uhr sarawi kan+ en imwen kaudok en Paal oh isikala.+ 27 Irail karangkehdi uhr sarawi+ en Paal, oh re karangkehdi imwen kaudok en Paalo+ oh wiakihla wasahn kot kan, me mihmihte leledo rahnwet.

28 Sehu eri kamwomwala Paal sang nan Israel. 29 Ahpw, Sehu sohte sohpeisang dihp kan me Seropoham nein Nepat kahrehiong Israel en wiahda me pid kouwol kohl kan me mi nan Pedel oh Dan.+ 30 Siohwa eri ketin mahsanihong Sehu: “Pwehki omw doadoahk mwahu oh wiadahr dahme pwung mwohn silangi ni omw kapwaiada mehkoaros me I koasoanehdi en wiahiong peneinei en Eihap,+ kadaudokomw kan lellahng dih kapahieu pahn mwohd nan mwoalen Israel.”+ 31 Ahpw Sehu sohte kanahieng idawehn ni mohngiong unsek Kosonned en Siohwa, Koht en Israel.+ E sohte sohpeisang dihp kan me Seropoham kahrehiong Israel en wiahda.+

32 Ni ahnsowo Siohwa ketin tepida ekisekis katikala* sapwen Israel. Asael kin mahmahweniong irail wasa koaros nan sapwen Israel,+ 33 sang Sordan kohla palimese, sapwen Kilead pwon—sapwen mehn Kad kan, mehn Reupen kan oh mehn Manase kan+—sang Aroer, me mi limwahn Wahun Arnon, lella Kilead oh Pasan.+

34 A duwen soahng teikan nan poadopoad en Sehu, soahng koaros me e wiahda oh duwen eh kehl koaros, e sou ntinting nan pwuhken poadopoad en nanmwarkien Israel kan? 35 Sehu eri kommoaldi rehn seme mehn mahs ako, oh re sarepedi ih nan Sameria; oh nah pwutak Sehoahas+ wiliandi ih wiahla nanmwarki. 36 Uwen reirei* en ahn Sehu kaunda Israel nan Sameria iei sounpar 28.

11 Eri ni Adalaia,+ inen Ahasaia, eh kilangada me nah pwutako melahr,+ e ahpw uhda oh kamwomwala kisehn kadaudok en nanmwarkio pwon.+ 2 Ahpw, Sehosihpa nein Nanmwarki Sehoram serepein, rien Ahasaia, ahpw ale Sehoas+ nein Ahasaia pwutak oh kawaisang ih nanpwungen nein nanmwarkio pwutak kan me pahn kamakamala. E kihdi pwutako oh lih me kin apwaliho nan perehn meir ehu masloaleo. Re koasoanehdi ren ekihsang Adalaia kisin pwutako, eri e sohte kamakamala. 3 Sehoas mihmihte rehn liho erein sounpar weneu, oh e wie ekiek nan tehnpesen Siohwa, nindoken Adalaia eh kakaun sahpwo.

4 Ni keisuhwen sounpar, Sehoiada ahpw ileklahng kaunen meh epwiki kan me wia silepen peneinei en nanmwarkio* oh silepen tehnpaso kan,*+ ren kohdo reh ni tehnpesen Siohwa. E wiahda inou ehu* rehrail oh wiahiong ren kahula ni tehnpesen Siohwa. Ih eri kasalehiong irail nein nanmwarki pwutako.+ 5 Sehoiada ahpw ruwesehkin irail: “Iet me kumwail pahn wiahn: Silikis ehu rehmwail pahn doadoahk ni rahnen Sapad oh pahn sinsile mwahu tehnpesen nanmwarkio,+ 6 pil silikis ehu pahn mi ni Ewen Kelen Poahsoan, oh pil silikis ehu pahn mi ni ewen kehl ni tihnsewen wasa me silepen tehnpas ko mihmi ie. Kumwail pahn kin weliali sinsile tehnpaso. 7 Pwihn riau me pahn kommoal ni rahnen Sapado pahn sinsile mwahu tehnpesen Siohwa pwehn pere nanmwarkio. 8 Kumwail pahn kapilpene nanmwarkio ni pali koaros, emenemen pahn kolokol nah tehtehn mahwen. Mehmen me pahn song daulihala sounpei ko pahn kamakamala. Kumwail pahn mihmihte rehn nanmwarkio wasa koaros me e kin ketila ie.”*

9 Kaunen meh epwiki ko+ uhdahn kapwaiada dahme samworo Sehoiada kehkehlingki. Emenemen irail ahpw kahrehda neirail ohl akan me doadoahk ni rahnen Sapad, iangahki irail akan me kommoal ni rahnen Sapad, oh re kohdo rehn samworo Sehoiada.+ 10 Samworo eri kihong kaunen meh epwiki ko nein Nanmwarki Depit ketieu ko oh mehn sansar pwonopwon ko, me mi nan tehnpesen Siohwa. 11 Silepen tehnpas ko eri+ kesihnenda nan dewerail kan, emenemen kin kol nah tehtehn mahwen, sang ni palimaun en tehnpaso lel ni palimeing en tehnpaso, limwahn pei sarawio+ oh limwahn tehnpaso oh re kapilpene nanmwarkio. 12 Sehoiada eri wahieido nein nanmwarkio pwutako+ oh kidahng powe nihno* oh Mehn Kadehdeo,*+ oh re kasapwiladahng ih nanmwarki oh keiehdi ih. Re ahpw tepida lopwolopw oh nda: “Nanmwarki en ketin mour werei!”+

13 Ni Adalaia eh rongada ngilen aramas ako ar tangatang, e ahpw mwadangete kohdo rehn aramas ako ni tehnpesen Siohwa.+ 14 Ih eri kilangada nanmwarkio eh kesikesihnen limwahn uhro nin duwen tiahk.+ Kaun ako oh sounpeuk sowi ko+ mihmi rehn nanmwarkio, oh aramas en sahpwo koaros wie pereperen oh pepeuk sowi kan. Adalaia eri tehrpeseng eh likou ko oh werkihda: “Re pangielahr! Re pangielahr!” 15 Ahpw samworo Sehoiada kehkehlingkihong kaunen meh epwiki ko,+ irail ako me idihdida pohn sounpei ko oh ndaiong irail: “Kumwail wahieila liho sang nanpwungen sounpei kan, oh ma mehmen pahn iangala liho a kumwail kemehkihla kedlahs!” Pwe samworo nda: “Kumwail dehr kemehla ih nan tehnpesen Siohwa.” 16 Irail eri koledi liho, oh ni eh lella wasa me oahs kan kin pedolong ni tehnpesen nanmwarkio,+ e ahpw kamakamala wasao.

17 Sehoiada eri wiahda inou lap ehu nanpwungen Siohwa oh nanmwarkio oh aramas ako,+ me re pahn kin wiewiahte sapwellimen Siohwa aramas, oh e pil wiahda inou lap ehu nanpwungen nanmwarkio oh aramas ako.+ 18 Mwurin mwo aramas koaros en sahpwo ahpw kohla ni imwen kaudok en Paal oh kauwehla eh pei sarawi kan,+ kamwutepene douluhl eh sansal kan,+ oh kemehla Mattan, samworo en Paal+ mwohn pei sarawi ko.

Samworo eri idihada sounapwalih kan ong tehnpesen Siohwa.+ 19 Oh e pil kahrehda kaunen meh epwiki kan,+ silepen peneinei en nanmwarkio,* silepen tehnpas ko+ oh aramas koaros en sahpwo pwe ren iang nanmwarkio kohdihdo sang ni tehnpesen Siohwa. Oh re kohla ni tehnpesen nanmwarkio ni ar keid nan ahl me kohlongala ni ewen kelen silepen tehnpaso. Ih eri mwohndiong pohn mwoalen nanmwarki.+ 20 Aramas koaros en sahpwo ahpw perenda oh miehla meleilei nan kahnimwo, pwehki re kemehkihla Adalaia kedlahs ni tehnpesen nanmwarkio.

21 Sehoas+ sounpar isuh ni ahnsou me e wiahla nanmwarki.+

12 Ni keisuhwen sounpar en Sehu,+ Sehoas+ ahpw wiahla nanmwarki, oh e kakaunki sounpar 40 nan Serusalem. Eden eh nohno iei Sipiah mehn Peersipa.+ 2 Sehoas kin usehlahte wiewia dahme pwung mwohn silangin Siohwa erein ahnsou me samworo Sehoiada kin kaukaweid ih. 3 Ahpw, wasa ile kan+ sohte kohsang, oh aramas akan kin usehlahte wiewia meirong oh meirong ediniei kan pohn wasa ile pwukat.

4 Sehoas eri ndaiong samworo ko: “Kumwail ale mwohni koaros me wisikdohng ni tehnpesen Siohwa ong meirong sarawi kan,+ mwohni me emenemen kin pwainki daksis,+ mwohni me kohsang aramas* akan me kahukihla inou,* oh mwohni koaros me emenemen koasoanehdi nan eh mohngiong en patohwando ni tehnpesen Siohwa.+ 5 Samworo ko pahn pein ale mwohni sang rehn aramas akan me kihda* oh doadoahngki pwehn onehda sapahl tehnpaso, wasa kan me mie ohla.”*+

6 Ni kerieisek siluhn sounpar en Nanmwarki Sehoas, samworo ko saikinte kamwahwihala wasa ohla kan ni tehnpaso.+ 7 Nanmwarki Sehoas eri ekerodo samworo Sehoiada+ oh samworo teikan oh ndaiong irail: “Dahme kumwail saikinte onehkihdasapahl wasa ohla kan ni tehnpaso? Eri, kumwail dehier ale mwohni sang rehn aramas akan me kin wahdo ma kumwail sohte pahn doadoahngkihong onohnsapahl en tehnpaso.”+ 8 Samworo ko eri pwungkihda me re sohla pahn ale mwohni sang rehn aramas ako oh sohte pahn pwukoahki onohnsapahl en tehnpaso.

9 Samworo Sehoiada eri ale koakon ehu+ oh wiahda pwoahr ehu pohn pweineo oh kihdiong limwahn pei sarawio, ni palimaun en aramas me kin pedolong ni tehnpesen Siohwa. Ih wasao me samworo kan me kin papah nin duwen silepen wenihmw ko kin kihdiong mwohni ko koaros me kin wisikdo ni tehnpesen Siohwa.+ 10 Ni ahnsou me re kin kilang me mwohni kan kin tohtohla nan koakono, nein nanmwarki sekterio oh samworo lapalapo ahpw kin kohdo oh kihpene* oh wadekedi mwohni ko me wisikdohng ni tehnpesen Siohwa.+ 11 Ira pahn kihla mwohni me wadawadediero ong irail kan me idihdida ong doadoahk me kin wiawi nan tehnpesen Siohwa. Irail uhd kin pwain deiksang kan oh sounkou ihmw kan me kin doadoahk ni tehnpesen Siohwa,+ 12 oh pil sounwia takai kan oh soun-par takai kan. Re pil pwainda tuhke kan oh takai me perperda kan pwehn kamwahwihala ohla kan ni tehnpesen Siohwa oh doadoahngki mwohnio pwehn pwain soahng teikan koaros me pidada onohnsapahl en tehnpaso.

13 Ahpw mwohni pwukat me wisikdohng ni tehnpesen Siohwa sohte kin doadoahkohng wiahda peisin silper, mehn kakunla lamp, pwohl, sowi,+ de soangen dipwisou kan me wiawihkihda kohl de silper ong tehnpesen Siohwa.+ 14 Re kin kihong mwohnio ongete irail kan me kin wia doadoahko, oh re doadoahngki mwohnio ni ar onehda sapahl tehnpesen Siohwa. 15 Re sohte kin kasawih aramas ako me kin ale mwohnio pwehn kihong tohndoadoahk kan, pwe irail aramas likilik kei.+ 16 Ahpw mwohni ong meirong en tomwki dihp+ oh mwohni ong meirong en dihp sohte kin wisikdohng ni tehnpesen Siohwa; samworo ko me kin naineki.+

17 Ahnsowo, Asael+ nanmwarkien Siria ahpw kohdo mahweniong Kahd,+ oh e kalowehdi, oh mwurin mwo e koasoanehdi en peiong* Serusalem.+ 18 Nanmwarki Sehoas en Suda eri ale meirong sarawi koaros me seme mehn mahs ako Seosopat, Sehoram, oh Ahasaia, nanmwarkien Suda ko kasarawihla, iangahki pein eh meirong sarawi kan oh kohl koaros me dierek nan wasahn nahk dipwisou kesempwal kan en tehnpesen Siohwa oh pil tehnpesen nanmwarkio, oh kadaralahng Asael nanmwarkien Siria mepwukat.+ Ih eri kohkohlahsang Serusalem.

19 A duwen soahng teikan nan poadopoad en Sehoas, soahng koaros me e wiahda, e sou ntinting nan pwuhken poadopoad en nanmwarkien Suda kan? 20 Ahpw nah lapalap ako iang uhwongada ih+ oh kemehla Sehoas ni imwen Dohl*+ me mi nanial me kohdilahng Silla. 21 Nah lapalap ako Sosakar nein Semead oh Sehosapad nein Somer me peiong ih oh kemehla.+ Irail sarepedi ih rehn seme mehn mahs ako nan Kahnimw en Depit, oh nah pwutak Amasaia wiliandi ih wiahla nanmwarki.+

13 Ni kerieisek siluhn sounpar en Sehoas+ nein Ahasaia+ nanmwarkien Suda, Sehoahas nein Sehu+ ahpw wiahla nanmwarkien Israel nan Sameria, oh e kakaunki sounpar 17. 2 E doulahte wia dahme suwed mwohn silangin Siohwa, e kin wiewiahte dihp me Seropoham nein Nepat kahrehiong Israel en wiahda.+ E sohte sohpeisang eh wiewia dihpo. 3 Siohwa eri ketin engiengda+ kowahlap pahn Israel,+ oh erein sounpar tohto, e kin ketikihong irail nan pehn Nanmwarki Asael+ en Siria oh nan pehn Penadad+ nein Asael.

4 Kedekedeo Sehoahas eri peki kupwuramwahu en Siohwa, oh Siohwa eri ketin karonge ih, pwe e ketin mahsaniher kalokolok me nanmwarkien Siria wiahiong Israel.+ 5 Siohwa ketikihong Israel sounkomour men+ pwehn kasaledekirailla sang pahn manaman en Siria, oh mehn Israel kan kakehr mour ni popohl duwehte mahs. 6 (Ahpw, re sohte sohpeisang dipen peneinei en Seropoham me e kahrehiong Israel en wiahda.+ Re pousehlahte wiewia dihp wet,* oh tuhke sarawio*+ mihmihte nan Sameria.) 7 Ihte nein Sehoahas karis en sounpei kan me luhwehdi iei soundak oahs 50, kuruma 10 oh sounpei alu 10,000, pwehki nanmwarkien Siria kamwomwirailla+ oh tiakiraildi duwehte pwelpar ni ahnsoun kihsang kilin krein.+

8 A duwen soahng teikan nan poadopoad en Sehoahas, soahng koaros me e wiahda oh duwen eh kehl, e sou ntinting nan pwuhken poadopoad en nanmwarkien Israel kan? 9 Sehoahas eri kommoaldi rehn seme mehn mahs ako, oh re sarepedi ih nan Sameria;+ oh nah pwutak Sehoas wiliandi ih wiahla nanmwarki.

10 Ni kesilihsek isuhwen sounpar en Nanmwarki Sehoas en Suda, Sehoas+ nein Sehoahas wiahla nanmwarkien Israel nan Sameria, oh e kakaunki sounpar 16. 11 E doulahte wia dahme suwed mwohn silangin Siohwa, e sohte sohpeisang dihp koaros me Seropoham nein Nepat kahrehiong Israel en wiahda.+ E pousehlahte wiewia* dihp pwukat.

12 A duwen soahng teikan nan poadopoad en Sehoas, soahng koaros me e wiahda oh duwen eh kehl oh duwen eh mahweniong Nanmwarki Amasaia en Suda,+ e sou ntinting nan pwuhken poadopoad en nanmwarkien Israel kan? 13 Sehoas eri kommoaldi rehn seme mehn mahs ako, oh Seropoham*+ eri mwohndi nan mwoale. Sehoas eri seridi nan Sameria rehn nanmwarkien Israel kan.+

14 Eri ni Elisa+ eh soumwahukihda soumwahu ehu me e kedekedeo mehkihla, Sehoas nanmwarkien Israel ahpw kohdihdo reh oh sengiseng mwohn Elisa, ndinda: “Semei, semei! Kuruma oh soundak oahs en Israel kan!”+ 15 Elisa eri ndaiong ih: “Ale ehu kesik ketieuwen oh arep kan.” Ih eri ale ehu kesik ketieu oh arep kan. 16 Elisa eri ndaiong nanmwarkien Israelo: “Onopada pwe komwi en kesik.” Ih eri onopadahng kesik, mwurin mwo Elisa eri pwil peh ko pohn pehn nanmwarkio. 17 Ih eri nda: “Ritingada wenihmwtok me sallahng palimese.” Ih eri ritingada. Elisa eri nda: “Kesik!” Ih eri kesik. Elisa eri nda: “Sapwellimen Siohwa arep en kana,* arep en kalowehdi Siria! Komw pahn kalowehdi Siria nan Apek+ lao komwi kamwomwala.”

18 Elisa doula nda: “Ale arep kan,” ih eri ale arep ko. Elisa eri ndaiong nanmwarkien Israelo: “Poakih nanpwelen.” Ih eri poakih pwehlo pak siluh oh uhdi. 19 Ohlen Koht mehlelo eri lingeringerda pah oh nda: “Komw anahne poakih pwehlen pak limau de weneu! Ma komw wia met, komw pahn kalowehdi Siria lao komwi kamwomwala, ahpw met komwi pahn kalowehdi Siria pak siluhte.”+

20 Mwurin mwo Elisa eri mehla oh seridi. Mie pwihnen loallap en mehn Mohap kei+ me kin kohdo nan sahpwo ni tepin pahr.* 21 Ehu rahno, ni aramas ekei ar pahn sarepedi aramas emen, re kilangada pwihnen loallapo, re ahpw mwadangete kesehdi aramaso nan sousoun Elisa oh tangdoaui. Ni aramaso eh sairada tihn Elisa ko, e ahpw mourda+ oh kesihnenda.

22 Nanmwarki Asael+ en Siria kin kaloke Israel+ erein kaundahn Sehoahas pwon. 23 Ahpw, Siohwa kin ketin kasalehiong irail kupwuramwahu oh kadek kalahngan+ oh kin ketin nsenohkin irail pwehki sapwellime inou lap rehn Eipraam,+ Aisek+ oh Seikop.+ E sohte ketin kupwurki kamwomwirailla, oh e sohte ketin soikirailla sang mwohn silangi leledo rahnwet. 24 Ni ahnsou me Nanmwarki Asael en Siria mehla, nah pwutak Penadad wiliandi ih wiahla nanmwarki. 25 Sehoas nein Sehoahas eri kapwurehsang Penadad nein Asael kahnimw kan me Asael kihsang Sehoahas ni ahnsoun mahwen. Sehoas kalowehdi Penadad pak siluh,+ oh e kapwurehdo kahnimw en Israel kan.

14 Ni keriaun sounpar en Sehoas+ nein Sehoahas nanmwarkien Israel, Amasaia nein Nanmwarki Sehoas en Suda ahpw wiahla nanmwarki. 2 E sounpar 25 ni ahnsou me e wiahla nanmwarki, oh e kakaunki sounpar 29 nan Serusalem. Eden eh nohno iei Sehoaddin mehn Serusalem.+ 3 E doulahte wia dahme pwung mwohn silangin Siohwa, ahpw e sohte duwehte seme mehn mahso Depit.+ E wia mehkoaros me semeo Sehoas wiadahr.+ 4 Ahpw, wasa ile kan sohte kohsang,+ oh aramas akan kin usehlahte wiewia meirong oh meirong ediniei kan pohn wasa ile pwukat.+ 5 Ni ahnsou me Amasaia ahnekilahr manaman unsek ong wehio, e ahpw kemehla nah lapalap ako me kemehla seme, nanmwarkio.+ 6 Ahpw e sohte kemehla nein sounkam aramas ako seri kan, me pahrekiong kehkehlik en Siohwa me ntinting nan pwuhken Kosonned en Moseso: “Pahpa kan sohte pahn kamakamkihla neirail seri kan, oh seri kan sohte pahn kamakamkihla arail pahpa kan; ahpw emenemen pahn kamakamkihla pein dipe.”+ 7 E kemehla mehn Edom kan+ nan Wahun Soahl,+ aramas 10,000, oh kalowehdi Sila nan mahweno+ oh kahdanekihla Sokdeel leledo rahnwet.

8 Amasaia eri kadarala meninkeder kei rehn Sehoas nein Sehoahas nein Sehu nanmwarkien Israel, nda: “Kohdo kita mahwenpene.”*+ 9 Nanmwarki Sehoas en Israel ahpw kadarala pasapeng wet rehn Nanmwarki Amasaia en Suda: “Tuhke tekatek en Lepanon kadaralahng tuhke sidar en Lepanon kair wet, ‘Mweidohng noumw serepeinen en pwoudiki nei pwutaket.’ Ahpw, mahn lawalo en Lepanon men keid wasao oh tiakedi tuhke tekateko. 10 Mehlel, komw kalowedier Edom,+ me kahrehda omw mohngiong pohnmwahsohkihda. Nsenamwahuki omw kana ahpw mihmihte ni tehnpasomwien. Dahme komw men wiahkihda kahpwal laud oh lohdi, iangahki Suda?” 11 Ahpw Amasaia sohte rong.+

Nanmwarki Sehoas en Israel eri kohdahla, ih oh Nanmwarki Amasaia en Suda ahpw mahwenpene nan Ped-semes,+ me iei sapwen Suda.+ 12 Suda eri lohdi pahn Israel, emenemen irail ahpw tangdoaui pwuralahng ni imwarail kan.* 13 Nanmwarki Sehoas en Israel eri koledi Nanmwarki Amasaia en Suda, nein Sehoas nein Ahasaia, nan Ped-semes. Irail eri kohdo Serusalem, oh e kauwehla dihd en Serusalem sang ni Ewen Kelen Epraim+ lel ni Ewen Kelen Keimw,+ kiupid 400.* 14 E wahsang kohl oh silper koaros oh dipwisou koaros me dierek nan tehnpesen Siohwa oh pil nan wasahn nahk dipwisou kesempwal kan en tehnpesen nanmwarkio, oh e pil wahsang aramas akan. Ih eri pwurala Sameria.

15 A duwen soahng teikan nan poadopoad en Sehoas, dahme e wiadahr oh duwen eh kehl oh duwen eh mahweniong Nanmwarki Amasaia en Suda, e sou ntinting nan pwuhken poadopoad en nanmwarkien Israel kan? 16 Sehoas eri kommoaldi rehn seme mehn mahs ako oh seridi nan Sameria+ rehn nanmwarkien Israel kan; oh nah pwutak Seropoham*+ wiliandi ih wiahla nanmwarki.

17 Amasaia+ nein Sehoas nanmwarkien Suda momourki sounpar 15 mwurin mehlahn Sehoas+ nein Sehoahas nanmwarkien Israel.+ 18 A duwen soahng teikan nan poadopoad en Amasaia, e sou ntinting nan pwuhken poadopoad en nanmwarkien Suda kan? 19 Mwuhr koasoandi ehu ahpw wiawihda pwehn pelianda ih+ nan Serusalem, ih eri tangalahng Lakis, ahpw re kadarala ohl ekei ren pwakihala ih nan Lakis oh re kemehla ih wasao. 20 Irail eri wahdo ih pohn oahs kei, oh e seridi nan Serusalem rehn seme mehn mahs ako nan Kahnimw en Depit.+ 21 Aramas en Suda ko koaros eri ale Asaraia,*+ me sounpar 16+ oh kasapwiladahng ih nanmwarki pwehn wiliandi semeo Amasaia.+ 22 E onehda sapahl Elad+ oh kapwuredohng Suda mwurin nanmwarkio* eh kommoaldi rehn seme mehn mahs ako.+

23 Ni kaeisek limaun sounpar en Amasaia nein Sehoas nanmwarkien Suda, Seropoham+ nein Nanmwarki Sehoas en Israel wiahla nanmwarki nan Sameria, oh e kakaunki sounpar 41. 24 E doulahte wia dahme suwed mwohn silangin Siohwa. E sohte sohpeisang dihp koaros me Seropoham nein Nepat kahrehiong Israel en wiahda.+ 25 E kapwurehdo irepen Israel sang Lepo-amad*+ lel ni Sehden Arapa,*+ duwehte me Siohwa, Koht en Israel ketin mahsanih sang rehn sapwellime ladu Sona+ nein Amidai, soukohp me kohsang Kahd-ehper.+ 26 Pwe Siohwa ketin mahsanihier lokolok laud en Israel.+ Sohte emen me luhwehdi pwehn sewese Israel, me sohte sawasepe de me semwehmwe pil sohla mie. 27 Ahpw Siohwa ketin inoukidahr me e sohte pahn ketin irisasang eden Israel nin sampah.+ Ih eri ketin doadoahngki Seropoham nein Sehoas en doareirailla.+

28 A duwen soahng teikan nan poadopoad en Seropoham, soahng koaros me e wiahda oh duwen eh kehl, duwen eh pei oh duwen eh kapwurehdo Damaskus+ oh Amad+ ong Suda nan Israel, e sou ntinting nan pwuhken poadopoad en nanmwarkien Israel kan? 29 Seropoham eri kommoaldi rehn seme mehn mahs ako, rehn nanmwarkien Israel kan; oh nah pwutak Sekaraia+ wiliandi ih wiahla nanmwarki.

15 Ni kerieisek isuhwen sounpar en Nanmwarki Seropoham* en Israel, Asaraia*+ nein Nanmwarki Amasaia+ en Suda ahpw wiahla nanmwarki.+ 2 E sounpar 16 ni ahnsou me e wiahla nanmwarki, oh e kakaunki sounpar 52 nan Serusalem. Eden eh nohno iei Sekolaia mehn Serusalem. 3 E doulahte wia dahme pwung mwohn silangin Siohwa, duwehte me semeo Amasaia kin wia.+ 4 Ahpw, wasa ile kan sohte kohsang,+ oh aramas akan kin usehlahte wiewia meirong oh meirong ediniei kan pohn wasa ile pwukat.+ 5 Siohwa eri ketin kalokehki nanmwarkio tokutok, oh e tokutokte+ lao lel rahn me e mehla; oh e kousoan nan ehu ihmw tohrohr,+ nindoken nein nanmwarkio pwutak Sodam+ eh kin apwalih tehnpaso oh kopwung aramas en sahpwo.+ 6 A duwen soahng teikan nan poadopoad en Asaraia,+ soahng koaros me e wiahda, e sou ntinting nan pwuhken poadopoad en nanmwarkien Suda kan? 7 Asaraia eri kommoaldi rehn seme mehn mahs ako,+ oh re sarepedi ih rehn seme mehn mahs ako nan Kahnimw en Depit; oh nah pwutak Sodam wiliandi ih wiahla nanmwarki.

8 Ni kesilihsek waluhn sounpar en Nanmwarki Asaraia+ en Suda, Sekaraia+ nein Seropoham wiahla nanmwarkien Israel nan Sameria, oh e kakaunki sounpwong weneu. 9 E kin wia dahme suwed mwohn silangin Siohwa, duwehte me seme mehn mahs ako wiadahr. E sohte sohpeisang dihp kan me Seropoham nein Nepat kahrehiong Israel en wiahda.+ 10 Sallum nein Sapes eri uhwongada Sekaraia oh kemehla ih+ nan Ipleam+ oh e wiliandi ih wiahla nanmwarki. 11 A duwen soahng teikan nan poadopoad en Sekaraia, e ntinting nan pwuhken poadopoad en nanmwarkien Israel kan. 12 Met kapwaiada sapwellimen Siohwa mahsen ong Sehu: “Kadaudokomw kan lellahng dih kapahieu+ pahn mwohd nan mwoalen Israel.”+ Oh ih met me wiawi.

13 Sallum nein Sapes wiahla nanmwarki ni kesilihsek duwaun sounpar en Nanmwarki Usaia+ en Suda, oh e kakaunki sounpwong ehu pwon nan Sameria. 14 Menahem nein Kadi eri kohsang Tirsa+ kolahng Sameria oh kemehla Sallum+ nein Sapes nan Sameria oh e wiliandi ih wiahla nanmwarki. 15 A duwen soahng teikan nan poadopoad en Sallum oh uhwong me e koasoanehdi, e ntinting nan pwuhken poadopoad en nanmwarkien Israel kan. 16 Ih ahnsowo me Menahem kohsang Tirsa oh kamwomwala Tipsa oh koaros me mi loale oh wasa kan limwah, pwehki eh sohte ritingadahng ih ewen kehlo. E kamwomwala wasao oh tehrpeseng lih liseian kan.

17 Ni kesilihsek duwaun sounpar en Nanmwarki Asaraia en Suda, Menahem nein Kadi wiahla nanmwarkien Israel, oh e kakaunki sounpar eisek nan Sameria. 18 E doulahte wia dahme suwed mwohn silangin Siohwa. Erein eh mour, e sohte sohpeisang dihp koaros me Seropoham nein Nepat kahrehiong Israel en wiahda.+ 19 Nanmwarki Pul+ en Asiria ahpw kohdo nan sahpwo. Menahem kihong Pul silper dalend* 1,000, pwe Pul en utung ih oh kakehlailihada eh kakaun wehio.+ 20 Menahem eri kihsang silper sekel* 50 rehn emenemen aramas ndand oh kepwehpwe kan+ en Israel pwehn kihpene oh kihong nanmwarkien Asiria. Nanmwarkien Asiria eri pwurala oh sohte mihmi nan sahpwo. 21 A duwen soahng teikan nan poadopoad en Menahem,+ soahng koaros me e wiahda, e sou ntinting nan pwuhken poadopoad en nanmwarkien Israel kan? 22 Menahem eri kommoaldi rehn seme mehn mahs ako; oh nah pwutak Pekaia wiliandi ih wiahla nanmwarki.

23 Ni kelimeisek en sounpar en Nanmwarki Asaraia en Suda, Pekaia nein Menahem wiahla nanmwarkien Israel nan Sameria, oh e kakaunki sounpar riau. 24 E doulahte wia dahme suwed mwohn silangin Siohwa. E sohte sohpeisang dihp kan me Seropoham nein Nepat kahrehiong Israel en wiahda.+ 25 Eri nah opiser Peka+ nein Remalaia koasoanehdi en uhwongada Pekaia oh kemehla nan Sameria nan imwen doulik kehlail en tehnpesen nanmwarkio, iangahki Arkop oh Araia.* Ohl en Kilead 50 iang Peka; mwurin eh kemehla Pekaia, e wiliandi ih wiahla nanmwarki. 26 A duwen soahng teikan nan poadopoad en Pekaia, soahng koaros me e wiahda, e ntinting nan pwuhken poadopoad en nanmwarkien Israel kan.

27 Ni kelimeisek riaun sounpar en Nanmwarki Asaraia en Suda, Peka+ nein Remalaia wiahla nanmwarkien Israel nan Sameria, oh e kakaunki sounpar 20. 28 E doulahte wia dahme suwed mwohn silangin Siohwa, oh e sohte sohpeisang dihp kan me Seropoham nein Nepat kahrehiong Israel en wiahda.+ 29 Ni mwehin Nanmwarki Peka en Israel, Nanmwarki Tiklad-pileser+ en Asiria ahpw kohlongodo oh kalowehdi Ison, Apel-ped-maaka,+ Sanoa, Kedes,+ Eisor, Kilead+ oh Kalili, sapwen Napdali pwon,+ oh e kalipehla tohn sahpwo nan Asiria.+ 30 Osea+ nein Elah ahpw koasoanehdi en uhwong Peka nein Remalaia, oh e kemehla ih oh wiliandi ih wiahla nanmwarki ni kerieisek en sounpar en Sodam+ nein Usaia. 31 A duwen soahng teikan nan poadopoad en Peka, soahng koaros me e wiahda, e ntinting nan pwuhken poadopoad en nanmwarkien Israel kan.

32 Ni keriaun sounpar en Peka nein Remalaia nanmwarkien Israel, Sodam+ nein Nanmwarki Usaia+ en Suda ahpw wiahla nanmwarki. 33 E sounpar 25 ni ahnsou me e wiahla nanmwarki, oh e kakaunki sounpar 16 nan Serusalem. Eden eh nohno iei Serusa, nein Sadok serepein.+ 34 E doulahte wia dahme pwung mwohn silangin Siohwa, duwehte me seme Usaia kin wia.+ 35 Ahpw, wasa ile kan sohte kohsang, oh aramas akan kin usehlahte wiewia meirong oh meirong ediniei kan pohn wasa ile pwukat.+ Sodam me kauwada Ewen Kehl Powe en tehnpesen Siohwa.+ 36 A duwen soahng teikan nan poadopoad en Sodam, dahme e wiadahr, e sou ntinting nan pwuhken poadopoad en nanmwarkien Suda kan? 37 Ni ahnsowo Siohwa ketin kamwakid Resin nanmwarkien Siria oh Peka+ nein Remalaia pwe ira en tepida mahweniong Suda.+ 38 Sodam eri kommoaldi rehn seme mehn mahs ako oh seridi rehn seme mehn mahs ako nan Kahnimw en Depit seme mehn mahso. Oh nah pwutak Ahas wiliandi ih wiahla nanmwarki.

16 Ni kaeisek isuhwen sounpar en Peka nein Remalaia, Ahas+ nein Nanmwarki Sodam en Suda ahpw wiahla nanmwarki. 2 Ahas sounpar 20 ni ahnsou me e wiahla nanmwarki, oh e kakaunki sounpar 16 nan Serusalem. E sohte kin wia dahme pwung mwohn silangin Siohwa eh Koht duwehte me Depit seme mehn mahso wiadahr.+ 3 E kin idawehn elen nanmwarkien Israel kan,+ oh e pil meirongkihla nah pwutak nan kisiniei,*+ ni eh kin idawehn wiewia kasaut en wehi kan+ me Siohwa ketin kasarehsang mwohn mehn Israel kan. 4 E pil kin usehlahte wiewia meirong oh meirong ediniei kan pohn wasa ile kan,+ pohn dohl kan oh pahn tuhke losolos koaros.+

5 Ni ahnsowo, Nanmwarki Resin en Siria oh Peka nein Remalaia nanmwarkien Israel ahpw kohdahdo mahweniong Serusalem.+ Re kapilpene kahnimwo me Ahas mi ie. Ahpw re sohte kak kalowehdi kahnimwo. 6 Ni ahnsowo Nanmwarki Resin en Siria kihsang Elad+ oh kapwurelahng Edom, oh mwurin mwo e kasarehsang mehn Suhs kan* nan Elad. Oh mehn Edom kan pedolong nan Elad, oh re kousoanla wasao lao leledo rahnwet. 7 Ahas eri kadarala meninkeder kei rehn Nanmwarki Tiklad-pileser+ en Asiria, nda: “Ngehi sapwellimomwi ladu oh sapwellimomwi pwutak. Komw ketido oh doareiehsang nan pehn nanmwarkien Siria oh pehn nanmwarkien Israel, me mahmahweniong ie.” 8 Ahas eri ale silper oh kohl me dierek nan tehnpesen Siohwa oh nan wasahn nahk dipwisou kesempwal kan en tehnpesen nanmwarkio oh kadaralahng nanmwarkien Asiria nin duwen kisakis ehu.+ 9 Nanmwarkien Asiria eri wia dahme Ahas pekio, oh e kohla Damaskus oh kalowehdi oh kalipehla aramas ako Kir,+ oh e kemehla Resin.+

10 Nanmwarki Ahas eri kohla Damaskus pwehn tuhwong Nanmwarki Tiklad-pileser en Asiria. Ni eh kilangada pei sarawi me mi nan Damaskuso, Nanmwarki Ahas eri kadarala rehn samworo Uraisa pilahn en pei sarawio, me kasalehda mwomwen pei sarawio oh wiepe kan.+ 11 Samworo Uraisa+ eri kauwada pei sarawi ehu+ nin duwen kaweid koaros me Nanmwarki Ahas kadarodo sang Damaskus. Samworo Uraisa eri kanekehla eh kauwada pei sarawio mwohn Nanmwarki Ahas eh pwurodo sang Damaskus. 12 Ni nanmwarkio eh pwurodo sang Damaskus oh kilangada pei sarawio, e ahpw keiong mpen pei sarawio oh wiahda meirong powe.+ 13 Oh e pousehlahte wiahda eh meirong isihs kan oh eh meirong en krein kan en edinieida pohn pei sarawio; e pil wudekihdiong eh meirong en wain oh usupihki ntahn eh meirong en kaminimin kan powe. 14 Ih eri kamwakid pei sarawi+ prons me mi mwohn silangin Siohwa sang nan dewe mwohn tehnpaso, sang nanpwungen eh pei sarawio oh tehnpesen Siohwa, oh e kihdi ni paliepeng en eh pei sarawio. 15 Nanmwarki Ahas ahpw kehkehlingkihong samworo Uraisa:+ “Wiahiong meirong isihs en nimenseng,+ oh pil meirong en krein nin soutik,+ en nanmwarki meirong isihs oh meirong en krein, iangahki en aramas akan koaros meirong isihs, meirong en krein oh meirong en wain en edinieida pohn pei sarawi lapalapo. Ke pil pahn usupihki powe ntahn meirong isihs kan koaros oh ntahn meirong teikan koaros. A duwen pei sarawi pronso, I pahn medewe dahme I pahn wiahiong.” 16 Samworo Uraisa eri kapwaiada soahng koaros me Nanmwarki Ahas kehkehlingki.+

17 Oh pil Nanmwarki Ahas lupukpene lepin dihd keimw pahieu en kuruma kan+ oh kihsang peisin kan ni kuruma ko,+ oh e kihsang lapalahn peisin me adaneki Sehd pohn kouwol prons ko+ me kin utung oh kihdiong pohn tat takai ehu.+ 18 Oh e kihsang wasa me pweipweidio me kin kadoadoahk ong Sapad me kokouda ni tehnpas sarawio oh pil wenihmw me nanmwarkio kin pedolong nan tehnpesen Siohwa; e wiahda met pwehki nanmwarkien Asiria.

19 A duwen soahng teikan nan poadopoad en Ahas, dahme e wiadahr, e sou ntinting nan pwuhken poadopoad en nanmwarkien Suda kan?+ 20 Ahas eri kommoaldi rehn seme mehn mahs ako oh seridi rehn seme mehn mahs ako nan Kahnimw en Depit; oh nah pwutak Esekaia*+ wiliandi ih wiahla nanmwarki.

17 Ni kaeisek riaun sounpar en Nanmwarki Ahas en Suda, Osea+ nein Elah ahpw wiahla nanmwarkien Israel nan Sameria; e kakaunki sounpar duwau. 2 E doulahte wia dahme suwed mwohn silangin Siohwa, ahpw sohte nohn suwed duwehte nanmwarkien Israel kan mwowe. 3 Nanmwarki Salmaneser en Asiria ahpw kohdo mahweniong ih,+ oh Osea wiahla nah ladu oh tepida walahng ih kisakis kan.+ 4 Ahpw nanmwarkien Asiria esehda me Osea koasoanehdi uhwong ehu, pwe e kadarala meninkeder kei rehn Nanmwarki So en Isip+ oh sohla walahng nanmwarkien Asiria kisakis ko duwehte me e kin wia sounpar en mwowe ko. Kahrehda nanmwarkien Asiria salihedi ih oh kihdiong nan imweteng.

5 Nanmwarkien Asiria ahpw kohlongala nan sahpwo pwon, oh e lella Sameria oh kapilpene wasao erein sounpar siluh. 6 Ni keduwaun sounpar en Osea, nanmwarkien Asiria kalowehdi Sameria.+ Ih eri kalipehla+ aramas en Israel ko Asiria oh kahrehiong irail en kousoan nan Ala oh nan Apor limwahn pillap Kosan+ oh nan kahnimw en Media kan.+

7 Met wiawi pwehki aramas en Israel ko dipada ong Siohwa arail Koht, me ketin wairailsang sapwen Isip, sang pahn kaundahn Parao nanmwarkien Isip.+ Re ahpw kaudokiong* koht teikan.+ 8 Re kin idawehn tiahk en tohnwehi kan me Siohwa ketin kasarehsang mwohn mehn Israel kan, oh re kin idawehn tiahk me nanmwarkien Israel kan koasoanehdi.

9 Mehn Israel kan kin wiewia soahng kan me sohte pwung mwohn silangin Siohwa arail Koht. Re kin kauwada wasa ile kan nan ar kahnimw kan koaros,+ sang wasahn iroir* lel kahnimw kehl kehlail.* 10 Re kin wiahda uhr sarawi kan oh tuhke sarawi kan*+ pohn dohl ile kan koaros oh pahn tuhke losolos kan koaros;+ 11 oh re kin wiahda meirong ediniei pohn wasa ile kan koaros duwehte tohnwehi kan me Siohwa ketin kasarehla mwohrail.+ Re kin wia soahng suwed kan pwehn kansensuwedihala Siohwa.

12 Re kin usehlahte papah dikedik kasaut kan,*+ duwen met, Siohwa ketin mahsanihong irail: “Kumwail sohte pahn wia met!”+ 13 Siohwa kin ketin pousehlahte panawih Israel oh Suda sang sapwellime soukohp kan oh sounkilang kaudiahl kan koaros,+ mahsanih: “Kumwail sohpeisang elen amwail mour suwed kan!+ Kumwail kapwaiada ei kehkehlik kan oh ei koasoandi kan, mehkoaros me ntingdi nan kosonnedo pwon me I kehkehlingkihong samamwail mehn mahs ako, me I kihong kumwail sang nei ladu soukohp kan.” 14 Ahpw re sohte kin rong oh re kin keptakailahte duwehte* samarail mehn mahs ako me sohte kin pwoson Siohwa arail Koht.+ 15 Re kin doulahte soikala sapwellime koasoandi kan oh inou lap+ me e ketin wiahiong samarail mehn mahs ako oh sapwellime mehn kataman kan me e ketikihong irail pwehn panawih irail,+ oh re kin idawehn dikedik soh katepe kan+ oh wiahla aramas soh katepe kei,+ oh re kin alasang tohnwehi kan koaros limwahrail me Siohwa ketin kehkehlingkihong irail en dehr alasang.+

16 Re kin kesehla kehkehlik kan koaros en arail Kohto, Siohwa, oh re wiahda sansal en koupwul mete riau+ oh tuhke sarawi*+ pwoat oh re kin pwongih karis en nanleng*+ kan koaros oh papah Paal.+ 17 Re pil kin meirongkihla neirail pwutak kan oh serepein kan nan kisiniei,*+ re kin wia kosetipw+ oh rapahki kilel kan me kin kasalehda duwen ahnsou kohkohdo, oh re kin poadidiong* wia dahme suwed mwohn silangin Siohwa pwehn kansensuwedihala ih.

18 Siohwa eri ketin engiengda kowahlap pahn Israel, kahrehda e ketikihsang irail mwohn silangi.+ E sohte ketin mweidohng emen en luwehdi ihte keinek en Suda.

19 Suda pil sohte kapwaiada kehkehlik kan en Siohwa arail Koht;+ re pil kin idawehn tiahk me Israel kin wia.+ 20 Siohwa ketin soikala kadaudok en Israel kan koaros oh kanamenekihirailla oh ketikihong irail nan pehn sounkul kan, lao eh ketin keseirailla sang mwohn silangi. 21 E ketin katohrehla Israel sang kadaudok en Depit, oh re wiahiong Seropoham nein Nepat en wiahla nanmwarki.+ Ahpw Seropoham kahrehiong Israel en sohla idawehn Siohwa, oh e kahrehiong irail en wiahda dihp laud ehu. 22 Oh aramas en Israel kan kin weweid nan dihp koaros me Seropoham wiadahr.+ Re sohte sohpeisang mepwukat 23 lao Siohwa ketin kasareirailla sang mwohn silangi, duwehte me e ketin mahsanih sang rehn sapwellime ladu soukohp akan koaros.+ Israel eri kalipilipala sang uhdakeo wisiklahng Asiria,+ wasa me re mihmihte leledo rahnwet.

24 Nanmwarkien Asiria eri wahdo aramas akan sang Papilon, Kud, Appa, Amad, oh Separpaim+ oh koasoaneiraildi nan kahnimw kan en Sameria, wiliandi mehn Israel kan; re sapwenikihla Sameria oh kousoanla nan kahnimw ko. 25 Ni ar tepida kousoan wasao, re sohte kin kaudokiong* Siohwa. Eri Siohwa ketin kadarala laion kan rehrail,+ oh re kemehla ekei aramas akan. 26 Nanmwarkien Asiria ahpw rongada rohng wet: “Tohnwehi ko me komw ketikihdo oh koasoanehdi nan kahnimw en Sameria kan sohte ese pelien lamalam* en Koht en sahpwo. Eri e kin pousehla kadarodohng irail laion kan, me kin kemekemeirailla, pwehki sohte emen rehrail ese pelien lamalam en Koht en sahpwo.”

27 Nanmwarkien Asiria eri ruwese oh nda: “Kumwail kapwurehla emen samworo me kumwail wahsang wasao pwe en kousoanla wasao oh padahkihong irail pelien lamalam en Koht en sahpwo.” 28 Eri emen samworo me re wahsang Sameria ahpw pwurala oh kousoan nan Pedel,+ oh e tepida padahkihong irail duwen ar pahn kaudokiong Siohwa.+

29 Ahpw ehuehu tohnwehi wiahda pein ar koht,* oh re kihdi nan imwen kaudok kan me mi pohn wasa ile kan me mehn Sameria ko wiahda; ehuehu tohnwehi kin wia met nan ar kahnimw kan me re kin kousoan ie. 30 Aramas en Papilon kan eri wiahda dikedik en Sukkod-penod, aramas en Kud kan wiahda dikedik en Nerkal, aramas en Amad kan+ wiahda dikedik en Asima, 31 oh Mehn Appa kan wiahda dikedik en Nipas oh Tartak. Mehn Separpaim kan isikala neirail pwutak kan nan kisiniei ong Adramelek oh Anamelek, koht en Separpaim kan.+ 32 Mendahki re kin kaudokiong Siohwa, re kin idihada samworo kan sang pein ar aramas kan ong wasa ile kan, oh samworo pwukat kin doadoahk ong irail nan imwen kaudok me mi pohn wasa ile kan.+ 33 Kahrehda re kin kaudokiong Siohwa, ahpw re pil kin kaudokiong pein ar koht kan nin duwen pelien lamalam* en wehi kan me re kalipilipasang ie.+

34 Re kin idawehn arail pelien lamalam* en mahso leledo rahnwet. Sohte emen irail kin kaudokiong* Siohwa, sohte emen kin idawehn sapwellime koasoandi kan, kopwung kan, Kosonnedo, oh kehkehlik kan me Siohwa ketikihong kadaudok en Seikop kan, me e ketin wekidala edeo ong Israel.+ 35 Ni Siohwa eh ketin wiahda inou lap ehu rehn Israel,+ e ketin kehkehlingkihong irail: “Kumwail sohte pahn kaudokiong koht teikan, oh kumwail sohte pahn poaridiong irail de papah irail de wiahda meirong ong irail.+ 36 Ahpw kumwail pahn kaudokiong+ Siohwa me ketin waikumwaildo sang sapwen Isip sang ni sapwellime manaman lapalap oh nin lime kehlail+ oh ih me kumwail pahn poaridiong oh pahn wia meirong ong. 37 Oh ahnsou koaros, kumwail pahn idawehn ni keneinei koasoandi kan, kopwung kan, Kosonnedo oh kehkehlik me e ketin ntingihedi ong kumwail,+ oh kumwail sohte pahn kaudokiong koht teikan. 38 Oh kumwail sohte pahn manokehla inou lapo me I wiahiong kumwail,+ oh kumwail sohte pahn kaudokiong koht teikan. 39 Ahpw Siohwa amwail Koht me kumwail pahn kaudokiong, pwehki ih me pahn ketin kapitkumwailla sang nan pehn amwail imwintihti kan koaros.”

40 Ahpw tohnwehi pwukat sohte kin peikiong, oh re kin idawehn ar pelien lamalam* en mahso.+ 41 Eri, re tepida kaudokiong Siohwa,+ ahpw re pil kin papah ar sansal perperda kan. Neirail seri kan oh nein neirail seri kan pil kin wiewiahte met leledo rahnwet, duwehte me samarail mehn mahs ako wiadahr.

18 Ni kesiluhwen sounpar en Osea+ nein Elah nanmwarkien Israel, Esekaia+ nein Nanmwarki Ahas+ en Suda wiahla nanmwarki. 2 E sounpar 25 ni ahnsou me e wiahla nanmwarki, oh e kakaunki sounpar 29 nan Serusalem. Eden eh nohno iei Api* nein Sekaraia serepein.+ 3 E doulahte wia dahme pwung mwohn silangin Siohwa+ duwehte me Depit seme mehn mahso wiadahr.+ 4 Ih me kihsang wasa ile kan,+ sukpeseng uhr sarawi kan, oh pelehdi tuhke sarawio.*+ E pil kamwutepene serpent prons me Moses wiahdao;+ pwe lao lel ahnsowo aramas en Israel kan kin wiahiong met meirong ediniei oh re kin kahdaneki dikediko serpent prons.* 5 E kin likih Siohwa,+ Koht en Israel; sohte emen me duwehte ih nanpwungen nanmwarkien Suda kan koaros me momour mwuri oh pil me momour mwowe. 6 E kin tengediongete Siohwa.+ E sohte sohpeisang idawehn ih; e kin pousehlahte kapwaiada kehkehlik kan me Siohwa ketikihong Moses. 7 Oh Siohwa kin ketin ieiang ih. Ni soahng koaros me e kin wia, e kin mwekid ni loalokong. E pelianda nanmwarkien Asiria oh sohte papah ih.+ 8 E pil kalowehdi mehn Pilisdia kan+ lella Kasa oh sapwe kan, sang wasahn iroir* lel kahnimw kehl kehlail.*

9 Ni kapahieun sounpar en Nanmwarki Esekaia, me iei, keisuhwen sounpar en Osea+ nein Elah nanmwarkien Israel, Nanmwarki Salmaneser en Asiria ahpw kohdahdo mahweniong Sameria oh tepida kapilpene.+ 10 Ni imwin sounpar siluh me re kapikapil wasao, re ahpw kalowehdi;+ ni keweneun sounpar en Esekaia, me iei ni keduwaun sounpar en Nanmwarki Osea en Israel, Sameria lohdier. 11 Nanmwarkien Asiria eri kalipehla Israel+ nan Asiria oh koasoaneiraildi nan Ala oh nan Apor limwahn pillap Kosan oh nan kahnimw en Media kan.+ 12 Met wiawi pwehki re sohte kin rong kapitien Siohwa ar Koht ahpw re kin usehlahte kauwehla sapwellime inou lapo, mehkoaros me sapwellimen Siohwa ladu Moses kehkehlingki.+ Re sohte kin rong oh re pil sohte kin peikiong.

13 Ni kaeisek pahieun sounpar en Nanmwarki Esekaia, Senakerip nanmwarkien Asiria+ ahpw kohdahdo mahweniong kahnimw kehl kehlail koaros en Suda oh kaloweiraildi.+ 14 Nanmwarki Esekaia en Suda eri kadaralahng nanmwarkien Asiria nan Lakis, koasoi pwukat: “I patohwan sapwungalahr. Komw pweieksang mahweniong ie, oh I pahn patohwanohng komwi mehkoaros me komw ketin koasoanediong ie.” Nanmwarkien Asiria eri koasoanediong Nanmwarki Esekaia en Suda en pwain silper dalend* 300 oh kohl dalend 30. 15 Esekaia eri kihla silper koaros me kak dierek nan tehnpesen Siohwa oh nan wasahn nahk dipwisou kesempwal kan en tehnpesen nanmwarkio.+ 16 Ni ahnsowo Esekaia eri kihsang* wenihmw kan en tehnpas sarawi+ en Siohwa oh uhren wenihmw kan me Nanmwarki Esekaia en Suda pein kidimala,*+ ih eri kihla mepwukat rehn nanmwarkien Asiria.

17 Nanmwarkien Asiria eri kadarala rehn Nanmwarki Esekaia nan Serusalem,+ Tartan,* Rapsaris* oh Rapsake* iangahki lapalahn karis ehu sang Lakis.+ Re kohdahla Serusalem oh uhdi limwahn warawar en lepin leh powe, me mi ni ahl en wasahn doadoahk en sounlopwolopw kan.+ 18 Ni ar likwerih nanmwarkio en pedoila, Elaiakim+ nein Ilkaia, me kin apwalih tohn tehnpaso, Sepnah+ sekterio, oh Soha nein Asap me wia sounnting ahpw kohieila rehrail.

19 Rapsake eri ndaiong irail: “Menlau, ndaiong Esekaia, ‘Iet me nanmwarki lapalapo, nanmwarkien Asiria, mahsanih: “Ia poahsoanpen omw koapworopwor?+ 20 Ke kin ndinda, ‘Mie ei koasoandi ehu oh kehl en mahwen,’ ahpw mepwukat koasoi mwahl kei. Ihs me ke kin likih, me ke lemehkihda ken uhwong ie?+ 21 Kilang! Ke kin likih sawasepen ahlek wet me mwutpenehr, iei Isip,+ a ma aramas emen pahn idengek powe, e pahn ihrlong nan peh oh doakoahdi. Ih met mwomwen Parao nanmwarkien Isip ong irail koaros me kin likih ih. 22 Oh ma ke pahn ndaiong ie, ‘Se kin likih Siohwa at Koht,’+ kaidehn ih me ahneki wasa ile kan oh pei sarawi kan me Esekaia kihsangehr,+ ni eh ndaiong Suda oh Serusalem, ‘Kumwail anahne poaridi mwohn pei sarawi wet nan Serusalem’?”’+ 23 Eri, menlau, pwungkihda met rehn ei kaun nanmwarkien Asiria: I pahn kihong uhk oahs 2,000 ma ke pahn kak rapahkihda uwen tohtohn soundak oahs pwukat.+ 24 Eri, ia duwen omw pahn kak kapwure emente kepina me keieu tikitik nanpwungen nein ei kaun ladu kan, ni omw kin likih Isip ong kuruma kan oh soundak oahs kan? 25 Eri, ia duwe, I kohdadohng mahweniong sahpwet pwehn kamwomwala ni ei sohte ale mweimwei sang rehn Siohwa? Pein Siohwa me ketin mahsanihong ie, ‘Kohdahla mahweniong sahpwet oh kamwomwala.’”

26 Elaiakim nein Ilkaia oh Sepnah+ oh Soha ahpw ndaiong Rapsake:+ “Menlau, koasoiong omw ladu kat ni lokaiahn Aramaik,*+ pwe se kak wehwehki; komw dehr koasoiong kiht ni lokaiahn Suhs ni aramas kat me mi pohn kehlet ar rongorong.”+ 27 Ahpw Rapsake ndaiong irail: “Ia duwe, ongete omw kauno oh kowe me ei kaun kadariehdo I en koasoia mahsen pwukat? Met sou pil ong aramas pwukat me mwomwohd pohn kehlo, me pahn iang kumwail kang pein arail pwise oh nim pein arail kent?”

28 Rapsakeo eri kesihnenda oh werki ni ngihl laud ni lokaiahn Suhs, nda: “Kumwail rong mahsen en nanmwarki lapalapo, nanmwarkien Asiria.+ 29 Iet me nanmwarkio mahsanih, ‘Kumwail dehr mweidohng Esekaia en pitih kumwail, pwe e sohte kak doareikumwailsang nan pehi.+ 30 Oh kumwail dehr mweidohng Esekaia en kahrehiong kumwail en likih Siohwa ni eh pahn nda: “Siohwa uhdahn pahn ketin doareikitailla, oh kahnimw wet sohte pahn kohieng nan pehn nanmwarkien Asiria.”+ 31 Kumwail dehr rong Esekaia, pwe iet me nanmwarkien Asiria mahsanih: “Kumwail wiahda popohl rehi oh pekimahk,* oh emenemen kumwail pahn tungoale pein eh tuhkehn kreip oh eh tuhkehn pik oh pahn nimpil sang nan pein eh pwoaren nahk pihl, 32 lao I kohdo oh waikumwailla nan sahpw ehu me duwehte pein sapwamwail,+ sahpw en krein oh wain kapw, sahpw en pilawa oh mwetin kreip kan, sahpw en tuhkehn olip kan oh sukehn loangalap. Eri kumwail ahpw pahn mour oh sohte mehla. Kumwail dehr rong Esekaia, pwe e pitipitih kumwail ni eh nda, ‘Siohwa pahn ketin doareikitailla.’ 33 Ia duwe, mie koht en wehi kan me doarehla sapwarail kan sang nan pehn nanmwarkien Asiria? 34 Ia koht kan en Amad+ oh Arpad? Ia koht kan en Separpaim,+ Ena oh Ippa? Ia duwe, irail doarehla Sameria sang nan pehi?+ 35 Ihs nanpwungen koht koaros en sahpw pwukat me doarehla sapwarail sang nan pehi, pwe Siohwa en pil kak doarehla Serusalem sang nan pehi?”’”+

36 Ahpw aramas ako nennenlahte oh sohte nda mehkot pwehn sapengki, pwe kehkehlik en nanmwarkio iei, “Kumwail dehpa sapeng ih.”+ 37 Ahpw Elaiakim nein Ilkaia, me kin apwalih tohn tehnpaso, Sepnah sekterio, oh Soha nein Asap me wia sounnting eri kohdo rehn Esekaia ni ar likou ko eh teipeseng oh ndaiong ih en Rapsake koasoi ko.

19 Ni ahnsowohte me Nanmwarki Esekaia rongada met, e ahpw tehrpeseng eh likou ko oh likawihada likoun nsensuwed* oh kohlongala nan tehnpesen Siohwa.+ 2 Ih eri kadarala Elaiakim, me kin apwalih tohn tehnpaso, Sepnah sekterio, oh ohl mah kan en samworo kan, rehn soukohp Aiseia,+ nein Eimwos, oh irail koaros likawih likoun nsensuwed.* 3 Irail eri ndaiong Aiseia: “Iet me Esekaia mahsanih, ‘Rahn wet iei rahnen apwal, peneu,* oh kanamenek; pwe seri kan onopadahngehr ren ipwidi,* ahpw sohte kehl en neitik.+ 4 Mweinele Siohwa omw Koht pahn ketin karonge en Rapsake koasoi koaros, me nanmwarkien Asiria eh kaun kadarodo pwehn kepitki Koht ieias,+ oh e pahn ketin kapwukoahki ih koasoi ko me Siohwa omw Koht ketin karongeier. Eri, kapakapki+ irail me luhwehdi kan me pitila.’”

5 Nein Nanmwarki Esekaia ladu ko eri kohla rehn Aiseia,+ 6 oh Aiseia ndaiong irail: “Iet me kumwail pahn ndaiong amwail kauno, ‘Iet me Siohwa ketin mahsanih: “Ke dehr masak+ pwehki koasoi kan me ke rongehr, koasoi kan me sounpapah en nanmwarkien Asiriao lahlahwehkin ie.+ 7 Eri I pahn kamwakid eh madamadau, oh e pahn rong pakair ehu oh pwurala nan pein sapwe; oh I pahn wiahiong ih en mehkihla kedlahs nan pein sapwe.”’”+

8 Mwurin Rapsake eh rongada me nanmwarkien Asiria kohkohlahsangehr Lakis,+ e ahpw pwurala reh oh diarada me e mahmahweniong Lipna.+ 9 Nanmwarkio eri rongada koasoi duwen Nanmwarki Tiraka en Idiopia: “Iet, e kohieidohr pwehn mahweniong komwi.” Ih eri pwurehng kadarala meninkeder kan+ rehn Esekaia, nda: 10 “Iet me kumwail pahn ndaiong Nanmwarki Esekaia en Suda, ‘Ke dehr mweidohng omw Koht me ke kin likih en pitihiukedi ni eh pahn mahsanih: “Serusalem sohte pahn kohieng nan pehn nanmwarkien Asiria.”+ 11 Kilang! Ke rongehr dahme nanmwarki kan en Asiria wiahiong sahpw koaros ni ar kamwomwirailla.+ Ia duwe, kowe kelehpw me pahn pitila? 12 Ia duwe, koht en wehi kan me semei mehn mahs ako kauwehla kapitirailla? Ia Kosan, Aran,+ Risep oh aramas en Ihden kan me mi nan Telassar? 13 Ia nanmwarkien Amad, nanmwarkien Arpad, oh nanmwarkien kahnimw kan en Separpaim, Ena, oh Ippa?’”+

14 Esekaia eri ale kisinlikou ko sang nan pehn meninkeder ko oh wadek mepwukat. Esekaia eri kohdahla ni tehnpesen Siohwa oh kihpeseng mepwukat* mwohn silangin Siohwa.+ 15 Oh Esekaia ahpw tepida kapakap+ mwohn silangin Siohwa oh patohwan: “Maing Siohwa, Koht en Israel, me ketiket nan mwoale pohnangin* kerup kan,+ komwi kelehpw me Koht mehlel en wehi koaros en sampah.+ Komwi me ketin wiahda nanleng oh sampah. 16 Maing Siohwa, komw ketin karonge+ ni keneinei! Maing Siohwa, komw ketin mahsanih+ ni keneinei! Komw ketin karonge koasoi koaros me Senakerip kadarodo pwehn kepitki Koht ieias. 17 Maing Siohwa, e mehlel me nanmwarki kan en Asiria kamwomwalahr wehi kan oh sapwarail kan.+ 18 Oh irail keselahr arail koht kan nan kisiniei, pwehki kaidehn irail koht kei+ ahpw wiepen pehn aramas+ me wiawihdahsang tuhke oh takai. Ihme kahrehda irail kak kamwomwirailla. 19 Ahpw met, Maing Siohwa at Koht, komw kupwurkalahngan oh ketin kapitkitala sang nan peh, pwe wehi koaros en sampah en ese me komwi kelehpw me Koht, Maing Siohwa.”+

20 Aiseia nein Eimwos eri kadarala rohng wet rehn Esekaia: “Iet me Siohwa, Koht en Israel ketin mahsanih, ‘I rongehr omw kapakapkihong+ ie duwen Nanmwarki Senakerip en Asiria.+ 21 Iet mahsen me Siohwa ketin mahsanihong ih:

“Nein Saion serepein meipwon kin mwamwahlikin uhk oh kepitkin uhk.

Nein Serusalem serepein kin tuwelekiong uhk.

22 Ihs me ke kepitki oh lahlahwe?+

Iei ong Koht Sarawi en Israel!+

I pahn pelehdihsang eh sidar ile kan, eh tuhke suniper keieu mwahu kan.

I pahn pedolong nan eh wasahn ruk me keieu doh kan, eh nanwel me keieu diren tuhke kan.

25 Ia duwe, ke sohte rong? Sang mahsie e koasoansoandier.*+

Sang rahn samwalahr ko I kaunopadahr.*+

Met I pahn wahdo.+

Ke pahn wekidohng kahnimw kehl kehlail kan ong ni koasoakoasoak en mohn ihmw kan.+

29 “‘Oh met pahn wia kilel ong uhk:* Pahr wet kumwail pahn tungoale dahme pein wosada;* oh ni keriaun sounpar, kumwail pahn tungoale krein me wosada sang met;+ ahpw ni kesiluhwen sounpar kumwail pahn kamwarak werentuhke oh dolung, oh kumwail pahn padok mwetin kreip kan oh tungoale wahrail kan.+ 30 Aramas en Suda kan me pitila, irail me luhwehdi kan,+ pahn kadarala kalewe pah oh kapwarehda wah powe. 31 Pwe me luhwehdi kan pahn kohieisang nan Serusalem oh me pitila kan sang pohn Nahna Saion. Siohwa kaunen karis en sounpei pahn ketin ngoangki wia met.+

32 “‘Kahrehda iet me Siohwa ketin mahsaniheki duwen nanmwarkien Asiria:+

35 Nipwongohte, sapwellimen Siohwa tohnleng men eri kohla oh kemehla ohl 185,000 nan kahnimpwal en mehn Asiria kan.+ Ni ahnsou me aramas ako sangkenei pirida, irail kilangada paliwar mehla ko koaros.+ 36 Eri Nanmwarki Senakerip en Asiria ahpw mweselda oh pwurala Ninipe+ oh mihmi wasao.+ 37 Oh ni eh wie poarpoardi nan imwen kaudok en eh koht Nisrok, pein nah pwutak ko Adramelek oh Sareser kemehkihla ih kedlahs+ oh mwuri tangalahng sapwen Ararat.+ Oh nah pwutak Esaradon+ wiliandi ih wiahla nanmwarki.

20 Ni rahn ako Esekaia soumwahuda oh pahn kereniongehr mehla.+ Soukohp Aiseia nein Eimwos eri kohdo oh ndaiong ih, “Iet me Siohwa ketin mahsanih: ‘Kihong tohnimwomwo koasoandi kan, pwe ke pahn mehla; ke sohte pahn mwahula.’”+ 2 Esekaia eri sohpeiong ni dihdo oh tepida kapakapohng Siohwa: 3 “Maing Siohwa, I patohwan peki rehmwi, komw kupwurkalahngan oh ketin tamataman duwen ei kin kekeid mwohn silangomwi ni lelepek oh ni mohngiong unsek, oh I kin wia dahme mwahu mwohn silangomwi.”+ Esekaia eri tepida sengiseng kowahlap.

4 Aiseia saikinte lella nanwerengen wasa me kelpeneo a Siohwa ketin mahsanihong ih:+ 5 “Pwurala oh ndaiong Esekaia, kaunen nei aramas akan, ‘Iet me Siohwa, Koht en semomw mehn mahso Depit ketin mahsanih: “I karongeier omw kapakap. I kilangehr pilen mesomw kan.+ Met I pahn kamwahwihiukala.+ Ni kesiluhwen rahn ke pahn kohdahla ni tehnpesen Siohwa.+ 6 I pahn kapatahiong omw mour* sounpar 15, oh I pahn doarehla kowe oh kahnimw wet sang nan pehn nanmwarkien Asiria,+ oh I pahn pere kahnimw wet pwehki ngehi oh pwehki ei ladu Depit.”’”+

7 Aiseia eri nda: “Wahdo pik madekeng kan me idaidpene.” Irail eri wahdo oh kihong ni mpwoso, mwurin mwo e ahpw ekisekis mwahula.+

8 Esekaia eri idek rehn Aiseia: “Ia kilel+ me pahn kasalehda me Siohwa pahn ketin kamwahwihiehla oh me I pahn kohdahla ni tehnpesen Siohwa ni kesiluhwen rahn?” 9 Aiseia eri sapeng: “Ih kilel en met sang Siohwa pwehn kasalehiong uhk me Siohwa pahn ketin kapwaiada mahsen kan me e ketin mahsanihier: Ke men mwete me mi pohn kehndakeo* en kohla kahk eisek mwowe de kahk eisek mwuri?”+ 10 Esekaia eri nda: “E mengeiong mwetehn en kohla kahk eisek mwowe sang kahk eisek mwuri.” 11 Soukohp Aiseia eri likweriong Siohwa, oh E ketin wiahiong mwete me mi pohn en Ahas kehndakeo en pwurala mwuri ni kahk eisek mwurin eh kohdihsangehr pohn kehndake ko.+

12 Ni ahnsowo nanmwarkien Papilon, Perodak-paladan nein Paladan, ahpw kadaralahng Esekaia kisinlikou kan oh kisakis ehu, pwe e rongada me Esekaia soumwahuda.+ 13 Esekaia eri kasamwo* irail oh kasalehiong irail eh wasahn nahk dipwisou kesempwal kan koaros+—silper, kohl, leh palsam* oh leh kesempwal teikan, eh imwen nahk dipwisoun mahwen kan, oh mehkoaros me dierek nan eh wasahn nahk dipwisou kesempwal kan. Sohte mehkot ehu me Esekaia sohte kasalehiong irail nan tehnpese oh nan eh wehi pwon.

14 Mwurin mwo soukohp Aiseia eri kohla rehn Nanmwarki Esekaia oh idek reh: “Dahme ohl pwukat nda, oh ia wasa irail kohsang ie?” Esekaia eri nda: “Irail kohsang sahpw doh ehu, sang Papilon.”+ 15 Aiseia eri idek: “Dahme irail kilang nan tehnpasomwi?” Esekaia eri sapengki: “Irail kilang mehkoaros nan tehnpesei. Sohte mehkot ehu me I sohte kasalehiong irail nan ei wasahn nahk dipwisou kesempwal kan.”

16 Aiseia eri ndaiong Esekaia: “Rong mahsen en Siohwa,+ 17 Siohwa ketin mahsanih: ‘Kilang! Rahn akan me pahn kohdo, oh mehkoaros me mi nan tehnpasomwi oh mehkoaros me semomw mehn mahs ako nekidalahr leledo rahnwet pahn wisiklahng Papilon.+ Sohte mehkot ehu pahn luhwehdi. 18 Oh ekei kadaudokomw kan me pahn ipwidi pahn wisiksang+ oh pahn wiahla lapalap akan nan tehnpesen nanmwarkien Papilon.’”+

19 Esekaia eri ndaiong Aiseia: “Mahsen en Siohwa me komw koasoiahn me mwahu.”+ Ih eri kapatahiong: “E mwahu ma e pahn mie popohl oh onepek mwahu* erein ei mour.”*+

20 A duwen soahng teikan nan poadopoad en Esekaia, oh duwen eh kehl koaros oh duwen eh wiahda lepin leh+ oh warawar pwe pihl en kohlongala nan kahnimwo,+ e sou ntinting nan pwuhken poadopoad en nanmwarkien Suda kan? 21 Esekaia eri kommoaldi rehn seme mehn mahs ako;+ oh nah pwutak Manase+ wiliandi ih wiahla nanmwarki.+

21 Manase+ sounpar 12 ni ahnsou me e wiahla nanmwarki, oh e kakaunki sounpar 55 nan Serusalem.+ Eden eh nohno iei Epsipa. 2 E kin wia dahme suwed mwohn silangin Siohwa, oh e kin idawehn wiewia kasaut en wehi kan+ me Siohwa ketin kasarehsang mwohn aramas en Israel kan.+ 3 E pwurehng kauwada wasa ile kan me seme Esekaia kauwelahr,+ oh e wiahda pei sarawi kan ong Paal oh tuhke sarawi* pwoat,+ duwehte me Eihap nanmwarkien Israel wiadahro.+ Oh e kin pwongih karis en nanleng kan koaros* oh papah mepwukat.+ 4 E pil kauwada pei sarawi kan nan tehnpesen Siohwa,+ wasa me Siohwa ketin mahsanih: “Nan Serusalem, I pahn ketikihdi mwarei.”+ 5 Oh e kauwada pei sarawi kan ong karis en nanleng kan koaros*+ nan wasa riau me kelpene nan tehnpesen Siohwa.+ 6 Oh e meirongkihla nah pwutak nan kisiniei;* e kin wia akmanaman, rapahki kilel kan me kin kasalehda duwen ahnsou kohkohdo,+ oh idihada sounwunahni kan oh sounkosetipw kan.+ E kin wiahda suwed me inenen laud mwohn silangin Siohwa, pwehn kansensuwedih.

7 E kihdi sansal perperda en tuhke sarawi*+ me e wiahda nan tehnpaso wasa me Siohwa ketin mahsanihong Depit oh nah pwutak Solomon: “Nan tehnpas wet oh Serusalem me I piladahr sang nan keinek en Israel koaros, I pahn kihdi mwarei kohkohlahte.+ 8 Oh I sohte pahn pwurehng wiahiong Israel en kohkohsang nan sahpw me I kihong samarail mehn mahs ako,+ ma re kanahieng kapwaiada mehkoaros me I kehkehlingkihong irail,+ Kosonnedo pwon me ei laduwo Moses ruwesehkin irail en idawehn.” 9 Ahpw re sohte peikiong, oh Manase kin pousehlahte kaweid sapwungih irail. E kin kahrehiong irail en wiahda soahng suwed kan me laudsang wehi kan me Siohwa ketin kamwomwala mwohn mehn Israel kan.+

10 Siohwa kin ketin pousehlahte mahsen sang sapwellime ladu soukohp kan,+ mahsanih: 11 “Manase nanmwarkien Suda wiadahr soahng kasaut pwukat koaros; e wiahda soahng suwed kan laudsang mehn Amor kan+ me momour mwowe,+ oh e kahrehiong Suda nan dihp sang eh dikedik kasaut kan.* 12 Kahrehda iet me Siohwa, Koht en Israel ketin mahsanih: ‘Iet I pahn wadohng Serusalem+ oh Suda kahpwal ehu me pahn kahrehiong mehmen me rong duwen met en pwuriamweikihla.*+ 13 Oh I pahn waikpeseng pohn Serusalem sahl en sosohng+ me kadoadoahk ong Sameria+ oh doadoahngki dipwisoun kainene mehkot* me kadoadoahk ong peneinei en Eihap,+ oh I pahn limwihasang Serusalem, duwehte emen eh limwihada pwohl ehu oh wekidedi.+ 14 I pahn kesehla luhwen ei sohso,+ oh kihirailla nan pehn arail imwintihti kan, oh arail imwintihti kan koaros pahn salihiraildi oh kulihasang arail kepwe kan,+ 15 pwehki irail wiahda dahme suwed mwohn silangi oh pousehlahte kansensuwedih ie sang rahn me samarail mehn mahs ako pedoisang Isip lao lel rahnwet.’”+

16 Likin dihp kan me Manase kahrehiong Suda en dipikihda ni arail wia dahme suwed mwohn silangin Siohwa, e pil kakerehdi ntahn aramas soh dipe kan ni uwe ieu me inenen laud me kak kadirehla Serusalem sang apali lel apali.+ 17 A duwen soahng teikan nan poadopoad en Manase oh soahng koaros me e wiahda oh dihp kan me e wiahda, e sou ntinting nan pwuhken poadopoad en nanmwarkien Suda kan? 18 Manase eri kommoaldi rehn seme mehn mahs ako oh seridi nan mwetuwel en tehnpese, nan mwetuwel en Ussa;+ oh nah pwutak Amon wiliandi ih wiahla nanmwarki.

19 Amon+ sounpar 22 ni ahnsou me e wiahla nanmwarki, oh e kakaunki sounpar riau nan Serusalem.+ Eden eh nohno iei Mesullemed nein Arus, mehn Sotpa. 20 E doulahte wia dahme suwed mwohn silangin Siohwa, duwehte me seme Manase wiadahr.+ 21 E kin kekeid nan ahl koaros me semeo kin keid loale, oh e pousehlahte papah oh poaridiong dikedik kasaut kan me semeo kin papah.+ 22 Ih eri kesehla Siohwa, Koht en seme mehn mahs ako, oh e sohte kin idawehn elen Siohwa.+ 23 Kedekedeo nein Amon ladu ko ahpw koasoanehdi ren uhwong ih oh kemehla nanmwarkio nan tehnpeseo. 24 Ahpw aramas akan en sahpwo kemehla irail ako koaros me koasoanehdi ren uhwong Nanmwarki Amon, oh re wiahiong nah pwutak Sosaia en wiliandi ih wiahla nanmwarki.+ 25 A duwen soahng teikan nan poadopoad en Amon, dahme e wiadahr, e sou ntinting nan pwuhken poadopoad en nanmwarkien Suda kan? 26 Irail eri sarepedi ih nan eh sousou nan mwetuwel en Ussa,+ oh nah pwutak Sosaia+ wiliandi ih wiahla nanmwarki.

22 Sosaia+ sounpar waluh ni ahnsou me e wiahla nanmwarki, oh e kakaunki sounpar 31 nan Serusalem.+ Eden eh nohno iei Sedida nein Adaia mehn Poskad.+ 2 E kin wia dahme pwung mwohn silangin Siohwa oh kin kekeid nan ahl koaros me seme mehn mahso Depit kin keid loale,+ oh e sohte kin wetla ni palimaun de palimeing.

3 Ni kaeisek waluhn sounpar en Nanmwarki Sosaia, nanmwarkio kadarala sekteri Sapan, nein Asalaia, nein Mesullam ni tehnpesen Siohwa,+ oh nda: 4 “Kohla rehn samworo lapalap Ilkaia,+ oh ndaiong ih en kihpene mwohni koaros me kin wisikdohng nan tehnpesen Siohwa,+ me silepen wenihmw ko alehsang aramas akan.+ 5 Mwohnio en kohwong irail kan me idihdida pwe ren apwalih doadoahk en tehnpesen Siohwa, oh re pahn uhd kihla mwohnio ong tohndoadoahk kan me kin kamwahwihala wasa ohla kan* nan tehnpesen Siohwa,+ 6 me iei, tohndoadoahk saman kan, sounkou ihmw kan, sounwia takai kan; oh irail pahn doadoahngki mwohnio pwe ren pwainda tuhke kan oh takai perperda kan pwe ren kamwahwihala tehnpaso.+ 7 Ahpw sohte anahnepen aramas en dawih mwohni ko me re ale, pwehki irail aramas likilik kei.”+

8 Mwuhr samworo lapalap Ilkaia ndaiong sekteri Sapan:+ “I diaradahr pwuhken Kosonnedo+ nan tehnpesen Siohwa.” Ilkaia eri kihong Sapan pwuhko, ih eri tepida wadek.+ 9 Sekteri Sapan eri kohla rehn nanmwarkio oh ndaiong ih: “Sapwellimomwi ladu ko ale mwohni ko me dierek nan tehnpaso, oh re kin kihla mwohni ko rehn irail kan me idihdida pwe ren apwalih doadoahk en tehnpesen Siohwa.”+ 10 Sekteri Sapan pil ndaiong nanmwarkio: “Mie pwuhk ehu+ me samworo Ilkaia kihong ie.” Sapan eri tepida wadek pwuhko mwohn nanmwarkio.

11 Ni ahnsowohte me nanmwarkio rongada mahsen kan en pwuhken Kosonnedo, e ahpw tehrpeseng eh likou ko.+ 12 Nanmwarkio eri ruwese samworo Ilkaia, Ahikam+ nein Sapan, Akpor nein Maikaia, sekteri Sapan oh Asaia nein nanmwarki laduwo: 13 “Kumwail kohla kalelapek rehn Siohwa, ong ngehi, ong aramas akan, oh ong Suda pwon me pid mahsen kan en pwuhk wet me dierekda; pwe engieng en Siohwa ong kitail me inenen laud,+ pwehki samatail mehn mahs ako sohte kin peikiong mahsen kan en pwuhk wet. Re sohte kin kapwaiada mehkoaros me ntingdier me pid kitail.”

14 Samworo Ilkaia, Ahikam, Akpor, Sapan oh Asaia eri kohla rehn lih soukohp Ulda.+ E pwoudiki Sallum nein Tikpa nein Aras, me kin apwalih likou kan, oh liho kin kousoan nan Pali Keriau en Serusalem; oh irail ahpw koasoiong ih wasao.+ 15 Liho ahpw ndaiong irail: “Iet me Siohwa, Koht en Israel ketin mahsanih, ‘Kumwail padahkihong ohl me kadarkumwaildo rehi: 16 “Iet me Siohwa ketin mahsanih, ‘I pahn wahdo kahpwal ong wasaht oh towe kan. Mahsen koaros en pwuhko me nanmwarkien Suda wadekadahr pahn pweida.+ 17 Pwehki re keseiehla oh wiahda meirong ediniei ong koht teikan+ pwehn kansensuwedihkin ie arail doadoahk koaros,+ I pahn kasalehiong wasaht ei engieng oh e sohte pahn tokedi.’”+ 18 Ahpw ong nanmwarkien Suda me kadarkumwaildo pwehn kalelapek rehn Siohwa, iet me kumwail pahn ndaiong ih, “Iet me Siohwa, Koht en Israel ketin mahsanih: ‘Me pid mahsen ko me ke rongehr, 19 pwehki omw mohngiong mwekidki* oh ke aktikitikla+ mwohn silangin Siohwa ni omw rongada dahme I mahsaniheki wasaht oh towe kan—me re pahn wiahla mehkot kamasepwehk ehu oh mehn keria ehu—oh ke tehrpeseng omw likou kan+ oh sengiseng mwohn silangi, I pil karongeiuk, Siohwa me ketin mahmahsen. 20 Ihme kahrehda ke pahn mehla oh seridi duwehte semomw mehn mahs ako oh ke pahn kommoaldi nan omw sousou ni popohl, oh mesomw kan sohte pahn kilang kahpwal koaros me I pahn wadohng wasaht.’”’” Irail eri walahng nanmwarkio rohng wet.

23 Nanmwarkio eri ilekla oh re ekerodo ohl mah kan koaros en Suda oh Serusalem.+ 2 Mwurin mwo nanmwarkio eri kohdahla ni tehnpesen Siohwa iangahki aramas koaros en Suda, tohn Serusalem kan koaros, samworo kan, soukohp akan—aramas akan koaros, sang me pwulopwul lel me mah. E wadekohng irail mahsen koaros en pwuhken+ inou lapo+ me dierek nan tehnpesen Siohwa.+ 3 Nanmwarkio eri kesihnenda ni uhro oh wiahda inou lap ehu* mwohn silangin Siohwa,+ me e pahn idawehn Siohwa oh peikiong sapwellime kehkehlik kan, mehn kataman kan oh koasoandi kan sang nan eh mohngiong unsek oh mour* unsek ni eh pahn kapwaiada mahsen kan en inou lap wet me ntingdi nan pwuhk wet. Oh aramas ako koaros pwungki inou lap wet.+

4 Nanmwarkio eri ruwese samworo lapalap Ilkaia,+ samworo teikan oh silepen wenihmw kan ren wahieisang nan tehnpas sarawi en Siohwa dipwisou koaros me wiawihda ong Paal, ong tuhke sarawio,*+ oh ong karis en nanleng kan koaros.* Ih eri isikala mepwukat likin Serusalem ni wasa ukedi en Kidron, oh e wahla pehs ko Pedel.+ 5 Ih eri kasarehsang samworo en koht en liki kan me nanmwarkien Suda kan idihada pwe ren wiahda meirong ediniei pohn wasa ile kan nan kahnimw en Suda kan oh wasa kan limwahn Serusalem, oh pil irail kan me kin wiahda meirong ediniei ong Paal, ketipin, maram, pwihnen usu kan oh ong karis en nanleng kan koaros.*+ 6 E wahieisang tuhke sarawio*+ nan tehnpesen Siohwa oh wahla ni irepen Serusalem, ni Wahun Kidron oh e isikala tuhke sarawio+ nan Wahun Kidron oh irispene lao e wiahla pwelpwar oh kamwarakseli pohn sousoun me semwehmwe kan.+ 7 E pil karangkehdi imwen ohlen netiki paliwararail kan*+ me mi nan tehnpesen Siohwa oh wasa me lih akan kin pahda ihmw likou ong tuhke sarawi.*

8 Ih eri wahsang samworo kan koaros nan kahnimw en Suda kan, oh e kasaminehla* wasa ile kan me samworo kan kin wiahda meirong ediniei, sang Kepa+ lel Peersipa.+ E pil karangkehdi wasa ile kan me mi ni wasahn pedolong en ewen kehl en Sosua kaunen kahnimwo, me mi ni palimeing ni aramas eh kin pedolong ni ewen kelen kahnimwo. 9 Samworo en wasa ile kan sohte kin papah ni pei sarawi en Siohwa nan Serusalem,+ ahpw re kin iang riarail kan tungoale pilawa me sohte doal ihs. 10 E pil kasaminehla* Doped,+ me mi nan Wahun Innom,*+ kahrehda sohte emen kak meirongkihla nah pwutak de serepein nan kisiniei* ong Molek.+ 11 Oh e keinapwihdi oahs kan me nanmwarkien Suda kan kin kasarawihong* ketipin ren pedolong nan tehnpesen Siohwa, sang en Nadan-melek, emen lapalap en tehnpaso, eh pereo,* me mi ni palangko; oh e isikala kuruma kan me kin kasarawihong ketipin.+ 12 Nanmwarkio pil karangkehdi pei sarawi kan me nanmwarkien Suda ko kihdi pohn+ en Ahas perehn powe, pil iangahki pei sarawi kan me Manase kihdi nan wasa riau me kelpene ko en tehnpesen Siohwa.+ E kamwutepene mepwukat oh kamwarakpeseng pwelpar nan Wahun Kidron. 13 Oh nanmwarkio kasaminehla* wasa ile kan me mi mwohn Serusalem me mi ni palieir* en Nahnahn Mwomwla,* me Solomon nanmwarkien Israel kauwada ong Asdarde koht lih kasaut en mehn Saidon kan; oh ong Kemos koht kasaut en mehn Mohap kan; oh ong Milkom+ koht kasaut en mehn Ammon kan.+ 14 E kapisetikihpene uhr sarawi kan oh pelehdihsang tuhke sarawi* kan+ oh kadirehkihla tihn aramas wasa pwukat. 15 E pil karangkehdi pei sarawi nan Pedel oh wasa ile me Seropoham nein Nepat wiahdao me kahrehiong Israel en dipada.+ Mwurin eh karangkehdi pei sarawio oh wasa ileo, e isikala wasa ileo oh irispene mehkoaros en wiahla pwelpar, oh isikala tuhke sarawio.*+

16 Ni Sosaia eh sohpeila oh kilangada sousou kan pohn nahnao, e ahpw kihsang tih kan nan sousou ko oh isikala pohn pei sarawio oh kasaminehla.* Met wiawiher duwehte sapwellimen Siohwa mahsen me ohlen Koht mehlelo kohpadahr.+ 17 Ih eri nda: “I kilang takain sousou ehu. Ahn ihs sousowo?” Aramas akan en kahnimwo ahpw ndaiong ih: “Iei sousoun ohlen Koht mehlelo sang Suda+ me kohpada mepwukat me komw wiahiongehr pei sarawi en Pedel.” 18 Ih eri nda: “Kumwail dehr sair tih kan, mweidohng en mihmihte.” Irail eri sohte sair tih ko, oh pil tihn soukohpo me kohsang Sameria.+

19 Sosaia pil kihsang imwen kaudok koaros me mi pohn wasa ile kan nan kahnimw kan en Sameria,+ me nanmwarkien Israel kan kauwada pwehn kansensuwedihki Koht, oh e wiahiong soahngohte me e wiadahr nan Pedel.+ 20 Ih eri meirongkihla pohn pei sarawi ko samworo en wasa ile kan koaros me mi mwo, oh e isikala tihn aramas akan powe.+ Mwurin mwo e pwurala Serusalem.

21 Nanmwarkio eri kehkehlingkihong aramas akan koaros: “Kumwail wia Pahsohpa+ ong Siohwa amwail Koht duwehte me ntingdier nan pwuhken inou lap wet.”+ 22 Sohte Pahsohpa ehu me duwehte met, me wiawi sangete ahnsou me sounkopwung kan kin kopwung Israel de erein kaundahn nanmwarkien Israel kan oh nanmwarkien Suda kan.+ 23 Ni kaeisek waluhn sounpar en Nanmwarki Sosaia, Pahsohpa wet ong Siohwa wiawi nan Serusalem.

24 Sosaia pil kasohrehla sounwunahni kan, sounkosetipw kan,+ sansal en derapim kan,*+ dikedik kasaut kan* oh soahng kasaut kan koaros me pwarada nan sapwen Suda oh Serusalem, pwehn kapwaiada mahsen kan en Kosonned+ me ntingdi nan pwuhko me samworo Ilkaia diarada nan tehnpesen Siohwa.+ 25 Sohte nanmwarki men mwowe me duwehte ih, me pwurodohng Siohwa ni eh idawehn Kosonned en Moses pwon nan eh mohngiong unsek oh eh mour*+ unsek oh eh kehl unsek; pil sohte emen duwehte ih me pwarada mwuri.

26 Ahpw Siohwa sohte ketin katokehdi sapwellime engieng kowahlap ong Suda pwehki soahng kasaut kan koaros me Manase wiadahr pwehn kansensuwedihki Ih.+ 27 Siohwa ketin mahsanih: “I pil pahn kihsang Suda mwohn silangi,+ duwehte ei kihsangehr Israel;+ oh I pahn soikala kahnimw wet Serusalem me I pilada, oh tehnpaso me I mahsaniheki, ‘Mwarei pahn mihmi mwo.’”+

28 A duwen soahng teikan nan poadopoad en Sosaia, soahng koaros me e wiahda, e sou ntinting nan pwuhken poadopoad en nanmwarkien Suda kan? 29 Ni mwehin Sosaia, Parao Neko nanmwarkien Isip kolahng tuhwong nanmwarkien Asiria ni Pillap Iupreitis, oh Nanmwarki Sosaia kolahng peiong ih; ahpw ni Neko eh kilangada Sosaia, e kemehla ih nan Mekiddo.+ 30 Nah ladu ko eri kidahng paliwereo pohn kuruma ehu oh walahng Serusalem sang Mekiddo oh sarepedi ih nan eh sousou. Eri aramas akan en sahpwo ahpw ale Sehoahas nein Sosaia oh keiehdi ih oh kasapwiladahng ih nanmwarki pwehn wiliandi semeo.+

31 Sehoahas+ sounpar 23 ni ahnsou me e wiahla nanmwarki, oh e kakaunki sounpwong siluh nan Serusalem. Eden eh nohno iei Amudal+ nein Seremaia mehn Lipna. 32 E tepida wia dahme suwed mwohn silangin Siohwa, duwehte soahng koaros me seme mehn mahs ako wiadahr.+ 33 Parao Neko+ salihedi ih ni Ripla+ nan sapwen Amad, pwe en sohla kakaun nan Serusalem, oh mwuri e koasoanediong Suda en pwain silper dalend* 100 oh kohl dalend ehu.+ 34 Parao Neko pil kasapwilada Elaiakim nein Sosaia en wiliandi semeo Sosaia wiahla nanmwarki oh wekidala edeo ong Sehoiakim; ahpw e ale Sehoahas oh wahla Isip,+ wasa me e kedekedeo mehla.+ 35 Sehoiakim kihong Parao silper oh kohl, ahpw e anahne rikada daksis sang aramas akan pwehn kihda silper me Parao idingkihong. E alehsang emenemen aramas en sahpwo uwen laud en silper oh kohl me koasoandier pwehn kihong Parao Neko.

36 Sehoiakim+ sounpar 25 ni ahnsou me e wiahla nanmwarki, oh e kakaunki sounpar 11 nan Serusalem.+ Eden eh nohno iei Sepida nein Pedaia mehn Ruma. 37 E doulahte wia dahme suwed mwohn silangin Siohwa,+ duwehte soahng koaros me seme mehn mahs ako wiadahr.+

24 Ni mwehin Sehoiakim, Nanmwarki Nepukadnesar+ en Papilon ahpw kohdo mahweniong ih, oh Sehoiakim wiahla nah ladu erein sounpar siluh. Ahpw e uhwongada Nepukadnesar. 2 Siohwa eri ketin tepida kadaralahng Sehoiakim pwihnen loallap en mehn Kaldia kei,+ mehn Siria kei, mehn Mohap kei oh mehn Ammon kei. E ketin pousehlahte kadarirailla nan Suda pwe ren kauwehla wasao, duwehte mahsen en Siohwa+ me e ketin mahsaniher sang rehn sapwellime ladu soukohp akan. 3 Siohwa ketin ruwese met en wiawihong Suda, pwehn ketikihsang irail mwohn silangi+ pwehki dihp koaros me Manase wiadahr,+ 4 oh ntahn aramas soh dipe kan me e kakerehdi,+ pwe e kadirehkihla Serusalem ntahn aramas soh dipe kan oh Siohwa sohte ketin kupwurki mahkohng.+

5 A duwen soahng teikan nan poadopoad en Sehoiakim, soahng koaros me e wiahda, e sou ntinting nan pwuhken poadopoad en nanmwarkien Suda kan?+ 6 Sehoiakim eri kommoaldi rehn seme mehn mahs ako;+ oh nah pwutak Sehoiakin wiliandi ih wiahla nanmwarki.

7 Nanmwarkien Isip sohla pwurehng kohieila sang nan sapwe, pwe nanmwarkien Papilon kihsang mehkoaros me nanmwarkien Isip+ ahneki, sang Wahun Isip+ lella ni Pillap Iupreitis.+

8 Sehoiakin+ sounpar 18 ni ahnsou me e wiahla nanmwarki, oh e kakaunki sounpwong siluh nan Serusalem.+ Eden eh nohno iei Nehusda nein Elnadan mehn Serusalem. 9 E doulahte wia dahme suwed mwohn silangin Siohwa, duwehte soahng koaros me semeo wiadahr. 10 Ni ahnsowo, nein Nanmwarki Nepukadnesar en Papilon lapalap akan ahpw kohdo mahweniong Serusalem, oh re kapilpene kahnimwo.+ 11 Nanmwarki Nepukadnesar en Papilon kohdo ni kahnimwo, nindoken nah lapalap ako ar wie kapikapil wasao.

12 Nanmwarki Sehoiakin en Suda iangahki eh nohno, nah ladu ko oh nah lapalap ako oh nah lapalap akan en tehnpaso+ ahpw kohieila oh peki mahk rehn nanmwarkien Papilon;+ oh ni kawaluhn sounpar en nanmwarkien Papilon, e salihedi Sehoiakin.+ 13 Nanmwarkien Papilon eri kihsang dipwisou kesempwal koaros en tehnpesen Siohwa oh dipwisou kesempwal kan en tehnpesen nanmwarkio.+ E lupukpene dipwisou kohl koaros me Solomon nanmwarkien Israel wiahda nan tehnpas sarawi en Siohwa.+ Met wiawi duwehte me Siohwa ketin kohpadahr. 14 E kalipehla aramas koaros nan Serusalem, lapalap akan koaros,+ sounpei kehlail kan koaros, oh tohndoadoahk saman oh sounsukmete kan*+ koaros—e kalipehla aramas 10,000. Sohte emen luhwehdi, ihte aramas me keieu semwehmwe nan sahpwo.+ 15 Ih duwen eh kalipehla Sehoiakin+ Papilon;+ e pil wahsang inen nanmwarkio, en nanmwarkio pwoud kan, nah lapalap akan en tehnpaso, oh lapalap akan en wehio, oh e kalipeirailsang Serusalem kohla Papilon. 16 Nanmwarkien Papilon pil kalipehlahng Papilon sounpei koaros, meh 7,000, oh pil tohndoadoahk saman kan oh sounsukmete kan,* meh 1,000. Irail koaros me kehlail oh kaiahnda ong mahwen. 17 Nanmwarkien Papilon ahpw kasapwilada Madanaia, rien semen Sehoiakin,+ pwe en wiliandi Sehoiakin wiahla nanmwarki oh e wekidala edeo ong Sedekaia.+

18 Sedekaia sounpar 21 ni ahnsou me e wiahla nanmwarki, oh e kakaunki sounpar 11 nan Serusalem. Eden eh nohno iei Amudal+ nein Seremaia mehn Lipna. 19 E doulahte wia dahme suwed mwohn silangin Siohwa, duwehte soahng koaros me Sehoiakim wiadahr.+ 20 Dahme wiawi nan Serusalem oh Suda kahngiangihada Siohwa, eri e ketin keseirahla.+ Sedekaia eri uhwongada nanmwarkien Papilon.+

25 Ni keduwaun sounpar en mwehin Sedekaia, ni kaeisek en sounpwong, ni kaeisek en rahn en sounpwongo, Nanmwarki Nepukadnesar+ en Papilon ahpw kohdo iangahki nah karis en sounpei kan koaros pwehn mahweniong Serusalem.+ E kauwada imwarail impwal kan kapilpene kahnimwo oh kauwada dihd kan kapilpene kahnimwo,+ 2 oh imwintihti kan kapilpene kahnimwo lao lel ni kaeisek ehun sounpar en Nanmwarki Sedekaia. 3 Ni keduwaun rahn en kapahieun sounpwong, lehk lapalapo uklahr+ nan kahnimwo, oh sohla mwenge ong aramas akan nan sahpwo.+ 4 Kelen kahnimwo eri pwallongala,+ oh sounpei ko koaros ahpw tangdoaui nipwongo pedoisang ni ewen kehlo nanpwungen kehl riauo limwahn mwetuwel en nanmwarki, nindoken mehn Kaldia kan ar kapikapil kahnimwo; oh nanmwarkio keidla ni ahl en Arapa.+ 5 Ahpw karis en sounpei en mehn Kaldia kan pwakihala nanmwarkio, oh re koanohdi ih nan sapwtehn en Seriko, oh nah pwihnen sounpei ko koaros ahpw tangasang ih. 6 Irail eri koledi nanmwarkio+ oh wahdahdo rehn nanmwarkien Papilon nan Ripla, oh re pakairkihda kadeikpe. 7 Re kemehla nein Sedekaia pwutak kan mwohn mese; Nepukadnesar eri kauwehla pwoaren mesen Sedekaia ko, salihekihdi selmete prons kan, oh walahng ih nan Papilon.+

8 Ni kelimaun sounpwong, ni keisuhwen rahn en sounpwongo, me iei, ni kaeisek duwaun sounpar en Nanmwarki Nepukadnesar nanmwarkien Papilon, Nepusaradan+ kaunen sounsilasil ko, nein nanmwarkien Papilon sounpapah, ahpw kohdo Serusalem.+ 9 E isikala tehnpesen Siohwa,+ tehnpesen nanmwarkio,+ oh ihmw koaros nan Serusalem;+ e pil isikala imwen me lapalap akan koaros.+ 10 Oh karis en sounpei en mehn Kaldia kan koaros me mi rehn kaunen sounsilasil ko ahpw karangkehdi kehl kan me kapilpene Serusalem.+ 11 Nepusaradan kaunen sounsilasil ko ahpw kalipehla aramas ako me luhwehdi nan kahnimwo, irail me tang me pekimahk rehn nanmwarkien Papilon, oh pil meteikan koaros.+ 12 Ahpw kaunen sounsilasil ko pwilikihdi ekei aramas me keieu semwehmwe nan sahpwo pwe ren wia soumwet en kreip kan oh wia doadoahk idihd kan.+ 13 Oh mehn Kaldia ko lupukpene uhr prons kan+ en tehnpesen Siohwa oh kuruma kan+ oh Sehd pronso*+ me mi nan tehnpesen Siohwa, oh irail walahng Papilon prons ko.+ 14 Irail pil wahsang deupen pehs kan, sapwel kan, mehn kakunla lamp kan, kep kan oh dipwisou prons koaros me kin kadoadoahk ong doadoahk en tehnpas sarawio. 15 Kaunen sounsilasil ko eri wahsang dewen mwoalus kan, pwohl kan me wiawihkihda kohl+ oh silper tohr.+ 16 A uhr riapwoato, Sehd pronso,* oh kuruma kan me Nanmwarki Solomon wiahda ong tehnpesen Siohwa, prons me kadoadoahk ong dipwisou pwukat koaros sohte kak tenekda.+ 17 Ehuehu uhr ko ilehki kiupid* 18,+ oh kadoken uhr keieuo wiawihkihda prons; oh kadoken uhro kiupid siluh ile, oh uhk oh pwohmakraneid kan koaros me kapilpene kadokeo wiawihkihda prons.+ Uhr keriauo iangahki uhko duwehte me keieuo.

18 Kaunen sounsilasil ko pil wahsang kaunen samworo Seraia,+ keriaun kaunen samworo Sepanaia,+ oh silepen wenihmw silimen ko.+ 19 Oh e wahsang nan kahnimwo emen lapalap en tehnpaso me wia kaunen sounpei kan, nein nanmwarkio sounkaweid limmen me mihmihte nan kahnimwo, iangahki nein kaunen karis en sounpei ko sekterio me kin kihpene sounpei kan nan sahpwo, oh ohl 60 nan sahpwo me mihmihte nan kahnimwo. 20 Nepusaradan+ kaunen sounsilasil ko eri ale irail oh wairaillahng rehn nanmwarkien Papilon nan Ripla.+ 21 Nanmwarkien Papilon eri kemeirailla nan Ripla nan sapwen Amad.+ Suda eri kalipilipasang nan uhdakeo.+

22 Nanmwarki Nepukadnesar en Papilon idihada Kedalaia+ nein Ahikam+ nein Sapan+ en apwalih aramas akan me e pwilikihdi nan sapwen Suda.+ 23 Ni ahnsowohte me kaunen karis en sounpei koaros oh neirail ohl akan rongada me nanmwarkien Papilon idihadahr Kedalaia, re ahpw kohla rehn Kedalaia nan Mispa. Irail akan iei Ismael nein Nedanaia, Sohanan nein Karea, Seraia nein Tanumed mehn Netopa, oh Saasanaia nein mehn Maakad men, iangahki neirail ohl akan.+ 24 Kedalaia ahpw kahukihong irail oh neirail ohl akan inou ehu oh ndaiong irail: “Kumwail dehr masak papah mehn Kaldia kan. Kumwail kousoan nan sahpwet oh papah nanmwarkien Papilon, oh e pahn pweida mwahu rehmwail.”+

25 Oh ni keisuhwen sounpwong, Ismael+ nein Nedanaia nein Elisama, me wia kisehn kadaudok en nanmwarki ahpw kohdo iangahki ohl ehk oh re kemehla Kedalaia, iangahki mehn Suhs kan oh mehn Kaldia kan me mi reh nan Mispa.+ 26 Mwurin mwo aramas akan koaros, sang me tikitik lel me laud, iangahki kaunen sounpei kan ahpw uhda oh kohla Isip,+ pwehki re masakada mehn Kaldia kan.+

27 Oh ni kesilihsek isuhwen sounpar en kalipiliplahn Nanmwarki Sehoiakin+ en Suda, ni kaeisek riaun sounpwong, ni kerieisek isuh en rahn en sounpwongo, pahr me Nanmwarki Epilmerodak en Papilon wiahla nanmwarki, e kasaledekala Nanmwarki Sehoiakin en Suda sang nan imweteng.+ 28 Epilmerodak koasoi kadekohng ih oh wiahiong mwoale en ileilehsang mwoalen nanmwarki teikan me mi reh nan Papilon. 29 Sehoiakin eri kapwuhrasang eh likoun nan imweteng ko, oh ahnsou koaros e kin iang mwenge ni tehpel en nanmwarkio erein eh mour. 30 Mie mwenge kei kin kohieng ih rahn koaros sang rehn nanmwarkio, erein eh mour.