EIMWOS
1 Mahsen kan en Eimwos,* me mi nanpwungen silepen sihpw kan sang Tekoa,+ me e alehdi sang kaudiahl me pid Israel ni mwehin Nanmwarki Usaia+ en Suda oh ni mwehin Seropoham+ nein Sohas,+ nanmwarkien Israel, sounpar riau mwohn rerrer en sahpwo.+ 2 E koasoia:
“Siohwa pahn ketin wer rasehng laion men sang nan Saion,
Oh e pahn ketin kapitie laudida sang nan Serusalem.
Mohs kan en silepen sihpw kan pahn mwahiei,
Oh kadoken Karmel pahn madada.”+
3 “Iet me Siohwa ketin mahsanih,
‘“Pwehki uhwong* siluh oh pil pahieu* en Damaskus, I sohte pahn wekidala dahme I piladahr,
Pwehki re kamwutehkihpene Kilead mehn wurahdek mete kan.+
4 Eri I pahn kadaridiong kisiniei pohn imwen Asael,+
Oh kisinieio pahn isikala imwen doulik kehlail kan en Penadad.+
5 I pahn kauwehla lepin tuhkehn kateng kan en Damaskus;+
I pahn kamwomwala towe kan sang Pikad-apen
Oh me kakaun* sang Pededen;
Oh aramas en Siria kan pahn kolahng Kir+ nin duwen me kalipilipala kei,” Siohwa me ketin mahmahsen.’
6 Iet me Siohwa ketin mahsanih,
‘“Pwehki uhwong siluh oh pil pahieu en Kasa,+ I sohte pahn wekidala dahme I piladahr,
Pwehki re ale pwihn ehu pwon en me kalipilipala kan+ oh kihiraillahng Edom.
7 Eri I pahn kadaridiong kisiniei pohn dihd en Kasa,+
Oh kisinieio pahn isikala eh imwen doulik kehlail kan.
8 I pahn kamwomwala towe kan sang Asdod,+
I pahn kauwohng limeiet ong Ekron,+
Oh mehn Pilisdia kan me luhwehdi pahn sohrala,”+ Kaun Wasa Lapalahpie Siohwa me ketin mahmahsen.’
9 Iet me Siohwa ketin mahsanih,
‘Pwehki uhwong siluh oh pil pahieu en Dair,+ I sohte pahn wekidala dahme I piladahr,
Pwehki re kihla pwihn ehu pwon en me kalipilipala kan rehn Edom,
Oh pwehki re sohte tamataman inou lap en pirien ko.+
10 Eri I pahn kadaridiong kisiniei pohn dihd en Dair,
Oh kisinieio pahn isikala eh imwen doulik kehlail kan.’+
11 Iet me Siohwa ketin mahsanih,
‘Pwehki uhwong siluh oh pil pahieu en Edom,+ I sohte pahn wekidala dahme I piladahr,
Pwehki e pwakiheki rie pwutako kedlahs,+
Oh pwehki e kahng kasalehda kadek kalahngan;
Nan eh lingeringer e kin usehlahte tehrirailpeseng,
Oh e kin usehlahte linglingeringer pahrail.+
12 Eri I pahn kadaridiong kisiniei nan Deman,+
Oh kisinieio pahn isikala imwen doulik kehlail kan en Posra.’+
13 Iet me Siohwa ketin mahsanih,
‘“Pwehki uhwong siluh oh pil pahieu en mehn Ammon kan,+ I sohte pahn wekidala dahme I piladahr,
Pwehki re tehrpeseng lih liseian kan en Kilead pwe ren kalaudehla sapwarail.+
14 Eri I pahn isikada dihd en Rappa,+
Oh kisinieio pahn isikala eh imwen doulik kehlail kan,
Nindoken wer en mahwen ehu me wiawi ni rahnen mahwen,
Rahno e pahn mie kisinieng en melimel laud ehu.
15 Oh arail nanmwarki pahn kalipilipala iangahki nah lapalap akan,”+ Siohwa me ketin mahmahsen.’
2 “Iet me Siohwa ketin mahsanih,
‘“Pwehki uhwong* siluh oh pil pahieu* en Mohap,+ I sohte pahn wekidala dahme I piladahr,
Pwehki e isikala tihn nanmwarkien Edom pwehn wiahla pehs.*
2 Eri I pahn kadaridiong kisiniei nan Mohap,
Oh kisinieio pahn isikala imwen doulik kehlail kan en Keriod;+
Mohap pahn mehla nan mwoarongo,
Nindoken wer en mahwen oh ngilen mehn pepeuko* eh wiewiawi.+
3 I pahn kihsang kaun* emen nan Mohap
Oh kemehla lapalap akan koaros en Mohap iangahki kaun menet,”+ Siohwa me ketin mahmahsen.’
4 Iet me Siohwa ketin mahsanih,
‘Pwehki uhwong siluh oh pil pahieu en Suda,+ I sohte pahn wekidala dahme I piladahr,
Pwehki re soikala kosonned* en Siohwa,
Oh pwehki re sohte kapwaiada eh koasoandi kan;+
Ahpw likamwkohte me samarail mehn mahs ako idawehn me kasalongeirailla.+
5 Eri I pahn kadaridiong kisiniei nan Suda,
Oh kisinieio pahn isikala imwen doulik kehlail kan en Serusalem.’+
6 Iet me Siohwa ketin mahsanih,
‘Pwehki uhwong siluh oh pil pahieu en Israel,+ I sohte pahn wekidala dahme I piladahr,
Pwehki re netikihla me pwung kan ong silper,
Oh me semwehmwe kan ong suht ehu.+
Ohl emen oh eh pahpa wendi rehn serepein tehmen,
Oh kasaminehla mwarei sarawi.
8 Limwahn pei sarawi kan koaros,+ re kin wendi pohn likou kan me re ale nin duwen kilelepen pweipwand;+
Oh wain me re kin nim nan imwen kaudok en arail koht kan kin kohsang rehn irail kan me re kin alehsang mwohni nin duwen kalokeparail.’
9 ‘Ahpw ngehi me kamwomwala mehn Amor kan mwohrail,+
Me reirei duwehte tuhke sidar kan oh kehlail duwehte tuhke ohk* kan;
I kauwehla wah kan powe oh kalewe kan pah.+
10 I waikumwaildo sang sapwen Isip,+
Oh I wiahiong kumwail en alu nan sapwtehno erein sounpar 40,+
Pwe kumwail en sapwenikihla sapwen mehn Amor kan.
11 I idihada ekei noumwail pwutak kan nin duwen soukohp kei+
Oh ekei noumwail mwahnakapw kan nin duwen Nasaraid kei.+
Aramas en Israel kan, met sou mehlel?’ Siohwa me ketin mahmahsen.
12 ‘Ahpw kumwail kin kihkihong Nasaraid kan wain pwe ren nim,+
Oh kumwail kin kehkehlingkihong soukohp kan: “Kumwail sohte pahn wia kokohp.”+
13 Eri I pahn idangkumwaildiong nan amwail wasa,
Duwehte kuruma pwoat me audaudkihda krein* paldi kan eh idangpene dahme mi pah.
14 Sohte wasa me marahra men pahn tangalahng ie,+
Me kehlail men sohla pahn kekehlail,
Oh sohte sounpei men pahn kak pitila.
15 Sounkesik ketieu men sohte pahn uh tengeteng,
Me marahrahn tang sohte pahn pitila,
Oh soundak oahs men sohte pahn pitila.
16 Pil me keieu kommwad* nanpwungen sounpei kan
Pahn kilisou tangdoaui rahno,’+ Siohwa me ketin mahmahsen.”
3 “Aramas en Israel kan, kumwail rong mahsen wet me Siohwa ketin mahsaniheki duwen kumwail, duwen peneineio pwon me I wahdohsang nan sapwen Isip:
2 ‘Kumwail kelehpw me I ese sang nanpwungen peneinei koaros en sampah.+
Ihme kahrehda I pahn kapwukoahkin kumwail amwail sapwung kan koaros.+
3 Ia duwe, aramas riemen pahn ehu alu ma ira sohte pwungkihda ira en tuhpene?*
4 Ia duwe, laion men pahn wer nanwelo ni eh sohte seike?
Ia duwe, laion pwulopwul men* pahn ngiringir nan eh pwoahro ni eh sohte saikedi mehkot?
5 Ia duwe, menpihr men pahn lohdiong nan lidip ehu nanpwelo ni eh sohte nsar ehu?*
Ia duwe, lidip ehu kak pitirekda sang nanpwelo ni eh sohte saikedi mehkot?
6 Ia duwe, ma mehn pepeuk* ehu kin pepeuk nan kahnimw ehu, aramas akan sou kin rerrerki ar masepwehk?
Ia duwe, ma kahpwal ehu kin wiawi nan kahnimw, kaidehn Siohwa me ketin mwekid?
7 Pwe Kaun Wasa Lapalahpie Siohwa sohte pahn ketin wia mehkot
Ma e sohte ketin kasalehiong sapwellime ladu soukohp kan sapwellime ire rir kan.+
8 Laiono wie weriwer!+ Ihs me sohte pahn masepwehkada?
Kaun Wasa Lapalahpie Siohwa ketin mahsenier! Ihs me sohte pahn wia kokohp?’+
9 ‘Lohki met pohn imwen doulik kehlail kan en Asdod
Oh pohn imwen doulik kehlail kan nan sapwen Isip.
Nda: “Kohpene pohn nahna kan en Sameria;+
Kilang mwoarong me wiewiawi wasao
Oh widing me wiewiawi loale.+
10 Pwe re sehse ia duwen ar pahn wia dahme pwung,
Irail me kin nahkpene tiahk lemei oh kamwomwala nan arail imwen doulik kehlail kan,” Siohwa me ketin mahmahsen.’
11 Kahrehda iet me Kaun Wasa Lapalahpie Siohwa ketin mahsanih,
‘Imwintihti men pahn kapilpene sahpwet,+
E pahn kihsang omw kehl,
Oh omw imwen doulik kehlail kan pahn kulsang.’+
12 Iet me Siohwa ketin mahsanih,
‘Duwehte silepen sihpw men eh kin adihasang neh riau de apali salengen sihpw men sang nan ewen laion,
Ih mwomwen aramas en Israel kan ar pahn pitila,
Irail me met mwomwohd pohn peht kaselel kan oh pohn mehn mwomwohd kaselel kan*+ nan Sameria.’
13 Kaun Wasa Lapalahpie Siohwa, Koht en kaunen karis en sounpei, ketin mahsanih, ‘Kumwail rong oh panawiheki* kadaudok en Seikop kan.
14 Pwe rahn me I pahn kapwukoahki Israel eh uhwong kan* koaros,+
I pahn pil kapwukoahki pei sarawi kan en Pedel;+
Kod kan en pei sarawio pahn lopla oh pwupwudiong nin sampah.+
15 I pahn kauwehla ihmw en ahnsoun kopou iangahki ihmw en ahnsoun karakar.’
‘Ihmw kan me kapwatki aipori pahn sohrala,+
Oh ihmw laud kan* pahn sohrala,’+ Siohwa me ketin mahmahsen.”
4 “Rong mahsen wet, kumwail kou kan en Pasan,
Me mi pohn nahnahn Sameria,+
Kumwail lih akan me kin widinge me tikitik kan+ oh kahpwalihala me semwehmwe kan,
Me kin ndaiong amwail pwoud kan,* ‘Wahdo mehkot sen nim!’
2 Kaun Wasa Lapalahpie Siohwa ketin kahula sang ni eh sarawi,
‘“Kilang! Rahn akan pahn kohdo ahnsou me kumwail pahn pwekipwekkihda kehs en sounkemehla mahn akan
Oh me luhwehdi rehmwail kan pahn pwekipwekkihda kehs en mwahmw kan.
3 Oh emenemen kumwail pahn inenieila nan wasa pwal kan ni kehlo;
Oh kumwail pahn lekdeklahng Armon,” Siohwa me ketin mahmahsen.’
4 ‘Kumwail kohdo Pedel oh kauwehla kosonned,*+
Kohdo Kilkal oh pil kalaudehla amwail kauwehla kosonned!+
Wahdo amwail meirong kan+ nimenseng,
Oh eisek kis ehun soahng kan me kumwail alehdi+ ni kesiluhwen rahn.
5 Isik meirong en kapingkalahngan en pilawa me doal ihs;+
Lohki ni ngihl laud amwail meirong kan me kumwail nsenki wia!
Pwe ih met me kumwail kin perenki wia, kumwail aramas en Israel kan,’ Kaun Wasa Lapalahpie Siohwa me ketin mahmahsen.
6 ‘A ngehi, I sohte kihong kumwail kanamwail mwenge* nan amwail kahnimw kan koaros
Oh wiahiong en sohla pilawa nan imwamwail kan koaros;+
Ahpw kumwail sohte pwurodo rehi,’+ Siohwa me ketin mahmahsen.
7 ‘I pil sohte kihong kumwail keteu erein sounpwong siluh mwohn ahnsoun rahk;+
I kin kamwerehdi keteu pohn ehu kahnimw a ehu kahnimw soh.
Ehu pelien sahpw kin mie keteu,
Ahpw ehu pelien sahpw me sohte keteu kin madada.
8 Aramas sang kahnimw riau de siluh kin wasawasasseli kohla ni ehu kahnimw pwe ren nimpil,+
Oh re sohte kin medla;
Ahpw kumwail sohte pwurodo rehi,’+ Siohwa me ketin mahmahsen.
9 ‘I kalokehki wahnsapwamwail kan kisinieng karakar oh soumwahu.+
Kumwail katohtowehla amwail mwetuwel kan oh mwetin kreip kan,
Ahpw loukust kan kin kadallehla amwail tuhke pik kan oh tuhkehn olip kan;+
Ahpw kumwail pil sohte pwurodo rehi,’+ Siohwa me ketin mahmahsen.
10 ‘I kadarewei nanpwungamwail soumwahu lusulus ehu duwehte me lelohng Isip.+
I kemehkihla noumwail mwahnakapw kan kedlahs+ oh koledi noumwail oahs kan.+
I wiahiong pwohsuwed en amwail kahnimpwal kan en kohda ni tumwamwail kan;+
Ahpw kumwail sohte pwurodo rehi,’ Siohwa me ketin mahmahsen.
11 ‘I kamwomwkumwailla
Duwehte Koht eh ketin kamwomwala Sodom oh Komora.+
Oh kumwail duwehte lepin tuhke pwoat me poarsang nan kisiniei;
Ahpw kumwail sohte pwurodo rehi,’+ Siohwa me ketin mahmahsen.
12 Eri Israel, iei met me I pahn wiahiong uhk.
Pwehki ih met I pahn wiahiong uhk,
Israel, onopada ken tuhwong omw Koht.
13 Pwe kilang! iei ih me ketin wiahda nahna kan+ oh kapikada kisinieng;+
E kin ketin padahkihong aramas audepen sapwellime madamadau kan,
E kin ketin kawekala marain en nin sohrahn ong ni rotorot,+
Oh e kin ketin tiakedi wasa ileile kan en sampah;+
Siohwa, Koht en kaunen karis en sounpei iei mware.”
5 “Aramas en Israel kan, rong mahsen wet me I pahn koasoiahkin kumwail nin duwen koulen kedepwidepw pwoat:*
2 ‘Meipwon Israel pwupwudier;
E sohte kak pwurehng pwourda.
Aramas koaros keselahr ih nan sapweo;
Sohte me pahn kapwourada.’
3 “Pwe iet me Kaun Wasa Lapalahpie Siohwa ketin mahsanih:
‘Kahnimw me kadarpeseng sounpei kid ong mahwen, mehte epwiki pahn luhwehdi;
Oh kahnimw me kadarpeseng sounpei epwiki ong mahwen, mehte ehk pahn luhwehdi, pwe ih met me pahn wiawihong aramas en Israel kan.’+
4 “Pwe iet me Siohwa ketin mahsanihong aramas en Israel kan:
‘Kumwail rapahkin ie oh kumwail en momourte.+
5 Kumwail dehpa rapahki Pedel,+
Kumwail dehr kohla Kilkal+ de kotehla Peersipa,+
Pwe Kilkal uhdahn pahn kalipilipala,+
Oh Pedel pahn sohla mie.*
6 Kumwail rapahki Siohwa oh kumwail en momourte,+
Pwe en dehr ketin kamwomwala kadaudok en Sosep kan rasehng kisiniei ehu,
Oh kamwasikahla Pedel, ni eh sohte me pahn kakunla.
8 Me ketin wiahda pwihnen usu Kaima* oh pwihnen usu Kesil,*+
Me kin ketin wekidala rotorot mosul ong nimenseng,
Me kin ketin wiahiong ni rahn en rotorot duwehte nipwong,+
Me kin ketin malipepene pihl en madau kan
Pwehn ketin kamwerehdiong ni pwelen sampah+
—Siohwa iei mware.
9 E pahn ketin mwadang kamwomwala me kehlail,
Oh pahn ketin kamwomwala wasa kelpene kehlail kan.
10 Re kailongki irail me kin kihda peneu ni ewen kelen kahnimwo,
Oh re kailongki irail me kin koasoi mehlel.+
11 Pwehki kumwail kin idingkihong me semwehmwe en kihda pweinen mwaht*
Oh kumwail ale eh krein nin duwen kisakis,+
Kumwail sohte pahn koukousoante nan ihmw takai perperda kan me kumwail kauwada+
De pil nim wain sang mwetin kreip me keieu mwahu kan me kumwail padokedi.+
12 Pwe I ese uwen tohtohn amwail uhwong kan*
Oh uwen laud en dipamwail kan
—Kumwail kin kaloke me pwung,
Kumwail kin ale kisakis ni ahl sapwung,
Oh kumwail kin kahmahmkihla pwuhng en me semwehmwe ni ewen kelen kahnimwo.+
13 Kahrehda, irail me ahneki dehde mwahu pahn nennenla ni ahnsowo,
Pwe e pahn wia ahnsou apwal ehu.+
Eri Siohwa, Koht en kaunen karis en sounpei, pahn ketiket rehmwail,
Nin duwen me kumwail kin kosekose.+
Mweinele Siohwa, Koht en kaunen karis en sounpei
Pahn ketin kupwuramwahwih kadaudok en Sosep kan me luhwehdi.’+
16 “Kahrehda iet me Siohwa, Koht en kaunen karis en sounpei, Siohwa ketin mahsanih:
‘E pahn mie mwahiei ni wasahn tuhpene kan koaros,
Oh ni ahl akan koaros re pahn nda, “Meid suwed, meid suwed!”
Re pahn eker soumwet kan ren mwahiei
Oh irail me kin ale pweinen ar mwahiei ren sengiseng.’
17 ‘E pahn mie mwahiei nan mwetin kreip koaros;+
Pwe I pahn keidwei nanpwungamwail,’ Siohwa me ketin mahmahsen.
18 ‘Meid suwediong irail me kasikasik rahnen Siohwa!+
Eri, ia pahn wehwehn rahnen Siohwa ong kumwail?+
E pahn rotorot a kaidehn marain.+
19 E pahn duwehte ohl emen me tangasang laion men oh tuhwong pehr men,
Oh ni eh pedolong nan imwe oh idengeki peho ni dihdo, sineik men ahpw ngalispene.
20 Rahnen Siohwa sou pahn rotorot a kaidehn marain;
E sou pahn rotorot a kaidehn lingaling?
21 I kalahdeki, I kalahdeki amwail kasarawi kan,+
Oh I sohte kupwurperenki pwoh kansenamwahu en amwail kapokon sarawi kan.
22 Mehnda ma kumwail meirongkihong ie meirong isihs me pwonte isihsla oh meirong en kisakis kan,
I sohte pahn kupwurperenki mepwukat;+
Oh I sohte pahn kupwurperenki amwail meirong en kaminimin en mahn mworourou kan.+
23 Kumwail katokehdi amwail koul katairong kan;
Oh kumwail dehr mweidohng ie I en rong ngilen noumwail keseng sahl akan.+
24 Pwung pahrek en pwilipwilwei rasehng pihl kan,+
Oh pwung en pwilipwilwei rasehng piletik me kin ahnsou koaros pwilipwilwei.
25 Aramas en Israel kan, ia duwe, kumwail wadohng ie meirong kan oh meirong en kisakis kan
Erein sounpar 40 ko nan sapwtehno?+
26 Met kumwail pahn anahne kapaikasang amwail nanmwarki Sakkud oh Kaiwan,*
Amwail sansal kan, amwail koht usu, me kumwail wiahda ong pein kumwail,
27 Oh I pahn kalipeikumwailla daulih Damaskus,’+ ih me mwarenki Siohwa, Koht en kaunen karis en sounpei me ketin mahmahsen.”+
6 “Meid suwediong aramas akan me kin likih pein irail* nan Saion,
Irail me sohte kin perki mehkot ni nahnahn Sameria,+
Me lapalap en wehi laud kan,
Irail me aramas en Israel kan kin pwarek!
2 Kumwail kotehwei oh kohwei Kalne oh kilang.
Kohsang wasao kohla Amad Laud,+
Oh kohdihla Kahd en mehn Pilisdia kan.
Ia duwe, irail mwahusang wehi pwukat,*
De sapwarailo laudsang sapwamwailo?
4 Re kin wendi pohn peht aipori kan+ oh wonohn pohn mehn mwomwohd kan,+
Tungutungoale sihpw wol kan sang pelin sihpwo oh koupwul mworourou kan;+
5 Re kin wiahda koul kan sang ni ngilen arp,*+
Oh duwehte Depit, re kin wiahda mehn keseng kan;+
6 Re kin nim wain sang nan pwohl kan+
Oh keiehkiniraildi leh keieu kaselel kan.
Ahpw re sohte nsenohki duwen* kahpwal laud en Sosep.+
7 Eri, irail me pahn tepin kalipilipala nanpwungen irail me pahn kalipilipala kan,+
Oh kamadipw katairong en irail me wonohn kan pahn imwisekla.
8 Siohwa, Koht en kaunen karis en sounpei, ketin mahsanih, ‘Kaun Wasa Lapalahpie Siohwa ketin kahukihla ni mware,+
“I kalahdeki aklapalap en Seikop,+
I kalahdeki eh imwen doulik kehlail kan,+
Oh I pahn pangala kahnimwo oh dahme mi loale.+
9 “‘“Oh ma aramas ehk me luhwehdi nan ihmw ehu, re pil pahn mehla. 10 Emen kisehn peneinei* pahn kohdo pwehn wairailieila oh isikirailla wad emen. E pahn wahieisang tihrail kan nan ihmwo; eri e pahn ndalahng sohte lipilipil me mi nan perehn masloalen ihmwo, ‘Pil miehte me mi rehmw?’ Oh e pahn nda, ‘Sohte!’ Eri e pahn nda, ‘Nennenla! Pwe kaidehn ahnsoun koasoia mwaren Siohwa met.’”
11 Pwe iei Siohwa me ketikihda kehkehliko,+
Oh e pahn ketin kamwerehdi ihmw laud lao e pisetikpene,
Oh ihmw tikitik lao e wiahla kihd.+
12 Ia duwe, oahs kan kin tang pohn paipalap,
De mie me pahn deipwelki kou men wasao?
13 Kumwail kin perenkihda soahng sohte katepe,
14 Kahrehda, aramas en Israel kan, I pahn wadohng kumwail wehi ehu,+
Oh re pahn kalokei kumwail sang Lepo-amad*+ kohdihla ni Wahun Arapa,’ Siohwa, Koht en kaunen karis en sounpei me ketin mahmahsen.”
7 Iet me Kaun Wasa Lapalahpie Siohwa ketin kasalehiong ie: Kilang! E ketin kadarpeseng pelin loukust ehu ni wahnsahpw en ahnsoun kopou* eh tepida wosada. Met iei wahnsahpw me kamwarakdi mwurin en nanmwarki dihpw meng kan ar lupsang. 2 Ni ahnsou me pelin loukusto kangalahr dihpw en sahpwo, I ahpw nda: “Maing Kaun Wasa Lapalahpie Siohwa, komw kupwurkalahngan oh ketin mahkohng sapwellimomwi aramas akan!+ Ia duwen Seikop eh kak pitila?* Pwe e me luwet!”+
3 Siohwa eri ketin wekidala kupwure* duwen met.+ Siohwa ketin mahsanih, “Met sohte pahn wiawi.”
4 Iet me Kaun Wasa Lapalahpie Siohwa ketin kasalehiong ie: Kilang! Kaun Wasa Lapalahpie Siohwa ketin lohkihda kalokolok ni eh ketin doadoahngki kisiniei ehu. Kisinieio eri kamwasikahla pihl laud oh loal kan, oh e kamwasikahla pelien sahpwo. 5 Ngehi eri nda: “Maing Kaun Wasa Lapalahpie Siohwa, komw kupwurkalahngan oh ketin kapweiekdi met.+ Ia duwen Seikop eh kak pitila?* Pwe e me luwet!”+
6 Siohwa eri ketin wekidala kupwure* duwen met.+ Kaun Wasa Lapalahpie Siohwa ketin mahsanih, “Met pil sohte pahn wiawi.”
7 Iet me e ketin kasalehiong ie: Kilang! Siohwa ketiket pohn dihd ehu me koasoakoasoangkihda selin sosohng pwoat,* oh mie selin sosohng pwoat nin lime. 8 Siohwa eri ketin mahsanihong ie: “Eimwos, dahme ke kilang?” Ngehi eri patohwan: “Selin sosohng pwoat.” Siohwa eri ketin mahsanih: “I pahn kihdi selin sosohng pwoat nanpwungen nei aramas en Israel kan. I sohla pahn mahkohng irail.+ 9 En Aisek wasa ile kan+ pahn tehnla, oh wasa sarawi kan en Israel pahn mwomwla;+ oh I pahn kohkidohng peneinei en Seropoham kedlahs pwoat.”+
10 Amasaia samworo en Pedel+ ahpw kadarala rohng wet rehn Nanmwarki Seropoham+ en Israel: “Eimwos koasoakoasoane en uhwong komwi nan Israel.+ Aramas akan en sahpwet sohla kak kanengamahiong eh mahsen kan koaros.+ 11 Pwe iet me Eimwos koasoiahn, ‘Seropoham pahn mehkihla kedlahs oh Israel uhdahn pahn kalipilipasang sapweo.’”+
12 Amasaia eri ndaiong Eimwos: “Kowe sounkilang kaudiahl, kohla, tangala nan sapwen Suda, alehda konomw pilawa* wasao oh ke kak wia kokohp wasao.+ 13 Ahpw ke sohla pahn wia kokohp nan Pedel,+ pwe wasaht iei wasa sarawi en nanmwarki+ oh tehnpesen wehi.”
14 Eimwos ahpw sapengki Amasaia: “Kaidehn ngehi soukohp men mahso de pil nein soukohp men; ahpw ngehi silepen sihpw men,+ oh I kin apwalih tuhke pik sikamor* kan. 15 Ahpw Siohwa ketin malipe ie ni ei apwahpwalih pelin sihpw kan, oh Siohwa ketin mahsanihong ie, ‘Kohla, wia kokohp ong nei aramas en Israel kan.’+ 16 Eri rong mahsen en Siohwa: ‘Ke kin nda, “Dehr wia kokohp ong Israel+ oh dehr lohki+ kadeik ong kadaudok en Aisek kan.” 17 Kahrehda iet me Siohwa ketin mahsanih: “Omw pwoud pahn wiahla lihen netiki paliwere men nan kahnimwo, oh noumw pwutak kan oh serepein kan pahn mehkihla kedlahs. Sapwomwo pahn nehnekipeseng sahl en sosohng pwoat, oh ke pahn mehla nan sahpw samin ehu; oh Israel uhdahn pahn kalipilipasang nan sapweo.”’”+
8 Iet me Kaun Wasa Lapalahpie Siohwa ketin kasalehiong ie: Kilang! Mie kopwoun wahntuhkehn ahnsoun karakar ehu. 2 Ih eri ketin mahsanih, “Eimwos, dahme ke kilang?” I ahpw sapeng patohwan, “Kopwoun wahntuhkehn ahnsoun karakar ehu.” Siohwa eri ketin mahsanihong ie: “Imwio leledohr ong nei aramas en Israel kan. I sohla pahn mahkohng irail.+ 3 ‘Koul kan en tehnpas sarawio pahn wekiong ni mwahiei rahno.+ E pahn mie paliwar mehla tohto me pahn lekdekla wasa koaros+—dehr mweseisei!’ Kaun Wasa Lapalahpie Siohwa me ketin mahmahsen.
4 Rong met, kumwail me kin tiakedi me semwehmwe
Oh me kin kauwehla me opampap en sahpwo,+
5 Me kin nda, ‘Iahd me kasarawien maram pwul pahn imwisekla,+ pwe kitail en kak netikihla atail krein,
Oh pil Sapad,+ pwe kitail en kak kihda krein mehn netila?
Pwe kitail en kak wiahiong sosohng en ihpah* en tikitikla
Oh paunen sekel* en laudla,
Pwehn likamwkihda neitail mehn tenek sapwung kan;+
6 Pwe kitail en kak pwainkihda me lokolok silper
Oh me semwehmwe suht ehu,+
Oh netikihla wasa soh katepe en krein kan.’
Ia duwe, sahpwet pwon sou pahn kohda rasehng Nail,
Oh kohda oh kohdi rasehng Nail en Isip?’+
9 Kaun Wasa Lapalahpie Siohwa ketin mahsanih, ‘Rahno,
I pahn kakihrala ketipino nin souwas,
Oh I pahn karotongehla sahpwo ni rahn marain ehu.+
10 I pahn wekidohng amwail kasarawi kan ni mwahiei+
Oh amwail koul kan koaros ni koulen kedepwidepw kan.*
I pahn kihong likoun nsensuwed* ni lukop koaros oh koimadihala moahng koaros;
I pahn wiahiong met en duwehte mwahieiki iehros men,
Oh imwilahn met en duwehte rahnen lokolok ehu.’
11 Kaun Wasa Lapalahpie Siohwa ketin mahsanih, ‘Kilang! Rahn akan kohkohdo,
Ahnsou me I pahn kadarohng sahpwet lehk lapalap ehu,
Kaidehn lehk lapalap en pilawa de men nimpil,
Ahpw mahsen kan en Siohwa.+
12 Irail pahn wasawasasseli sang ehu sehd lel ehu sehd
Oh sang paliepeng lel palimese.*
Irail pahn kohkohseli raparapahki mahsen en Siohwa, ahpw re sohte pahn diar.
13 Rahno meipwon kaselel kan pahn lipwongmasala,
Oh pil mwahnakapw kan, pwehki ar men nimpil;
14 Irail me kin kahukihla dipen Sameria+ oh kin nda,
“Dan,+ nin duwen amwail koht eh momour!”
Oh, “Nin duwen ahl en Peersipa+ eh momour!”
Re pahn pwupwudi oh re sohte pahn pwurehng uhda.’”+
9 I kilangada Siohwa+ eh uh pohnangin pei sarawio, oh e ketin mahsanih: “Poakih moangen uhro, oh poahsoane kan pahn rerada. Pelehsang moangen mepwukat oh I pahn kemehkihla me luhwehdi kan kedlahs. Sohte emen me tang pahn pitila oh sohte emen me song en pitila pahn pweida.+
2 Ma irail weirdihla pahn pwehl pwe ren rukula nan Sousou,*
Limeiet pahn koliraildi sang wasao;
Oh ma irail kohdahla nanleng,
I pahn wairaildihdo sang wasao.
3 Oh ma irail rukula pohn kadoken Karmel,
I pahn rapahkin irail oh koliraildi sang wasao.+
Ma irail rukusang silangi* nan kapin sehdo,
I pahn ruwese serpento en ngalis irail wasao.
4 Ma irail kalipilipala mwohn arail imwintihti kan,
I pahn ruwese kedlahs oh e pahn kemeirailla sang wasao;+
I pahn sohpeiong irail pwehn wahdo kahpwal a kaidehn kapai kan.+
5 Pwe Kaun Wasa Lapalahpie, Siohwa kaunen karis en sounpei, iei ih me ketin doahke sahpwet,*
Kahrehda e peipeseng+ oh towe kan koaros pahn mwahiei;+
Oh sahpwet pwon pahn kohda rasehng Nail,
Oh kohdi rasehng Nail en Isip.+
6 ‘Me kin ketin kauwada eh kehndake nanleng
Oh kin ketin wiahda pwelengen lahng* pohnangin sampah;
Me kin ketin malipepene pihl en madau kan,
Pwehn ketin kamwerehdiong ni pwelen sampah+
—Siohwa iei mware.’+
7 Siohwa ketin mahsanih, ‘Aramas en Israel kan, kumwail sou duwehte nein mehn Kus kan ong ie?
8 ‘Kilang! Kaun Wasa Lapalahpie Siohwa kin ketin mwasamwasahn wehi dipano,
Oh e pahn ketin kamwomwala wehio sang nan sahpwo.+
Ahpw I sohte pahn kamwomwala douluhl kadaudok en Seikop kan,’+ Siohwa me ketin mahmahsen.
9 ‘Pwe kilang! I pahn ruwes,
I pahn itikada aramas en Israel kan nan wehi kan koaros,+
Duwehte emen eh kin itik mehn sihp ehu,
Oh sohte kisin takai kin pwupwudiong nanpwel.
10 Irail pahn mehkihla kedlahs, me dipan akan koaros en nei aramas akan,
Irail me kin nda, “Kahpwalo sohte pahn kerendohng kiht de lelohng kiht.”’
11 ‘Rahno I pahn kauwada impwal* en Depit+ me pwupwudier,
I pahn kamwahwihala wasa pwal kan,*
Oh kamwahwihala eh wasa rengkpeseng kan;
I pahn onehda sapahl duwehte rahn akan mahso,+
12 Pwe irail en ahnekihla dahme luwehdi nan Edom,+
Oh tohnwehi koaros me kin adki mwarei,’ Siohwa me pahn ketin wia met me mahmahsen.
13 Siohwa ketin mahsanih, ‘Kilang! Rahn akan pahn kohdo,
Ahnsou me soundeipwel pahn koanohdi soundondol,
Oh me kin weuwa werentuhke pahn koanohdi sountiak kreip kan;+
Oh nahna kan pahn kakusada wain mem,+
14 I pahn kapwurepene nei aramas en Israel me selidi kan,+
Oh re pahn onehda sapahl kahnimw tehnla kan oh kousoanla loale;+
Re pahn padokedi mwetin kreip kan oh nim ar wain kan,+
Oh wiahda mwetuwel kan oh kang wahrail kan.’+
15 ‘I pahn padokiraildi nan sapwarailo,
Oh re sohte pahn pwurehng usuhsda
Sang nan sapwarailo me I kihong irail,’+ Siohwa omw Koht me ketin mahmahsen.”
Wehwehki, “Wia Wisik Ehu” de “Weuwa Wisik Ehu.”
De “kauwehla kosonned.”
Lepin lokaia kat “siluh, pil pahieu” ele dokedoke mwekid kan me kin pwurupwurehng wiawi.
LI, “me kolokol sokon.”
LI, “me kolokol sokon.”
De “kauwehla kosonned.”
Lepin lokaia kat “siluh, pil pahieu” ele dokedoke mwekid kan me kin pwurupwurehng wiawi.
LI, “pweht.”
LI, “kodo.” Kilang KLL.
LI, “sounkopwung.”
De “kaweid.”
Soangen tuhke kalaimwun ehu, me ni lokaiahn wai e adaneki “oak.”
Kilang KLL.
De “irail me mohngiong kehlail.”
De “tuhpene ni ara wiahda koasoandi.”
De “laion pwulopwul men me wunaun ni tepinwere.”
De kakete, “ni eh sohte pahn nan lidipo?”
LI, “kod.” Kilang KLL.
De “mehn mwomwohd kan sang Damaskus.”
De “kadehdehiong.”
De “kauwehla kosonned kan.”
De kakete, “ihmw tohto.”
De “soumas kan.”
De “uhwong.”
LI, “I kihong kumwail ngih mwakelekel kan.”
De “koulen mwahiei pwoat.”
De kakete, “wiahla mehkot me pid akmanaman.”
De “katik.”
Kakete usu Pliadis kan nan pwihnen usu Daurus.
Kakete pwihnen usu Orion.
De “daksis en sahpw.”
De “kauwehla kosonned kan.”
Mepwukat ele dokedoke usu Saturn, me aramas kin kaudokiong nin duwen koht men.
De “seukautih.”
E sansal me met dokedoke wehin Suda oh Israel.
LI, “mwoalen.”
De “keseng sahl.”
LI, “sohte soumwahukihda.”
LI, “Rien eh pahpao ohl.”
De “katik.”
LI, “ale kod kan ong pein kiht.”
De “wasahn pedolong en Amad.”
Me iei, erein January oh February.
LI, “uhda?”
De “koluhkihla.”
LI, “uhda.”
De “koluhkihla.”
Dipwisou wet iei mehkot me kin langalang sang ni sahl pwoat oh kin kadoadoahk pwehn ese uwen inen en mehkot me uhda.
LI, “kang pilawa.”
De “I kin doakoa pik sikamor kan.” Pik sikamor iei soangen tuhke pik pwoat.
Kilang Ortk B14.
Kilang Ortk B14.
De “sampah.”
De “koulen mwahiei kan.”
E wiawihkihda mwein likou arekarek me kin wiahda ehd.
De “wasa me ketipin kin dakada ie.”
LI, sheʼohl′. Kilang KLL.
LI, “pwoaren mesei kat.”
De “sampah.”
De “pwelengen lahng pwonopwon.”
De “imwios.”
De “ar wasa pwal kan.”
LI, “pahn peipeseng.”