KERIAUN KISINLIKOU ONG MEHN KORINT

1 Sang Pohl, wahnpoaron en Krais Sises sang ni kupwuren Koht, oh sang rehn riatail Timoty,+ ong mwomwohdisohn Koht me mi nan Korint, iangahki aramas sarawi kan koaros me mi nan Akaia pwon:+

2 Samatail Koht oh Kaun Sises Krais en ketikihong kumwail kadek sapan oh popohl.

3 Kaping en kohwong Koht, Semen atail Kaun Sises Krais,+ Semen kupwurkalahngan+ oh Koht en kansenamwahu koaros,+ 4 me kin ketin kansenamwahwih* kitail nan atail apwal* akan koaros+ pwe kitail en kak kansenamwahwihki meteikan+ me mi nan soangsoangen apwal* akan nsenamwahu me kitail alehdihsang rehn Koht.+ 5 Pwe duwen atail kin direkihla lokolok pwehki Krais,+ ih pil duwen atail kin direkihla nsenamwahu me kitail alehsang rehn Krais. 6 Eri ma se kin lelohng apwal* akan, iei pwe en wia amwail nsenamwahu oh komourpamwail; oh ma se nsenamwahula, iei pwe en wia amwail nsenamwahu, me pahn sewese kumwail en dadaur pahn soangen lokolok kohte me se pil kin lokolongki. 7 Oh at koapworopworkin kumwail kin tengeteng, pwe se ese me duwen amwail kin iang kiht nan lokolok kan, ih pil duwen amwail pahn iang kiht nsenamwahula.+

8 Pwe riat ko, se men kumwail en ese duwen kahpwal laud me se lelohng nan wehin Eisia.+ Se mihla pahn katoutou me inenen laudsang dahme se kakohng, kahrehda se sehse ma se kak momour.+ 9 Ni mehlel, se pehm me se alehdier kalokepen kamakamala. Met wiawi pwe sen dehr kin likih pein kiht, ahpw sen likih Koht+ me kin ketin kaiasada me melahr akan. 10 E ketin doareikitasang soangen keper en mehla wet, oh e pahn ketin doareikitala, oh se kin koapworopworki me e pil pahn ketin pousehlahte doareikitala.+ 11 Kumwail pil kak sewesei kiht sang ni amwail kapakapkin kiht ni ngidingid.+ Pwe ma me tohto kapakapkin kiht, Koht pahn ketin karonge oh sewesei kiht oh pwehki met, me tohto pahn kalahngankihong ih.+

12 Pwe soahng kan me se kin suweiki iei met, kadeikpen loalat kadehdehda at wiewia nan sampah, ahpw mehlel ong kumwail, me se kin kekeidki mour mwakelekel oh mehlel me kohsang rehn Koht, ahpw kaidehn erpit en sampah,+ pwe sapwellimen Koht kadek sapan. 13 Pwe uhdahno se sohte ntingkiwohng kumwail mehkot likin dahme kumwail kak wadek* oh wehwehki, oh I koapworopworki me kumwail pahn pousehlahte wehwehki mepwukat ni unsek.* 14 Ekei kumwail wehwehkier me se wialahr kahrepen amwail kin suwei, duwehte amwail pil pahn wia kahrepen at suwei ni rahnen atail Kaun Sises.

15 Eri sang ni koapworopwor wet, I koasoanehdi en kohwei rehmwail mahs, pwe kumwail en ahneki keriapak en peren;* 16 pwe I koasoanehdi I en mwemweitwei rehmwail ni ei pahn kohla Masedonia oh pil pahn pwurodo rehmwail sang Masedonia, a mwuri kumwail ahpw pahn iang ie aluhwei ekis ni ei pahn kohla Sudia.+ 17 Eri, kumwail ese me ni ei wiadahr soangen koasoandi wet, I sohte kin wiahki ire wet mehkot tikitik. De, ia duwe, I kin wiahda koasoandi nin duwen madamadau en aramas pwe I en kin nda “Ei, ei” a mwuri “Soh, soh”? 18 Ahpw kumwail kak likih Koht me dahme se ndaiong kumwail sohte kin “ei” a mwuri “soh.” 19 Pwe sapwellimen Koht ohlo, Sises Krais, me ngehi, Silpanus* oh Timoty+ kalohkihong kumwail duwe, sohte kin mahsanih “ei” a mwuri “soh,” pwe “ei” me pid duwen ih wialahr “ei.” 20 Pwe mendahki uwen tohtohn sapwellimen Koht inou kan, re wialahr “ei” pwehki ih.+ Eri pil pwehki ih, kitail kin patohwanohng Koht “Amen,”+ pwe kitail en kalinganahla ih. 21 Ahpw me ketikihda mehn kamehlel me kumwail oh kiht iei sapwellimen Krais oh me ketin keiekitaildier, iei Koht.+ 22 E pil ketikihong pohtail sapwellime kilel+ oh ketikihongkitailehr mehn kadehde en dahme pahn kohdo,* me iei, ngehn sarawi*+ nan mohngiongitail.

23 Eri I patohwan likweriong Koht en ketin wia ei sounkadehde, me I saikinte kohwei Korint pwehki ei sohte men kalaudehla amwail nsensuwed. 24 Kaidehn kiht me kaunen amwail pwoson,+ ahpw kiht iengamwail tohndoadoahk ong amwail peren, pwe kumwail kin kesihnenda teng pwehki amwail pwoson.

2 Pwe I koasoanedier nan ei madamadau en dehr pwurehng kohwei rehmwail ni nsensuwed. 2 Pwe ma I kahrehiong kumwail en nsensuwed, a ihs me pahn kak kaperenihiehda? Ihte irail kan me I kansensuwedihala. 3 Ih kahrepen ei ntingwohng kumwail, pwe ni ei pahn kohwei, I sohte pahn nsensuwedkihla irail kan me I anahne perenkihda, pwehki I kamehlele me dahme kin kihong ie peren pahn kihong kumwail koaros soangen perenohte. 4 Pwe sang ni kahpwal oh pwunod laud en mohngiong, I ntingwohng kumwail ni ei sengiseng laud, kaidehn pwe I en kansensuwedih kumwail,+ ahpw pwe kumwail en ese uwen loal en limpoak me I ahneki ong kumwail.

5 Eri ma mehmen wiadahr kansensuwed ehu,+ kaidehk ngehi me e kansensuwedihala, pwe kumwail koaros ni uwe ieu. Ahpw I sohte men nohn ngillemei. 6 Peneu wet me pali laud en kumwail kihongehr itarohng soangen aramas menet; 7 ahpw met kumwail anahne mahkohng ni kadek oh kansenamwahwihala,+ pwe eh nsensuwed laud en dehr powehdi ih.+ 8 Ihme kahrehda, I kangoangei kumwail en kamehlelehiong ih amwail limpoak.+ 9 Pwe ih pil kahrepe wet me I ntingkiwohng kumwail: pwe I en ese ma kumwail pahn kadehdehda amwail peik ni mehkoaros. 10 Ma kumwail pahn mahkikihong emen mehkot, I pil pahn wia met. Ni mehlel, mehkot sohte lipilipil me I mahkohng (ma I mahkohngehr mehkot) kin wiawi pwehki kumwail mwohn silangin Krais, 11 pwe Sehdan en dehr poweikitaildi,*+ pwe kitail ese eh wiepe kan.*+

12 Eri ni ei lella Troas+ pwe I en lohki rongamwahu duwen Krais oh wenihmw ehu ritidahng ie nan doadoahk en Kauno, 13 I ahpw uhdahn pwunodkihda ei sohte diarada riatail Taitus.+ Ngehi eri kamwurirailla oh mwesellahng Masedonia.+

14 Se kapingkalahngankihong Koht eh kin ketin kahluwei kitail ahnsou koaros nan kapar en powehdi rehn Krais! Oh sang atail doadoahk, e ketin kahrehiong loalokong duwen ih me duwehte pwohtik pwohmwahu ehu en ikiparpeseng wasa koaros. 15 Pwe ong Koht, kitail rasehng pwohtik pwohmwahu en Krais nanpwungen irail kan me pahn komourla oh nanpwungen irail kan me pahn sohrala; 16 ong mehn mwuhr ko, pwohn mehla me kin kahluwalahng mehla,+ a ong mehn mwowe ko, pwohtik pwohmwahu en mour me kahluwalahng mour. Oh ihs me kak wia mepwukat? 17 Iei kiht, pwe se sohte kin netikiseli* mahsen en Koht+ duwehte me aramas tohto kin wia, ahpw se kin koasoi ni mehlel nin duwen irail kan me Koht ketin poaronehdo, ei, mwohn silangin Koht, ni at kin ieiang Krais.

3 Ia duwe, se anahne pwurehng kapehsehiong kumwail pein kiht? De se anahne kisinlikoun kapehse ong kumwail de sang rehmwail, duwehte aramas teikan? 2 Pein kumwail iei nait kisinlikou+ me ntingdier nan at mohngiong oh aramas koaros kin ese oh pil wadek. 3 Pwe e sansal me kumwail iei kisinlikoun Krais me se ntingihedi nin duwen sounpapah kei,+ kaidehkin ingk me e ntingkihdi, pwe sapwellimen Koht ieias ngehn sarawi,* kaidehn pohn pelien takai patapat ko,+ ahpw ni mohngiong.*+

4 Se ahneki koapworopwor wet rehn Koht pwehki Krais. 5 Se sohte kin nda me se kak pein wia doadoahk wet, ahpw Koht me kin ketin sewesei kiht sen wia doadoahk wet,+ 6 oh e kin ketin sewesei kiht sen wiahla sounpapah en inou lap kapw,+ kaidehn sounpapah en kosonned me ntingdier,+ ahpw sounpapah en ngehn sarawi;* pwe kosonned me ntingdier kin kahrehda mehla,+ ahpw ngehn sarawi* kin kamourada.+

7 Oh pil, Kosonnedo me imwikihla mehla, me ntingdi pohn pelien takai ko+ pwarkihdo soangen lingan me mehn Israel ko sohte kak kilangki mesen Moses pwehki eh lingan,+ oh lingan wet pahn sohrala. 8 Eri, ia duwe, doadoahk en ngehn sarawi*+ sou pahn lingan sang mehlel?+ 9 Pwe ma Kosonnedo me imwikihla kadeik+ me lingan,+ a ia uwen doadoahk me kin sewese aramas en pwungla eh pahn lingan sang!+ 10 Ni mehlel, dahme linganlahr mahso kohsangehr eh lingan pwehki lingan me siksango.+ 11 Pwe ma dahme pahn sohralao kohdo ni lingan,+ eri dahme mihmihte ahnsou wet pahn ale lingan me inenen laudsang!+

12 Pwehki atail ahneki soangen koapworopwor wet,+ kitail kin doadoahngki saledek en koasoi, 13 oh sohte kin wia dahme Moses wia ni eh perehkihla meseo koaduhpwel ehu,+ pwe mehn Israel kan en dehr kilang imwilahn dahme pahn sohrala. 14 Ahpw arail madamadau konsla.+ Pwe leledo rahnwet, koaduhpwelo mihmihte oh sohte papahkda ni ahnsou me inou lap meringo kin wadawad,+ pwe e pahn kohsang ihte pwehki Krais.+ 15 Ni mehlel, leledo rahnwet, ahnsou koaros me pwuhken Moses kin wadawad,+ koaduhpwel ehu kin pwaindi mohngiongirail.+ 16 Ahpw ni emen eh kin sohpeiong Siohwa,* koaduhpwelo kin kohsang.+ 17 Eri Siohwa* iei Ngehn Emen,+ oh wasa me sapwellimen Siohwa* ngehn sarawi* kin mi ie, saledek pil kin mi wasao.+ 18 Oh kitail koaros, me kihsangehr koaduhpwel ni masatail kan kin rasehng mehn irongen kei me kin kasalehda sapwellimen Siohwa* lingan. Kitail kin wekidekla pwe kitail en rasehngala Koht oh kin kalakalaudehla atail kasalehda lingan en Koht, nin duwen Siohwa* me wia Ngehn Emen ketin kupwurki.*+

4 Eri, pwehki se ahneki doadoahk wet sang ni kadek kalahngan me sansalohng kiht, se sohte kin uhdi. 2 Ahpw se kin kesehla soahng kan me kanamenek oh rir, oh sohte kin kekeidki widing de kasapwungehla mahsen en Koht;+ ahpw sang ni at kin kasansalehda me mehlelo, se kin wia mehn kahlemeng mwahu ong kadeikpen loalen aramas koaros mwohn silangin Koht.+ 3 Ni mehlel, ma rongamwahu me se kin lohki kin koaduhpwaldi, eri e koaduhpwaldi rehn irail kan me pahn sohrala, 4 rehn me seupwoson akan, me koht en koasoandi en mwehi wet*+ kin karotongehla ar madamadau,+ pwe marain en lingan duwen rongamwahu en Krais, me iei kasalepen Koht,+ en dehr dakerirailda.+ 5 Pwe se sohte kin kalohki duwen pein kiht, ahpw se kin kalohki me Sises Krais iei me Kaun, a kiht, se wia amwail ladu pwehki Sises. 6 Pwe Koht me ketin mahsanih: “Marain en dakerada nan rotorot,”+ oh e ketin dakerki mohngiongitail+ loalokong en Koht me lingan sang ni silangin Krais.

7 Ahpw, se ahneki pai kesempwal wet+ nan sah pwehl kan,+ pwe kehl me laudsang dahme aramas ahneki en kohsang rehn Koht, a kaidehn sang kiht.+ 8 Se uhdahn idaidpene sang pali koaros, ahpw kaidehn pwe se sohte kak mwekid; se pingida, ahpw mie elen pitila;*+ 9 aramas kin kalokei kiht, ahpw Koht sohte kin ketin likidmelieikitala;+ aramas kin keseikitdi nanpwel, ahpw se sohte kin ohla.+ 10 Ahnsou koaros se kin weuwaseli ni paliwarat keper en mehla me kohwong Sises,+ pwe mouren Sises en pil sansalda ni paliwarat. 11 Pwe kiht akan me momour kin mi nan keper en mehla+ ahnsou koaros pwehki Sises, pwe mouren Sises en pil sansalda ni paliwarat me kin mehla. 12 Eri mehla kin wie doadoahk reht, ahpw mour kin wie doadoahk rehmwail.

13 Eri pwehki se ahneki soangen pwosonohte me ntingdier: “I kin kasalehda pwoson, ihme I lokaiahki”;+ se pil kin kasalehda pwoson oh ihme se kin lokaiahki, 14 pwe se ese me Ih me ketin kaiasadahr Sises pil pahn ketin kaiasada kiht rehn Sises oh pahn ketikinkitlahng reh, iangahki kumwail.+ 15 Mepwukat koaros wiawi ong kamwahupamwail pwe aramas tohto en alehdi sapwellimen Koht kadek sapan. Pwehki met, aramas tohto pahn patohwanohng Koht kapingkalahngan, oh met pahn kalinganahda Ih.+

16 Ihme kahrehda kitail sohte kin uhdi, pwe mehnda ma paliwaratail kin luhluwetala, loalatail kin kekehlailla ehuehu rahn. 17 Pwe mehnda ma kahpwalo kin ongete ahnsou kis oh me marahra, e kin kahrehiong kitail en ale lingan ehu me kin wie lalaudla oh me poatopoat.+ 18 Kitail kin kilengwohng, kaidehn soahng kan me kitail kak kilang, ahpw soahng kan me kitail sohte kak kilang.+ Pwe soahng kan me kitail kak kilang kin ongete ahnsou kis, ahpw soahng kan me kitail sohte kak kilang kin poatopoat.

5 Pwe kitail ese me ma imwatail ihmw en sampah, me iei impwal wet, pahn kamweremwerdi,+ kitail pahn imwaneki ihmw ehu sang rehn Koht, ihmw ehu me sohte wiawihkihda pehn aramas,+ me pahn poatopoat nanleng. 2 Pwe nan ihmw* wet, kitail kin ingihngtik oh kin uhdahn inengieng pwuhriong me pahn kohieng kitail sang nanleng,*+ 3 pwe ni atail pahn pwuhriong, kitail sohte pahn kilisou. 4 Ni mehlel, kitail me kin mi nan impwal wet kin ingihngtik oh toutoukihla pwunod, pwe kitail sohte men kapwuhrasang mewet, ahpw kitail men pwuhriong meteio,+ pwe mour en kadallehla me kin mehlao.+ 5 Eri me ketin kaunopadahng kitail mewet iei Koht,+ me ketikihong kitail ngehn sarawi* nin duwen mehn kadehde en dahme pahn kohdo.*+

6 Eri kitail kin diren eimah ahnsou koaros oh ese me ni atail kin momour nan paliwar wet, kitail kin dohsang Kauno,+ 7 pwe kitail kin weweidki pwoson, a kaidehn dahme kitail kilang. 8 Ahpw kitail kin diren eimah oh men dohlahsang paliwar wet oh kousoanla rehn Kauno.+ 9 Eri sohte lipilipil ia wasa kitail kin mi ie, mehnda ma kitail mi reh de soh, kitail kin nannanti pwe kitail en kaperenda ih. 10 Pwe kitail koaros anahne pwarala mwohn mwoalen kadeik en Krais, pwe emenemen en ale ketingpe nin duwen soahng kan me e wiadahr ni eh momour nan paliwar, mehnda ma mwahu de suwed.+

11 Eri, pwehki at ese dahkot lemmwiki Kauno, se kin pousehlahte kamwakid aramas akan ren kamehlele, ahpw Koht uhdahn ketin mwahngih duwen kiht. Ahpw, I koapworopworki me kadeikpen loalamwail pil uhdahn wehwehkin kiht. 12 Se sohte men pwurehng suwei ong kumwail, ahpw se men kihong kumwail kahrepen amwail pahn suweikin kiht, pwe kumwail en kak sapeng irail ko me kin suweiki masliki,+ a kaidehn dahme mi nan mohngiong. 13 Pwe ma se sahliel,+ se wia met pwehki Koht; ma se ahneki madamadau pwung, se wia met pwehki kumwail. 14 Pwe limpoak en Krais me kin kamwakid kitail laud, pwehki iet me se dehdehkier, me aramas tehmen pwoukihla aramas koaros;+ pwehki aramas koaros melahr. 15 Oh e pwoukihla aramas koaros pwe irail kan me momour en solahr momourki pein irail,+ ahpw ren kin momourki ih me pwoukinirailla oh ketin iasadahr.

16 Eri sang met kohla, kitail solahr pahn kilang aramas nin duwen lamalam en aramas.+ Mehnda ma mahso kitail kin kilang Krais nin duwen lamalam en aramas, a met kitail solahr kin kilang ih ni mwohmw wet.+ 17 Eri, ma mehmen kin miniminiong Krais, ih kepikipik kapw ehu;+ soahng mering kan sohralahr; kilang! soahng kapw kan mielahr. 18 Ahpw mehkoaros kohsang rehn Koht. Ih me ketin pwurehng kupwuramwahwih kitail pwehki Krais+ oh ketikihong kitail doadoahk en sewese aramas akan en pwurehng ale kupwuramwahu en Koht,+ 19 met wehwehki me Koht ketin pwurehng kupwuramwahwih sampah ni eh ketin doadoahngki Krais,+ oh e sohte kin ketin kapwukoahkin irail diparail kan,+ oh e ketikihong kitail doadoahk en padahkihong aramas akan me irail kak pwurehng ale sapwellime kupwuramwahu.+

20 Eri, kitail meninkeder kei,+ wiliepen Krais,+ oh mwomwen me Koht ketin wia pekipek ehu rehn aramas akan ni eh ketin doadoahngkin kitail. Nin duwen wiliepen Krais kei, kitail kin peki: “Kumwail pwurehng ale kupwuramwahu en Koht.” 21 Koht ketin wiahiong me sohte dipeo+ en dipanla* pwehki kitail, pwe kitail en pwungla rehn Koht pwehki ih.+

6 Se kin iang ih doadoahk+ oh se pil kangoangei kumwail en ale sapwellimen Koht kadek sapan oh dehr mwamwahliki.+ 2 Pwe e ketin mahsanih: “Ni ahnsoun kupwuramwahu I rong uhk, oh ni rahnen komour I seweseiuk.”+ Kilang! Met iei ahnsoun kupwuramwahu. Kilang! Met iei rahnen komour.

3 Se soh mwahn kin wiahda mehn kadipekelekel, pwe emen de kauwe at doadoahk;+ 4 ahpw ni mehkoaros se kin kasalehda me kiht sapwellimen Koht sounpapah kei,+ ni at kin dadaur pahn soahng tohto, ni kahpwal kan, ni ahnsoun semwehmwe, ni irair apwal kan,+ 5 ni at wowoki, ni at lekdekiong nan imweteng,+ ni moromor kan, ni at kin doadoahk laud, ni at sohte kin meir nipwong, ni ahnsou me sohte mwenge;+ 6 ni at mwakelekel, ni at loalokong, ni at kanengamah,+ ni at kadek,+ ni ngehn sarawi,* ni limpoak me sohte mwalaun,+ 7 ni at koasoi mehlel, ni manaman en Koht;+ ni tehtehn mahwen en pwung+ ni peh palimaun* oh palimeing,* 8 ni lingan oh soh wahu, ni rohng suwed oh rohng mwahu. Aramas kin wiahkin kiht sounwiding kei ahpw se kin mehlel, 9 sampah sohte kin esei kiht, ahpw Koht ketin mwahngih kiht, e mwomwen me se pahn mehla, ahpw kilang! se momour,+ e mwomwen me se kalokolok,* ahpw se sohte kamakamala,+ 10 e mwomwen me se pahtou ahpw se pereperen, e mwomwen me se semwehmwe ahpw se kin kakepwehpwehla me tohto, e mwomwen me se sohte ahneki mehkot ahpw se ahneki mehkoaros.+

11 Mehn Korint kan, se kin koasoiong kumwail ni saledek, oh se kin ritingada douluhl at mohngiong. 12 Se sohte kin irehdi at limpoak ong kumwail,+ ahpw kumwail kin irehdi amwail limpoak ong kiht. 13 I kin koasoiong kumwail duwehte nei seri kan, kumwail wiahiong kiht duwehte me se kin wiahiong kumwail, kumwail ritingada douluhl amwail mohngiong.+

14 Kumwail dehr patehng* me seupwoson kan.+ Pwe soangen werek dah me me pwung oh me suwed ahnekipene?+ De dahme marain oh rotorot ahnekipene?+ 15 Oh pil, soangen pwungpene dahieu me mie nanpwungen Krais oh Pihliel?*+ De dahme me pwoson men* oh me seupwoson men kin ahnekipene?+ 16 Oh soangen pwungpene dahieu me mie nanpwungen dikedik kan oh sapwellimen Koht tehnpas?+ Pwe kitail iei tehnpesen Koht ieias men;+ duwehte Koht eh ketin mahsanih: “I pahn kousoan nanpwungarail+ oh weweid nanpwungarail, oh I pahn wiahla ar Koht, oh re pahn wiahla nei aramas.”+ 17 “Siohwa* ketin mahsanih: ‘Ihme kahrehda kumwail pedoisang rehrail oh katohreikumwailla oh dehier doahke mehkot samin’”;+ “‘I ahpw pahn kasamwo kumwail.’”+ 18 “Siohwa,* Koht me Keieu Manaman, ketin mahsanih: ‘Oh I pahn wiahla samamwail,+ oh kumwail pahn wiahla nei pwutak kan oh nei serepein kan.’”+

7 Eri kompoakepahi ko, pwehki atail ahneki inou pwukat,+ kitail kamwakeleikitailsang mehkoaros me kin kasaminehla paliwar* oh elen madamadau,*+ oh kitail sarawihla ni unsek ni atail kin lemmwiki Koht.

2 Kumwail wiahda dewat nan mohngiongimwail.+ Sohte sapwung me se wiahiong emen, se sohte kauwehla emen, oh se sohte isanekihla emen.+ 3 I sohte nda met pwe en kadeingkumwailda. Pwe I ndahier mwoweo, me kumwail kin mi nan at mohngiong mehnda ma se momour de mehla. 4 I ahneki saledek laud en koasoiong kumwail. I uhdahn kin suweikin kumwail. I kin direkihla nsenamwahu; I kin direkihla peren nan at lokolok koaros.+

5 Ni mehlel, ni at lella Masedonia,+ paliwarat ka* sohte kin kommoal, ahpw se kin pousehlahte lokolok ni mehkoaros—​mie pei liki oh pwunod loalat. 6 Ahpw Koht, me kin ketin kansenamwahwih me nan kapehd toutoulahr akan,+ ketin kansenamwahwihkinkitala en Taitus eh mihmi reht; 7 ahpw kaidehkte eh mihmi reht, ahpw e pil nsenamwahula pwehki kumwail, ni eh kairehkin kiht duwen amwail ngoangkilahr en kilang ie, amwail pahtou laud, oh amwail uhdahn nsenohkin* ie; iei met me kalaudehla ei peren.

8 Pwe mehnda ma I pil kansensuwedihkinkumwailla nei kisinlikowo,+ I sohte koluhkihla. Mehnda ma I koluhkihla nin tapio (ni ei esehda me kisinlikowo kansensuwedihkumwailla, mehnda ma pil ongete ahnsou kis), 9 met I perenda, kaidehnte pwehki amwail nsensuwedla, ahpw pil pwehki amwail nsensuwed eh kahrehiong kumwail en koluhla. Pwe kumwail nsensuwedla ni ahl me Koht ketin kupwurki, kahrehda sohte mehkot suwed se kahrehiong kumwail. 10 Pwe nsensuwed me Koht ketin kupwurki kin kahrehda koluhla me kahluwalahng komour oh kitail kin paiekihda;+ ahpw nsensuwed en sampah kin kahrehda mehla. 11 Pwe kilang ia uwen nsenoh laud me amwail nsensuwedla ni ahl me Koht ketin kupwurki eh wiahiong kumwail, ei, kumwail kadehdedahr me sohte amwail sapwung, kumwail nsensuwedkihla suwedo, lemmwiki Koht, ei, kumwail kasalehdahr amwail inengieng, ngoang oh kumwail kapwungala sapwungo!+ Ni mehkoaros, kumwail kasalehdahr amwail mwakelekel ni ire wet. 12 Mehnda ma I ntingwohng kumwail, I sohte wia met ong aramas me wiahda sapwungo,+ de aramas me sapwung wiawihongo, ahpw pwe amwail mehlel ong kiht en sansalda nanpwungamwail mwohn silangin Koht. 13 Ihme se nsenamwahukihla.

Ahpw patehng at nsenamwahula, at peren pil laudkihla ahn Taitus peren, pwehki kumwail koaros kaperenihada. 14 I suweikin kumwail ong ih, oh I sohte namenengkihla; ahpw duwehte soahng koaros me se ndaiong kumwail ar kin mehlel, eri at suweikin kumwail ong Taitus pil sansaldahr me e mehlel. 15 Eh limpoak ong kumwail pil laudla ni eh kin tamanda me kumwail koaros kin peik,+ oh duwen amwail kin kasamwo ih ni lemmwin oh wahu laud. 16 I perenki ei koapworopworkin* kumwail ni mehkoaros.

8 Eri riat ako, se men kumwail en ese duwen sapwellimen Koht kadek sapan me kohieng mwomwohdiso kan en Masedonia.+ 2 Erein ar mi nan kahpwal pwehki songosong laud, re kasalehda arail peren laud oh arail sapan mendahki irail uhdahn semwehmwe. 3 I kak kadehde me re kihda uwen me re kak,+ ei, pil laudsang dahme re kakohng.+ 4 Re pein peki reht ni ngidingid ren iang kihda sawas ni kadek, pwe ren iang doadoahk en sawas ong aramas sarawi kan.+ 5 Oh re wia laudsang dahme se kasik, pwe keieu, re mweidohng pein irail Kauno oh pil kiht sang ni kupwuren Koht. 6 Eri, se kangoange Taitus+ en kanekehla eh kihpene amwail kisakis en kadek wet pwehki ih me tapihadahr doadoahk wet rehmwail. 7 Ahpw kumwail direkilahr mehkoaros, me duwehte pwoson, koahiek en koasoi, loalokong, ngoang, oh kumwail kin poakohng aramas duwehte at kin poakohng kumwail. Kahrehda, kumwail en pil sapan nan soangen doadoahk en sawas wet.+

8 I sohte nda met nin duwen kehkehlik ehu ong kumwail, ahpw I men kumwail en ese ahn meteikan ar doadoahk laud oh ngoang oh I en kilang ma amwail limpoak uhdahn mehlel. 9 Pwe kumwail ese kadek sapan en atail Kaun Sises Krais, me mendahki eh kepwehpwe, e ketin semwehmwehla pwehki kumwail,+ pwe kumwail en kepwehpwehla sang ni eh semwehmwehla.

10 Oh I pahn kihda ei madamadau ong ire wet:+ Met iei ong kamwahupamwail, pwehki sounpar ehu samwalahro, kumwail tepidahr wia met, ahpw kaidehn ihte met, kumwail pil kasalehda amwail ineng en wia met. 11 Eri kumwail kanekehla dahme kumwail tapihadahr. Ni ahl wet, kumwail pahn kanekehla nin duwen dahme kumwail ahneki, duwehte me kumwail inengieng wia nin tapio. 12 Pwe ma ineng wet mieier, eri me pahn keieu konehng iei emenemen en kin kihwei nin duwen dahme e ahneki,+ a kaidehn dahme e sohte ahneki. 13 Pwe I sohte men wia en mengeiong meteikan, ahpw apwal ong kumwail; 14 ahpw sang ni atail pahn wiahda en soangen pahrekteieu, dahme depala rehmwail ahnsou wet en kaitarala arail anahn, pwe dahme depala rehrail en pil kaitarala dahme sohte itar rehmwail pwe en pahrek. 15 Duwehte me ntingdier: “Aramas me rikpene me tohto, e sohte nohn depala, oh aramas me rikpene me malaulau, e sohte nohn malaulaula.”+

16 Eri se kalahngankihong Koht eh ketikihong nan mohngiong en Taitus+ soangen nsenoh me se ahneki ong kumwail. 17 Pwehki e mwekidki dahme se ndaiong, ahpw, e pil ngoangki wia dahme se peki reho, eri e pahn kohwei rehmwail sang ni pein nsene. 18 Ahpw se pahn kadarewei ih oh pil riatailo me mwomwohdiso koaros kin kapingahki dahme e kin wia me pid rongamwahwo. 19 Kaidehn ihte met, ahpw mwomwohdiso kan pil idihadahr ih en iang kiht seiloak ni at pahn apwalihala kisakis en kadek wet ong ni kalinganpen Kauno oh pwe en kadehdehda me se men sewese meteikan. 20 Eri, se kin kanahieng pwe emen de kauwe mwomwen at kin apwalih kisakis sapan wet.+ 21 Pwe se kin ‘mehlel ni at apwalihala soahng koaros, kaidehkinte mwohn silangin Siohwa,* ahpw pil mwohn mesen aramas akan.’+

22 Patehng met, se pahn kadarirahwei iangahki emen riatail me se kadehdeier pak tohto oh eseier me e kin pwerisek ni soahng tohto, ahpw met eh ngoang kin laudla pwehki eh kin koapworopworkin kumwail laud. 23 Ahpw ma mie me peikasalki Taitus, ih iengei oh e kin iang ie doadoahk ong kamwahupamwail; de ma mie me peikasalki riatail ko, ira iei wahnpoaron en mwomwohdiso kan oh kalinganpen Krais. 24 Eri kasalehda kadehdepen amwail limpoak ong irail,+ oh kasalehiong mwomwohdiso kan kahrepen at kin suweikin kumwail.

9 Eri I sohte anahne ntingkiwohng kumwail duwen doadoahk* me pid aramas sarawi kan,+ 2 pwe I ese duwen amwail kin men sawas me I kin suweikihong mehn Masedonia ko, me kumwail nan Akaia kaunopadahr erein sounpar ehu, oh amwail ngoang kamwakidada pali laud en irail. 3 Ahpw I pahn kadarewei riatail ko, pwe at kin suweiki amwail sapan en dehr sohte katepe oh kumwail en uhdahn onopada, duwehte ei ndahier me kumwail pahn wia. 4 Pwe ma soh, eri, ma mehn Masedonia kan pahn iang ie kohwei oh diarada me kumwail sohte onopada, se pahn namenekla pwehki at kin koapworopworkin kumwail, oh kumwail pil pahn namenekla. 5 Kahrehda I medewe me I anahne kangoange riatail ko pwe ren tiengwei rehmwail oh kaunopada mwowe amwail kisakis sapan kan me kumwail inoukihda, pwe met en onopada nin duwen kisakis sapan, a kaidehn nin duwen mehkot idihd.

6 Ahpw duwen ire wet, mehmen me kin kamwarak malaulau, pahn pil dolung malaulau, oh mehmen me kin kamwarak tohto, pahn pil dolung tohto.+ 7 Emenemen en wia nin duwen me e koasoanedier nan eh mohngiong, kaidehn ni mehnseiren de ni idihd,+ pwe Koht kin ketin poakohng me kin perenki kihwei.+

8 Patehng met, Koht kak ketin kahrehiong sapwellime kadek sapan koaros en dirala rehmwail pwe ahnsou koaros kumwail en kin ahneki soahng koaros me kumwail anahne oh pil direkihla dahme anahn ong doadoahk mwahu koaros.+ 9 (Duwehte eh ntingdier: “E kin nehkpeseng ni sapan; e kin kihong me semwehmwe kan. Wahn eh wiewia pwung kan pahn mihmi kohkohlahte.”+ 10 Eri, Koht me kin ketikihong sounkamwarak werentuhke tohto oh pilawa ong mwenge, pahn ketikihda oh kadirehla werentuhke ong kumwail en kamwarak oh pahn ketin kalaudehla wahn amwail wiewia pwung.) 11 Koht kin ketin kapaia kumwail ni mehkoaros pwe kumwail en kak sapan ni soangen ahl koaros, oh sang ni at wiewia kan, soangen sapan wet kin kamwakid aramas akan ren kalahngankihong Koht; 12 pwehki doadoahk en sawas ong wehipokon wet sohte pahn ihte apwalihala mwahu anahn en aramas sarawi kan,+ ahpw aramas tohto pil pahn kalahngankihong Koht doadoahk wet. 13 Sang ni mehn kadehde me doadoahk en sawas wet kin kihda, re kin kalinganahda Koht pwehki amwail kin peikiong rongamwahu duwen Krais, ni amwail kin lohkihong wehipokon, oh pwehki amwail kin sapan ni amwail kin sewese irail oh meteikan koaros.+ 14 Oh ni ar kin kapakapkin kumwail ni ngidingid, re kin kasalehda arail limpoak ong kumwail pwehki sapwellimen Koht kadek sapan lapalap ong kumwail.

15 Kitail kalahngankihong Koht sapwellime kisakis* me sohte lokaia kak kawehwehda uwen eh kaselel.

10 Eri pwehki sapwellimen Krais mpahi oh kadek,+ pein ngehi Pohl peki rehmwail, mehnda ma I luwet ni ei kin mi rehmwail,+ ahpw I kin lokaia inen ong kumwail ni ei sohte kin mi rehmwail.+ 2 Ni mehlel, I kasikasik me ni ei pahn mi rehmwail, I sohte anahne lipwoare laud irail me kin medewe me se kin weweidki lamalam en sampah. 3 Pwe mehnda ma at mour duwehte ahn aramas teikan, se sohte kin pei nin duwen madamadau en sampah. 4 Pwe tehtehn mahwen nan at pei sohte kin kohsang sampah,+ ahpw mepwukat tehtehn mahwen kehlail kei me Koht ketikihong kiht+ pwe sen kauwehla soahng kan me teng oh kehlail. 5 Pwe se kin kauwehla madamadau likamw oh soangen aklapalap koaros me kin kerempwa aramas en esehla Koht,+ oh se kin salihedi madamadau koaros pwe en peikiong Krais; 6 oh se onopadahr en kaloke koaros me kin sapeik,+ mwurin amwail pahn kadehdehda amwail peik ni unsek.

7 Kumwail kin kasawih soahng kan sang ni mwomwarail. Ma mehmen kin kamehlele me pein ih sapwellimen Krais, en pil pwurehng medewe ire mehlel wet: Kiht pil sapwellimen Krais duwehte ih. 8 Pwe mehnda ma e ekis daulihala ei suweiki manaman me Kauno ketikihong kiht pwe sen kakehlakahkin kumwail a kaidehn en kauwehkin kumwail,+ I sohte pahn namenengki. 9 Pwe I sohte men kumwail en medewe me I men kamasangkin kumwail nei kisinlikou kat. 10 Pwe ekei kin nda: “Nah kisinlikou kan kin kehlail oh kin koasoia soahng kesempwal kan, ahpw ni eh mihmi rehtail, mwomwe kin luwet oh eh lokaia kin sohte katepe.” 11 Soangen aramas menet en ese me dahme se nda nan kisinlikou kan ni at sohte mi rehmwail, ih me se pahn pil wia ni at mihmi rehmwail.+ 12 Pwe se sohte men kapahrekiong pein kiht de karasahiong pein kiht ekei aramas me kin suweiki pein irail.+ Pwe ni arail kin sohng pein irail sang ni pein arail koasoandi oh karasahiong irail pein irail, met kasalehda me sohte arail koahiek en wehwehki mehkot.+

13 Se sohte pahn suweiki soahng teikan likin doadoahk me Koht ketin kilelehdiong kiht, ahpw se pahn suweiki pwukoa me se alehdi sang Koht, oh kumwail pil iang mi nan pwukoa wet.+ 14 Ni mehlel, se sohte daulihala irepen at wasa, mwomwen me e sohte lelewei rehmwail, pwe kiht me tepin lelkihwei rehmwail rongamwahu duwen Krais.+ 15 Soh, se sohte kin suweiki doadoahk en emen tohrohr likin at wasa me se pwukoahki, ahpw se kin koapworopworki me ni amwail pwoson eh wie lalaudla, dahme se wiadahr pil pahn laudla nan at wasa. Eri irepen at doadoahk pahn lalaudla, 16 pwe sen lohki rongamwahwo nan wehi kan palilahsang kumwail, pwe sen dehr suweiki dahme wiawidahr nan ahn emen tohrohr wasa. 17 “Ahpw mehmen me kin suwei, a en suweiki Siohwa.”*+ 18 Pwe kaidehn me kin suweiki pein ih me Koht kin ketin kupwurki,+ ahpw Siohwa* me kin ketin pilada me e kin ketin kupwurki.+

11 I men kumwail en kanengamahiong ie, mehnda ma I mwomwen pweipwei. Ahpw ni mehlel, kumwail kin kanengamahiong ie! 2 Pwe I kin luwangkin kumwail duwehte Koht eh ketin luwangkin kumwail,* pwe pein ngehi wiahda inou me kumwail en pwoudiki ohl tehmen, Krais, oh I men patohwanohng ih kumwail nin duwen meipwon mwakelekel men.+ 3 Ahpw I perki ma amwail madamadau pahn sapwungala sang me mehlel oh mwakelekel me kumwail anahne kasalehiong Krais,+ duwehte Ihp eh lohdi pahn widing en serpento.+ 4 Pwe ni mehlel, ma emen kohdo oh kalohki emen Sises me tohrohrasang me se kin kalohki, de kumwail ale ehu elen madamadau* me tohrohrasang me kumwail aleier, de rongamwahu me tohrohrasang me kumwail kamehlele,+ kumwail kin kanengamahiong ih. 5 Pwe I medewe me sohte mehkot kin kadehdehda me I mi pahnangin amwail wahnpoaron kan me kin mwomwehda me re uhdahn mwahu.+ 6 Mehnda ma I soakoahiek ni lokaia,+ ahpw mie ei loalokong; ni mehlel, se kasalehiong kumwail met ni sansal ni ahl koaros oh ni mehkoaros.

7 De I wiahda dihp ehu pwehki ei perenki lohkihong kumwail rongamwahu en Koht ni soh isepe+ oh katikala pein ngehi pwe kumwail en waunla? 8 I kin ale sawas sang mwomwohdiso teikan oh met duwehte ei kin pirapahda mepwukat pwe I en papah kumwail.+ 9 Ahpw, ni ei kin mihmi rehmwail oh anahnehda mehkot, I sohte kin katoutouwihala emen, pwe riatail ko me kohsang Masedonia kin kihong ie soahng koaros me I anahne.+ Ei, I sohte kin katoutouwih kumwail ni soahng koaros oh I pahn doulahte wia met.+ 10 I kin koasoia me mehlel duwehte me Krais kin ketin wia, kahrehda I sohte pahn uhdihsang suweiki met+ nan Akaia pwon. 11 Ia kahrepe? Pwehki ei sohte poakohng kumwail? Koht ketin mwahngih duwen ei kin poakohng kumwail.

12 Mie ekei me kin suwei oh nda me irail wahnpoaron kei duwehte kiht. Eri I pahn pousehlahte wia dahme I kin wiewia+ pwe I en irehsang irail kahrepen ar suwei. 13 Pwe aramas pwukat wahnpoaron likamw kei, tohndoadoahk likamw kei me kin mwomwehda wia wahnpoaron en Krais.+ 14 Oh e sohte kapwuriamwei, pwehki Sehdan kin mwomwehda wia tohnleng en marain.+ 15 Ihme kahrehda, e pil sohte kapwuriamwei ma nah sounpapah kan kin mwomwehda wia sounpapah en me pwung. Ahpw dahme pahn wiawihong irail ni imwio pahn poahsoankihda arail doadoahk.+

16 I pahn pwurehng nda: Emen dehpa medewe me I pweipwei. Ahpw mehnda ma ih me kumwail medewehn met, eri kumwail kanengamahiong ie ma I mwomwen pweipwei, pwe I en pil kak ekis suwei. 17 Dahme I nda ahnsou wet, sohte duwehte mwomwen Kauno eh pahn mahsen, ahpw I kin suwei duwehte aramas pweipwei men me kin likih pein ih. 18 Pwehki me tohto kin suweiki mehkan en sampah, I pil pahn suwei. 19 Pwehki amwail uhdahn “loalokong,” kumwail kin perenki kanengamahiong me pweipwei kan. 20 Ni mehlel, kumwail kin kanengamahiong mehmen me kin kaliduwih kumwail, me kin adihasang amwail kepwe kan, me kin kulihasang dahme kumwail ahneki, me kin kasapwilada pein ih pohmwail, oh me kin pohr masamwail.

21 E kanamenek ong kiht en nda met, pwehki e mwomwen me at mwekid me luwet.

Ahpw ma emen pahn wia mehkot ni eimah, I pil kak wia met ni eimah, eri I lokaiahn aramas pweipwei. 22 Irail mehn Ipru? Ngehi pil mehn Ipru.+ Irail mehn Israel? Ngehi pil mehn Israel. Irail kadaudok en Eipraam? Ngehi pil.+ 23 Irail sounpapah en Krais kei? I kin sapeng duwehte aramas sahliel men, I uhdahn wia sounpapah en Krais men mwahusang irail: I kin doadoahk laudsang irail,+ selidi pak tohtohsang irail,+ wowoki pak tohto, oh kereniong mehla pak tohto.+ 24 Pak limau I ale wowoki silihsek duwau sang rehn mehn Suhs akan,+ 25 pak siluh I wowokihki lepin tuhke,+ pak ehu kostakaidi,+ pak siluh sohp me I iang ko ohla,+ I peipeikiseli nan madau pwohng ehu oh rahn ehu; 26 ni ei kin kalapw seiloak, I kin lelohng kahpwal sang nan pillap akan, kahpwal sang lipirap akan, kahpwal sang rehn pein ei aramas akan,+ kahpwal sang rehn mehn liki kan,+ kahpwal nan kahnimw,+ kahpwal nan sapwtehn, kahpwal nansed, kahpwal sang rehn riatail likamw akan, 27 I kin doadoahk laud oh nannanti, kalapw sohte meir nipwong,+ duhpek oh men nimpil,+ kalapw sohte kenei mwenge,+ pou oh sohte ei likou.*

28 Kaidehn ihte mepwukat, ahpw pil ehuehu rahn I kin pwunodki mwomwohdiso koaros.+ 29 Ni emen eh kin luwet, I sou kin luwetala? Ni emen eh kin dipekelekel, I sou kin lingeringerda?

30 Ma I uhdahn pahn suwei, I pahn suweiki soahng kan me kin kasalehda ei luwet. 31 Koht Semen Kaun Sises, me ketin warohng ale kaping kohkohlahte, ketin mwahngih me I sohte kin likamw. 32 Nan Damaskus, kepina me kin papah nanmwarki Aretus silehdi ewen kelen kahnimwo pwe en koliehdi, 33 ahpw I epidi nan kopwou ehu sang ni wenihmwtok en kelen kahnimwo,+ ngehi eri pitila.

12 I anahne suwei. Eri I pahn koasoia duwen kasansal kan+ oh kaudiahl kan en Kauno,+ mendahki met sohte mwahu ong ie. 2 I ese aramas emen me kin miniminiong Krais me pwekipwekdahla nanleng kesiluh sounpar 14 samwalahro. I sehse ma met wiawi ni paliwar de likin paliwar; Koht me ketin mwahngih. 3 Ei, I ese aramas menet. E pwekipwekdalahng paradais, I sehse ma ni paliwar de likin paliwar; Koht me ketin mwahngih, 4 oh ni eh mihmi nan paradais, e rongada mahsen kan me aramas sohte kak koasoia oh sohte mweimwei aramas emen en koasoia. 5 I pahn suweiki soangen aramas menet, ahpw I sohte pahn suweiki pein ngehi, ihte ei luwet kan. 6 Pwe ma I pil men suwei, I sohte pahn mwomwen pweipwei, pwe I pahn lokaia mehlel. Ahpw I sohte pahn suwei, pwe emen de kapinga ie laud sang dahme e kilang rehi de rongasang ie, 7 ihte pwehki soangen kaudiahl kapwuriamwei kan me I ale.

Pwe I en dehr aklapalapala, kisin tek kis kohieng ni paliwereiet,+ me duwehte tohnleng en Sehdan, pwe en wie popohr* ie, pwe I de aklapalapala. 8 Pak siluh I peki rehn Kauno duwen met, pwe kisin tek kiset en kohsang ie. 9 Ahpw e ketin mahsanihong ie: “Ei kadek sapan kin itarohng uhk, pwe ei manaman kin unsekla ni omw kin luwet.”+ Eri I pahn perenki suweiki ei luwet kan, pwe manaman en Krais en mihmi pohi duwehte impwal ehu. 10 Eri I kin peren ni ei kin luwet, ni ei kin mwamwahlla, ni ahnsoun semwehmwe, ni ei kin kalokolok oh ni ei kin mi nan kahpwal pwehki Krais. Pwe ni ahnsou me I kin luwet, ih ahnsou me I kin kehlail.+

11 Pwehki kumwail, I kin koasoi duwehte aramas pweipwei men. Ahpw ma kumwail koasoia soahng mwahu kan duwen ngehi, I sohte pahn koasoi ni mwohmw wet. Mehnda ma kaidehn ngehi mehkot, sohte mehkot me kak kadehdehda me I mi pahnangin amwail wahnpoaron kan me kin mwomwehda me re uhdahn mwahu.+ 12 Ni mehlel, pein kumwail kilang mehn kadehde me ngehi wahnpoaron men sang ni kanengamah laud+ oh sang ni kilel kan oh soahng kapwuriamwei kan oh manaman kan.+ 13 Pwe ia mwomwen amwail sekeniken sang mwomwohdiso teikan, kaidehn ihte ei sohte kin katoutouwihkin kumwail mehkot?+ Eri kumwail menlau mahkikihong ie sapwung wet.

14 Kilang! Met iei kesilipak en ahnsou me I onopadahng kohwei rehmwail, oh I sohte pahn katoutouwihkin kumwail mehkot. Pwe I sohte raparapahki amwail kepwe kan,+ ahpw kumwail; pwe kaidehn seri kan+ me pahn nahkohng ar pahpa oh nohno kan, ahpw pahpa oh nohno kan ong nair seri kan. 15 A ngehi, I uhdahn pahn perenki kihong kumwail mehkoaros oh tounmeteikihla pein ngehi ong kumwail.+ Ma ei poakohng kumwail uhdahn lalaudla, ia duwe, amwail poakohng ie pahn tikitikla? 16 Ahpw mendahki met, I sohte kin katoutouwihkin kumwail mehkot.+ Ahpw kumwail kin nda me I “mwersuwed” oh I kolkumwaildi “pwehki widing.” 17 Ia duwe, I pitihasang kumwail mehkot sang rehn irail ko me I kadarowohng kumwail? 18 I kangoange Taitus en kohwei rehmwail oh I kadarewei ih oh emen riatail. Ia duwe, Taitus kin isanekin kumwail?+ Soh douluhl. Ia duwe, se sou kin kasalehda soangen madamadauteieu?* Se sou kin weweid ni ahl tehieu?

19 Kumwail kin medemedewe me se kin koasoi pwe sen doare pein kiht mwohmwail? Se koasoakoasoi mwohn silangin Koht ni at miniminiong Krais. Ahpw kompoakepahi ko, se kin wia mehkoaros pwe sen kakehlaikumwailda. 20 Pwe I perki me ni ei pahn lelewei rehmwail, I sohte pahn diar kumwail nin duwen me I inengieng oh I sohte pahn wia nin duwen me kumwail inengieng, ahpw pahn mie pei, peirin, lingeringer, akamai, lokaia kamedek, lipahned,* aklapalap, oh liseliping. 21 Mwein ni ei pahn pwurowei, ei Koht kakete ketin kanamenekihiehla mwohmwail, oh I kakete nsensuwedkihla me tohto me dipadahr mahso ahpw sohte koluhkihla arail samin oh tiahk samin me pid wia nsenen pwopwoud* oh ar kin wia me suwed ni ngidingid.*

13 Met kesilipak en ei pahn kohwei rehmwail. “Soahng koaros anahne sansalda sang ni kadehde* en sounkadehde riemen de silimen.”+ 2 Mendahki ei sohte mihmi rehmwail ahnsou wet, met mwomwen keriapak en ahnsou me I mi rehmwail, oh I pahn panawih mahs irail kan me dipadahr mahso oh meteikan koaros, pwe ma I pahn pwurowei, sohte emen pahn pitsang peneu, 3 pwehki kumwail kin rapahki mehn kadehde me Krais, me sohte ketin luwet rehmwail ahpw ketin kehlail rehmwail, kin uhdahn mahsen sang rehi. 4 Pwe ni mehlel, e ketin kamakamalahr nin tuhkeo pwehki luwet, ahpw e ketin ieiaski manaman en Koht.+ Mehlel, se pil iang ih luwet, ahpw se pahn iang ih+ ieiaski manaman en Koht ong kumwail.+

5 Kumwail pousehlahte kasawih ma kumwail kin mi nan pwoson; de pousehlahte kadehdehda soangen aramas dah kumwail.+ De kumwail sohte kin ese me Sises Krais kin ketin miniminiong kumwail? Ihte ma Koht sohte ketin kupwurkin kumwail. 6 I uhdahn koapworopworki me kumwail pahn ese me Koht ketin kupwurkin kiht.

7 Eri se kapakapohng Koht pwe kumwail en dehr wiahda mehkot sapwung, kaidehn pwe en kasalehda me meteikan kin pwungkin kiht, ahpw pwe kumwail en wia me mwahu, mehnda ma meteikan sapwungkin kiht. 8 Pwe se sohte kak wia mehkot me kin pelianda me mehlelo, ahpw ihte utungada me mehlelo. 9 Se uhdahn peren ahnsou koaros ni at kin luwet ahpw kumwail kin kehlail. Oh iet me se kin kapakapki, kumwail en kin kapwungala amwail madamadau. 10 Ihme I ntingihkihdi mepwukat ni ei sohte mihmi rehmwail, pwe ni ei pahn mihmi rehmwail, I dehr nohn ukla ni ei doadoahngki manaman me Kauno ketikihong ie,+ pwe I en kakehlaikumwailda a kaidehn kauweikumwailla.

11 Eri, riei ko, kumwail pousehlahte pereperen oh kapwungala amwail madamadau, ale kangoang sang meteikan,+ ahneki madamadauteieu,+ momour ni popohl;+ oh Koht en limpoak oh popohl+ pahn kin ketin ieiang kumwail. 12 Kumwail rahnmwahupene oh metik* emenemen. 13 Aramas sarawi kan koaros kadarewei arail rahnmwahu.

14 Kadek sapan en Kaun Sises Krais oh limpoak en Koht oh kapai kan en ngehn sarawi* en kin ieiang kumwail koaros.