KAUDIAHL EHU ONG SOHN

1 Kaudiahl ehu* sang rehn Sises Krais, me Koht ketikihong ih,+ pwe en ketin kasalehiong sapwellime ladu kan+ soahng kan me uhdahn pahn wiawi ni ahnsou keren. Oh e ketin kadarodo sapwellime tohnleng oh doadoahngki ih en kasalehda met ni kilel kan ong sapwellime ladu Sohn,+ 2 me kadehdehda mahsen me Koht ketikihda oh rohng me Sises Krais ketikihda, ei, soahng koaros me e kilangehr. 3 Meid peren aramas me kin wadek ni ngihl laud mahsen kan en kokohp wet oh irail kan me kin rong oh kapwaiada soahng kan me ntingdi loale,+ pwe ahnsou me kileldier kerendohr.

4 Sang Sohn ong mwomwohdiso isuh+ me mi nan wehin Eisia:

Kadek sapan oh popohl en kohieng kumwail sang rehn “Koht me ketin mie, me ketin mieier oh me pahn ketido,”+ oh sang ngehn sarawi* isuh+ me kin mi mwohn mwoale, 5 oh sang rehn Sises Krais, “Sounkadehde Lelepek,”+ “mesenih me tepin iasada sang rehn me melahr akan,”+ oh “Kaunen nanmwarkien sampah kan.”+

Ong ih me ketin poakohng kitail+ oh kasaledengkitailla sang dipatail kan pwehki sapwellime nta+— 6 oh e ketin wiahkinkitailla wehi ehu,+ samworo kei+ ong Seme Koht—ei, lingan oh kehl en kohwong ih kohkohlahte. Amen.

7 Kilang! E pahn ketido iang depwek kan,+ oh aramas koaros pahn kilang ih oh pil irail kan me doakoahdi ih; oh pwehki ih, keinek koaros en sampah pahn pikipikir mwaremwarerail kan nan ar nsensuwed.+ Ei, Amen.

8 Siohwa* Koht ketin mahsanih: “Ngehi me Alpa oh Omeka,*+ me ketin mie, me ketin mieier oh me pahn ketido, me Keieu Manaman.”+

9 Ngehi Sohn, riamwail, oh pwehki ei miniminiong Sises,+ I kin iang kumwail nan lokolok,+ dadaur+ pahn kahpwal oh pahn iang kumwail kakaun nan wehio.+ I miher nan deke me adaneki Padmos pwehki ei kin koasoia duwen Koht oh ei kin kadehdehda duwen Sises. 10 Ngehn sarawi* waielahng ni rahnen Kauno. Ngehi eri rongada ngihl laud ehu me peido sang pohnseweiet me duwehte ngilen sowi, 11 me mahsanih: “Ntingihedi nan pwuhk ehu* dahme ke kilang oh kadarowohng mwomwohdiso isuh me mi nan Episos,+ Smirna,+ Perkamum,+ Daiadaira,+ Sardis,+ Piladelpia+ oh Laodisia.”+

12 I ahpw pirekekla pwe I en kilang ihs me mahmahseniong ieo, oh ni ei pirekek, I ahpw kilangada dewen lamp kohl isuh,+ 13 oh nanwerengen dewen lamp ko, I kilangada mehmen me rasehng nein-aramas,+ me likawih likou ehu me leldihla ni aluweluwe kan oh pirapirki kateng kohl ehu ni mwaremware. 14 Oh pil, pitenmoange ko pwetepwet, rasehng wunen sihpw pwetepwet, rasehng sinoh, oh silangi* rasehng mpwulen kisiniei,+ 15 oh aluweluwe ko rasehng prons melengileng+ ni eh kin ngkengken nan wasahn kisiniei, oh kapitie rasehng ngilen tenihr laud ehu.* 16 Oh e ketiki nin lime palimaun usu isuh,+ oh kedlahs reirei keng me au riau uhsang nin doauese,+ oh silangi kamahl rasehng mahlen ketipin en souwas.+ 17 Ni ei kilangada ih, I ahpw pwupwudi ni aluweluwe ko likamwete I mehla.

E ahpw ketikihdi lime palimaun pohi oh mahsanih: “Ke dehr masak. Ngehi me Keieu+ oh me Keieu Mwuri,+ 18 oh ngehi me ieiaso,+ oh I mehla,+ ahpw kilang! I momour oh I pahn momour kohkohlahte,+ oh I kolokol kih en mehla oh kih en Sousou.*+ 19 Eri ntingihedi soahng kan me ke kilangehr, oh soahng kan me wiewiawi, oh soahng kan me pahn wiawi mwurin mepwukat. 20 Me pid rir sarawi en usu isuh me ke kilangehr nan pehi palimaun oh dewen lamp kohl isuh ko: Usu isuh ko kin wehwehki tohnleng kan en mwomwohdiso isuh, oh dewen lamp ko kin wehwehki mwomwohdiso isuh.+

2 “Ntingkiwohng tohnleng+ en mwomwohdiso me mi nan Episos:+ Iet mahsen sang ih me ketin kolokol nin lime palimaun usu isuh ko oh ketseli nanpwungen dewen lamp kohl isuh ko:+ 2 ‘I ese omw wiewia kan, omw doadoahk oh omw kin dadaur, oh ke sohte kin pwungki aramas suwed kan, oh omw kin kasawih irail kan me kin nda irail wahnpoaron kei,+ ahpw soh, oh ke diarada me re likamw. 3 Ke pil kin dadaur pahn kahpwal oh kin nannanti pwehki mwarei+ oh sohte kin pwangada.+ 4 Ahpw iet me I suwedki rehmw, ke keselahr limpoak me ke ahneki mahso.

5 “‘Eri tamataman wasa me ke pwupwudi sang ie, oh koluhla+ oh wia dahme ke kin wia mahso. Ma ke sohte koluhla,+ I pahn kohwei rehmw oh I pahn kihsang noumw dewen lampen+ nan dewe. 6 Ahpw iet mehkot me mwahu rehmw: ke kin kailongki wiewiahn pwihn en Nikolaida,+ me I pil kin kailongki. 7 Mehmen me mie salenge, a en rong dahme ngehn sarawi* mahsanihong mwomwohdiso kan:+ Ong mehmen me kin kalowehdi,+ I pahn mweidohng ih en tungoale tuhkehn mour,+ me mi nan paradais en Koht.’

8 “Ntingkiwohng tohnleng en mwomwohdiso me mi nan Smirna: Iet mahsen sang ih, ‘me Keieu oh me Keieu Mwuri,’+ me pwoulahr oh pwurehng mourda:+ 9 ‘I ese omw kahpwal oh omw semwehmwe—ahpw ke me kepwehpwe+—oh I pil ese lahlahwehn irail kan me dene irail mehn Suhs, ahpw irail kaidehn uhdahn mehn Suhs, pwe irail iei sinakoke en Sehdan.+ 10 Ke dehr masak soahng kan me ke pahn lokolongki.+ Kilang! Tepil pahn pousehlahte kesehiong ekei kumwail nan imweteng pwe en uhdahn song kumwail, oh kumwail pahn mi nan kahpwal erein rahn eisek. Eri, kadehdehda omw lelepek lao lel mehla, oh I pahn kihong uhk nihn en mour.+ 11 Mehmen me mie salenge, a en rong+ dahme ngehn sarawi* mahsanihong mwomwohdiso kan: Mehmen me kin kalowehdi,+ sohte mwahn pahn ohkihla mehla keriau.’+

12 “Ntingkiwohng tohnleng en mwomwohdiso me mi nan Perkamum: Iet mahsen sang ih me sapwellimanki kedlahs reirei keng me au riau:+ 13 ‘I ese wasa me ke kin mi ie, me iei, wasa me mwoalen Sehdan kin mi ie; ahpw ke kin kolokol teng mwarei,+ oh ke sohte kahmahmkihla omw pwoson ie,+ pil ni rahn ako me nei sounkadehde lelepek+ Antipas kamakamala+ rehmwail, wasa me Sehdan kin mi ie.

14 “‘Ahpw, mie soahng kei me I suwedki rehmw, pwe mie ekei rehmw me kin idawehn padahk en Palaam,+ me padahkihong Palak+ en kihdi mehn kadipekelekel ehu mwohn mehn Israel kan, pwe ren tungoale soahng kan me meirongalahr ong dikedik kan oh wia tiahk samin me pid wia nsenen pwopwoud.*+ 15 Ni ahlohte, pil mie ekei rehmw me kin idawehn padahk en pwihn en Nikolaida.+ 16 Eri koluhla. Ma ke sohte wia met, I pahn mwadang kohwei rehmw, oh I pahn mahwenkihong irail kedlahs reirei me uhsang nan eweiet.+

17 “‘Mehmen me mie salenge, a en rong dahme ngehn sarawi* mahsanihong mwomwohdiso kan:+ Ong mehmen me kin kalowehdi,+ I pahn kihong ekis kisin manna riro,+ oh I pahn kihong ih kisin takai pwetepwet ehu me ahd kapw ehu ntingdi powe, oh sohte me ese ahdo pwe ihete me alehdio.’

18 “Ntingkiwohng tohnleng en mwomwohdiso me mi nan Daiadaira:+ Iet mahsen sang rehn Sapwellimen Kohto, me silangi* rasehng mpwulen kisiniei,+ oh aluweluwe ko rasehng prons melengileng:+ 19 ‘I ese omw wiewia kan, oh omw limpoak oh pwoson oh omw kin papah Koht oh dadaur, oh omw wiewiahn rahn pwukat laudsang dahme ke kin wia mahso.

20 “‘Ahpw iet me I suwedki rehmw, ke kin pwungki liho Sesepel,+ me kin wiahki pein ih soukohp men, oh kin padahki oh pitiheki nei ladu kan ren wia tiahk samin me pid wia nsenen pwopwoud*+ oh tungoale soahng kan me meirongalahr ong dikedik kan. 21 Oh I kihong ih ahnsou en koluhla, ahpw e sohte men koluhkihla eh tiahk samin me pid wia nsenen pwopwoud.* 22 Kilang! I pahn kesehdiong ih nan kie,* oh I pahn kesehdiong irail kan me kin wia dipen kamwahl reh nan kahpwal laud, ma re sohte koluhkihla wiewia kan me liho pitiheki irail en wia. 23 Oh I pahn kemehkihla nah seri kan soumwahu keper, pwe mwomwohdiso koaros pahn ese me iei ngehi me kin kasawih madamadau keieu loal kan* oh mohngiong kan, oh I pahn dupukohng emenemen kumwail nin duwen amwail wiewia kan.+

24 “‘Ahpw, I pahn ndaiong kumwail teikan me mihmi nan Daiadaira, koaros me sohte kin idawehn padahk wet, irail kan me sohte ese dahme re kin kahdaneki “soahng rir kan en Sehdan”:+ I sohte pahn katoutouwihkin kumwail mehkot tohrohr. 25 Pil duwehte, kumwail kolokol teng dahme kumwail ahneki lao I kohwei.+ 26 Oh ong mehmen me kin kalowehdi oh idawehn ei wiewia kan lel ni imwi, I pahn kihong ih manaman pohn wehi kan,+ 27 duwehte me I alehdi sang rehn Semei, oh e pahn kaunkihda aramas akan sokon mete+ pwe ren mwerpeseng rasehng sah pwehl kan. 28 Oh I pahn kihong ih usuhn rahn.+ 29 Mehmen me mie salenge, a en rong dahme ngehn sarawi* mahsanihong mwomwohdiso kan.’

3 “Ntingkiwohng tohnleng en mwomwohdiso me mi nan Sardis: Iet mahsen sang ih me ketiki sapwellimen Koht ngehn sarawi* isuh+ oh usu isuh ko:+ ‘I ese omw wiewia kan, me ke adikihte momour, ahpw ni mehlel ke melahr.+ 2 Ke en mwasamwasahn+ oh kakehlakahda mehkan me luhluhwe me pahn melahr, pwe I sohte diar me omw doadoahk kan wiawidahr ni unsek mwohn silangin ei Koht. 3 Kahrehda, medemedewehte* dahme ke aleier oh dahme ke rongehr, oh kolokolete met, oh koluhla.+ Ni mehlel, ma ke sohte pirida, I pahn kohwei duwehte lipirap emen,+ oh ke soh mwahn pahn ese ahnsou dah me I pahn pwarowei.+

4 “‘Ahpw mie aramas malaulau kei* rehmw nan Sardis, me sohte kasaminehla ar likou kan,+ oh re pahn iang ie weweid nan likou pwetepwet,+ pwehki ar warohng. 5 Mehmen me kin kalowehdi+ pahn likawih likou pwetepwet,+ oh I sohte mwahn pahn irisasang edeo nan pwuhken mour,+ ahpw I pahn pohnese edeo mwohn silangin Semei oh mwohn sapwellime tohnleng kan.+ 6 Mehmen me mie salenge, a en rong dahme ngehn sarawi* mahsanihong mwomwohdiso kan.’

7 “Ntingkiwohng tohnleng en mwomwohdiso me mi nan Piladelpia: Iet mahsen sang ih me sarawi,+ me mehlel,+ me ketin kolokol nein Depit kih,+ me kin ketin ritingada pwe sohte emen pahn ritingedi oh me kin ketin ritingedi pwe sohte emen pahn ritingada: 8 ‘I ese omw wiewia kan—kilang! I ritingadahr mwohmw wenihmw ehu,+ me sohte emen kak ritingedi. Oh I ese me omw kehl me tikitik, ahpw ke kin peikiong ei mahsen oh kin lelepek ong mwarei. 9 Kilang! I pahn wiahiong irail kan me kohsang sinakoke en Sehdan, me kin nda me irail mehn Suhs, ahpw soh,+ pwe re kin likamw—kilang! I pahn wiahiong irail en kohwei oh dairukedi* mwohn nehmw kan oh kahrehiong irail en ese me I kin poakohng uhk. 10 Pwehki omw kin idawehn dahme ke rong duwen ei dadaur,*+ I pahn pil silehsang uhk awahn songosong+ me pahn lelohng sampah pwon, pwe en song irail kan me kin kousoan pohn sampah. 11 I pahn mwadang kohwei.+ Kolokolete teng dahme ke ahneki pwe emen dehr kihsang omw nihn.+

12 “‘Mehmen me kin kalowehdi—I pahn wiahkihla ih uhren tehnpas sarawi en ei Koht, oh e solahr pahn pedoisang wasao, oh I pahn ntingihediong powe mwaren ei Koht+ oh eden kahnimw en ei Koht, Serusalem Kapw+ me kohdihdo sang nanleng sang rehn ei Koht, oh pil pein mwarei me kapw.+ 13 Mehmen me mie salenge, a en rong dahme ngehn sarawi* mahsanihong mwomwohdiso kan.’

14 “Ntingkiwohng tohnleng en mwomwohdiso me mi nan Laodisia:+ Iet mahsen sang ih me mwarenki Amen,+ sounkadehde+ lelepek oh mehlel,+ tepin sapwellimen Koht kepikipik:+ 15 ‘I ese omw wiewia kan, me ke sohte lemwulemwur oh pil sohte karakar. I men ken lemwulemwur de karakar. 16 Eri pwehki omw ekiste karakar oh sohte karakar+ de pil lemwulemwur,+ I pahn mwuskinuhkeweisang nan eweiet. 17 Pwehki omw kin nda, “I kepwehpwe+ oh aledahr kepwe tohto oh sohte anahne mehkot,” ahpw ke sehse me ke paisuwed, kompoake, semwehmwe, maskun oh kilisou, 18 I kaweidkin uhk ken pwainsang rehi kohl me mwakelekelkidahr kisiniei pwe ken kepwehpwehla, oh likou pwetepwet pwe ken likouda oh kanamenekpen omw kilisou en dehr sansalda,+ oh wini en mas en iriski mesomw kan+ pwe ken kilang wasa.+

19 “‘I kin lipwoare oh panawih irail koaros me I kin poakohng.+ Eri, ngoangda oh koluhla.+ 20 Kilang! I kesikesihnen ni wenihmwo oh wie letelet. Ma emen rong ngilei oh ritingada wenihmwo, I pahn pedolong nan imwe oh se pahn mwengehn soutik. 21 Ong mehmen me kin kalowehdi,+ I pahn mweidohng ih en iang ie mwohd nan mwoalei,+ duwehte ei kin kalowehdi oh iang Semei mwohndi+ nan mwoale. 22 Mehmen me mie salenge, a en rong dahme ngehn sarawi* mahsanihong mwomwohdiso kan.’”

4 Mwurin met, kilang! I kilangada wenihmw ehu me ritida nanleng, oh tepin ngihl me I rongada me koasoakoasoiong ie duwehte ngilen sowi, ndinda: “Kohdahdo wasaht, oh I pahn kasalehiong uhk soahng kan me uhdahn pahn wiawi.” 2 Mwurinte met, ngehn sarawi* ahpw tepida doadoahk rehi, oh kilang! mwoahl ehu mi nanleng oh mehmen ketiket pohn mwoahlo.+ 3 Oh Ih me ketiket powe lingaling duwehte takai sasper+ oh takai sardius,* oh ahia ehu me duwehte emerald kapilpene mwoahlo.+

4 Mwoahl 24 kapilpene mwoahlo, oh I kilangada lapalap* 24+ me mwomwohd nan mwoahl pwukat me likawih likou pwetepwet, oh nihn kohl mi pohn moangarail ko. 5 Lioal+ oh ngihl kei oh nansapwe+ kin peisang ni mwoahlo; oh mie dewen lamp isuh me okohk mwohn mwoahlo, oh mepwukat kin wehwehki sapwellimen Koht ngehn sarawi* isuh.+ 6 Mwohn mwoahlo mie mehkot me duwehte sehd kilahs,+ duwehte krisdal.

Nanwerenge, wasa me mwoahlo mi ie, oh pali koaros en mwoahlo mie menmour pahmen+ me diren pwoaren mas ni paliwararail kan, mwohrail oh pohnsekirail. 7 Keieun menmouro duwehte laion men,+ oh keriaun menmouro duwehte kouwol pwulopwul men,+ oh kesiluhwen menmouro,+ mese duwehte mesen aramas, oh kapahieun menmouro+ duwehte ikel men me wie pipihr.+ 8 Me pid menmour pahmeno, emenemen irail mie arail pehnpihr weneu, oh wasa koaros ni arail pehnpihr ko diren pwoaren mas.+ Oh re sohte kin tokedihsang ar kin ndinda nin rahn oh nipwong: “Sarawi, sarawi, sarawi iei Siohwa*+ Koht, me Keieu Manaman, me ketin mieier, me ketin mie oh me pahn ketido.”+

9 Ni ahnsou koaros me menmour ko kin kalinganahda, kawauwih oh kapingkalahngan ong Ih me ketiket nan mwoahlo, Ih me ketin ieias kohkohlahte,+ 10 lapalap* 24 ko+ ahpw kin poaridiong mwohn Ih me ketiket nan mwoahlo oh kaudokiong Ih me ketin ieias kohkohlahte, oh re patohwan keselahng arail nihn kan mwohn mwoahlo, patohwan: 11 “Maing Siohwa* at Koht, komwi me ketin warohng sapwellimanki lingan,+ wahu+ oh manaman,+ pwehki omwi ketin kapikada mehkoaros,+ oh pwehki kupwuromwien mehkoaros miehla oh kapikipikda.”

5 Oh I kilangada ni palimaun en nin limen Ih me ketiket nan mwoahlo+ doaropwe limilimpene ehu me nting ni pali koaros,* oh mehn kateng isuh me katengepene. 2 Oh I kilangada tohnleng kehlail men me lohkihda ni ngihl laud: “Ihs me warohng kauwehla mehn kateng kan oh pahkpeseng doaropweo?” 3 Ahpw sohte emen nanleng de pohn sampah de pahn sampah me kak pahkpeseng doaropweo de kilang loale. 4 I ahpw tepida sengiseng kowahlap pwehki sohte emen me dierekda me warohng pahkpeseng doaropweo de kilang loale. 5 Ahpw emen lapalap* ako ndaiong ie: “Eriher sengiseng. Kilang! Laiono me sang keinek en Suda,+ peneinei*+ en Depit+ kalowedier+ pwe en lapwahda mehn kateng isuh ko oh pahkpeseng doaropweo.”

6 I ahpw kilangada sihmpwul men+ me kesikesihnen nanwerengen mwoahlo, nanpwungen menmour pahmeno oh nanpwungen lapalap* ako.+ E mwomwen kamakamalahr,+ oh mie kode isuh oh pwoaren mese isuh, oh pwoaren mas ko wehwehki sapwellimen Koht ngehn sarawi* isuh+ me pekederpeseng nan sampah pwon. 7 Ni ahnsowohte, e patohla oh patohwansang doaropweo ni palimaun en nin limen Ih me ketiket nan mwoahlo.+ 8 Ni ahnsou me e patohwanda doaropweo, menmour pahmeno oh lapalap* 24 ko+ ahpw poaridi mwohn Sihmpwulo, oh mie arp oh pwohl kohl me diren warpwohmwahu rehn emenemen irail. (Warpwohmwahu wehwehki kapakap en aramas sarawi kan.)+ 9 Oh re koulki koul kapw pwoat,+ ndinda: “Komwi me warohng ketikihda doaropwehn oh lapwahda mehn kateng kan, pwe komwi me ketin kamakamalahr oh ntahmwi me komw ketin pwainkidahr aramas akan ong Koht+ sang keinek koaros, lokaia* koaros, aramas koaros oh wehi koaros,+ 10 oh komw ketin wiahkinirailla wehi ehu+ oh samworo kei ong atail Koht,+ oh re pahn kaunda sampah nin duwen nanmwarki kei.”+

11 Oh I kilangada oh rongada ngilen tohnleng tohtohie me kapilpene mwoahlo, menmour ko oh lapalap* ako, oh uwen tohtohn irail meh nen kei pak nen kei oh kid kei pak kid kei,+ 12 oh re kin ndinda ni ngihl laud: “Sihmpwul me kamakamalahro+ warohng ale manaman oh kapai oh erpit oh kehl oh wahu oh lingan oh kaping.”+

13 Oh I rong kepikipik koaros nanleng oh sampah oh pahn sampah+ oh nansed oh audeparail koaros ar ndinda: “Kaping oh wahu+ oh lingan oh kehl en kohwong Ih me ketiket nan mwoahlo+ oh Sihmpwulo+ kohkohlahte.”+ 14 Menmour pahmeno ahpw ndinda: “Amen!” oh lapalap* ako ahpw poaridi oh kaudok.

6 Oh I kilangada Sihmpwulo+ eh ketin lapwahda keieun mehn kateng isuh ko,+ oh I rongada emen menmour pahmeno+ eh nda ni ngihl ehu me rasehng nansapwe: “Kohdo!” 2 Oh kilang! I kilangada oahs pwetepwet men+ oh me mwomwohd powe kolokol kesik ketieu pwoat; oh nihn ehu ahpw kohieng,+ oh e kohieilahng kalowehdi eh imwintihti kan.+

3 Ni eh ketin lapwahda keriaun mehn katengo, I rongada menmour keriemeno+ eh nda: “Kohdo!” 4 Pil emen kohieido, oahs weitahta men, oh mweimwei kohieng me mwomwohd powe en kihsang popohl nin sampah pwe aramas akan en kemehla emenemen. Kedlahs lapala pwoat ahpw kohieng ih.+

5 Ni eh ketin lapwahda kesiluhwen mehn katengo,+ I rongada menmour kesilimeno+ eh nda: “Kohdo!” Oh kilang! I kilangada oahs toantoal men, oh me mwomwohd powe kolokol nan peh mehn tenek ehu. 6 I rongada mehkot me duwehte ngihl ehu me peido sang nanpwungen menmour pahmeno me nda: “Quart* en wihd ehu ong denari* ehu+ oh quart en parli siluh ong denari ehu; oh dehr wiakauwe lehn olip oh wain.”+

7 Ni eh ketin lapwahda kapahieun mehn katengo, I rongada ngilen menmour kapahmeno+ eh nda: “Kohdo!” 8 Oh kilang! I kilangada oahs pehsehs men, oh me mwomwohd powe adaneki Mehla. Oh Sousou* kin ideidawehnte ih. Oh manaman kohieng ira en kaunda pahkis ehun sampah pwe ira en kemehkihla aramas akan kedlahs reirei pwoat, lehk lapalap,+ soumwahu keper oh mahn lawalo kan en sampah.+

9 Ni eh ketin lapwahda kelimaun mehn katengo, I kilangada pahn pei sarawio+ ntahn*+ irail kan me kamakamalahr pwehki ar kin kapwaiada mahsen en Koht oh pwehki doadoahk en kalohk me re kin wia.+ 10 Re wer ni ngihl laud, ndinda: “Maing Kaun Wasa Lapalahpie, me sarawi oh mehlel.+ Ia uwen reirei en ahnsou mwohn omwi pahn ketin kadeikada oh dupukohng irail me kin kousoan nin sampah me kemeikitala?”+ 11 Oh likou pwetepwet reirei ehu ahpw kohieng emenemen irail,+ oh mahsen pil kohieng irail en kommoaldi ekis ahnsou, lao wadawad en iangarail ladu kan oh pil riarail kan me pahn kamakamala duwehte irail+ pahn unsekla.

12 Oh I kilang eh ketin lapwahda keweneun mehn katengo, oh lapalahn rerrer en sahpw ehu wiawi; ketipin toantoalla duwehte likoun nsensuwed* me wiawihkihda wunen mahn,* oh maram pwon weitahtahla duwehte nta,+ 13 oh usuhn pahnlahng kan pwupwudiong sampah duwehte ni ahnsou me kisinieng kehlail kin itikada tuhke pik oh kamwerehdi wahn pik pwul kan. 14 Oh lahng sohrala duwehte doaropwe ehu me limilimpenehr,+ oh nahna koaros oh deke koaros mwekidsang nan dewerail kan.+ 15 Nanmwarkien sampah kan, lapalap akan, kaunen karis en sounpei kan,* aramas kepwehpwe, aramas kehlail, ladu koaros, oh aramas saledek koaros ahpw rukula nan pwoahr kan oh nanpwungen paip en nahna kan.+ 16 Oh re kin ndaiong nahna kan oh paip akan: “Pwupwudiong poht+ oh karukihkitala sang silangin Ih me ketiket nan mwoahlo+ oh sang ni engieng en Sihmpwulo,+ 17 pwehki rahn lapalap en sapwellimara engieng lelehr,+ oh ihs me kakohng?”+

7 Mwurin met, I kilangada tohnleng pahmen me kesikesihnen ni keimw pahieu en sampah oh kolokol teng ahng pahieu en sampah, pwe sohte kisinieng ehu en kak ipidohng pohn sampah de pohn sehd de pil pohn tuhke kan. 2 Oh I kilangada pil emen tohnleng me pwarada sang ni palimese,* kolokol mehn kilel sang rehn Koht ieias; oh e likwerih ni ngihl laud tohnleng pahmeno me ale mweimwei en kauwehla sampah oh sehd, 3 nda: “Dehr kauwehla sampah de sehd de pil tuhke kan, lao se kilelehdi+ temwen+ sapwellimen atail Koht ladu kan.”

4 Oh I rong wadawad en irail kan me kileldier, meh 144,000,+ me kileldi sang ni keinek koaros en mehn Israel kan:+

9 Mwurin met, kilang! I kilangada pokon kalaimwun ehu me aramas sohte kak wadekedi uwen tohto. Re kohsang wehi koaros, keinek koaros, aramas koaros oh lokaia* koaros,+ oh re uh mwohn mwoahlo oh mwohn Sihmpwulo, likawih likou pwetepwet reirei;+ oh mie tehntuhke pahm kei* nan pehrail.+ 10 Oh re pousehlahte weriwer ni ngihl laud, ndinda: “Komourpat kohsang rehn at Koht, me ketiket nan mwoahlo,+ oh sang rehn Sihmpwulo.”+

11 Tohnleng kan koaros uh kapilpene mwoahlo oh lapalap* ako+ oh menmour pahmeno, oh re poaridiong mwohn mwoahlo oh kaudokiong Koht, 12 ndinda: “Amen! Kaping oh lingan oh erpit oh kapingkalahngan oh wahu oh manaman oh kehl en mihmi rehn atail Koht, kohkohlahte.+ Amen.”

13 Emen lapalap* ako ahpw idek rehi: “Ihs irail pwukat me likawih likou pwetepwet reirei+ oh re kohsang ia?” 14 Eri ni ahnsowohte I ndaiong ih: “Maing ei kaun, komwi me mwahngih.” A e ndaiong ie: “Ih irail pwukat me kohieisang nan kahn kamakam kowahlapo,+ oh re kamwakelehkihda ar likou reirei kan oh wiahiong en pwetepwetkihla ntahn Sihmpwulo.+ 15 Ihme kahrehda re mi mwohn mwoalen Koht, oh re kin papah ih nin rahn oh nipwong nan sapwellime tehnpas sarawio; oh Ih me ketiket nan mwoahlo+ pahn ketin perekipeseng sapwellime impwalo pohrail.+ 16 Re solahr pahn kin men mwengehda de pil men nimpilda, ketipin de pil ehu soangen karakar solahr pahn kamwasikei irail,+ 17 pwehki Sihmpwulo,+ me mi nanwerengen mwoahlo, pahn ketin wia sileparail+ oh kahreiraillahng ni utuhnpihl en mour.+ Oh Koht pahn ketin limwihasang pilen masarail kan koaros.”+

8 Ni eh+ ketin lapwahda keisuhwen mehn katengo,+ sohla mweseisei nanleng mpen elep en awa. 2 Oh I kilangada tohnleng isimen+ me uh mwohn silangin Koht, oh sowi isuh kohieng irail.

3 Pil emen tohnleng me kolokol deupen* warpwohmwahu kohl ehu ahpw leledo oh kesihnenda ni pei sarawio,+ oh warpwohmwahu tohto+ ahpw kohieng ih pwe en meirongki pohn pei sarawi kohl+ me mi mwohn mwoahlo ni ahnsou me aramas sarawi kan koaros kin kapakap. 4 Ediniei en warpwohmwahwo sang ni pehn tohnlengo oh en aramas sarawi kan kapakap+ ahpw edidalahng mwohn silangin Koht. 5 Ahpw ni ahnsowohte, tohnlengo audehkihda deupen warpwohmwahwo ekis kisiniei sang ni pei sarawio oh kesepwekehdilahng nin sampah. Oh lioal piripir oh nansapwe oh ngihl kei+ oh rerrer en sahpw ahpw wiawi. 6 Oh tohnleng isimeno me kolokol sowi isuh ko+ ahpw kaunopada ren peuk sowi kan.

7 Keieun tohnlengo ahpw peuk nah sowio. Oh aihs takai oh kisiniei me doal nta ahpw mwerediong pohn sampah;+ oh silikis ehun sampah ahpw mwasikala, oh silikis ehun tuhke kan mwasikala, oh dihpw oh reh kan koaros pil mwasikala.+

8 Keriemen en tohnlengo ahpw peuk nah sowio. Oh mehkot me duwehte lapalahn nahna lullul ehu ahpw lekdekdilahng nansed.+ Oh silikis ehun sehdo wiahla nta;+ 9 oh silikis ehun mour kan en nansed mehla,+ oh silikis ehun sohp kan ohla.

10 Kesilimen en tohnlengo ahpw peuk nah sowio. Oh lapalahn usu ehu me lullul duwehte lamp ehu pwupwudihsang nanleng, oh e pwupwudiong pohn silikis ehun pillap akan oh utuhnpihl akan.+ 11 Eden usuwo, Tuhke Sadik. Oh silikis ehun pihl kan katikala, oh aramas tohto mehkihla pihl kan, pwehki pihl pwukat katikalahr.+

12 Kapahmen en tohnlengo ahpw peuk nah sowio. Oh silikis ehun ketipin oh silikis ehun maram oh silikis ehun usu kan ahpw ohla,+ pwe silikis ehun irail koaros rotala,+ oh silikis ehun rahn sohla marain, oh pil duwehte nipwong.

13 Oh I kilangada oh rongada ikel men me pipihr nan wehwe oh ndinda ni ngihl laud: “Meid apwal, meid apwal, meid apwal+ ong irail kan me kin kousoan nin sampah pwehki tohnleng silimen teiko ar pil pahn peuk neirail sowi kan!”+

9 Kelimmen en tohnlengo ahpw peuk nah sowio.+ Oh I kilangada usu ehu me pwupwudiong nin sampah sang nanleng, oh kihen ewen pwoahr loalo me soh kapi+ ahpw kohieng ih. 2 E ritingada ewen pwoahr loalo me soh kapi, oh ediniei kohdahsang nan pwoahro duwehte ediniei sang ni lapalahn wasahn kisiniei mwehl ehu, oh ketipin oh pil nan wehwe rotorotkihla+ ediniei sang nan pwoahro. 3 Oh loukust kan kohieisang nan edinieio kolahng nin sampah,+ oh manaman kohieng irail, manaman me duwehte ahn skorpion en sampah. 4 Mahsen ahpw kohieng irail ren dehpa kauwehla rehn nansapw akan, de kisin tuhke kan de pil tuhke teikan, ahpw ihte me re kak kauwehla, aramas akan me sohte kilelkihdi kilelen Koht ni temwarail kan.+

5 Oh e sohte mweimweiong loukust kan en kemeirailla, ahpw ren kaloke irail sounpwong limau, oh arail lokolok kin duwehte lokolok me emen ahneki ni eh keikeidi pahn skorpion.*+ 6 Ni rahn ako aramas akan pahn rapahki mehla, ahpw re sohte mwahn pahn diar, oh re pahn men mehla, ahpw mehla pahn tangasang irail.

7 Oh mwomwen loukust ko duwehte oahs kan me onopadahng mahwen;+ mehkot duwehte nihn kohl mi pohn moangarail kan, oh masarail kan duwehte mesen aramas, 8 ahpw mie pitenmoangarail me duwehte pitenmoangen lih. Oh ngihrail kan duwehte ngihn laion,+ 9 oh mie perehpen mwaremwarerail kan me mete. Oh ngilen arail pehnpihr kan duwehte ngirisek en kuruma me oahs kin tangatangahki uk kolahng mahwen.+ 10 Oh pil ni ikirail kan mie mehn dok me duwehte ahn skorpion, oh arail manaman kin mi ni ikirail pwe ren kin kalokehki aramas akan sounpwong limau.+ 11 Mie nanmwarki men me kakaun irail, iei tohnleng en pwoahr loalo me soh kapi.+ Ni lokaiahn Ipru ede iei Apadon,* ahpw ni lokaiahn Krihs ede Apolion.*

12 Kahpwal lapalap ehu nekier. A kilang! Pil kahpwal lapalap riau+ pahn kohdo mwurin mepwukat.

13 Kewenemen en tohnlengo+ ahpw peuk nah sowio.+ Oh I rongada ngihl ehu sang ni kod kan en pei sarawi kohlo+ me mi mwohn silangin Koht, 14 me ndaiong kewenemen en tohnlengo me kolokol sowio: “Lapwahda tohnleng pahmen me sensel ni pillap laud Iupreitis.”+ 15 Oh tohnleng pahmeno me onopadahngehr awao, rahno, sounpwongo oh sounparo ahpw lapwada pwe ren kemehla silikis ehun aramas akan.

16 Uwen tohtohn karis en sounpei me dak oahs iei rienen pak nen;* I rongada uwen tohtohn irail. 17 Oh iet duwen ei kilang nan kaudiahlo oahs ko oh irail ko me dake: Mie perehpen mwaremwarerail kan me weitahta duwehte kisiniei oh poh mei oh oangoahng duwehte suwepel. Moangen oahs ko duwehte moangen laion,+ oh kisiniei oh ediniei oh suwepel kin kohieisang nan awarail kan. 18 Silikis ehun aramas akan kamakamkihla kalokolok siluh pwukat, kisiniei, ediniei oh suwepel me kohieisang nan awarail ko. 19 Pwe manaman en oahs ko kin mi ni awarail kan oh ikirail kan, pwe ikirail kan duwehte serpent kan oh mie moangarail, oh re kin kauwehkihla aramas akan mepwukat.

20 Ahpw aramas ako me luwehdi, me sohte kamakamkihla kalokolok pwukat, sohte koluhkihla arail wiewia kan;* re sohte uhdihsang arail kaudokiong ngehn suwed kan oh dikedik kan me wiawihkihda kohl, silper, prons, takai oh tuhke, me sohte kak kilang de pil rong de pil alu.+ 21 Oh re sohte koluhkihla ar kin kamaramas de ar kin wunahni de ar kin wia tiahk samin me pid wia nsenen pwopwoud* de ar kin pirap.

10 Oh I kilangada pil emen tohnleng kehlail me kohdihdo sang nanleng, me kapwatkihda* depwek ehu, oh ahia pwoat mi pohn moange, oh mese duwehte ketipin,+ oh neh kan duwehte uhr en kisiniei, 2 oh e kolokol kisin doaropwe* kis me papahkpeseng. Oh e kihdiong neh palimaun pohn sehdo, a neh palimeing pohn sahpw, 3 oh e ngihl laudida weriwer duwehte laion men eh kin weriwer.+ Oh ni eh wer, I rongada ngilen nansapwe isuh ko.+

4 Eri ni ahnsou me nansapwe isuh ko koasoi, I kereniong ntingihedi, ahpw I rongada ngihl ehu sang nanleng+ me mahsanih: “Katengepene soahng kan me nansapwe isuh ko koasoia, oh dehr ntingihedi mepwukat.” 5 A tohnleng me I kilangada kesikesihnen pohn sehdo oh sahpwo, ahpw kapahdalahng nanleng peh palimaun, 6 oh e kahukihla mwaren Ih me ketin ieias kohkohlahte,+ me ketin kapikada nanleng oh audepe kan, oh sampah oh audepe kan, oh sehd oh audepe kan:+ “E solahr pahn ketin pwapwand. 7 Ahpw ni keisimen en tohnlengo+ eh pahn kereniong peuk nah sowio,+ rir sarawi+ me Koht ketin lohkihong sapwellime ladu soukohp ako+ nin duwen rongamwahu pahn pweida.”

8 Oh I rongada ngihl me kohsang nanlengo+ eh pwurehng mahsanihong ie: “Kohwei oh ale doaropwe me papahkpesengen nan pehn tohnleng me kesikesihnen pohn sehdo oh pohn sahpwo.”+ 9 I ahpw kohla rehn tohnlengo oh ndaiong en kihong ie kisin doaropweo. E ahpw ndaiong ie: “Ale oh kangala,+ oh e pahn kahrehiong nan kapehdomwen en katikala, ahpw e pahn mem nan ewomwen duwehte sukehn loangalap.” 10 Ngehi eri kihsang kisin doaropweo nan pehn tohnlengo oh kangala,+ oh e mem nan eweiet duwehte sukehn loangalap,+ ahpw mwurin ei kangala, nan kapehdiet katingkihda. 11 Oh ira mahsanihong ie: “Ke uhdahn pahn pwurehng kohpada duwen aramas akan, wehi kan, lokaia kan* oh nanmwarki tohto.”

11 Oh ahlek pwoat me duwehte lepin tuhke kis*+ ahpw kohieng ie ni eh nda: “Uhda oh sohngedi wasa sarawi en tehnpas sarawi en Koht oh pei sarawio oh irail kan me wiewia kaudok wasao. 2 Ahpw wasa me kelpene likin wasa sarawi en tehnpas sarawio, kihdihte oh ke dehr sohngedi, pwehki e kohiengehr wehi kan, oh re pahn tiakedi kahnimw sarawio+ erein sounpwong 42.+ 3 I pahn wiahiong nei sounkadehde riemeno ira en wia kokohp erein rahn 1,260 ni ara likawih likoun nsensuwed.”* 4 Ira rasehng tuhke olip riapwoat+ oh dewen lamp riau+ oh ira uh mwohn Kaun en sampah.+

5 Ma emen men kauweirahla, kisiniei pahn kohieisang nan awara ko oh kamwomwala ara imwintihti kan. Ma emen pahn men kauweirahla, ih duwen eh pahn kamakamala. 6 Ira ahneki manaman en ritingedi pahnlahng*+ pwe keteu en dehr mweredi+ erein ara wiewia kokohp, oh ira ahneki manaman en kawekiong pihl akan ni nta+ oh kalokehki sampah soangen kalokolok koaros ni uwen pak tohto me ira inengieng.

7 Ni ahnsou me ira kanekehla ara kadehde, mahn lawalo me kohdahsang nan pwoahr loalo me soh kapi pahn mahweniong ira oh kalowehdi oh kemeirahla.+ 8 Oh paliwarara pahn mi pohn ahllap en kahnimw kalaimwun me adaneki Sodom oh Isip ni karasaras, wasa me ara Kauno pil kamakamala nin tuhkeo. 9 Oh soangsoangen aramas akan, keinek kan, lokaia kan* oh wehi kan pahn kilang paliwarara erein rahn siluh elep,+ oh re sohte pahn mweidohng paliwarara ko en seridi nan sousou. 10 Oh irail kan me kin kousoan nin sampah kin pereperen oh kamakamadipw pwehki ara mehla, oh re pahn kisakispene, pwehki soukohp riemenet ara kin kaloke irail kan me kin kousoan nin sampah.

11 Mwurin rahn siluh elep, kehl* en mour sang rehn Koht ahpw pedolong rehra,+ oh ira uhda, oh irail kan me kilangirahda ahpw masepwehkada kowahlap. 12 Oh ira rongada ngihl laud ehu sang nanleng me mahsanihong ira: “Kohdahdo wasaht.” Ira ahpw kohdahla nanleng nan depwek ehu, oh ara imwintihti kan kilangirahda.* 13 Ni ahnsowohte,* lapalahn rerrer en sahpw ehu ahpw wiawi, oh eisek kis ehun kahnimwo pwupwudi; oh aramas 7,000 mehkihla rerrer en sahpwo, oh irail kan me luhwe ahpw masepwehkada oh kalinganahda Koht en nanleng.

14 Keriaun kahpwal lapalap+ nekier. Kilang! Kesiluhwen kahpwal lapalap pahn mwadang kohdo.

15 Keisimen en tohnlengo ahpw peuk nah sowio.+ Oh mie ngihl laud kei nanleng me ndinda: “Wehin sampah wialahr Wehin atail Kaun+ oh sapwellime Krais,+ oh e pahn ketin kakaun nin duwen nanmwarki kohkohlahte.”+

16 Oh lapalap* 24+ me mwomwohd nan mwoalarail kan mwohn silangin Koht ahpw poaridi oh kaudokiong Koht, 17 patopatohwan: “Maing Siohwa* Koht, me Keieu Manaman, me ketin mie+ oh me ketin mieier, se kalahngankihong komwi omwi ketikiher sapwellimomwi manaman lapalap oh tapiada kakaun nin duwen nanmwarki.+ 18 Ahpw wehi kan inenen lingeringerda, oh omwi engieng ahpw leledo, oh ahnsou me kileldier leledohr pwe me melahr akan en pakadeikda oh komwi en ketin katingih+ sapwellimomwi ladu soukohp akan+ oh aramas sarawi kan oh irail me kin lemmwiki mwaromwi, me tikitik kan oh me lapalap akan, oh kauwehla irail kan me kin kauwehla sampah.”+

19 Oh wasa sarawi en tehnpas sarawi en Koht nanleng ahpw ritida, oh kohpwahn sapwellime inou lap sansalda nan wasa sarawi en sapwellime tehnpas sarawio.+ Oh lioal piripir oh ngihl kei oh nansapwe oh rerrer en sahpw ahpw wiawi oh keteu aihs takai laud kan ahpw mweredi.

12 Lapalahn kilel ehu ahpw pwarada nanleng: Lih emen+ me kapwatkihda* ketipin, oh maram mi pahn neh ko, oh nihn en usu 12 mi pohn moange, 2 oh e liseian. Oh e kin weriwerki eh medek oh lokolok en neitik.

3 Pil ehu kilel pwarada nanleng. Kilang! Lapalahn drakon weitahta men,+ me moahng isuh oh kod eisek oh nihn* isuh mi pohn moahng ko; 4 oh pwadaikio sipedasang silikis ehun usuhn+ nanleng kan, oh e kesepwekeiraildiong nin sampah.+ Oh drakono uh mwohn liho+ me nektehn pahn neitik, pwe ni eh pahn neitik, e pahn kadallehla nah serio.

5 Oh e naitikihada pwutak emen,+ me pahn kaunkihda wehi kan koaros sokon mete.+ Oh nah serio pehdsang oh wisiklahng rehn Koht oh ni mwoale. 6 Liho ahpw tangalahng nan sapwtehn, wasa me Koht ketin kaunopada dewe ie, oh wasa me re pahn kamwakamwenge erein rahn 1,260.+

7 Oh mahwen tepida wiawi nanleng: Maikel*+ oh nah tohnleng kan ahpw mahweniong drakono, oh drakono oh nah tohnleng kan mahweniong 8 ahpw re sohte pweida, pil sohla dewerail nanleng. 9 Lapalahn drakono+ eri lekdekdiong nin sampah, me iei serpent en mahso,+ me adaneki Tepil+ oh Sehdan,+ me kin pitipitih sampah pwon;+ oh e lekdekdiong nin sampah+ iangahki nah tohnleng kan. 10 I ahpw rongada ngihl laud ehu nanleng me nda:

“Ahnsoun komour leledohr+ oh manaman en atail Koht sansaldahr oh sapwellime Wehi+ pweidahier oh manaman en sapwellime Krais tepidahr, pwehki sounkedip en riatail kan lekdekdiongehr nin sampah, me kin kedipa irail ni rahn oh nipwong mwohn silangin atail Koht!+ 11 Oh re kalowedier ih+ pwehki ntahn Sihmpwulo+ oh pwehki mahsen me re kin kadehdehda,+ oh re sohte poakohng arail mour*+ mehnda ma re lelohng mehla. 12 Pwehki met, kumwail nanleng kan, kumwail perenda oh kumwail me kin kousoan nanleng! Meid suwediong sampah oh sehd,+ pwehki Tepilo leledohr rehmwa, oh e inenen lingeringer kowahlap, pwehki eh ese me eh ahnsou mwotomwotalahr.”+

13 Eri ni drakono eh tehkada me e lekdekdiongehr sampah,+ e kaloke liho+ me naitikihada seri wolo. 14 Ahpw pehnpihr riau en ikel lapala men+ kohieng liho, pwe en pihrlahng nan dewe nan sapwtehn, wasa me e kin mwengehsang ie erein ahnsou ehu oh ahnsou riau oh elep en ahnsou,*+ me dohsang mesen serpento.+

15 Oh serpento kakusalahng mwurin liho pihl me duwehte pillap pwoat sang nan ewe, pwe en kahrehiong en duhla. 16 Sampah ahpw sewesehda liho, oh sampah sarapeseng oh kadallehla pillap me drakono kakusieisang nan eweo. 17 Drakono eri lingeringerda pahn liho oh kohla mahweniong luhwen kadaudok en liho,+ me kin kapwaiada kehkehlik en Koht kan oh pwaisanki doadoahk en kadehdehda duwen Sises.+

13 Oh e* kesikesihnen pohn pihken oaroahro.

I ahpw kilangada mahn lawalo men+ me kohkohdahsang nansedo,+ me kod eisek oh moahng isuh, oh nihn* eisek mi pohn kode ko, ahpw ahd kan me lahlahwe Koht mi pohn moange ko. 2 Eri mahn lawalo me I kilangadao duwehte lepard men, ahpw neh ko duwehte nehn pehr, oh ewe duwehte ewen laion. Oh mahno alehdi eh kehl, mwoale oh manaman laud en kakaun+ sang drakono.+

3 I kilangada me ehu moange ko ohla laud, ahpw ohla laudo mohdier,+ oh tohnsampah koaros kin wauneki oh kin idawehnla mahn lawalo menet. 4 Oh re kaudokiong drakono pwehki e kihong mahn lawalo menet manaman, oh re kin kaudokiong mahn lawalo menet, ndinda: “Ihs me duwehte mahn lawalo menet, oh ihs me kak mahweniong ih?” 5 Au ehu ahpw kohieng ih pwe en koasoia soahng aklapalap kan oh lahlahwe kan, oh e pil ale manaman en wia nsene erein sounpwong 42.+ 6 Ewe ahpw tepida lahlahwe+ Koht, pwe en lahlahwe mware oh wasa me e kin ketiket ie, oh pil irail kan me kin kousoan nanleng.+ 7 E pil mweimweiong en mahweniong aramas sarawi kan oh kaloweiraildi,+ oh e alehdier manaman en kaunda keinek koaros, aramas koaros, lokaia* koaros oh wehi koaros. 8 Oh irail koaros me kin kousoan nin sampah pahn kaudokiong ih. Sang ni tepin tohnsampah* kohdo, sohte eden emen irail ntingdi nan pwuhken* mour+ en Sihmpwulo me kamakamalahr.+

9 Ma mehmen mie salenge, a en rong.+ 10 Ma konehng emen en selidi, a e pahn selidi. Ma emen pahn kemehkihla aramas kedlahs,* e uhdahn pahn kamakamkihla kedlahs.+ Ihme kahrehda aramas sarawi kan+ anahne dadaur+ oh pwoson.+

11 I ahpw kilangada pil emen mahn lawalo me kohkohdahsang sampah, oh mie kode riau me duwehte ahn sihmpwul men, ahpw e tepida koasoakoasoi duwehte drakon men.+ 12 E kin doadoahngki manaman koaros en keieun mahn lawalo+ mwohn mese. Oh e kin kahrehiong sampah oh towe kan en kaudokiong keieun mahn lawalo, me eh ohla laudo mohdier.+ 13 Oh e wiahda kilel kapwuriamwei kei oh pil kamwerediong pohn sampah kisiniei sang nanleng mwohn mesen aramas akan koaros.

14 E kin pitih irail kan me kin kousoan nin sampah pwehki kilel kan me mweimweiong en wiahda mwohn mesen keieun mahn lawalo, ni eh kin ndaiong irail kan me kin kousoan nin sampah ren wiahda sansal+ en mahn lawalo me ohkihla kedlahs ahpw mwahula.+ 15 Oh e pil mweimweiong ih en kihong mour* nan sansal en mahn lawalou, pwe sansal en mahn lawalou en kin koasoi oh kahrehiong irail koaros me kahng kaudokiong sansal en mahn lawalou ren kamakamala.

16 E idingkihong aramas koaros—me tikitik oh me lapalap, me kepwehpwe oh me semwehmwe, me saledek oh lidu kan—pwe irail pwukat en kileldi ni pehrail palimaun de ni temwarail kan.+ 17 Sohte emen kak pwainda mehkot de netikihla mehkot, ahpw ihte aramas me kilelkihdi eden+ mahn lawalou de nempehn edeo.+ 18 Ihme kahrehda erpit anahn wasaht: Mehmen me ahneki dehde mwahu a en kapata nempehn mahn lawalou, pwe nempe wet iei nempehn aramas emen, oh eh nempe iei 666.+

14 Kilang! I ahpw kilangada Sihmpwulo+ eh ketiket pohn Nahna Saion,+ oh meh 144,000+ iangih. Mwaren Sihmpwulo oh mwaren Semeo+ ntingdier ni temwarail kan. 2 I ahpw rongada ngihl ehu sang nanleng me duwehte ngilen tenihr laud* oh ngilen nansapwe laud; oh ngihl me I rongadao duwehte ngilen sounkoul kan ni arail kesekesengki neirail arp kan. 3 Oh re kokoulki koul pwoat me mwomwen koul kapw pwoat+ mwohn mwoahlo oh mwohn menmour pahmeno+ oh me lapalap* ako,+ oh sohte emen kak esehla koulo, ihte meh 144,000,+ me pweipweida sang nin sampah. 4 Iei irail pwukat me sohte saminkihla lih; ni mehlel, irail meipwon kei.+ Iei irail pwukat me kin ideidawehnte Sihmpwulo wasa koaros me e kin ketila ie.+ Irail pweipweida+ sang nanpwungen aramas akan nin duwen tepin wah kan+ me meirongalahr ong Koht oh Sihmpwulo, 5 oh sohte widing ehu dierekda sang nan awarail kan; sohte sapwung kis mie rehrail.+

6 Oh I kilangada pil emen tohnleng me pipihr nan wehwe, oh e kin lohkiseli rongamwahu soutuk ong irail kan me kin kousoan nin sampah, ong wehi koaros oh keinek koaros oh lokaia* koaros oh aramas koaros.+ 7 E kin nda ni ngihl laud: “Kumwail lemmwiki Koht oh kalinganahda ih, pwehki awahn kadeik me e pahn ketin wia leledohr,+ eri kumwail kaudokiong Ih me ketin wiahda nanleng, sampah, sehd+ oh utuhnpihl akan.”

8 Oh pil emen tohnleng, me keriemeno, ahpw idawehndo oh ndinda: “E pwupwudier! Papilon Lapalap+ pwupwudier,+ lih me kahrehiong wehi kan koaros en nim eh wain me kin kahrehda ineng kehlail* en wia tiahk samin me pid wia nsenen pwopwoud!”*+

9 Oh pil emen tohnleng, me kesilimeno, ahpw idawehndo ira, ndinda ni ngihl laud: “Ma mehmen kin kaudokiong mahn lawalou+ oh eh sansal oh ale kilel ehu ni temwe de ni peh,+ 10 e pahn pil nim wain en sapwellimen Koht engieng, iei wain kehlail me wudekdiong nan kep en Sapwellime engieng,+ oh e pahn lokolongki kisiniei oh suwepel+ mwohn mesen tohnleng sarawi kan oh mwohn silangin Sihmpwulo. 11 Oh ediniei en arail lokolok* kin ediedida kohkohlahte.+ Sohte mwahn kisin kommoal kis ni rahn oh nipwong ong irail kan me kin kaudokiong mahn lawalou oh eh sansal oh pil mehmen me kilelkiher edeo.+ 12 Ihme kahrehda aramas sarawi kan anahne dadaur,+ irail kan me kin kapwaiada sapwellimen Koht kehkehlik kan oh kin idawehn pwoson+ en Sises.”

13 Oh I rongada ngihl ehu sang nanleng me nda, “Ntingihedi: Meid peren irail kan me mehla sang met kohla ni arail kin miniminiong Kauno.+ Ei, ngehn sarawi* mahsanih, irail en kommoaldihsang arail doadoahk, pwe soahng kan me re wiadahr kin iangirailda ni ahnsowohte.”

14 Kilang! I ahpw kilangada depwek pwetepwet ehu, oh me ketiket pohn depweko iei emen me duwehte nein-aramas,+ oh nihn kohl ehu mi pohn tapwi oh naipokos keng pwoat mi nin lime.

15 Pil emen tohnleng ahpw pwarodo sang ni wasa sarawi en tehnpas sarawio, me patohwanohng ih me ketiket pohn depweko ni ngihl laud: “Komw ketin tepida doadoahngki noumwi naipokos oh dondol, pwehki awahn dondol leledohr, pwe wahnsahpw en sampah mahier.”+ 16 Oh me ketiket pohn depweko ahpw ketin palkidiong nin sampah sapwellime naipokoso, wahnsahpw en sampah eri dondol.

17 A pil emen tohnleng ahpw pwarodo sang ni wasa sarawi en tehnpas sarawio me mi nanleng, oh e pil kolokol naipokos keng pwoat.

18 A pil emen tohnleng pwarodo sang ni pei sarawio, oh e ahneki manaman pohn kisinieio. E ahpw werkilahng me kolokol naipokos kengo, nda: “Doadoahngki noumw naipokos kengen oh rikpene dunen kreip en sampah kan, pwe kreip kan mahier.”+ 19 Tohnlengo ahpw palkidiong nin sampah nah naipokoso oh rikpene kreip en sampah kan, e ahpw kesepwekehdiong nan lapalahn wasahn tiak kreipo, me wehwehki sapwellimen Koht engieng.+ 20 Wasahn tiak kreipo eri tiatipene likin kahnimwo, oh nta ahpw pwilweisang nan wasahn tiak kreipo leldahla ni ewen oahs ko oh e reireiki stadia 1,600.*

15 Oh I kilangada pil ehu kilel me lapalap oh kapwuriamwei nanleng, tohnleng isimen+ me kolokol kalokolok isuh. Mepwukat iei kaimwiseklahn kalokolok kan, pwehki sang ni mepwukat sapwellimen Koht engieng pahn imwisekla.+

2 Oh I kilangada mehkot me duwehte sehd kilahs ehu+ me doalki kisiniei, oh irail kan me kalowedier+ mahn lawalou oh eh sansal+ oh nempehn ede,+ me kesikesihnen ni sehd kilahso oh kolokol arp kan en Koht. 3 Irail kokoulki koulen Moses,+ sapwellimen Koht ladu oh koulen Sihmpwulo,+ ndinda:

“Maing Siohwa* Koht, me Keieu Manaman,+ omwi wiewia kan me lapalap oh kapwuriamwei.+ Komwi me Nanmwarki poatopoat,+ alomwi kan me pwung oh mehlel.+ 4 Maing Siohwa,* ihs me sohte pahn lemmwikin komwi oh kalinganahda mwaromwi? Pwe komwihte me loalopwoat!+ Pwe wehi kan koaros pahn patohdo oh kaudok mwohn silangomwi,+ pwehki sapwellimomwi kadeik pwung sansaldahr.”

5 Mwurin met, I ahpw kilangada wasa sarawi en impwalo*+ eh ritida nanleng,+ 6 oh tohnleng isimen me kolokol kalokolok isuhwo+ ahpw pwarodo sang ni wasa sarawio, likawih likou linen me mwakelekel oh lingaling oh pirapirki kateng kohl ni mwaremwarerail kan. 7 Emen menmour pahmeno ahpw kihong tohnleng isimeno pwohl kohl isuh me diren engieng en Koht,+ me ketin ieias kohkohlahte. 8 Oh wasa sarawio ahpw direkihla ediniei pwehki sapwellimen Koht lingan+ oh pwehki sapwellime manaman, oh sohte emen kak pedolong nan wasa sarawio lao kalokolok isuh+ en tohnleng isimeno imwisekla.

16 Oh I rongada ngihl laud ehu sang nan wasa sarawio+ me mahsanihong tohnleng isimeno: “Kumwail kohwei oh wudekihdiong pohn sampah pwohl isuh en engieng en Koht.”+

2 Me keieuo kohla oh wudekihdiong pohn sampah nah pwohlo.+ Kens kamedek oh suwed+ ahpw pwarada rehn aramas ako me kilelkihdi kilel en mahn lawalo+ oh me kin kaudokiong eh sansal.+

3 Me keriemeno wudekihdiong pohn sehdo nah pwohlo.+ Oh e wiahla nta+ me duwehte ntahn aramas mehla men, oh soahng momour* koaros en nansed ahpw mehla.+

4 Me kesilimeno wudekihdiong pohn pillap akan oh utuhnpihl akan nah pwohlo.+ Oh re wiahla nta.+ 5 I ahpw rongada tohnleng men me ahneki manaman pohn pihl ako eh patohwan: “Komwi iei Koht Loalopwoato,+ me ketin mie oh me ketin mieier.+ Komwi ketin pwung pwehki omwi ketikihda kadeik pwukat.+ 6 Irail kakeredier ntahn aramas sarawi kan oh soukohp akan,+ ihme kahrehda komw ketin wiahiong irail en nim nta;+ re warohng met.”+ 7 Oh I rongada ngihl ehu sang ni pei sarawio me patohwan: “Ei, Maing Siohwa* Koht, me Keieu Manaman,+ sapwellimomwi kadeik* me mehlel oh pwung.”+

8 Me kapahmeno wudekihdiong pohn ketipin nah pwohlo,+ oh e mweimweiongehr ketipino en kamwasikahki aramas akan kisiniei. 9 Oh aramas ako mwasingkihla karakar laud, re ahpw lahlahwe mwaren Koht, me sapwellimanki manaman en wiahda kalokolok pwukat, oh re sohte koluhla oh kalinganahda ih.

10 Me kelimmeno wudekihdiong pohn mwoalen mahn lawalo nah pwohlo. Oh eh wehi ahpw rotorotala,+ aramas akan ahpw tepida kehpene lowarail kan pwehki ar medek, 11 irail ahpw lahlahwe Koht en nanleng pwehki ar medek oh kens kan, oh re sohte koluhkihla ar wiewia kan.

12 Me kewenemeno wudekihdiong pohn pillap laud Iupreitis+ nah pwohlo, oh pihlo ahpw madada+ pwe en kaunopada elen nanmwarki kan+ sang wasa me ketipin kin dakada ie.*

13 Oh I kilangada koasoi* samin siluh me mwomwen kairu me kohieisang nan ewen drakono,+ sang nan ewen mahn lawalou oh sang nan ewen soukohp likamwo. 14 Ni mehlel, koasoi pwukat kohsang rehn ngehn suwed kan oh re kin wiahda kilel kan,+ oh koasoi pwukat kin kohwong nanmwarki kan en sampah pwon pwe en kihpene irail ong ni mahwen+ me pahn wiawi ni rahn lapalap en Koht, me Keieu Manaman.+

15 “Kilang! I pahn kohdo duwehte lipirap emen.+ Meid peren me kin pepehd+ oh kolokol eh likou puhp kan, pwe en dehr kin alialu kilisou oh aramas akan kilang eh kanamenek.”+

16 Oh irail kihpene irail nan wasa me adaneki ni lokaiahn Ipru Armakedon.*+

17 Me keisimeno wudekihdiong nan wehwe nah pwohlo. Ngihl laud ehu ahpw kohieisang nan wasa sarawio+ sang nan mwoahlo, me mahsanih: “E imwiseklahr!” 18 Oh lioal piripir oh ngihl kei oh nansapwe ahpw wiawi oh lapalahn rerrer en sahpw ehu pil wiawi, me sohte duwehte me wiawiher sangete ahnsou me aramas tepin kapikipikda nin sampah,+ rerrer en sahpwo me inenen mwuledek oh kehlail. 19 Kahnimw kalaimwuno+ ahpw pwalpeseng wiahda pali siluh, oh kahnimw en wehi kan eri pwupwudi; Koht ahpw ketin tamanda Papilon Lapalap+ pwe en ketikihong ih kep en wain en sapwellime engieng laud.+ 20 Deke koaros pil tangpeseng, oh nahna kan sohte dierekda.+ 21 Lapalahn keteu aihs takai, me ehuehu aihs takai ko toutouki mpen dalend* ehu ahpw mwerediong pohn aramas akan sang nanleng,+ oh aramas akan ahpw lahlahwe Koht pwehki kalokolok en keteu aihs takaio,+ pwe kalokolok wet me inenen laud mehlel.

17 Emen tohnleng isimen ko me kolokol pwohl isuh ko+ ahpw kohdo rehi oh ndaiong ie: “Kohdo, I pahn kasalehiong uhk kadeik ong lihen netiki paliwere ndand me mwomwohd pohn pihl tohto.+ 2 Nanmwarkien sampah kan wiadahr tiahk samin me pid wia nsenen pwopwoud*+ rehn liho, oh tohnsampah kan sakaukilahr wain en eh tiahk samin me pid wia nsenen pwopwoud.”*+

3 E ahpw waielahng nan sapwtehn sang ni ngehn sarawi.* Oh I kilangada lih emen me mwomwohd pohn mahn lawalo weitahta men me diren ahd kan me lahlahwe Koht oh mie moange isuh oh kode eisek. 4 Liho likawih likou pohn ntahnmwel+ oh weitahta, oh e kapwatki kohl oh takai kesempwal kan oh perl kan,+ oh e kolokol kep kohl ehu me diren soahng kasaut kan oh wiewia samin kan en eh tiahk samin me pid wia nsenen pwopwoud.* 5 Ahd ehu nting nin temwe, ahd rir ehu: “Papilon Lapalap, inen lihen netiki paliwararail kan+ oh inen soahng kasaut kan en sampah.”+ 6 Oh I kilangada me liho sakaukihla ntahn aramas sarawi kan oh ntahn sounkadehdehn Sises kan.+

Eri, ni ei kilikilang liho, I inenen pwuriamweikihla kowahlap. 7 Tohnlengo eri ndaiong ie: “Dahme ke pwuriamweikihla? I pahn ndaiong uhk ire rir ehu duwen liho+ oh duwen mahn lawalo me e dakehn, me moahng isuh oh kod eisek:+ 8 Mahn lawalou me ke kilangada me mie mahso, ahpw e solahr mie, pahn nektehn kohda sang nan pwoahr loalo me soh kapi,+ oh e pahn kasohrala. Oh tohnsampah kan—irail kan me adarail sohte ntingdi nan pwuhken* mour+ sang ni tepin tohnsampah*—pahn pwuriamweikihla ar pahn kilang mahn lawalou me mie mahso, ahpw e solahr mie, ahpw e pahn pwurodo.

9 “Emen anahne erpit pwe en wehwehki met: Moahng isuh ko+ wehwehki nahna isuh, wasa me liho mwomwohd powe. 10 Oh mie nanmwarki isimen: Limmen pwupwudier, emen mihmihte, oh meteio saikinte leledo; ahpw ni eh pahn leledo, e pahn mihmi ahnsoutehkis. 11 Oh mahn lawalo me mie mahso, ahpw solahr mie,+ iei kawelimen en nanmwarki, ahpw e kohsang nanmwarki isimeno, oh e pahn kasohrala.

12 “Kode eisek me ke kilangehr kin wehwehki nanmwarki ehk me saikinte ale wehi ehu, ahpw re pahn iang mahn lawalou ale manaman nin duwen nanmwarki kei erein awa ehu. 13 Irail pwukat ahneki madamadau tehieu, re ahpw kihong mahn lawalou arail kehl oh manaman en kakaun. 14 Re pahn mahweniong Sihmpwulo,+ ahpw pwehki ih me Kaunen kaun akan oh Nanmwarkien nanmwarki kan,+ Sihmpwulo pahn kaloweiraildi.+ Oh pil irail kan me Koht ketin malipeier oh piladahr oh me kin lelepek pahn pil kaloweiraildi.”+

15 E ahpw ndaiong ie: “Pihl akan me ke kilangehr, wasa me lihen netiki paliwereo mwomwohd ie, kin wehwehki aramas akan, lapalahn pokon kan, wehi kan oh lokaia kan.*+ 16 Oh kode eisek+ me ke kilangehr oh mahn lawalou+ pahn kailongkihla lihen netiki paliwereo+ oh kihsang mehkoaros me e ahneki oh kakilisawihada, oh re pahn kangala uduke oh isingkihla douluhl kisiniei.+ 17 Pwe Koht ketin audehda arail mohngiong pwe ren kapwaiada kupwure,+ ei, re pahn kapwaiada madamadau tehieu ni ar pahn kihong mahn lawalou arail wehi,+ lao mahsen en Koht pahn pweida. 18 Oh lih+ me ke kilangehro kin wehwehki kahnimw kalaimwun me kin kaunda nanmwarkien sampah kan.”

18 Mwurin met I kilangada pil emen tohnleng me kohdihdo sang nanleng me ahneki manaman laud, oh sampah marainkihla eh lingan. 2 Oh e ngihl laudida weriwer oh nda: “E pwupwudier! Papilon Lapalap pwupwudier+ oh e wialahr wasahn kousoan en ngehn suwed kan, oh wasa me ngehn* saut koaros oh menpihr koaros me samin oh kasaut kin rukuruk ie!+ 3 Pwehki wain en eh ineng kehlail* en tiahk samin me pid wia nsenen pwopwoud,* wehi koaros lohdier,+ oh nanmwarkien sampah kan wiadahr tiahk samin me pid wia nsenen pwopwoud reh,+ oh sounnetinet* en sampah kan kepwehpwehkilahr eh mouren noahrok soh irepe.”

4 Oh I rongada pil ehu ngihl sang nanleng me mahsanih: “Kumwail nei aramas akan, kumwail pedoisang reh,+ ma kumwail sohte men iang ih nan dipe kan, oh ma kumwail sohte men iang lokolongki eh kalokolok kan.+ 5 Pwe dipe kan koasoakoasoakdahr oh leldalahngehr nanleng,+ oh Koht ketin tamanda eh wiewia suwed kan.*+ 6 Dupukohng ih duwehte me e kin wiahiong meteikan,+ ei, dupukohng ih pak riau ong dahme e wiadahr;+ nan kep+ me e kin doalki, doaloahda pak riau ong ih.+ 7 Kihong ih lokolok laud oh mwahiei, me uwehte eh kin kalingana pein ih oh mouren noahrok soh irepe me e kin wia. Pwe e kin ndinda nan eh mohngiong: ‘I kin mwomwohd duwehte lih nanmwarki men, oh kaidehn ngehi liohdi men, oh I sohte mwahn pahn mwahiei.’+ 8 Ihme kahrehda eh kalokolok kan pahn lelpenehng nan rahnteieu, me iei mehla, mwahiei oh lehk lapalap. Oh e pahn isihsla douluhl+ pwehki Siohwa* Koht me ketin kadeikada ih, me kehlail.+

9 “Oh nanmwarkien sampah kan me wiadahr tiahk samin me pid wia nsenen pwopwoud* reh oh kin mi reh nan mouren noahrok soh irepe pahn sengiseng oh pakepakere pein irail pwehki ar pahtoukihla ih ni ar kilang ediniei en eh roangala. 10 Re pahn uh ekis dohsang pwehki ar masak eh lokolok laud oh nda: ‘Meid suwed, meid suwed, kowe kahnimw kalaimwun,+ kowe kahnimw kehlail Papilon, pwehki nan awateieu, kadeikpomw leledohr!’

11 “Sounnetinet en sampah kan pil sengiseng oh mwahieiki ih, pwehki solahr me pahn pwainsang ar kepwe kan koaros, 12 kepwe kan me duwehte kohl, silper, takai kesempwal, perl, likou linen kaselel, likou pohn ntahnmwel, silik, oh likou weitahta; oh soahng koaros me wiawihsang tuhke pwohmwahu kan oh soangen dipwisou koaros me wiawihsang aipori, oh sang tuhke kesempwal, prons, mete oh marpel; 13 oh pil sinamon, mehn doal sang India,* warpwohmwahu, leh pwohmwahu, warpwohmwahu pwetepwet,* wain, lehn olip, pilawa kaselel, wihd, kou, sihpw, oahs kan, kuruma kan, lidu kan, oh mour* en aramas akan. 14 Ei, soahng mwahu kan* me ke kin inengieng kohsanguhkehr, oh mwenge koaros oh soahng kaselel koaros sohrasanguhkehr, oh solahr pahn pwurehng dierek.

15 “Sounnetinet kan me kin netikihla soahng pwukat, me kepwehpwehla pwehki ih, pahn uh ekis dohsang pwehki ar masak eh lokolok laud oh pahn sengiseng oh mwahiei, 16 ndinda: ‘Meid suwed, meid suwed, kahnimw kalaimwuno, me likawih likou linen kaselel, likou pohn ntahnmwel oh weitahta, oh kapwatki diren mehn kapwat kohl kan, takai kesempwal kan oh perl kan,+ 17 pwehki nan awateieu soangen kepwehpwe laud wet sohralahr!’

“Oh kepdin en sohp kan koaros oh koaros me kin seiloak nansed oh sehla koaros oh irail koaros me kin mourki nansed ahpw uh ekis dohsang 18 oh weriwer ni ar kilang ediniei en eh roangala oh nda: ‘Mehnia kahnimw me duwehte kahnimw kalaimwun wet?’ 19 Re kesedahng pwelpar pohn moangarail kan oh weriwer, sengiseng oh mwahiei, oh nda: ‘Meid suwed, meid suwed, kahnimw kalaimwuno, me irail koaros me waraneki sohp nan madau kepwehpwehkihla eh kepwe kan, pwehki nan awateieu e mwomwlahr!’+

20 “Kowe nanleng, perenkihda dahme wiawihongehr ih,+ oh pil kumwail aramas sarawi kan+ oh wahnpoaron kan oh soukohp akan, pwehki kumwail, Koht ketin kadeikada ih!”+

21 Oh tohnleng kehlail men ahpw pwekada takai ehu me duwehte lapalahn takain ngidar pilawa ehu, e ahpw kesehdilahng nansedo, ndinda: “Ih duwen kahnimw kalaimwun Papilon eh pahn mwadang lekdekla, oh e solahr pahn pwurehng dierekda.+ 22 Oh solahr me pahn pwurehng rong rehmw ngilen sounkoul kan me kin kesekesengki neirail arp, ngilen sounkeseng kan, ngilen sounkesengki keseng pepeuk kan, oh ngilen sounpeuk sowi kan. Oh solahr tohndoadoahk saman kan me kin wia soangsoangen doadoahk kan pahn pwurehng dierek rehmw, oh solahr me pahn pwurehng rong ngilen takain ngidar pilawa rehmw. 23 Sohte marain en lamp ehu pahn pwurehng marainda rehmw, oh sohte me pahn pwurehng rong ngilen ohl kamwohd oh lih kamwohd rehmw; pwe noumw sounnetinet kan iei me lapalap akan en sampah, oh ke pitihkidier tohnwehi kan koaros omw tiahk en wunahni.+ 24 Ei, ntahn soukohp akan oh ntahn aramas sarawi kan+ oh ntahn irail koaros me kamakamalahr nin sampah dierekdahr nan kahnimw wet.”+

19 Mwurin met, I rongada ngihl laud ehu me duwehte ngilen pokon kalaimwun ehu nanleng. Re patohwan: “Kapinga Iah!*+ Atail Koht me ketin sapwellimanki komour, lingan oh manaman, 2 pwehki sapwellime kadeik me mehlel oh pwung.+ Pwe e ketin kadeikadahr lihen netiki paliwere ndand me kauwehkilahr sampah eh tiahk samin me pid wia nsenen pwopwoud,* oh e ketin dupuk ntahn sapwellime ladu kan me mi nan pehn liho.”*+ 3 Oh ni ahnsowohte, re ahpw patohwan keriapak: “Kapinga Iah!*+ Oh ediniei sang reh ahpw kin ediedida kohkohlahte.”+

4 Oh lapalap* 24+ oh menmour pahmeno+ ahpw poaridi oh kaudokiong Koht me ketiket nan mwoahlo oh patohwan: “Amen! Kapinga Iah!”*+

5 Oh pil, ngihl ehu kohdo sang ni mwoahlo me mahsanih: “Kapinga atail Koht, kumwail koaros sapwellime ladu kan+ me kin lemmwiki ih, me tikitik kan oh me lapalap akan.”+

6 Oh I rongada ngihl ehu me duwehte ngilen pokon kalaimwun ehu oh duwehte ngilen tenihr laud* oh duwehte ngilen nansapwe laud kan. Re patohwan: “Kaping Iah,*+ pwehki Siohwa* atail Koht, me Keieu Manaman,+ ketin tepidahr kakaun nin duwen nanmwarki!+ 7 Kitail en pereperen oh perenda kowahlap oh kalinganahda ih, pwehki kapwopwoud en Sihmpwulo eh leledohr oh sapwellime lih kamwohd onopadahr. 8 Ei, e mweimweiongehr lih kamwohdo en likawihada likou linen kaselel me lingaling oh mwakelekel—pwe likou linen kaselel kin wehwehki en aramas sarawi kan wiewia pwung.”+

9 Oh tohnlengo ndaiong ie, “Ntingihedi: Meid peren irail kan me lukodohng ni kamadipw en kapwopwoud en Sihmpwulo.”+ E pil ndaiong ie: “Mepwukat iei mahsen mehlel en Koht.” 10 Ngehi eri poaridiong ni neh ko pwe I en kaudokiong ih. Ahpw e ndaiong ie: “Kanahieng! Ke dehr wia men!+ I wiahte ladu men, duwehte kowe oh riomw kan me kin wia doadoahk en kadehde duwen Sises.+ Kaudokiong Koht!+ Pwe kahrepen kokohp kan iei en wia kadehde duwen Sises.”+

11 I ahpw kilangada nanleng eh ritpeseng, oh kilang! oahs pwetepwet men.+ Oh me ketiket powe mwarenki Lelepek+ oh Mehlel,+ oh e kin ketin kadeik ni pwung oh pousehlahte mahwen ni pwung.+ 12 Silangi* duwehte mpwulen kisiniei,+ oh nihn* tohto mi pohn tapwi. Mwar ehu ntinting powe me sohte emen ese ahpw ihete, 13 oh e ketin likawihada likou puhp ehu me reikihla* nta, oh e mwarenki Mahsen+ en Koht. 14 Oh pil, karis en sounpei kan en nanleng me dake oahs pwetepwet kan ideidawehn ih, oh re likawih likou linen kaselel me pwetepwet oh mwakelekel. 15 Oh kedlahs reirei keng pwoat uhsang nin doauese+ pwe en ketin kamwomwkihla wehi kan, oh e pahn ketin kaunkinirailda sokon mete.+ Patehng met, e pahn tiakpeseng wasahn tiak kreip en engieng laud en Koht me Keieu Manaman.+ 16 Mwar ehu ntingdi pohn eh likou puhp, ei, pohn denge, Nanmwarkien nanmwarki kan oh Kaunen kaun akan.+

17 I ahpw pil kilangada tohnleng men me kesikesihnen mwohn ketipino, oh e ngihl laudida weriwer oh ndaiong menpihr kan koaros me pipihr nan wehwe: “Kumwail kohdo wasaht, oh pokonpene ni kamadipw lapalap en Koht,+ 18 pwe kumwail en kangala uduk en nanmwarki kan oh uduk en kaunen karis en sounpei kan+ oh uduk en aramas kehlail kan oh uduk en oahs akan oh irail kan me mwomwohd powe,+ oh uduk en aramas koaros, me saledek kan oh pil lidu kan oh me tikitik kan oh me lapalap akan.”

19 Oh I kilangada mahn lawalou oh nanmwarkien sampah kan oh neirail karis en sounpei kan arail pokonpene pwe ren mahweniong ih me ketiket pohn oahso oh sapwellime karis.+ 20 Oh mahn lawalou ahpw poarpoardi iangahki soukohp likamwo+ me kin wiahda manaman kan mwohn mahn lawalou, me e kin pitiheki irail kan me alehdi kilel en mahn lawalou+ oh irail kan me kin kaudokiong sansal en mahn lawalou.+ Nindoken ara momourte, ira koaros lekdekiong nan lehn kisiniei me lullulki suwepel.+ 21 Ahpw irail kan me luwehdi kamakamkihla kedlahs reirei me uhsang nin doauesen me ketiket pohn oahso.+ Menpihr kan koaros ahpw medkihla udukarail kan.+

20 Oh I kilangada tohnleng men me kohdihdo sang nanleng me wa kihen pwoahr loalo me soh kapi+ oh selmete laud ehu. 2 E ahpw parokedi drakono,+ serpent en mahso,+ me iei Tepil+ oh Sehdan,+ oh salihedi erein sounpar 1,000. 3 Oh e kesepwekehdilahng nan pwoahr loalo me soh kapi+ oh ritingedi oh katengehdi powe, pwe en solahr kin pitih wehi kan lao pahr 1,000 imwisekla. Mwurin met, e pahn sapwedekda erein ahnsou kis.+

4 Oh I kilangada mwoahl kei, oh manaman en kadeik ahpw kohieng irail kan me mwomwohd powe. Ei, I kilangada ntahn* irail kan me kamakamala* pwehki arail kin kadehdehda duwen Sises oh kin kalohki duwen Koht, oh pil irail kan me sohte kin kaudokiong mahn lawalou de eh sansal oh sohte alehdi kilel ni temwarail oh ni pehrail.+ Oh re mourda oh iang Krais kakaun nin duwen nanmwarki kei+ erein sounpar 1,000. 5 (A me melahr teikan+ sohte mourda lao pahr 1,000 imwisekla.) Met iei kaiasada keieu.+ 6 Meid peren oh sarawi mehmen me iang kaiasada keieu;+ mehla keriau+ sohte ahneki manaman pohrail,+ ahpw re pahn wiahla samworo+ en Koht oh Krais, oh re pahn iang ih* kakaun nin duwen nanmwarki kei erein sounpar 1,000.+

7 Mwurinte pahr 1,000 eh imwiseklahr, Sehdan pahn sapwedekda sang eh sensel, 8 oh e pahn kohieilahng pitih wehi kan ni keimw pahieun sampah, Kok oh Makok, pwe en kapokoneirailpene ong mahwen. Uwen tohtohn irail rasehng pihken oaroahr kan. 9 Oh re paraparala nin sampah pwon oh kapilpene kahnimpwal en aramas sarawi kan oh kahnimw me Koht ketin poakohng. Ahpw kisiniei kohdihdo sang nanleng oh kamwomwirailla.+ 10 Oh Tepil me kin pitipitih irail ahpw lekdekiong nan lehn kisiniei oh suwepel, wasa me mahn lawalou+ oh soukohp likamwo miher ie;+ oh irail pahn lokolok* ni rahn oh nipwong kohkohlahte.

11 Oh I kilangada mwoahl pwetepwet laud ehu oh Ih me ketiket powe.+ Sampah oh nanleng ahpw tangasang mwowe,+ oh re sohla mie. 12 Oh I kilangada me melahr akan, me lapalap akan oh me tikitik kan, me kesikesihnen mwohn mwoahlo, oh pwuhk kan* papahkpeseng. Ahpw pil ehu pwuhk* papahkpeseng; iei pwuhken mour.+ Me melahr akan ahpw pakadeingkihda soahng kan me ntinting nan pwuhk ko nin duwen arail wiewia kan.+ 13 Oh sehd ahpw mweidala me melahr akan me mi loale, oh mehla oh Sousou* ahpw mweidala me melahr akan me ira kolokol, oh emenemen irail ahpw pakadeikda nin duwen arail wiewia kan.+ 14 Oh mehla oh Sousou* ahpw lekdekiong nan lehn kisiniei.+ Lehn kisiniei+ wet wehwehki mehla keriau.+ 15 Mehmen me ede sohte nting nan pwuhken mour+ pil iang lekdekiong nan lehn kisiniei.+

21 Oh I kilangada lahng kapw oh sampah kapw;+ pwe lahng en mahso oh sampah en mahso sohralahr,+ oh sehd+ pil sohla mie. 2 I pil kilangada kahnimw sarawio, Serusalem Kapw, me kohkohdi sang nanleng, sang rehn Koht+ oh onopadahr duwehte lih kamwohd men me kapwatadahr ong eh pwoud.+ 3 Ngehi eri rongada ngihl ehu sang ni mwoahlo me mahsanih: “Kilang! Impwal en Koht mi rehn aramas akan, oh e pahn ketiket rehrail, oh re pahn wiahla sapwellime aramas. Oh pein Koht pahn kin ketiket rehrail.+ 4 Oh e pahn ketin limwihasang pilen masarail kan koaros,+ oh mehla solahr pahn wiawi,+ solahr mwahiei, solahr sengiseng oh solahr medek.+ Mehkan en mahso sohralahr.”

5 Oh Ih me ketiket nan mwoahlo+ ketin mahsanih: “Kilang! I wiewiahda mehkoaros en kapw.”+ E pil ketin mahsanih: “Ntingihedi, pwe mahsen pwukat me likilik* oh mehlel.” 6 Oh e ketin mahsanihong ie: “Mahsen pwukat pweidahr! Ngehi me Alpa oh Omeka,* me tapi oh imwi.+ Mehmen me men nimpildahr, I pahn kihong pwe en nimasang utuhnpihl en mour ni soh isepe.*+ 7 Mehmen me kin kalowehdi pahn sohsohki mepwukat, oh I pahn wiahla eh Koht oh e pahn wiahla nei seri. 8 Ahpw irail kan me kin masepwehk, me sohte ar pwoson,+ me kasaut oh samin, me kin kamaramas,+ me kin wia tiahk samin me pid wia nsenen pwopwoud,*+ me kin wunahni, me kin pwongih dikedik kan oh me likamw koaros,+ pwaisarail iei, re pahn mi nan leh me kin lullulki kisiniei oh suwepel.+ Met wehwehki mehla keriau.”+

9 Emen tohnleng isimen ko me kolokol pwohl isuh me diren kaimwiseklahn kalokolok isuh+ ahpw kohdo oh ndaiong ie: “Kohdo, oh I pahn kasalehiong uhk lih kamwohdo, werek en Sihmpwulo.”+ 10 Ih eri waielahng ni lapalahn nahna ileile ehu sang ni manaman en ngehn sarawi,* oh e kasalehiong ie kahnimw sarawio Serusalem me kohkohdi sang nanleng, sang rehn Koht,+ 11 me wie lingalingki lingan en Koht.+ Eh lingan duwehte takai me keieu kesempwal, duwehte takai sasper me melengileng duwehte krisdal mwakelekel.+ 12 Kehl laud oh ile ehu mie oh ewen kehl 12 mie oh tohnleng 12 kin mi ni ewen kehl ko, oh pohn ewen kehl ko eden keinek 12 en Israel ntinting ie. 13 Mie ewen kehl siluh ni palimese, oh ewen kehl siluh ni paliepeng, oh ewen kehl siluh ni palieir, oh ewen kehl siluh ni palikapi.+ 14 Kelen kahnimwo pil poahsoankihda takai 12, oh pohn takai ko mie ahd 12, eden sapwellimen Sihmpwulo wahnpoaron 12 ko.+

15 Eri me koasoakoasoiong ieo kolokol ahlek kohl pwoat me wia mehn sosohng pwe en sohngedi kahnimwo oh ewen kehl ko oh kehlo.+ 16 Kahnimwo mie keimw pahieu, oh uwen reirei oh tehlap duwepenehte. Oh e sohngkihdi kahnimwo ahleko, stadia 12,000;* uwen reirei oh tehlap oh ile duwepenehte. 17 E pil sohngedi uwen ilehn kehlo, me ilehki kiupid 144,* duwen mehn sosohng en aramas, me pil duwehte mehn sosohng en tohnleng. 18 Eri kehlo wiawihkihda sasper,+ oh kahnimwo wiawihkihda kohl tohr duwehte kilahs mwakelekel. 19 Poahsoan kan en kelen kahnimwo kapwatki soangsoangen takai kesempwal kan: keieun poahsoano iei sasper, keriauo sapair, kesiluhwo kalsedoni, kapahieuo emerald, 20 kelimauwo sardoniks, keweneuwo sardius, keisuhwo krisolaid, kawaluhwo peril, keduwauwo topas, kaeiseko krisopreis, kaeisek ehuwo aiasin oh kaeisek riauwo amedist. 21 Oh pil, perl 12 me wia ewen kehl 12; ehuehu ewen kehl ko wiawihkihda perl ehu. Oh ahllap en kahnimwo kohl tohr, duwehte kilahs mwakelekel.

22 I sohte kilangada tehnpas sarawi ehu nan kahnimwo, pwe Siohwa* Koht me Keieu Manaman+ oh Sihmpwulo me wia tehnpas sarawi en kahnimwo. 23 Oh kahnimwo sohte anahne ketipin de pil maram pwe en dakerada, pwe lingan en Koht me kin kamarainih,+ oh Sihmpwulo me wia lamp en kahnimwo.+ 24 Oh wehi kan pahn weweidki marain en kahnimwo,+ oh nanmwarkien sampah kan pahn wahla ar lingan nan kahnimwo. 25 Ewen kehl kan sohte mwahn pahn ritidi ni rahn, oh wasao sohte mwahn pahn kin nipwong.+ 26 Lingan oh wahu en wehi kan pahn wisikdohng nan kahnimw wet.+ 27 Ahpw mehkot samin oh mehmen me kin wia mehkot saut oh kin likamw sohte mwahn pahn pedolong loale;+ ihte irail kan me ntingdi nan sapwellimen Sihmpwulo pwuhken* mour me pahn pedolong.+

22 Tohnlengo pil kasalehiong ie pillap en pilen mour+ me mwakelekel duwehte krisdal, me pwilipwilsang ni mwoalen Koht oh Sihmpwulo+ 2 pwilipwildilahng nanwerengen ahllap en kahnimwo. Ni pali koaros en pillapo mie tuhkehn mour me kin kapwarehda wah pak 12 nan pahr ehu, me wehwehki re kin wa ehuehu sounpwong. Oh tehntuhke ko iei ong kamwahwihala tohnwehi kan.+

3 Oh solahr pahn mie keria. Ahpw mwoalen Koht oh Sihmpwulo+ pahn mi nan kahnimwo, oh sapwellimen Koht ladu kan pahn kin papah ih; 4 oh re pahn kin kilang silangi,+ oh mware pahn kin ntinting ni temwarail kan.+ 5 Pil solahr pahn mie nipwong,+ oh re sohte pahn anahne marain en lamp de pil marain en ketipin, pwe Siohwa* Koht pahn ketin kamarainih irail,+ oh re pahn kakaun nin duwen nanmwarki kei kohkohlahte.+

6 E ahpw ndaiong ie: “Mahsen pwukat me likilik* oh mehlel;+ Siohwa,* Koht me kin ketin kamwakid soukohp ako en koasoi,+ ketin poaronedohr sapwellime tohnleng pwe en kasalehiong sapwellime ladu kan soahng kan me uhdahn pahn wiawi ni ahnsou keren. 7 Kilang! I pahn mwadang kohwei.+ Meid peren mehmen me kin kapwaiada mahsen en kokohp en pwuhk* wet.”+

8 Eri ngehi, Sohn, me rongorong oh kilikilang mepwukat. Ni ei rongada oh kilangada mepwukat, I ahpw poaridi ni nehn tohnlengo me kasalehiong ie mepwukat pwe I en kaudokiong. 9 Ahpw e ndaiong ie: “Kanahieng! Ke dehr wia men! I wiahte ladu men, duwehte kowe oh riomw kan me wia soukohp oh irail kan me kin kapwaiada mahsen en pwuhk wet. Kaudokiong Koht.”+

10 E pil ndaiong ie: “Ke dehpa katengehdi mahsen en kokohp en pwuhk wet, pwe ahnsou me kileldier kerendohr. 11 Mehmen me suwed en wiewiahte me suwed, oh mehmen me samin en wiewiahte eh samin; ahpw mehmen me pwung en wiewiahte me pwung, oh mehmen me sarawi en wiewiahte me sarawi.

12 “‘Kilang! I pahn mwadang kohwei, oh keting me I pahn kihda mi rehi, pwe I en dupuk ong emenemen nin duwen eh wiewia.+ 13 Ngehi me Alpa oh Omeka,*+ me keieu oh me keieu mwuri, me tapi oh imwi. 14 Meid peren irail kan me kamwakeledahr ar likou reirei,+ pwe ren ahneki pwuhng en kohla ni tuhkehn mour+ oh pwe ren kak pedolong nan kahnimwo ni ewen kehl ko.+ 15 Irail akan me mihmi likin kahnimwo iei, kidi kan,* irail kan me kin wunahni, me kin wia tiahk samin me pid wia nsenen pwopwoud,* me kin kamaramas, me kin pwongih dikedik kan, oh koaros me kin mwahuki likamw oh wiahda likamw.’+

16 “‘Ngehi, Sises, me kadarewei nei tohnleng men pwe en kadehdehiong kumwail duwen mepwukat ong mwomwohdiso kan. Ngehi me peneinei* oh kadaudok en Depit+ oh usuhn rahn lingaling.’”+

17 Oh ngehn sarawi* oh lih kamwohdo+ kin pousehlahte mahsanih, “Kohdo!” oh mehmen me kin rong en nda, “Kohdo!” oh mehmen me men nimpilda en kohdo;+ oh mehmen me men ale pilen mour a en ale ni soh isepe.+

18 “I kin kadehdehiong koaros me kin rong mahsen en kokohp en pwuhk wet: Ma mehmen kapatahiong mehkot nan mahsen pwukat,+ Koht pahn ketin kapatahiong ih kalokolok kan me ntingdi nan pwuhk wet;+ 19 oh ma mehmen kihsang mehkot nan mahsen kan en pwuhk en kokohp wet, Koht pahn ketikihsang pwaise nin tuhkehn mour+ oh sang ni kahnimw sarawio,+ me iei soahng kan me ntingdier nan pwuhk wet.

20 “Me ketin kadehdehda mepwukat mahsanih, ‘Ei, I pahn mwadang kohwei.’”+

“Amen! Komw ketido, Kaun Sises.”

21 Kadek sapan en Kaun Sises en kin ieiang aramas sarawi kan.