July

Soahng koaros me Sises mahsanih oh wiahda, iangahki manaman kan, kasalehda ni unsek dahme Semeo kin ketin medewe oh pehm. (Sohn 14:9) Dahme kitail kak sukuhlkihsang sapwellimen Sises manaman kan? Sises oh Semeo uhdahn ketin poakohng kitail. Erein eh ketiket nin sampah, Sises ketin kasalehda uwen laud en sapwellime limpoak ong aramas akan sang ni eh doadoahngki sapwellime manaman kapwuriamwei pwehn sewese irail me lokolok kan. Ehu ahnsowo, ohl maskun riemen peki en ketin sewese ira. (Mad. 20:​30-34) Tehk me Sises ketin “poakeirahla” oh eri ketin kamwahwihirahla. Wasaht, lepin lokaiahn Krihs me kawehwehdiong “poakeirahla” kin dokedoke pepehmo me emen kin ahneki ni eh uhdahn poakehla meteikan. Soangen pepehm laud wet iei limpoak me Sises ketin kasalehiong aramas akan, me pil kamwakid ih en ketin kamwenge me duhpeklahr oh kamwahwihala me tokutok kan. (Mad. 15:32; Mark 1:41) Kitail kak uhdahn kamehlele me Siohwa, Koht en “kupwurkalahngan,” oh sapwellime Ohlo uhdahn ketin poakohng kitail oh kupwurtoutoukihla atail kin lokolok. (Luk 1:78; 1 Pit. 5:7) Ira uhdahn ketin kupwurki ketikihsang kahpwal kan koaros me kin kahpwalihala aramas akan! w23.04 3 ¶4-5

Kitail kak wia uwen atail kak en soikala wadek oh rong madamadau sapwung kan me aramas tohto ahneki nan ahn Sehdan sampah. Kitail kak audehkihda atail madamadau soahng mwahu kan sang ni atail wadek oh onopki Paipel. Atail towehda mihting kan oh doadoahk en kalohk pahn pil pere atail madamadau. Oh Siohwa ketin inoukihda me e sohte pahn ketin mweidohng kitail en lelohng songosong me kitail sohte kakohng. (1 Kor. 10:​12, 13) Emenemen kitail anahne kalaudehla atail kapakap pwehn lelepekohngete Siohwa erein imwin rahn apwal pwukat. Siohwa ketin kupwurki kitail en ‘kasalehiong ih atail apwal akan.’ (Mel. 62:8) Kapinga Siohwa oh kalahngankihong soahng koaros me e kin ketin wia. Peki en ketin seweseiuk en eimah nan kalohk. Peki en ketin seweseiuk dadaur pahn kahpwal kan oh pelian kasongosong kan me ele ke ahneki. Dehr mweidohng mehkot de emen en kauhiukedihsang omw en kaukaule kapakapohng Siohwa. w23.05 7 ¶17-18

Dahme kahrehda kitail kin iang towehda mihting en mwomwohdiso kan? Kahrepe keieu, pwe kitail en kapinga Siohwa. (Mel. 26:12; 111:1) Kitail pil kin towehda mihting kan pwe kitail en kak kangoange emenemen ni ahnsou apwal pwukat. (1 Des. 5:11) Ni atail kin kauwada pehtail kan oh pasapeng, kitail kin wia soahng riau pwukat. Ahpw ni atail kin pasapeng, ele kitail kin apwalki soahng kei. Ele kitail kin salohki pasapeng, de kitail kin uhdahn men pasapeng pak tohto ahpw ekei pak brother kan sohte kin pilkitailda ni atail kauwada pehtail. Wahnpoaron Pohl koasoia me kitail anahne medemedewehte en “kangoange emenemen.” Kitail pahn sohla nohn saloh en kihda pehtail ma kitail tamataman me kitail kak kangoange meteikan sang atail wia pasapeng mengei ehu me kasalehda atail pwoson. Oh ma kitail sohte kin kalapw likwerda, kitail kak perenki me meteikan nan mwomwohdiso kak pasapeng.—1 Pit. 3:8. w23.04 20 ¶1-3

Nanmwarkio wiadahr pakair ehu! Mehn Suhs kan me sensel nan Papilon erein sounpar 70, saledeklahr pwehn pwurala nan sapwarailo Israel. (Esra 1:​2-4) Siohwa kelehpw me kak ketin kahrehda met en wiawi. Mehn Papilon kan sohte kin kasaledekihala neirail me sensel kan. (Ais. 14:​4, 17) Ahpw Papilon lohdier, oh kaun kapwo padahkihong mehn Suhs kan me irail kakehr kohkohsang sahpwo. Mehn Suhs koaros, ahpw mehlel tapwin peneinei kan, anahne wiahda pilipil ehu: ren kohkohsang Papilon de ren mihmihte. Ele e sohte mengei en wiahda pilipil wet. Ele me tohto rehrail mahlahr mehlel pwehn wia seiloako. Oh pwehki pali laud en mehn Suhs ko ipwidi Papilon, irail saikinte kousoan ehu wasa tohrohr. Ong irail, Israel wiahte sapwen arail pahpa kahlap en mahs ko. Ekei mehn Suhs ko kepwehpwelahr nan Papilon, eri e kakete apwal ong irail en kohkohsang imwarail oh arail pesines mwahu ko oh kousoanla ehu wasa me re sahn. w23.05 14 ¶1-2

Mahsen en Koht kangoange kitail en pousehlahte kakairada irair en dadaurete, poakehla meteikan, oh limpoak. Luk 21:19 mahsanih: “Ni amwail pahn kin dadaurete, kumwail pahn doarehla amwail mour.” Kolose 3:12 mahsanih: “Pwuhriong nan limpoak me kin mwekidki poakehla.” Oh 1 Deselonika 4:​9, 10 mahsanih: “Pwe Koht ketin padahkihong kumwail en poakohng emenemen. . . . Ahpw se kangoangei kumwail, riat ko, kumwail wonlahte kalaudehla amwail kin wiewia met.” Mahsen pwukat koaros ntingdi ong tohnpadahk ko me kasalehdahr irair en dadaurete, poakehla meteikan, oh limpoak. Ahpw, irail anahne doulahte kalaudehla irair pwukat. Kitail anahne wia soahngohte. Pwehn sewese iuk, medemedewe ia duwen tepin Kristian ko ar kasalehda irair pwukat. Mwuhr, ke pahn kilang ia duwen omw kak alasang irail oh kadehdehda me ke onopadahngehr kahn kamakam kowahlapo. Eri ni ahnsou me kahn kamakam kowahlapo tepida, ke pahn eseier ia duwen omw pahn dadaurete oh pahn koasoanehdi teng en pousehlahte wia met. w23.07 3 ¶4, 8

Sohte lipilipil ma kitail me keidi kei, de “sihpw teikan,” kitail anahne kekeidte nan “Ahl en Sarawi.” Met pahn sewese kitail en doulahte kaudokiong Siohwa ahnsou wet oh pil ni ahnsou kohkohdo, ahnsou me Wehio pahn wahdo irair kaselel kan nin sampah. (Sohn 10:16) Sangete pahr 1919, ohl, lih, oh seri rar rar kei kohkohsangehr Papilon Lapalap, pelien lamalam likamw koaros nin sampah, oh tepida keid nan ahlo. Ni mehn Suhs kan ar kohkohsang Papilon, Siohwa ketin tehk mwahu me e pahn ketikihsang pohn ahlo mehn kerempwa kan. (Ais. 57:14) Ahpw ia duwen “Ahl en Sarawi” en atail ahnsou? Sounpar epwiki kei mwohn pahr 1919, Siohwa ketin tepida doadoahngki ohl akan me uhdahn wauneki ih ren kamwakelehda ahlo me kohsang Papilon Lapalap. (Pil kilang Aiseia 40:3.) Irail wiahda doadoahk kan me anahn pwe mwuhr aramas akan me ahneki mohngiong mehlel en kak kohkohsang kaudok likamw oh en iang sapwellimen Siohwa aramas akan kaudokiong ih. w23.05 15-16 ¶8-9

Siohwa kin ketin kupwurki kitail en perenki oh pil nsenki papah ih. (2 Kor. 9:7) Ahpw kitail anahne pousehlahte nantihong lel atail mehn akadeio ma kitail sohte men? Medewehla ahn wahnpoaron Pohl mehn kahlemeng. E koasoia: “I kin kaloke paliwereiet oh kaunda duwehte lidu men.” (1 Kor. 9:​25-27) Pil ni ahnsou me Pohl sohte inengieng wia dahme Siohwa ketin kupwurki en wia, e kin idingkihong pein ih en wia. Ia duwe, Siohwa ketin kupwurperenki dahme Pohl wia ong ih? Ei uhdahn! Oh Siohwa pil ketin katingiheki eh nannanti. (2 Tim. 4:​7, 8) Duwehte met, Siohwa kin ketin kupwurperenki ni eh mahsanih atail nannanti en lel atail mehn akadei, pil ni ahnsou me kitail sohte ahneki ineng en wia met. E ketin kupwurperenki met pwehki e ketin mwahngih me mehnda ma kitail sohte kin ahnsou koaros perenki dahme kitail wiewia, kitail kin wiahte met pwehki kitail poakohng ih. Duwehte Siohwa eh ketin kapaiahda Pohl, E pil pahn ketin kapaikitailda pwehki atail nannanti. (Mel. 126:5) Oh ni atail pehm sapwellimen Siohwa kapai kan, kitail pil kakete tepida ahneki ineng en lel atail mehn akadeio. w23.05 29 ¶9-10

Wahnpoaron Pohl kapahrekiong irail kan me sohte pahn pitsang rahnen Siohwa aramas akan me kin meir. Irail sohte kin kehn ahnsou de dahme kin wiewiawi limwahrail. Kahrehda, re sohte ese ahnsou me mehkot kesempwal wiawi oh sohte kak mwekidki. Pali laud en aramas akan rahnwet kin duwehte aramas akan me memeir. (Rom 11:8) Irail sohte kamehlele mehn kadehde kan me kitail miher ni “imwin rahn akan” oh me kahn kamakam kowahlap kerendohr. (2 Pit. 3:​3, 4) Ahpw rahn koaros, e kin uhdahn kesempwal ong kitail en kin wie pepehd. (1 Des. 5:6) Kahrehda, kitail anahne kolokol atail koahiek en madamadau oh sohte masepwehk. Dahme kahrehda? Pwehki kitail en dehr pidada soahng kan me palien politik de aramas akan kin pwunodki rahnwet. Kasongosong en kin uhki pali kan nan irair pwukat pahn laudla ni rahnen Siohwa eh kerendohr. Ahpw kitail en dehr pwunodki ia duwen atail pahn mwekidki met. Sapwellimen Koht manaman kak sewese kitail en ahneki madamadau meleilei oh sohte masepwehk oh en wiahda pilipil mwahu kan.—Luk 12:​11, 12. w23.06 10 ¶6-7

Dahme ke kin medewe ni omw rong ahdo Samson? Ele ke kin medewe duwen ohl emen me uhdahn kehlail. Ei mehlel. Ahpw Samson wiahda pilipil sapwung ehu me kahrehda e lelohng lokolok laud. Mendahki met, Siohwa ketin kilangwohngete ahn Samson lelepek, oh ketin mweidohng eh mehn kahlemeng en kileldi nan Paipel pwe kitail en paiekihda. Siohwa ketin doadoahngki Samson en kapwaiada soahng kapwuriamwei kan pwehn sewese sapwellime aramas akan, mehn Israel. Sounpar epwiki kei mwurin Samson mehla, Siohwa ketin kaweid wahnpoaron Pohl en kilelehdi eden Samson en iangete eden irail kan me ahneki pwoson laud. (Ipru 11:​32-34) Ahn Samson mehn kahlemeng kak kangoange kitail. Samson kin koapworopworki Siohwa, pil erein ahnsou apwal kan. Kitail pahn koasoiapene dahme kitail kak sukuhlkihsang Samson oh ia duwen eh mehn kahlemeng eh kak kangoange kitail. w23.09 2 ¶1-2

Kitail kak kakehlaka atail dadaurete sang ni atail kin kalapw kapakapohng Siohwa oh padahkihong atail kapwunod kan koaros. (1 Des. 5:17) Ele sohte omw kahpwal laud ahnsou wet. Ahpw ia duwe, ke kin peki sapwellimen Siohwa sawas ahnsou sohte lipilipil me ke kin nsensuwed, de sehsehla dahme ke pahn wia? Ma ahnsou wet ke kin kalapw kapakapkihong Siohwa omw kahpwal tikitik kan, ke sohte pahn pweiek en wia met ni omw lelohng kahpwal laud kan ni ahnsou kohkohdo. Eri, ke pahn uhdahn likih me e uhdahn ketin mwahngih iahd oh ia duwen eh pahn ketin seweseiuk. (Mel. 27:​1, 3) Ele kitail pahn kak dadaurete pahn kahn kamakam kowahlapo ma kitail kin dadaurete pahn kahpwal kan rahnwet. (Rom 5:3) Dahme kahrehda kitail kak ndahki met? Riatail Kristian tohto koasoia me ehuehu ahnsou me re kin dadaur pahn kahpwal laud ehu, met kin sewese irail en dadaurete pahn kahpwal kan mwuhr. Arail dadaurete kin kalaudehla arail pwoson me Siohwa ketin kupwurki sewese irail. Oh arail pwoson kin uhd sewese irail en dadaur pahn kahpwal en mwurio.—Seims 1:​2-4. w23.07 3 ¶7-8

Sapwellimen Siohwa aktikitik oh poakehla meteikan kin kamwakid en ketin madamadau toupahrek. Karasepe, Siohwa ketin kasalehda ia uwen eh aktikitik ni ahnsou me e pahn kereniong ketin kasohrehla aramas suwed kan nan Sodom. Ni eh ketin doadoahngki sapwellime tohnleng kan, Siohwa mahsanihong ohl lelepeko Lohd en tangala ni nahna kan. Lohd masak kohla wasao. Eri e peki me ih oh eh peneineio en kohla Soar, kisin kahnimw ehu me Siohwa ketin pilada en kasohrehla. Siohwa kakete ketin idingkihong Lohd en idawehnte dahme E mahsanihong. Ahpw e ketin mweidohng Lohd en kohla Soar, oh E sohte kasohrehla kahnimwo. (Sen. 19:​18-22) Sounpar epwiki kei mwuhr, Siohwa ketin poakehla mehn Ninipe kan. E ketin kadarala soukohp Sona Ninipe pwehn padahkihong aramas suwed ko me irail oh arail kahnimwo pahn kasohrala. Ahpw ni ahnsou me mehn Ninipe ko koluhla, Siohwa ketin poakeirailla oh sohte kasohrehla kahnimwo.—Sona 3:​1, 10; 4:​10, 11. w23.07 21 ¶5

Dahme kitail kak sukuhlkihsang mehn kahlemeng en Sohas? E duwehte tuhke pwoat me kalewe kan pedeped oh anahne lepin tuhke pwoat en utungada. Mwurin Sehoiada me kin utung ih mehla, oh Sohas tepida rong irail kan me uhwongada oh kesehla kaudok mehlel, e sohla lelepek ong Siohwa. Karasaras wet kasalehda me kitail en dehr peikiong Koht ihte pwehki atail peneinei de meteikan nan mwomwohdiso wiahda mehn kahlemeng mwahu ong kitail. Pwe kitail en mi karanihte Siohwa, kitail anahne kakehlaka atail poakohng oh wauneki ih sang ni atail kin kaukaule onopki Paipel, doudouloale, oh kapakap. (Ser. 17:​7, 8; Kol. 2:​6, 7) Siohwa sohte ketin kasik kitail en wia laudsang dahme kitail kakohng. Dahme e ketin kasik sang kitail iei me Eklesiasdes 12:13 mahsanih: “Lemmwiki Koht, oh kapwaiada sapwellime mahsen, pwehki ih kahrepe wet me aramas kepikipikihda.” Ni atail lemmwiki Koht, kitail pahn kak loalopwoatohngete ih, sohte lipilipil dahme pahn wiawi ni ahnsou kohkohdo. Sohte mehkot pahn kak kauwehla atail nanpwungmwahu rehn Siohwa. w23.06 19 ¶17-19

Iretikitik 5 tepikihda met: “Meno me ketiket nan mwoahl ketin mahsanih.” (Kaud. 21:5a) Mahsen pwukat kesempwal pwehki nan pwuhken Kaudiahl, ahnsou siluhte me pein Siohwa ketin mahsen, oh met wia ehu ahnsou ko. Eri kaidehn tohnleng men de pil Sises me ketin wiahda inou wet, ahpw pein Siohwa! Met kadehdehda me kitail kak uhdahn kamehlele dahme e ketin mahsanih mwuri. Dahme kahrehda? Pwehki Siohwa “sohte kak ketin likamw.” (Taitus 1:2) Eri mahsen kan me kitail wadek nan Kaudiahl 21:​5, 6 pahn uhdahn pweida. Siohwa ketin mahsanih; “Kilang!” Lepin lokaiahn Krihs me kawehwehdiong “kilang!” kin kalapw pwarada nan pwuhken Kaudiahl. Dahme Koht mahsanih mwuri? E ketin mahsanih: “I wiewiahda mehkoaros en kapw.” Mehlel, Siohwa pahn ketin wiahda wekidekla pwukat ni ahnsou kohkohdo. Ahpw ong ih, inou pwukat pahn uhdahn pweida me kahrehda ni eh ketin mahsanih duwen wekidekla pwukat, e mwomwen me wekidekla pwukat wiawiher.—Ais. 46:10. w23.11 3-4 ¶7-8

Wahnpoaron Piter kin apwalki powehdi eh luwet akan. Medewehla ekei karasepen met. Ni Sises eh ketin kawehwehda mwomwen eh pahn lokolok oh pwoula pwehn kapwaiada kokohp en Paipel, Piter patohwanohng me met sohte pahn wiawi. (Mark 8:​31-33) Piter oh wahnpoaron teiko kin pwurupwurehng akamaiki ihs me keieu lapalap nanpwungarail. (Mark 9:​33, 34) Nipwongo mwohnte Sises ketin pwoula, Piter pelehsang salengen emen ohl. (Sohn 18:10) Pil nipwongohte, Piter uhdahn masakada dahme aramas akan pahn medewehki ih kahrehda e kahmahmkihla kompoakepaho Sises pak siluh. (Mark 14:​66-72) Met kahrehiong ih en sengiseng kowahlap. Sises sohte ketin meliehla sapwellime wahnpoarono me uhdahn mworusala. Mwurin Sises eh ketin iasada, e ketin wiahda ahnsou ong Piter pwehn kamehlelehiong me e ketin poakepoakehte ih. Sises ketin luke Piter en papah nin duwen silepen sapwellime sihpw kan ni aktikitik. (Sohn 21:​15-17) Piter pwungki wia met. E mihmi Serusalem ni rahnen Pendekos oh iangete irail kan me tepin keikihdi sapwellimen Koht manaman. w23.09 21-22 ¶6-7

Wahnpoaron Piter kangoangehki ienge elder kan: “Kumwail wia silepen sapwellimen Koht pelin sihpw.” (1 Pit. 5:​1-4) Ma kowe elder men, se ese me ke poakohng riomw Kristian kan oh men apwalih irail. Ahpw, ele ekei pak ke pehm me ke uhdahn kedirepw de uhdahn pwangada me kahrehda ke sohte kak kapwaiada pwukoau. Dahme ke kak wia? Padahkihong Siohwa omw pepehm. Piter ntingihedi: “Ma emen kin papah, a en wia met ni eh pahn kin koapworopworki kehl me Koht ketikihda.” (1 Pit. 4:11) Riomw Kristian kan ele lelohng kahpwal kan me sohte kak mwahula ahnsou wet. Ahpw tamatamante me “silepe lapalap en sihpw kan,” Sises Krais, kak ketin sewese irail laudsang me ke kak wia. E kak ketin wia met rahnwet oh pil nan sampah kapwo. Koht ketin kupwurki elder kan en poakohngete riarail kan, apwalih irail, oh wiahla “mehn kahlemeng ong pelin sihpwo.” w23.09 29-30 ¶13-14

Kitail dehr doadoahngki madamadau en aramas me kin pohnsehsehla sapwellimen Siohwa kosonned kan pwehn kamwahwihala kahpwalo. Ma kitail ahneki soangen madamadau wet, kitail pil kak tepida pohnsehsehla Siohwa oh sapwellime kosonned kan. (1 Kor. 3:19) “Erpit en sampah wet” kin kalapw kamwakid aramas akan en sapeikiong Koht. Ekei Kristian kan nan Perkamum oh Daiadaira tepida ahneki madamadau en aramas akan wasao me kin kaudokiong dikedik kan oh wia tiahk samin. Sises ketikihong mwomwohdiso riau pwukat kaweid kehlail pwehki irail kin mweidohng tiahk samin me pid wia nsenen pwopwoud en wiawi. (Kaud. 2:​14, 20) Rahnwet, aramas akan kak song en kamwakid kitail en pwungki madamadau sapwung kan. Tohn atail peneinei oh meteikan me kitail ese kak song en kamehlelehiong kitail me kitail nohn kakos oh kangoange kitail en wekidala atail madamadau. Karasepe, irail kak nda me e sohte uhdahn kesempwal en kolokolete atail mwakelekel, oh me kosonned en Paipel kan solahr kadoadoahk. Ekei pak, kitail ele medewe me Siohwa sohte kin ketikihda kaweid me uhdahn sansal. Ele met kin kasonge kitail en wia “daulihala soahng kan me ntingdier.”—1 Kor. 4:6. w23.07 16 ¶10-11

Mery, inen Sises, anahne kehl pwehn wia kupwuren Siohwa. Medewehla ia uwen eh pwunod ni ahnsowo me tohnlengo Kapriel padahkihong me e pahn liseianda mendahki e saikinte pwopwoudla. Saikinte pak ehu me e pein apwalihda seri, ahpw e anahne apwalih kisin pwutako me pahn wiahla Mesaia. Oh pwehki e saikinte wia nsenen pwopwoud, ia duwen Mery eh pahn kawehwehiong eh inoun pwopwoudo Sosep duwen met? (Luk 1:​26-33) Ia duwen Mery eh alehdi kehl? E rapahki sawas sang meteikan. Karasepe, e peki Kapriel en kasalehda pil ekei ire me pid pwukoau. (Luk 1:34) Sohte pwand mwurin mwo, e seiloakla “wasa nahnahn sahpwo” nan Suda pwehn mwamwaitih kisehu Elisapet. Elisapet kapinga Mery oh Siohwa ketin doadoahngki pwehn ehukihong Mery kokohp kangoango me pid nein Mery kisin pwutako me saikinte ipwidi. (Luk 1:​39-45) Mery koasoia me Siohwa “ketin wiahkihda lime roson soahng kapwuriamwei kan.” (Luk 1:​46-51) Sang ni eh ketin doadoahngki Kapriel oh Elisapet, Siohwa ketin kakehlakahda Mery. w23.10 14-15 ¶10-12

Ekeite sapwellimen Krais tohnpadahk kan me keikihdi sapwellimen Koht manaman, oh irail ahneki nanpwungmwahu tohrohr rehn Siohwa. Irail meh 144,000 pwukat pahn iang Sises papah nin duwen samworo kei nanleng. (Kaud. 14:1) Wasa Sarawio nan impwalo kin karasaraskihong arail pwekipwekda nin duwen sapwellimen Koht seri kei ni arail mi nin sampah. (Rom 8:​15-17) Wasa Sarawihe en impwalo kin karasaraskihong nanleng, wasa me Siohwa kin ketiket ie. “Kahdengo” me katohrepeseng Wasa Sarawio sang Wasa Sarawiheo kin karasaraskihong kahlepen Sises. Ma e wia aramaste oh ahneki paliwar uduk, e sohte kak kohdahla nanleng nin duwen Samworo Lapalap en sapwellimen Siohwa tehnpas sarawi lapalapo. Sang ni eh ketin tounmeteikihla eh mour ong aramas akan, Sises ketin ritingadahng Kristian keidi kan koaros ong mour nanleng. Irail pil anahne sohla ahneki paliwar uduk pwehn ale ketingparail nanleng.—Ipru 10:​19, 20; 1 Kor. 15:50. w23.10 28 ¶13

Kidion kin meleilei ni mehn Epraim ko ar kauwe ih. (Sounkopwung 8:​1-3) E sohte lingeringer ni eh sapeng irail. E kasalehda aktikitik ni eh rong arail kaulim oh pil sang ni eh lokaia kadek ong irail. Met kameleileiraildi. Elder kan me erpit kin alasang Kidion sang ni arail rong kanahieng oh sapeng ni meleilei ma meteikan kauwe irail. (Seims 3:13) Irail eri kin sewese wiahda popohl nan mwomwohdiso. Ni meteikan ar kapinga Kidion pwehki eh kalowehdi mehn Midian kan, e patohwanohng Siohwa kaping koaros. (Sounkopwung 8:​22, 23) Ia duwen ohl akan me idihdida ar kak alasang Kidion? Irail anahne kapinga Siohwa pwehki soahng kan me irail wiahda. (1 Kor. 4:​6, 7) Karasepe, ma meteikan kin kapinga elder men pwehki eh koahiek en padahk, e kak nda me kaweid ko kohsang Mahsen en Koht oh me kitail koaros kin ale kasukuhl sang pwihn en Siohwa. Elder kan kak medewe ma irail kin wia padahk ni ahl me kin kawauwih Siohwa, de ma irail kin wia met pwehn wahdo kaping ong irail. w23.06 4 ¶7-8

Ma kitail sohte alehdi dahme kitail peki nan atail kapakap, ele kitail kak pein idek rehtail, ‘E pwung dahme I kapakapkio?’ Kitail kin kalapw medewe me kitail ese dahme keieu mwahu ong kitail. Ahpw soahng kan me kitail peki ele sohte uhdahn mwahu ong kitail. Ma kitail kapakapki duwen kahpwal ehu, ele mie ehu ahl en kamwahwihala kahpwalo me mwahusang dahme kitail peki. Oh mwein ekei soahng kan me kitail peki sohte pahrekiong kupwuren Siohwa. (1 Sohn 5:14) Karasepe, medewehla karasaras en pahpa nohno kan me kapakapkihong Siohwa me neirail serio en mihmihte nan padahk mehlel. E mwomwen me arail kapakapo pwung. Ahpw Siohwa sohte pahn ketin idingkihong kitail en papah ih. E ketin kupwurki me kitail koaros, iangahki neitail seri kan, en pilada en kaudokiong ih. (Deud. 10:​12, 13; 30:​19, 20) Eri pahpa nohno kan kak peki rehn Siohwa en ketin sewese irail en sair mohngiong en neirail serio pwehn kamwakid ih en poakohng Siohwa oh wiahla kompoakepah.—Lep. Pad. 22:6; Ep. 6:4. w23.11 21 ¶5; 23 ¶12

Dahme kahrehda en kansenamwahwih meteikan wia ahl kesempwal ehu en kasalehda me kitail poakohng irail? Nin duwen me ehu pwuhk kawehwehda, lepin mahsen me Pohl doadoahngki me kawehwehdi ong “kansenamwahwih” kin wehwehki “en kesihnen limwahn emen pwehn kangoange ih ni eh mihla nan kahpwal laud.” Eri, ni atail kin kansenamwahwih riatail men, kitail kin sewese en pousehlahte papah Siohwa ni lelepek. Oh ehuehu ahnsou me kitail kin wia met, kitail kin kasalehiong me kitail poakohng ih. (2 Kor. 7:​6, 7, 13) En poakehla oh kansenamwahwih emen kin uhdahn dokpene. Ia duwen? Ni emen eh kin poakehla emen me lelohng lokolok, e kin men kansenamwahwihala aramaso oh wia mehkot pwehn sewese. Eri keieu, kitail kin poakehla, oh mwuhr kitail kin kansenamwahwih. Pohl kawehwehda me ni Siohwa eh kin ketin poakehla emen, met kamwakid Ih en ketin kansenamwahwihala. Pohl koasoia me Siohwa iei “Semen kupwurkalahngan oh Koht en kansenamwahu koaros.”—2 Kor. 1:3. w23.11 9-10 ¶8-10

Sapwellimen Krais tohnpadahk kan koaros kak kasik en lelohng kahpwal kan. Medewehla ahn wahnpoaron Pohl mehn kahlemeng. E ndaiong irail kan nan Deselonika: “Ni ahnsou me se kin mihmi rehmwail, se kin ndaiong kumwail mwowe me kitail pahn lokolongki kahpwal, oh ih me wiawi.” (1 Des. 3:4) Oh ong mehn Korint kan, e ntingihedi: “Se men kumwail en ese, riei ko, duwen kahpwal laud me se lelohng . . . Se sohte medewe me se kak mour.” (2 Kor. 1:8; 11:​23-27) Kristian kan rahnwet pil kak kasik en lelohng soangen kahpwal kan. (2 Tim. 3:12) Ni omw pwoson Sises oh tepida idawehn ih, kompoakepahmw oh kisehmw kan ele kin lemeiong uhk. Ia duwe, omw kin nantihong en kin mehlel ni mehkoaros sou kin kahrehda kahpwal ong uhk nan wasahn doadoahk? (Ipru 13:18) Ke kin lelohng uhwong sang koperment pwehki ke kin ehukihong meteikan duwen omw koapworopwor? Ahpw, sohte lipilipil soangen kahpwal dah me kitail ele lelohng, Pohl nda me kitail en kin peren. w23.12 10-11 ¶9-10

Seikop lelohng kahpwal tohto. Nein Seikop pwutak riemeno, Simion oh Lipai, kihsang wahu en ara peneineio oh mwaren Siohwa. Patehng met, ahn Seikop pwoudo me e kin poakohng, Resel, mehla nin doken eh naitikihedi neira seri keriemeno. Oh pwehki lehk laud ehu, Seikop anahne keseula nan sapwen Isip ni eh mahlahr. (Sen. 35:​16-19; 37:28; 45:​9-11, 28) Mendahki kahpwal pwukat koaros, Seikop kin pwosonte Siohwa oh sapwellime inou kan. Oh Siohwa ketin kasalehiong Seikop me E ketin kupwurperenki ih. Karasepe, Siohwa ketikihong ih soahng tohto. Oh Seikop uhdahn kalahngankihong Siohwa ni eh pwurehng kilang nah pwutako Sosep. E medewe Sosep mehla wereilahr! Ahn Seikop nanpwungmwahu keren rehn Siohwa kahrehiong ih en kak dadaur pahn eh kahpwal kan. (Sen. 30:43; 32:​9, 10; 46:​28-30) Ni atail kin kolokolete nanpwungmwahu keren rehn Siohwa, kitail pil kak pweida ni atail lelohng kahpwal kan me kitail sohte kasik. w23.04 15 ¶6-7

Nan Melkahka 23, Depit kasalehda eh koapworopworki me Siohwa ketin poakohng oh nsenohki ih. E kawehwehda nanpwungmwahu keren me ih oh Siohwa me e kin ekerki Silepe ahneki. Depit sohte kin pwunodki ni eh mweidohng Siohwa en ketin kahluwa ih, oh e kin uhdahn likih Ih. Depit ese me Siohwa pahn kin ketin kasalehiong ih sapwellime limpoak rahn koaros. Dahme kahrehiong ih en uhdahn koapworopworki met? Depit pehm me e kin epwelmwahu pwehki ahnsou koaros Siohwa kin ketikihong ih dahme e anahne. Depit pil ese me Siohwa wia kompoakepah oh me e kin ketin kupwurperenki ih. Ihme kahrehda e uhdahn kamehlele me sohte lipilipil dahme pahn wiawihong ih ahnsou kohkohdo, Siohwa pahn ketin pousehlahte apwalihala eh anahn akan koaros. Pwehki Depit likih me Siohwa ketin poakohng oh pahn apwalih, met sewese ih en dehr pwunod ahpw en kin peren oh nsenamwahu.—Mel. 16:11. w24.01 29 ¶12-13

Mwurin Mahwen Keriau en Sampah, sapwellimen Siohwa aramas akan kin kalohk ni saledek nan sahpw tohto. Ni mehlel, doadoahko uhdahn pweida. Rahnwet Pwihn me Kin Apwalih Mwomwohdiso nan Sampah Pwon kin pousehlahte rapahki kaweid sang Krais. Irail men kaweid kan me re kihong brother kan en kasalehda sapwellimen Siohwa oh Sises madamadau ong soahng kan. Oh irail kin doadoahngki sounapwalih me kin seiloak oh elder kan pwehn kihong mwomwohdiso kan kaweid. Elder keidi kan kin mi ‘nin limen Krais palimaun.’ (Kaud. 2:1) Ei mehlel, elder pwukat sohte unsek oh kin wiahda sapwung. Moses oh Sosua kin wiahda sapwung ekei pak, duwehte wahnpoaron ko. (Nemp. 20:12; Sos. 9:​14, 15; Rom 3:23) Ahpw kitail kak kilang ni sansal me Krais kin ketin kanahieng ni eh kin kaweid ladu lelepeko oh elder kan me idihdda, oh e pahn pousehlahte wia met. Eri mie kahrepe mwahu en likih kaweid kan me e ketikihda sang ni eh ketin doadoahngki irail kan me idihdda pwehn tiengla mwowe. w24.02 23 ¶13-14

Rahnwet, kitail kak kaperenda Siohwa sang ni atail kin koasoia duwen ih ni ahl ehu me kasalehda uwen atail kalahngan oh poakohng ih. Nan kalohk, atail mehn akadei iei en sewese meteikan en karanihala Siohwa oh poakohng Ih duwehte atail kin poakohng. (Seims 4:8) Kitail kin perenki kasalehiong aramas akan ia duwen Paipel eh kawehwehda duwen Siohwa, sapwellime limpoak, pwung pahrek, erpit, manaman, oh irair kaselel teikan. Kitail pil kin kapinga Siohwa oh kaperenda ih sang ni atail nantihong en kahlemengih ih. Ni atail wia met, meteikan ele pahn kilang me kitail weksang aramas en sampah suwed wet oh men ese dahme kahrehda. (Mad. 5:​14-16) Nan atail mour en ehuehu rahn ni atail iang irail doadoahk de wia soahng teikan, ele kitail kak kawehwehiong irail kahrepen atail wiewia kan. Eri, me ahneki mohngiong mehlel kan pahn men karanihala atail Kohto. Ni atail kin kapinga Siohwa ni soangen ahl pwukat, kitail kin kaperenda kupwure.—1 Tim. 2:​3, 4. w24.02 10 ¶7

Pwehn wiahla ohl Kristian koahiek men, ke anahne esehla koahiek kan me katapan. Soahng pwukat pahn seweseiuk pwehn alehdi pwukoa kan nan mwomwohdiso, pwehn ahneki doadoahk me pahn apwalihiuk oh omw peneinei, oh seweseiuk en ahneki nanpwungmwahu rehn meteikan. Karasepe, esehla mwahu wadawad oh nting. Paipel mahsanih me ohl emen me kin peren oh pweida kin wadek Paipel ehuehu rahn oh kin doudouloale. (Mel. 1:​1-3) Sang ni eh kaukaule wadek Paipel, e pahn esehla sapwellimen Siohwa madamadau, me pahn sewese ih en ahneki koahiek en madamadau oh esehla ia duwen eh pahn kapwaiada kaweid en Paipel. (Lep. Pad. 1:​3, 4) Riatail Kristian kan anahne sawas sang ohl akan me kak kihda padahk oh sawas sang Paipel. Ma ke esehla mwahu wadawad oh nting, ke pahn kak kaunopada padahk oh pasapeng kan me meteikan kak paiekihda oh kakehlaka arail pwoson. Ke pil pahn kak ntingihdi soahng kan me kak sawas me pahn sewese kakehlaka omw pwoson oh kangoange meteikan. w23.12 26-27 ¶9-11

Ni omw kin masepwehkada, doudouloale dahme Siohwa pahn ketin wia ni ahnsou kohkohdo, ahnsou me Sehdan sohla pahn mie. Kamwomwada ehu me wiawi nan prokram en mihting tohrohro 2014 kasalehda pahpa men koasoiong eh peneineio ia duwen lepin lokaia kan nan 2 Timoty 3:​1-5 eh kak wekila ma iretikitik ko uhd kohpada ia pahn mwomwen mour nan Paradais. E koasoia: “Nan sampah kapwo, e pahn mie ahnsou kaperen kan. Pwe aramas akan pahn poakohng meteikan, poakohng me mehlel, mpahi, aktikitik, pahn kin kapinga Koht, peikiong pahpa nohno kan, kin kalahnganki soahng kan, loalopwoat, uhdahn poakohng arail peneinei, men pwungki meteikan, ahnsou koaros koasoia soahng mwahu kan duwen meteikan, kak kaunda pein irail, opampap, poakohng me mwahu, likilik, uhpa meteikan, karakarahk, poakohng Koht a kaidehn en nsenohkihte nsenarail, arail poadidiong Koht kin kamwakid arail kaudok; oh ken kin patehngete soangen aramas pwukat.” Ia duwe, ke kin koasoiaiong omw peneinei de iengomw me pwoson kan ia pahn mwomwen mour nan sampah kapwo? w24.01 6 ¶13-14

Ia uwen eh kangoang en ese me Siohwa kin ketin kupwurperenki sapwellime aramas akan! Paipel mahsanih me Siohwa “kin kupwurperenki sapwellime aramas akan.” (Mel. 149:4) Ahpw ekei pak, ekei kin uhdahn mworusala me kahrehda re kin medewe, ‘Siohwa kin kupwurperenkin ie?’ Me tohto nan Paipel me kin papah Siohwa ni lelepek kin ekei pak apwalki kamehlele me Siohwa kin kupwurperenkin irail. (1 Sam. 1:​6-10; Sohp 29:​2, 4; Mel. 51:11) Paipel kasalehda ni sansal me aramas soh unsek kan kak ale sapwellimen Siohwa kupwuramwahu. Ia duwen? Kitail anahne kasalehda atail pwoson Sises Krais oh papidaisla. (Sohn 3:16) Ni ahl wet, kitail kin kasalehiong meteikan me kitail koluhkihlahr dipatail kan oh inoukihong Koht en wia kupwure. (Wiewia 2:38; 3:19) Siohwa kin uhdahn ketin kupwurperenkin kitail ni atail kin wia soahng pwukat pwehn karanihala ih. Ma kitail wia uwen atail kak en kapwaiada atail inou, Siohwa pahn ketin kupwurperenkin kitail oh wiahkin kitail kompoakepah keren.—Mel. 25:14. w24.03 26 ¶1-2

Kitail kak alasang tohnpadahk ko sang ni atail pousehlahte kalohk ni koperment kan ar nda kitail en uhdi. Kitail kak kamehlele me Siohwa pahn ketin sewese kitail en kapwaiada atail doadoahk en kalohk. Eri, kapakapki eimah oh erpit oh pil peki Siohwa en ketin seweseiuk dadaur mendahki omw kahpwal kan. Me tohto rehtail kin lokolongki soahng kan duwehte soumwahu en war de pepehm, emen me kitail poakohng mehla, kahpwal en nan peneinei, kalokolok, de kahpwal teikan. Oh soumwahu lusulus oh mahwen pil ehute kahpwalihala kahpwal pwukat. Wehkohng Siohwa uhdahn omw pepehm. Padahkihong ih omw irair duwehte omw pahn padahkihong kompoakepahmw keren men. Likih me Siohwa pahn ketin “seweseiuk.” (Mel. 37:​3, 5) En poadidiong kapakap pahn sewese kitail en “dadaur pahn kahpwal.” (Rom 12:12) Siohwa ketin mwahngih dahme sapwellime tohnkaudok kan kin lelohng—“e kin ketin karonge ar likwer.”—Mel. 145:​18, 19. w23.05 5-6 ¶12-15

Ni atail anahne wiahda pilipil kesempwal ehu, kitail anahne esehda “dahme Siohwa ketin kupwurki” oh eri mwekid pahrekiong. (Ep. 5:17) Ni atail kin diarada kaweid en Paipel kan me kitail kak doadoahngki ong atail irairo, kitail kin rapahki sapwellimen Koht madamadau ong met. Oh ni atail kin kapwaiada sapwellime kaweid kan, kitail pahn kak wiahda pilipil mwahu. “Me suwedo,” atail imwintihtio Sehdan, men kitail en kedirepwkihla soahng kan en sampah wet me kahrehda en sohla atail ahnsou en papah Koht. (1 Sohn 5:19) Kristian men kak tepida medemedewehte mwohni, sukuhl, de doadoahk a kaidehn soahng tohto me e kak wia pwehn papah Siohwa. Ma e wia met, e pahn tepida kasalehda me e ahneki madamadau en sampah. Ei mehlel, soahng pwukat sohte uhdahn sapwung, ahpw kitail en dehr wiakihla me ihme keieu kesempwal nan atail mour. w24.03 24 ¶16-17