Padahk Mehlel Kin Kawikidala Mour en Aramas Akan

E inenen kansensuwed ahpw mehlel me mour en aramas tohto nan rahnpwukat me apwal, pil kapwunod. Soahngen aramas pwukat kak rapahkihda nsenamwahu? Ekei iei aramas mwersuwed kan me kin kauwe mour en mehn mperail kan. Irail pwukat kak wiahla towe mehlel en koasoandi en aramas? Pasapeng ong peidek riau pwukat koaros iei ehi. Aramas kak wikila. Mour kan kak wikila. Wahnpoaron Pohl kasalehda iaduwen met kak wiawi ni ah ntingihdi: “Mweidohng Koht en ketin kawiliakapwala loalamwail kan unsek. Eri, kumwail ahpw pahn esehda dahme kupwur en Koht-dahme mwahu, oh dahme e kin ketin kupwurperen, oh dahme unsek.”​—⁠Rom 12:⁠2.

Mahsan pwukat “kupwur en Koht” kin katamanda dahme Sises padahkiong sapwellimen tohnpadahk kan mpen sounpar 20 samwa mwohn Pohl ntingihdi mahsan pwukat. Sises mahsanih: “Oh kumwail pahn dehdehki dahme mehlel, oh me mehlelo pahn kasaledengkumwailla.” (Sohn 8:32) En Sises mahsanih duwen “padahk mehlel,” kin wehwehki ire sarawi kan​—⁠keiou ire kan me pid kupwur en Koht​—⁠me nekinekla ong kitail nan Paipel. (Sohn 17:17) Padahk mehlel en Paipel kin uhdahn kasaledekla aramas? Mour parekiong kupwuren Koht uhdahn kin kawikila mour kan? Ehi uhdahn. Tehk ekei karasepe pwukat.

Miehla Karepen Mour

Nan ahnsou keren kan, Moises, nan Gibraltar, kin wia ohl nsensuwed men. E kosoia: “I kin kamomsakau oh meir nan ahl akan. I ahneki pepehm en sohla katepei. Pwohng koaros I kin pekih rehn Koht en kupwure ie oh en dehr mweidohng ie en lellahng rahn en mwuri. I kin sengiseng ni ahi kin idek rehn Koht karepen ahi ipwidi ma sohte katepei, sohte ahi doadoahk en mwohni, sohte ahi peneinei, oh sohte me pahn sewese ie. Ia karepen I en momour?” Eri, mehkot wiawi.

Moises pousehla kosoia: “I ese me Koht sapengla ahi kapakap ni ahnsou me I tuhwongada Roberto, emen Sounkadehde kan en Siohwa. Roberto kihong ie ehu Paipel oh ehu kopi en sawas en onop en Paipel Dahme Koht Kupwurki Kitail En Wia?a Rahn koaros se kin onopkihpene Paipel pohn sehr me I kin meir powe ni pwohng kan. Mwurin sounpwong ehu Roberto kahreielahng ehu mihding en Sounkadehde kan en Siohwa nan Kingdom Hall en wasao. Mwurinte mwo, padahk mehlel en Paipel wikidala douluhl ahi lamalam. I sohla kin meir nan ahl akan; I pil sohla kin kamom de simwok. Ahi mour wikilahr, oh I peren. I koapwoaroapwoarki en papdaisla ahnsou mwadang oh papah Siohwa nin duwen emen sapwellime Sounkadehde kan.”

Ia uwen met wia wikila ehu! Ni ahnsou me aramas sohte kin ahneki koapwoaroapwoar, karepeo kin kalap pwehki re sehse mehkot. Re sehse duwen Koht de sapwellime kupwur kaselel kan. Duwen me wiawiong Moises, ni ahnsou me e ahnekihla loalokongo, e kihong ih kehl oh eimah en kawikila ah mour. En sounmelkahkaho kapakap ong Koht kin pasapengla rehn Moises: “Komw ketin kadarodo sapwellimomwi marain oh mehlel pwe en kahluwa ie oh pwurehng kahrehiewohng ni sapwellimomwi dohl sarawi, Saion, oh nan Tehnpasomwi, wasa komw kin ketiket ie.”​—⁠Melkahka 43:⁠3.

Nan Belize, Daniel kin ahneki soahngen eksperiens ohte. Daniel sohte kin meir nan ahl akan​—⁠ahpw e ahneki doadoahk ndand ehu. Erein sounpar 20 e kin peiong ah tengala pahn wini suwed oh kamom sakau oh mour samin. Mendahki e tikida nin duwen Kadolik men, Daniel sohte kak kilang ia karepen mour, oh e sohte kamehlele me mie Koht. E kin towehda sarawi tohto raparapahki sawas ahpw diarada me kompoakepah tohto me kin kohla sarawi oh pil iangahki ekei kompoakepah kaun en lamalam kan kin doadoahngki wini suwed oh kamom sakau. Nin doken met, ah pwoudo pahn kesehla ih.

Pwehki e pwunodada Daniel pedolong nan wasahn sewese soahngen aramas me men uhdisang doadoahngki wini suwed, kamom sakau, de soahng teikan me aramas kin tengala pah. Mendahki met, e ese me mwurin ah pahn pedoi sang nan wasaht, e pahn pil pwurehng doadoahngki wini suwed kan ma e sohte ale sawas. Ahpw soahngen sawas dah? Nan May 1996, rahn riau mwurin ah pedoi sang nan wasao, Daniel tuhwongada emen Sounkadehde kan en Siohwa oh kaluskihda pekipeko, “Menlau onopkiohng ie Paipel.” Sounkadehdeo koasoanehdi en onopkihong Daniel Paipel pak riau nan wihk ehu, oh Daniel ahnsou mwadang tepiada wikid ah mour pwehn parekiong kupwur en Koht oh wiliankihdi kompoakepah kan en mahs kompoakepah Kristian kan me sohte kin doaodahngki wini suwed de kamom sakau oh me kin liksang tiahk samin. Ihme karehda Daniel diarada me dahme Paipel mahsanih me mehlel: “Ma ke pahn padahngki mehkot sang rehn me loalokong kan, ke pahn pil loalokongla. A ma ke pahn kompoakepahnki me pweipwei kan, ke pahn ohkihla.” (Lepin Padahk 13:20) Mwurinte met, e kosoia: “Ehdin nan ahi mour me I esehda dahkot en ahneki nsenmwakelekel.” Mour en Daniel pil wikila.

Nan Puerto Rico, emen ohl pil wiahda wikila sansal. E seldi nan imweteng oh aramas kin kilangwohng me e inenen lemei, pwehki e kemehla aramas tohto. Padahk mehlel en Paipel kak kawikila? Ehi. Emen Sounkadehde kan en Siohwa kihong ih ekei makasihn Watchtower oh Awake!, oh e mwadangete pil peki ekei. Ehu onop en Paipel tepiada reh, oh nin doken padahk mehlel en Paipel tepiada kamwekidih mohngiongih, e wiahda wikidekla kan me sansal ong koaros. Ehu mehn kadehde keiou en ah wikila iei ni ah sehkla mwotomwot piten moangen reirei oh sihpisang ah alis reireio.

Paipel mahsanih me Koht kin ketin mahkikiong dipen irail kan me uhdahn koluhla mehlel oh wikidala arail mour. Pohl ntingihdi: “Kumwail sehse me aramas suwed kan sohte pahn iang sohsohki Wehin Koht?. . .Eri, ekei kumwail iang mihmi ni soangen aramas pwukat mahso, ahpw met kumwail mwakelekelsangehr dihp.” (1 Korint 6:​9, 11) Ni sohpeikidpe, mahsan pwukat kamweitala ohl menet, me pil duwehte mahsan kan en Wiewia 24:15: “Aramas koaros, me mwahu oh me suwed, pahn iasada sang mehla.” E kosoia: “I men mih wasao ni ahnsou me kaiasadahn me melahr kan pahn wiawi pwe I en kak peki mahk ong irail kan me I kemehla.”

Peneinei Kapw Ehu

Rahn ehu Luis, emen sounkalohk kaukaule en Sounkadehde kan en Siohwa nan Argentina, tuhwong ohl pwulopwul men me ahneki mour me kansensuwed. Ahnsou me e pwelel ah pahpa oh nohno kesehla ih, ih eri tikida nan imwen seri sepwoupwou tohto. Ni ahnsou me e mahki sounpar 20, e esehda iawasa me ah nohno kin kousoan ie oh e koasoanehdi me e pahn kohla mihla wasao pwehn kak kerenih ah nohno. E doadoahk laud, oh nekidala mwohni tohto, oh seiloklahng kahnimwo me ah nohno kin mihe. Ah nohno mweidohng en mih reh lau sohla nein pwutako mwohni oh eri ndaiong pwutako en kohkohla sang reh. Ah nohno kesehla ih karehong ih en men kemehla pein ih.

Ahpw, Luis ehukiong ohl pwulopwul menet padahk mehlel en Paipel. Padahk mehlelo kin oarepene koapwoaroapwoar wet: “Semei oh inei pil kak keseiehla, ahpw Kauno (Siohwa) pahn ketin apwahpwahlih ie.” (Melkahka 27:10) Pwutak pwulopwulo diarada me mie emen Seme nanleng me sohte pahn likidmeliehla. Ahnsouwet e perenki iang kisehn peneinei kapw ehu, peneinei en Siohwa.

Emen ohl nan wehiohte padahkiong emen Sounkadehde kan en Siohwa me e mwahuki makasihno Watchtower. Dahme karehda? Pwehki e doarehla ah pwopwoud. Rahn ehu ohl menet, ni ah mweselsang ah wasahn doadoahk, kilangada nan wasahn kihd ehu makasihn Watchtower me daidelo kosoia ni mesen nting laud “Mweipeseng.” Pwehki ah pwopwoud milahr nan apwal oh ih oh eh pwoudo tepiadahr doarepwehn tohrohrpeseng, e pwekada makasihno oh tepiada wadek. E wahla makasihno imweo oh iang ah pwoudo wadek. Pwopwoudo song kapwaiada kaweid en Paipel kan nan makasihno. (Epsos 12:6:⁠4) Mwurinte met, nanpwungara mwahula. Re kauhdi doarepwehn katohrohro oh ahnsouwet kin onop Paipel nin duwen pwopwoud minimin ehu.

Nan Uruguay, emen ohl me adaneki Luis sohte kin peren. Tengala pahn wini suwed kan, oh pahn ngehn saut, oh pwongih dikedik, oh kamom sakau​—⁠iei ekei soahng pwukat me kin karehda ah mour en pingiping. Ikmwuri, Luis, pwehki e uhdahn pwunodada, sohla kamehlele me mie Koht. Emen kompoakepah kihong ih pwuhko Life​—⁠How Did It Get Here? By Evolution or by Creation?b Met imwikihla e tuhwong ni ahnsou mwotomwot Sounkadehde kan en Siohwa, ahpw Luis pil mwadangete pwurelahng kamom sakau oh doadoahngki wini suwed. Ni ahnsou me e inenen nsensuwed, e diarada pein ih mwomwohd nan pwoahr ehu me dirkihla kihd, ih eri kapakap, oh wiahiong ah kapakapo “Semen Sises Krais,” pwehki e sehse ia mwaren Koht.

E pekih Koht en kasalehiong ih ma mie karepen ah mour. “Mandahn rahno,” Luis ripohtki, “emen me ih kin ese kihong ie pwuhk ehu me e sohla kin doadoahngki. Ia daidel en pwuko? Revelation​—⁠Its Grand Climax At Hand!”c Pwuhko sewese ih en sapengla ah peideko. Luis pil pwurehng kapakapki sawas en rapahkihda kaudek me pahn kasalehiong ih iaduwen en papah Koht. Ia uwen met kapwuriamwei! Pehl en ah wenihmwo sek, oh Sounkadehdehn Siohwa riemen me wie kesikesihnen likio. Luis mwadangete tepiada onop en Paipel rehrail. E kekeirada mwadang oh ahnsouwet paikihda en wia emen Sounkadehde papdais. E mourki mour mwakelekel oh kin sewese meteikan en pil rapahki karepen arail mour. Ong ih, mahsan kan en Melkahka 65:2 kin pweida: “Pwehki omwi kin ketin sapeng pekipek kan. Aramas koaros pahn pwarewei rehmwi.”

Nan Philippines, Allan kin wia emen tohnsukuhl me kin uhwong koperment. E kin iang pwihn ehu me kin songosong en “kauwehla koperment kan pwe dih kan en mwuhr en kak paikihda kopwung pwung.” Ahpw, rahn ehu, e tuhwong Sounkadehde kan en Siohwa oh sukuhlki sang nan Paipel ia kupwur en Koht ong tohnsampah. Kupwuro kin oarepene inou sarawio: “Ahnsou keren aramas suwed kan pahn sohrala;. . .a me aktikitik kan pahn sapwenikihla sahpwo oh re pahn paiamwahu oh popohl.” (Melkahka 37:​10, 11) Allan kosoia: “Ni ahnsou mwadang I diarada me dahme at pwihn kin pepeiki ahnsou wereila Paipel inoukidahier mahso. Soahng kan koaros me se kin uhdahn inengieng pahn kaitarala pahn Wehin Koht.” Allan kin ahnsouwet utungada Wehin Koht oh sewese meteikan en pwosonla padahk mehlel en Paipel.

Ehi, mour kan kin wikila ni ahnsou me aramas kin kapwaiada Mahsan en Koht, Paipel. Ni mehlel, ahnsouwo kohkohdo me tohnsampah koaros me pitila pahn kawikila arail mour kan pwehn parekiong kupwur en Koht. Ia uwen met pahn wia wikidekla ehu! Eri, kokohpo pahn pweida: “Sohte meninkou de mehkot suwed pahn mie nan Saion, sapwellimen Koht dohl sarawio. Pwe sampah pahn direkihla kupwurokong en Kauno (Siohwa), duwehte madau eh kin direkihla pihl.”​—⁠Aiseia 11:⁠9.

[Nting tikitik kan me mi pah]