Esekiel
11 Ngehn sarawi* ahpw pwekiehda oh waiehla ni ewen kelen palimese en tehnpesen Siohwa, ewen kehl me sallahng palimese.+ Wasao ni wasahn pedolong en ewen kehlo I kilangada ohl 25, oh me mi nanpwungarail iei Saasanaia nein Assur oh Pelataia nein Penaia, kaun akan en aramas ako.+ 2 Koht eri ketin mahsanihong ie: “Nein-aramas, ih ohl pwukat me koasoakoasoane soahng suwed oh kihkihda kaweid suwed nan* kahnimw wet. 3 Re ndinda, ‘E sou lelehr ahnsoun kauwada ihmw kan?+ Kahnimw wet* me einpwoat en kuk*+ oh kitail me uduk.’
4 “Eri, wia kokohp ong irail. Nein-aramas, wia kokohp.”+
5 Sapwellimen Siohwa ngehn sarawi* ahpw kohdiong pohi,+ oh e ketin mahsanihong ie: “Nda, ‘Iet me Siohwa ketin mahsanihen: “Aramas en Israel kan, dahme kumwail ndahn me pwung, oh I ese dahme kumwail medemedewe. 6 Kumwail kahrehiongehr me tohto ar mehla nan kahnimw wet, oh kumwail kadirehkilahr eh ahl akan me melahr akan.”’”+ 7 “Kahrehda iet me Kaun Wasa Lapalahpie Siohwa ketin mahsanih: ‘Paliwar mehla kan me kumwail kamwarakpeseng nan kahnimw wet iei me uduk, oh kahnimw wet iei me einpwoat.+ Ahpw kumwail me pahn kohieisang loale.’”
8 “Kaun Wasa Lapalahpie Siohwa ketin mahsanih, ‘Kumwail kin masak kedlahs,+ ahpw kedlahs me I pahn uhkihong kumwail. 9 I pahn waikumwailsang nan kahnimwet oh kihkumwailla nan pehn mehn liki kan oh kadeingkumwailda.+ 10 Kumwail pahn mehkihla kedlahs.+ I pahn kadeik kumwail ni irepen Israel,+ oh kumwail pahn anahne ese me ngehi me Siohwa.+ 11 Kahnimw wet sohte pahn wia einpwoat ong kumwail, oh kumwail sohte pahn wia uduk me mi loale; I pahn kadeik kumwail ni irepen Israel, 12 oh kumwail pahn anahne ese me ngehi me Siohwa. Pwe kumwail sohte keid nan ei koasoandi kan oh kapwaiada ei kopwung kan,*+ ahpw kumwail kin idawehn kosonned* en wehi kan me kapilkumwailpene.’”+
13 Ni ahnsowohte me I kohpada, Pelataia nein Penaia ahpw mehla, oh I poaridiong nanpwelo oh ngihl laudida patohwan: “Maing, Kaun Wasa Lapalahpie Siohwa! Komw pahn ketin kasohrehla irail kan me luhwehdi nan Israel?”+
14 Siohwa ketin pwurehng mahsanihong ie: 15 “Nein-aramas, riomw kan, riomw kan me ahneki pwuhng en pwainda sapahl, iangahki aramas en Israel kan pwon kin rongasang tohn Serusalem kan me ndinda, ‘Kumwail kadohwankumwailweisang Siohwa. Sapwat sahpwo; e kohieng kiht nin duwen sohso ehu.’ 16 Kahrehda nda, ‘Iet me Kaun Wasa Lapalahpie Siohwa ketin mahsanih: “Mendahki ei kihirailla wasa doh nan wehi kan oh I kamwarakirailpeseng nan sahpw akan,+ ahpw erein ahnsou kis I pahn wiahla wasa sarawi ehu ong irail nan sahpw kan me re kohla ie.”’+
17 “Kahrehda nda, ‘Iet me Kaun Wasa Lapalahpie Siohwa ketin mahsanih: “I pil pahn rikumwailpene sang aramas akan oh kihkumwailpene sang sahpw kan me kumwail mwarahkpeseng ie, oh I pahn kihong kumwail sapwen Israel.+ 18 Oh re pahn pwurala wasao oh kihsang eh soahng kasaut oh wiewia kasaut kan koaros.+ 19 Oh I pahn kaminiminpene mohngiongirail kan,*+ oh I pahn kihong loalarail elen madamadau* kapw;+ oh I pahn kihsang ni paliwararail kan mohngiong me kekeluwak duwehte takai+ oh kihong irail mohngiong mwuterek,*+ 20 pwe ren kak kekeid nan ei koasoandi kan oh kapwaiada ei kopwung kan* oh peikiong mepwukat. Eri irail ahpw pahn wiahla nei aramas, oh I pahn wiahla ar Koht.”’
21 “‘Kaun Wasa Lapalahpie Siohwa ketin mahsanih: “Ahpw ong irail me ar mohngiong koasoanehdi ren usehlahte wiewia ar soahng kasaut kan oh wiewia kasaut kan, I pahn kihdiong pohn moangarail kan imwilahn arail wiewia kan.”’”
22 Kerup ko eri kapapeseng ar pehnpihr kan, oh daia ko mi limwahrail,+ oh lingan en Koht en Israel mi pohnangirail.+ 23 Lingan en Siohwa+ ahpw kohdahsang nan kahnimwo oh uhdi pohn nahna me sallahng palimesehn kahnimwo.+ 24 Ngehn sarawi* ahpw pwekiehda oh waiehla rehn aramas kalipilipala ko nan Kaldia. Met wiawi nan kaudiahl me I alehdi sang sapwellimen Koht ngehn sarawi.* Mwuri kaudiahl me I kilangehro ahpw sohrasang ie. 25 Oh I tepida ndaiong aramas kalipilipala ko mehkoaros me Siohwa ketin kasalehiongieier.