16 BARAKI KU DEBORA
“N na bai ku bo”
I SEDUBA un tempu difisil na Israel. Povu rebela kontra Jeova. Suma ku Jeova avisaba elis, i ntrega elis na mon di se inimigus, nkluindu kananeus pa kilas domina elis. I ntrega elis na mon di Jabin rei di Kanaan. Si ẑeneral seduba un omi mau dimas comadu Sísera. I staba na kumanda un grupu di manga di tropas nkluindu 900 karu di gera ku tene ferus na roda.
Duranti 20 anu, tropas di Sísera ta miti israelitas medu. Parsi di kuma ora ke ataka un sidadi o prasa e ta paña bajudas i e ta bafa elis. Pabia des kusas meduñu, jintis ta mediba yanda na kamiñus prinsipal, e ta medi vivi na se tabankas e ta bai sukundi na matus ku montañas. Puku omis israelita ku teneba spada o utru materialis di gera pa difindi kel.
Na ki tempu, un minjer koraẑosu comadu Debora sirbi suma profeta di Jeova. Tambi i ta julgaba situasons difisil ku povu ta aprinsentalba. Jeova usa Debora pa i da instrusons pa un omi comadu Baraki, ki kuji pa i sedu ŝef i salvadur di si povu. Baraki dibi di fika suprendidu oca ki dal instruson di Jeova, pa i junta 10.000 omi i pa i leba elis na monti Tabor. Jeova na pul pa i ngaña Sísera ku si tropas!
Sera ki Baraki paña raiba pabia i dadu instrusons atraves i un minjer? Nau. En ves di kila, i obdisi ku umildadi, i fala i na bai monti Tabor si kontra Debora na kumpañal. Es ka signifika di kuma i ka teneba fe. Mas tardi apostolu Paulu pui nomi di Baraki entri omis ku minjeris ku teneba fe garandi. (Eb 11:1, 2, 32) Baraki staba na mostra si fe, oca ki pidi Debora pa i kumpañal juntu ku si omis. I sibiba di kuma, Jeova staba na usa Debora pa juda na gia si povu. Asin, si kila kumpaña elis i na pudi da elis mas instrusons di parti di Jeova. Ku koraẑen Debora seta bai ku elis i fala: “N na bai ku bo.” Tambi i konta Baraki di kuma, mesmu manera ki na ngaña gera, nin un omi, nin el Baraki propi ka na mata Sísera. Ma Deus konta di kuma, un minjer ku na mata Sísera.
Baraki fasi kinti-kinti ke ku Jeova falal. I junta 10.000 omi koraẑosus i purpara elis pa gera, apesar di kuma e teneba puku material di gera. I leba elis riba di monti Tabor. Es monti garandi ku parsi ku tigela ku mborka, tene kuas 600 metru di altura, i sta na zona rasu di Jizreel. Apartir des monti, Debora, Baraki, ku si omis pudiba oja Sísera ku si tropas di lunju ku na bin ku karus di gera.
Ke ku Baraki na fasi? Si kontra i staba na pensa na un planu di gera, talves i na pera tok Sísera subi ku karus di gera te na rodas di monti Tabor. Pabia ora ku karus di gera na subi na monti e na sedu lentu, i kila na pui pa i sedu mas fasil pa Baraki ku si omis geria kontra Sísera ku si tropas. Ma Baraki sukuta Debora. Atraves del Jeova fala Baraki pa i lanta i ataka! Na manera di oja di un tropa, i parsi di kuma i na sedu impusivel pa e ngaña gera di ki manera. Ma Baraki sibiba di kuma, gera i ka di sil ma i di Jeova. Ku koraẑen Baraki ku si omis ria bas di monti na zona rasu, pruntu pa nfrenta ki karus di gera ku ta miti medu!
Un ŝef ku un minjer profeta, tenba ku nfrenta un ẑeneral mau ku si tropas ku tene karus di gera.
Jeova oja se koraẑen i paga elis pa kila. I pui tropas kananeus na konfuson. I pui pa cuba cubi ku forsa. Nin i ka tarda kobon di Jizreel inci kun, i ki karus di gera ku ta miti medu kumsa ku ntola na lama. Gosi tropas di Sísera ten ku nfrenta israelitas pa e geria mon ku mon, sin ki karus di gera ke fiansaba nel. Nin un tropa di Sísera ka kapli, tudu muri. Ma ke gora di Sísera?
Sísera konsigi kapli. I kuri na lama pa ciga na kaus mas altu. Ku kobardisa i bandona si omis i kuri pa salva si vida. Ma Baraki kuri si tras pa pañal. Jeova staba na jubi. I teneba un planu kontra Sísera.
Lei es storia na Biblia:
Ŝefis 4:1-16, 23, 24; 5:1-23
Pa kombersa del:
Di kal maneras ku Baraki ku Debora mostra koraẑen?
Fasi piskisa pa ntindi minjor
1. Kuma ku vida seduba na Israel oca ku Sísera na kastigaba elis? (w15-T 1/8 paẑina 13 paragrafu 1)
2. Pabia ku Debora ka ta kontadu tudu ora suma un di 12 ŝefis ku sirbi na Israel, antis di Samuel sedu profeta? (w86-T 1/6 paẑina 31 paragrafu 6 te 8)
3. Na kal sintidu ku Debora seduba “mame na Israel”? (Ŝef 4:4, 5; 5:7; w15-T 1/8 paẑina 13 paragrafu 2) A
Diseñu A
Diseñu A
4. Ke ku Debora ku Baraki misti fala oca ke kanta kuma ‘strelas geria’ kontra Sísera? (Ŝef 5:20; w05-T 15/1 paẑina 25 paragrafu 5)
Pensa na kuma di aplika es lisons
Na kal mumentu ku un ermon pudi kopia Baraki ora ki na seta ku umildadi ajuda di un irma? B
Foto B
Pabia ku Debora pirsisaba di koraẑen pa kumpaña Baraki? Kal mumentu ku no pudi pirsisa des tipu di koraẑen?
Di kal utrus manera ku bu pudi kopia koraẑen di Baraki ku Debora?
Pensa fundu na lisons mas garandi
Ke ku es storia nsinan aserka di Jeova?
Kal ligason ku es storia tene ku intenson di Jeova?
Ke ku N na gostaba di punta Baraki ku Debora ora ke resusitadu?
Aprindi mas
Jubi kuma ku es storia nsinanu di kuma, ke ku no ta fasi pa Jeova i importanti pa rel.
Ke ku Baraki ku Debora ta nsinanu aserka di konfia na Jeova, obdisil, i rikuñisi no limitason?
“Pabia di si fe, Baraki ngaña tropas puderosu” (w03-T 15/11 paẑina 28 te 31)