Livru di Jo pudi judau ora ku bu na sufri

1-2. Ke ku manda i bon pa no lei livru di Jo?

SERA ki i ka tarda ku bu lei livru di Jo? Livru di Jo skirbidu serka di 3.500 anu atras, ma manga di jintis ta ojal inda suma un di minjoris livrus ku ciga di skirbidu. Jintis ta ngaba kin ku skirbi livru di Jo, pabia i usa palabras fasil di ntindi, tambi i usa palabras bonitu ku ta toka korson. Mesmu manera ku Moisés skirbi es livru, i Jeova Deus ku kontal ke ki dibi di skirbi. — 2 Tim 3:16.

² Livru di Jo i un parti di Biblia importanti dimas. Pabia? Pabia i ta judanu ntindi di kuma, anjus ku pekaduris dibi di disidi si kontra e na sirbi Jeova pabia di amor ke tene pa rel ku si nomi. Tambi i ta nsinanu aserka di maneras di sedu bonitu di Jeova, suma amor, jiresa, justisa ku puder. Pur isemplu, livru di Jo fala di Jeova manga di bias suma Deus ku tene tudu puder. Livru di Jo splika tambi pabia ku Deus disa sufrimentu. I ruspundi utrus purguntas importanti ku manga di jintis misti sibi resposta.

3. Ke ku no pudi aprindi di livru di Jo?

³ No pudi kompara lei livru di Jo, suma subi un montaña. Ora ku no sta riba di montaña no pudi oja di manera klaru ke ku danu volta. Ora ku no na lei livru di Jo, no pudi sibi ke ku Jeova ta pensa aserka di no sufrimentu. No na aprindi kuma ku storia di Jo juda alguns israelitas, i kuma ki pudi judanu aos tambi. No na aprindi tambi kuma ku no pudi usa livru di Jo pa juda utrus.

DEUS DISA PA JO SUFRI

4. Kal diferensa garandi ku tenba entri Jo ku alguns israelitas ku staba na Ejitu?

⁴ Jo staba na vivi na un tera comadu Uz, na tempu nunde ku israelitas seduba skravu na Ejitu. Talves Uz staba na norti di Arabia. Oca israelitas staba na Ejitu, alguns ta adoraba deusis falsu, ma Jo ka seduba suma elis. I ta sirbiba Jeova di manera fiel. (Jos 24:14; Eze 20:8) Jeova fala sin aserka di Jo: ʻI ka ten ningin na mundu ku parsi ku el.’a (Jo 1:8) Jo teneba manga di rikesa, i seduba un omi rispitadu na ki zona. (Jo 1:3) Na bardadi, Satanas pañaba raiba mal di oja es omi ku manga di jintis kunsi i rispita, na sirbi Jeova di manera fiel!

5. Pabia ku Jeova disa Jo sufri? (Jo 1:​20-22; 2:​9, 10)

⁵ Satanas falaba di kuma, si Jo na sufri, i na para sirbi Jeova. (Jo 1:​7-11; 2:​2-5) Jeova amaba Jo dimas, ma i disa Satanas pa i prova si ke ki fala aserka di Jo i bardadi o nau. (Jo 1:​12-19; 2:​6-8) Satanas mata limarias di Jo, i mata si 10 fijus, tambi i pui pa Jo tene un duensa ku manga di dur, cagas toma konta di tudu si kurpu. Ma mesmu manera ku Satanas pui pa Jo sufri ciu, Jo kontinua sirbi Jeova di manera fiel. (Lei Jo 1:​20-22; 2:​9, 10.) Dipus, Jeova kura Jo, i dal manga di rikesas ku manga di fijus. Jintis pasa rispita Jo mas. Tambi Jeova da Jo vida kumpridu, i vivi mas 140 anu, asin i pudi oja si netus ku si bisnetus. (Jo 42:​10-13, 16) Ke ku servus di Jeova na pasadu aprindi di storia di Jo? I ke ku no pudi aprindi del aos?

6. Kuma ku storia di Jo juda israelitas? (Jubi tambi diseñu.)

⁶ Kuma ku israelitas pudiba judadu. Storia di Jo judaba israelitas ku sufriba ciu na Ejitu. Pur isemplu, Josué ku Kalebi pasa se juventudi suma skravus. Dipus e dibi di viviba na disertu pa 40 anu, pabia utrus israelitas disobdisi Jeova. Asin, storia di Jo pudiba nkoraẑa israelitas ku bin vivi mas tardi. E pudiba ntindi di kuma i Satanas ku ta punu sufri, i ka Deus. E pudiba ntindi tambi, ke ku manda Deus disa pekaduris na sufri, i di kuma Jeova ama kilis ku kontinua fiel pa rel mesmu manera ke sta na pasa purblemas, tambi i na bin paga elis.

7-8. Kuma ku livru di Jo pudi juda kilis ku sta na sufri? Bu pudi da un isemplu.

⁷ Kuma ku no pudi benefisia. Infilismenti, manga di jintis aos pirdi fe na Deus, pabia e ka ntindi ke ku manda mau kusas sta na kontisi ku bon jintis. Jubi isemplu di Hazelb di Ruanda. Oca i seduba joven, i fiaba na Deus. Ma dipus, manga di mau kusas kontisi ku el. Si pape ku si mame kaba kasamenti. Si mame kasa ku utru omi, i kila ta maltratalba. Mas tardi, un omi bafal. Hazel bai pa kau ke ta fasi adorason, ma i ka risibi nin un nkoraẑamentu. Mas tardi, Hazel skirbi un karta pa Deus. I fala sin: “Deus, N oraba pa bo, N tentaba fasi bon kusas, ma bu pun na sufri. N na para adorau, i gosi N misti fasi kualker kusa ku na pun sinti filis.” No ta fika tristi di oja jintis suma Hazel, ku manga di jintis konta elis mintida aserka di Deus i e fia di kuma i Deus ku ta pui elis sufri!

⁸ Na livru di Jo no aprindi di kuma i ka Deus ku ta punu sufri, ma i Satanas. Tambi no aprindi di kuma, ora ki jintis na sufri, no ka dibi di pensa di kuma e fasi mau kusas. Biblia mostra di kuma, mau kusas pudi kontisi ku kualker algin na kualker mumentu. (Ekl 9:​11, 12; Jo 4:​1, 8) Tambi no aprindi di kuma, si no kontinua sirbi Jeova di manera fiel na mumentus difisil, no na dal oportunidadi di mostra di kuma Satanas i munturus. (Jo 2:3; Dit 27:11) No kontenti di aprindi es kusas di Biblia, pabia gosi no sibi pabia ku bon jintis ta sufri. Dipus ku Hazel studa Biblia ku Tustumuñas di Jeova i pasa ntindi di kuma i ka Deus ku pul na sufri. I fala sin: “N ora Deus utru bias, N kontal kuma propi kuma ku N sta na sinti. N falal di kuma ocan falalba di kuma N na para adoral, na bardadi, N ka mistiba fasil. N fala kila, so pabia di kuma, N ka sibiba kal tipu di algin ki sedu. N ntindi di kuma, Jeova aman, gosi N sedu filis dimas.” No ta kontenti di sibi ke ku manda Deus disa sufrimentu. No na jubi kuma ku isemplu di Jo pudi judanu, ora ku no sta na sufri.

KUMA KU STORIA DI JO TA JUDANU NGUENTA

9. Ke ku Jo fasi oca ki staba na sufri? (Tiagu 5:11)

⁹ Imaẑina kuma ku Jo staba na sufri. I sinta na sinza, si kurpu staba ku manga di cagas, i staba ku manga di dur. Si kurpu danaba mal, i staba fraku. Jo ka teneba forsa di fasi manga di kusas. I sinta, i na kosa si cagas ku padas di puti. Sempri i staba na keŝa pa dur ki staba na sufri. Jo ka kontinua so vivi ku es sufrimentu, ma i kontinua sedu fiel pa Jeova, i konfia nel. (Lei Tiagu 5:11.) Ke ku juda Jo kontinua sedu fiel?

10. Ke ku ta mostra di kuma Jo staba avontadi pa papia ku Jeova? Bu pudi splika.

¹⁰ Jo kontaba Jeova ke propi ki staba na sinti. (Jo 10:​1, 2; 16:20) Pur isemplu, kapitulu 3 kontanu di kuma, Jo splika tristesa ki staba na sinti pabia di ke ku kontisi ku el. Jo pensaba di kuma i Jeova ku pulba tudu ki purblemas. Dipus, tris amigus di Jo fala manga di bias di kuma i Deus ku staba na kastigal pabia di si pekadus. Ma Jo kontinua fala di kuma i seduba fiel pa Jeova. Alguns kusas ku Jo fala, mostra di kuma pa un tempu i pensaba di kuma i sedu mas justu di ki Deus. (Jo 10:​1-3; 32:​1, 2; 35:​1, 2) Ma utrora, Jo falaba tambi di kusas sin sintidu, pabia i staba na tenta mostra di kuma i kontinua sedu fiel. (Jo 6:​3, 26) Dipus, na kapitulu 31, Jo mistiba pa Deus ruspundil i pa i falal di kuma i ka mersi sedu kastigadu. (Jo 31:35) Ma Jo ka dibi di nsistiba pa Deus kontal ke ku manda i staba na sufri.

11. Kuma ku Jeova reaẑi pa manera ku Jo kontinua sedu fiel?

¹¹ No ntindi gosi di kuma, oca Jo papia ku Jeova suma ki fasi, i pabia i teneba amisadi forti ku Jeova. Tambi i teneba tudu konfiansa di kuma Jeova na julgal di manera justu. Ku tempu Jeova pui pa i ten bentu forti, i ruspundi Jo, ma Jeova ka splika ke ku manda Jo staba na sufri. Tambi i ka kastiga Jo pa manera ki kontal kuma ki staba na sinti o pa manera ki fala i ka fasi nada di mal. En ves di kila, suma un bon Pape, ku bondadi Jeova nsina Jo bon manera di pensa. Es i minjor manera di juda Jo. Kila pui Jo rikuñisi ku umildadi di kuma i sibiba puku, tambi i ripindi pa palabras ki papia sin pensa. (Jo 31:6; 40:​4, 5; 42:​1-6) Kuma kes storia juda povu di Jeova na pasadu, i kuma ki pudi judanu aos?

12. Kuma ku storia di Jo juda israelitas?

¹² Kuma ku israelitas pudiba judadu. Israelitas pudiba aprindi di ke ku kontisi ku Jo. Pensa na isemplu di Moisés. I ka seduba fasil pa Moisés gia nason di Israel. Manga di bias e disobdisiba Jeova, e puiba pa Moisés fika disanimadu. Israelitas keŝaba manga di bias kontra Jeova oca ku kusas seduba difisil. Ma Moisés ora Jeova pa i judal na ki tempu difisil. (Sai 16:​6-8; Num 11:​10-14; 14:​1-4, 11; 16:​41, 49; 17:5) Isemplu di Jo pudiba tambi juda Moisés oca Jeova kuriẑil. Pur isemplu, puku tempu antis di israelitas yentra na Tera di Purmesa, Moisés pañaba raiba ku elis, i papia sin pensa. I ka ngaba nomi di Jeova. (Sal 106:​32, 33) Pa kila, Jeova ka disa Moisés yentra na Tera di Purmesa. (Lei 32:​50-52) Mesmu pa manera kes seduba difisil, Moisés seduba umildi, i seta disiplina ku Jeova dal. Storia di Jo pudiba tambi juda israelitas fiel dipus ke yentra na Tera di Purmesa. E pudiba pensa na storia di Jo i konta Jeova kuma ke staba na sinti. Ma e pirsisaba tambi di lembra di kuma e ka seduba mas justu di ki Jeova. Tambi e pudiba aprindi di kuma e dibi di sedu umildi i sukuta ora ku Jeova kuriẑi elis.

13. Kuma ku storia di Jo pudi judanu nguenta? (Ebreus 10:36)

¹³ Kuma ku no pudi benefisia. Suma kristons, anos tambi no pirsisa di nguenta. (Lei Ebreus 10:36.) Pur isemplu, i pudi sedu ki no duensi risu, o no sta na sufri pabia di depreson o preokupason garandi, o no tene purblema na no familia. O talves un membru di no familia o no amigu muri, o no tene utru purblema gravi. Utrora, ora ku no sta na sufri, algin pudi fala o fasi algun kusa ku na torna inda mas difisil pa no pudi nguenta no situason. (Dit 12:18) Ma, livru di Jo ta nsina di kuma no pudi konta Jeova tudu ku sta na no korson, ku sertesa di kuma i na obinu. (1 Jon 5:14) Ora ku no yabri no korson pa Jeova utrora no pudi fala kusas sin sintidu, suma ki kontisi ku Jo, ma Jeova ka na paña raiba di nos. En ves di kila, i na danu forsa ku jiresa ku no pirsisa del pa nguenta. (2 Kron 16:9; Tiagu 1:5) Jeova pudi tambi kuriẑinu ora ki pirsis, suma ki fasi ku Jo. Livru di Jo ta nsinanu tambi kuma ku no pudi obdisi Jeova i kontinua sirbil, ora ku no risibi konsiju o disiplina ku bin di si Palabra, di si organizason o di amigus maduru. (Eb 12:​5-7) Suma ku Jo benefisia i seta ku umildadi koreson ki risibi, no pudi tambi benefisia si no seta sedu kuriẑidu. (2 Kor 13:11) Es i bon lisons ku no pudi aprindi di livru di Jo! No jubi gosi kuma ku no pudi usa es storia di Jo pa juda utrus.

USA LIVRU DI JO PA JUDA UTRUS

14. Kal ki un di manera di splika un algin na pregason, pabia ku sufrimentu ten?

¹⁴ Bu ciga ja di kontra ku un algin na pregason ku puntau pabia ku sufrimentu ten? Kuma ku bu ruspundil? Talves bu kontal ke ku Biblia fala aserka di ke ku kontisi na jardin di Eden. I pudi sedu ki, bu kumsa ku splikal di kuma Satanas, un spiritu mau, konta mintida pa purmeru omi ku minjer, i leba elis na rebela kontra Deus. (Kum 3:​1-6) Talves bu splikal di kuma, rebelion di Adon ku Eva ku pui jintis ta sufri i muri. (Rom 5:12) Dipus bu splikal di kuma, Deus da tempu sufisienti pa mostra tudu jintis di kuma, ke ku Satanas fala i ka bardadi. Tambi Deus ta usa es tempu pa juda jintis sibi di kuma i na bin kaba ku sufrimentu, i di kuma e pudi bin tene un vida filis pa sempri. (Apok 21:​3, 4) Es i un bon splikason ku juda ja manga di jintis ntindi pabia ku bon jintis ta sufri.

15. Kuma ku no pudi usa livru di Jo pa splika un algin ke ku manda sufrimentu ten? (Jubi tambi fotos.)

¹⁵ Utru manera ku no pudi juda un algin sibi pabia ku sufrimentu ten, i kontal storia di Jo. Bu pudi kumsa ku ngabal pa bon purgunta ki fasi. Dipus bu pudi kontal di kuma Jo, un omi fiel ku sufriba ciu, fasiba tambi mesmu purgunta. I pensaba di kuma, Deus ku pul i na sufri. (Jo 7:​17-21) Algin ku bu na papia ku el pudi fika dimiradu di kuma, desdi manga di tempu jintis misti sibi pabia ku sufrimentu ten. Dipus ku rispitu, bu pudi splikal di kuma, i ka Deus ku pui Jo sufri, ma i Diabu. Diabu fasi kila pa tenta prova di kuma pekaduris ta sirbi Deus so pa interesi. Bu pudi splikal di kuma, Deus tene konfiansa di kuma i ten pekaduris ku tene fe i ku ka sedu intereseru. I misti da elis oportunidadi pa e mostra di kuma, Satanas i munturus. Pa fin, bu pudi splikal di kuma Deus bin bensua Jo pabia i kontinua fiel. Asin, no pudi konsola utrus ora ku no garanti elis di kuma sufrimentu ka bin di Jeova.

16. Konta un spiriensia ku na mostra kuma ku livru di Jo juda un algin ku staba na sufri.

¹⁶ Pensa na kuma ku livru di Jo juda Mario. Un dia na 2021, un irma staba na prega pa telefoni. Na si purmeru ŝamada, i papia ku un omi comadu Mario. I leil versikulus di Biblia ku mostra di kuma Deus ta obi no orasons, tambi purmiti kusas bonitu pa futuru. Oca ki punta Mario ke ki pensa di ki versikulus, Mario falal di kuma i staba na skirbi un karta pa si familia antis di mata kabesa. I fala sin: “N fia na Deus, ma N ta sinti di kuma i ka ta preokupa ku mi.” Mas tardi, irma ligal, i kontal sufrimentu ku Jo pasa. Mario disidi di kuma i pirsisa di lei tudu livru di Jo. Asin, no irma mandal link di Tradução do Novo Mundo da Bíblia Sagrada. Kal ku rusultadu? Mario seta studa Biblia, i kontentiba dimas aprindi aserka di Deus di amor ku ta preokupa ku el.

17. Pabia ku no kontenti manera ku Jeova nklui livru di Jo na si Palabra nspiradu? (Jo 34:12)

¹⁷ Biblia tene puder di muda no vida, i te mesmu di konsola kilis ku na sufri. (Eb 4:12) No kontenti manera ku Jeova nklui storia di Jo na si Palabra nspiradu! (Jo 19:​23, 24) Livru di Jo ta danu garantia di kuma “na bardadi Deus ka ta fasi kusas na un manera mau”. (Lei Jo 34:12.) Tambi i ta nsinanu pabia ku Deus pirmiti sufrimentu i kuma ku no pudi nguental. I ta judanu konsola kilis ku na sufri. Na studu ku na bin, no na bin oja kuma ku livru di Jo pudi judanu ora ku no na da konsiju.