Kontinua konfia na orientason di Jeova

1. Kal ki alguns kusas ku pekaduris pirsisa del? (Mateus 5:3)

JEOVA sibi ke ku pekaduris pirsisa del. Pur isemplu, no pirsisa di kumida, ropa ku kau di mora. Si no ka tene es kusas no pudi muri, o vida pudi torna difisil dimas. Jeova sibi di kuma i ten utru kusas ku pekaduris pirsisa del. I kumpunu ku nesesidadi di kunsil i konfia di kuma i pudi judanu. (Lei Mateus 5:​3, Traduson di Nobu Mundu.) Si no misti tene filisidadi di bardadi, no ten ku sibi di kuma no pirsisa di si orientason i kontinua konfia nel.

2. Kuma ku no situason parsi ku algin ku na pidi simola?

² Palabra gregu ku traduzidu pa “sibi di kuma e pirsisa di Deus”, ta da ideia di un pididur di simola ku pirsisa di ajuda. Imaẑina un pididur di simola tene ropa susu mal, i ka tene manga di kusas di kume, i ta sinta bas di sol, i di noti i ta tene manga di friu. Jintis ta kuri del, pabia di kuma ki sta. I ta sta kansadu i tristi. Es pididur di simola sibi di kuma i pirsisa di ajuda pa kontinua vivi i tene forsa. Di mesmu manera, kilis ku sibi di kuma e pirsisa di Deus, ta tene vontadi garandi di pidi si ajuda i sukutal.

3. Ke ku no na fala del nes studu?

³ Nes studu, no na fala di ke ku no pudi aprindi di minjer di zona di Kanaan ku pidi pa Jesus judal. Es storia na mostra tris manera di sedu ku no pirsisa di tene si no misti kopial, i si no misti pa Jeova kontinua orientanu. Dipus, no na fala di isemplu di apostolus Pedru ku Paulu i ku rei Davi ku konfiaba na ajuda di Jeova.

KE KU NO PUDI APRINDI DI UN MINJER KU PIDI AJUDA

4. Ke ku un minjer di zona di Kanaan mistiba pa Jesus fasi pa si fiju femia?

⁴ Un dia, un minjer di zona di Kanaan pertusi di Jesus. Si fiju femia teneba “dimoniu ku na kansal dimas.” (Mat 15:​21-28) Minjer finka juju dianti di Jesus, i pidil pa i juda si fiju femia. No jubi tris kusas ku no pudi kopia des minjer.

5. Kal maneras di sedu ku minjer mostraba, i ke ku Jesus fasi pa rel? (Jubi tambi diseñu.)

⁵ Es minjer mostraba umildi di bardadi. Pabia ku no pudi fala kila? Pabia i ka fika mal, oca Jesus komparal ku kacuriñu, talves un limaria ku kilis ku ka seduba judeus ta teneba na se kasa. Kuma ku bu na reaẑiba si Jesus falauba es palabras? Sera ki bu na fikaba mal i para pidil ajuda? I ka kila ku minjer di zona di Kanaan fasi. I ka mostra so umildadi, ma i pegaba nsisti. Es notadu pa manera ki kontinua pidi Jesus pa i judal. Ke ku lebal na fasi kila? I teneba fe garandi na Jesus. Na bardadi, oca Jesus oja fe forti des minjer, i disidi judal. Mesmu manera ki fala di kuma i bin so pa juda “jinti di nason di Israel ku pirdi suma karnel”, Jesus tira dimoniu na si fiju femia.

6. Kuma ku no pudi kopia isemplu di minjer di zona di Kanaan?

⁶ Si no misti risibi orientason di Jeova, no pirsisa di kopia es minjer di zona di Kanaan. No dibi di sedu umildi, pega nsisti i tene fe forti. So jintis umildi ku ta kontinua pidi Deus ajuda. No pirsisa tambi di tene fe forti na Kristu Jesus i konfia na kilis ki ta usa pa orienta si disipulus. (Mat 24:​45-47) Jeova ku Jesus ta kontenti ora ku no sedu umildi, kontinua pidi se ajuda i tene fe. Si no fasil, e na judanu i orientanu. (Komparal ku Tiagu 1:​5-7.) Gosi, no jubi kuma ku Jeova ta orientanu i danu ke ku no pirsisa del pa sedu filis. No na oja tambi kuma ku no pudi kopia isemplus di apostolus Pedru ku Paulu i ku rei Davi.

KONTINUA STUDA PALABRA DI DEUS SUMA PEDRU

7. Kal tarbaju ku Jesus da Pedru, i kal utru kusa ki pirsisa tambi di fasi? (Ebreus 5:14–6:1)

⁷ No jubi isemplu di apostolu Pedru. I seduba un di purmerus judeus ku rikuñisi di kuma Jesus sedu Mesias, algin ku Jeova usaba pa alimenta si povu ku “palabra ku ta da vida ku ka ta kaba.” (Jon 6:​66-68) Antis di Jesus bai pa seu, i daba Pedru tarbaju di alimenta si karnelis. (Jon 21:17) Pedru kumpri es tarbaju di manera fiel, i te mesmu Jeova usal pa i skirbi dus kartas ku bin fasi parti di Biblia. Ma Pedru pirsisa tambi di studa Palabra di Deus. Pur isemplu, i studa kartas ku Paulu skirbi, i ku fasiba ja parti di Biblia. Pedru sibi kuma alguns kusas ku Paulu skirbi i seduba “kansadu pa ntindi.” (2 Ped 3:​15, 16) Ma Pedru kontinua studa es kusas. I teneba fe di kuma Jeova na judal ntindi kusas ki studa, i aplika ke ki aprindi. — Lei Ebreus 5:14–6:1.

8. Ke ku Pedru fasiba oca ki risibi nobu orientason di Jeova?

⁸ Suma Pedru teneba fe forti na Jeova, i obdisi si orientason. Pur isemplu, un dia oca Pedru staba na sidadi di Jopi, i risibi vison di un anju ku mandal pa i kume limarias ku Lei di Moisés ka pirmitiba pa judeus kume. Pedru ku seduba judeu duranti tudu si vida, pensaba di kuma i mal fasi ke ku anju fala. Na kumsada, Pedru ruspundi asin: “Di nin un manera, Siñor! Nunka N ka kume kusa ku ka puru, ku anos judeus no ka dibi di kume.” Dipus anju falal: “Kusa ku Deus fala bu pudi kume, ka bu fala i ka ta kumedu.” (At 10:​9-15) Pedru obdisi i muda si manera di pensa. Kuma ku no sibi kila? Dipus ki risibi vison, tris omis bin pa kasa di Pedru i e falal di kuma se patron Kornéliu misti ojal. Antis di risibi vison, Pedru nunka ka bai na kasa di jintis ki ka seduba judeus. Ŝefis judeus ta nsinaba povu di kuma, i mal pa un judeu yentra na kasa di kin ka sedu judeus. (At 10:​28, 29) Ma oca ku Jeova mostra Pedru di kuma gosi i misti pa tudu jintis obi bon noba, Pedru logu muda si manera di pensa i obdisi Jeova. (Dit 4:18) I prega Kornéliu, si familia ku si amigus ku staba na si kasa. Elis tudu e pui fe na Jesus, e risibi spiritu santu i e batisadu. — At 10:​44-48.

9. Di kal dus maneras ku no ta benefisia, ora ku no ta studa kusas ku pudi sedu difisil di ntindi?

⁹ Suma Pedru, no pirsisa sempri di studa Palabra di Deus. Manga di bias no ta lei kusas ki difisil di ntindi. No dibi di tambi gosta di studa kusas ki mas difisil di ntindi. No pirsisa di ranja tempu i sta dispostu pa fasi sforsu pa ntindi kusas difisil di Palabra di Deus, ma i bali pena fasil. Pabia? No pudi pensa na dus benefisius ku no na tene: Purmeru, no na aprindi kusas aserka di Jeova ku na aumenta no amor ku rispitu pa rel. Sugundu, no na aumenta no diseẑu di papia ku utrus aserka di Jeova. (Rom 11:33; Apok 4:11) Utru kusa ku no pudi aprindi di Pedru i es: Ora ku Jeova ku si organizason fasi algun mudansa na no ntindimentu di Palabra di Deus, no pirsisa di sedu rapidu pa adapta no manera di pensa ku no komportamentu. Des manera, Jeova na pudi kontinua orientanu i no na konsigi sirbil di manera fiel.

MOSTRA MANERAS DI SEDU KU TA KONTENTA DEUS SUMA PAULU

10. Di akordu ku Kolosensis 3:​8-10, ke ku no pirsisa di fasi pa kontenta Jeova?

¹⁰ Si no misti sedu filis i disa pa Jeova orientanu, no pirsisa di tene maneras di sedu ku na kontental. Apostolu Paulu skirbi di kuma, no dibi di dispi di “naturesa beju” i bisti “naturesa nobu”. (Lei Kolosensis 3:​8-10.) I pirsis manga di tempu i sforsu garandi, pa tene maneras di sedu ku ta kontenta Deus. Pensa na isemplu di Paulu. Ocalba mas joven i sforsa ciu pa kontenta Deus. (Gal 1:14; Fil 3:​4, 5) Ma i ka ntindiba kuma ki na adora Deus di un bon manera. I ka sibiba kal ki bardadi aserka di Jesus. Paulu seduba orgulyosu, pa kila, i ta komportaba di un manera ku ka ta kontenta Deus. Paulu fala di kuma, i seduba un algin ku ka ta rispita Deus. — 1 Tim 1:13.

11. Kal mudansa ku Paulu tenba di fasi? Bu pudi splika.

¹¹ Antis di torna kriston, Paulu ta lestuba ku paña raiba. Livru di Atus fala di kuma, Paulu pañaba raiba kontra disipulus di Jesus tok i mistiba mata elis. (At 9:1) Ma dipus ki torna kriston, i sforsa ciu pa kontrola si raiba. I pasa sedu pasenseru i bon algin. (Ef 4:​22, 31) Ma Paulu ta fasiba erus, oca ku el ku Barnabé e ka konkordaba aserka di un asuntu, Paulu pañaba raiba mal. (At 15:​37-39) Na ki mumentu, Paulu ka komportaba di un manera ku Deus mistiba pa i komporta. Ma i kontinua sforsa ciu pa sedu algin ku Jeova ta kontentiba ku el. — 1 Kor 9:27.

12. Ke ku juda Paulu kontinua fasi mudansas na si maneras di sedu?

¹² Paulu konsigi fasi mudansas na si maneras di sedu, pabia i seduba umildi. (Fil 4:13) Suma Pedru, Paulu dipindiba di “forsa ku Deus dal”. (1 Ped 4:11) Utrora Paulu ta fasiba erus, i kila ta pulba sinti disanimadu. Ma ora ki sinti disanimadu i ta pensa na bon kusas ku si Pape ku sta na seu fasi pa rel, i kila ta dal vontadi di kontinua sforsa. — Rom 7:​21-25.

13. Kuma ku no pudi kopia isemplu di Paulu?

¹³ Mesmu si no sta na sirbi Jeova pa manga di anus, no pirsisa di sforsa pa minjoria no maneras di sedu. No na fasi erus. Pur isemplu, no pudi paña raiba, papia o fasi un kusa ki ka bon. Ora ku kila kontisi, no ka dibi di pensa di kuma no ka pudi nunka kontenta Jeova. En ves di kila, no dibi di kontinua sforsa pa muda no manera di pensa ku no komportamentu. (Rom 12:​1, 2; Ef 4:24) Ma ora ku no fasil, no dibi di lembra des kusa importanti: Diferenti di ropas ku ta mudadu pa e pudi cibinu, no dibi di muda no maneras di sedu pa pudi kontenta Jeova. Si no misti kontinua minjoria no maneras di sedu, no pirsisa di disa Jeova nsinanu i kunsil minjor.

DISA JEOVA PROTEẐIU SUMA DAVI

14-15. Di kal maneras ku Jeova ta proteẑi si povu? (Salmu 27:5) (Jubi tambi foto.)

¹⁴ Pa tene filisidadi di bardadi, no pirsisa tambi di proteson di Jeova. Di kal maneras ku Jeova ta proteẑinu? Ke ku no pirsisa di fasi pa i pudi proteẑinu?

¹⁵ Rei Davi teneba sertesa di kuma, Jeova na proteẑil na tempus difisil. (Lei Salmu 27:5.) Kuma ku Jeova ta proteẑi si povu aos? Jeova ta proteẑinu di kualker algin o kualker kusa ku pudi dana no fe. Mesmu si jintis tenta tujinu adoral, i purmiti di kuma i na proteẑi no amisadi ku el. (Sal 34:7; Isa 54:17) Satanas, dimonius ku kilis ku ta pirsiginu tene puder, ma Jeova mas elis tene puder. Mesmu si e tira no vida, Jeova na bin lantandanu. (1 Kor 15:​55-57; Apok 21:​3, 4) Jeova tambi ta judanu ora ku no tene manga di kudadi ku pudi punu para sirbil. (Dit 12:25; Mat 6:​27-29) No Pape ku amanu, danu ermons ku irmas ku ta nkoraẑanu i judanu na tempus difisil. Tambi i danu ansions ku ta nsinanu i judanu kontinua tene fe forti. (Isa 32:​1, 2) Ora ku no ta mati runions, no ta aprindi utrus manera ku no pudi disa pa Jeova judanu i proteẑinu. — Eb 10:​24, 25.

16. Di kal manera ku Jeova proteẑi Davi?

¹⁶ Ora ku Davi obdisiba ke ku Jeova fala, Jeova ta judal toma bon disisons, i kila ta puiba pa Davi sedu filis. I des manera ku Jeova proteẑil. (Komparal ku Ditus 5:​1, 2.) Ma, ora ku Davi disobdisi Jeova, i ta sufriba di rusultadu di si mau disisons. (2 Sam 12:​9, 10) Ke gora oca ku Davi sufriba pabia utrus tratalba mal? Davi konta Jeova tudu si preokupason, i Jeova proteẑil. Kuma ku Jeova fasi kila? I konsola Davi i purmiti di kuma i na kuida del, i na judal sinti di kuma i amal. — Sal 23:​1-6.

17. Kuma ku no pudi kopia isemplu di Davi?

¹⁷ No pudi kopia Davi ora ku no na ora Jeova pa buska si konsijus, ku na judanu toma bon disisons. Lembra di kuma, ora ku no disobdisi Jeova i ka na tira rusultadu di mau disisons ku no toma. (Gal 6:​7, 8) Ma mesmu si no obdidi Jeova, utrora no pudi sufri pabia di utru motivus. Ora ku no na sufri no pudi konta Jeova tudu no preokupason i pidil pa i judanu. Dipus Jeova na konsolanu i judanu sinti si amor. — Fil 4:​6, 7.

KONTINUA KONFIA NA ORIENTASON DI JEOVA

18. Kal difikuldadis ku no na pasa pa rel, i kuma ku no pudi kontinua sigi orientasons di Jeova? (Jubi tambi fotos.)

¹⁸ No testu di anu 2026 fala sin: “Filis i kilis ku sibi di kuma e pirsisa di Deus.” Aos, i importanti dimas fasi ke ku Jesus fala, i konfia na orientason di Jeova. Pabia di ke? Pabia manga di jintis ka ta seta di kuma e pirsisa di Deus i di si orientasons. Utrus ta fia na Deus, ma e ta misti adoral di se manera. I utrus ta konfia na orientasons di pekaduris, i kila ta pui pa e ka sedu filis. No ka dibi di kopia elis. Gosi, ke ku no dibi di fasi pa kontinua konfia na Jeova? No dibi di kontinua studa Palabra di Deus, kontinua mostra maneras di sedu ku na kontenta Jeova, obdisil i disal pa i proteẑinu.