Kantu Tustumuñas di Jeova ku bu kunsi? Alguns di nos pudi sedu bu viziñus, kolegas di tarbaju o di skola. O talves no ciga ja di kombersa ku bo aserka di Biblia. Ma, ba kin propi ku no sedu, i pabia di ke ku manda no ta papia ku utrus aserka di no krensas?

Anos i suma utrus jintis. No sedu di diferentis kultura ku nivel sosial. Alguns di nos seduba di utru riliẑion, nkuantu utrus ka ta fiaba na Deus. Ma, antis di no torna Tustumuñas di Jeova, kada un di nos toma tempu pa izamina ku kuidadu nsinus di Biblia. (Atus 17:11) No konkorda ku ke ku no aprindi, dipus no toma no propi disison pa adora Jeova Deus.

Studu di Biblia ta benefisianu. Suma kualker algin, no ten di nfrenta purblemas i lida ku no propi frakesas. Ma ku sforsu di aplika orientasons di Biblia na no vida di kada dia, no ta minjoria kualidadi di no vida. (Salmu 128:​1, 2) Es i un di rason ku pui no ta papia ku utrus aserka di bon kusas ku no aprindi di Biblia.

No ta vivi sugundu normas di Deus. Es normas, suma ki sinadu na Biblia, ta kontribui pa no ben i ta nkorajanu pa rispita utrus, i disenvolvi utrus kualidadis suma onestidadi ku bondadi. Es orientasons di Biblia ta kontribui pa minjoria saudi, sedu membru prudutivu di sosiedadi, i tene union ku bon komportamentu na familia. Suma no sta sertu di kuma “Deus ka ta fasi skuju di jinti,” no ta nkara no kabesa suma parti di un familia internasional, unidu pa mesmu krensas, livri di divison rasial ku pulitika. No sedu suma utrus, ma anos i un povu spesial. — Atus 4:13; 10:​34, 35.

•  Ke ku Tustumuñas di Jeova tene di kumun ku utrus jinti?

•  Kal normas ku Tustumuñas di Jeova aprindi atraves di Biblia?

Manga di jintis ta pensa kuma Tustumuñas di Jeova i nomi di un nobu riliẑion. Ma, mas di 2.700 anus atras, Biblia falaba ja di servus di Deus di bardadi suma si “tustumuñas.” (Isaias 43:​10-12) Te na 1931, no kunsiduba suma Studantis di Biblia. Ke ku manda no pasa comadu pa nomi Tustumuñas di Jeova?

I ta identifika no Deus. Sugundu manuskritus antigu, nomi di Deus, Jeova, ojaduba na Biblia kuas seti mil bias. Na manga di tradusons es nomi trokadu pa titulus suma Siñor o Deus. Ma, Deus di bardadi kontaba Moises si nomi pesual, Jeova, i fala: “Es i ña nomi pa sempri.” (Saida 3:15) De manera, i diferensia si kabesa ku tudu deusis falsu. No tene orgulyu di leba nomi sagradu di Deus.

I ta diskribi no mison. Manga di jintis na tempu antigu da tustumuñu di se fe na Jeova. Purmeru delis i omi justu, Abel. Pa manga di anus, Noe, Abraon, Sara, Moises, Davi ku utrus, fasi parti di “tudu e tustumuñas ku rodianu suma nuven.” (Ebreus 11:4–12:1) Suma un algin ku ta da tustumuñu na tribunal pa ben di un inosenti, no sta disididu pa fasi utrus kunsi bardadi aserka di no Deus.

No sta na kopia Jesus. Biblia comal di “tustumuña di bardadi i fiel.” (Apokalipsi 3:14) Propi Jesus fala kuma i ‘pui pa nomi di Deus kunsidu’ i ‘da tustumuñu di bardadi’ aserka di Deus. ( Jon 17:26; 18:37) Asin, kilis ku na bardadi ta sigi Kristu, dibi di leba nomi di Jeova i fasi utrus kunsil. I es ku Tustumuñas di Jeova ta sforsa na fasi.

•  Ke ku manda Studantis di Biblia toma nomi Tustumuñas di Jeova?

•  Disna di kal tempu ku Jeova tene tustumuñas na tera?

•  Kin ki Tustumuña di Jeova mas garandi?