LISON 7
Ke ku Deus purmiti atraves di profetas
ANTIGUS profetas mostraba fe na Deus. E fiaba na si purmesas i e disa sedu giadu pa es purmesas. Es i kal purmesas?
Logu dipus ki Adon ku Eva rebela na jardin di Eden, Deus purmitiba di ki i na kuji un algin ku na masa kabesa di “serpenti,” ku representadu suma “garandi dragon . . . ku sedu antigu serpenti ku comadu diabu ku Satanas,” i na kaba ku el un bias. (Kumsada 3:14, 15; Apokalipsi 12:9, 12) Profetas staba na pera un algin ki na bin juda elis. Es i kal algin?
Serka di 2.000 anus dipus ki dadu ki purmeru profesia, Jeova purmiti profeta Abraon di kuma ki algin na bin na si familia. Deus fala Abraon: “Suma ku bu obi ke ku N falau, tudu nasons di mundu na bensuadu pabia di bu jorson [o fiju.]” — Kumsada 22:18.
Na anu 1473 antis di no era, Deus daba profeta Moises mas nformason aserka des “fiju.” Moises fala fijus di Israel: “SIÑOR bu Deus na lantandau un anunsiadur suma mi na metadi di bu ermons; el ku bu na obi.” (Ripitison di Lei 18:15) Suma Moises, es profeta o anunsiadur na sai na metadi di fijus di Abraon.
Es profeta tambi na bin di familia di Rei Davi. Tambi i na torna un rei garandi. Deus purmitiba Rei Davi: “N na lantanda un di bu familia, ku sedu bu fiju propi, . . . N na konfirma tronu di si renansa pa sempri.” (2 Samuel 7:12, 13) Deus mostra tambi ki, es fiju di Davi na comadu “Rei di Pas,” i fala mas: “Kirsimentu di si gubernu ku si pas ka na ten kabantada. I na sinta na tronu di Davi pa firmanta si renu, pa fortifikal ku justisa ku vida retu, disna di gosi pa sempri.” (Isaias 9:6, 7) Na bardadi, e Rei justu na tisi pas ku justisa na tudu mundu. Ma kal tempu ki na bin?
“Fiju” purmitidu na bin . . . na familia di Abraon, sedu suma profeta Moises, na familia di Davi, ciga na anu 29 di no era, masa serpenti, Satanas
Mas tardi anju Gabriel fala profeta di Deus, Daniel: “Obi, bu ntindi. Disna ku ordi sai pa torna kumpu Jerusalen te na tempu ku ki algin ciga ku Deus kuji pa i sedu rei, i na ten korenta i novi anu. . . . I na tarda pa kuatrusentus i trinta i kuatru anu.” (Daniel 9:25) Es 49 anu mas 434 anu na da un total di 483 anu. I kumsa kontadu apartir di 455 antis di no era ate anu 29 di no era.a
Mesias o algin ku Deus kuji, profeta suma Moises, “fiju” ku staba na peradu manga di tempu, sera ki i bin na anu 29 di no era? No jubi rasposta.
a Jubi nota 2 na paẑina 255 di livru Bu Pudi Tene Un Vida Filis pa Sempri! Fasidu pa Tustumuñas di Jeova.