No organizason ka tene lideris riliẑiozu ku ta pagadu. En ves di kila, suma ki ta fasiduba pa purmeru kristons, superintendentis kualifikadu ta disignadu pa ‘pastoria kongregason di Deus.’ (Atus 20:28) Es ansions i omis maduru na sintidu spiritual ku ta toma lideransa na kongregason i ku ka ta pastoria ku ‘obrigason, ma di livri vontadi, suma ku Deus misti; i ka ku spiritu intereseru, ma ku diseẑu di sirbi.’ (1 Pedru 5:​1-3) Kal tarbaju ke ta fasi pa no benefisiu?

E ta preokupa ku nos i e ta protejinu. Ansions ta da orientasons basiadu na Skrituras i e ta juda kongregason kontinua pertusi di Jeova. Suma e sibi kuma Deus da elis es tarbaju importanti, ansions ka ta domina kongregason, en ves di kila, e ta kontribui pa no ben i pa no alegria. (2 Koríntius 1:​24) Suma ku un pastor ta sforsa na kuida di kada un di si karnelis, ansions ta sforsa kunsi kada membru di kongregason. — Ditus 27:23.

E ta sinanu kuma di fasi vontadi di Deus. Tudu sumana ansions ta diriji runions di kongregason pa pudi fortalisi no fe. (Atus 15:32) Es omis dedikadu ta toma lideransa tambi na atividadi di pregason, e ta tarbaja ku nos i e ta mostranu diferentis maneras ku no pudi prega.

E ta nkoraẑa kada un di nos. Pa pudi kuida di nesesidadi spiritual di kada un di nos, ansions lokal pudi visitanu na no kasa o na Salon di Renu pa pudi danu ajuda ku konsolu basiadu na Biblia. — Tiagu 5:​14, 15.

Alen di juda kongregason, manga di ansions tene se tarbaju ku responsabilidadis di familia ku ta toma parti di se tempu ku atenson. Es irmons ku ta tarbaja ciu meresi no rispitu. — 1 Tesalonisensis 5:​12, 13.

•  Kal ki tarbaju di ansions di kongregason?

•  Di kal maneras ku ansions ta mostra interesi na kada un di nos?

Biblia fala di dus grupu di omis kriston ku ta kuida di responsabilidadis na kongregason. Tustumuñas di Jeova ta coma elis di “Superintendentis” i “servus ministerial.” (Filipensis 1:⁠1, NM) Kada kongregason kustuma tene ansions ku servus ministerial. Kal tarbaju ku servus ministerial ta fasi pa no benefisiu?

E ta juda korpu di ansions. Servus ministerial tene bon spiritualidadi, e sedu di konfiansa, i omis ku ta pega tesu, alguns pudi sedu jovens utrus di mas idadi. E ta kuida di kusas importanti ku sempri pirsisa di fasidu na kongregason, suma tarbajus fisiku i di organizason. Es ta pirmiti ansions konsentra na responsabilidadi di sina ku pastoria.

E ta fasi sirvisus importanti. Alguns servus ministerial ta disignadu suma indikaduris pa risibi tudu kilis ku bin runions. Utrus ta kuida di ekipamentu di son, di distribuison di publikasons, di kontas di kongregason i di disigna tiritorius di pregason pa membrus di kongregason. E ta juda tambi na manutenson di Salon di Renu. Ansions pudi pidi elis pa juda jintis di idadi. Servus ministerial ta sta dispostu pa fasi kualker tarbaju ke dadu, i kongregason ta rispita elis pa se bon tarbaju ku se bon vontadi. — 1 Timótiu 3:​13.

E ta da un bon izemplu suma omis kriston. Servus ministerial ta kujidu pabia di se bon kualidadis spiritual. Ora ke na apresenta partis na runions, e ta fortalisi no fe. Se bon izemplu na pregason, ta buri no zelu. Pabia di se spiritu di koperason, e ta promovi alegria ku unidadi. (Efésius 4:​16) Ku tempu, elis tambi e pudi kualifika pa sirbi suma ansions.

•  Kal tipu di omis ku servus ministerial sedu?

•  Kuma ku servus ministerial ta juda kongregason funsiona diritu?

Skrituras Gregu Kriston fala manga di bias di Barnabe ku apostulu Paulu. Es omis sirbiba suma superintendentis viaẑantis, e ta visitaba kongregasons di purmeru sekulu. Pabia di ke? E staba ku interesi garandi na ben di se irmons spiritual. Paulu fala i misti ‘bai visita ermons’ pa oja kuma ke sta. I staba dispostu pa viaẑa distansia garandi pa bai fortalisi elis. (Atus 15:​36) Es i diseẑu ku no superintendentis viaẑantis tene aos.

E ta bin pa nkoraẑanu. Kada superintendenti di sirkuitu ta visita serka di 20 kongregasons, i ta pasa un sumanu ku kada kongregason dus bias kada anu. Es signifika el i responsavel pa kualidadi di programa. No pudi benefisia ciu di spriensia des irmons ku se minjeris, si kontra e sedu kasadu. E ta sforsa pa kunsi jovens ku jintis di idadi, i e ta gosta di kumpañanu na pregason i na no studus bibliku. Es superintendentis ta fasi visitas di pastoreiu ku ansions, i e ta fortalisinu, e ta fasi diskursus nkoraẑanti na runions ku asembleias. — Atus 15:35.

E ta mostra interesi pa tudu jinti. Superintendentis di sirkuitu tene manga di interesi na kondison spiritual di kongregasons. E ta riuni ku ansions i ku servus ministerial pa analiza progresu ku fasidu i pa da konsijus pratiku na manera di kuida di se responsabilidadis. E ta juda pionerus tene susesu na se ministeriu, e ta fika kontenti di kunsi nobus i di sibi di progresu ke sta na fasi na bardadi. Kada un des irmons, di livri vontadi, ta da di si kabesa suma no ‘kumpañeris di tarbaju pa judanu.’ (2 Koríntius 8:​23) No dibi di kopia se fe ku devoson pa Deus. — Ebreus 13:⁠7.

•  Ku kal objetivu ku superintendentis di sirkuitu ta visita kongregasons?

•  Kuma ku bu pudi benefisia di se visitas?

Ora ku un disastri akontisi, Tustumuñas di Jeova ta kumsa logu organiza pa juda se irmons ku afetadu. Es sforsus ta mostra kuma, no tene amor di bardadi pa n̈utru. ( Jon 13:​34, 35; 1 Jon 3:​17, 18) Di kal maneras ku no ta juda?

No ta da diñeru. Oca ku fomi garandi akontisi na Judeia, purmeru kristons na Antiokia manda diñeru pa se irmons spiritual. (Atus 11:​27-​30) Di mesmu manera, ora ku no sibi kuma no irmons na un tera sta na nfrenta difikuldadis, no ta manda diñeru atraves di kongregason lokal, pa da ajuda matirial pa kilis ku sta na nesesidadi garandi. — 2 Koríntius 8:​13-​15.

No ta da ajuda pratiku. Ansions ku sta na lokal di disastri ta lokaliza kada membru di kongregason pa tene serteza di kuma tudu ojadu i e sta ben. Kumison di ajuda umanitariu ta kordena furnisimentu di kumida, yagu limpu, ropa, kau di mora ku ajuda medika. Manga di Tustumuñas di Jeova ku tene spriensia na un aria, ta bai di un manera voluntariu na se propi kustu, pa partisipa na tarbaju di juda kumpu kasas ku dana ku Salons di Renu. Unidadi ku no tene suma un organizason ku spriensia ku no gaña na tarbaja juntu, ta judanu konsigi ajuda ku tarbajaduris ki pirsis na ora. No ta yabri no mon pa “no familia na fe,” ma mesmu asin, no ta juda tambi utrus ora ki pusivel, sin jubi pa se riliẑion. — Gálatas 6:​10.

No ta da ajuda spiritual i emosional. Vitimas di disastri pirsisa mas di konsolu. Na ki mumentus, no pudi fortalisidu pa Jeova “Deus ku tudu koraẑen bin del.” (2 ­Koríntius 1:​3, 4) Ku alegria no ta mostra promesas di Biblia pa kilis ku sta disisperadu, no ta da elis garantia di kuma i ka na tarda, Renu di Deus na bin kaba ku tudu disastris ku ta kausa dur ku sufrimentu. — Apokalipsi 21:⁠4.

•  Ke ku manda Tustumuñas di Jeova ta konsigi aẑi rapidu ora ki ten disastris?

•  Kal konsolu spiritual ku no ta da pa kilis ku konsigi salba?

Puku tempu antis di muri, Jesus teneba un kombersa so ku si quatru disipulus — Pedru, Tiagu, Jon, ku Andre. Nkuantu Jesus na falaba di sinal di si prisensa na ultimus dias, i fasi un diklarason importanti i fala: “I tenba un servu jiru, di fiansa, ku si patron pui riba di utru servus di kasa, pa i pudi da elis se kumida na ora sertu.” (Mateus 24:​3, 45; Markus 13:​3, 4) Jesus garanti si disipulus di kuma suma se “patron” i na disigna kilis ku na ba ta da di manera kontinuadu alimentu spiritual na tempu di fin. Ba kin ku fasi parti des skravu fiel?

I un grupu pikininu di sigiduris di Jesus unjidu pa spiritu. ‘Skravu’ ta identifikadu suma Korpu Guvernati di Tustumuñas di Jeova. I ta furnisi alimentu spiritual na ora pa utrus adoraduris di Jeova. No dipindi di skravu fiel pa ba ta risibi no “kiñon di kumida na ora.” — Lukas 12:42.

I ta kuida di tudu bens ku si patron disignal. Jesus da skravu fiel i diskretu responsabilidadi garandi di kuida di tarbaju di parti di organizason di Jeova ku sta na tera — kuida di si bens matirial, diriẑi atividadi di pregason ku nsinu atraves di no kongregasons. Pa danu ke ku no pirsisa i na ora ku no pirsisa del ‘skravu fiel i diskretu’ ta distribui alimentu spiritual atraves di publikasons ku no ta usa na pregason, suma tambi atraves di programas ku ta apresentadu na no runions ku asembleias.

Skravu i fiel pa bardadis di Biblia i pa si mison di prega bon noba, i diskretu na jiresa ki ta usa pa kuida di bens di Kristu na tera. (Atus 10:42) Jeova sta na abensua tarbaju des skravu ku manga di kirsimentu i ku manga di kumida spiritual. — Isaias 60:22; 65:13.

•  Kin ku Jesus disigna pa alimenta si disipulus na sintidu spiritual?

•  Di kal manera ku skravu sedu fiel i diskretu?

Na purmeru sekulu, un grupu siñu di ‘apostulus ku garandis na Jerusalen’ sirbiba suma korpu guvernanti pa toma disisons importanti pa benefisiu di tudu kongregasons di kristons unjidu. (Atus 15:2) Disa sedu giadu pa Skrituras i sigi orientason di spiritu di Deus, ta leba elis ciga na un akordu na se disisons. (Atus 15:25) Es izemplu ku ta sigidu aos.

I sta na usadu pa Deus pa fasi si vontadi. Irmons unjidu ku ta sirbi na Korpu Guvernanti tene manga di interesi na Palabra di Deus i manga di spriensia na lida ku asuntus pratiku i spiritual. E ta riuni kada sumana pa konsidera nesesidadis di irmons na mundu ntidu. Suma na purmeru sekulu, instrusons basiadu na Biblia ta dadu atraves di kartas o atraves di superintendentis viaẑantis o utrus. Es ta juda povu di Deus na sedu unidu na manera di pensa i aẑi. (Atus 16:​4, 5) Korpu Guvernanti ta supervisiona purparason di alimentu spiritual, i ta da mas insentivu na tarbaju di pregason di Renu, i ta supervisiona disignason di irmons pa kargus di responsabilidadi.

I ta sigi orientason di spiritu di Deus. Korpu Guvernanti ta buska orientason di Soberanu Universal, Jeova, i di Jesus, Kabesa di kongregason. (1 Koríntius 11:3; Efésius 5:​23) Si membrus ka ta pensa kuma elis i lideris di povu di Deus. Elis, ku tudu kristons unjidu e ta “yanda tras di Karnel [Jesus] pa tudu ladu ki na bai.” (Apokalipsi 14:4) Korpu Guvernanti ta apresia no orasons pa relis.

•  Ba kin ku fasiba parti di korpu guvernanti na purmeru sekulu?

•  Kuma ku Korpu Guvernanti aos ta sigi orientason di Deus?

Nomi ebraiku Betel signifika “kasa di Deus.” (Kumsada 28:17, 19) I un nomi apropriadu pa idifisiu o grupu di idifisius ku Tustumuñas di Jeova kumpu na mundu ntidu, nunde ki obra di pregason ta diriẑidu i apoiadu. Korpu Guvernanti sta na sedi mundial na Stadu di Nova York, Stadus Unidu, i di la, i ta supervisiona tarbaju ku ta fasidu na tudu “Betel” di mundu. Suma un grupu, kilis ku ta tarbaja nes kaus kunsidu suma familia di Betel. Suma un familia, e mora juntu, e ta tarbaja juntu, e ta kume juntu i e ta studa Biblia juntu na union. — Salmu 133:⁠1.

Uniku lugar nunde ku membrus di familia tene un spiritu di sakrifisiu. Na tudu Betel, i ten omis ku minjeris ku disidi fasi vontadi di Deus i sirbi interesis di Renu pa tempu kompletu. (Mateus 6:33) Nin un delis ka ta risibi salariu, ma tudu ta dadu kau di mora, di kume ku un ajuda finanseru pa se dispezas pesual. Kada kin na Betel ta dadu un tarbaju, utrus na gabineti, na kusiña, na sala di jantar. Alguns ta tarbaja na kau di impreson o na enkadernason, o fasi tarbajus di kasa, laba roba, manutenson o utru kusas.

Un kau di manga di tarbaju ku ta apoia pregason di Renu. Objetivu mas garandi di un Betel, i fasi tudu ki pusivel pa ciganta bardadis di Biblia pa manga di jintis. Es broŝura i un izemplu di kila. I skirbidu bas di orientason di Korpu Guvernanti, i atraves di komputadoris i mandadu pa manga di ekipas di traduson na mundu ntidu, i mprimidu na makinas di altu vulusidadi na manga di Betel ku ta mprimi, dipus i mandadu pa mas di 110 mil kongregasons. Na tudu es prusesu, familia di Betel ta da ajuda ki pirsis pa tarbaju mas urjenti — pregason di bon noba. — Markus 13:10.

•  Ba kin ku ta tarbaja na Betel, i kal provisons ku fasidu pa relis?

•  Kal tarbaju urjenti ku ta apoiadu pa atividadi ku ta fasidu na kada Betel?

Membrus di familia di Betel ta tarbaja na diferentis dipartamentus, e ta kuida di atividadi di pregason na un o mas teras. E pudi tarbaja na ekipa di traduson, mprimi rivistas, inkaderna livrus, stoki di publikasons, pruduzi videos ku audiu, o kuida di utrus asuntus di ki zona.

Un Kumison di Filial ta supervisiona atividadi. Korpu Guvernanti ta da tarbajus di kada Betel pa un Kumison di Filial, formadu pa tris o mas ansions ben kualifikadu. Kumison ta nforma Korpu Guvernanti di progresu di obra na kada tera ku sta bas di si supervison ku kualker purblema ku pudi ten. E relatorius ta juda Korpu Guvernanti disidi kal asuntus ku dibi di konsideradu na prosimu publikasons, na runions ku asembleias. Representantis di Korpu Guvernanti ta mandadu sempri pa visita filial, i da Kumison di Filial orientasons na manera de kuida di se disignasons. (Ditus 11:14) Un programa spesial juntu ku diskursu di representanti di sedi mundial ta purparadu pa nkoraẑa kilis ku mora na tiritoriu di filial.

Apoiu ta dadu pa kongregasons lokal. Irmons responsavel na skritoriu di filial ta aprova formason di nobu kongregasons. Tambi i ten irmons ku ta kuida di atividadi di pionerus, misionarius ku superintendentis di sirkuitu ku ta sirbi na tiritoriu di filial. E ta organiza asembleias ku kongresus, kordena konstruson di nobu Salons di Renu i jubi si kontra publikasons mandadu pa kongregasons pa kubri se nesesidadi. Tudu ku ta fasidu na filial ta kontribui pa obra di pregason fasidu na ordi. — 1 Koríntius 14:​33, 40.

•  Kuma ki Kumisons di Filial ta juda Korpu Guvernanti?

•  Kal responsabilidadis ku ta kuidadu del na un filial?

Pa pudi fasi no minjor na konta “Bon Noba” pa “tudu nason ku rasa ku lingua ku pobu,” no ta fasi publikasons na mas di 750 lingua. (Apokalipsi 14:​6) Kuma no ta konsigi nfrenta es disafiu? No tene skirbiduris na manga di teras ku bin di diferentis nasons juntu ku un grupu di tradutoris dedikadu — tudu i Tustumuñas di Jeova.

Testu orijinal ta purparadu na inglis. Korpu Guvernanti ta supervisiona atividadi di Dipartamentu di Redason na sedi mundial. Es dipartamentu ta kordena disignason di skirbiduris ku ta sirbi na sedi mundial i na alguns skritorius di filial. Suma no skirbiduris bin di diferentis nasons ku teras, kila ta pirmitinu skirbi asuntus ku ta afeta jintis di diferentis kultura, pa kila no publikasons ta toka jintis di manga di teras.

Testu ta mandadu pa tradutoris. Dipus ku materia skirbidu i aprovadu, i ta mandadu atraves di komputadoris pa ekipas di traduson na tudu mundu, e ta traduzi, verifika i fasi revison di testu. E ta sforsa kuji “palabra di bardadi” ku ta transmiti tudu signifikadu di inglis na se lingua. — Eklesiastis 12:10.

Komputadoris ta silera tarbaju. Un komputador ka pudi toma lugar di skirbiduris ku tradutoris. Ma se tarbaju pudi fasidu rapidu ku usu di disionarius eletroniku, programas di komputador i ku feramentas di piskisa. Tustumuñas di Jeova fasi un Sistema di Editorason Eletroniku na manga di Linguas (MEPS). Es ta pirmiti elis skirbi testu na sentenas di linguas juntu ku gravuras i purpara testu pa mpreson.

Ke ku manda no ta fasi e manga di sforsu, te mesmu pa linguas ku ta papiadu so pa puku jintis? Pabia i di vontadi di Jeova pa “tudu jintis salba, pa e ciga di kunsi bardadi.” — 1 Timótiu 2:⁠3, 4.

•  Kuma ki no publikasons ta skirbidu?

•  Ke ku manda no ta traduzi no publikasons na manga di linguas?

No organizason ta pruduzi i distribui milyons di Biblia ku utrus publikasons kada anu sin kobra nada. No ta kumpu no repara Salons di Renu ku idifisius di filial. No ta apoia milyaris di betelitas ku misionarius, i no ta da ajuda na mumentus di disastri. Talves bu na punta: ‘Kuma kes tudu ta finansiadu?’

No ka ta kobra dizimu, taŝas, o pidi diñeru. Kustu di no tarbaju di ivanjelizason i garandi dimas, ma mesmu asin, no ka ta pidi diñeru. Mas di sen anu atras, sugundu artigu di rivista A Sentinela fala kuma no akredita ki, Jeova i no apoiadur i pa kila, no organizason “ka na fasi nin un pididu pa omis apoia no tarbaju” — i nunka no fasil! — Mateus 10:⁠8.

No obra ta apoiadu pa ofertas di livri vontadi. Manga di jintis ta apresia no tarbaju di sina Biblia i e ta apoial. Propi Tustumuñas di Jeova, di manera alegri e ta kontribui ku se tempu, inerẑia, diñeru i ku utrus meius pa fasi vontadi di Deus na tudu mundu. (1 Kronikas 29:⁠9) Na Salon di Renu i na no asembleias ku kongresus, i ten kaŝas di kontribuison nunde ku kilis ku misti fasi oferta pudi fasil. Tambi oferta pudi fasidu atraves di no site jw.org. Maioria di diñeru ku ta risibidu, ta bin di jintis simplis, manga delis i suma ki viuva pobri ku Jesus ngaba pa manera ki pui dus mueda di puku balur na kofri di templu. (Lukas 21:​1-4) Asin, kada kin pudi ba ta “pui aparti si oferta” pa da “konformi i sinti na si korson.” — 1 Koríntius 16:2; 2 Koríntius 9:⁠7.

No sta konvensidu di kuma Jeova na kontinua motiva korson di kilis ku misti ‘dal gloria ku se rikesa’ na apoia tarbaju di prega Renu, asin si vontadi na pudi fasidu. — Ditus 3:⁠9.

•  Ke ku ta diferensia no organizason ku utrus riliẑion?

•  Kuma ku ofertas vuluntariu ta usadu?

Suma ki propi nomi Salon di Renu misti mostra, nsinu prinsipal di Biblia ku ta konsideradu la, ta konsentra na Renu di Deus — tema di pregason di Jesus. — Lukas 8:⁠1.

I sentrus di adorason di bardadi na kumunidadi. I nes kau ku pregason di bon noba di Renu ta organizadu. (Mateus 24:14) Salons di Renu ta diferenti na tamañu ku stilu, ma tudu i simplis idifisius, i manga delis ta usadu pa mas di un kongregason. Na anus resenti no kumpu milyaris di nobu Salons di Renu (un media di sinku kada dia) pa kumpaña omentu di publikadoris ku kongregasons. Kuma kes pudi sedu? — Mateus 19:26.

E ta kumpudu ku ofertas ku ta fasidu pa konstruson di Salons di Renu. E ofertas ta mandadu pa skritoriu di filial, asin diñeru pudi sta dispunivel pa kongregasons ku pirsisa di kumpu o repara se Salon di Renu.

E ta kumpudu pa vuluntarius di diferentis formasons ku ka ta pagadu. Na manga di teras i organizadu Grupus di Konstruson di Salon di Renu. Ekipas di ajudantis ku vuluntarius ta bai di un kongregason pa utru dentru di ki tera, te mesmu na zonas lunju, pa juda kongregasons lokal kumpu se Salons di Renu. Na utru teras, Tustumuñas di Jeova kualifikadu ta disignadu pa supervisiona kunstruson ku renovason di Salons di Renu dentru di un reẑion disignadu. I bardadi kuma manga di tarbajaduris profisional di ki reẑion ta bin juda na tudu kaus di konstruson, ma membrus di kongregason lokal ta forma parti mas garandi di vuluntarius pa tarbaja. Spiritu di Jeova ku tudu sforsu sinseru di si povu ta torna es tudu pusivel. — Salmu 127:1; Kolosensis 3:​23.

•  Ke ku manda no lugaris di adorason ta comadu Salons di Renu?

•  Kuma ki pusivel kumpu Salons di Renu na mundu ntidu?

Kada Salon di Renu di Tustumuñas di Jeova, i sentru nunde ku Jeova ta adoradu. Pa kila, no ta sinti kuma i un privileẑiu tambi i parti importanti di no adorason mantil limpu, apresentavel, i na bon stadu. Tudu jinti pudi partisipa.

Sedu vuluntariu dipus di runion pa fasi algun limpeza. Dipus di kada runion, irmons ku irmas ta kontenti fasi un limpeza siñu pa ruma Salon di Renu. Un bias na sumana, un limpeza mas kompletu ta fasidu. Un ansion o servu ministerial ta kordena tarbaju, manga di bias i ta sigidu un lista di kusas ku dibi di fasidu. I ta dipindi di nesesidadi, kada kin ta juda na tarbajus suma bari, pasa panu, tira puera, kumpu asentus, limpa i disinfeta kasa di bañu, ­limpa janelas ku spelius, bota liŝu, limpa fora i kuida di ­plantas. Pelu menus un bias pa anu, un dia ta kujidu pa fasi un limpeza mas garandi. Nklui no fijus na alguns tarbajus ta pirmitinu sina elis rispita no kau di adorason. — Eklesiastis 5:⁠1.

Sedu vuluntariu pa juda na kualker reparason ki pirsis. Kada anu un inspeson kompletu ta fasidu na Salon di Renu, dentru ku fora. Basiadu nes inspeson, manutenson regular ta fasidu pa manti Salon na un bon stadu, i ivita di fasi gastus ki ka pirsis. (2 Kronikas 24:13; 34:10) Un Salon di Renu limpu i ben kuidadu i un kau dignu pa adora no Deus. Si no sta dispostu pa fasi es tarbaju, no ta mostra kuma no ama Jeova, i no valoriza no kau di adorason. (Salmu 122:⁠1) Kila tambi ta da un bon nomi na kumunidadi. — 2 Koríntius 6:⁠3.

•  Ke ku manda no ka dibi di niglijensia no kau di adorason?

•  Kal aranẑus ku fasidu pa manti Salon di Renu limpu?

Bu misti fasi alguns piskisa pa omenta bu kuñisimentu di Biblia? Bu sta kuriosu pa aprindi aserka di un testu di Biblia o di kunsi un algin, lugar, o un kusa ku mensionadu na Biblia? Bu ciga ja di punta di kal manera ku Palabra di Deus pudi judau na un preokupason ku bu tene? Enton visita biblioteka di Salon di Renu.

I tene feramentas ku ta juda na piskisa. Talves bu ka tene tudu publikasons bibliku di Tustumuñas di Jeova ku sta dispunivel na bu lingua. Ma biblioteka di Salon di Renu tene maioria di publikasons resenti. I pudi tene tambi diferentis tradusons di Biblia, un bon disionariu, ku utrus bon obras di referensia. Bu pudi sta avontadi pa usa biblioteka antis i dipus di runions. Si komputador pudu la, talves i tene Watchtower Library instaladu. Es i um programa di komputador ku tene manga di no publikasons, i tene un feramenta di piskisa fasil di usa pa piskisa un asuntu, un palabra o un testu di Biblia.

I bon pa alunus di Runion Vida ku Ministeriu. Bu pudi fasi un bon usu di biblioteka di Salon di Renu ora ku bu na purpara bu disignasons. Superintendenti di skola i responsavel di biblioteka. I responsavel di kuida pa nobus publikasons pudu la i pa e sta ben organizadu. El o kin ku ta studa Biblia ku bo pudi mostrau kuma ku bu pudi nkontra nformason ku bu pirsisa del. Ma nin un livru di biblioteka ka dibi di sai fora di Salon di Renu. I pa kila, no misti kuida di livrus diritu pa ka fasi nin un anotason la.

Biblia fala kuma pa oja “kunsimentu di Deus” no dibi di buskal suma “rikesa sukundidu.” (Ditus 2:​1-5) Biblioteka di Salon di Renu pudi judau kumsa es buska.

•  Kal feramentas di piskisa ku ten na biblioteka di Salon di Renu?

•  Kin ku pudi judau fasi bon usu di biblioteka?

Jesus Kristu fala si sigiduris: “Bo dibi di fasi bo lus pa i numia dianti di jintis, pa e pudi oja kusas bon ku bo ta fasi, pa e pudi ngaba bo pape ku sta na seu.” (Mateus 5:16) Pabia des ku manda, no ta fasi bon usu di teknolojia mudernu, suma internet. No paẑina na internet, jw.org, i un fonti ofisial di nformasons aserka di krensas ku atividadis di Tustumuñas di Jeova. Ke ki pudi ojadu la?

Respostas di Biblia pa purguntas ku mas ta fasidu. Bu pudi oja respostas di alguns purguntas importanti ku jintis kustuma fasi. Pur izemplu, tratadu Sera ki un dia sufrimentu na kaba? ku tratadu Jintis ku muri pudi na bardadi vivi di nobu? sta dispunivel na internet na mas di 600 linguas. Bu pudi oja tambi Tradução do Novo Mundo na mas di 130 linguas ku manga di publikasons pa studu di Biblia, suma Bon Noba ku Bin di Deus! ku artigus resenti di A Sentinela ku Despertai! Manga des publikasons pudi leidu o jubidu na internet o i pudi baŝadu na formatus audiu, PDF o EPUB. Bu pudi te mesmu mprimi alguns paẑinas pa da un algin interesadu na si propi lingua! Publikasons na formatu di video sta dispunivel na manga di linguas di sinal. Bu pudi baŝa leitura bibliku dramatizadu, tiatrus bibliku, ku kantikus bonitu pa pasa bu mumentus di divirtimentu.

Nformason di bardadi aserka di Tustumuñas di Jeova. I ta pudu tambi nformasons mas resenti ku videos aserka di no tarbaju na mundu ntidu, iventus ku ta afeta Tustumuñas di Jeova, ku no sforsus na da ajuda umanitariu. Bu pudi oja nformasons aserka di kongresus ku na bin ku nformasons di kontaktu di no skritorius di filial.

Atraves des meius, no ta numia lus di bardadi pa partis mas lunju di tera. Jintis di tudu kontinenti, te mesmu di Antartida sta na benefisia. No ta ora pa ‘palabra di Jeova spaja rapidu’ na tudu tera, pa gloria di Deus. — 2 Tesalonisensis 3:⁠1.

• Kuma ku paẑina na internet, jw.org sta na juda mas jintis kunsi bardadis di Biblia?

• Ke ku bu misti jubi na no paẑina na internet?