Manga di jintis para mati kultus riliẑiosu, pabia e ka oja konsolu nin respostas pa purguntas mas importanti di vida. Ke ku manda, gosi, bu dibi di mati runions ku ta organizadu pa Tustumuñas di Jeova? Ke ku bu na oja la?

Alegria di sta na metadi di jintis ku amau i ku ta preokupa ku bo. Na purmeru sekulu, kristons staba organizadu na kongregasons, i e ta fasi runions pa adora Deus, pa studa Skrituras i pa nkoraẑa n̈utru. (Ebreus 10:24, 25) Na metadi di un ambienti di amor, e ta sinti ki e sta entri amigus di bardadi — se irmons spiritual. (2 Tesalonisensis 1:3; 3 Jon 14) No ta sigi es izemplu i no ta sinti mesmu alegria.

Benefisius di aprindi manera di aplika ke ku Biblia fala. Suma ki faladu na Biblia, omis, minjeris ku mininus ta riuni tudu juntu. Instrutoris kualifikadu ta usa Biblia pa judanu ntindi kuma ku no pudi aplika orientasons di Biblia na vida di kada dia. (Ripitison di Lei 31:12; Neemias 8:⁠8) Tudu jintis pudi spresa se fe atraves di komentarius ku kantiku. — Ebreus 10:23.

Benson di tene bu fe na Deus fortalisidu. Apostulu Paulu falaba un di kongregasons di si tempu: “N misti oja bos, . . . ami ku bos juntu no pudi fortifika n̈utru, ami pabia di bo fe, abos pabia di ña fe.” (Romanus 1:​11, 12) Asosia sempri ku no irmons na runions, ta fortalisi no fe ku disison di vivi na armonia ku ke ki Biblia fala.

Bu sta kumbidadu mati no prosimu runion di kongregason pa abo propi bu oja ke ku faladu nes lison. Bu na sedu ben-vindu. Tudu runions i sin pagu — nunka i pididu diñeru.

•  Kal izemplu ku no runions di kongregason ta sigi?

•  Kal benefisius ku no pudi tene di mati runions?

Mesmu si no dibi di ba yanda distansia garandi, na lama o puera, no ta mati sempri no runions. Ke ku manda, mesmu ku disafius di vida o kansasu dipus di un dia di tarbaju, Tustumuñas di Jeova ta fasi sforsu pa asosia ku se irmons na fe?

I ta judanu lida ku disafius di vida. Oca i na papia di kilis ku no ta asosia kelis na kongregason, Paulu fala ki no dibi di “pensa na n̈utru.” (Ebreus 10:24) Es palabras signifika ki no dibi di kunsi n̈utru diritu. I ta nsentivanu preokupa ku utrus. Kunsi utrus membrus di kongregason na lebanu diskubri ki alguns delis konsigi vensi disafius suma di nos i kila pudi judanu fasi suma elis.

I ta disenvolvi amizadis forti. Na no runions, no ka ta junta so ku simplis kuñisidus, ma ku un grupu di bons amigus. Na utru mumentus, no ta pasa tempu juntu na un bon divirtimentu. Kal benefisiu kes tipu di asosiason tene? No ta aprindi apresia n̈utru mas, i kila ta fortalisi no lasus di amor. Asin, ora ku no irmons ku irmas sta na pasa purblemas, no ta sta prontu pa juda elis, pabia i ten un amizadi forti na no metadi. (Ditus 17:17) Asosia ku tudu membrus di no kongregason ta mostra kuma no “tene mesmu tratu un pa utru.” — 1 Koríntius 12:​25, 26.

No na nsentivau pa bu fasi amizadi ku kilis ku sta na fasi vontadi di Deus. Bu na oja e tipu di amigus na metadi di Tustumuñas di Jeova. Ten pasensa ka bu disa nada tujiu asosia ku nos.

•  Ke ku manda asosiason na runions ta benefisianu?

•  Kal tempu ku bu pensa kunsi no kongregason?

Runions di purmeru kristons seduba simplis. E ta kantaba, ora, lei i kombersa aserka di Skrituras. (1 Koríntius 14:26) Bu pudi oja mesmu kusa na no runions.

Instrusons ta basia na Biblia i sedu pratiku. Na fin di sumana, kada kongregason ta riuni pa obi un Diskursu Bibliku di 30 minutu, ku ta mostra kal ki balur di Biblia na no vida i kuma ki ta relasiona ku tempus ku no sta na vivi. Anos tudu no ta nsentivadu sigi ku no propi Biblia. Dipus di diskursu, i ta ten un ora di Studu di “A Sentinela”, nunde ku tudu jintis pudi partisipa na konsiderason di un artigu basiadu na edison di studu di A Sentinela. Es konsiderason ta judanu aplika orientasons di Biblia na no vida. Mesmu materia ta studadu na mas di 110 mil kongregasons na mundu ntidu.

No ta judadu minjoria no abilidadi di sina. No ta riuni tambi na metadi di sumana pa un programa di tris parti ku tene tema No Vida Kriston ku No Ministeriu, basiadu na un manual ku ta furnisidu kada mis, Manual pa Runion Vida ku Ministeriu. Purmeru parti di runion, Rikesas di Palabra di Deus ta judanu ntindi diritu parti di Biblia ku kongregason lei na ki sumana. Dipus, parti Fasi bu Minjor na Ministeriu ta nklui dimostrasons aserka di kuma ku no pudi papia ku utrus aserka di Biblia. Un konsileiru ta da konsiju ku ta judanu minjoria no abilidadi di lei ku papia. (1 Timótiu 4:​13) Ultimu parti No Vida Kriston ta fala di kuma ku no pudi pui na pratika prinsipius di Biblia na no Vida. Es parti ta nklui un konsiderason di purgunta ku resposta ku ta omenta no ntindimentu di Biblia.

Ora ku bu mati no runions, sin duvida bu na fika adimiradu ku kualidadi di nsinu ku bu na risibi.— Isaias 54:13.

•  Ke ku bu pudi spera obi na runions di Tustumuñas di Jeova?

•  Kal un di no runions ku bu misti mati?

Bu nota na fotos des broŝura kuma ku Tustumuñas di Jeova ta bisti diritu ora ke na bai se runions? Ke ku manda no ta da manga di atenson pa no aparensia ku manera di bisti?

Pa mostra rispitu pa no Deus. I bardadi kuma Deus ka ta konsentra na no aparensia. (1 Samuel 16:⁠7) Ma, ora ku no junta pa adoral, no diseẑu di korson i pa mostra rispitu pa rel i pa no kumpañeris di adorason. Si no dibi di baiba nunde un rei o un prisidenti, no na misti kuida di no aparensia pabia di si kargu. Di mesmu manera, no aparensia na runions ta mostra no rispitu pa “Rei di nasons,” Jeova Deus, i rispitu pa kau ku no ta adoral. — Jeremias 10:7.

Pa mostra normas ku no ta sigi. Biblia nsentiva kristons pa bisti “simplis, ku rispitu.” (1 Timótiu 2:​9, 10) Bisti di un manera “simplis” signifika ivita ropas ku pudi coma manga di atenson pa no kabesa, ku ta provoka o ku sedu transparenti. Tambi, tene “rispitu” na judanu kuji ropas bonitu ku ka sedu disleŝadu o ijajeradu. Es orientasons ta pirmiti pa i ten manga di diferensa na skolia pesual. Sin papia, no aparensia atraenti i di bon gustu pudi sedu “bon fajamentu na tudu kusa pa nsinamentu di Deus no Salbadur” i ‘ngabal.’ (Titu 2:​10; 1 Pedru 2:​12) Si no bisti diritu pa runions, no pudi nfluensia manera di utrus nkara adorason di Jeova.

Mesmu si bu ka tene ropa sosial, ka bu disa di bai Salon di Renu. No ropas ka pirsisa di sedu karu o sta na moda, basta e sedu limpu i apresentavel.

•  Ke ku manda manera di no bisti i importanti ora ku no na adora Deus?

•  Kal orientasons ku ta gia no manera di bisti i kuida di no aparensia?

Si bu ta studa Biblia ku un Tustumuña di Jeova, i pudi sedu ki bu ta purpara materia antis di kada studu. I bon fasi mesmu kusa antis di mati un runion di kongregason, pa bu benefisia mas. No na tene bon rusultadu si no ta fasil sempri.

Kuji ora ku lugar di studa. Kal ora ku bu mas ta konsentra minjor? I parmaña sedu antis di kumsa bu dia di tarbaju o di noiti dipus di mininus bai pa kama? Mesmu si bu ka ta konsigi studa manga di tempu, disidi kantu tempu ku bu pudi usa pa studa i ka bu pirmiti nada tujiu fasil. Buska un kau kalmu, disliga radiu, televison ku telemovel pa ivita di tudu distrasons. Ora antis di bu studa na judau alivia preokupasons di dia, asin bu na pudi konsentra na Palabra di Deus. — Filipensis 4:⁠6, 7.

Subliña materia i purpara pa partisipa. Purmeru, tene un ideia jeral di asuntu. Pensa na tema di artigu o kapitulu, jubi kuma ki kada subtitulu relasiona ku tema, izamina kualker gavuras ku purguntas di revison ku ta distaka pontus prinsipal. Dipus lei kada paragrafu i buska resposta di si purgunta. Buska testus sitadu i lei elis, dipus pensa na kuma ke ta apoia asuntu. (Atus 17:11) Ora ku bu oja resposta di purgunta, subliña o distaka alguns palabras o frasis prinsipal na paragrafu ku na judau lembra di resposta. Dipus, na runion, bu pudi yalsa mon si bu misti, i fasi un komentariu brevi na bu propi palabras.

Studa diferentis kusas ku ta konsideradu na runions di kada sumana na omenta bu kuñisimentu di Biblia. — Mateus 13:​51, 52.

•  Ke ki bu dibi di ba ta fasi sempri pa purpara pa runions?

•  Kuma ku bu pudi purpara pa fasi komentariu na runion?

Desdi tempus antigu, Jeova misti pa kada familia pasa tempu juntu, pa e fortalisi se spiritualidadi ku se relason. (Ripitison di Lei 6:​6, 7) Es ku pui familias Tustumuñas di Jeova ta tira tempu kada sumana pa adora Deus juntu — e ta kombersa na un ambienti diskontraidu aserka di asuntus spiritual ku relasiona ku se nesesidadis. Mesmu si bu mora abo so, bu pudi usa ki tempu pa pertusi di Deus atraves di un projetu di studu pesual di Biblia di bu skolia.

I tempu di pertusi mas di Jeova. “Bo ciga pertu di Deus; i ta ciga pa bos.” (Tiagu 4:⁠8) No mas ta kunsi Jeova ora ku no aprindi nformasons aserka di si personalidadi ku si asons atraves di si Palabra, Biblia. Un manera fasil di kumsa bu adorason na familia i toma un parti di tempu pa lei Biblia na vos altu juntu, talves sigi programa di kada sumana di runion Vida ku Ministeriu. Un parti di leitura pudi disignadu pa kada membru di familia, dipus, tudu pudi kombersa aserka di ke ku aprindidu di Skrituras.

I tempu di pertusi mas di membrus di familia. Omis ku minjeris, papes, mames ku fijus, ta fortalisi se relason ku n̈utru ora ke na studa Biblia suma familia. I dibi di sedu un mumentu filis, kalmu, un iventu mas importanti di sumana. Papes o mames pudi kuji asuntus pratiku pa konsidera, konformi idadi di se fijus, i pudi sedu artigus di A Sentinela ku Despertai! o asuntus ku sta na no site, jw.org. Bu pudi papia di purblemas ku bu fijus ta pasa na skola i kuma ke pudi lida kel. Bo pudi jubi programa JW Broadcasting (tv.jw.org) i dipus bo kombersa aserka del. Bo pudi nsaia kantikus ku na bin kantadu na runions i kume un kusa siñu dipus di adorason na familia.

Es mumentu spesial ku ta usadu kada sumana pa adora Jeova juntu, na juda tudu membrus di familia sinti praser na studa Palabra di Deus, el i na abensua ciu bu sforsu.— Salmu 1:​1-3.

• Ke ku manda no ta ranja tempu pa adorason na familia?

• Kuma ku papes o mames pudi fasi es mumentu sedu di alegria pa tudu na familia?

Ke ku manda es jintis sta ku kara alegri? E sta na mati un di no asembleias. Suma servus di Deus na pasadu ku daduba instruson di ba ta junta tris bias kada anu, no ta pera ku alegria junta na grupus garandi. (Ripitison di Lei 16:16) Kada anu, no ta tene tris iventus: dus asembleia di sirkuitu di un dia ku un kongresu reẑional di tris dia. Kuma ku no ta benefisia des iventus?

E ta fortalisi no ermondadi kriston. Suma manera ku Israelitas ta kontentiba ngaba Jeova “na juntamentu,” anos tambi no ta kontenti adora Jeova juntu nes mumentus spesial. (Salmu 26:12; 111:1) Es iventus ta kria opurtunidadi di kontra i asosia ku Tustumuñas di Jeova di utrus kongregasons o te mesmu di utrus tera. Kada familia o kada kin ta insentivadu leba un kusa di kume simplis, asin me-dia no pudi kume juntu na kau di asembleia i buri un ambienti di amizadi nes mumentus spiritual. (Atus 2:​42) Nes asembleias garandi, no ta oja ku no propi ujus amor ku ta uni no “ermons” na mundu ntidu. — 1 Pedru 2:​17.

E ta judanu fasi progresu spiritual. Israelitas ta benefisiaba tambi di ‘ntindi palabras’ di Skrituras ke splikadu. (Neemias 8:​8, 12) Anos tambi no ta apresia instrusons di Biblia ku no ta risibi na no asembleias. Kada programa ta basia na un tema bibliku. Atraves di diskursus, simposius ku dimostrasons interesantis, no ta aprindi kuma ku no pudi fasi vontadi di Deus na no vida. No ta nkoraẑadu ora ku no obi spriensias di kilis ku sai ben na lida ku difikuldadis di vivi suma kriston nes tempus difisil. Na kongresus reẑional, tiatrus ta torna storias di Biblia mas real pa nos i e ta sinanu lisons pratiku. Na kada asembleia, i ta batizadu kilis ku misti mostra kuma e dedika pa Deus.

•  Pabia ku asembleias sedu mumentus alegri?

•  Kuma ku bu pudi benefisia di mati un asembleia?

Puku tempu antis di i muri, Jesus fala: “E Bon Noba di renu i na kontadu na tudu mundu pa sedu tustumuñu pa tudu rasa. Dipus, fin ta ciga.” (Mateus 24:14) Ma kuma kes tarbaju di pregason na mundu ntidu na fasidu? Atraves di sigi izemplu ku Jesus disa oca i staba na tera. — Lukas 8:⁠1.

No ta tenta kontakta jintis na se kasas. Jesus trena si disipulus pa prega bon noba di kasa pa kasa. (Mateus 10:​11-​13; Atus 5:​42; 20:20) Es ivanjelizaduris di purmeru sekulu daduba tiritorius spesifiku pa prega. (Mateus 10:5, 6; 2 Koríntius 10:13) Di mesmu manera aos, no tarbaju di pregason sta ben organizadu, i kada kongregason ta disignadu un aria pa kubri. Es ta pirmitinu kumpri mandamentu di Jesus di “prega povu i da tustumuñu kompletu.” — Atus 10:42, NM.

No ta sforsa pa oja jintis na kualker kau ke sta. Jesus tambi disa un izemplu atraves di prega jintis na kaus publiku, suma na bera di mar o na fontis. (Markus 4:1; Jon 4:5-15) Anos tambi no ta kombersa ku jintis aserka di Biblia na kualker kau ku no pudi — na stradas, na fera, na jardins, o atraves di telefoni. Ora ki surji opurtunidadi, no ta prega tambi no viziñus, kolegas di tarbaju, di skola o parentis. Tudu es sforsu ta pui pa milyons di jintis na mundu ntidu obi bon noba di “salbason.” — Salmu 96:2.

Bu pudi pensa na un algin ku bu pudi konta bon noba di Renu di Deus i splikal ke ki bon noba signifika pa si futuru? Ka bu fika kes mensaẑen di speransa so pa bo. Konta utrus el mas rapidu ku bu pudi!

•  Kal “Bon Noba” ku dibi di kontadu?

•  Kuma ki Tusmumuñas di Jeova ta kopia Jesus na manera di prega?

Palabra “pioneru” manga di bias ta rifiri algin ku pasa dianti pa limpa kamiñu nunde ku utrus pudi viaẑa. Jesus seduba suma pioneru, pabia i mandadu pa tera pa prega un mensaẑen ku ta salba vida i limpa kamiñu pa salbason. (Mateus 20:28) Aos, si sigiduris ta kopial pa manera ke ta gasta manga di tempu ke pudi na ‘fasi disipulus.’ (Mateus 28:​19, 20) Alguns konsigi partisipa na kil ku no ta coma di sirvisu di pioneru.

Un pioneru i un ivanjelizadur di tempu kompletu. Tudu Tustumuñas di Jeova i publikadoris di bon noba. Ma alguns organiza se vida pa sirbi suma pionerus regular, e ta gasta 70 oras kada mis na tarbaju di pregason. Pa fasi es, manga delis pirfiri un tarbaju di me-priudu. Utrus kujidu pa sirbi suma pionerus spesial na zonas nunde ki ten mas nesesidadi di publikadoris di Renu, e ta gasta 130 oras o mas na pregason kada mis. Pionerus ta kontenti leba un vida simplis, i konfia di kuma Jeova na da elis kil ki pirsis pa vivi. (Mateus 6:​31-​33; 1 Timótiu 6:6-8) Kilis ku ka pudi sedu pioneru pa tempu kompletu, pudi sirbi suma pionerus ausiliar, asin e na pudi omenta se atividadi di pregason pa 30 o 50 oras na mis.

Pioneru ta motivadu pa amor pa Deus i pa jintis. Suma Jesus, no nota kuma manga di jintis tene nesesidadi garandi di kunsi Deus ku si intenson pa tera. (Markus 6:​34) Ma no tene nformason ku pudi juda elis gosi, i da elis un speransa suguru pa futuru. Amor pa utrus ta motiva un pioneru na da ciu di si tempu ku inerẑia pa juda utrus kunsi bon noba. (Mateus 22:39; 1 Tesalonisensis 2:⁠8) Kila ta fortalisi si fe, i ta pertusil mas di Deus i omenta si filisidadi. — Atus 20:35.

•  Ke ki un pioneru pa bo?

•  Ke ku motiva alguns pa sedu pioneru pa tempu kompletu?

Pa manga di tempu ja, ku idukason teokratiku sedu un marka di Tustumuñas di Jeova. I fasidu skolas spesial pa kilis ku ta gasta mas tempu na tarbaju di pregason di Renu, pa e pudi ‘fasi tudu sirvis ku e comadu pa el.’ — 2 Timótiu 4:5.

Skola di Sirvisu di Pioneru. Na fin di purmeru anu di sirvisu di tempu kompletu, pioneru ta mati un skola di seis dia ku talves pudi fasidu na Salon di Renu mas pertu. Objetivu des skola i pa juda pioneru pertusi mas di Jeova, i tene mas abilidadi na tudu forma di pregason, i kontinua fiel na sirvisu.

Skola pa Ivanjilizaduris di Renu. Es skola di dus mis i pa forma pionerus ku tene ja spiriensia i ku sta dispostu pa bai sirbi na kualker kau ke mandadu. Na imitason di Jesus Kristu, Ivanjelizadur mas garandi ku sirbi ja Deus na tera, sta suma es pionerus na fala: “Alin li; mandan!” (Isaias 6:8; Jon 7:29) Muda pa utru ladu talves pudi nvolvi muda di manera di vivi. Talves kultura, klima ku kumida pudi sedu diferenti di kil ku bu kustuma. I pudi te mesmu pirsis pa bu aprindi nobu lingua. Es skola na juda irmons ku irmas solterus i kasadus ku tene entri 23 te 65 anu. I na juda elis tene kualidadis spiritual ke na pirsisa del na se disignason, i tene abilidadis ku na pui pa e sedu mas usadu pa Jeova i pa si organizason.

Skola Bibliku di Jiliadi di Tori di Vijia. Na ebraiku, “Jiliadi” signifika “monti di tustumuñu.” Disna di 1943, mas di 8 mil jintis ku forma nes skola mandadu suma misionarius pa da un tustumuñu “te fin di mundu”, ku un bon rusultadu. (Atus 13:47) Oca misionarius kumsa ciga Peru, i ka tenba kongregason la. Gosi i ten mas di 1000 kongregasons. Oca no misionarius kumsa sirbi na Japon, i tenba menus di des Tustumuñas di Jeova la. Gosi no tene mas di 200 mil. Kursu tudu, i sinku mis di studu kompletu di Palabra di Deus. Kilis ku na sirbi suma pionerus spesial o misionarius, na filial o suma superintendenti di sirkuitu, ta kumbidadu pa risibi un trenamentu ntensivu nes skola pa pudi juda firmanta tarbaju di pregason na mundu ntidu.

•  Kal ki objetivu di skola di sirvisu di pioneru?

•  Pa kin ki fasidu skola di Ivanjilizaduris di Renu?