PURGUNTA 10

Kuma ku Biblia pudi judan?

PABIA KI BON PENSA NES

Biblia fala kuma, “tudu Skritura, i Deus ku nspiral.” (2 Timótiu 3:16) Si es i bardadi, nta Biblia pudi dau orientason ku bu pirsisa del.

KE KU BU NA FASIBA?

Imaẑina es sena: Davi na kurinti karu na un zona ki ka kunsi. Sinalis ku plakas na strada mostra kuma i ka sta na lugar sertu. Davi nota kuma i pirdi. Duranti viaẑen i toma un kamiñu ki ka dibi di tomaba.

Si bu staba na lugar di Davi, ke ku bu na fasiba?

PENSA UN BOKADU!

Bu tene manga di opsons:

Punta kal ki kamiñu.
Jubi mapa o usa GPS.
Kontinua kurinti karu, ku speransa di kuma di kualker manera bu na oja kamiñu.

I klaru kuma, opson C i kil ku mas ka na judau.

Opson B i minjor di ki purmeru opson. Pabia, i minjor tene un mapa o GPS pa i pudi judau i giau duranti bu bias.

Biblia pudi judau di mesmu manera!

Es minjor livru pudi:

giau ora ku bu tene purblema
judau kunsi bu kabesa i sedu un bon algin
mostrau kuma ku bu pudi tene minjor vida

RESPOSTAS PA PURGUNTAS MAS IMPORTANTI DI VIDA

Apartir di mumentu ku no pudi papia, no ta kumsa fasi purguntas.

Pabia ku seu i azul?
Kin ku kumpu strelas?

Mas tardi, no ta kumsa fasi purguntas aserka di mundu.

Ke ku manda i ten kusas mau?
Ke ku manda jintis ta muri?

Ke gora si respostas sta na Biblia?

Pa manga di jintis Biblia i un livru ŝeiu di storias inventadu, un livru ku pasa prazu, o i difisil di ntindi dimas. Ma sera ki bardadi, o i so ke ku jintis pensa? Es mundu sta fora di kontrolu!

Pur izemplu, jintis pensa kuma Deus ku na kontrola mundu. Ma kuma ku kila pudi sedu? Es mundu sta fora di kontrolu! I sta ŝeiu di dur ku sufrimentu, di duensa ku mortu, pobresa ku disastri. Kuma ki un Deus di amor pudi sedu responsavel pa es tudu?

Bu mistiba sibi resposta des purguntas? Ke ku Biblia fala aserka di kin ku na kontrola mundu talves pudi surprendiu!

Talves bu nota kuma konsijus ku sta nes broŝura i basiadu na Biblia. Tustumuñas di Jeova sta konvensidu di kuma Biblia i un gia konfiavel di orientason. Pabia di kuma i “Deus ku nspiral; i ten purbitu pa nsina, pa raprindi, pa kuriẑi, pa mostra manera di yanda diritu.” (2 Timótiu 3:16, 17) Minjor kusa ku bu pudi fasi i pa bu izamina es livru ku tarda, ma ku sedu inda mudernu!