Ke ki Renu di Deus?

Bu Pudi Tene un Vida Filis pa Sempri! — Benefisia di Studu di Biblia
- LISON 31
  
  Ke ki Renu di Deus?
  Mensaẑen mas importanti di Biblia i Renu di Deus. Jeova na usa si Renu pa torna Tera na un paraísu. Ke ki Renu? Kuma ku no sibi kuma i sta ja na manda? Ke ki i fasi ja? I ke ku i na bin fasi na futuru? Es lison ku dus ku na bin na ruspundi es purguntas.
  
  1. Ke ki Renu di Deus i kin ki si Rei?
  
  Renu i un guvernu ku Jeova Deus forma. Si Rei i Jesus Kristu, i sta na manda na seu. (Mateus 4:17; Jon 18:36) Biblia fala sin aserka di Jesus: “I na rena pa sempri”. (Lukas 1:32, 33) Suma Rei di Renu di Deus, Jesus na bin rena riba di tudu jintis na Tera.
  
  2. Ba kin ku na rena juntu ku Jesus?
  
  Jesus ka na rena el son. Jintis “di tudu rasa, di tudu lingua, di tudu pobu, di tudu nason . . . na rena riba di mundu.” (Apokalipsi 5:9, 10) Kantu jintis ku na rena juntu ku Kristu? Disna ku Jesus bin pa Tera milyons di kristons torna si sigiduris. Ma so 144.000 delis ku na bai seu pa rena juntu ku Jesus. (Apokalipsi 14:1-4) Tudu utrus kristons li na Tera na sedu sidadons di Renu. — Salmu 37:29.
  
  3. Pabia ku Renu di Deus i minjor di ki guvernus di pekadur?
  
  Nin si guvernus di pekadur tenta fasi bon kusas, e ka tene puder di fasi tudu ke ke misti. I kilis ku toma se lugar talves na pensa so na se kabesa i e ka na misti juda jintis. Ma ningin ka na toma lugar di Jesus, ku sedu Rei di Renu di Deus. Deus “lantanda utru renu ku nunka ka na danadu.” (Daniel 2:44) Jesus na bin manda riba di tudu Tera, i ka na trata un algin minjor di ki utru. Jesus tene amor, bondadi ku justisa, i na sina jintis trata n̈utru di mesmu manera, ku amor, ku bondadi i ku justisa. — Lei Isaias 11:9.
  APRINDI MAS
  
  Jubi pabia di ke ku manda Renu di Deus i minjor di ki kualker guvernu di pekadur.
  
  4. Renu di Deus na manda riba di tudu Tera
  
  Jesus Kristu tene puder pa manda mas di ki kualker guvernanti ku ciga ja di ten. Lei Mateus 28:18, dipus bo kombersa aserka des purgunta:
  
  Ke ku manda puder di Jesus i mas garandi di ki kualker pekadur ku na manda?
  
  Guvernus di pekadur ta muda manga di bias, i kada un delis ta manda so na un parti di tera. Ma ke gora di Renu di Deus? Lei Daniel 7:14, dipus bo kombersa aserka des purguntas:
  
  Pabia di ke ku manda i bon sibi di kuma Renu di Deus “ka na kabadu ku el”?
  
  Pabia di ke ku manda i bon sibi di kuma Renu di Deus na manda riba di tudu Tera?
  
  5. Guvernus di pekadur dibi di torkiadu
  
  Ke ku manda Renu di Deus dibi di toma lugar di guvernus di pekadur? Mostra VIDEO, dipus bo kombersa aserka des purgunta:
  
  VIDEO: Ke ki Renu di Deus? — So un parti (1:41)
  
  Kal ki rusultadu di guvernus di pekadur?
  
  Lei Eklesiastis 8:9, dipus bo kombersa aserka des purguntas:
  
  Bu pensa kuma Renu di Deus dibi di toma lugar di guvernus di pekadur? Pabia ku bu pensa sin?
  
  6. Renu di Deus tene guvernantis ku ta ntindi no situason
  
  No Rei Jesus viviba suma omi na Tera, asin i pudi “ten pena di no frakesa”. (Ebreus 4:15) 144.000 omis ku minjeris fiel ku na manda juntu ku Jesus kujidu pa Jeova “di tudu rasa, di tudu lingua, di tudu pobu, di tudu nason.” — Apokalipsi 5:9.
  
  Sera ki i ka ta animau di sibi di kuma Jesus ku tudu kilis ku na manda ku el ta ntindi no sintimentu ku no purblemas? Pabia ku bu fala sin?
  
  Jeova kuji omis ku minjeris di tudu formason pa manda ku Jesus.
  
  7. Renu di Deus tene minjor leis
  
  Guvernus ta fasi leis ke pensa di kuma i na benefisia i proteẑi se sidadons. Renu di Deus tene tambi leis ku si sidadons dibi di sigi. Lei 1 Koríntius 6:9-11, dipus bo kombersa aserka des purguntas:
  
  Kuma ku pensa mundu na sta si tudu jintis rispita leis di Deus?a
  
  Bu pensa kuma Jeova tene diritu di spera pa sidadons di Renu rispita si leis? Pabia?
  
  Ke ku mostra di kuma jintis ku ka ta obdisi es leis pudi muda? — Jubi versikulu 11.
  
  Guvernus ta fasi leis pa proteẑi i benefisia se sidadons. Renu di Deus tene minjoris leis pa proteẑi i benefisia si sidadons.
  
  ALGIN PUDI FALA: “Renu sta na no korson.”
  
  Ke ku bu na falal?
  RUSUMU
  
  Renu di Deus i un guvernu ku ten, i sta na seu, i na bin manda riba di tudu Tera.
  
  Rekapitulason
  
  Ba kin ku na guverna na Renu di Deus?
  
  Pabia di ke ku manda Renu di Deus i minjor di ki kualker guvernu di pekadur?
  
  Kal ki alguns kusas ku Jeova na spera pa sidadons di Renu fasi?
  
  No kaba es lison na dia:
  
  Tenta fasi es
  Lei aserka di guvernu di Jesus na Isaias 11:1-10, i jubi kuma ki diferenti di guvernus di pekadur.
  
  Utru kusa ku bu pudi fasi:
  Utru kusa ku bu pudi fasi
  
  TENE MAS INFORMASON
  
  Jubi nunde ku Jesus fala Renu di Deus sta nel.
  
  “Sera ki Renu di Deus Sta na Bu Korson?” (Artigu na internet)
  
  Diskubri ke ku Biblia fala aserka di 144.000 ku Jeova kuji pa rena juntu ku Jesus.
  
  “Kin ku na Bai pa Seu?” (Artigu na internet)
  
  Ke ku konvensi un minjer na prison di kuma so Deus ku pudi tisi un mundu di justisa?
  
  “N diskubri kuma injustisa ka na bin ten” (No Korda!, novembru di 2011)
  a Alguns des leis na bin faladu del na Seson 3.

Renu di Deus sta ja na manda!

Bu Pudi Tene un Vida Filis pa Sempri! — Benefisia di Studu di Biblia
- LISON 32
  
  Renu di Deus sta ja na manda!
  Renu di Deus kumsa ku manda na seu na 1914. Tambi i nes tempu ku fin di guvernus di pekadur kumsa. Kuma ku no sibi kila? No na jubi ke ku Biblia falaba ja, i ke ku sta na akontisi na mundu, i kuma ku jintis sta na komporta desdi 1914.
  
  1. Ke ku Biblia falaba ja del?
  
  Livru di Daniel mostra kuma, Renu di Deus na kumsa manda na fin di un tempu comadu “seti tempu”. (Daniel 4:16, 17) Manga di anu mas tardi, Jesus coma ki tempu suma tempu di “jintius”, i fala kuma es tempu ka kababa inda. (Lukas 21:24) Suma ku no na bin oja, e seti tempu kaba na 1914.
  
  2. Ke ku sta na akontisi na mundu i kuma ku jintis sta na komporta desdi 1914?
  
  Disipulus di Jesus puntal: “Kal sinal ku na mostra kuma bu na bin, kuma mundu na kaba?” (Mateus 24:3) Jesus konta elis manga di kusas ku na akontisi ora ki kumsa manda suma Rei di Renu di Deus. Alguns des kusas i gera, fomi ku tirmidura di con. (Lei Mateus 24:7.) Biblia falaba ja tambi kuma pabia di komportamentu di jintis na “fin de tempu” no na bin tene “kansera”. (2 Timótiu 3:1-5) Es kondisons di mundu ku komportamentu di jintis kumsa ku notadu di manera klaru desdi 1914.
  
  3. Ke ku manda situason di mundu torna pior disna ku Renu di Deus kumsa ku guverna?
  
  Puku tempu dipus di Jesus sedu Rei di Renu di Deus, i geria kontra Satanas ku si dimonius na seu. Satanas pirdi gera. Biblia fala: “I fercadu na tera, tudu ku si anjus.” (Apokalipsi 12:9, 10, 12) Satanas sta ku raiba garandi pabia i sibi kuma i na bin kabadu ku el. Asin, el i kulpadu pa dur ku sufrimentu ku ten na tudu Tera. Es ta judanu ntindi pabia di ke ku manda situason di mundu sta na piora! Renu di Deus na bin kaba ku tudu es purblemas.
  APRINDI MAS
  
  Jubi ke ku ta mostra kuma Renu kumsa ku guverna na 1914 i ke ku es dibi di lebanu pa fasi.
  
  4. Profesias di Biblia mostra kuma Renu di Deus kumsa guverna na 1914
  
  Mostra VIDEO.
  
  VIDEO: Renu di Deus Kumsa Guverna na 1914 (5:02)
  
  Deus pui pa un rei di antigu Babilonia Nabukodonosor tene un suñu ku na mostra ke ku na bin akontisi na futuru. Es suñu ku splikason ku Daniel da, na aplika pa guvernu di Nabukodonosor tambi pa Renu di Deus. — Lei Daniel 4:17.a
  
  Lei Daniel 4:20-26, dipus usa tabela pa ruspundi es purguntas:
  
  (A) Ke ku Nabukodonosor oja na si suñu? — Jubi versikulu 20 ku 21.
  
  (B) Ke ku na akontisi ku arvuri? — Jubi versikulu 23.
  
  (C) Ke ku na akontisi na fin di “seti tempu”? — Jubi versikulu 26.
  
  Kal relason ku ten entri suñu di arvuri ku Renu di Deus
  
  PROFESIA (Daniel 4:20-36)
  
  Guvernu
  
  (A) Un arvuri garandi
  
  Guvernu ntrumpidu
  
  (B) “Bo korta ki arvuri,” i bo disa “seti tempu pasa riba del”
  
  Guvernu ribantadu
  
  (C) “Bu renu na tornadu pa bo”
  
  Na purmeru kumprimentu des profesia . . .
  
  (D) Kin ku es arvuri na trata del? — Jubi versikulu 22.
  
  (E) Kuma ku si guvernu ntrumpidu? — Lei Daniel 4:29-33.
  
  (F) Ke ku akontisi ku Nabukodonosor na fin di “seti tempu”? — Lei Daniel 4:34-36.
  
  PURMERU KUMPRIMENTU
  
  Guvernu
  
  (D) Nabukodonosor, Rei di Babilonia
  
  Guvernu ntrumpidu
  
  (E) Dipus na 606 AEK, Nabukodonosor pirdi juisu i ka pudi manda pa seti anu
  
  Guvernu ribantadu
  
  (F) Nabukodonosor rekupera si juisu i kumsa manda mas
  
  Na sugundu kumprimentu des profesia . . .
  
  (G) Kin ku es arvuri na trata del? — Lei 1 Kronikas 29:23.
  
  (H) Kuma ku si renu ntrumpidu? Kuma ku no sibi kuma i kontinua ntrumpidu oca Jesus staba na Tera? — Lei Lukas 21:24.
  
  (I) Kal tempu i na nunde ku es guvernu kumsa manda mas?
  
  SUGUNDU KUMPRIMENTU
  
  Guvernu
  
  (G) Reis israelitas ta representaba guvernu di Deus
  
  Guvernu ntrumpidu
  
  (H) Jerusalen kabadu ku el, renansa di reis di Israel ntrumpidu pa 2.520 anu
  
  Guvernu ribantadu
  
  (I) Jesus kumsa ku manda na seu suma Rei di Renu di Deus
  
  Kal ki durason di seti tempu?
  
  Alguns parti di Biblia pudi judanu ntindi utru parti. Pur izemplu, livru di Apokalipsi fala di kuma tris anu i meiu o tris tempu i meiu korospondi 1.260 dias. (Apokalipsi 12:6, 14) Seti tempu i dobru di 1.260 dia, ku sedu 2.520 dia. Utrora Biblia ta usa dia pa fala di anu. (Ezekiel 4:6) Asin, es seti tempu ku faladu del na livru di Daniel, i 2.520 anu.
  5. Situason di mundu muda disna di 1914
  
  Mostra VIDEO.
  
  VIDEO: Situason di Mundu Muda Disna di 1914 (1:10)
  
  Jesus konta kuma ku mundu na sta ora ki sedu Rei. Lei Lukas 21:9-11, dipus bo kombersa aserka des purgunta:
  
  Kal kusas ku faladu del li ku bu sta na oja o obi?
  
  Apostulu Paulu konta kuma ku pekaduris na sedu na fin de tempu ora ku guvernus di pekadur pertu kaba. Lei 2 Timótiu 3:1-5, dipus bo kombersa aserka des purgunta:
  
  Kal un des komportamentus ku bu oja jintis tene aos?
  
  6. Ke ku Renu di Deus dibi di lebanu pa fasi
  
  Lei Mateus 24:3, 14, dipus bo kombersa aserka des purguntas:
  
  Kal tarbaju importanti ku ta mostra di kuma Renu di Deus kumsa ja ku manda?
  
  Kuma ku bu pudi partisipa nes tarbaju?
  
  Renu di Deus kumsa ja ku manda, i ka na tarda i na bin manda riba di tudu Tera. Lei Ebreus 10:24, 25, dipus bo kombersa aserka des purgunta:
  
  Ke ku kada un di nos dibi di fasi, suma ku no “oja Dia ku Siñor na bin mas na pertu”?
  
  Si bu aprindi un kusa ku pudi juda i salva vida di utrus, ke ku kila na lebau pa bu fasi?
  
  ALGIN PUDI PUNTA: “Ke ku manda Tustumuñas di Jeova ta papia ciu aserka di 1914?”
  
  Kuma ku bu na ruspundi?
  RUSUMU
  
  Profesias di Biblia, ku situasons na mundu ta mostra kuma Renu di Deus kumsa ja ku guverna. No ta mostra kuma no fia nes ora ku no na prega aserka di Renu i mati runions na kongregason.
  
  Rekapitulason
  
  Ke ku akontisi na fin di seti tempu ku faladu del na livru di Daniel?
  
  Ke ku konvensiu di kuma Renu di Deus kumsa ku guverna na 1914?
  
  Kuma ku bu pudi mostra kuma bu fia di kuma Renu di Deus sta ja na manda?
  
  No kaba es lison na dia:
  
  Tenta fasi es
  Sforsa pa sedu publikadur di bon noba.
  
  Utru kusa ku bu pudi fasi:
  Your other goal
  
  TENE MAS INFORMASON
  
  Jubi kuma ku profesia ku sta na Mateus 24:14 muda vida di un omi.
  
  “N gostaba di juga beisbol mas di ki kualker kusa!” (Sintinela N.° 3 2017)
  
  Kuma ku no sibi di kuma profesia ku faladu del na Daniel kapitulu 4 na aplika pa Renu di Deus?
  
  “Kal tempu ku Renu di Deus kumsa ku guverna? (Parti 1)” (Sintinela di 1 di otubru di 2014)
  
  Ke ku ta mostra kuma “seti tempu” ku faladu del na Daniel kapitulu 4 kaba na 1914?
  
  “Kal tempu ku Renu di Deus kumsa ku guverna? (Parti 2)” (Sintinela di 1 di novembru di 2014)
  a Jubi dus ultimu artigus ku sta na parti Tene Mas Informason des lison.

Ke ku Renu na bin fasi

Bu Pudi Tene un Vida Filis pa Sempri! — Benefisia di Studu di Biblia

LISON 33

Ke ku Renu na bin fasi

Renu di Deus sta ja na manda. I ka na tarda i na bin tisi mudansas garandi na Tera. Gosi no na bai jubi alguns di bon kusas ku bu na bin oja bas di renansa des Renu.

1. Kuma ku Renu di Deus na bin tisi pas ku justisa na Tera?

Jesus ku sedu Rei di Renu di Deus, na bin kaba ku jintis mau i ku tudu guvernus na gera di Armajedon. (Apokalipsi 16:14, 16) Na ki tempu, es promesa di Biblia na bin kumpri: “Dipus di puku tempu, jintis mau na disparsi”. (Salmu 37:10) Jesus na usa Renu pa fasi pa i ten pas ku justisa na tudu parti di Tera. — Lei Isaias 11:4.

2. Kuma ku vida na sedu ora ku vontadi di Deus fasidu na Tera?

Bas di renansa di Renu di Deus, “justus na yarda ki tera, e na mora nel pa sempri.” (Salmu 37:29) Imaẑina vivi na un mundu nunde ku tudu jintis sedu justu, e ama Jeova i e ama n̈utru! Nunde ku ningin ka na duensi i tudu jinti na vivi pa sempri.

3. Ke ku Renu di Deus na fasi ora ku maus kabadu kel?

Ora ku maus kabadu kel, Jesus na manda suma Rei pa 1.000 anu. Duranti ki tempu, Jesus ku 144.000 ku na judal manda e na juda pekaduris pa tene un vida perfeitu, sin pekadu. Na fin di mil anu, tudu Tera na sedu un paraísu bonitu, i tudu jinti na vivi filis, pabia e na obdisi leis di Jeova. Dipus Jesus na torna renansa pa si Pape Jeova. Nomi di Deus na “rispitadu” o santifikadu, suma nunka i ciga di ojadu. (Mateus 6:9, 10) I na fika klaru di kuma Jeova i un bon Guvernanti ku ta preokupa ku jintis. Dipus Jeova na kaba ku Satanas ku si dimonius, i ku kualker algin ku disidi rebela kontra si guvernu. (Apokalipsi 20:7-10) Ki bon mudansas ku na fasidu pa Renu di Deus na fika pa sempri.

APRINDI MAS

Jubi pabia di ke ku manda no pudi fia di kuma Deus na usa si Renu pa kumpri tudu ke ku Biblia purmitinu pa futuru.

4. Renu di Deus na kaba ku guvernus di pekadur

“Omi ta manda riba di si kumpañer pa fasil mal.” (Eklesiastis 8:9) Atraves di si Renu, Jeova na kaba ku es injustisa.

Lei Daniel 2:44 ku 2 Tesalonisensis 1:6-8, dipus bo kombersa aserka des purguntas:

Ke ku Jeova ku si Fiju Jesus, na fasi ku tudu guvernus di pekadur ku kilis ku ta apoia elis?
Kuma ku kusas ku bu aprindi aserka di Jeova ku Jesus dau sertesa di kuma ke ke na fasi i bon i justu?

Jesus suma Rei na seu sta na manda na paraísu na Tera.

5. Jesus i minjor Rei

Suma Rei di Renu di Deus, Jesus na fasi manga di kusas pa juda kilis ku na vivi na Tera. Mostra VIDEO pa oja kuma ku Jesus mostra kuma i misti juda jintis, i Deus dal puder pa fasi kila.

VIDEO: Jesus Mostra ke ku Renu na Bin Fasi (1:13)

Ocal na Tera, Jesus mostra ke ku Renu na bin fasi. Kal bensons ku faladu del li ku bu mas misti tene na futuru? Lei testus di Biblia juntu ku bensons ku faladu del.

OCAL NA TERA, JESUS . . .	LA DI SEU, JESUS NA . . .
kontrola forsa di natureza. — Markus 4:36-41.	repara tudu stragus ku fasidu na Tera. — Isaias 35:1, 2.
i fasi milagri pa da manga di jinti di kume. — Mateus 14:17-21.	kaba ku fomi na mundu. — Salmu 72:16.
i kura manga di jinti ku sta duenti. — Lukas 18:35-43.	pui pa tudu jinti tene saudi perfeitu. — Isaias 33:24.
i lantanda kilis ku muri. — Lukas 8:49-55.	lantanda kilis ku muri i kaba ku mortu. — Apokalipsi 21:3, 4.

6. Renu di Deus na danu un futuru minjor

Renu na da jintis un futuru minjor ku Jeova sempri mistiba pa nos. No na pudi vivi pa sempri na paraísu na Tera. Mostra VIDEO pa jubi kuma ku Jeova sta na usa si Fiju Jesus, pa kumpri ke ki tarda mistiba pa nos.

VIDEO: Ideia di un Futuru Minjor (4:38)

Lei Salmu 145:16, dipus bo kombersa aserka des purgunta:

Kuma ku bu ta sinti di sibi di kuma Jeova na “fartanda diseẑu di tudu ku tene vida”?

ALGUNS JINTIS TA FALA: “Si no tarbaja juntu no pudi rosolvi purblemas di mundu.”

Kal purblemas ku Renu di Deus na kaba kel ku guvernus di pekadur ka pudi kaba kel?

RUSUMU

Renu di Deus na fasi ke ku Deus misti. I na torna tudu Tera na un paraísu ku na tene so bon jintis ku na adora Jeova pa sempri.

Rekapitulason

Kuma ku Renu di Deus na rispita o santifika nomi di Jeova?
Ke ku manda no pudi fia di kuma Renu di Deus na bin kumpri promesas ku faladu del na Biblia?
Na tudu bon kusas ku Renu di Deus na bin fasi, kal un delis ku bu na mas gostaba di oja?

No kaba es lison na dia:

Tenta fasi es

Usa tratadu Ke ki Renu di Deus? pa kumsa un kombersa.

Utru kusa ku bu pudi fasi:

Utru kusa ku bu pudi fasi