Sera ki N dibi di para kurinti karu?

Sera ki bu sta na mesmu situason? Si sedu asin, ke ku pudi judau disidi si bu dibi di kontinua kurinti karu?

Na sertus tera, jintis di idadi ku misti renova se karta di konduson, dibi di tene pirmison di un mediku pa kontinua kurinti karu. Kristons ku mora nes teras ta obdisi es lei. (Rom 13:1) Ma i ka mporta nunde ku bu mora, bu dibi di jubi bu situason pa sibi si kontra bu pudi kurinti inda karu ku suguransa.

JUBI DIRITU BU MANERA DI KURINTI KARU

Suma ku Institutu Nasional di Jintis di Idadi na Stadus Unidu fala na se site, bu pudi kumsa ku fasi es purguntas:

• Sera ki i difisil pa N ntindi plakas di sinalizason o i difisil pa N oja di noti?

• Sera ki i ta difisil pa N muvimenta tok N ka ta pudi vira kabesa rapidu pa jubi speliu i jubi karu, o algun kusa ku na bin na skerda ku direita?

• Sera ki i ta difisil pa N reaẑi rapidu, suma tira pe na seleradur i pul na travon?

• Sera ki N ta kurinti karu lentu dimas, i kila ta pui pa i ten engarafamentu na strada?

• Sera ki i ka tarda ku N tene alguns asidenti o ña karu tene markas pabia N maja kusas?

• Sera ki polisia paran pabia di ña manera di kurinti karu?

• Sera ki N ciga di jungu nkuantu N na kurinti karu?

• Sera ki N ta toma alguns medikamentu ku pudi afeta manera ku N ta kurinti karu?

• Sera ki membrus di ña familia o amigus falan di kuma e preokupa ku manera ku N ta kurinti karu?

Si bu ruspundi sin pa un o dus des purguntas, talves bu pirsisa di fasi alguns mudansas. Pur isemplu, bu pudi rapati kurinti karu, prinsipalmenti di noti. Kontinua jubi bu kabesa pa sibi si kontra bu ta kurinti karu diritu. Bu pudi punta un membru di familia o un amigu pa i kontau ke ki pensa aserka di manera ku bu ta kurinti karu. Bu pudi tambi ripiti fasi alguns lisons na manera di kurinti karu, pa sibi kuma ku bu pudi kurinti karu ku suguransa. Ma si bu ruspundi sin pa mas di ki dus des purguntas ku sta riba, talves i minjor pa bu para kurinti karu.a

KUMA KU PRINSIPIUS DI BIBLIA PUDI JUDAU TOMA BON DISISON

I pudi sedu difisil nota di kuma bu ka ta kurinti karu diritu suma antis. Ideia di kuma bu ka pudi kurinti karu, pudi sedu difisil pensa nel o papia aserka del. Pa kila, kuma ku Biblia pudi judau pensa diritu i toma bon disison? No jubi dus prinsipius di Biblia.

Kontinua rikuñisi bu limiti. (Dit 11:2) Ora ku idadi sta na bai, no uju, no oreja, no muskulus ku manera ku no ta reaẑi ta torna fraku. Pur isemplu, maioria di jintis ta para juga sertu jugus ora ki idadi sta na bai, pabia e ta nota di kuma i mas fasil pa e molostra. Mesmu prinsipiu pudi aplikadu na manera di kurinti karu. Un algin ku kunsi si limiti na para kurinti karu ora ki ka sedu ja mas suguru pa i fasil. (Dit 22:3) Tambi, un algin ku kunsi si limiti ta sta dispostu pa sukuta utrus ku ta preokupa ku el. — Komparal ku 2 Samuel 21:​15-17.

Ivita tene kulpa di sangi. (Lei 22:8) Si un algin ka ta kurinti karu ku suguransa i pudi molostra utrus o mata elis. Un algin ku kontinua kurinti karu, ora ki ka sedu ja mas bon kondutor, pudi muri na asidenti o pui pa utrus muri. I pudi te mesmu tene kulpa pa manera ki pui pa un algin muri.

Ka bu pensa di kuma utrus ka na rispitau mas si bu para kurinti karu. Jeova amau, i ta kontenti ora ku bu rikuñisi bu limiti, sedu umildi i pensa na suguransa di utrus. Tambi i purmiti judau i animau. (Isa 46:4) Nunka i ka na ciga di bandonau. Pa kila, pidil pa i judau usa jiresa i sigi bon konsijus di Biblia, ora ku bu na disidi si bu dibi di para kurinti karu.