Ajuda pa minjeris ku maltratadu

Es i palabras ku sta na kumsada di artigu “As mulheres e a sua segurança – O que diz a Bíblia” ku sta na site jw.org. Na fin di ki artigu, i tene un link ku ta pirmitiu baŝa un PDF ku pudi mprimidu i dobradu na un tratadu di kuatru paẑina. Un irma na Stadus Unidu comadu Stacy fala sin: “N mprimi es tratadu manga del, i ami ku un irma no lebal pa un kau na no tiritoriu nunde ke ta kuida di minjeris ku ta sufri maltratu.”

Un algin ku ta tarbaja la pidi mas tratadus pa i pudi da minjeris ku sta la. Suma rusultadu, i ntregadu la mas di 40 tratadu, juntu ku 30 karton di visita jw.org. Na un visita mas tardi, minjer ki responsavel di ki kau, pidi pa irmas mostra minjeris kuma ku studu di Biblia ta fasidu.

Stacy ku dus utrus irmas konsigi mesmu rusultadu na un utru kau ku ta kuida di minjeris ku ta sufri maltratu. E ntrega 5 tratadu i kilis ku ta tarbaja la, pidi pa e buri elis mas utrus. Un minjer ku ta tarbaja la fala sin: “Es tratadu na juda minjeris ku sta li.” I torna fala mas: “No pirsisa des.” Na un utru visita mas tardi, manga di minjeris ku sta na ki kau, junta pa oja kuma ku studu di Biblia ta fasidu, i dus delis fala e misti mati prosimu runion di fin di semana na Salon di Renu.

Stacy fala sin: “No fika dimiradu manera ku jintis risibi es artigu bonitu. Ora ku es artigu mprimidu i dobradu, i ta fika bonitu, i un bon manera di konta bon noba di Renu pa minjeris ku ta sufri maltratu. No fika tokadu manera ke reaẑi ben, i no ten di presa pa oja kuma ku Jeova na bensua no sforsu nkuantu no na kontinua konta elis bon noba.