2 Reyes
14 Israelmanta rey Jehoacazpa wawan Jehoás+ iskay watataña kamachishajtin, Judá nacionpi Amasías kamachiyta qallarerqa, payqa Judamanta rey Jehoaspa wawan karqa. 2 Amasiasqa 25 watasniyoj karqa kamachiyta qallarishajtin. Jerusalenpitaj 29 watasta rey jina kamacherqa. Mamanqa Jehoadín sutikorqa, Jerusalén llajtamantataj karqa.+ 3 Amasiasqa Jehová Diospa qhawayninpi allin imasta ruwarqa, jinapis mana ñaupa tatan David jinapunichu.+ Amasiasqa tukuy imata tatan Jehoás jinallataj ruwarqa.+ 4 Jinapis waj diosesta yupaychanapaj pata lugaresqa kakushallarqapuni,+ runaspis chay pata lugarespi jaywanasta ruphachispa qʼoshñichishallarqankupuni.+ 5 Amasiasqa tukuynin nación makinpiña kashajtin, pikunachus tatanta wañucherqanku chay kamachisninta wañucherqa.+ 6 Tatanta wañucherqanku chay runaspa wawasninkutataj mana wañucherqachu. Chayqa karqa Jehová Dios kamachisqanman jina, Moisespa Leyninpa libronpi nisqanman jina. Chaypi nin: “Tatasqa mana wañuchisqachu kanqanku wawasninkoj juchasninkurayku. Wawaspis mana wañuchisqachu kanqanku tatasninkoj juchasninkurayku. Sapa ujpis juchanrayku wañunan tiyan”,+ nispa. 7 Amasiasqa edomitasta+ wañuracherqa Kachi mayupi,+ chunka waranqa runastapuni. Chay guerrapitaj Sela llajtata japʼikaporqa,+ chantá chay llajtaman Jocteel sutita churarqa, kunankamataj chay sutiyoj kashan.
8 Chantá Amasiasqa runasta kacharqa Israelpa reynin Jehoasman. Jehoasqa Jehoacazpa wawan karqa, Jehoacaztaj Jehuj wawan karqa. Amasiasqa kay jinata Jehoasman nicherqa: “Jamuy, guerrapi tinkusunchej”,+ nispa. 9 Israelmanta rey Jehoastaj, Judamanta rey Amasiasman kay jinata nichillarqataj: “Khishkarara qhoraqa Libanomanta cedro sachʼaman nichisqa: ‘Warmi wawaykita qhari wawayman entregapuy warmin kananpaj’, nispa. Jinapis Libanomanta uj monte animal jamuspa chay khishkarara qhorata qʼalata sarorqosqa. 10 Edomtaqa+ atiparqankipuni, chayrayku qanqa runaykachashanki. Chay atipasqaykimanta kusikuspa wasillaykipi* kakuy. ¿Ima kajtataj desgraciata maskʼakushanki? Atipachikojtiykeqa Judá nacionnintinta ñakʼarichinki”, nispa. 11 Amasiastaj mana kasuta ruwarqachu.+
Chayrayku Israelmanta rey Jehoasqa maqanakoj wicharerqa Judamanta rey Amasiaswan. Paykunaqa guerrapi tinkorqanku Bet-Semes+ llajtapi, chaytaj kashan Judá nacionpa japʼiyninpi.+ 12 Israeltaj Judá nacionta atiparqa, Judamanta soldadostaj wasisninkuman ayqekorqanku. 13 Israelmanta rey Jehoasqa Judamanta rey Amasiasta presota japʼerqa Bet-Semes llajtapi. Amasiasqa Jehoaspa wawan karqa, Jehoastaj Ocoziaspa wawan karqa. Jehoasqa Amasiasta Jerusalenman apamorqa, chantá Jerusalenpa perqanta 178 metrosta* urmacherqa Efraín Punkumantapacha+ Esquina Punkukama.+ 14 Chantá Jehoasqa Jehová Diospa wasinmanta, jinallataj reypa wasinmanta apakaporqa tukuynin qorita, tukuynin qolqe metalta, tukuy imastawan, presostapis. Chay tukuy imas aparisqataj Samariaman riporqa.
15 Jehoaspa tukuy kausayninmanta, imastachus ruwasqanmanta, sumaj atiyniyoj kasqanmanta, imaynatachus Judamanta rey Amasiaswan guerrapi tinkusqanmantapis qhelqasqa kashan Israelpa reyesninmanta parlaj libropi. 16 Chantá Jehoasqa ñaupa tatasnin jina wañuporqa, Samariapitaj pʼampakorqa,+ maypichus Israelpa ñaupa reyesnin pʼampasqa kasharqanku chaypi. Wawan Jeroboantaj*+ paypa cuentanmanta rey jina kamachiyta qallarerqa.
17 Israelmanta rey Jehoacazpa+ wawan Jehoás+ wañupusqanmanta, Judamanta rey Jehoaspa wawan Amasiasqa+ 15 watastaraj kausarqa. 18 Amasiaspa tukuy kausayninmantaqa qhelqasqa kashan Judajpa reyesninmanta parlaj libropi. 19 Aswan qhepamantaj Jerusalenpi runasqa Amasiasta wañuchinankupaj yachachinakorqanku,+ paytaj Lakís llajtaman ayqekorqa. Chay yachachinakojkunataj Lakís llajtaman paypa qhepanta runasta kachallarqankutaj, chaypitaj Amasiasta wañucherqanku. 20 Chantá caballopi Jerusalenman apakaporqanku, chaypitaj ñaupa tatasnintawan khuska pʼamparqanku Davidpa Llajtanpi.+ 21 Chantá Judamanta tukuy runasqa Azariasta*+ churarqanku reyninku kananpaj, tatan Amasiaspa cuentanmanta.+ Chaypacha Azariasqa 16 watasniyoj kasharqa.+ 22 Azariasqa Elat+ llajtata Judapaj qhechukapuytawan watejmanta sayaricherqa. Payqa chayta ruwarqa tatan Amasías ñaupa tatasnin jina wañupusqanmantaña.+
23 Judamanta rey Jehoaspa wawan Amasías 15 watastaña kamachishajtin, Israelmanta rey Jehoaspa wawan Jeroboanqa+ Samariapi rey jina kamachiyta qallarerqa. Jeroboanqa 41 watasta kamacherqa. 24 Jeroboanqa Jehová Diospa qhawayninpi sajra imasta ruwallarqapuni. Ima juchastachus Nebatpa wawan Jeroboán israelitasta ruwacherqa, chay juchasllatataj paypis ruwarqa.+ 25 Jeroboanqa Israelpa lindesninta* watejmanta churarqa Lebo-Hamatmantapacha,*+ Arabá qochakama.*+ Chayqa karqa Israelpa Diosnin Jehová, kamachin Jonasnejta+ nisqanman jina. Jonasqa Gat-Hefermanta+ profeta karqa, Amitaijpa wawan. 26 Jehová Diosqa rikorqa israelitas manchaytapuni ñakʼarishasqankuta.+ Israelitastaqa ni pi yanaparej karqachu, ni pisi kallpayoj runaspis ni wajchaspis. 27 Jehová Diosqa nerqaña Israelpa sutinta mana kay jallpʼamanta chinkachinanta.+ Chayrayku Jehoaspa wawan Jeroboannejta israelitasta salvarqa.+
28 Jeroboanpa tukuy kausayninmanta, tukuy ima ruwasqanmanta, sumaj atiyniyoj kasqanmanta, guerraspi tinkusqanmanta, imaynatachus Damascotawan+ Hamattawan+ Judaman, Israelman kutichipusqanmantapis qhelqasqa kashan Israelpa reyesninmanta parlaj libropi. 29 Chantá Jeroboanqa ñaupa tatasnin jina wañupullarqataj, Israelpa ñaupa reyesnin jina. Wawan Zacariastaj+ paypa cuentanmanta rey jina kamachiyta qallarerqa.