2 Reyes
16 Remaliaspa wawan Pécah 17 watastaña kamachishajtin, Judamanta rey Jotanpa wawan Ajaz*+ rey jina kamachiyta qallarerqa. 2 Ajazqa kamachiyta qallarishajtin 20 watasniyoj karqa, Jerusalenpitaj 16 watasta kamacherqa. Ajazqa Jehová Diosninpa qhawayninpi sajra imasta ruwarqa, manataj ñaupa tatan David jinachu ruwarqa.+ 3 Ajaz David jina ruwananmantaqa Israelpa reyesninpa chakinta qhaterqa,+ qhari wawantapis ninapi ruphaykucherqa.*+ Chaytaqa ruwarqa waj nacionespa millay costumbresninkuman jina,+ Jehová Diosqa chay nacionesta israelitaspa ñaupaqenkumanta qharqojtinñapis. 4 Ajazqa pata lugarespi, lomaspi, tukuynin ramarara sachʼa uraspipis+ waj diosespaj jaywanasta ruphachispa qʼoshñichej.+
5 Chaypacha Siriaj reynin Rezinwan, Remaliaspa wawan Israelpa reynin Pecahwan Jerusalenman wicharerqanku Ajazwan guerrapi tinkunankupaj.+ Paykunaqa soldadosninkuwan Jerusalén llajtata muyuykorqanku, nitaj atipayta aterqankuchu. 6 Chaypacha Siriaj reynin Rezinqa Edom nacionman Elat+ llajtata kutichiporqa. Chantá Elat llajtamanta judiosta* qharqorqa. Edomitastaj Elat llajtaman yaykuporqanku, kunankamataj chaypi tiyakushanku. 7 Chayrayku Ajazqa runasta kacharqa Asiriamanta rey Tiglat-Pileserman+ kayta ninankupaj: “Noqaqa kamachiyki kani, wawayki kani. Jamuspa salvaway ari, Siriaj reyninmanta, Israelpa reyninmantawan. Paykunaqa noqawan maqanakoj jamunku”, nispa. 8 Chantá Ajazqa qolqe metalta, qoritawan orqhorqa Jehová Diospa wasinmanta, reypa wasinpi* jallchʼasqa kasharqa chaytawan, chaytataj Asiriaj reyninman apacherqa llukʼiykunanpaj.*+ 9 Asiriaj reynintaj Ajazpa mañakusqanta ruwarqa, rispa Damasco llajtata japʼikanporqa, chay llajtapi tiyakojkunatataj Quir+ jallpʼasman presosta apacherqa, rey Rezintapis wañucherqa.+
10 Chantá rey Ajazqa Asiriaj reynin Tiglat-Pileserta watukoj rerqa Damasco llajtaman. Damascopitaj rey Ajazqa uj altarta rikusqa, chantá sacerdote Uriyaman uj planota apachimusqa. Chay planopitaj dibujasqa kasharqa imaynachus chay altar ruwasqa kasqanta.+ 11 Sacerdote Uriyataj+ altarta ruwarqa+ rey Ajaz Damasco llajtamantapacha kamachimusqanman jina. Niraj rey Ajaz Damascomanta kutimushantintaj sacerdote Uriyaqa chay altarta ruwayta tukucharqaña. 12 Rey Ajazqa Damascomanta chayamuspa chay altarta ruwasqata rikorqa, qayllaykuspataj chay altar patapi jaywanasta jaywarqa.+ 13 Payqa chay altarpi qʼoshñichillarqapuni qʼolachina* ofrendasninta, chʼaki mikhuy ofrendasnintapis. Chantapis chay altarman jichʼaykorqa vino ofrendasninta, chʼajchuykorqataj khuska mikhurikuy ofrendasninpa yawarninta. 14 Chantá Jehová Diospa ñaupaqenpi kasharqa chay cobre altarta+ temploj ñaupaqenmanta waj ladoman oqharicherqa. Chay cobre altarqa chaupipi kasharqa, ujnin ladonpi kasharqa Jehová Diospa templon, ujnin ladonpitaj Ajazpa ruwachisqan altar. Ajazqa chay cobre altarta oqharichispa chay ruwachisqan altarpa norte ladonman* churacherqa. 15 Chantá rey Ajazqa sacerdote Uriyata+ kayta kamacherqa: “Jatun altarpeqa qʼoshñichinki tutamanta ruphachina ofrendata,+ tarde ladota jaywana chʼaki mikhuy ofrendata,+ reypa qʼolachina ofrendanta, chʼaki mikhuy ofrendantawan. Chay jatun altarpi qʼoshñichillankitaj tukuy runaspa qʼolachina ofrendasninkuta, chʼaki mikhuy ofrendasninkuta, vino ofrendasninkutawan. Chantá chʼajchuykunki tukuy qʼolachina ofrendaspa yawarninkuta, chay waj jaywanaspa yawarninkutapis. Chantá qhawarisajña imatachus chay cobre altarwan ruwanayta”, nispa. 16 Sacerdote Uriyataj rey Ajazpa tukuy ima kamachisqanta ruwarqa.+
17 Chantapis rey Ajazqa carrospa ladosninmanta planchonesta* tʼunata kʼuturacherqa,+ patankupi kasharqa chay fuentestapis+ orqhoracherqa. Chantá cobre toros patapi karqa chay jatun wirkhitapis*+ uraykuchispa rumi pampaman churacherqa.+ 18 Chantá Ajazqa oqharicherqa Jehová Diospa wasinpi samarikuna pʼunchaypaj ruwarqanku chay corredorta. Orqhorqataj Diospa wasinman reyespa yaykunanku punkuta. Ajazqa chayta ruwarqa Asiriaj reyninta manchachikusqanrayku.
19 Ajazpa tukuy kausayninmanta, imatachus ruwasqanmantapis qhelqasqa kashan Judajpa reyesninmanta parlaj libropi.+ 20 Chantá Ajazqa ñaupa tatasnin jina wañuporqa, pʼampakorqataj maypichus ñaupa tatasnin pʼampasqa kasharqanku chaypi, Davidpa Llajtanpi. Wawan Ezequiastaj*+ paypa cuentanmanta rey jina kamachiyta qallarerqa.