2 Reyes
2 Jehová Dios Eliasta+ cieloman muyoj wayrapi apakapunanpaj tiempoña kashajtin,+ Eliaswan Eliseowanqa+ Guilgalmanta+ llojserqanku. 2 Eliastaj Eliseota nerqa: “Ama jina kaspa kayllapi quedakuy. Jehová Diosqa Betelman kachashawan”, nispa. Eliseotaj nerqa: “Kausaj Jehová Diospa sutinpi jurani, jinallataj qanpa kausayniykirayku jurani, noqaqa manapuni sapaykita rejta saqesqaykichu”, nispa. Chantá iskayninku Betelman+ uraykorqanku. 3 Betelpi kasharqanku chay profetaspa* wawasnintaj* llojsimuspa Eliseota nerqanku: “Jehová Diosqa kunan pʼunchay patronniykita apakaponqa, payqa niña yachachejniykichu kanqa. ¿Yacharqankichu?”,+ nispa. Eliseotaj paykunata nerqa: “Arí, yacharqaniña. Ama chaymanta parlaychejchu”, nispa.
4 Eliastaj Eliseota nerqa: “Eliseo, ama jina kaspa kayllapi quedakuy. Jehová Diosqa Jericoman+ kachashawan”, nispa. Eliseotaj nerqa: “Kausaj Jehová Diospa sutinpi jurani, jinallataj qanpa kausayniykirayku jurani, noqaqa manapuni sapaykita rejta saqesqaykichu”, nispa. Chantá iskayninku Jericoman rerqanku. 5 Jericopi karqanku chay profetaspa wawasninkutaj Eliseoman chimpaykuspa nerqanku: “Jehová Diosqa kunan pʼunchay patronniykita apakaponqa, payqa niña yachachejniykichu kanqa. ¿Yacharqankichu?”, nispa. Eliseotaj paykunata nerqa: “Arí, yacharqaniña. Ama chaymanta parlaychejchu”, nispa.
6 Eliastaj Eliseota nerqa: “Ama jina kaspa kayllapi quedakuy. Jehová Diosqa Jordán mayuman kachashawan”, nispa. Eliseotaj nerqa: “Kausaj Jehová Diospa sutinpi jurani, jinallataj qanpa kausayniykirayku jurani, noqaqa manapuni sapaykita rejta saqesqaykichu”, nispa. Ajinamanta iskayninku rillarqankupuni. 7 Profetaspa wawasninkumantapis 50 profetas rillarqankutaj, chay profetasqa karullapi sayaykuspa Eliasta, Eliseotawan qhawasharqanku, Eliaswan Eliseowantaj Jordán mayu kantupi sayasharqanku. 8 Chantá Eliasqa profeta ropanta+ maytʼuykuspa chaywan yakuta wajtarqa, mayumanta yakutaj iskayman khallakorqa lloqʼe ladoman paña ladoman. Iskayninkutaj chʼaki pampanta mayuta pasarqanku.+
9 Mayuta pasasqankutawan Eliasqa Eliseota nerqa: “Niraj ladoykimanta apasqa kashajtiy, imatachus qanpaj ruwanayta munanki chayta mañakuway”, nispa. Eliseotaj nerqa: “Dios qosunki chay espiritumanta+ iskay jinasta japʼiyta munani,+ ¿atikunmanchu?”, nispa. 10 Eliastaj kuticherqa: “Chay mañakuwasqaykeqa mana atikunanpaj jinachu. Ladoykimanta apasqa kashajtiy rikuwanki chayqa, chay mañakuwasqaykita japʼinki, mana rikuwankichu chaytaj mana japʼinkichu”, nispa.
11 Parlan parlan rishajtinkutaj ujllata uj laurarishaj carreta, laurarishaj caballosniyoj+ paykunata tʼaqarparqa. Ajinapi Eliasqa muyoj wayrapi cieloman oqharisqa karqa.+ 12 Eliseotaj chayta rikuspa qhaparerqa: “Tatáy, tatáy. Israelpa carretan, caballospi purej soldadosnin”,+ nispa. Eliasta niña rikuspataj ropasninta iskayman llikʼikorqa.+ 13 Chantá Eliseoqa Eliaspa tʼakasqan profeta ropanta+ oqharerqa. Jordán mayu kantuman kutispataj chaypi sayarqa. 14 Chantá Eliseoqa Eliaspa tʼakakusqan profeta ropanta japʼispa yakuta wajtarqa, nerqataj: “¿Maypitaj kashan Eliaspa Diosnin Jehová?”, nispa. Yakuta wajtasqantawantaj mayu yakusqa iskayman khallakorqa lloqʼe ladoman paña ladoman, Eliseotaj chayninta mayuta pasarqa.+
15 Jericomanta profetaspa wawasnintaj karullamanta payta qhawamusharqanku nerqankutaj: “Diospa espiritonqa Eliaspi kasharqa, kunanqa Eliseopiñataj kashan”,+ nispa. Chantá Eliseota taripamuytawan ñaupaqenpi pampakama kʼumuykukorqanku. 16 Chantá Eliseota nerqanku: “Kaypi kashanku kamachisniykiwan khuska 50 wapu runas. Paykuna patronniykita maskʼamuchunku ari. Ichapis Jehová Diospa espiritonqa* payta oqharispa uj orqoman wijchʼuykamun chayri wayqʼoman wijchʼuykamun”,+ nispa. Eliseotaj nerqa: “Ama kachaychejchu”, nispa. 17 Paykunataj kachaytapuni munaspa sigue chayta nisharqanku Eliseota saykʼuchinankukama, Eliseotaj paykunata nerqa: “Yapis, kachaychej ari”, nispa. Paykunataj 50 runasta kacharqanku, Eliastaqa kinsa pʼunchay juntʼatapuni maskʼamorqanku, nitaj tarerqankuchu. 18 Chay runas Eliseojpaman kutimojtinkutaj, payqa Jericó llajtapi kasharqa.+ Eliseotaj paykunata nerqa: “¿Nichu nerqaykichej ama rinaykichejta?”, nispa.
19 Chaymantataj Jericó llajtamanta runasqa Eliseota nerqanku: “Señorníy, rikunki jina llajtaqa allin lugarpi kashan,+ jinapis yakoqa mana allinchu, jallpʼapis mana poqonchu”,* nispa. 20 Eliseotaj paykunata nerqa: “Uj mosoj pʼuku platituman kachita churaykuspa apamuwaychej”, nispa. Paykunataj chay nisqanta apamorqanku. 21 Chantá Eliseoqa yaku llojsimusharqa chayman riytawan chayman kachita tʼakaykorqa,+ nerqataj: “Jehová Diosqa kayta nin: ‘Noqa kay yakuta jampiniña. Niña pitapis wañuchenqachu, nitaj warmistapis mana wawata rejsejman tukuchenqachu’,* nispa”. 22 Yakutaj kunankama jampisqa kashan, Eliseo nisqanman jina.
23 Chantá Eliseoqa Betelman wicharerqa. Ñanta rishajtintaj wakin wawas llajtamanta llojsimorqanku, chay wawastaj Eliseota asipayaspa+ nerqanku: “Pʼajla, wicharimuy. Pʼajla, wicharimuy”, nispa. 24 Chaymanta Eliseoqa kutirikuspa chay wawasta qhawarerqa, Jehová Diospa sutinpitaj paykunata maldicerqa. Chantá montemanta iskay china jukumaris+ llojsimuspa 42 wawastapuni mithararqanku.*+ 25 Chaymantataj Eliseoqa rillarqapuni Carmelo orqoman+ chayanankama, chantá Samariaman kutirerqa.