2 Reyes
5 Siriamanta reypa soldadosninpa comandantenqa Naamán karqa. Naamanqa respetasqa runa karqa. Jehová Diostaj paynejta siriosta yanaparqa enemigosninkuta atipanankupaj, chayrayku reyqa Naamanta munakoj. Naamanqa wapu soldado kaspapis lepra onqoyniyoj karqa. 2 Uj kuti Siriamanta soldadosqa Israel nacionman maqanakoj yaykorqanku, chaypachataj uj imillitata apakaporqanku. Ajinapi chay imillitaqa Naamanpa warminpa kamachin karqa. 3 Imillitaqa patronanta nerqa: “Patronneyqa Samariallamanpis rinman Diospa profetanta waturikoj.+ Chay profetaqa lepra onqoyninmanta sanoyachinman”,+ nispa. 4 Chayrayku reyman willamorqanku imatachus Israelmanta imillita nisqanta.
5 Siria nacionmanta reytaj Naamanta nerqa: “Kunanpacha riy. Noqa uj cartata apachisaj Israelpa reyninman”, nispa. Naamantaj rerqa, aparqataj 342 kilos* qolqe metalta, 6.000 siclos qorita, chunka mosoj pʼachastawan completosta. 6 Payqa chay cartata Israelpa reyninman jaywarqa, chay cartapitaj nisharqa: “Kay cartatawan khuska kamachiy Naamanta kachamushayki, lepra onqoyninmanta sanoyachinaykipaj”, nispa. 7 Israelpa reynintaj chay cartata leeytawan ropasninta llikʼirakuspa nerqa: “¿Noqaqa Dioschu kasqani pitapis wañuchinaypaj chayri kausachinaypaj?+ Chay reyqa kay runata kachamuwasqa lepra onqoyninmanta sanoyachinayta nispa. Qankuna reparaychej, paypuni noqawan maqanakuyta munashan”, nispa.
8 Cheqa Diospa* kamachin Eliseotaj uyarerqa Israelpa reynin ropasninta llikʼirakusqanta, chay ratopachataj reyman nicherqa: “¿Imajtintaj ropasniykita llikʼirakunki? Ama jina kaspa chay runata noqaman kachamuway, allinta yachananpaj Israelpi uj profeta kasqanta”,+ nispa. 9 Chayrayku Naamanqa jamorqa tukuynin caballosninwan, tukuynin maqanakuna carretasninwan, sayaykorqataj Eliseoj wasi punkunpi. 10 Eliseotaj ujnin kamachinwan Naamanta nicherqa: “Jordán mayuman+ rispa qanchis kutita bañakamuy,+ chantá aychayki sanoyaponqa, llimphutaj kanki”, nispa. 11 Naamantaj mayta rabiakorqa, kay jinata rimaspataj ripusharqa: “Noqaqa nisharqani: ‘Diospa profetanqa llojsimuspa ñaupaqeypi sayaykonqa, Jehová Diosninpa sutinta oqharispataj makinta nanasqasniy patapi kuyuchenqa sanoyachinanpaj’, nispa. 12 ¿Nichu Damascopi+ Abaná mayupis, Farpar mayupis aswan sumaj kanku Israelpa tukuynin mayusninmanta nisqaqa? ¿Nichu chay sumaj mayuspi bañakamuspa sanoyapuyman?”, nispa. Ajinata payqa rabiasqa kutipusharqa.
13 Naamanpa kamachisnintaj payman qayllaykuspa nerqanku: “Tatáy, sichus profetaqa mana ruway atinata ruwanaykita nisunkiman karqa chayqa, ¿nichu chaytaqa ruwallawaj karqa? Paytajrí ‘bañakamuy, sanoyapunki’ nishallasunki, ¿nichu chaytaqa ruwayta atillawaj?”, nispa. 14 Chayrayku Naamanqa uraykuspa qanchis kutita Jordán mayuman yaykorqa,* cheqa Diospa kamachin nisqanman jina.+ Aycha qarantaj wawaj aychanman jina kuterqa,+ llimphutaj karqa.+
15 Chantá Naamanqa cheqa Diospa kamachinpaman kuterqa,+ tukuynin soldadosninwan khuska. Eliseoj ñaupaqenman sayaykuspataj nerqa: “Kunanqa sutʼita yachani tukuynin jallpʼantinpi mana Dios kanchu, Israelllapi Diosqa tiyan.+ Kunanqa kay kamachiykimanta regalota japʼikullay ari”, nispa. 16 Eliseotaj nerqa: “Kausaj Jehová Diospa sutinpi jurani, payta noqaqa sirvini,* mana chay regalota japʼikusqaykichu”,+ nispa. Naamantaj jaywaytapuni munarqa, Eliseotajrí manapuni japʼikorqachu. 17 Chantá Naamanqa nerqa: “Mana japʼikuyta munanki chayqa, ama jina kaspa kay kamachiykeqa jallpʼata apakuchun kay lugarmanta iskay mulaspi. Kay kamachiykeqa niña waj diosesman jaywanqachu qʼolachina* ofrendasta nitaj ima jaywanatapis, Jehová Diosllamanña jaywanqa. 18 Jehová Diosqa kay kamachiykita perdonachun kayta ruwajtin: Señorniy reyqa Rimonpa templonman yaykuspa chaypi kʼumuykukuyta yachan, kʼumuykukuspataj makiymanta japʼikun, ajinapi noqapis Rimonpa templonpi kʼumuykukullanitaj. Rimonpa templonman kʼumuykukoj yaykojtiy, Jehová Diosqa perdonallachun ari kay kamachiykita”, nispa. 19 Eliseotaj nerqa: “Allillanta rerqapuy”, nispa. Naamantaj riporqa. Karutaña rishajtintaj 20 cheqa Diospa+ kamachinpata kamachin Guehaziqa+ sonqonpi nerqa: “Patronneyqa Siria llajtayoj Naamanta+ kachapun ni ima apamusqanta japʼikuspalla. Kausaj Jehová Diospa sutinpi jurani, noqaqa qhepanta kachaykukusaj imallatapis qochikunaypaj”, nispa. 21 Chantá Guehaziqa Naamanpa qhepanta kachaykukorqa. Naamantaj paypa qhepanta uj runa corremushasqanta rikuspa, carretanmanta uraykuspa taripamorqa, nerqataj: “¿Allillanchu tukuy imapis?”, nispa. 22 Guehazitaj nerqa: “Arí, tukuy imapis allillan. Patronniy kachamuwan kay jinata nispa: ‘Kunitallan profetaspa wawasninkumanta iskay jóvenes chayamunku, Efraín orqos chaynejmanta. Ama jina kaspa paykunaman jayway 34 kilos* qolqe metalta, iskay mosoj ropastawan completosta’,+ nispa”. 23 Naamantaj nerqa: “68 kilosta* apay”, nispa. Naamanqa apachiytapuni munarqa,+ chayrayku 68 kilos qolqe metalta iskay costalasman churaykaporqa, iskay mosoj ropastawan completosta. Chaytataj iskay kamachisninman jaywarqa, paykunataj Guehazij ñaupaqenta aparqanku.
24 Ofelman* chayajtintaj Guehaziqa chay costalasta chay kamachismanta qochikorqa, wasimantaj apaykorqa. Chantá chay runasta kachaporqa. Ripusqankutawan 25 Guehaziqa patronninpaman yaykorqa, ladonpitaj sayaykorqa. Eliseotaj taporqa: “Guehazí, ¿maymantá jamushanki?”, nispa. Paytaj nerqa: “Kay kamachiykeqa manapuni maymanpis rinchu”,+ nispa. 26 Eliseotajrí nerqa: “¿Nishankichu mana yachasqayta Naamanpa qhepanta risqaykita, carretanmanta uraykuspa qanwan parlasqantapis? ¿Kay tiempopi allillanchu kashan japʼikunaqa qolqe metalta, ropasta, olivo huertasta, uva huertasta, ovejasta, wakasta, qhari kamachista, warmi kamachistapis?*+ 27 Kunanqa Naamanpa lepra onqoynin+ qanman chimpaykusonqa, mirayniykimanpis wiñaypaj wiñaynintinpaj”, nispa. Chay ratopachataj Guehaziqa Eliseoj ñaupaqenmanta llojserqa lepra onqoywan juntʼa, yurajlla kasharqa ritʼi jinapuni.+